मकवानपुर । हेटौंडा २ मा रहेको सिद्धार्थ माध्यमिक विद्यालयले स्वर्ण जयन्ती महोत्सवको आयव्यय तथा गतिविधि सार्वजनिक गरेको छ । विद्यालयले स्वर्ण महोत्सव अवधिमा कुल ४६ लाख ७१ हजार २४३ रुपैयाँ आम्दानी तथा ३३ लाख १३ हजार १०८ रुपैयाँ खर्च भएको विद्यालयका प्रधानाध्यापक परमानन्द सरोज कर्णले बताए ।
बागमती प्रदेशका दुई ठूला विद्यालयमध्ये एक सिद्धार्थ माध्यमिक विद्यालय २०३२ साल माघ ८ गते तत्कालीन सिद्धार्थ निम्न माध्यमिक विद्यालयका रूपमा स्थापना भएको थियो । “सिद्धार्थको आगामी दशक, प्रविधिमैत्री दक्ष शिक्षक” भन्ने मूल नारासहित २०८२ पुस २४ गतेदेखि माघ ८ गतेसम्म विद्यालयले स्वर्ण जयन्ती महोत्सव विभिन्न कार्यक्रम गरेको थियो।
स्वर्ण महोत्सवको तयारीका लागि हेटौंडा–२ का वडा अध्यक्ष विष्णुगोपाल महर्जनको संयोजकत्वमा ५०१ सदस्यीय मूल समारोह समिति तथा ४० सदस्यीय सचिवालय गठन गरिएको थियो । सचिवालयको नियमित बैठकमार्फत आवश्यक कार्यक्रम सञ्चालन गरिएको विद्यालयले जनाएको छ ।
महोत्सवको अवसरमा विद्यालय भवन, सरस्वती मन्दिर तथा गेटहरूको रंगरोगन, चउर तथा चौतारा निर्माण, स्मारिका प्रकाशन, मायाको चिनो खरिद तथा स्वर्ण स्तम्भ निर्माणलगायतका पूर्वाधार निर्माणका काम सम्पन्न गरिएको थियो ।
महोत्सवअन्तर्गत पुस २४ र २५ गते सञ्चालन गरिएको दुईदिने आँखा शिविरमा ९४८ जना विद्यार्थी तथा शिक्षकको परीक्षण गरिएको थियो । जसमध्ये ५३ जनामा समस्या देखिएको विद्यालयले जनाएको छ । त्यसैगरी पुस २८ गते सम्पन्न दन्त शिविरमा ४५० जना विद्यार्थीको दाँत परीक्षण गरेको थियो ।
मकवानपुर । मकवानपुर हेटौंडामा ४ जना स्रष्टा सम्मानित हुने भएका छन् । मकवानपुरको साहित्यिक संस्था मातृभूमि साहित्य समाजले स्रष्टाहरु प्रदिप रोदन (गोरखा), राजकुमार लामिछाने (मकवानपुर), बासुदेव पाण्डेय ‘प्रभाकर’ (सुर्खेत) र स्वस्तिका बानियाँ (मकवानपुर) लाई सम्मान गर्न लागेकाे हाे ।
आगामी जेठ ९ गते शनिबार समाजले हेटौंडामा आयोजना गर्ने ‘मातृभूमि साहित्य उत्सव–२०८३’ मा गजलकार प्रदीप रोदनलाई ‘राजकुमार स्मृति मातृभूमि सम्मान–२०८२’, साहित्यकार राजकुमार लामिछानेलाई ‘क्षेत्रबहादुर स्मृति मातृभूमि सम्मान–२०८२’, छन्द कवि बासुदेव पाण्डेय ‘प्रभाकर’ लाई ‘होमनाथ बलदेवी छन्द साहित्य सम्मान–२०८२’ र स्वस्तिका बानियाँलाई ‘मंगलादेवी स्मृति मातृभूमि सम्मान–२०८२’ बाट सम्मानित गरिने सचिवकिशन पौडेलले बताउनु भयो ।
हेटौंडा उपमहानगरपालिकासँगको सहकार्यमा शनिबार हुने ‘मातृभूमि साहित्य उत्सव–२०८३’ मा सम्मानसहित अन्तरसंवाद र कार्यपत्र प्रस्तुतिसमेत रहने सचिव पौडेलले जानकारी दिनुभयो । उनका अनुसार उत्सवमा ‘नारी स्रष्टाको साहित्य सिर्जनामा पुरुष अभिव्यक्ति’ विषयक विशेष अन्तरसंवाद हुनेछ । बहसकर्ताहरू समालोचक चेतना शर्मा, अनिता कोईराला र उपन्यासकार कल्पना खरेल रहने अन्तरसंवादमा मकवानपुरका साहित्यकार डा. निमेष निखिलले सहजकर्ताको भूमिका निर्वाह गर्नुहुनेछ ।
यसैगरी उत्सवमा दुईवटा महत्वपूर्ण कार्यपत्रहरू पनि प्रस्तुत गरिने । समालोचक डा. ज्ञानु अधिकारीले ‘साहित्यमा आध्यात्म दर्शन’ विषयमा प्रस्तुत गर्नुहुने कार्यपत्रमा अनिता कोईरालाले टिप्पणी गर्नुहुने कार्यक्रम रहेकाे पौडेलले जानकारी दिनुभयो । उनका अनुसार समालोचक घनश्याम घिमिरेले ‘साहित्यमा कृत्रिम बौद्धिकता’ विषयमा कार्यपत्र प्रस्तुत गर्नुहुनेछ भने मकवानपुरका साहित्यकार डीबी बर्तौलाले टिप्पणी गर्नुहुनेछ ।
नेपाली भाषा, साहित्य तथा कलाको संरक्षण, संवर्द्धन र प्रवर्द्धन गर्ने उद्देश्यले वि.सं.२०५६ सालमा स्थापना भएको समाजले स्थापना कालदेखि नै विविध साहित्यिक तथा सांस्कृतिक गतिविधिहरूलाई निरन्तरता दिँदै आइरहेको बताइएकाे छ। साहित्य समाजले स्थापित तथा नवोदित प्रतिभाहरूलाई साहित्य, कला, सङ्गीत एवं सामाजिक सेवाका विभिन्न क्षेत्रमा योगदान पुर्याएवापत पुरस्कार तथा सम्मान अर्पण गर्दै आएको छ।
मकवानपुर । किसानलाई तरकारी लगाएदेखि उपभाेगको लागि तयार हुँदासम्मको लागत उठाउन धौधौ छ । तर उपभोक्तालाई किनेर उपभोग गर्ने मुल्य दिनदिनै आकाशिदो छ ।
यसको उदाहरण हो अहिले मकवानपुरको थाहा नगरमा चलेको आलुको मुल्य । सस्तोमै आलु बेच्नु परेपछि मकवानपुरको थाहा नगरपालिकाका कृषक लगानी नै नउठ्ने चिन्तामा छन् । थाहा नगरपालिकाको दामन, पालुङ, बज्रवराही, चित्लाङका कृषक यतिबेला धमाधम आलु खन्न व्यस्त छन् । उत्पादित आलुको मूल्य अत्यन्त न्यून भएको उनीहरुको गुनासो छ । व्यापारीले खेतमै गएर कृषकबाट अहिले सेतो आलु प्रतिकेजी १० र रातो प्रतिकेजी १२ रुपैयाँमा खरिद गरिरहेका छन् ।
गत वर्ष खेतबाटै सेतो प्रतिकेजी २० र रातो २५ रुपैयाँ बिक्री गरेका थिए । ‘गत वर्षको आलुको उत्पादन पनि राम्रो थियो, भाउ पनि सुहाउँदो थियो, अहिले उत्पादन पनि घटेको छ, भाउ पनि छैन,’ थाहा–३ का कृषक मुरारी खत्रीले भने,‘बोट मरिसक्यो आलु खन्न परिहाल्यो, सुरक्षित भण्डारण गर्ने ठाँउ छैन, सस्तो भए पनि बिक्री गर्न परि गो ।’ वैशाखमा नियमितजसो पानी पर्दा डढुवा रोगले छिटै बोट मरेकाले आलुका दाना बढ्न नपाएको थाहा नगरपालिका कृषि शाखाकी प्रमुख बालकुमारी भट्टराईले बताइन् । यसपाली दाना सानो आकारका फलेको उनले बताइन् ।
आलु खरिद गर्न व्यापारीहरु तराजु लिएर खेतमै पुगेका छन् । आलु भण्डारण गर्ने व्यवस्था नहुँदा खेतबाटै सस्तो मूल्यमै बिक्री गर्न बाध्य रहेको नेपाल तरकारी व्यवसायी संघ उत्तरी क्षेत्र मकवानपुरका अध्यक्ष राजेन्द्र विडारी बताउँछन् । ‘१० रुपैयाँ किलोमा बेच्दा त लागत मूल्य पनि पाउन सकेका छैनन्,’ उनले भने,’यो वर्ष फलेको पनि कम छ । त्यसमै भाउ पाेहोर भन्दा आधा कम भयो ।’
बजारमा भारतीय आलु पनि सस्तो भएर आएकाले यहाँको उत्पादनले भाउ नपाएको अध्यक्ष विडारीले बताए । बेमौसमी तरकारी खेतीको पकेट क्षेत्रका रुपमा चिनिएको थाहामा आलु बढ्ने बेलामा बोटमै रोग लागेकाले उत्पादनसँगै दानाको आकार पनि घटेको थाहा–३ का कृषक सुदर्शन विष्टले बताए ।
१२ वडामा विभाजित थाहा नगरपालिकाका बासिन्दाको मुख्य आम्दानीको स्रोत तरकारी खेती हो । सबैभन्दा बढी आम्दानीको हिस्सा ओगट्ने आलुको उत्पादन र मूल्यमा गिरावट आउँदा स्थानीयको आम्दानी नै प्रभावित हुने गर्छ । थाहाको ६ हजार ३ सय रोपनी जग्गामा आलु खेती गरिन्छ । गत वर्ष झण्डै ७ हजार टन आलु उत्पादन भएको थियो । वैशाखमा दैनिकजसो वर्षा भएकाले आलुबाहेक अन्य तरकारी उत्पादन र बिक्रीमा पनि समस्या भएको कृषि विकास शाखा प्रमुख भट्टराईले बताइन् ।
यहाँ उत्पादन हुने आलु काठमाडौं, पोखरा, हेटौंडा, बुटवल, भरतपुरलगायत विभिन्न सहरमा बिक्री हुने गर्छ । थाहाले आलुबाटमात्र करिब ५७ देखि ६० लाख रुपैयाँ राजस्व संकलन गर्दै आएको छ । यहाँबाट निर्यात हुने आलुलगायत अन्य तरकारीमा ५२ वर्षदेखि स्थानीय कर लगाइदै आएको छ ।
२०३१ सालदेखिरुपचन्द्र विष्ट ‘थाहा’ले दामन र पालुङमा आलुमा कर लगाउन सुरु गरेका थिए । उक्त करबाट संकलन भएको रकम यस क्षेत्रको शैक्षिक विकास एवं भौतिक पूर्वाधारका लागि खर्च गरिँदै आएको थियो । उक्त कर अहिले नगरपालिकाले तोक्ने गरेको छ । यस क्षेत्रमा विसं २०१८ सालदेखि व्यावसायिक रुपमै आलु खेती सुरु गरिएको स्थानीयको भनाई छ ।
नीयले अहिले कार्डिनल, डेजुरे, खुमल रातो, जनकदेव, कुखुरे ज्योती र साजिटा जातका आलुको बीउ लगाउने गरेका छन् । माघ पहिलो सातादेखि रोप्न सुरु गरेको आलु जेठमा गरिन्छ । तर, यसपाली वर्षाले डढुवा फैलिँदा चाँडै बिक्रि गरेका हुन् । इकान्तिुरको लागि पत्रकार प्रताप विष्टले लेख्नु भएको समाचार हामीले साभार गरेका हौं ।
मकवानपुर । युवापुस्ताले आधिकारिक सूचना र विश्वसनीय सञ्चारमाध्यमलाई प्राथमिकता दिनुपर्नेमा जोड दिइएको छ । जनपत्र मिडिया प्रालिले गरेकाे कार्यक्रममा सामाजिक सञ्जालमा फैलिने भ्रामक सूचना, फेक आइडी र अपुष्ट सामग्रीका कारण समाजमा भ्रम, अविश्वास र मानसिक तनाव बढ्दै गएकोले युवाहरुले उक्त कुरामा जोड दिएका हुन् ।
जनपत्रले हेटौंडा स्कुल अफ म्यानेजमेन्ट एण्ड सोसल साइन्सेसमा आयोजना गरेको “भ्रामक सूचनाबाट बचौँ, आधिकारिक सूचना रोजौँ” विषयक अन्तरक्रिया कार्यक्रममा सहभागी वक्ताहरूले सामाजिक सञ्जालको सही प्रयोग, तथ्य जाँच र आलोचनात्मक सोचको आवश्यकता औँल्याएका हुन् ।सामाजिक सञ्जालले सूचना आदान–प्रदानलाई सहज बनाएको भए पनि गलत सूचना र अफवाह फैलाउने माध्यमका रूपमा पनि प्रयोग भइरहेको उल्लेख गर्दै विद्यार्थीहरूलाई कुनै पनि सामग्री तत्काल विश्वास नगर्न आग्रह गरिएको थियो ।
वक्ताहरूले एउटै सूचना विभिन्न विश्वसनीय माध्यममा आएको छ कि छैन भन्ने जाँच गर्न, पोस्ट गर्ने व्यक्तिको विश्वसनीयता हेर्न तथा आधिकारिक निकायबाट पुष्टि नभएसम्म कुनै सूचना शेयर नगर्न सुझाव दिए । अन्तरक्रियामा सहभागी विद्यार्थीहरूले अहिलेको युवा पुस्ता फेसबुक, टिकटक, इन्स्टाग्राम, युट्युब लगायतका प्लेटफर्मतर्फ तीव्र रूपमा आकर्षित भइरहेको बताए । उनीहरूका अनुसार सामाजिक सञ्जालले साथीभाइ र आफन्तसँग तुरुन्त सम्पर्क राख्न, नयाँ जानकारी पाउन, मनोरञ्जन लिन तथा आफ्नो विचार अभिव्यक्त गर्न सहज वातावरण बनाएको छ ।
कार्यक्रममा सामाजिक सञ्जालको आकर्षणसँगै यसको नकारात्मक प्रभावबारे पनि चर्चा गरिएको थियो । विशेषगरी फुर्सदको अधिकांश समय मोबाइल र सामाजिक सञ्जालमै बिताउने प्रवृत्तिका कारण अध्ययन, सामाजिक सम्बन्ध र मानसिक स्वास्थ्यमा असर परेको विषय उठाइएको थियो । सहभागीहरूले सामाजिक सञ्जाल प्रयोग गर्दा समय व्यवस्थापन र सामग्री छनोटमा सचेत हुनुपर्ने धारणा राखेका थिए ।
वक्ताहरूले सामाजिक सञ्जाल र समाचारबीचको भिन्नता बुझ्न आवश्यक रहेको बताए । उनीहरूका अनुसार समाचार प्रमाणित सञ्चारमाध्यम, पत्रकार वा आधिकारिक संस्थाबाट तथ्य जाँच गरेर तयार गरिन्छ भने सामाजिक सञ्जालमा जोकोहीले जुनसुकै सामग्री पोस्ट गर्न सक्छ । त्यसैले सामाजिक सञ्जालमा देखिएको सबै सामग्री सत्य नहुन सक्ने भएकाले त्यसलाई अन्तिम सत्य मानेर धारणा बनाउन नहुनेमा जोड दिइयो ।
अन्तरक्रियामा सामाजिक सञ्जालमा फैलिने भ्रामक सूचना कसरी छुट्याउने भन्ने विषयमा विस्तृत जानकारी दिइएको थियो । वक्ताहरूले कुनै पनि सामग्री हेरेपछि त्यसको स्रोत के हो, कसले पोस्ट गरेको हो, आधिकारिक हो कि होइन भन्ने विषय जाँच गर्नुपर्ने बताए । यदि एउटै समाचार विश्वसनीय रेडियो, टेलिभिजन, राष्ट्रिय पत्रपत्रिका वा सरकारी वेबसाइटमा आएको छैन भने त्यसलाई शंकाको दृष्टिले हेर्नुपर्ने सुझाव दिइयो ।
कार्यक्रममा फेक आइडीको समस्या अहिले गम्भीर बन्दै गएको विषय पनि उठाइएको थियो । चर्चित व्यक्ति, नेता, कलाकार, पत्रकार वा सार्वजनिक व्यक्तित्वका नाममा नक्कली खाता बनाएर गलत सूचना फैलाउने, चरित्र हत्या गर्ने र आर्थिक ठगीसमेत हुने गरेको उल्लेख गर्दै यस्ता गतिविधिबाट बच्न विद्यार्थीहरूलाई सचेत गराइएकाे थियो ।
कार्यक्रममा बागमती प्रदेशसभाका प्रवक्ता प्रकाश चापागाई एवम् कानूनका उपसचिव प्रकाश चापागाईले सामाजिक सञ्जालबाट सही सूचना मात्र लिनका लागि आग्रह गरे । कार्यक्रममा सहजीकरण गर्दै चापागाईले सामाजिक सञ्जालमा धेरै खालका सूचनाहरु आउने गरेको र ती सूचना सत्य होकी होइनन् भनेर जाँच गर्नुपर्ने बताए ।
सूचना पाउने हक सबैको रहेकोले सबै सार्वजनिक निकायबाट सूचनाको हक सम्वन्धी कानूनको प्रयोग गरेर कुनैपनि प्राप्त गर्न सकिने सूचना लिन सकिने बताए । कुनैपनि भ्रामक सूचनाहरु फैलाउन नहुनेमा उनको जोड थियो । जेनजी आन्दोलनपछी भ्रामक सूचना धेरै फैलिएको र त्यसको असर परेको उनले बताए ।
कार्यक्रममा हेटौंडा स्कुलअफ म्यानेजमेन्टका सहायक प्रिन्सिपल राम पण्डीत खनालले अहिले सामाजिक सञ्जालमा धेरै खालका भ्रामक सूचनाहरु आउने गरेकाले त्यसबाट बेलैमा सचेत हुनुपर्ने बताए । कुनैपनि सूचना आधिकारिक होकी होइन भनेर पहिले बुझ्नुपर्ने बताए ।
संञ्चारिका समुह बागमती प्रदेश समितिका निवर्तमान अध्यक्ष तथा राजधानी दैनिकका पत्रकार सरिता दाहाल, नेपाल पत्रकार महासंघ बागमती प्रदेश समितिका उपाध्यक्ष तथा जनपत्र मिडिया प्रालिका अध्यक्ष हरि हुमागाईले सहजीकरण गरेका थिए ।
वक्ताहरूले फेक आइडी छुट्याउने केही आधारहरू पनि प्रस्तुत गरे । सामाजिक सञ्जाल प्लेटफर्ममा रहेको “ब्लु टिक” वा भेरिफिकेसन चिन्ह हेर्ने, प्रोफाइलको नाम र फोटो ध्यानपूर्वक अध्ययन गर्ने, पोस्टको भाषा र शैलीमा निरन्तरता छ कि छैन जाँच गर्ने तथा फलोअर संख्या र गतिविधि हेर्ने उपायबारे जानकारी दिइयो । उनीहरूका अनुसार आधिकारिक व्यक्तिहरूले सामान्यतया आफ्नै भाषा र शैलीमा निरन्तर सामग्री पोस्ट गर्ने गर्छन् । यदि कुनै खाताबाट अचानक उत्तेजक, घृणात्मक, अश्लील वा अस्वाभाविक सामग्री पोस्ट हुन थाल्यो भने त्यसलाई शंकाको दृष्टिले हेर्नुपर्ने सुझाव दिइयो ।
कार्यक्रममा सहभागी युवाहरूले सामाजिक सञ्जालको प्रयोग पूर्ण रूपमा नकारात्मक नभएको पनि बताए । उनीहरूका अनुसार सामाजिक सञ्जाल आधुनिक शिक्षा, करिअर, प्रविधि र विश्वका नयाँ ट्रेन्डबारे जानकारी प्राप्त गर्ने प्रभावकारी माध्यम बनेको छ । अनलाइन कक्षा, अध्ययन सामग्री, तालिम र सीप विकासका सामग्री सहज रूपमा उपलब्ध हुने भएकाले यसको सकारात्मक प्रयोग आवश्यक रहेको धारणा व्यक्त गरियो ।
त्यस्तै व्यवसायिक प्रचार–प्रसारमा पनि सामाजिक सञ्जाल प्रभावकारी माध्यम बनेको चर्चा गरिएको थियो । साना व्यवसाय, उद्यमी र सिर्जनशील युवाहरूले आफ्ना उत्पादन र सेवा प्रचार गर्न सामाजिक सञ्जाल प्रयोग गरिरहेको उदाहरण प्रस्तुत गर्दै सही तरिकाले प्रयोग गर्दा यसले आर्थिक अवसर सिर्जना गर्न सक्ने बताइयो ।
अन्तरक्रियामा सहभागीहरूले सामाजिक सञ्जालले युवाहरूलाई आफ्नो पहिचान, प्रतिभा र विचार प्रस्तुत गर्ने सहज प्लेटफर्म दिएको बताए । अहिले धेरै युवाहरू टिकटक भिडियो, फेसबुक पोस्ट, इन्स्टाग्राम रिल्स तथा युट्युब सामग्रीमार्फत आफ्नो सिर्जना प्रस्तुत गरिरहेका छन् । तर लोकप्रियता र भाइरलको मोहमा तथ्यहीन सामग्री बनाउने प्रवृत्ति बढेको भन्दै त्यसप्रति सचेत रहनुपर्ने धारणा राखिएको थियो ।
वक्ताहरूले आलोचनात्मक सोचको विकास अहिलेको आवश्यकता भएको बताए । सामाजिक सञ्जालमा देखिएको कुनै पनि सामग्री तुरुन्तै पत्याउने वा शेयर गर्ने संस्कारले समाजमा भ्रम सिर्जना गर्ने भएकाले तथ्य तुलना गर्ने, स्रोत पुष्टि गर्ने र अध्ययन गरेर मात्रै धारणा बनाउनुपर्नेमा जोड दिइयो ।कार्यक्रममा सहभागी विद्यार्थीहरूले पनि सामाजिक सञ्जाल प्रयोग गर्दा आफूहरूले भोगेका अनुभव साझा गरेका थिए । कतिपयले अपुष्ट समाचार शेयर गर्दा पछि गलत साबित भएको अनुभव सुनाउँदै अबदेखि आधिकारिक स्रोतबाट पुष्टि गरेर मात्रै सामग्री शेयर गर्ने प्रतिबद्धता जनाए ।
विद्यार्थीहरूले सामाजिक सञ्जालले सिर्जना गरेको प्रतिस्पर्धात्मक मानसिकता, लाइक र फलोअरको दबाब तथा अनावश्यक तुलना गर्ने प्रवृत्तिले युवाहरूमा तनाव बढाएको अनुभव पनि सुनाए । उनीहरूले वास्तविक जीवनभन्दा सामाजिक सञ्जालको कृत्रिम जीवनशैलीलाई बढी प्राथमिकता दिनु चुनौतीपूर्ण बन्दै गएको बताए ।
सञ्चारकर्मीहरूले सामाजिक सञ्जालमा आएका सामग्रीलाई अन्तिम सत्य मानेर प्रतिक्रिया दिनु वा धारणा बनाउनु गलत हुने बताए । उनीहरूका अनुसार समाचार लेखनमा तथ्य, स्रोत, सन्तुलन र प्रमाणको विशेष ध्यान दिइन्छ भने सामाजिक सञ्जालमा व्यक्तिगत धारणा, हल्ला वा अपुष्ट दाबी पनि तीव्र रूपमा फैलिन सक्छन् ।
वक्ताहरूले सूचना प्रविधिको विकाससँगै डिजिटल साक्षरताको आवश्यकता पनि बढेको उल्लेख गरे । विशेषगरी युवा पुस्ताले सूचना पहिचान गर्ने क्षमता, तथ्य जाँच गर्ने अभ्यास र जिम्मेवार डिजिटल व्यवहार सिक्नुपर्ने धारणा व्यक्त गरिएको थियो ।
कार्यक्रममा सामाजिक सञ्जालको अत्यधिक प्रयोगले समय व्यवस्थापनमा समस्या ल्याएको विषय पनि उठाइएको थियो । धेरै युवाहरू राति अबेरसम्म मोबाइल चलाउने, अध्ययनको समयमा पनि सामाजिक सञ्जालमा व्यस्त रहने तथा फुर्सदको अधिकांश समय डिजिटल प्लेटफर्ममै बिताउने गरेको सहभागीहरूले बताएका थिए ।
सहभागीहरूले सामाजिक सञ्जालको सकारात्मक उपयोग गर्दै भ्रामक सूचना नियन्त्रणमा युवापुस्ताले महत्वपूर्ण भूमिका खेल्न सक्ने निष्कर्ष निकाले । “पहिले पुष्टि, अनि मात्रै विश्वास” भन्ने सोच विकास गर्न सके सामाजिक सञ्जालबाट फैलिने भ्रम, अफवाह र गलत प्रचार न्यूनीकरण गर्न सकिने धारणा व्यक्त गरिएको थियो । कार्यक्रममा सहभागी विद्यार्थीहरूले आधिकारिक सूचना रोज्ने, फेक आइडी र भ्रामक सामग्रीबारे सचेत रहने तथा सामाजिक सञ्जाललाई जिम्मेवार रूपमा प्रयोग गर्ने प्रतिबद्धता व्यक्त गरेका थिए ।
जनपत्र मिडिया प्रालिले हेटौंडा उपमहानगरपालिका वडा नम्बर–२ को आयोजनामा तथा संयुक्त राष्ट्रसंघीय विकास कार्यक्रम संसद सहयोग परियोजनाको सहकार्यमा गरेकाे कार्यक्रममा कलेजका प्राध्यापकहरु अनुराग अधिकारी, समिर तिमल्सिना लगायतकाको आतिथ्यता रहेको थियो ।
नेपाल यातायात व्यवसायी राष्ट्रिय महासङ्घ निर्वाचन २९ गते मंगलबार हुँदै
मकवानपुर । गण्डकी प्रदेशको पोखरामा आजबाट सुरु भएको नेपाल यातायात व्यवसायी राष्ट्रिय महासङ्घको सातौं महाधिवेशनमा मकवानपुरका पुराना यातायात व्यवसायी गोकर्ण प्रसाद पराजुलीले वरिष्ठ उपाध्यक्ष पदमा उम्मेदवारी दीएका छन् ।
यातायात क्षेत्रका अनुभव तथा इमानदारी नेतृत्वको रुपमा परिचित पराजुली नेपाल यातायात व्यवसायी राष्ट्रिय महासङ्घमा यस अघि विज्ञ सल्लाहकार थिए भने निवर्तमान कार्यसमितिमा केन्द्रीय सदस्य थिए । निर्वाचन २९ गते मंगलबार हुदैछ ।
नेपालको यातायात क्षेत्र अनेकौँ चुनौती, असहज नीति, व्यवसायिक असुरक्षा र बदलिँदो परिस्थितिबीच संघर्षरत रहेको बेला आफूले योगदान गर्न सो पदको लागि उम्मेदवारी दिएको पराजुलीले बताए । “यस्तो परिस्थितिमा मेरो अनुभव विगतमा यसै क्षेत्रमा गरेको संघर्ष र व्यवहारिक ज्ञानको सदुपयोग गर्न खोजेको हुँ” पराजुलीले भने ।
व्यवसायीको हक, सम्मान र सुरक्षित भविष्य नै आफ्नो अठोट भएको पराजुलीले बताए । आफु वरिष्ठ उपाध्यक्ष पदमा विजयी भएमा हाल विभाजित महासंघलाई एकताको सूत्रमा बाँध्ने उनले बताए ।
“विभिन्न धार र संरचनामा रहेका यातायातसम्बन्धी महासंघ तथा संगठनहरूलाई एउटै साझा छातामुनि ल्याई बलियो, एकीकृत र प्रभावकारी संगठन निर्माण गर्न निरन्तर पहल गर्नेछु” पराजुलीले भने । एकताबद्ध महासंघ नै व्यवसायीको अधिकार सुनिश्चित गर्ने बलियो आधार हो भन्नेमा उनीले विश्वास व्यक्त गरे ।
यसैगरी महासंघको आफ्नै आधुनिक भवन निर्माण, राज्यसँग प्रभावकारी नीतिगत पैरवीमा आफ्नो पहल हुने उले आफ्नो प्रतिवद्धतामार्फत सार्वजनिक गरेका छन् । महासंघको संस्थागत मजबुती, गरिमा र पहिचानका लागि महासंघको आफ्नै आधुनिक भवन निर्माणमा अग्रणी भूमिका निर्वाह गर्ने पराजुलीको प्रतिवद्धता रहेको छ ।
यातायात व्यवसायीहरूको पक्षमा राज्यसँग प्रभावकारी संवाद, सहकार्य र दबाबमार्फत व्यवसायीमैत्री नीति निर्माण गराउन सशक्त भूमिका खेल्ने, कर, बीमा, जरिवाना, नवीकरण, बैंक ब्याजलगायत व्यवसायीका जटिल समस्याको समाधानमा निरन्तर खटिने उनले बताए ।
यसैगरी सबैखाले सवारी धनीहरूको साझा प्रतिनिधित्व गर्दै मालवाहक, यात्रुवाहक, इन्धन ढुवानी, साना तथा मझौला सवारीसाधन धनीहरू—सबै व्यवसायीहरूको साझा आवाजका रूपमा अहोरात्र खटेर काम गर्ने प्रतिबद्धता व्यक्त गरेका छन् । महासंघ कुनै सीमित वर्गको नभई सम्पूर्ण यातायात व्यवसायीहरूको साझा घर बन्नुपर्ने र यसको लागि आफ्नो भूमिका रहने उनले बताए ।
उनले दुर्घटनापीडित व्यवसायीका लागि राहत प्रणाली सुदृढीकरण गर्ने योजना अघि सारेका छन् । यातायात क्षेत्रमा हुने कहालीलाग्दा दुर्घटनाबाट पीडित व्यवसायीहरूलाई राहत प्रदान गर्न छुट्टै कोष स्थापना गरी हित सञ्चालनमा अग्रणी भूमिका निर्वाह गरेको अनुभवलाई थप सुदृढ बनाउँदै भविष्यमा अझ प्रभावकारी राहत प्रणाली निर्माणमा पहल गर्नेछु उनको प्रतिवद्धतामा भनिएको छ ।
को हुन् पराजुली
नारायणी यातायात व्यवसायी संघमा सचिव, कोषाध्यक्ष हुँदै दुई कार्यकाल अध्यक्ष भएर सफल नेतृत्व निर्वाह गरेका पराजुली मध्यमाञ्चल पेट्रोलियम ढुवानी व्यवसायी संघको अध्यक्ष भई इन्धन ढुवानी क्षेत्रका व्यवसायीहरूको हकहितमा सक्रिय भूमिका निर्वाह गरेका व्यक्ति हुन् ।
नेपाल ट्रक यातायात व्यवसायी महासंघको वरिष्ठ उपाध्यक्ष भई राष्ट्रिय स्तरमा यातायात व्यवसायीहरूको पक्षमा नेतृत्वदायी भूमिका निर्वाह गरेका उनी मकवानपुर उद्योग वाणिज्य संघको महासचिव भई निजी क्षेत्र र व्यवसायिक हित संरक्षणमा सक्रिय योगदान गरेको अनुभव समेत छ ।
यसैगरी दुर्घटनाबाट प्रभावित यातायात व्यवसायीहरूको राहत र संरक्षणका लागि हित कोष सञ्चालनमा अग्रणी भूमिका निर्वाह गर्ने पराजुली यातायात क्षेत्रमा अनुभवले खारिएको नेतृत्व मानिन्छन् । संघर्षबाट स्थापित पहिचान, सबैखाले व्यवसायीको साझा आवाज, काम गर्ने स्पष्ट दृष्टिकोण र योजना भएका एकता, सम्मान र सुरक्षित व्यवसायको प्रतिबद्धता भएको व्यक्ति भएकाले आफूहरुको रोजाइको उम्मेदवारी रहेको मकवानपुरका एक यातायात व्यवसायीले बताए ।