मकवानपुर । राष्ट्रिय अपाङ्ग महासंघ नेपाल बागमती प्रदेशले बागमती प्रदेशका सांसदहरुलाई ध्यानाकर्षण पत्र बुझाएका छन् ।
हालै प्रस्तुत प्रदेस सरकारको सिदान्त र प्राथमिकतामा प्रस्तुत गरिएका बुदाँहरुमा सिमान्तकृत र पछाडि पारिएका वर्ग भनि गोलमटोल शव्दहरुको प्रयोग गरि प्राथमिकतामा राख्नुपर्ने अपाङ्गता भएका व्यक्तिहरुको वर्गलाई सम्वोधन नगरिएको प्रति राष्ट्रिय अपाङ्ग महासंघ नेपाल बागमती प्रदेसको गम्भिर ध्यानाकर्षण भएको जनाइएको छ।
अपाङ्गता भएका ब्यक्तिको हक, हित र अधिकार संरक्षण, सम्बर्धन र प्रवर्धनको लागि आफूहरले २०५० सालदेखि निरन्तर लागिपर्दै आएको तर अझैसम्म पनि भौतिक संरचनालगायतको धेरै पाटोमा असहजता भोग्नु परेको महासंघका अध्यक्ष अश्विन लम्सालले बताए । महासंघले ६० जना प्रदेश सभा सदस्यहरुलाई ध्यानाकषर्ण पत्र बुझाएकाे लम्सालले बताए ।

“आर्थिक विकासका लाभहरुको समन्यायिक वितरण र उत्पादनका साधनमा सीमान्तीकृत समूह तथा समुदायको पहुँच अभिवृद्धि गर्ने नीति अवलम्बन गरिनेछ,अपाङ्गता भएका वर्ग, पिछडिएको क्षेत्र वर्ग र समुदायलाई आर्थिक गतिविधिमा मूलप्रवाहीकरण गरी समावेशी आर्थिक विकासको आधार तयार गरिनेछ” भनिएको प्रति महासंले ध्यानाकर्षण जनाएको हो ।
महासंघले “प्रदेशको संस्थागत विकास र सबलीकरणको लागि प्रदेशका संरचनाहरुको पुनरावलोकन गर्ने, कार्यालयहरुको संगठन तथा व्यवस्थापन सर्वेक्षण गर्ने, प्रदेश मन्त्रालय निकाय र कार्यालयहरुको पहुँचयुक्त भौतिक संरचना निर्माण गर्ने, प्रदेश कानून तर्जुमा गर्ने, प्रदेश सरकारको जनशक्ति व्यवस्थापन गर्ने, प्रदेशको सेवा प्रवाहलाई थप व्यवस्थित गर्न एकीकृत सेवा कार्यालय स्थापना गर्ने” भन्ने सिद्धान्त पछ्याउन माग गरेको छ ।
पूर्वाधार विकास अन्तरगत प्रदेशको सन्तुलित आर्थिक विकासको लागि पहुँचयुक्त भौतिक पूर्वाधारको विकास गर्ने, प्रदेश राजधानीलाई संघीय राजधानीसँग जोड्ने सडकको निर्माण आगामी आर्थिक वर्षभित्र सम्पन्न गर्ने, प्रदेश गौरव आयोजनाहरुको निर्माण कार्य निर्धारित समयभित्र सम्पन्न गर्ने, अधुरा आयोजनाहरु सम्पन्न गर्ने, प्रदेश सडक गुरुयोजना अनसुार सडक निर्माण गर्ने, प्रदेश लोक मार्गहरुको विस्तार र स्तरोन्नति गर्ने, विद्यमान भौतिक पूर्वाधारहरुको नियमित मर्मत सम्भार गर्ने भन्ने सिद्धान्त पछ्याउन पनि महासंघले माग गरेको छ ।
यसैगरी पर्यटन क्षेत्रको विकासतर्फ मौलिक कला, संस्कृति र ऐतिहासिक सम्पदाहरुको संरक्षण र सम्वर्द्धन गर्ने, पर्यटकीय पहुँचयुक्त पूर्वाधार विकासमा लगानी गर्ने, धार्मिक तथा मनोरञ्जनात्मक पर्यटन विकास गर्ने, आन्तरिक पर्यटन प्रवर्द्धन गर्ने, पर्यटन क्षेत्रलाई उद्योगको रुपमा विकास गर्नुपर्ने माग गरिएको छ ।
मकवानपुर । कुवाको सिमित पानी, दामासाही भागबन्डा गरेर कसरी गुजारा चल्छ ? यसको राम्रो अनुभव छ मकवानपुर जिल्ला थाहागरपालिकाकी सान्नानी कार्कीलाई ।
“एका विहानै कुवामा पानीको लागि लाम लाग्न पुगिएन भने दिनभर घरमा ‘थोप्पो’ पानी हुँदैनथ्यो” कार्की भन्छिन “पाहुना आउदा पानी पुर्याउन धौ धौ थियो ।”
यो उनको बिगत हो, अब त्यो बिगत जस्तो छैन दैनिकी । रातभरी कुवामा जम्मा भएको पानी विहान भेला भएका महिलाहरु मग (पानी उभाउने भाँडो) ले भाग लगाउँथे । कस्ले कति मग पानी उभाउन पाउने भनेर । कसैको घरमा पाहुना आएको भए एक वा दुई मग थपिदिन्थे छिमेकीको मायाले । नत्र सामन्यत: परिवार संख्या अनुसार पानीको बाँडफाँड हुन्थ्यो ।
वर्षौसम्म खानेपानीको अभाव खेपेका मकवानपुर थाहा नगरपालिका टिष्टुङ कुवापानीले धेरै पुस्ता फेर्यो । गाउँको नामै कुवापानी । गाउँमा प्रतिनीधि निर्वाचित भएर आएपछि खानेपानी घरघरमा पुर्याउने योजना बन्यो । घरघरमा पानीको धारा पाउने योजना सुनेरै उपभोक्ता उत्साहित भए ।
कुवापनीसंगै थाहा नगरपालिका वडा नम्बर ११ टिष्टुङकै कालोपानी ठाडोखोलामा पनि घरैपिच्छे शुद्ध खानेपानीसहित धारा पुर्याउने योजना थपियो । अहिले भने कुवापानीले मुहार फेरेको छ । अब मगले पानी भाग लगाउने दिनको अन्त्य भएको छ ।
निरन्तरको प्रयासपछि कुवापनी गाउँका २८ वटै घरमा धारा जडान भएको छ । धारामा नियमित पानी आउँछ, कुवापानीकी निरा घिसिङले भनिन् । ‘खानेपानी बोक्न जाँदा बालबालिकालाई समयमै खाना बनाउन नभ्याएर कतिपटक गाउँलेहरुले स्कूलसम्म पठाउन भ्याउँदैन थिए’ निराले पुराना दिन सम्झिइन् ।
खानेपानी लिनकै लागि कुवापानीबासीलाई डेढ घण्टा धाउन पर्थ्यो । थाहा नगरपालिका वडा नम्बर ११ का वडाध्यक्ष दिनेश तामाङले भने–‘अन्नको भन्दा नि दुःख पानीको थियो, अहिले दुःख तोडियो नागरिकहरु खुसी छन् ।’ विकासका कामसंगै घरघरमा धारा पुर्याउँदा निकै खुशी लागेको वडाध्यक्ष तामाङले बताए । ‘नागरिकको लागि काम गर्ने हामी प्रतिनीधिलाई नागरिकको आवश्यकता पूरा गर्न पाउँदा खुसी लाग्ने रहेछ ।’
विद्युतको सहायताले मुहानदेखि २२ सय मीटर माथि लिफ्टीङ गरी वस्तीभन्दा माथि निर्माण गरिएको पानी ट्याङ्कीबाट अहिले कुवापानीवासीलाई खानेपानी वितरण भइरहेको छ ।
खानेपानी आयोजनाका लागि स्थानीय सरकारको मात्र लगानीले पुगेन । यसका लागि उपभोक्ताहरु कम्मर कसेर लागे । खानेपानीको अभाव टार्न २८ परिवारले ५३ लाख जुटाए । उनीहरु महिनौसम्म श्रमदानमा जुटेर यति धेरै लगानी गरेका हुन् ।
गाउँका लागि आएको योजनामा श्रमदान गर्दा योजनाप्रती अपनत्व हुने र दीगो पनि हुने वडाध्यक्ष तामाङले सुनाए । कुवापानी खानेपानी आयोजनाका लागि थाहा नगरपालिकाले २० लाख, गैरसरकारी संस्था च्वाइस नेपालले २५ लाख लगानी गरेका छन् । बाँकी श्रमदानबाटै योजना निर्माण भएको हो ।
‘आयोजनाको लागि अझै ८५ हजारजति अपुग छ’–वडाध्यक्ष तामाङले भने । उनले नपुग रकमको लागि स्रोत जुटाउन लागिपर्ने प्रतिवद्धता व्यक्त गरे । यस योजनामा ६/६ हजारको दुईवटा र एउटा १० हजार लिटरको गरी तीनवटा खानेपानी ट्याङ्की रहेका छन् ।
कुवापानीबासीका जस्तै खानेपानीका लागि अभाव झेलीरहेका थाहा नगरपालिका वडा नम्बर ११ टिष्टुङकै फलाँटे, भट्टीडाँडा, तल्लो देउराली, माथ्लो देउरालीलगायतका क्षेत्रका बासिन्दाहरुको पनि घरघरमा खानेपानी धारा जडान भएको छ ।
यि दुवै आयोजना हालै उद्घाटन भएको छ । स्वच्छ पानी पिउने अधिकारको सम्मान गर्न खोजेको थाहा नगरपालिकाका नगर प्रमुख विष्णु बहादुर विष्टले बताए ।
‘खानेपानी आयोजनामा टिष्टुङका उपभोक्ताको लगाव र लगानी उदाहरणीय छ, श्रमदानमा भएको उत्साह अतुलनीय छ’, नगर प्रमुख विष्टले भने । थाहा नगरपालिकाको विभिन्न किसिमका विकास र आयआर्जनको क्षेत्रमा समेत साँझेदारी गर्दै आएको च्वाइस नेपालको लगानी थाहानगरका लागि सहयोगी सावित भएको नगर प्रमुख विष्टले बताए ।
नागरिकसंग प्रत्येक्ष सरोकार राख्ने योजनामा गाउँपालिका साँझेदार बन्ने विष्टको भनाइ थियो । १ सय ६७ घरमा पानी पुयाइएको यस योजनामा मुख्य ५० हजार लिटरसहितको ३ वटा पानीट्याङ्की रहेको छ । टिष्टुङको यस योजनामा ‘एक घर, एक धारा’ अभियानलाई कार्यान्वयनमा ल्याइएको छ ।
कालोपानी ठाडोखोला खानेपानी आयोजनाका लागि थाहा नगरपालिकाको ४५ लाख लगानी छ । उक्त योजनाका लागि गैरसरकारी संस्था च्वाइस नेपालले ८० लाख र स्थानीय उपभोक्ताले ५६ लाख बराबरको श्रमदान जुटाएका छन् । कुल १ करोड ८१ लाख कुल लागत रहेको योजनाको काम सकिएको छ । उपभोक्ताहरुले प्रतिवद्धताको साथ काम गरेकोले योजना सम्पन्न भइ घरघरमा धारा पुर्याउन सफल भएको वडा कार्यालयले जनाएको छ ।
यस आयोजनामा उपभोक्ताहरुले कार्यालय भवन समेत बनाएका छन् । उनीहरुले खानेपानी सेवालाई व्यवस्थित गर्न इस्टिमेट बाहेकको श्रमदान गरी भुईतले कार्यालय भवन निर्माण गरेका हुन् । भवनको लागत करिब २० लाख रहेको छ । खानेपानी आयोजना सम्पन्न भई घरघरमा पानी थाप्न पाएपछि स्थानीय ठूली स्याङ्तानले खुसी व्यक्त गरिन् ।
‘टाढाबाट बोकेर पानी खाइन्थ्यो, अब घरमै धारामा थापेर खाइन्छ’ स्याङ्तानले हर्षित हुँदै भनिन् । उनले यस आयोजना सम्पन्न गर्न सहयोग गर्ने सबैलाई धन्यवाद दिइन् ।
थाहानगरको ११ नम्बर वडामा निर्माण सकिएको दुवै खानेपानी आयोजना शुल्कमा आधारित बनाई यसको दीगोपना दिइने वडाध्यक्ष दिनेश तामाङले बताए । योजनाको ३० वैशाखमा सार्वजनिक सुनुवाई गरी आम नागरिकलाई हिसाबकिताब सार्वजनिक गरिएको र ३ जेठमा आयोजनाको उद्घाटन गरिएको हो । केही समय परीक्षणका रुपमा खानेपानी वितरणसंगै आम उपभोक्ता भेला आयोजना गरिने वडाध्यक्ष तामाङले बताए । भेलाले महशुल दर तोक्ने, आयोजना निरन्तर संचालन गर्ने लगायतका विषयमा कार्ययोजना निर्माण गरी अघि बढ्ने उनको भनाइ छ । यसका लागि उपभोक्ता, थाहा नगरपालिका र सहयोगी संस्था च्वाइस नेपालको अभिभावकत्व सँधै आवश्यक रहने तामाङले बताए ।
मकवानपुर । दोश्रो बागमती प्रदेश खेलकुद प्रतियोगिता अन्तर्गत एथलेटिक्समा मकवानपुरले २ स्वर्ण पदक जितेकाे छ । मगलबार भएकाे एथलेक्टिक्स तर्फकाे २ मिटर दौडमा मकवानपुरका दिना गोपाली र जिकेश सापकोटाले स्वर्ण पदक जितेका हुन् ।
प्रदेश खेलकुद विकास परिषद्को आयोजनामा भइरहेकाे प्रतियोगितामा २ सय मिटरको प्रतिस्पर्धामा मकवानपुरका गोपालीले महिला तर्फ र सापकोटाले पुरुष तर्फकाे दौडमा स्वर्ण पदक जितेका हुन् । हेटौंडास्थित पिप्ले–क्याम्पा रंगशालामा भएकाे दौडमा दिनाले निर्धारित दुरी २९.३७ सेकेन्ड र जिकेशले २४.६० सेकेन्ड मा पुरा गरी स्वर्ण पदक हात पारेका हुन् । महिला तर्फ भक्तपुरकी स्वागता खाइतु र चितवनकी रोजिता गुरुङले क्रमशः रजत र कांस्य पदक प्राप्त गरे भने ।
पुरुषतर्फ मकवानपुरकै सुजन राई र चितवनका शेखर उप्रेतीले कांस्य पदक जिते । महिला ८ सय मिटर दौडमा ललितपुरकी रजिना दुलालले २ मिनेट ४० सेकेन्डमा दौड पूरा गर्दै स्वर्ण पदका प्राप्त गर्दा यसै विधामा नुवाकोटकी आस्था राईले रजत र रामेछापकी भगवती खड्काले कांस्य पदक जितेका छन् । ८ सय मिटर पुरुष दौड विधामै पुरुष तर्फ चितवनका अृमत बोटले स्वर्ण हात पार्न सफल भए । उनले यो दूरी २ मिनेट ८ सेकेन्डमा पूरा गर्दै स्वर्ण पदका जितेका हुन् । सिन्धुपाल्चोकका टीकाराम लोप्चन रजत र नुवाकोटका दिनेश राई कांस्य पदक जित्न सफल भए ।
५ हजार मिटर दौडमा सिन्धुपाल्चोकका मिगमार सिंहले सफलता पाए । उनले १८ मिनेटमा ९ सेकेन्डमा उक्त दूरी पार गर्दै स्वर्ण पदका हात पार्दा काठमाडौंका धर्म महर्जन र सिन्धुपाल्चोकै विश्वराम कुँवरले क्रमशः रजत र कांस्य पदक मा चित्त बुझाए । यसै विधाको महिला तर्फ सिन्धुपाल्चोककै निनु तामाङले २१ मिनेट ८ सेकेन्डमा निर्धारित दुरी पार गर्दै स्वर्ण पदक जितिन् । दोलखाकी सोनु घोतानेले रजत र भक्तपुरकी रोस्टिना सितिखाले कांस्य पदक जिते ।
यसैगरी महिला लङजम्पमा चितवनकी प्रनिशा महतोले स्वर्ण जितिन् । चितवनकै आसिका गुरुङले रजत र दोलखाकी रोजिना कार्कीले कांस्य पदक जिते । पुरुषको लङजम्पमा चितवनका सुजितकुमार महतोले स्वर्ण पदक हात पारे भने चितवनकै सुदीप महतोले रजत र दोलखाका सुदीप मिजारले कांस्य जिते । पुरुषको सटसुटमा चितवनका ललित राउतले १२.७८ मिटर पर फ्याक्दै स्वर्ण पदक जिते । रामेछापका प्रचण्ड ढुंगेल रजत र चितवनका दीपेश महतो कांस्य पदक जित्न सफल भए । महिला तर्फकाे सटपुटमा चितवनकी अप्सरा श्रेष्ठले स्वर्ण जित्दा सिन्धुलीकी प्रमिला माझीले रजत र रामेछापकी अनिता कार्कीले कांस्य पदक हात पारेका छन् ।
मकवानपुर । बागमती प्रदेश सभाकाे दाेस्राे अधिवेशन सुरु भएकाे छ । मंगलबार सभाकाे दाेस्राे अधिबेशनकाे पहिलाे बैठक शुन्य समयमात्र संचालन भएर स्थगित भएकाे छ । बिशेष समय नरहेकाे मंगलबारकाे प्रदेश सभा बैठक विशेष समयमा प्रवेश नै नगरी बुधबारसम्मका लागि स्थगित भएको छ ।
मंगलबारकाे प्रदेश सभा बैठकमा सभामुख सानु कुमार पाठकले प्रदेश प्रमुखकाे कार्यालयबाट प्राप्त विधेयक फिर्ता र सन्देशको पत्र तथा प्रमाणीकरण सम्बन्धी पत्र पढेर सुनाएका थिए । त्यस लगतै सभामुख पाठकले बैठकमा विशेष समय नरहेको जानकारी गराउँदै शुन्य समयको प्रारम्भ गरेका थिए । संसदमा शुन्य समयमा सांसदहरुले देशकाे जल्दाेबल्दाे समस्याका बारेमा आफ्नाे धारणा राख्ने गर्दछन् ।
मंगलबारकाे प्रदेश सभाकाे शुन्य समयमा सत्तापक्ष र प्रतिपक्ष दलका सांसदहरुले राष्ट्रिय सरोकारको साथै बाढीपहिरोबाट प्रभावित क्षेत्रलाई समय मै सरकारको तर्फबाट निगरानी र उद्दार कार्यको लागि सजकता अपनाउनुपर्ने धारणा व्यक्त गरे ।सभामा नेपाली कांग्रेसका नेता कुन्दनराज काफ्ले, नेकपा एमालेका बागमती प्रदेश संसदीय दलका प्रमुख सचेतक मधुसुदन प्रसाद पौडेल, राप्रसा संसदीय दलका नेता उद्धब थापा, बागमती प्रदेश नेकपा एकीकृत समाजवादी पार्टीका संसदीय दलका नेता कृष्णप्रसाद शर्मा खनाल र हाम्रो नेपाली पार्टी संसदीय दलका नेता शैलेन्द्र राज बज्राचार्यल लगायतले धारणा व्यक्त गरेका थिए ।
प्रदेश सरकारले जनताको लागि पूर्वाधार विकास, आर्थिक समृद्धिलाई अग्रसर तुल्याउन जनमुखी कार्यक्रम ल्याउनुपर्ने सु्झाव दिएका थिए । उनीहरुले प्रदेशको सबै जिल्लाहरुलाई सदरमुकामसम्म जोड्ने सडक सञ्जाल, खानेपानी, विद्युतको विस्तार र स्वास्थ्य उपचार गर्ने कार्यलाई प्राथमिकतामा राखेर बजेटलाई कार्यान्वयन गर्नुपर्ने उल्लेख गरे ।
उनीहरुले प्रदेशमा सुशासन ल्याउन र बढ्दै गएको भ्रष्टाचारलाई न्यूनिकरण गर्नका लागि सबै राजनीतिक दलहरुमा दलगत स्वार्थ त्यागेर कठोर कलम चाल्न आग्रह गरे । बैठकमा नक्कली भुटानी शरणार्थी प्रकरणमा दोषी जुनसुकै दलका नेता भएपनि कानूनी कठघरामा उभिनु पर्ने बताउँदै सांसदहरुले त्यस्ता व्यक्तिहरुलाई राजनीतिक दलका उच्च नेताहरुले संरक्षण दिन नहुनेतर्फ सबैले आत्मसमिक्षा गर्नुपर्ने समय आएको स्पष्ट पारेका थिए ।
प्रदेश सरकारले प्रदेशको सबै जिल्लामा सुशासनलाई कार्यान्वयन गर्न र जनतालाई आधारभुत रुपमा विकासको पूर्वाधार, प्रत्यक्ष रोजगारीको अवसर, उच्च शिक्षा र गुणस्तरीय शिक्षालाई प्रभावकारी रुपमा परिचालन गर्ने गरी बजेट ल्याउनुपर्ने उनीहरुले माग गरे ।

यस्तै, बैठकमा बागमती प्रदेशका आर्थिक मामिला तथा योजनामन्त्री बहादुर सिं लामा तामाङ्ले प्रदेश सरकारको तर्फबाट विनियोजन विधेयक २०८० को सिद्दान्त र प्राथमिकताको सम्बन्धमा प्रतिवेदन प्रस्तुत गरेका थिए । उक्त प्रतिवेदनमा सरकारले आगामी आर्थिक वर्ष २०८०/०८१ को लागि प्रदेशभित्र गुणस्तरीय स्वास्थ्य सेवाको प्रवाह साथै शिक्षालाई दक्ष उत्पादनमुलक बनाउने र रोजगारीलाई उच्च प्राथमिकताका साथ कार्यान्वयन गर्दै लैजाने उद्देश्य रहेको उनले जानकारी दिए ।
उनले प्रदेशका विपन्न नागरिकहरुलाई आर्थिक आयआर्जनतर्फ कृषि उद्यमी र उत्पादनको लागि प्याकेज कार्यक्रम सञ्चालन गर्ने र साना उद्यमीहरुलाई उद्योग सञ्चालनको लागि सहुलियतपूर्ण ऋण उपलब्ध गराउनेतर्फ जोड दिए । उक्त बैठकमा उनले विनियोजन विधेयक २०८० को सिद्धान्त र प्राथमिकताको सन्दर्भमा दफावार छलफल गरियोस् भनी प्रस्ताव टेबुल गरे । उक्त विधेयकमाथि अर्काे बैठकमा दफावार छलफल हुने प्रदेश सभाका प्रमुख सचिव कृष्णहरि खड्काले जानकारी दिए ।
सभाकाे शुन्य समयमा सभाका सदस्यहरुले धारणा राखे पछि प्रदेश सभाको सभामुख भुवनकुमार पाठकले प्रदेश सभाको दोस्राे अधिवेशनकाे दाेस्राे बैठक जेष्ठ १० गते बिहान ११ बजे बस्ने गरी स्थगित भएको जानकारी दिए ।
मकवानपुर। बागमती प्रदेश सरकारले ३ दिन गणतन्त्र दिवस विविध कार्यक्रम गरी मनाउने भएको छ । मंगलबार प्रदेशका मुख्यमन्त्री शालिकराम जम्मकट्टेलको बसेको सर्वपक्षीय बैठकले गणतन्त्र दिवस ३ दिन विविध कार्यक्रमका साथ मनाउने निर्णय गरेकाे हाे ।
आन्तरिक मामिला तथा कानून मन्त्रालयका सूचना अधिकृत सुरेन्द्र कार्कीका अनुसार बैठकले जेष्ठ १४, १५ र १६ गते विविध कार्यक्रम गरी गणतन्त्र दिवस २०८० भव्य रुपमा मनाउने निर्णय गरेको हो । गणतन्त्र दिवसको पहिलाे दिन जेष्ठ १४ गते हेटौंडा नगर सरसफाई तथा सरकारी कार्यालयहरुमा नेपालको राष्ट्रिय झण्डा फहराउने कार्यक्रमकाे तय भएकाे छ । यस्तै, जेष्ठ १५ गते विहान प्रभातफेरी हुँदै मन्त्रिपरिषद् कार्यालयमा पुगेर कार्यक्रमको आयोजना तथा साँझ दिपावली गरिने छ । जेष्ठ १६ गते खेलकुद र सरसफाई कार्यक्रमको आयोजना गरिने कार्कीले बताए ।
गणतन्त्र दिवस मनाउन प्रदेशका मुख्यमन्त्री जम्मकट्टेलको संयोजकत्वमा ३७ सदस्यीय मूल समारोह समिति गठन गरिएको छ । समितिमा प्रदेश सभामुख भुवन पाठक, उपसभामुख अप्सरा चापागाईँ, प्रदेश मन्त्रीहरु, मन्त्रालयका सचिवहरु, नेपाल पत्रकार महासंघ बागमती प्रदेशका प्रतिनिधि, उद्योग वाणिज्य महासंघका प्रतिनिधि, हेटौंडा उपमहानगरपालिकाकी मेयर मिना लामा, जिल्ला समन्वय समितिका प्रमुख ललित घलान, पत्रकार महासंघ मकवानपुरका प्रतिनिधि, विभिन्न राजनीतिक दलका प्रतिनिधि, समाजसेवीहरु, मकवानपुरका प्रजिअ लगायत सदस्य रहेका छन् ।
