मकवानपुर । हेटौडा उपमहानगरपालिका वडा नम्बर २ मा रहेकाे एक सहकारीले आफ्नाे स्थापना दिवसकाे अवसरमा सरसफाई र रक्तदान कार्यक्रम गरेकाे छ । हेटौंडा–२ मनकामना चाेकमा कार्यालय रहेकाे प्रतिफल बचत तथा ऋण सहकारी संस्था लिमिटेडले स्थापनाकाे १० औं बर्षकाे दिवसमा सरसफाई र रक्तदान कार्यक्रम गरेकाे हाे ।
सोमबार संस्थाको स्थापना दिवसको अवसरमा हेटौंडा–२ स्थित मनकामना चोक हुँदै मनकामना मन्दिर जाने बाटो हेटौंडा–५ सिँचाइ टोलसम्म सरसफाइ गरिएको छ । यस्तै, हेटौंडा–२ मकवानपुर बहुमुखी क्याम्पस अगाडी, वनस्खण्डी गेट, मनकामना चोकलगायतका क्षेत्रमा संस्थाले सौजन्य गरेको करिब ६० हजार रुपैयाँ बराबरको फोहोर फाल्ने २० वटा डस्टविन राखिएको संस्था व्यवस्थापक विनोद पौडेलले जानकारी दिए ।

यसैगरी सहकारी स्थापना दिवसको अवसरमा रक्तदान समेत गरिएको छ । रक्त सञ्चार केन्द्र हेटौंडाको समन्वयमा भएको रक्तदान कार्यक्रममा ३४ जनाले रक्तदान गरेकाे सहकारी अध्यक्ष दिलिश गाेविन्द जाेशीले जानकारी दिए ।
यस्तै संस्थाको अहिले सेयर सदस्य १ हजार २ सयभन्दा बढी रहेको जाेशीले जानकारी दिए । यस्तै १ करोड ३ लाख रुपैयाँ सेयर पुँजी, ४ करोड ८० लाख रुपैयाँ ऋण लगानी र ३ करोड १० लाख रुपैयाँ निक्षेप बचत रहेको व्वस्थापनक पाैडेलले बताए ।
संस्थाका अध्यक्ष जोशीको अध्यक्षता तथा हेटौंडा उपमहानगरपालिकी प्रमुख मिना कुमारी लामाको प्रमुख आतिथ्यतामा भएको कार्यक्रममा हेटौंडा–२ का वडाध्यक्ष विष्णु गोपाल महर्जन र ५ नम्बर वडाको वडाध्यक्ष सुशील घिमिरे लगायतको आतिथ्यता रहेको थियो ।
मकवानपुर । बागमती प्रदेशका स्वास्थ्य मन्त्री निमा लामाले सराेकारवाला सवैकाे सहयाेगमा काेराेना विरुद्धको अभियानमा बागमती प्रदेशलेसफलता हासिल गरेकाे बताएका छन् । संघीय र प्रदेश सरकारको समन्वय तथा स्वास्थ्यकर्मीको अथक प्रयासमा नागरिकको सहयोगका कारण काराेना भाइरस विरुद्धको अभियानमा प्रदेशले सफलता हासिल गरेको उनले बताए ।
प्रदेश स्वास्थ्य मन्त्रालय अन्तर्गतका कार्यालयहरुको बार्षिक समिक्षा बैठक एवं मन्त्रालयको प्रदेशस्तरीय समस्या समाधान समितिको बैठकमा बोल्दै मन्त्री लामाले सबैको प्रयासमा काेराेना (कोभिड–१९) विरुद्धको अभियानमा सफलता हासिल गरेको बताएका हुन् ।
खोप अभियानलाई सार्थक बनाउन र नागरिकलाई कोभिड–१९ को जोखिमबाट बचाउन बागमती प्रदेश सरकारले कोभिड–१९ विरुद्धको खोप अभियानमा सतप्रतिशत सफलता हासिल गरेकोमा लामाले सबैलाई आभार व्यक्त गरे । प्रधानमन्त्री शेरबहादुर देउवाको सतप्रतिशत खोप अभियानलाई सार्थक बनाउन बागमती प्रदेश सफल रहेकाे बताए ।
‘कोभिड महामारी, नीतिगत समस्या र प्रशासनिक समस्याका कारण लक्ष्य अनुसारको प्रगतिमा समस्या रहेको छ’ मन्त्री लामाले भने– ‘चालु आर्थिक बर्ष ०७९/०८० मा मन्त्रालय अन्तर्गतका सबै निकायले लक्ष्य अनुसारको प्रगति गर्ने गरी काम गर्नु पर्छ ।’ जनतालाई स्वास्थ्य सेवा पुर्याउने स्वास्थ्य संस्थाहरुको सेवा प्रवाह ‘स्मार्ट’ हुनुपर्ने भन्दै उनले यसतर्फ लाग्न सबै निकाय कार्ययोजन अनुसार अघि बढ्नुपर्नेमा जोड दिए ।
कार्यक्रममा प्रदेश नीति तथा योजना आयोगका सदस्य प्रल्हाद लामिछानेले प्रदेशका सबै मन्त्रालयहरुको समस्या एकै किसिमको रहेकाले यसलाई समाधान गर्न सबैको सामुदायिक प्रयास आवश्यक रहेको बताए । उनले कार्यालयहरुको पूर्वाधार विकास, जनशक्ति व्यवस्थापन, सुशासन र पारदर्शिता जस्ता विषयमा विशेष ध्यान दिएर अघि बढ्न सुझाव दिए । प्रदेश नीति तथा योजना आयोगले प्रदेश सरकार अन्तर्गतका निकायहरुको काम कारवाहीबारे अनुगमन गरेको र आवश्यक सुझाव समेत दिएकाले सोही अनुसार सुधारको अपेक्षा गरिएको लामिछानेले बताए ।
स्वास्थ्य मन्त्रालयका सचिव बद्रीबहादुर खड्काको अध्यक्षतामा बसेको समिक्षा बैठकमा मन्त्रालय, मन्त्रालय अन्तर्गतका विभिन्न निकायहरुले गत आर्थक वर्ष २०७८/०७९ को कार्यप्रगति, समस्या र समाधान प्रस्तुत गरेका थिए ।
मकवानपुर । बागमती प्रदेशकाे ३ वटा विधेयक प्रमाणिकरण भएकाे छ । बागमती प्रदेश प्रमुख यादबचन्द्र शर्माले प्रदेशसभाबाट पारित भएका ३ वटा विधेयक प्रमाणीकरण गरेका हुन् ।
केही प्रदेश ऐन संशोधन गर्न बनेको विधेयक, प्रदेश सञ्चार माध्यम व्यावस्थापन ऐन २०७५ लाई संशोधन गर्न बनेको विधेयक र प्रदेश अनुसंधान व्युरो सेवाको गठन, स्थापना, काम, कर्तव्य र अधिकार सम्वन्धमा व्यवस्था गर्न बनेको विधेयकलाई प्रमाणीकरण गरेको प्रदेश प्रमुखको कार्यालयले जनाएको छ ।
प्रदेश प्रमुखबाट प्रमाणिकरण भए पछी उक्त विधेयक ऐनकाे रुपमा प्रदेश राजपत्रमा प्रकाशित हुनेछ ।
मकवानपुर । राष्ट्रपति विद्यादेवी भण्डारीले संघीय संसदबाट पारित भएको नागरिकता विधेयक फिर्ता पठाइदिएकी छन् ।
सभामुख अग्निप्रसाद सापकोटाले प्रमाणित गरी प्रमाणीकरण गर्न राष्ट्रपतिसमक्ष पेस भएको विधेयक आइतबार राष्ट्रपतिबाट १५ बुँदे सुझावसहित संसदमा पुनर्विचारको लागि फिर्ता पठाइएको राष्ट्रपति कार्यालयले जनाएको छ ।
राष्ट्रपति कार्यालयका प्रवक्ता सागर आचार्यका अनुसार राष्ट्रपति भण्डारीले पुनर्विचार गर्न भन्दै नागरिकता विधेयक आइतबार संसदमा फिर्ता पठाएकी हुन् । ‘सम्माननीय राष्ट्रपति विद्यादेवी भण्डारीज्यूसमक्ष प्रतिनिधि सभाका सम्माननीय सभामुखज्यूबाट प्रमाणित भई नेपालको संविधानको धारा ११३ को उपधारा (२) बमोजिम प्रमाणीकरणका लागि पेस हुन आएको नेपाल नागरिकता ऐन, २०६३ लाई संशोधन गर्न बनेको विधेयकमा नेपालको संविधानबमोजिम नागरिकता प्राप्तिसम्बन्धी विषयमा संघीय संसद्बाट पुनर्विचार हुन आवश्यक देखिएकाले नेपालको संविधानको धारा ११३ को उपधारा (३) बमोजिम सन्देशसहित यो विधेयक सम्माननीय राष्ट्रपतिज्यूले प्रतिनिधि सभामा फिर्ता पठाउनुभएको छ,’ राष्ट्रपति कार्यालयले जारी गरेको विज्ञप्तिमा भनिएको छ ।
संसद्का दुवै सदनबाट बहुमतले पारित गरेर पठाएको विधेयक राष्ट्रपतिले १५ दिनभित्र प्रमाणीकरण गर्ने वा पुनर्विचारका लागि फिर्ता पठाउन सक्ने संवैधानिक व्यवस्था छ । विधेयक साउन १५ मा राष्ट्रपति कार्यालय पुगेको थियो ।
नागरिकता विधेयकमा जन्मसिद्धका आधारमा नागरिकता पाएका आमाबुवाका सन्तानलाई नागरिकता दिने, गैरआवासीय नेपालीलाई पनि राजनीतिक अधिकारबिनाको नागरिकता दिनेलगायत विषय समेटिएका थिए ।
हालको नागरिकता विधेयकको नागरिक समाजबाट चर्को आलोचना र विरोध हुँदै आइरहेको थियो । नागरिक समाजका विभिन्न समूहले राष्ट्रपति भण्डारीलाई शितल निवासमै भेटेर प्रमाणीकरण नगर्न भनेका थिए ।
प्रमुख प्रतिपक्ष दल नेकपा एमालेले नागरिकता विधेयकको विषयमा विरोध गर्दै आएको थियो ।
संघीय संसद्का दुवै सदनबाट बहुमतले पारित भएको नागरिकता विधेयकको पक्षमा नेपाली कांग्रेस, नेकपा माओवादी केन्द्र, एकीकृत समाजवादी, जनता समाजवादी पार्टी थिए । नेकपा एमाले, राष्ट्रिय जनमोर्चा, नेपाल मजदुर किसान पार्टी भने विधेयकका केही प्रावधानको विपक्षमा रहेका थिए ।
जन्मका आधारमा नेपाली नागरिकता पाएकाको सन्तान लामो समयदेखि नागरिकताविहीन अवस्थामा रहेकाले यही विषय सम्बोधन गर्न नागरिकता विधेयक ल्याइएको थियो ।
फिर्ता भएको विधेयकअनुसार नागरिकता लिन चाहने व्यक्तिले आमा वा बाबुको थर उल्लेख गर्ने भन्ने रोज्न पाउने व्यवस्था छ । त्यस्तै, ठेगाना पनि व्यक्तिले रोज्न पाइने व्यवस्था छ । नागरिकतामा लैंगिक पहिचानको व्यवस्थालाई समेत समेटेको छ । नागरिकताको अभिलेखमा आमा वा बाबुको नागरिकताको विवरण राख्ने व्यवस्थासमेत गरिएको छ । विधेयकले जन्मसिद्धका सन्तानले नागरिकता पाउने व्यवस्था थियो ।
विधेयकले जन्मको आधारमा नागरिकता पाएका (जन्मसिद्ध नागरिक)हरूका सन्तानलाई नागरिकता प्राप्त गर्न बाटो खोल्ने व्यवस्था गरेको थियो । २०४६ सालको चैत मसान्तभित्र नेपालमा जन्म भई नेपालमा स्थायी बसोबास गर्ने व्यक्तिलाई यसअघि जन्मको आधारमा नागरिकता दिइएको थियो ।
यस अघि २०५७ सालमा तत्कालीन राजा बिरेन्द्रले दुबै सदनबाट पारित भएको नागरिकता बिधेयक अदालतको राय सहित फिर्ता गरेका थिए ।
फिर्ता गरिएको नागरिकता विधेयकमा राष्ट्रपतिको १५ बुँदे सन्देश
१ संसदमा गहिरो गरी छलफल नभएकाले अझै गहिरो गरी छलफल गर्न आग्रह
२. तत्कालीन राजा वीरेन्द्रको पालामा गठन भएको नागरिकता समस्या सुझाव आयोगको स्मरण
३. नागरिकता’मा हाम्रो उतारचढावयुक्त इतिहासको वस्तुनिष्ठ समीक्षा गर्न आग्रह
४. नागरिकताका सिद्धान्तमा स्पष्टताको खोजी गर्न आग्रह
५. नागरिकता प्राप्तिका सम्बन्धमा विगतदेखि नै कायम रहेका सवाल सम्बोधन गर्नुपर्ने दायित्व
६. अंगीकृत नागरिकताको विषयलाई स्थायी रूपमा समाधान गरिनुपर्ने
७. यहाँको सामाजिक यथार्थलाई सम्बोधन हुनेगरी लागू गर्नुपर्ने
८. प्रतिनिधि सभाको राज्य व्यवस्था तथा सुशासन समितिको प्रतिवेदनमा चासो
९. तत्कालीन राजनीतिमा नाफाघाटाको विषय बनाउन वा कुनै खास वर्ग वा समुदायका नागरिकको आत्मसम्मानमा ठेस पुग्नेगरी सधैं लम्ब्याइरहनु उपयुक्त नहुने
१०. मधेसको भावना सम्बोधनका लागि स्थायी समाधान खोज्न आग्रह
११. स्वघोषणा’ गम्भीर ध्यानाकर्षण
१२. प्रादेशिक पहिचान’ संविधानको व्यवस्था ऐनमा नदेखिएको
१३. अध्यादेशबाट कानुन निर्माण हुने प्रक्रिया र विधेयकबाट कानुन निर्माण हुने प्रक्रिया फरक रहेको तथ्यको स्मरण
१४. तत्काल छलफल गरी पुनः प्रमाणीकरणका लागि विधेयक पेस गर्न संसद्लाई आग्रह
१५. संविधानको धारा १६ लाई सँगै राखेर गरिएको खण्डमा अझ प्रासंगिक र स्पष्ट हुन सक्ने

मकवानपुर । चलचित्र प्रकाशको टोली हेटौंडा आइपुगेको छ । आगामी भदौ १० गतेबाट प्रर्दशनमा आउन लागेको नेपाली कथानक चलचित्र ‘प्रकाश’को टोली प्रचारप्रसारको लागि हेटौंडामा आएको हो ।
चलचित्र प्रचारप्रसारमा देशका विभिन्न शहरमा दौडाहामा व्यस्त रहेको टोली आइतबार हेटौंडा आइपुगको हो । हेटौंडामा सञ्चारकर्मीसँग भेटघाट गर्दै चलचित्रका लेखक विकास सुवेदीले चलचित्र प्रकाशको कथा बस्तु र चलचित्रको बारेमा जानकारी गराएका थिए । करिब २ करोड ५० लाख रुपैयाँ खर्चेर चलचित्र निर्माण गरिएको सुवेदीले बताए ।
चलचित्र प्रसाद, पर्व, क्लासिकमा सहायक निर्देशन गरिसकेका सुवेदी प्रकाशका लेखक समेत हुन । सुवेदीले चलचित्र जुम्लाको परिबेश अनुशारको कथामा निर्माण भएकोले आफुले जुम्लाको महिलाको कथा बुझ्न लामो समय जुम्लामा बसेर कथा लेखन कार्य गरेको बताए ।
चलचित्रमा आमाको भूमिका निर्वाह गरेकी नायिका दिया मास्केले समाजमा पहिचान खोजी गर्ने क्रममा एकल महिलाले गर्नुपर्ने संघर्षको विषयमा उठान गरिएको बताइन् । उनले आफु नायक प्रदीप खड्काको आमाको भूमिकामा रहेको बताउदै जुम्लाका महिलाहरुले भोग्नुपरेको कथावस्तुलाई चलचित्रमा उठान गरिएको बताइन् ।
निर्देशक दिनेश राउतको निर्देशनमा बनेको चलचित्रमा दिया मास्के, प्रदीप खड्का, प्रकाश घिमिरे, राजन खतिवडा, रेणु योगी लगायत कलाकारहरुको अभिनय रहेको छ । चलचित्रलाई महेन्द्र अधिकारीले निर्माण गरेका हुन ।
