मकवानपुर । बागमती प्रदेशका प्रमुख यादवचन्द्र शर्माले ग्याल्पो ल्होसारको उपलक्ष्यमा शुभकामना दिएका छन् ।
नेपाली चाडपर्वहरुले आपसी भाइचारा,सामाजिक सद्भाव,सहिष्णुता र एकता कायम राख्न मद्दत पुर्याउने भन्दै उनले शुभकामना सन्देश दिएका हुन् ।
आज मंगलबार हिमाली समुदायका आदिवासी शेर्पा समुदायले मनाउने नयाँ वर्ष २१५० औं ग्याल्पो ल्होसारका सन्दर्भमा शुभकामना सन्देश जारी गर्दै प्रदेश प्रमुख शर्माले यस्तो दिएका हुन् । “भौगोलिक र प्राकृतिक रूपमा विविधतायुक्त हाम्रो देश नेपाल बहुजातीय,बहुभाषिक, बहुधार्मिक,बहुसांस्कृतिक विशेषताले भरिपूर्ण छ, ग्याल्पो ल्होसारजस्ता नेपाली राष्ट्रिय संस्कृतिको अभिन्न अंग बनेका छन्’ प्रदेश प्रमुख शर्माले आफ्नो शुभकामना सन्देशमा उल्लेख गरेका छन् ।
चाडपर्वबाट कायम हुने सामाजिक एकता तथा सद्भावलाई दिगो बनाउँनु हामी सबैको दायित्व भएको भएको उनको भनाई छ । “यस्ता चाडपर्वका माध्यमबाट कायम हुने सामाजिक एकता तथा सद्भावलाई दिगो र दरिलो बनाउनु हामी सबैको दायित्व हो” शुभकामनामा भनिएको छ ।
प्रमुख शर्माले ग्याल्पो ल्होसारका अवसरमा देश तथा देश बाहिर रहनु भएका सम्पूर्ण नेपाली दाजुभाई एवं दिदीबहिनीहरुमा सुख,शान्ति र समृद्धिको लागि शुभकामना व्यक्त गर्दै यो पर्वले नयाँ उत्साह र उमंग छर्दै आपसी एकता,सद्भाव र बन्धुत्वको भावना अभिवृद्धि हुन गई हाम्रो राष्ट्र थप सुदृढ बनाउन सघाउ पुगोस् भन्ने कामना समेत गरेका छन् ।
मकवानपुर । बागमती प्रदेश कृषि तथा पशुपंन्छी विकास मन्त्रालयले प्रदेश भित्रका ८ लाख ३३ हजार १ सय ८९ भेडाबाख्रालाई पीपीआर रोग विरुद्धको खोप लगाएको छ ।
मन्त्रालयले प्रदेशका ४ हजार २६४ वटा भेडा र ८ लाख २८ हजार ९२५ वटा बाख्रालाई गरि जम्मा ८ लाख ३३ हजार १८९ वटा भेडाबाख्रालाई पीपीआर रोग विरुद्धको खोप लगाइएको कृषि तथा पशुपन्छी विकास मन्त्रालयका सुचना अधिकारी अनुप अधिकारीले जानकारी दिए ।
फागुन १ गतेदेखि सुरु भएको सप्ताहव्यापी खोप अभियानअन्तर्गत प्रदेशका १३ वटा जिल्लाका किसानले पालेका भेडा बाख्रालाई पीपीआर रोगविरुद्ध खोप लगाइएको अधिकारीले जानकारी दिए ।
खोप कार्यक्रम ४ सय २५ जना भ्याक्सिनेटर र १ हजार २ सय ४४ खोप केन्द्रबाट सञ्चालन भएको उनले बताए । अभियान बाहेक अन्य समयमा समेत मन्त्रालयले भेडाबाख्रालाई उक्त खोप लगाउदै आएको छ ।
पीपीआर भेडाबाख्रामा विषाणुबाट लाग्ने संक्रामक रोग हो । यसलाई भेडाबाख्राको हैजा पनि भनिन्छ । नेपालमा पीपीआर रोगका कारण बर्सेनि भेडाबाख्रा मरेर कृषकहरूले ठूलो आर्थिक हानि बेहोर्नुपरेको छ । यस्तो अवस्था आउन नदिनका लागि खोप अभियान सञ्चालनमा ल्याइएको मन्त्रालयले जनाएको छ ।
अफ्रिकी देशबाट सुरु भएको यो रोग नेपालमा पनि सबैजसो जिल्लामा देखापरेको छ ।
पीपीआर रोगविरुद्धको सप्ताहव्यापी खोप अभियानअन्तर्गत शनिवारसम्म खोप लगाएको थियो । नेपाल सरकारले आगामी सन २०३० सम्म नेपालमा भेडा बाख्रामा लाग्ने रोग पीपीआर उन्मुलन गर्ने लक्ष्य लिएको छ । हेर्नुस् बिस्तृत बिवरण:

मकवानपुर । राज्य र गैरराज्य तर्फबाट मानव अधिकार उल्लंघनको घटना बढ्दो अवस्थामा रहेको तथ्यांक सार्वजनिक भएको छ ।
अनौपचारिक क्षेत्र सेवा केन्द्र (इन्सेक) ले सन् २०२१ को तुलनामा सन २०२२ मा मानव अधिकार उल्लंघनको घटना बढेको सार्वजनिक गरेको हो ।
इन्सेकले नेपाल मानव अधिकार वर्षपुस्तक २०२३ प्रकाशन गर्दै यस्तो तथ्यांक सार्वजनिक गरेको हो ।
इन्सेक बागमती प्रदेश कार्यालय संयोजक गणेश भण्डारीले राज्यपक्ष कमजोर हुंदा मानव अधिकार संरक्षणको पाटो झन्झन् कमजोर भएको बताए ।
इन्सेकले गरेको अभिलेखअनुसार सन् २०२२ मा बागमती प्रदेशमा मानव अधिकार उल्लङ्घन र ज्यादतीका घटनामा १ हजार ४ सय २५ जना पीडित भएका छन् । यो सङ्ख्या गत वर्ष सन् २०२१ भन्दा २ सय २४ जनाले बढी हो । गत वर्ष सन् २०२१ मा १ हजार १ सय ८३ जना पीडित भएका थिए । यस वर्ष मानव अधिकार उल्लङ्घनका घटनामा राज्य पक्षबाट ३४ जना महिला र ३ सय ४१ पुरुष गरी जम्मा ३ सय ७५ जना तथा ज्यादतीका घटनामा अन्य पक्षबाट ८ सय ७७ जना महिला, १ सय ७२ जना पुरुष र १ जना अन्य यौनिक अल्पसङ्ख्यक) सहित जम्मा १ हजार ५० जना पीडित भएको भण्डारीले बताए ।
यस वर्ष राज्यपक्ष अन्तर्गत भएका मानव अधिकार उल्लङ्घन अन्तर्गत कारागारमा रहेका ४ जना महिला र ४१ पुरुष गरी ४५ जनाको स्वास्थ्य लगायतका विभिन्न कारणले मृत्यु भएको उल्लेख छ । साथै कुटपिटका घटनामा ४ जना, गिरफ्तारीका घटनामा ३८ जना, यातनाका घटनामा ४ जना तथा अभिव्यक्ति, भेला तथा सङ्गठित हुने अधिकारमा ३० जना महिला र २ सय ४५ जना पुरुष गरी २ सय ५५ जना पीडित भएका छन् ।
यसैगरी सन् २०२१ मा मानव अधिकार उल्लङ्घन र ज्यादतीका घटनामा १ हजार १ सय ७३ जना पीडित भएका थिए जसमा राज्यपक्षबाट ३ सय ७५ जना र अन्यपक्षबाट ८ सय ९० जना पीडित भएका थिए ।
महिला अधिकार उल्ङ्घनका घटनामा सन् २०२२ मा बागमती प्रदेशमा ४ सय ३४ जना पीडित भएको अभिलेख इन्सेकले गरेकोछ । यस वर्ष बेचबिखनका घटनामा १३ जना, घरेलु हिंसाका घटनामा ९० जना, कथित बोक्सीको आरोपमा ३ जना, बलात्कारका घटनामा १ सय ७१ जना, बलात्कार प्रयासका घटनामा ३५ जना र यौन दुर्व्यवहारको घटनामा १७ जना महिला पीडित भएको अभिलेख छ ।
साथै परिवारजनबाट महिला मारिएका केही घटनामा पीडितपक्षले हत्याको आरोप लगायो भने आरोपित पक्षले आत्महत्या गरेको पाइएको इन्सेकले जनाएको छ ।
यस वर्ष बाल अधिकार उल्लङ्घनका घटनामा ४ सय २ जना पीडित भए । जसमध्ये बलात्कारका घटनामा २ सय ८५ जना, यौन दुर्व्यवहारको घटनामा १ जना बालक सहित १ सय २ जना, बालबालिका बेचबिखनमा ७ जना बालकसहित १८ जना, बालबिवाहका दुई ओटा र विद्यालयमा शारीरिक सजाय दिइएको २ जना बालिका र ४ जना बालक गरी ६ जना पीडित भएको अभिलेख भयो ।
इन्सेकका अनुसार देशको ७७ जिल्लामा रहेका जिल्ला प्रतिनिधिहरूले सङ्कलन गरेका मानव अधिकार उल्लङ्घन तथा ज्यादतीका घटनाहरूको प्राथमिक सूचनामा आधारित छ ।
इन्सेकले गरेको अभिलेखअनुसार सन् २०२२ मा मानव अधिकार उल्लङ्घन र ज्यादतीका घटनामा राज्यपक्षबाट ६ सय २२ जना तथा अन्यपक्षबाट ६ हजार ७ सय ५४ जना गरी जम्मा ७ हजार ३ सय ७६ जना पीडित भएको उल्लेख छ । सन् २०२१ मा मानव अधिकार उल्लङ्घन र ज्यादतीका घटनामा ६ हजार २ सय ८५ जना पीडित भएका थिए । गत वर्षभन्दा यो वर्ष १ हजार ९१ जनाले बढी हो । जसमा मानव अधिकार उल्लङ्घनका घटनामा राज्य पक्षबाट ५० जना महिला र ५ सय ७२ जना पुरुष गरी जम्मा ६ सय २२ जना तथा ज्यादतीका घटनामा अन्य पक्षबाट ५ हजार ९ सय ४४ जना महिला, ८ सय ७ जना पुरुष र ३ जना अन्य (यौनिक अल्पसङ्ख्यक) गरी जम्मा ६ हजार ७ सय ५४ जना पीडित भएको अभिलेख छ ।
यस वर्ष राज्यपक्षबाट १ जना महिला र ४ जना पुरुष गरी ५ जनाको हत्या भएको थियो । यातनाका घटनामा ४ जना, गिरफ्तारीका घटनामा ८१ जना, जातीय विभेदका घटनामा २२ जना, अमानवीय व्यवहारका घटनामा २५ जना, भेला तथा सङ्गठित हुने अधिकारमा ४ सय ५ जना, धम्कीका घटनामा २७ जना र कुटपिटका घटनामा ४ सय ४८ जना पीडित भएको अभिलेख भयो ।
यस वर्ष बाल अधिकार उल्लङ्घनका घटनामा १ हजार ४ सय १४ जना बालिका र ३९ जना बालक गरी जम्मा १ हजार ४ सय ५३ जना पीडित भए । जसमध्ये बलात्कारका घटनामा १ हजार ९ जना, यौन दुर्व्यवहारको घटनामा ३ सय २६ जना बालिका र १९ जना बालक सहित ३ सय ४५ जना बालबालिका बेचबिखनमा ७ जना बालक र ३९ जना बालकसहित ४६ जना, बालविवाहका ३२, नवजात शिशु हत्या ७ ओटा र विद्यालयमा शारीरिक सजाय दिइएको घटनामा १४ जना पीडित भएको अभिलेख भयो ।
साथै यस वर्ष महिलामाथि हुने हिंसाका घटनामा ४ हजार २ सय २७ जना पीडित भएको अभिलेख भयो । यस वर्ष महिला बेचविखन तथा ओसारपसार प्रयासका घटनामा ४८ जना, घरेलु हिंसाका घटनामा ३ हजार २१ जना, कथित बोक्सीको आरोपमा २३ जना, बलात्कारका घटनामा ६ सय ५ जना, बलात्कार प्रयासका घटनामा १ सय ४५ जना, यौन दुर्व्यवहारको घटनामा ४२ जना र बहुविवाहका घटनामा ४२ जना महिला पीडित भएको अभिलेखमा उल्लेख छ ।
इन्सेकले हरेक बर्ष फागुन ७ गते देशैभरको मानव अधिकारको अवस्था बारेको पुस्तक सार्वजनिक गर्दै आएको छ । आज प्रदेशको राजधानी हेटौंडामा पत्रकार सम्मेलन गर्दै प्रदेश कार्यालयले यस्तो तथ्यांक सार्वजनिक गरेको हो ।
थाहानगर/ उत्तरी क्षेत्रको एकमात्रै उच्च शिक्षा प्रदान गर्ने पालुङ बहुमुखी क्याम्पसलाई प्रदेश सरकारबाट निरन्तर सहयोग हुने बागमति प्रदेश सामाजिक बिकास मन्त्री कुमारी मोक्तानले बताएकी छिन् ।
पालुङ बहुमुखी क्याम्पसको २० औं वार्षिकोत्सव तथा परिषद भेलाको उद्घाटन गर्दै पालुङ क्याम्पसको लागि यो बर्ष पनि सामाजिक विकास मन्त्रालयले २५ लाख रुपैयाँ बिनियोजन गरेको बताइन ।
मन्त्री मोक्तानले थाहा नगरबाट सामाजिक बिकास मन्त्रालयमा शैक्षिक व्यवस्थापन, सुधार, बिकासकालागि प्राप्त भएको सबै योजनालाई संबोधन गरिएको बताइन ।
परिषद् भेलामा क्याम्पस ब्यवस्थापन समितिका अध्यक्ष तथा थाहा नगरपालिकाका प्रमुख बिष्णु बहादुर बिष्टले क्याम्पसको बार्षिक नीति र कार्यक्रम प्रस्तुत गर्दै पालुङ क्याम्पसलाई मकवानपुर उत्तरी क्षेत्रको महत्त्वपूर्ण शैक्षिक गन्तब्यको रुपमा बिकास गर्ने लक्ष्य रहेको बताए ।
परिषद् भेलामा क्याम्पस प्रमुख राजन मिश्रले क्याम्पसको वर्तमान अवस्था र भावी योजनाको सहितको प्रतिवेदन प्रस्तुत गरे । क्याम्पसका लेखापाल मधुसूदन रायमाझीले आर्थिक प्रतिवेदन प्रस्तुत गरेका थिए ।
भेलामा थाहा नगरपालिकाका उपप्रमुख भरत गोपाली, नारायणी यातायात ब्यवशायी संघका महासचिब सरोज कुमार खनाल, जनकल्याण माबिका प्रधानाध्यापक तथा क्याम्पस ब्यवस्थापन समितिका पूर्व अध्यक्ष सानोभाई कार्की, थाहा नगरपालिका वडा नम्बर ४ का वडा अध्यक्ष नारायण लामा, भूमि सम्बन्धि आयोग मकवानपुरका सदस्य अरुण रायमाझी, नेपाली काङ्ग्रेस थाहा नगर सभापति प्रमोदकृष्ण जोशी, नेकपा माओवादी केन्द्र थाहा नगर अध्यक्ष बिनोद कुमार लामा, नेकपा एमाले थाहा नगर अध्यक्ष अच्युत्तम प्रसाद ढकाल, राप्रपा थाहा नगर अध्यक्ष नवीन रायमाझी, थाहा नगर उद्योग वाणिज्य संघका अध्यक्ष कविराज खत्री, प्याब्सन थाहा नगर अध्यक्ष सुरेन्द्रमान प्रधान, फरक सोचका अध्यक्ष यादव रायमाझी लगायत परिषद सदस्यहरु, क्याम्पस संचालक समितिका पदाधिकारीहरु, विभिन्न विद्यालयका प्रधानाध्यापकहरु, प्राध्यापक, विद्यार्थीहरुको उपस्थिति रहेको थियो।
वार्षिकोत्सवको अवसरमा पालुङ क्याम्पसका प्रथम व्याचका विद्यार्थी नानुमैया प्रधानलाई विद्यावारिधी (पिएचडी) को तयारी गरिरहेको भन्दै सम्मान गरिएको थियो । सोहि अवसरमा उत्कृष्ट प्राध्यापक अंग्रेजी विषयका गोपाल उप्रेती, बिगत १३ बर्ष क्याम्पस प्रमुखको जिम्मेवारीमा रही क्याम्पसको प्रगतिको लागि खटिएकोमा पूर्व क्याम्पस प्रमुख रामहरि अधिकारीलाई सम्मान गरिएको थियो ।
त्यस्तै क्याम्पसको सुचना प्रवाहमा महत्त्वपूर्ण योगदान पुर्याएकोमा थाहापाटी अनलाइनका सम्पादक शम्भु अधिकारी र क्याम्पसको भौतिक निर्माण कार्यमा योगदान पुर्याएबापत श्रवण लामालाई सम्मानित गरिएको थियो।
यसैबिच शुक्रबार भएको परिषद् भेलाले पुनः बिष्णु बहादुर बिष्टको अध्यक्षतामा नयाँ ब्यवस्थापन समिति चयन गरेको छ । समितिको सदस्यहरुमा सहदेव ढकाल,सरोज कुमार खनाल, सगुन कुमार ढकाल, रिता प्रधान, जुजुभाइ प्रधान, केदार कार्की, सुरेन्द्रमान प्रधान, बिमल कुमार ढकाल, सुदर्शन कार्की र मनोज कुमार अधिकारी रहेको निर्वाचन अधिकृत उमेश श्रेष्ठले जानकारी दिए ।
निर्वाचित संचालक समितिको पहिलो बैठक फागुन ९ गते बस्ने र बैठकले पदाधिकारी र अन्य सदस्यहरुको मनोनित गर्ने नवनिर्वाचित अध्यक्ष बिष्टले बताए ।
मकवानपुर । बागमती प्रदेश सरकारले बिगत ५ वर्षको अवधिमा गरेका कामको विवरण सार्वजनिक गरेको छ ।
बागमती प्रदेश मुख्यमन्त्री तथा मन्त्रिपरिषद्को कार्यालयको आयोजनामा आज आयोजित पत्रकार सम्मेलनमा पुस्तक मार्फत प्रगति विवरण सार्बजनिक गरेको हो ।
प्रदेशका मुख्यमन्त्री शालिकराम जम्मकट्टेलले उक्त पुस्तक सार्वजनिक गरेका हुन् । प्रदेश सरकार स्थापना भएदेखि अहिलेसम्मका उपलब्धीहरु पुस्तकमा समेटिएको मुख्यमन्त्री जम्मकट्टेलले बताए ।
प्रदेश सरकारले पाँच वर्षको अवधिमा धेरै काम गरेको र पुस्तकमा छोटकरी रुपमा समेटिएको उनले बताए । पाँच वर्षे उपलब्धका बारेमा आम नागरिकलाई जानकारी गराइदिन पनि उनले आग्रह गरे ।
२०७४ साल माघ ३ गते प्रदेशको अस्थायी राजधानी तोकिएदेखि अहिलेसम्म प्रदेश सरकारले गरेका कामका विषयमा पुस्तकमा समेटिएको छ । प्रदेशका मन्त्रालयनै पिच्छे गरिएका कामको विवरण पुस्तकमा समेटिएको प्रदेशका प्रमुख सचिब मुकुन्द प्रसाद निरौलाले जानकारी गराए ।
यस्ता छन् सम्पादित कार्यहरूको संक्षिप्त विवरण
नेपाल सरकारले मिति २०७४ माघ ३ गते प्रदेश ३ को राजधानी हेटौडा तोकी प्रदेश प्रमुख नियुक्त गरेको र मिति २०७४ माघ २८ गते नेपालको संविधान बमोजिम प्रदेश प्रमुखबाट श्री डोरमणि पौडेललाई मुख्यमन्त्री नियुक्त गरी प्रदेश सरकारको गठन भएको ।
शुन्यताबाट शुरु भएको प्रदेश सरकार स्थापनाको समयमा ७ मन्त्रालय र निकायहरू रहेकोमा हाल ११ मन्त्रालय तथा प्रदेश सरकार अन्तरगत निकाय १९८ कायम रहेका ।
यस प्रदेश भित्र १३ जिल्ला, संघीय निर्वाचन क्षेत्र ३३, प्रादेशिक निर्वाचन क्षेत्र ६६ र तीन महानगरपालिका, एक उपमहानगरपालिका, ४१ नगरपालिका र ७४ गाउँपालिका गरी जम्मा ११९ वटा स्थानीय तहहरू रहेका
सम्वत् २०७८ को जनगणना अनुसार बागमती प्रदेशमा पुरूष ३०३३५७४ महिला ३०५०४६८ गरी कूल ६०८४०४२ जनसङ्ख्या रहेका छन् ।
प्रदेश सरकारबाट पाँच वर्षको अवधिमा ७० वटा ऐन संशोधन समेत, अध्यादेश ११, नियमावली ३३, निर्देशिका ५, कार्यविधि ४४, मापदण्ड ७ र आदेश १२ गरी जम्मा १८६ ओटा जारी भएको ।
प्रदेशको पहिलो पाँच वर्षे आवधिक योजना निर्माण, कार्यान्वयन र त्यसको अर्धवार्षिक समीक्षा सम्पन्न गरिएको साथै प्रदेशको वस्तुस्थिति विवरण २०७५ तयार गरी तथ्याङ्क उपयोग गरिएको ।
संघीय सरकारसंगको समन्वय र सहकार्यमा २० वटा समपुरक र विशेष अनुदानका आयोजनाहरू सञ्चालन र नवप्रवर्तन साझेदारी कोषमार्फत ११ वटा स्थानीय तहहरूमा नवप्रवर्तनात्मक परियोजनाहरू सञ्चालन गरी स्थानीय तहमा रोजगारी सिर्जना तथा आर्थिक विकासलाई प्रवर्द्धन गरिएको ।
यस अवधिमा प्रदेश सुशासन केन्द्रमार्फत बागमती प्रदेश अन्तर्गत प्रदेश र स्थानीय तहमा निर्वाचित, मनोनित तथा नियुक्त पदाधिकारी तथा कर्मचारीहरूका क्षमता विकासतर्फ हालसम्म ५,११२ जनप्रतिनिधिहरू तथा ८,१७४ जना कर्मचारीहरू गरी कूल १३,२८६ जना लाभान्वित भएका ।
प्रदेशमा आव २०७८र०७९ सम्ममा १५५१७९ उद्योग दर्ता भएको ।
९ वटा जिल्लामा १० शीत भण्डार निर्माणको कार्य सम्पन्न हुने अवस्थामा रहेको जसबाट १५८०० मेट्रिक टन फलफुल तथा तरकारी भण्डारणमा सहजता हुने ।
१०४१ सिंचाई योजना सम्पन्न भई १३१३४८ हेक्टर जमीनमा सिंचाई सुविधा उपलव्ध भएको र १६ वटा नदीहरूको नदी नियन्त्रणको गुरु योजना तयार गरी नदी नियन्त्रणका कार्य शुरु गरिएको ।
२७६ वटा खानेपानी योजनाहरू सम्पन्न भई थप ४६१९६ घरधुरीहरूमा आधारभूत स्तरको खानेपानी सेवा पुगेको
यस अवधिमा कच्ची सडक ७६१ किमि, ग्राभेल ७७९ किमि, कालोपत्रे ५३६ किमि, ढलान सडक १५४ किमि, सडक पुल ६९ वटा र झोलुङ्गे पुल ७ वटा सम्पन्न भएका ।
सहरी विकास तथा भवन पूर्वाधार तर्फ ३३० भवन, ४३४ पार्क निर्माण, १९५ सरकारी कार्यालय मर्मत र २०८९ जनता आवास निर्माण सम्पन्न ।
प्रदेशभित्र ५३८९७५ सवारी दर्ता भएका र १०४३६ जनाले व्यावसायिक तालिम प्राप्त गरेका ।
युवा उद्यमशीलता विकास अन्तरगत २६० स्वंयसेवक परिचालन, ४३ व्यवस्थित खेल मैदान, जिल्ला स्तरीय रङ्गशाला ७, कभर्ड हल ३० वटा सम्पन्न भएको ।
सामुदायिक वन तथा अन्यक्षेत्रमा गरी ३९६ हेक्टरमा कूल ६२२९८५ जडिबुटीको विरूवा रोपण गरिएको ।
वागमती प्रदेशलाई ९७। २२ प्रतिशत साक्षरता सहित नेपालकै पहिलो साक्षर प्रदेश घोषणा गरिएको ।
उच्च शिक्षामा महिलाको पहूँच बढाउन स्नातक र स्नातकोत्तर तहमा अध्ययनरत ५६७ छोरी बुहारीलाई छात्रवृति प्रदान गरिएको ।
प्रदेशभित्र विभिन्न सूचकका आधारमा २० नमूना विद्यालय स्थापना , २२१ वटा शैक्षिक परामर्श केन्द्र सञ्चालन अनुमति ७२ विद्यालयलाई वस सेवा उपलव्ध, ३३१ माविमा इ लाइब्रेरी, १९७ विद्यालयमा विज्ञान प्रयोगशाला स्थापना र २२१ वटा सामुदायिक क्याम्पसहरूलाई सवलीकरण गरिएको ।
आधारभूत तहदेखि माध्यमिक तहसम्मका ३७८८ जना शिक्षकहरूलाई पेशागत विकास तालिम र ९०२५ जनालाई पुनरताजगी तालिम प्रदान गरिएको ।
प्रदेशभित्रका पर्यटकीय पदमार्ग, मठमन्दिर, पार्क, पर्यटन सूचना केन्द्र, पिकनिक घर र होमस्टे गरी ११५५० स्थानको सवलीकरण र व्यवस्थापन गरिएको ।
बागमती प्रदेशको पर्यटन ब्रान्ड नाम स्वीकृति गरी लागु गरिएको साथै जुगल हिमश्रृंखला आरोहण खुला गरी पहिलो आरोहण सम्पन्न गरिएको ।
विद्यालय स्वास्थ्य, सरसफाई र छात्राहरूको स्वास्थ्य प्रवर्धनका लागि एक विद्यालय एक नर्स कार्यक्रम हालसम्म ११९ तहका ४५९ विद्यालयमा कार्यान्वयन गरिएको ।
मुख्यमन्त्री जनता स्वास्थ्य कार्यक्रम र प्रदेशका १३ प्रादेशिक अस्पतालमा विशिष्टिकृत सेवा सञ्चालनमा ल्याइएको
प्रदेश लोकसेवा आयोगबाट सार्वजनिक सेवा प्रवाहको लागि ८२५ विभिन्न पदको विज्ञापन मार्फत परीक्षा सञ्चालन गरी नियुक्तिको लागि सिफारिस भएको ।
बागमती प्रदेशको स्थानीय मानव विकास प्रतिवेदन र दिगो विकास लक्ष्यको आधार तथा मार्गचित्र तयार गरिएको
१३ जिल्लाका जिर्ण प्रहरी चौकी निर्माण गरी सुरक्षाकर्मीका लागि कार्य वातावरण उपयुक्त सिर्जना गरिएको ।
यस अवधिमा प्रदेश सरकार र मातहतका निकायहरूलाई विपक्षी बनाई दायर भएका २०८ मुद्दामध्ये ७४ मुद्दा किनारा लागिसकेको जसमा ८१ प्रतिशत मुद्दामा सफलता प्राप्त भएको ।
