मकवानपुर । माइती नेपाल मकवानपुरले संस्थामा ४ महिनासम्म आवासीय तालिम लिएका किशोरीहरुलाई मंगलबार प्रमाणपत्र वितरण गरेको छ ।
पढाई छोडेका, आर्थिक रुपमा विपन्न, बेचविखनको जोखिममा पर्न संभावना भएका वर्गका २० किशोरीहरुलाई आधारभूत तथा एड्भान्स सिलाई सिप सिकाएको प्रशिक्षक सरिता देवकोटाले बताइन् । उनीहरुलाई नेतृत्व विकास, जीवनपयोगी कलाबारे प्रशिक्षण गराइएको थियो ।
माइती नेपाल मकवानपुर प्रमुख माया लामाको अध्यक्षतामा भएको प्रमाणपत्र वितरण कार्यक्रमका हेटौंडा ४ का वडा अध्यक्ष नविन सिग्देलले सिपलाई सदुपयोग गर्न प्रशिक्षार्थीहरुलाई अनुरोध गरे । सिपले व्यक्तिलाई आत्मानिर्भर बनाउने र आत्मानिर्भरताले हिंसाबाट माथि उठ्न सहायता गर्ने भएकोले जीवनमा उर्जाशील हुन अध्यक्ष सिग्देलले आग्रह गरे । आर्थिक रुपमा सशक्त भएपछि व्यक्तिको जीवन सहज बन्छ, सिपलाई अझै समय सापेक्ष बनाउन युट्युबबाट समेत ज्ञान लिन सकिने सिग्देलले बताए ।
कार्यक्रममा मानव अधिकार संरक्षण तथा बेचविखन विरुद्धको जिल्ला सञ्जाल अध्यक्ष आरती पाठकले माइती नेपालको कामको प्रशंसा गर्दै सिप सिकेका किशोरीहरुले आफ्नो गाउँमा गएर अन्यलाई समेत समन्वय गरेर सिपलाई बढाउनु पर्ने बताइन् । कार्यक्रममा हिमराइट्स मकवानपुर प्रमुख कुमारी वाइबाले सिप जीवनको आधार बन्ने भएकोले प्रमाणपत्रको भरपुर प्रयोग गर्न किशोरीहरुलाई प्रेरित गरिन् । तालिममा मकवानपुरगढी, मनहरी, बकैया, बागमती, राक्सिराङलगायत गाउँपालिका र हेटौंडा उपमहानगरपालिकाका किशोरीहरु सहभागी रहेको संस्थाकी सुपरभाइजर मन लामाले बताइन् ।
यसैगरी संस्थाले माइती नेपालमा अघिल्लो समूहमा सिलाई सिकेर व्यवसायमा लागेकी मकवानपुरगढी १ रानीसेराकी सरिता बम्जनको व्यवसाय अवलोकन गराएको छ । सोमबार भएको अवलोकन भ्रमणमा गाउँपालिकाको वडा १ का अध्यक्ष आइतसिं लोको समेत उपस्थिति रहेको थियो । मानव बेचविखन रोकथाम परियोजना अन्तरगत भएको कार्यक्रममा पालिकामा रहेका किशोरीहरुको हितको लागि आफूले समन्वय गर्ने वडा अध्यक्ष लोले बताए ।
व्यवसाय अवलोकनपछि संस्थाबाट तालिम लिएका किशोरी तथा संस्थाका प्रतिनिधिहरुले माइती नेपालद्वारा उत्पादित सूचना तथा जानकारीमुलक ब्रुसरहरु वितरणको लागि घरदैलो कार्यक्रम समेत गरिएको प्रमुख माया लामाले बताइन् ।
‘तहगत सरकारबीच अन्तरद्वन्द्व हुँदा संघीयता कमजोर हुन्छ’ मन्त्री लामा
Tags: No Comments
मकवानपुर । बागमती प्रदेशका आर्थिक मामिला तथा योजना मन्त्रि बहादुर सिं लामाले ‘तहगत सरकारबीच अन्तरद्वन्द्व हुँदा संघीयता कमजोर हुने बताएका छन् । सोमबार जिल्ला समन्वय समिति मकवानपुरको वार्षिक समिक्षा कार्यक्रमलाई बोल्दै उनले तीनवटै तहले अधिकारको मात्रै विषय उठाउँदा एकआपसमा अन्तरद्वन्दवकाे स्थिति पैदा भएकोले सरोकार पक्ष सबै यसमा गम्भीर बन्नुपर्ने बताए ।
‘संघीय व्यवस्था कमजोर नहुने गरि स्थानीय तहलाई बलियो बनाउनुपर्छ’ मन्त्री लामाले भने ‘संघ, प्रदेश र स्थानीय तहबीच समन्वयकारी भूमिका अहिलेको प्रमुख आवश्यकता रहेको छ’। तीनवटै तहका सरकारबाट बनेका तथा बनाउनु पर्ने नीति, नियम, मापदण्ड गहिराे अध्ययन पश्चात मात्र गरि निर्माण गर्नुपर्ने उनले बताए । हाल देशमा देखिएकाे आर्थिक तरलताकाे असर असर पनि तीनवटै तहमा परिरहेकाेले यसकाे समाधानमा एकले अर्कालाई सघाउनु पर्ने उनकाे भनाई थियाे ।
यसैगरी वार्षिक समिक्षामा बागमती प्रदेश सांसद एकलाल श्रेष्ठले स्थानीय स्रोत साधनको समुचित प्रयोग हुनुपर्ने बताए । स्थानीय तहले जनताको चित्त बुझ्नेगरि काम गर्नुपर्ने उनले बताए । उनले प्रदेश र संघ तहमा समुचित बजेट विनियोजन हुन नसकेको भन्दै सांसद श्रेष्ठले योजना र बजेट मन्त्रीको निर्वाचन क्षेत्र केन्द्रीत भएर जाने गरेको गुनासो समेत गरे ।
यस्तै, मकवानपुरका प्रमुख जिल्ला अधिकारी सुर्य प्रसाद सेढाईले कर्मचारीहरु प्रविधिमैत्री सँगै नागरिकलाई छिटाे सेवा प्रवाहमा केन्द्रीत भएर लाग्नु पर्ने बताए । महालेखाकाे प्रतिवेदन अनुसार स्थानीय तहमा बेरुजुकाे चाङ देखिएकाेले सुशासनलाई ध्यानमा राखेर काम गर्नुपर्ने उनले बताए । ‘स्थानीय स्रोतको दोहन, सार्वजनिक सम्पत्तिको दुरुपयोग, दोहोरो भुक्तानीको समस्या रोक्नु पर्छ’ उनले भने ।
कार्यक्रममा जिल्ला समन्वय समिति मकवानपुरका प्रमुख ललित घलानले प्राकृतिक स्रोतको उपयोग गर्ने नीतिहरु बन्ने क्रममा रहेको र आर्थिक समृद्धिकालागि त्यस किसिमका नीतिहरु आवश्यक रहेको बताए । समयमा नीतिहरु नबन्दा स्थानीय तहहरुले समस्या भोगिरहेको प्रमुख घलानले जानकारी दिए ।
१२ जना सम्मानित

जिसस मकवानपुरले आफ्नो वार्षिक समिक्षा कार्यक्रममा १२ जनालाई सम्मान गरेकाे छ । जिससले फरक विधाका संस्था तथा व्यक्ति गरि १२ जनालाई सम्मानित गरेकाे हाे । सहकारी विधा अन्तर्गत श्रमिक साना किसान कृषि सहकारी संस्था लिमिटेड, मकवानपुरगढी र जनसेवक कर्मचारी उपभोक्ता सहकारी संस्था लिमिटेडलाई सम्मान गरिएको छ । यस्तै, गैह्र सरकारी संस्थातर्फ शान्ति फाउण्डेशन मकवानपुर र ग्रामिण जीवनस्तर सुधार मञ्च मकवानपुरलाई सम्मान गरिएको छ ।
यसैगरि, कर्मचारितर्फ जिल्ला समन्वय समिति मकवानपुरमा खरिदार पदमा कार्यरत कर्मचारी अमृता खनाल र कैलाश गाउँपालिका अन्तर्गत कार्यरत सिनियर अनमि आशाकुमारी गुरुङ झा, बकैया गाउँपालिकाका सहायक पाँचौं तहका कर्मचारी मनिषा पराजुली सम्मानित भएकी छन् । समाजसेवातर्फ “फरक सोच अभियन्ता” थाहा नगरपालिकाका यादवजंग रायमाझी सम्मानित भएका छन् । यस्तै, खेलकुदतर्फ कराँतेमा, थाहा नगरपालिकाका मान सिं दोङ सम्मानित भएका छन् ।
यस्तै, सामुदायिक वनतर्फ सिमपानी देउकोट सामुदायिक वन उपभोक्ता समूह मनहरि सम्मानित भएका छन् । शिक्षातर्फ इन्द्रसरोवर गाउँपालिकाका चन्द्र आधारभूत विद्यालयलाई सम्मान प्रदान गरिएकाे छ । यसैगरि साना महिला उद्यमीतर्फ गीता मैनाली सम्मानित भएकी छन् ।
मकवानपुर । बागमती प्रदेश सरकारको लगानीमा हेटौंडामा पाउडर (धुलो) दुध उत्पादन उद्योग स्थापनाकाे कार्य सुरु भएकाे ३ वर्ष भए पनि निर्माण कार्य पुरा भएकाे छैन ।
प्रदेश सरकारले ३ वर्ष अघि हेटौंडा उपमहानगरपालिका वडा नम्बर १० न्यूरेनीस्थित सिसौघारीमा धुलो दुध तथा बटर उद्योग स्थापनाकाे कार्य थालनी गरेकाे थियाे । १ वर्षमा निर्माण कार्य सक्नेगरी प्रदेश सरकारको कृषि तथा पशुपन्छी विकास मन्त्रालय अन्तर्गतको प्रदेश दुग्ध विकास बोर्डको लगानीमा उद्योग निर्माण गरिएको थियो ।
किसानले उत्पादन गरेको दुध विक्री नहुने समस्या वर्षेनी आइरहेकाे वेला प्रदेशको कृषि तथा पशुपन्छी मन्त्रालयले पाउडर प्लान्ट निर्माण कार्य अघि बढाएको थियो । एक वर्षमा निर्माण कार्य सक्नेगरी प्रदेश सरकारको कृषि तथा पशुपन्छी विकास मन्त्रालय अन्तर्गतको प्रदेश दुग्ध विकास बोर्डको लगानीमा उद्योग निर्माणकाे काम सुरु गरिएकाे हाे ।
बागमती प्रदेशसहित काेशी मधेस र गण्डकी गरी ४ प्रदेशका किसानले उत्पादन गरेको दुध खपत गरी पाउडर बनाइने मन्त्रालयले जनाएको छ । उक्त ४ प्रदेशका कृषकले उत्पादन गरेको दुधलाई खपत गरी पाउडर बनाउने याेजना मन्त्रालयसँग छ । तर पाउडर प्लान्ट निर्माणका लागि २०७७ पुस १ गते इजी इन्फा प्रालि काठमाडौंले सम्झौता गरी शिलान्यास गरिएको उक्त उद्योगको निर्माणको काम हालसम्म सकिएकाे छैन । सम्झौता तथा पटक पटककाे म्याद थप अनुसार पाउडर प्लान्ट निर्माणको काम सकेर २०८० साल कार्तिक ३० गतेसम्म दुग्ध विकास बोर्डलाई हस्तान्तरण गर्नु पर्ने हाे । तर, हालसम्म पनि निर्माण कम्पनीले कार्य सपन्न गरेकाे छैन् ।
पाउडर प्लान्ट निर्माण सम्पन्न भएकाे भन्दै १ दिन परीक्षण उत्पादन समेत भएकाे थियाे । संझौता अनुसार दूधबाट पाउडर उत्पादन नभएपछी पुनः मर्मतको काम भइरहेको मन्त्रालयले जनाएकाे छ । बागमती प्रदेश सरकारको कृषि तथा पशुपन्छी मन्त्रालय अन्तरगतको प्रदेश दुग्ध विकास बोर्डको लगानीमा हेटौंडामा पाउडर (धुलो) दुध उत्पादन उद्योग निर्माणका लागि तीन पटक म्याद थप गरिएको भए पनि निर्माण सम्पन्न भएकाे छैन । अब म्याद थप गर्ने कानूनी आधार नभएकाे बताइएकाे छ । तीन पटक म्याद थप गर्दा पनि काम सकेर हस्तान्तरण नगरेकाले निर्माण कम्पनीलाई दश प्रतिशत जरिवाना तिराउनुपर्ने कानूनी व्यवस्था रहेको छ ।
संघीय सरकार मातहतको दुग्ध विकास आयोजनाको पशु आहार उत्पादन उद्योगको २ बिघा क्षेत्रफलमा जग्गामा पाउडर प्लान्ट स्थापना गरिएको हो । भौतिक संरचना निर्माण लगायतको काम करिब सकिए पनि उद्योग परिसरलाई व्यवस्थित गर्ने र चिस्यान केन्द्र (कोल्ड रुम) सञ्चालनको काम बाँकी छ ।
उद्योगको निर्माणको काम अन्तिम चरणमा पुगे बताइरहँदा प्लान्ट निर्माणको चरणमा भारतिय इन्जिनियर सहितका कामदारहरुले प्लान्टमा काम गरिरहेका छन् । प्लान्टबाट पाउडर दूध उत्पादन हुनका लागि अझै केही समय लाग्ने प्राबिधिक बताउँछन् ।
निर्माण कम्पनीलाई अन्तिम रकम भुक्तानी दिनका लागि दुग्ध विकास बोर्डसँग पर्याप्त रकम नभएकाे पाइएकाे छ । करिब ६ करोड रुपैया रकमान्तर गरेर आर्थिक मामिला तथा योजना मन्त्रालयको स्वीकृतिमा रकम भुक्तानी दिने तयारी भइरहेको बोर्डका कर्मचारीले बताए । उद्योग निर्माण कम्पनी इजी इन्फ्रा प्रालिका म्यानेजर उत्तम पौडेलले उद्योगको काम सकिएकाेले अब म्याद थप गर्न आवश्यक नै नरहेकाे बताए । पाैडेलले म्याद थप गरेको अवधिमानै काम सकिएको भने पनि उद्योग परिषर बाँकी निर्माणकाे कार्य भइरहेकाे छ ।
किसानले उत्पादन गरेको दुध नबिकेर ‘मिल्क होलीडे’ गर्नुपर्ने बाध्यता हटाउने उद्देश्यले स्थापना गरिएको उद्योगमा धुलो दुध उत्पादन परीक्षण, हस्तान्तरण र अन्य व्यवस्थापकीय काम गर्न भने बाँकी नै रहेको बोर्डका पदाधिकारीहरु बताउँछन् ।आवश्यक भौतिक निर्माण र उपकरण जडान सकिएसँगै कारखानामा पानीको प्रयोगबाट परीक्षण थालिएको केही दिनमै धुलो दुध उत्पादन परीक्षण गरेर हस्तान्तरण गर्ने पौडेलले बताए ।
मकवानपुर । मकवानपुरकाे हेटौडा उपमहानगरपालिकामा ट्याक्टर दुर्घटना हुँदा २ जनाको मृत्यु भएको छ । हेटौडा –१६ पानीस्वारामा ट्याक्टर दुर्घटना हुँदा २ जनाको घटना स्थलमानै मृत्यु भएको हाे ।
मधेश प्रदेश ०३–००१ त ६९८७ नम्बरको ट्याक्टर ब्याक गर्ने क्रममा आफै अनियन्त्रित भई पानीस्वारा भिरबाट ३ सय मिटर तल खसी दुर्घटना हुदाँ २ जनाको घटनास्थलमै मृत्यु भएको जिल्ला प्रहरी कार्यालय मकवानपुरले जनाएको छ ।
मृत्यु हुनेमा ट्याक्टर चालक बारा निजगंढ नगरपालिका वडा नम्बर–१३ बस्ने २६ वर्षीय डिलम थिङ र ट्याक्टरमा सवार हेटौंडा–१६ पानीस्वारा बस्ने ५६ वर्षीय जित बहादुर थिङ रहेकाे मकवानपुर प्रहरीले जनाएको छ ।
मकवानपुर । बागमती प्रदेशमा आइतबारकाे लागि बाेलाइएकाे सर्वदलीय बैठक निष्कर्ष विहिन सकिएकाे छ । संसदीय सभापति चयनलगायतका विषयमा छलफल गर्न बाेलाइएकाे प्रदेशको सर्वदलीय बैठक विना निष्कर्ष सकिएको हाे ।
मुख्यमन्त्री जम्कट्टेलको सक्रियतामा प्रदेश सभामुखको सचिवालयले बोलाएको बैठकमा सहमति जुट्ने सम्भावना नदेखिए पछि मुख्यमन्त्री शालिकराम जम्कट्टेल नै बैठक कक्षबाट बाहिरिएका थिए । सरकार गैरजिम्मेवार बनेकाले कुनै सहमति नभएको प्रमुख प्रतिपक्ष नेकपा एमालेले आराेप लगाएकाे छ । मुख्यमन्त्रीले एनजीओ शैलीमा सरकार चलाउन खोज्दा समस्या भएको एमाले नेता जगन्नाथ थपलियाले बताए । उनले भने, ‘संविधानले दिएको अधिकारमा रहेर संसद्ले गरेका निर्णय विरुद्धका काम सरकारले गरिरहेको छ ।’
एकीकृत समाजवादी संसदीय दलको नेता कृष्ण खनालले सबैको कमजोरीका कारण बैठक निष्कर्षविहीन बनेको बताए । ‘सरकार र प्रतिपक्ष दुवै समस्या समाधान भन्दा पनि समस्या बढाउनेतिर केन्द्रित भए । पाउने र गुमाउने विषयमा मात्र छलफल भयो’, खनालले भने, ‘बजेट तैँले कति लिने मैले कति लिने भन्नेमा छलफल केन्द्रित भयो, संसदीय समितिका सभापति चयनबारे छलफल प्रवेश नै भएन ।’
गत बुधबार मुख्यमन्त्री तथा मन्त्रिपरिषद् कार्यालय हेटौँडामा प्रदेशका मन्त्रीहरूसँगको छलफलपछि प्रदेशको वर्तमान राजनीतिक अवस्था र संसदीय समिति विषयमा छलफलका लागि बैठक आह्वान गरिएको थियाे । गत असारमा प्रदेश सभाबाट बजेट पारित गर्ने समयदेखि प्रदेश सरकार दबाबमा छ । मुख्यमन्त्री जम्कट्टेलले आर्थिक वर्ष २०८०-०८१ को बजेट पारित गर्दा प्रमुख प्रतिपक्ष दल नेकपा एमाले र प्रतिपक्ष दल राप्रपासँग गरेको सम्झौता कार्यान्वयनमा नआएकाे विषयले समस्या भएकाे हाे ।
प्रतिपक्ष दलहरूसँगको सम्झौताकै कारण बजेट पारित भएपछि पनि गत भदौ र असोज महिनामा बसेका प्रदेशसभा बैठकहरू समेत अवरुद्ध बनेको थियो । सम्झौता कार्यान्वयन नभएकाे भन्दै प्रतिपक्षदलले प्रदेश सभा पटक पटक अवरुद्ध गर्दै आएकाे छ । सरकार र प्रतिपक्ष दल बिचको आन्तरिक समस्या प्रदेशसभा बैठकमा प्रवेश भएपछि बैठक बस्न सकसपूर्ण हुँदै आएकाे छ ।
सहमति अनुसार बजेट माथिको छलफल सकिए लगत्तै असार २० गते बसेको मन्त्रिपरिषद् बैठकले विपक्षी दलले दिएका योजना समेटेर लैजाने निर्णय समेत गरेको थियो । त्यस पश्चात् असार २२ मा बसेको प्रदेशसभाले बजेट पारित भएको थियो । बजेट पारित भएपछि नयाँ याेजना समेट्न सकिदैन् । प्रतिपक्ष दलसँगकाे सम्झौता कार्यान्वयन नभएपछि सरकार माथि थप दबाब बढ्दै गएकाेले प्रदेश सरकारले समस्या समाधानको विकल्प खोज्न सर्वदलीय बैठक आह्वान गरेको थियाे । यसले बागमती प्रदेशमा सरकार र प्रतिपक्ष दलकाे रस्साकस्सीले प्रदेश सभा बैठक सञ्चालनमा समेत अवराेध हुने देखिन्छ ।
