मकवानपुर । हेटौंडामा स्कुटरको ठक्करबाट १ जनाको मृत्यु भएको छ । हेटौँडा उपमहानगरपालिका १७, बाबुचोकमा शुक्रबार स्कुटरको ठक्करबाट स्थानीय ४३ वर्षीया गोपिनी बिकको मृत्यु भएको प्रहरीले जनाएको छ ।
शुक्रबार मदन भण्डारी राजमार्गको हेटौँडा–सिन्धुली खण्डअन्तर्गत हर्नामाडी ठूलोदमारबाट हटियातर्फ आउँदै गरेको ना २५ प ८३५६ नम्बरको स्कुटरले बाटो काट्दै गरेकी पैदलयात्री गोपिनी बिकलाई ठक्कर दिएको थियो ।
स्कुटरको ठक्करबाट गम्भीर घाईते भएकी गोपिनीको हेटौँडा अस्पतालमा उपचारको क्रममा शुक्रबार साझनै डाक्टरले मृत घोषणा गरेको जिल्ला प्रहरी कार्यालय मकवानपुरले जनाएको छ । प्रहरीले स्कुटर चालक हेटौँडा–१, पिपलबोट बस्ने ३५ वर्षीय ईलेश श्रेष्ठलाई नियन्त्रणमा लिएको छ ।
मकवानपुर । मिथिला क्षेत्रमा छठ पर्व सुरु भएको छ । सूर्यको उपासना गरी मनाइने यसपर्व अन्तर्गत व्रतालुले आज ‘नहाय–खाय’ विधि गर्दैछन् । तिहार सकिए लगत्तै तराई मधेसमा छठपर्वको रौनक सुरु भएको छ । पहिले तराई मधेसमा मात्र मनाइदै आएकाे छठ पर्व केही वर्ष अघिदेखि पहाड तिर उक्लदै छ ।
छठ पर्व सुरु भएसँगै बागमती प्रदेशकाे राजधानी हेटौडा भएर बग्ने राप्ती नदीमा छठ घाट सजावटको काम तीव्र रुपमा अगाडी बढाइएकाे छ । यो पर्व मनाउन धार्मिक महत्वका तलाउ र नदी परिसरलाई बेहुलीझैँ सिंगार्ने चलन छ । मकवानपुरकाे हेटौडामा समेत तराई मधेस समुदायकाले पछिल्लाे समय छठको रमझम मधेसको जस्तै देखिने गरेको छ । छठकाे विधि पूर्वक व्रत अन्य समुदायकाले समेत बस्ने गरेका छन् । यसै गरी राप्ती नदीमा छठको रौनक हेर्न अन्य समुदायको उपस्थिति पनि उल्लेख्य देखिने गरेको छ ।
व्रतालुले नदी एवम् खोला किनारका निर्माण गरेको घाटमा छठ पर्वको विधि श्रद्धापूर्वक गर्ने गर्छन् । कतिपय गाउँमा छठ पर्वका लागि खोलामा स्थायी घाट नै निर्माण गरिएको छ ।
कात्तिक शुक्ल तृतीयाकै दिन (बिहीबार) व्रतालुले उसिना चामल, कोदो, मुसुरो, माछामासुसहित तामसी र राजसी भोजन परित्याग गरी ‘अरबा–अरबाइन’ विधि गरेका छन् । निरामिष (सात्विक) भोजन सुरु गरेर तृतीयाकै दिन व्रतको तयारी थाल्ने परम्परा छ ।
मिथिलामा अहिले जताततै सूर्यदेव र षष्ठी (छठी) देवीको महिमा गाइएका गीत गुञ्जिरहेका छन् । छठ प्रारम्भसँगै मिथिलाका धार्मिक महत्वका तलाउ र नदी परिसर बेहुलीझैँ सिँगारिएका छन् । छठ पर्वमा महिला–पुरुष जसले व्रत गरे पनि हुने विधान (शास्त्रीय मत) भए पनि धेरैजसो घरका मुख्य महिलाले नै व्रत विधि पुरा गर्ने गरेको पाइन्छ ।
आज कात्तिक शुक्ल चौथीका दिन व्रतालुले पवित्र स्नान गरी व्रत सङ्कल्पका साथ चोखोनीतो खानेछन् । यो विधिलाई ‘नहाय–खाय’ भनिन्छ । श्रद्धा, निष्ठा र आत्मिक शुद्धिलाई अत्यन्त महत्व दिइने छठमा पूजा प्रसाद सामग्री ठकुवा (गहुँको पिठो र सखर मिसाएर शुद्ध घ्यूमा बनाइने खास परिकार), भुसुवा (कसार) र अन्य मिष्ठान्न परिकार ढिकी, जाँतोमा कुटिएको र पिँधिएको चामल र गहुँको पिठोबाट नै पकाइने परम्परा छ । यी परिकार पकाउन चुल्हो पनि नयाँ प्रयोग गरिन्छ ।
पर्वमा सूर्यलाई अर्घ्य दिने र हात उठाउने समयमा ज्यामिर, बिमिरो, बोटसहित उखालिएको अदुवा, बेसार र फुर्को (पातगुवो) सहितको उखु आवश्यक सामग्रीमा पर्ने हुँदा पर्व विशेषमा यी कृषि उपजले राम्रो बजार पाउने गरेका छन् ।
हिजो कात्तिक शुक्ल तृतीयाका दिन ‘अरबा–अरबाइन’ र आज (चौथी तिथि) ‘नहाय–खाय’ विधि गर्ने व्रतालुले भोलि निराहार व्रत बसी राति सखरमा पकाइएको अरवा चामलको खीर कूलदेवता र छठीदेवीलाई चढाएर प्रसादस्वरूप खानेछन् । यो विधिलाई मिथिलामा ‘खरना’ भनिन्छ ।
व्रतालुले षष्ठी तिथिका दिन निराहार व्रत बसेर साँझपख मनोरम घाट बनाइएको जलाशयमा पुगी कम्मरसम्म पानीमा चोबलिएर अस्ताउँदो सूर्यलाई अर्घ्य दिएर प्रसाद राखिएको डाली हातमा उठाइ सूर्यलाई देखाइन्छ । यो व्रत आइतबार सम्पन्न गरिने छ । यो विधिलाई ‘सझुका अरख’ वा ‘सँझियाघाट’ भनिन्छ ।
यसरी ‘सझुका अरख’ मा देखाइएको प्रसाद सामग्रीको डाली सप्तमीका दिन बिहानै उदाउँदो सूर्यलाई अर्घ्य दिएर देखाइएपछि छठ सम्पन्न हुने परम्परा छ । यसपालि छठको समापन सोमबार बिहान सूर्योदयसँगै गरिने छ ।
मकवानपुर । मकवानपुरको हेटौंडा उपमहानगरपालिका वडा नम्बर–४, हुप्रचौरमा नवजात शिशु फेला परेको छ ।
हेटौंडा ४ स्थित बागमती प्रदेश लोक आयोगको कार्यलय नजिकको विहीबार साँझ सालनाल सहितको नवजात शिशु फेला परेको मकवानपुर प्रहरीले जनाएको छ ।
स्थानीयले बच्चा रोएको सुनेपछि प्रहरीलाई खबर गरेका थिए । वडा प्रहरी कार्यालय हेटौंडाको टोली र स्थानीयले शिशुलाई उपचारको लागि हेटौंडा अस्पताल लगेका थिए ।
हेटौंडा अस्पतालमा नवजात शिशुको उपचार भइ रहेको तथा स्वास्थ्य अवस्था सामान्य रहेको प्रहरीले जनाएको छ । उक्त घटनाको सम्बन्धमा आवश्यक अनुसन्धान भइरहेको जिल्ला प्रहरी कार्यालय मकवानपुरले जानकारी दिएको छ ।
मकवानपुर । मकवानपुरको पदमपोखरी स्थित महेन्द्र माध्यमिक विद्यालयमा पूर्व विद्यार्थी समूह गठन गरिएको छ ।
विहीबार २०५९ सालको एसएलसी ब्याजको भएको विद्यार्थी भेलाले वीर वहादुर स्याङ्वाेकाे अध्ययक्षतामा १३ सदस्यीय समुह गठन गरिएको हो । समूह उपाध्यक्षमा वगान सिं थिङ, सचिव राजेन्द्र थापा, सहसचिव देवेन्द्र पराजुली, काेषाध्यक्ष सुस्मा थापा, सदस्यहरु राजेश नगरकाेटी, उद्दव गाैतम, पुष्पा ओझा,सुरेश स्याङ्वाे लगायत रहेका छन ।
विद्यालयको पूर्व विद्यार्थीहरुले वनभाेज पुनर्मिलन तथा भेला कार्यक्रम गरि समूह गठन गरिएको हो । कार्यक्रम विधालयका पूर्व प्राधानाध्यापक वेलि थापाकाे प्रमुख आतिथ्यता तथा विद्यार्थी समुहका अध्यक्ष दिल वहादुर स्याङ्वाेकाे सभाध्यतामा भएकाे थियाे ।
पूर्व प्रधानाध्यापक वेलि थापाले जवसम्म मानिस सामाजिक हुन सक्दैन तवसम्म समाज विकास सम्भव नहुने बताइन् । ‘व्यक्तिमा हुने बौद्धिकतालेनै शिक्षाकाे गुणस्तर मापन गर्छ’ उनले भनिन् ‘समाजमा आफ्नाे उपस्थिति बनाउन सक्नु नै गुणस्तरीय शिक्षाकाे उपज हाे ।’ ‘मानिस इमाेसनल पनि हुनुपर्छ, मानिसमा आत्मपरक गुण हुनुपर्छ, आध्यात्मिकताले नै मानिसलाइ सही निर्णय लिन सक्छ र समाजमा राम्राे संस्कारकाे विकास गर्छ’ उनले भनिन् । थापाले हालकाे युग प्रविधिकाे युग भएकोले साेहि अनुरुपको शिक्षा दिइनु पर्ने बताउदै विधालयले शिक्षामा गुणस्तरीय मात्र नभै विद्यार्थीलाई संस्कारयुक्त शिक्षाको सिकाईमा ध्यान दिनु पर्ने बताइन् ।
कार्यक्रममा महेन्द्र माविका प्रधानाध्यापक विष्णु श्रेष्ठ, पूर्व प्राधानाध्यापक शंकर खतिवडा, विधालय व्यवस्थापन समिति अध्यक्ष पुष्करबहादुर रोक्का, शिक्षकहरु निबन्ध लामा, अमरनिधि उप्रेती, आशा थापा, श्यामकुमार भारद्वाज, रामकृष्ण रोक्का, रामप्रसाद यादव, मातृका दुलाल, लक्ष्मी थिङ, बालकुमार श्रेष्ठ, डेमिज़ थापा लगायतकाे उपस्थिति रहेकाे थियाे ।
मकवानपुर । मकवानपुरकाे हेटौडामा गाेविन्द गिरी प्रेरणाका कविता सुनिएका छन् । साहित्य सङ्गम मकवानपुरले साहित्यकार गोविन्द गिरी प्रेरणाका एकल कविता वाचन कार्यक्रम गरी उनका कविता सुनिएकाे हाे ।
विहीबार कवि गिरीले १० वटा कविता वाचन गरेका थिए । मकवानपुर थातथलाे भई हाल अमेरिकालाई कर्म थलाे बनाउँदै आएका उनले विभिन्न देशमा रहँदाकाे अनुभवलाई सङ्गाली लेखिएका आमा, छुटेको रेल लगायतका १० कविताहरू सुनाएका थिए । गिरीका आधा दर्जन बढी कथा सङ्ग्रह, उपन्यास र कविता संग्रह प्रकाशित छन् । साहित्यकार गिरीले हेटौंडाबाट साहित्यकाे पाइला टेकेकाे बताउँदै काठमाडौंमा रहँदा त्यसलाई प्रष्फुटन गर्ने वातावरण मिलेको बताए ।
साहित्य सङ्गम मकवानपुरका उपाध्यक्ष सानु खनालले गिरीकाे व्यक्तिगत व्यक्तित्वकाे चर्चा गर्दै उनले हालसम्म मैनाली कथा पुरस्कार, वासुशशी स्मृति पुरस्कार, नारायणी वाङ्गमय पुरस्कारलगायत प्राप्त गरेकाे बताए । सर्जक सञ्जाल मकवानपुरका संयोजक निमेष निखिलले नेपाली साहित्यका लागि महत्वपूर्ण योगदान दिएकाे गिरीले विभिन्न देशमा रहेर साहित्यका विधामा कलम चलाइ रहनु भएकाेमा गर्व गर्दै उनका सृजनाले मकवानपुर तथा राष्ट्रलाई गुन लगाएकाे बताए ।
कविता वाचन कार्यक्रममा मकवानपुरका पुराना पुस्ता र नयाँ पुस्ताका साहित्यिक सर्जकहरुकाे उपस्थितिमा भएकाे कविता वचान कार्यक्रम सर्जक सञ्जाल मकवानपुर संयाेजक निमेष निखिलकाे प्रमुख आतिथ्यता र साहित्य सङ्गम मकवानपुर अध्यक्ष डीबी बर्ताैलाकाे सभाध्यक्षतामा भएकाे हाे । कार्यक्रमलाई संगम सहसचिव भवानी तिमल्सिनाले सहजीकरण गरेकी थिइन् ।
