मकवानपुर । मुख्य निर्वाचन कार्यालय मकवानपुरले प्रतिनिधि सभा र प्रदेश सभातर्फ निर्वाचित भएका सांसदहरुलाई प्रमाणपत्र वितरण गरेको छ ।
मकवानपुर जिल्लामा प्रतिनिधीसभा र प्रदेशसभामा निर्वाचित भएका सांसदहरुलाई आज निर्वाचन परिणाम घोषणा गर्दै प्रमाणपत्र वितरण गरिएको हो। मुख्य निर्वाचन अधिकृतको कार्यालय मकवानपुरले जिल्लामा प्रतिनिधि सभा र प्रदेश सभाको चुनावमा विजयी भएकाहरुलाई प्रमाणपत्र वितरण गरिएको हो ।
मकवानपुरका मुख्य निर्वाचन अधिकृत ऋषिराम निरौलाले बिजयी भएका संघीय सांसद र प्रदेशसभाका सदस्यहरुलाई बधाइ ज्ञापन गर्दै प्रमाणपत्र वितरण गरे ।
मकवानपुरको निर्वाचन अधिकृतको कार्यालयले जिल्लाको प्रतिनिधीसभा क्षेत्र नम्बर–१ मा बिजयी राप्रपाका नेता दिपक बहादुर सिंह, मकवानपुर क्षेत्र नम्बर–२ मा विजयी नेकपा एमालेका बागमती प्रदेशसका उपसचिब महेश कुमार बर्तौलालाई विजयी भएको आधिकारीक घोषणा गर्दै आजै प्रमाणपत्र वितरण गरेको हो ।
त्यसैगरी क्षेत्र नम्बर–१ को प्रदेशसभा १ मा विजयी माओबादी केन्द्रका नेता प्रेम बहादुर पुलामी, क्षेत्र नम्बर १ को २ मा निर्वाचित एमालेका मकवानपुर अध्यक्ष एकालाल श्रेष्ठ, क्षेत्र नम्बर–२ को प्रदेशसभा १ मा निर्वाचित माओबादीका नेता कुमारी मोक्तान, क्षेत्र नम्बर–२ को २ मा निार्वाचित कांग्रस नेता इन्द्र बहादुर बानिायाँलाई प्रमाणपत्र वितरण गरिएको हो ।
मुख्य निर्वाचन अधिकृत ऋषिराम निरौलाको अध्यक्षतामा भएको कार्यक्रममा बागमती प्रदेश सरकारका प्रमुख सचिब मुकुन्द निरौला, जिल्ला समन्वय समिति मकवानपुरका प्रमुख ललित घलान, मकवानपुरका प्रमुख जिल्ला अधिकारी राजेन्द्र देव पाण्डेलगायतको उपस्थिती रहेको थियो ।
मकवानपुर । आसन्न प्रदेश तथा प्रतिनिधिसभा निर्वाचनको प्रत्यक्षतर्फ मतगणना अन्तिम चरणमा पुगेसँगै वाग्मती प्रदेशमा कांग्रेस पहिलो दल बन्ने भएको छ । दोलखाबाहेक १२ जिल्लामा मतगणना सम्पन्न हुँदा कांग्रेसले प्रत्यक्षतर्फ २४ सिट जितेको छ । माओवादी केन्द्रले १४, एमालेले १२, राप्रपाले ७, नेकपा एकीकृत समाजवादीले ५, हाम्रो नेपाली पार्टीले १ र नेपाल मजदुर किसान पार्टीले १ स्थानमा विजय हासिल गरेका छन् ।
वाग्मती प्रदेशमा प्रत्यक्षतर्फ ६६ सिटका लागि निर्वाचन भएको हो । ४४ सामानुपतिकसहित प्रदेशसभामा १ सय १० जना सांसद रहनेछन् । गत निर्वाचनमा प्रत्यक्षतर्फ तेस्रो स्थानमा रहेको कांग्रेस अहिले पहिलो दल बनेको छ । यसअघि पहिलो स्थानमा रहेको एमाले भने तेस्रो स्थानमा पुगेको छ । माओवादी केन्द्र भने यसअघिकै स्थानमा कायम छ ।
समानुपातिकतर्फको पूरा मत गनिसकेपछि मात्रै सांसदको संख्या टुंगो लाग्ने र सदनको दोस्रो र तेस्रो ठूलो दल को बन्ने भन्ने निश्चित हुनेछ । हालसम्म समानुपातिकतर्फ पहिलो स्थानमा रहेका कारण एमाले दोस्रो दलको हैसियतमा प्रदेशसभामा रहने देखिन्छ । गत निर्वाचनमा २ सिटमा सीमित राप्रपाले यसपटक आकार बढाएको छ । यसअघिका २ सांसद पनि समानुपातिक मतबाट छनोट भएका थिए । अहिले राप्रपाका ५ जना उम्मेदवार प्रत्यक्षबाटै निर्वाचित भइसकेका छन् । यसबाहेक, हाम्रो नेपाली पार्टीले १ सिटमा विजयी हुँदै नयाँ दलका रूपमा सदनमा प्रवेश पाएको छ ।
हाल सत्तारूढ गठबन्धनमा रहेका कांग्रेस, माओवादी र एकीकृत समाजवादीले प्रत्यक्षतर्फ जितेको सांसदको हालसम्मको ९दोलखाबाहेक० संख्या ४३ पुगेको छ । सरकार बनाउन ५६ सिट भए पुग्छ । समानुपातिकबाट १३ सिट सहजै पुग्ने भएकाले गठबन्धनकै सरकार निर्माण हुने निश्चित जस्तै छ ।
प्रदेशसभामा निर्वाचित सांसदहरूमा केही पुरानै अनुहार दोहोरिए पनि अधिकांश नयाँ छन् । केही सांसदले दोहोरिएर उम्मेदवार बने पनि पराजय भोग्दै दोस्रो पटक सदनमा प्रवेश पाउन यसपल्टलाई विराम लागेको छ । प्रदेशका बहालवाला मन्त्री तथा पूर्वमन्त्रीहरूमध्ये पनि केही मात्रै विजयी हुन सकेका छन् । निवर्तमान सभामुख सानुकुमार श्रेष्ठ काठमाडौंमा राप्रपाका सुनील केसीसँग पराजित भए । श्रेष्ठलाई एमालेले भावी मुख्यमन्त्रीका रूपमा अगाडि सारेको थियो । उपसभामुख राधिका तामाङ भने नुवाकोटबाट पुनः निर्वाचित भएकी छन् ।
मन्त्रीहरू माओवादीका रत्नप्रसाद ढकाल, कुमारी मोक्तान, शालिकराम जम्मकट्टेल पुनः निर्वाचित हुँदा श्रम तथा यातायातमन्त्री रहेका माओवादीकै घनश्याम दाहाल भने चितवनमा पराजित भए । पूर्वसामाजिक विकासमन्त्री युवराज दुलाललाई पनि पुनः सदनमा देख्न सकिने भएको छ । जम्मकट्टेललाई माओवादीबाट मुख्यमन्त्रीको दाबेदारका रूपमा हेरिएको छ । उनी यसअघि प्रदेशमा दुई पटक मन्त्री भइसकेका छन् । मन्त्रीमा कांग्रेसबाट टिकट पाउनेमा दीपेन्द्र श्रेष्ठ मात्रै थिए । उनी पुनः निर्वाचित भएका छन् । कांग्रेसले यसअघि समानुपातिकबाट सांसद भएकाहरूको नामसमेत बन्द सूचीमा समावेश गरेको छैन । जसका कारण कांग्रेसबाट समानुपातिकतर्फ प्रदेशसभा सदस्य बन्ने सबै नयाँ अनुहार हुनेछन् ।
कांग्रेस संसदीय दलका नेता इन्द्रबहादुर बानियाँले मकवानपुरबाट निर्वाचित हुँदै मुख्यमन्त्रीका रूपमा आफ्नो दाबेदारी यसपटक पनि प्रस्तुत गरेका छन् । यसअघि आलोपालो सरकारको नेतृत्व गर्ने सत्ता गठबन्धनभित्र लिखित सहमति भए पनि उनी मुख्यमन्त्री बन्नबाट वञ्चित भएका थिए । जसका कारण यसपल्ट उनलाई मुख्यमन्त्रीको मुख्य दाबेदारका रूपमा हेरिएको हो । उनी कांग्रेस सभापति एवं प्रधानमन्त्री शेरबहादुर देउवानिकट हुन् । एकीकृत समाजवादीबाट मन्त्री बनेका कृष्णप्रसाद शर्मा खनाल र वसन्तप्रसाद मानन्धर पनि पुनः निर्वाचित भएका छन् ।
यस दलबाट अन्य मन्त्री तथा राज्यमन्त्रीहरू उम्मेदवार बनेनन् । मुख्यमन्त्री एवं एकीकृत समाजवादीका प्रदेश संसदीय दलका नेता राजेन्द्रप्रसाद पाण्डे भने प्रतिनिधिसभामा निर्वाचित भएका छन् । पूर्वमुख्यमन्त्रीद्वय डोरमणि पौडेल र अष्टलक्ष्मी शाक्य चुनावी मैदानमै उत्रिएनन् । एमालेबाट प्रदेशसभामा मन्त्री भएका रामेश्वर फुयाँल प्रदेशमा, कैलाशप्रसाद ढुंगेल र सरेश नेपाल प्रतिनिधिसभामा पराजित भए । चितवनबाट सांसद भएका जगन्नाथ थपलिया प्रदेशमा एमाले संसदीय दलको नेता हुने सम्भावना रहेको उनीनिकट नेताहरू दाबी गर्छन् । यसअघि प्रदेशसभामा मुख्य सचेतक रहेका एमालेका दीपक निरौला पराजित हुँदा कांग्रेसका सचेतक छिरिङ दोर्जे लामा, प्रभात तामाङ, एकीकृत समाजवादीकी रमा आलेमगर, नेमकिपाका सुरेन्द्रराज गोसाईं भने पुनः निर्वाचित भएका छन् । छिरिङ, प्रभात, रमा र सुरेन्द्र अघिल्लो पटक पनि प्रत्यक्षबाटै निर्वाचित भएका थिए । इकान्तिपुरबाट ।
मकवानपुर । अघिल्लो प्रतिनिधिसभामा रहेका ६१ भन्दाबढी निवर्तमान सांसद प्रतिनिधिसभा सदस्य निर्वाचनमा पराजित भएका छन् ।
संसदीय राजनीतिमा लामो अनुभव रहे तापनि निर्वाचन परिणामले पार्टीको माथिल्लो तहको जिम्मेवारीमै रहेका मुख्य नेतालाई सदनबाहिर रहन बाध्य तुल्याएको छ । संसदमा यसपटक प्रवेश गर्न नपाउनेमा कतिपय पार्टीका अध्यक्ष, उपाध्यक्ष, महासचिव तथा प्रदेशका पूर्वमुख्यमन्त्रीसमेत छन् ।
जनता समाजवादी पार्टी नेपालका अध्यक्ष उपेन्द्र यादव, नेकपा एकीकृत समाजवादीका सम्मानित नेता तथा पूर्वप्रधानमन्त्री झलनाथ खनाल, लोकतान्त्रिक समाजवादी पार्टीका वरिष्ठ नेता राजेन्द्र महतो, नेकपा एमालेका वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डे, महासचिव शङ्कर पोखरेल र उपमहासचिव प्रदीपकुमार ज्ञवाली निर्वाचनमा पराजित भए ।
नेकपा (माओवादी केन्द्र) का महासचिव देवप्रसाद गुरुङ, उपमहासचिवद्वय गिरिराजमणि पोखरेल र पम्फा भुसाल तथा पूर्वमुख्यमन्त्री शेरधन राईलाई प्रतिनिधिसभाको यस निर्वाचन अफापसिद्ध रह्यो ।
नेपाली कांग्रेसका सहमहामन्त्री उमाकान्त चौधरी, लोकतान्त्रिक समाजवादी पार्टी (लोसपा) का कार्यकारिणी समिति सदस्य अनिलकुमार झा तथा गृहमन्त्री बालकृष्ण खाण, संस्कृति, पर्यटन तथा नागरिक उड्डयनमन्त्री र युवा तथा खेलकुदमन्त्री महेश्वरजङ्ग गहतराज, विनाविभागीय राज्यमन्त्री उमेश श्रेष्ठ पनि निर्वाचनमा पराजित भए ।
पूर्वसभामुख ओनसरी घर्ती, पूर्वउपसभामुख पुष्पा भुसाल गौतम तथा राष्ट्रिय जनमोर्चाका उपाध्यक्ष दुर्गा पौडेलका लागि पनि यसपटकको निर्वाचन फलदायी हुन सकेन । अघिल्लो प्रतिनिधिसभा सदस्य अञ्जना विशङ्खे, अभिषेकप्रताप शाह, कृष्णकुमार राई, कृष्णभक्त पोखरेल, गणेश ठगुन्ना, गौरीशङ्कर चौधरी, गङ्गा चौधरी (सत्गौवा), घनश्याम भुसाल, चक्रपाणी खनाल, चित्रलेखा यादव, झपटबहादुर रावललाई निर्वाचन परिणामले निरासा तुल्यायो ।
निवर्तमान सांसद देवेन्द्रराज कँडेल नवराज सिलवाल, निरुदेवी पाल, प्रमोद साह, बृजेशकुमार गुप्ता, भरतकुमार शाह, भानुभक्त ढकाल, भीमसेनदास प्रधान, भूमिप्रसाद त्रिपाठी र महेश्वर बस्नेतका लागि निर्वाचन फलामको च्यूरा बन्यो ।
अघिल्लो प्रतिनिधिसभामा रहनुभएका मातृकाप्रसाद यादव, मोहम्मद इस्तियाक राई, यज्ञराज सुनुवार, राजेन्द्रप्रसाद गौतम, राजेन्द्रप्रसाद श्रेष्ठ, रामकुमारी झाँक्री, रामवीर मानन्धरलाई पनि निर्वाचन कष्टप्रद रह्यो । जनता प्रगतिशील पार्टी नेपालका हृदयेश त्रिपाठीलाई पनि यस निर्वाचनले सदन प्रवेशमा धक्का लगायो ।
पूर्वमन्त्री लक्ष्मणलाल कर्ण, लालबाबु पण्डित, सुजाता कोइराला, लेखराज भट्ट, बीना मगर, विरोध खतिवडा, सोमप्रसाद पाण्डेय, शेरबहादुर तामाङ तथा पूर्वसांसदहरू विजय सुब्बा, विशाल भट्टराई सूर्यप्रसाद पाठक र कोमल वलीका लागि पनि यो निर्वाचन बाधक रहन पुग्यो ।
यही मङ्सिर ४ गते सम्पन्न प्रतिनिधिसभा र प्रदेशसभा सदस्य निर्वाचनको मतगणना जारी छ । प्रतिनिधिसभातर्फ हालसम्म एक सय ५६ निर्वाचन क्षेत्रको मतपरिणाम सार्वजनिक भएको छ ।
निर्वाचन आयोगका अनुसार हालसम्म कांग्रेसले ५३ स्थानमा जित निकाल्दै आफ्नो अग्रता कायमै राखेको छ । एमाले ४१, माओवादी केन्द्र १७, एकीकृत समाजवादी १०, राष्ट्रिय स्वतन्त्र पार्टी सात, जसपा छ, स्वतन्त्र पाँच, लोसपा पाँच र नागरिक उन्मुक्ति पार्टी तीन स्थानमा विजयी भएको छ । राजधानी दैनिकबाट
मकवानपुर । दोलखाका १० मतदानकेन्द्रमा पुनः मतदान हुने भएको छ । निर्वाचन आयोगले जिल्ला निर्वाचन कार्यालय दोलखालाई १५ गतेभित्र निर्वाचन गराउन निर्देशन दिएको छ ।
मतदान केन्द्र अनधिकृत कब्जा गरिएको, हुलहुज्जत गरेर स्वतन्त्र र निष्पक्ष मतदान हुन नदिएको जाँचबुझ टोलीको निष्कर्षपछि आयोगले यस्तो निर्देशन दिएको हो ।
आयोगका प्रवक्ता शालिकराम शर्माकाअनुसार पुन मतदानको मिति भने जिल्लालाई नै तोक्ने अधिकार दिएर निर्वाचन गराउन निर्देशन दिएको हो ।“त्यहाँ निष्पक्ष मतदान हुन नदिएको जाँचबुझ टोलीको निष्कर्ष भएपछि यस्तो निर्देशन दिइएको हो ।” उनले भने ।
निर्वाचन आयोगले गठन गरेको जाँचबुझ टोलीले आज प्रतिवेदन बुझाउँदै दोलखाका केन्द्रमा स्वतन्त्र र निष्पक्ष मतदान हुन नसकेको र पुनः मतदान गर्न सिफारिस गरेको थियो ।
४ मंसिरमा भएको चुनावमा बैतेश्वर, तामाकोशी, शैलुङ र मेलुङका आठ मतदान केन्द्रमा मतदान निष्पक्ष र स्वतन्त्र हुन नसकेको भन्दै मुख्य निर्वाचन अधिकृतको कार्यालयले निर्वाचन आयोगलाई रिपोर्ट पठाएको थियो । सोही कारण थप वस्तुस्थिति बुझ्न आयोगले सहसचिव यज्ञप्रसाद भट्टराईको नेतृत्वमा तीन सदस्यीय जाँचबुझ टोली छानबिनका लागि खटाएको थियो टोलीले सात केन्द्रमा निष्पक्ष र स्वतन्त्र मतदान नभएको पाइएको जनाएको छ ।
टोलीले प्रमुख निर्वाचन आयुक्त दिनेश थपलियालाई प्रतिवेदन बुझाएको थियो । सोही अनुसार १० केन्द्रम पुन मतदान हुने भएको आयोगले जनाएको छ ।
आयोगले पुनः मतदानका लागि दोलखाका विभिन्न १० वटा मतदान केन्द्रसमेत सिफारिस गरेको छ । दोलखाको वैत्यश्वर गाउँपालिका वडा नम्बर ६ स्थित वैत्यश्वर माध्यमिक विद्यालय मतदान केन्द्रको क, ख, ग, वडा नम्बर २ स्थित जनज्योति माध्यमिक विद्यालय पुतली काठका क र ख, तामाकोसी गाउँपालिका वडा नम्बर ३ स्थित हेल्थ पोस्ट भवन क र ख, वडा नम्बर ३ स्थित कालीढुंगा मावि क, ख, ग मा मतदान हुने आयोगले जनाएको छ ।
मकवानपुर । नेकपा (एकीकृत समाजवादी) मकवानपुरले चुनावी समिक्षा गर्दै हारकाे कारण कमजाेर संगठन भनेकाे छ । आइतबार हेटौँडामा बसेको जिल्ला कार्यकर्ता भेलामा पार्टीका शीर्ष नेताहरुले कमजोर संगठन, अरुको गठजोड, आर्थिक अभाव तथा नयाँ शक्तिहरुको बलियो उपस्थितिका कारण मकवानपुरमा हार व्यहाेर्नु परेकाे जनाएकाे हाे ।
सत्ता गठबन्धन साझेदार दल नेकपा एसले गठबन्धनका दलहरु र मकवानपुरका मतदातामा धन्यवाद सहित आभार समेत प्रकट गरेको छ । मकवानपुर निर्वाचन क्षेत्र नम्बर २ का उम्मेदवार विरोध खतिवडालाई उम्मेदवार बनाउने गठबन्धन र मतदान गर्ने मतदातालाई धन्यवाद् ज्ञापन गरेको हो । अध्यक्ष सूर्यचन्द्र न्यौपानेको अध्यक्षतामा बसेको बैठकमा इमानदार भएर मतदान गर्ने ३० हजार भन्दा बढी मतदातालाई धन्यवाद ज्ञापनकाे निर्णय गरेको हो । समाजवादीले मकवानपुर निर्वाचन क्षेत्र नम्बर २ का हरेक वडाहरुका मतदाताकहाँ समेत पुगेर धन्यवाद ज्ञापन गर्ने तयारी गरेकाे छ ।
नेकपा (एकीकृत समाजवादी)का बागमती प्रदेश इञ्चार्ज एवम् उपाध्यक्ष केदार न्यौपानेले निर्वाचन परिणाममा झिनो मतले हारजित भए पनि संगठन बलियो पारेर अघि बढ्न सके मकवानपुरमा समाजवादी पार्टी बलियो हुने बताएका छन् । यस्तै, स्थायी कमिटी सदस्य ललित बस्नेतले कम जनशक्ति भएको पार्टीले गठबन्धनको जोडमा चुनावमा होमिँदा यस्ता अप्ठ्यारा परिस्थिति आइलाग्ने भएकाले शिक्षाका रुपमा लिएर अघि बढ्नु पर्ने बताए ।
स्थायी कमिटी सदस्य विरोध खतिवडाले प्राविधिक रुपमा निर्वाचनमा पराजय हुनुमा अरुको गठजोडको आन्तरिक समस्या भए पनि नेता कार्यकर्तालाई निरास नभई पार्टी काममा लाग्न र सक्रिय रहन आग्रह गरेका छन् । आफू पनि मकवानपुरे जनतासँग निरन्तर सम्पर्कमा रहेर पार्टी काममा लागिरहने समेत उनले बताए ।
नेकपा समाजवादीका स्थायी कमिटी सदस्य समेत रहनुभएका खतिवडा मकवानपुर क्षेत्र नम्बर २ बाट नेकपा एमालेका महेश कुमार बर्तौलासँग पराजित भएका हुन्। बर्तौला ३४ हजार ९ सय १६ मतसहित विजयी हुँदा खतिवडा ३० हजार ३ सय ९६ मतले पराजित भए ।
एकीकृत समाजवादीले आगामी पुस ९ गते विस्तारित बैठक र भेला बोलाउने भएको छ । भेलाले पार्टीको मकवानपुर नेतृत्व हेरफेरसमेत गर्ने तयारी गरेको सचिवालय सदस्य एवम् प्रचार विभाग प्रमुख रामकुमार एलनले जानकारी दिए । स्थानीय तह निर्वाचन अघि नै पार्टीका तत्कालील अध्यक्ष श्रीधर पोखरेलले पार्टी छाडेपछि केन्द्रीय सदस्य सूर्यचन्द्र न्यौपाने पार्टी अध्यक्षको जिम्मेवारीमा रहेका छन् ।
