मकवानपुर । राष्ट्रिय सभा सदस्य पदकाे लागि विहीबार भएकाे मतदान दिउँसाे ३ बजे सकिएकाे छ । बामगती प्रदेशकाे ४ सहित १९ सदस्य पदका लागि भएको निर्वाचन सातै प्रदेशमा शान्तिपूर्ण रूपमा मतदान सम्पन्न भएको हाे ।
आगमी फागुन २० गतेबाट रिक्त हुने २० राष्ट्रिय सभा सदस्य पदमध्ये १९ पदका लागि सातै प्रदेशमा शान्तिपूर्ण मतदान सम्पन्न भएको हो । १ पदमा भने राष्ट्रपतिबाट मनाेनित हुनेछ । बागमती प्रदेश अन्तरगत हेटौडाकाे भुटनदेवी माविमा भएकाे मतदानमा ३ सय ४२ मतदाताले मतदान गरेका छन् ।
प्रदेश सभाकाे १ सय १० र स्थानीय तहका २ सय ३७ मतदातासहित ३ सय ४७ मतदाता रहेको बागमतीमा काठमाडौँका मेयर बालेन शाहसहित ५ जना मतदानमा अनुपस्थित भए । प्रदेश तर्फ १ सय ८ र स्थानीय तर्फ २ सय ३४ मतदाताले मतदान गरे । प्रदेश तर्फ २ र स्थानीय तर्फ ३ मत खसेन । प्रदेश तर्फ हाम्राे नेपाली पार्टीका शैलेन्द्र बज्राचार्य र सरिता खड्की र स्थानीय तह तर्फ नुवाकाेट किस्पाङ गाउँपालिका अध्यक्ष बिरबल तामाङ र काभ्रे चौरी देउराली गाउँपालिका उपाध्यक्ष शेरबहादुर तामाङ मतदानमा सहभागी नभएकाे निर्वाचन अधिकृतकाे कार्यालय हेटौडाले जनाएकाे छ ।
निर्वाचन आयोगले बिहान नौ बजेदेखि ३ बजेसम्म मतदानको समय निर्धारण गरेको थियो । १९ पदका लागि ५१ जना उम्मेदवार चुनावी प्रतिस्पर्धामा थिए । बागमतीमा मतगणना बारे सर्वदलीय सर्वपक्षिय बैठक बस्ने तयारी भइरहेकाे छ । बैठक पछि आजै मतगणना सुरु गरिने निर्वाचन अधिकृत श्रीप्रसाद सञ्जेलले जानकारी दिए । संभवत आजै मतपरिणाम समेत सार्वजनिक हुनेछ ।
राष्ट्रिय सभा सदस्य निर्वाचनमा प्रदेशसभा सदस्य र नगरपालिका प्रमुख–उपप्रमुख, गाउँपालिका अध्यक्ष–उपाध्यक्षले मतदाता रहन संवैधानिक प्रावधन बमाेजिम मतदानमा सहभागी भएका हुन् ।
कोसी प्रदेशमा कुल ३ सय ६७ मतदाता रहेकोमा ३ सय ६४ मत खसेकाे छ । धरानका हर्क साम्पाङ र मोरङ ग्रामथान गाउँपालिकाका अध्यक्ष जयप्रकाश गच्छदार अनुपस्थित भएका छन् । झापा गाउँपालिकाका जयनारायण साह भ्रष्टाचार मुद्दामा निलम्बित भएकाले उनी पनि मतदानमा सहभागी भएनन् ।
मधेस प्रदेशमा एक जना मतदाता बाहेक सबैले मतदान गरेका छन् । प्रदेशमा ३ सय ७४ मतदाताले मतदान गरेका छन् । त्यस्तै गण्डकीमा २ सय २९ जनाले मतदान गरे । सहकारी ठगी काण्डमा फरार रहेका ढोरपाटनका मेयर देवकुमार नेपाली भने मतदानमा सहभागी भएनन् । त्यस्तै लुम्बिनीमा ३ सय ५ जना मतदाता रहेकोमा स्थानीय तहकाे दुइ जनाले मतदान गरेनन् ।
यसैगरी १ सय ९६ मतदाता रहेका कर्णालीमा शत प्रतिशत मतदान भएको निर्वाचन आयाेगले जनाएकाे छ । सुदूरपश्चिममा २ सय २६ मतदाताले मतदानमा सहभागी जनाएका छन् । निर्वाचन आयाेगले सात प्रदेशमा एक–एक मतदान स्थल र दुई–दुई मतदान केन्द्र कायम गरेर मतदानको व्यवस्था गरेको थियो ।
बागमती प्रदेशबाट अल्पसङ्ख्यक र अपाङ्गता, महिला, दलित र अन्य गरी चार क्षेत्र (क्लस्टर) का चार जनाका लागि राष्ट्रिय सभा सदस्यमा मतदान भएकाे हाे । राष्ट्रिय सभा सदस्य रहेका बागमती प्रदेशका एमालेबाट दिलकुमारी रावल र रामचन्द्र राई, एकीकृत समाजवादीका सिंगबहादुर विश्वकर्मा र सांसद खिमलाल देवकोटाको पद रिक्त हुँदैछ। जस अनुसार निर्वाचनमा महिला, अपांगता÷अल्पसंख्यक, दलित र अन्य समूहका १/१ सिटका लागि प्रतिस्पर्धा भएकाे हाे ।
मकवानपुर । राष्ट्रियसभा सदस्य निर्वाचन अन्तरगत हेटौंडास्थित भुटनदेवी मावि मतदान केन्द्रमा मतदान जारी रहेको छ । मतदानमामा अहिलेसम्म प्रदेशसभातर्फ प्रदेश तर्फ १ सय र स्थानीय तर्फ २ सय २५ जनाले मतदान गरेका छन् ।
प्रदेशसभातर्फ ११० मतदाता रहेका छन् । स्थानीय तहतर्फ २३७ मतदाता रहेका छन् । बागमतीमा रिक्त हुने ४ पदका लागि १५ जनाले उम्मेदवारी दर्ता गराएका छन् । मतदान विहान ९ बजे सुरु भएकाे छ भने दिउँसाे ३ बजे सम्पन्न हुने छ । निर्वाचन लगत्तै आजै मतगणना गरी नतिजा सार्वजनिक गरिने निर्वाचन अधिकृतकाे कार्यालयले जनाएकाे छ ।
मकवानपुर । मकवानपुरकाे हेटौडा सहित ७ वटै प्रदेशकाे राजधानीमा आज राष्ट्रिय सभाकाे निर्वाचन अन्तरगत मतदान हुदैछ । बागमतती प्रदेशकाे राजधानी हेटौडामा हुने मतदान हेटौंडा ४ स्थित भुटनदेवी माविमा विहान ९ बजेबाट सुरु हुनेछ ।
फागुन २० गतेबाट रिक्त हुने २० पद मध्ये १९ पदकाे लागि आज निर्वाचन हुन लागेकाे हाे । १ पदमा भने राष्ट्रपतिबाट मनाेनित हुनेछ । बागमती प्रदेशबाट प्रतिनिधित्व गर्ने ४ सदस्यकाे पद रिक्त हुने भए पछि मतदान हुन लागेकाे हाे । हेटौडा मतदान केन्द्रमा रहेकाे २ मतदान स्थलमा मतदान बिहान ९ बजेदेखि दिउँसो ३ बजेसम्म हुने प्रदेश निर्वाचन कार्यालय बागमतीले जनाएकाे छ । बागमती प्रदेश सभा सदस्य र प्रदेशभित्रका स्थानीय तहका नगर प्रमुख–उपप्रमुख तथा गाउँपालिकाका अध्यक्ष–उपाध्यक्ष मतदाता रहने छन् ।
बागमती प्रदेशबाट अल्पसङ्ख्यक र अपाङ्गता, महिला, दलित र अन्य गरी चार क्षेत्र (क्लस्टर) का चार जनाका लागि राष्ट्रिय सभा सदस्यमा निर्वाचन हुँदैछ । राष्ट्रिय सभा सदस्य रहेका बागमती प्रदेश तर्फका एमालेबाट दिलकुमारी रावल र रामचन्द्र राई, एकीकृत समाजवादीका सिंगबहादुर विश्वकर्मा र सांसद खिमलाल देवकोटाको पद रिक्त हुँदैछ। जस अनुसार निर्वाचनमा महिला, अपांगता÷अल्पसंख्यक, दलित र अन्य समूहका १/१ सिटका लागि प्रतिस्पर्धा हुनेछ।
मतदान सकिएलगत्तै मत गणना सुरु हुने र आजै नतिजा सार्वजनिक गर्ने निर्वाचन आयोगले जनाएको छ । बागमती प्रदेशमा रिक्त हुने ४ सदस्यकाे लागि १५ जनाले उम्मेदवारी दिएका छन् । निर्वाचनमा मतदाता रहने प्रदेश सभा सदस्य र स्थानीय तहका प्रमुख–उपप्रमुखका लागि छुट्टाछुट्टै मतदान केन्द्रको व्यवस्था गरिएको छ ।
मतदान केन्द्र अनुसार मतपत्रको रङ पनि फरक–फरक रहनेछ । निर्वाचनको लागि नेकपा एमाले र नेपाल मजदुर किसान पार्टीको ४/४, राष्ट्रिय प्रजातन्त्र पार्टीको ३, नेपाली कांग्रेसको २, नेकपा (माओवादी केन्द्र) र नेकपा (एकीकृत समाजवादी) ले १/१ गरी १५ जनाले उम्मेदवारी दिएका छन् । आज हुने निर्वाचनकाे लागि हेटौडामा बुधबार सर्वदलिय सर्वपक्षिय बैठक बसेर तयारी तथा सुरक्षा व्यवस्थाकाे जानकारी गराइएकाे थियाे ।
मकवानपुर । राष्ट्रिय युवा संघ नेपाल मकवानपुरको संयोजकमा राजेश नगरकोटी चयन भएका छन् । बुधबार हेटौंडामा भएको भेलाबाट नगरकोटीको संयोजकत्वमा नेतृत्व चयनका लागि गरिने सम्मेलनकाे लागि ७७ सदस्यीय कमिटि चयन भएको हो । कमिटिको सहसंयोजक सबिन लामा चयन भएका छन् ।
बैठकलाई सम्बोधन गर्दै युवा संघका केन्द्रीय उपाध्यक्ष कृष्णहरि केसीले नयाँ नेतृत्व चयनसँगै संगठनमा नयाँ गति पैदा हुने बताए । उनले कमी कमजोरी हटाई संगठनलाई सशक्त बनाउन र युवामा आकर्षण बढाउन सहयोग पुग्ने बताए । ‘सबल पार्टीको लागि सशक्त युवा संघ आवश्यक छ। त्यसैले यो सदस्य विस्तार, व्यवस्थापन र सदृढीकरणको अभियानमा लाग्नु पर्छ’ उनले भने ।
जनजीविकाका मुद्दा बोक्न, युवाका समस्या समाधानमा लाग्न र आत्मनिर्भर बनाउन युवालाई शिक्षा, सीप, श्रम र उत्पादनसँग जोड्ने लक्ष्य लिन समेत उनले आग्रह गरे । युवामा आशा जगाउने र नयाँ नेपाल निर्माण गर्ने अभिभारा युवाकै हो भन्दै नयाँ नेतृत्वले युवामा गति आउने विश्वास व्यक्त गरेका छन् । राष्ट्रिय युवा संघ नेपाल मकवानपुर अध्यक्ष लक्ष्मण उप्रेतीको सभाध्यक्षता र राष्ट्रिय युवा संघका केन्द्रीय उपाध्यक्ष कृष्णहरि केसीको प्रमुख आतिथ्यतामा विस्तारित बैठक भएकाे हाे ।
कार्यक्रममा नेकपा एमाले पोलिटिकल ब्युराे सदस्य तथा मकवानपुर जिल्ला इन्चार्ज देवी ज्ञवाली, नेकपा एमाले मकवानपुरका अध्यक्ष एकालाल श्रेष्ठ, राष्ट्रिय युवा संघ नेपालका लेखा आयोगका प्रमुख सन्तोष चौलागाई, नेपाल खेलकुद महासंघ महासचिव धरम बहादुर लामा, राष्ट्रिय यूवा संघ नेपाल स्थायी कमिटी सदस्य मिलन पाठक, राष्ट्रिय यूवा संघ नेपालका केन्द्रिय सदस्य प्रकाश लामा, दिल माया घर्ती, राष्ट्रिय यूवा संघ नेपाल बागमती प्रदेशको कोषाध्यक्ष नरेन्द्र भण्डारी, राष्ट्रिय यूवा संघ नेपाल प्रदेश सदस्य विश्वराज राई, नेकपा एमाले जिल्ला कमिटि सदस्य सानुकुमार लामा, नेकपा एमाले जनसंगठन समन्वयका सहइन्चार्ज आरती पाठक लगायतको उपस्थिति थियो ।
मकवानपुर । मकवानपुरकाे हेटौंडा उपमहानगरपालिका–१८ मा रहेको ज्योति माध्यमिक बिद्यालय (प्राबिधिक शिक्षालय) मा १ कराेड रुपैयाँ बजेटकाे ४ कोठे बन्ने भएकाे छ ।
हेटौंडा उपमहानगरपालिकाको सहयोगमा निर्माण हुने भवनको बुधवार नगर प्रमुख मीनाकुमारी लामाले शिलान्यास गरेकी हुन् । चालु आर्थिक बर्षको बजेटमा समाबेश रहेको बिद्यालय भवनको निर्माणका लागि करिब १ करोड रुपियाँ लाग्ने बिद्यालय व्यवस्थापन समितिका अध्यक्ष हर्क रम्तेलले जानकारी दिए ।
भवनको शिलान्यास गर्दै नगर प्रमुख लामाले शैक्षिक गुणस्तर सुधारका लागि उपमहानगर लागिरहेको बताइन् । उनले शैक्षिक सुधारका लागि उपमहानगरले नयाँ कार्ययोजना बनाएर अघि बढ्ने तयारीमा रहेको जानकारी दिइन् । आगामी आर्थिक बर्षलाई शैक्षिक बर्षको रुपमा मनाउँने तयारीमा उपमहानगर रहेको भन्दै बिद्यार्थिलाई गुणस्तरीय शिक्षा दिने काममा अभिभाबक र शिक्षकको भूमिका महत्वपुण हुने बताइन् ।
बिद्यालय व्यवस्थापन समितिका अध्यक्ष रम्तेलको अध्यक्षतामा भएको कार्यक्रममा हेटौंडा १८ का वडा अध्यक्ष अनिलकुमार बानियाँ, बिद्यालयका प्रधानाध्यापक जयराम थापा सहित स्थानिय संघ सस्थाका प्रतिनिधीहरुको आतिथ्यता रहेको थियो ।
