मकवानपुर । त्रिवि क्रिकेट मैदान काठमाडाैंमा जारी त्रिकोणात्मक टी–२० क्रिकेटको उपाधि नेपालले जितेको छ । सोमबार भएको फाइनलमा नेपालले पपुवा न्यूगिनी (पीएनजी) लाई ५० रनले पराजित गर्दै टी–२० क्रिकेट सिरिजको उपाधि जितेको हो ।
टस हारेर पहिले ब्याटिङ गरेको नेपालले निर्धारित २० ओभरमा ६ विकेट गुमाएर १ सय ६८ रन जोडेको थियो । जितका लागि १ सय ६९ रनको लक्ष्य पछ्याउने क्रममा पीएनजी १६ ओभर १ बलमा अलआउट हुदै १ सय १८ रनमा सिमित भएपछि फाइनल नेपालले जितेको हो ।
नेपालका लागि दिपेन्द्र सिंह ऐरीले सर्वाधिक ४ विकेट लिदै ५४ रन बनाए । खेलमा करण केसीले ३ विकेट लिए । केसीले १२ बलमा अविजित ३३ रन बनाए । र कप्तान सन्दीप लामिछाने २ विकेट लिए। ऐरी यो समेत पाँचौ अर्धशतक हो । उनी नेपालका लागि टी–ट्वान्टी अन्तर्राष्ट्रियमा १ हजार रन पुरा गर्ने पहिलो खेलाडी समेत बनेका छन् । ओपनर आशिफ शेखले २९ र कुशल भुर्तेलले २५ रन जोडे । आरिफ शेख र दिलिप नाथ शून्य रनमै आउट भए । आदिलले १५ रन जोडे ।
पीएनजीका सेमो कामेयाले एकै ओभरमा ३ विकेट लिएका थिए । उनले ११ औं ओभरमा आशिफ, आरिफ र दिलिप नाथको विकेट हात पारेका थिए । चाड सोपर, काबुआ मोरिया र रिले हेकुरेले एक–एक विकेट लिए । पीएनजीका लागि सेसे बाउले सर्वाधिक ५९ रन जोडे ।
मकवानपुर। कांग्रेस हेटौंडा नगरको वृहत नगर भेला साेमबार भएको छ। आसन्न स्थानीय तह निर्वाचनकाे सन्दर्भमा ‘घर घर जाऔ कांग्रेस जिताऔ’ अभियान अन्तर्गत वृहत हेटौंडा नगर भेलाको आयोजना गरिएको हो।
नगर भेलाका प्रमुख अतिथि कांग्रेस सह महामन्त्री महालक्ष्मी उपाध्याय डिनाले स्थानीय तहकाे निर्वाचनमा गठबन्धन आवश्यकता रहेको तर व्यवस्थित गरेर जानु पर्ने बताइन। पार्टी सभापति शेरबहादुर देउवाले गठबन्धन लाद्न नखोजेको तर व्यवस्थित गर्नु पर्नेमा चितिन्ति रहेको समेत बताइन। ‘स्थानीय तहको निर्वाचनमा उम्मेदवार चयन गर्न वडातहबाट सर्वसम्मत चयन गर्न इकाइ समितिलाई जिम्मा दिनुपर्छ’-डिनाले भनिन्।
त्यसैगरी कांग्रेस पुर्व सदस्य तथा मकवानपुर प्रतिनिधि गुरुराज घिमिरेले कार्यक्रम घरघर जाऔ कांग्रेस जिताऔ अभियान स्थानीय तहको निर्वाचनमा जनताको निरासलाई भगाउदै कांग्रेसलाई विजयी गराउन जनतासंग जोड्ने आधारशिला रहेको बताए। ‘कम्युनिष्टबाट जनता चरम निरास बनेकोले साे अन्त्य गर्न आवश्यक रहेको छ’ घिमिरेले बताए ।
निर्वाचनमा गठबन्धन भएपनि उनीहरुको सत्यता बुझाउनु यस अभियानको मुख्य उद्देश्य हो”-घिमिरेले भने।
भेलामा सम्बोधन गर्दै कांग्रेस बागमती प्रदेश सभापति इन्द्रबहादुर बानियाँले कांग्रेस पद्दतीमा चल्ने पार्टी भएकोले स्थानीय तहको निर्वाचनमा पदकालागि प्रतिस्पर्धाको हावी भएको स्वीकार गर्दै मिलेर लैजानुको विकल्प नरहेको बताए । पार्टी निर्णय विरुद्ध जिम्मेवार कांग्रेसी हिड्न नहुने भन्दै स्थानीय तहको निर्वाचनमा गठबन्धन अपरिहार्य भएको बाँनियाले बताए। ‘भारतमा सरकारको नेतृत्व गरिरहेको भाजपा कुनै समय २१ वटा दलसँग गठबन्धन गरेर निर्वाचनमा होमिएको थियो,स्मरण रहोस अप्ठेरो परेको अवस्थामा सहकार्य गर्नेलाई कांग्रेस धोका दिदैन’-नेता बानियाँले भने।
कांग्रेस हेटौंडानगर सभापति उत्सव इटेनीको सभाध्यक्षतामा भएकाे भेलामा कांग्रेस सह महामन्त्री महालक्ष्मी डिनाको प्रमुख आतिथ्यता रहेको थियो भने कांग्रेस निवर्तमान केन्द्रीय सदस्य घिमिरे र कांग्रेस बागमती प्रदेश सभापति इन्द्रबहादुर बानियाँको विशिष्ट आतिथ्यता रहेको थियो।
कार्यक्रमलाई हेटौंडा-१ का सभापति रामकृष्ण महर्जन प्रतिनिधिसभा १ प्रदेश ख का सभापति राजेश बानियाँ,संघिय सभापति दामोदर खनाल,कांग्रेस मकवानपुरका पुर्व सचिव आनन्दराम पराजुलीले, बागमती प्रदेश सदस्य तथा मकवानपुर प्रदेश प्रतिनिधि प्रज्वल दवाडी,बागमती प्रदेश सदस्य तथा हेटौंडानगर प्रतिनिधि तारा गुरुङ, कांग्रेस दैलेखका महासमिति सदस्य खगेन्द्र सुनार,कांग्रेस मकवानपुर सभापति बुद्ध लामा लगायतले मन्तव्य व्यक्त गरेका थिए।
कार्यक्रममा मकवानपुर सभापति बुद्ध लामा,उप सभापति आनन्द कठायत,सचिव भिमसेन महत,इश्वर पाठक, सहसचिव इन्दिरा न्यौपाने,निसान्त बजगाई,कांग्रेस मकवानपुरका संघिय सभापति दामोदर खनाल,लोक मुक्तान,प्रदेश(क्षेत्रीय) सभापतिहरू सुशान्त श्रेष्ठ,राजेश बानियाँ,खड्ग गोपाली,रञ्जन कालाखेती कांग्रेस मकवानपुरका पुर्व सभापति माइकल रामचन्द्र अर्याल,पुर्व कार्यवाहक सभापति विष्णुप्रसाद लामिछाने,पुर्व मकवानपुर सचिव आनन्दराम पराजुली, कांग्रेस मकवानपुरका संगठन विभाग प्रमुख सैलेन्द्र बानियाँ सहित हेटौंडाका १९ वडा सभापति,महाधिवेशन प्रतिनिधि,महासमिति सदस्य क्षेत्रीय प्रतिनिधि लगायत विभिन्न भातृसंगठनका प्रतिनिधि नेता कार्यकर्ताको उपस्थिती रहेको थियो।
अन्य पार्टी परित्याग गरेर कांग्रेसमा प्रवेश
नेपाली कांग्रेस हेटौंडा उपमहानगरको आयोजनामा भएकाे नगर भेलामा एमाले सहित अन्य पार्टी परित्याग गरेर नेपाली कांग्रेसमा प्रवेश गरेका छन्। नवप्रवेसीलाई प्रमुख अतिथि महालक्ष्मी उपाध्याय डिना, कांग्रेस बागमती प्रदेश सभापति बानियाँ र केन्द्रीय प्रतिनिधि घिमिरेले खादा र टिका लगाएर स्वागत गरेका थिए।
मकवानपुर/बागमती प्रदेश सभाले बनाएको प्रदेश उच्च शिक्षा ऐन,२०७८ जारी भएको सातौ दिन परिषदको बैठक बसेको छ ।उच्च शिक्षा ऐनले उत्कृष्ट राष्ट्रिय–अन्तर्राष्ट्रिय विश्वविद्यालयले प्रयोग गरेका शिक्षण प्रकृया, व्यवस्थापन र सञ्चालन पद्धतिलाई अनुसरण गर्ने प्रयत्न गरेको दाबि गरिएको छ ।
यो ऐनले नेपालमा उच्च शिक्षा सम्बन्धी फरक प्रयोग कार्यान्वयन गराउने ध्येय राखेको प्रदेशका मूख्यमन्त्री तथा परिषदका अध्यक्ष राजेन्द्रप्रसाद पाण्डेले बताए ।
बागमती प्रदेश सरकारले प्रदेश उच्च शिक्षा ऐन, २०७८ जारी भएसँगै कार्यान्वयन प्रक्रिया अघि बढाएको हो । उक्त ऐनमा व्यवस्था भए अनुसार प्रदेश उच्च शिक्षा परिषद्को पहिलो बैठक २० चैत मा बसेको थियो । ऐन १४ चैतमा जारी भएको थियो । प्रदेशका मूख्यमन्त्री तथा परिषदका अध्यक्ष पाण्डेको अध्यक्षतामा बैठक बसेको हो ।
ऐन जारी भए पश्चात बसेको परिषदको प्रथम पटक प्रदेश उच्च शिक्षा ऐन, २०७८ लाई कार्यान्वयन गर्नको लागि परिषदलाई पुर्णता दिने, प्रदेश उच्च शिक्षा नियमावली तर्जुमा गर्नका लागि विज्ञ सहितको कार्यदल निर्माण गरी प्रक्रिया अघि बढाउने, ऐनका प्रावधान बारे सरोकार संस्थासंग छलफल अघि बढाउने, परिषद सञ्चालन गर्नका लागि आवश्यक जनशक्ति व्यवस्थापनको प्रक्रिया अघि बढाउने, आवश्यक पर्ने बजेटको श्रोतको व्यवस्था गर्ने निर्णय समेत गरेको छ ।
ऐन अन्तरगत उच्च शिक्षा परिषद्को व्यवस्था, सार्वजनिक विश्वविद्यालय, मानित विश्वविद्यालय र स्वायत्त प्रतिष्ठान स्थापना गर्न सक्ने व्यवस्था गरेको छ । यस अन्तर्गत छुट्टै विधानद्वारा विश्वविद्यालय, मानित विश्वविद्यालय र प्रतिष्ठान स्थापना हुने विश्वविद्यालय र प्रतिष्ठान छुट्टा छुट्टै संरक्षक समिति (बोर्ड अफ ट्रष्टी) को ढाँचामा सञ्चालन हुने र विकृतिको रुपमा रहेको सम्बन्धन दिने परम्परालाई निरुत्साहित गरिएको छ ।
बैठकमा मन्तव्य राख्दै मुख्यमन्त्री तथा परिषद्का अध्यक्ष राजेन्द्रप्रसाद पाण्डेले आगामी दिनमा समुन्नत र शिक्षित बागमती प्रदेश निर्माण गर्नको लागि विषयगत रुपमा सक्षम शैक्षिक संस्थाहरुलाइ विश्वविद्यालयको रुपमा विकास गर्न र लोपोन्मुख कला र सीपलाइ शैक्षिक रुपमा प्रमाणिकरण गर्न र त्यसको सम्मान गर्नका लागि सोही अनुसारको पाठ्यक्रम निर्माण र शैक्षिक मापदण्ड अनुसार स्तरीकृत गर्नका लागि विश्वविद्यालयहरु मार्फत शैक्षिक पाठ्यक्रम निर्माण गरी अध्ययन र अध्यापन गर्ने वातावरण सृजना गर्नु आवश्यक रहेको छ । श्रमको सम्मान गर्ने शैक्षिक प्रणालीको विकास गर्नका लागि बागमती प्रदेश सरकार नीति तर्जुमा गरी आगामती दिनमा अघि बढ्ने पाण्डेले बताए ।
परिषद्का उपाध्यक्ष एवम् सामाजिक विकास मन्त्री कुमारी मोक्तान, परिषद सदस्य तथा प्रदेशका प्रमुख सचिव मुकुन्दप्रसाद निरौला, सदस्य तथा प्रदेश नीति तथा योजना आयोग उपाध्यक्ष डा. कृष्णराज पन्त, सदस्य तथा सामाजिक विकास मन्त्रलायका सचिव श्रीकृष्ण नेपालको उपस्थितिमा बसेको थियो ।
३० वैशाखमा हुने स्थानीय तह निर्वाचनमा प्रयोग हुने मतपत्रमा नेकपा एमालेको चुनाव चिह्न ‘सूर्य’ पहिलो नम्बरमा रहने भएको छ । यसैगरी नेपाली कांग्रेसको निर्वाचन चिह्न ‘रूख’ दोस्रो नम्बरमा रहनेछ ।
आयोगले स्थानीय तह निर्वाचन ऐन २०७३ को दफा २६ को उपदफा ६ मा भएको व्यवस्थाअनुसार स्थानीय तहको निर्वाचनका लागि राजनीतिक दलको चुनाव चिह्नको रोलक्रम निर्धारण गर्ने भएको हो ।
सो दफाको उपदफा ६ मा ‘निर्वाचन चिह्न मतपत्रमा समावेश गर्दा त्यस्तो दलले तत्काल अघि भएको प्रतिनिधि सभाको निर्वाचनमा समानुपातिक निर्वाचन प्रणालीतर्फ प्राप्त गरेको मत संख्याको आधारमा समावेश गरिनेछ ।’ भन्ने उल्लेख छ ।
सो कानुनअनुसार मतपत्रमा नेकपा एमालेको चुनाव चिह्न सूर्य पहिलो, कांग्रेसको ‘रुख’ दोस्रो, नेकपा माओवादी केन्द्रको गोलाकारभित्र हँसिया हथौडा तेस्रो, जसपाको ढल्केको छाता चौंथो, लोकतान्त्रिक समाजवादी पार्टी (लोपाका)को साइकल पाँचौं र नेकपा एकीकृत समाजवादीको चुनाव चिह्न कलम छैटौं नम्बरमा रहने भएको हो । यी ६ दल राष्ट्रिय मान्यता प्राप्त हुन् ।
यसैगरी, सातौं नम्बरमा विवेकशील साझा पार्टीको चिह्न तराजु, आठौंमा राप्रपाको हलो, नवौंमा जनमोर्चाको गिलास र १०औं नम्बरमा नेपाल मजदुर किसान पार्टीको चिह्न मादल रहने आयोगले जनाएको छ ।
– २०७४ मा प्राप्त समानुपातिक मतका आधारमा चिह्न
– मतपत्र हरियो
प्रदेशसभा सदस्य निर्वाचन ऐन २०७४ को दफा ३१ र प्रतिनिधिसभा सदस्य निर्वाचन ऐन २०७४ को दफा ३१ को व्यवस्थामा पनि अघिल्लो निर्वाचनमा समानुपातिकमा प्राप्त मतका आधारमा अर्को चुनावका लागि चिह्न निर्धारण हुने व्यवस्था उल्लेख छ ।
आयोगका प्रमुख आयुक्त दिनेशकुमार थपलियाले २०७४ सालमा सम्पन्न प्रतिनिधि सभा निर्वाचनमा समानुपातिक निर्वाचन प्रणालीअन्तर्गत दलहरूले प्राप्त गरेको मतका आधारमा स्थानीय तह निर्वाचनको मतपत्रमा चुनाव चिह्न कायम हुने जानकारी दिए ।
‘आयोगले मतपत्रमा चुनाव चिह्न राख्दा दल हेर्दैन, कानुन हेर्छ, कानुनअनुसार २०७४ सालमा सम्पन्न प्रतिनिधि सभा निर्वाचनमा समानुपातिक निर्वाचन प्रणालीअन्तर्गत दलहरूले प्राप्त गरेको मतका आधारमा मतपत्रमा चुनाव चिह्न कायम हुन्छ,’ आयोगका प्रमुख आयुक्त थपलियाले राजधानीसँग भने ।
दलहरूबीचमा मतपत्रमा चुनाव चिह्न राख्ने विषयमा विवाद हुने गरेपछि २०७३ सालमा निर्वाचनसम्बन्धी कानुन बनाउँदा समानुपातिकतर्फ दलले प्राप्त गरेको मतका आधारमा अर्को चुनावका लागि चिह्न निर्धारण हुने व्यवस्था गरिएको थियो ।
२०७४ सालमा सम्पन्न प्रतिनिधि सभा निर्वाचनमा नेकपा एमालेले समानुपातिक निर्वाचन प्रणालीतर्फ सबैभन्दा बढी मत पाएको थियो । एमालेले ३१ लाख ७३ हजार ४ सय ९४ मत समानुपातिक निर्वाचन प्रणालीतर्फ प्राप्त गरेको थियो ।
यसैगरी, कांग्रेसले दोस्रो बन्दै ३१ लाख २८ हजार ३ सय ८९ मत पाएको थियो भने माओवादी केन्द्रले आफ्नो चुनाव चिह्न गोलाकारभित्रको हँसिया हथौडामा १३ लाख ३ हजार ७ सय २१ मत प्राप्त गरेको थियो ।
यस्तै, राष्ट्रिय जनता पार्टी नेपालले छाता चिह्नमा ४ लाख ७२ हजार २ सय ५४ मत पाएको थियो भने संघीय समाजवादी फोरम नेपालको चिह्न हातले समातेको मसालमा ४ लाख ७० हजार २ सय १, विवेकशील साझा पार्टीले २ लाख १२ हजार ३ सय ६४, राप्रपाले गाईमा १ लाख ९६ हजार ७ सय ८२, राप्रपा प्रजातान्त्रिकले गोलाकारभित्रको हलोमा ८८ हजार ३ सय ७७, नयाँ शक्ति पार्टीले देब्रे आँखामा ८१ हजार ८ सय ३७ र राष्ट्रिय जनमोर्चाले गिलासमा ६२ हजार १ सय ३३ मत प्राप्त गरेको थियो । राजधानी दैनिकबाट
मकवानपुर । मकवानपुर उद्योग वाणिज्य संघले वीरगंज उद्योग वाणिज्य संघको टोलीलाई शनिबार हेटौंडामा स्वागत गरेको छ । वीरगंज उवासंघका अध्यक्ष डा. सुवोधकुमार गुप्तासहितकाे टाेलीलाई स्वागतसँगै मउवा संघ र वीउवा संघबीच आपसी सहकार्य गर्ने समझदारी पत्रमा हस्ताक्षर समेत गरिएको छ ।
स्वागत कार्यक्रयमा मउवासंघका अध्यक्ष कृष्ण कुमार गुप्ताले मकवानपुर जिल्लाको औद्योगिक तथा पर्यटकीय सम्भावना, उद्योगी/व्यवसायीका समस्याहरु र संघको गतिविधि जानकारी गराएका थिए । त्यसैगरी वीरगंज उवासंघका अध्यक्ष डा. सुवोधकुमार गुप्ताले मउवासंघ र वीरगंज उवासंघ मिलेर संयुक्त परियोजना संचालन गर्न सकिने बताएका थिए । मउवासंघका व्यवसायिक समस्याहरु समाधानको लागि वीरगंज उवासंघले पनि पहल गर्ने उनले बताए ।
गुप्ताले २ हजार ७ सालमा स्थापना भएको वीरगंज उवासंघले त्यहाँको औद्योगिक करिडोरमा सिसिटिभीको लागि पहल अघि बढाएको, ५० प्रतिशतभन्दा बढी रेभिन्यु वीरगंजले राज्यलाई दिएको, पाँच करोड भन्दा माथिको कारोवारमा मात्र भिसिटियस लगाउनु पर्ने, राष्ट्र बैंकले नै. ५ प्रतिशतमा दिइरहेको कर्जा ७ प्रतिशत पु¥याएको कार्य सहि नभएको, बैंक व्याज सिंगल डिटिजमा हुनुपर्ने, क्रेडिट ऐन ल्याएर व्यवसायीको उधारो कारोवार व्यवस्थित गरिनुपर्ने, तरलता अभाव हुन नदिन राज्यले कम्तिमा ७०–८० प्रतिशत पुँजीगत खर्च अनिवार्य गर्नुपर्ने जस्ता विषयहरु चर्चा गरेका थिए । कार्यक्रममा बैंकले आफूखुशी व्याज बढाउने, अघोषित लोडसेडि· जस्ता विषय जटिल बनिरहेको चर्चा गरिएको थियो ।
वीरगंज उवासंघका वरिष्ठ उपाध्यक्ष अनिल कुमार अग्रवाल, मउवासंघका पूर्व अध्यक्ष भुवनलाल श्रेष्ठ, वरिष्ठ उपाध्यक्ष अनिल अग्रवाल, उपाध्यक्षद्वय उज्वल चौलागाई, राजु अधिकारी र सहकोषाध्यक्ष निलम पाण्डेले मन्तव्य राखेका थिए ।
अध्यक्ष डा. सुवोधकुमार गुप्ताको नेतृत्वमा टोली हेटौंडा आएको थियो । अध्यक्ष गुप्ताको नेतृत्वमा आएकाे वीरगंज उवासंघकाे टोलीमा निवर्तमान अध्यक्ष गोपाल केडिया, वरिष्ठ उपाध्यक्ष अनिल कुमार अग्रवाल, सचिव अरविन्द्र अमात्य, सहकोषाध्यक्ष प्रेमचन्द्र गोयल, सदस्यहरु रविन्द्र वर्णवाल, मनोज शर्मा, सुरेशकुमार रुंगटा, अंकित खेतान, प्रमोदकुमार चौरसिया, कार्यकारी सचिव सुनिलकुमार कण्ठ र अधिकृत खड्ग रावलको सहभागिता रहेको थियो ।
त्यसैगरी मकवानपुर उद्योग वाणिज्य संघका पूर्व अध्यक्ष भुवनलाल श्रेष्ठ, वरिष्ठ उपाध्यक्ष अनिल अग्रवाल, उपाध्यक्षद्वय उज्वल चौलागाई, राजु अधिकारी, कोषाध्यक्ष सन्तोष कुमार अर्याल, सचिवद्वय राजाराम कार्की, श्रीकृष्ण कर्माचार्य, सहकोषाध्यक्ष निलम पाण्डे, सदस्यहरु कुल प्रसाद चौलागाई, अनिल भक्त श्रेष्ठ, नेत्र प्रसाद खतिवडा, विकेशलाल श्रेष्ठ र विशेष आमन्त्रित सदस्य राजेन्द्र लामिछानेको सहभागिता रहेको थियो ।