यो वर्षको दसैँ नेपाली दर्शकका लागि विशेष बन्दैछ। किनकि फूलपातीबाट तीन ठूला फिल्म रिलिज हुँदैछन्। दीपकदीपाको ‘छक्का पञ्जा ५’, जितु नेपालको ‘ज्वाइँ साब’ र विराज भट्टको ‘१२ गाउँ’ बीच महाभिडन्त हुँदैछ।
‘छक्का पञ्जा ५’ चर्चित फिल्मको पाँचौँ शृंखला हो। सिरिजका अरु फिल्मजस्तै आक्रामक व्यापार गर्न यो फिल्मलाई यसपटक चुनौती थपिएको छ। एकैदिन २ ठूला फिल्मसँग जुध्नुपर्दा। त्यसमाथि सामाजिक सञ्जालमा नकारात्मक टिप्पणी आइरहेका छन्। जसले फिल्मको कठिनाइ बढाउन पनि सक्छ।
यसै सेरोफेरोमा रहेर ‘छक्का पञ्जा ५’ अभिनेता, लेखक तथा निर्माता दीपकराज गिरीसँग नेपालखबरले गरेको कुराकानी:
फिल्म रिलिजको तरखरमा छ, दौडधुप कत्तिको छ नि?
अहिले प्रचारप्रसारमा पनि लागिरहेका छौँ। सिनेमाको काम पनि गरिरहेका छौँ। प्रचारप्रसारभन्दा पनि हामीविरुद्ध भइरहेको दुष्प्रचारविरुद्ध लागिरहेका छौँ। अलिकति नराम्रो चिजहरू हाबी भइरहेको छ फिल्म उद्योगमा।
हाम्रो सामग्रीमा आएर नकारात्मक कमेन्ट गर्ने र आफ्नो प्रचार गर्न लगाउने काम भइरहेको छ। साइबर सेना खटाएर गीतदेखि ट्रेलरसम्म गाली आइरहेको छ। भोलि फिल्म आउँदा पनि गाली गर्न रेडी छन् उनीहरू।
हामीले लगाएको सेतो लुगालाई ५० जनाले कालो भन्दा मान्छेमा दुविधा हुन्छ। त्यो भाष्य निर्माण गर्न खोजिँदैछ। त्यसको लागि हामी कसरी भिड्ने, छलफलमा छौँ। र, चिन्तित पनि छौँ। किनभने कामले हराउन नसकेपछि मान्छेहरू यो तरिका अपनाइरहेका छन्।
तपाईंलाई यो पटक फिल्मलक्षित नकारात्मक टिप्पणी बढी आइरहेको जस्तो लाग्छ?
अहिले सामाजिक सञ्जाल एकदमै बलियो छ। ५० जना लाग्दा प्रभाव बनाउन सक्छ। त्यसकारण हाम्रो चलचित्रप्रति लक्षित ठूलै आक्रमण देखिरहेको छु। त्यो स्वाभाविक होइन। कसैलाई फुसर्द छैन कि दीपकराज गिरीलाई गाली गर्न। मेरो पोस्टमा आएर १२ गाउँ किन लेख्ने? आफ्नै पोस्टमा लेखे भइहाल्यो नि। यो स्वाभाविक छैन।
यसलाई केही गरी हराउन सकिन्न, अब इमेजमा हान्नुपर्यो। जनतामाझ यसको बारेमा गतल भाष्य निर्माण गर्नुपर्यो भनेर मान्छेहरू लागिरहेका छन्। त्यसमा हाम्रै साथीहरूको ठूलो भूमिका छ। जब मान्छे कामले सक्दैन, तब अस्त्र प्रयोग गर्न थाल्छ। हामीलाई दर्शकले गरेको यति लामो माया केही साथीहरूलाई पचेको छैन। जसकारण यो दुष्प्रचारतिर लाग्नु भएको छ।
सोही दिन अरु दुई फिल्म पनि रिलिज हुँदैछन्, त्यसले व्यापारलाई असर कत्तिको असर गर्ला?
सबभन्दा पहिले मैले नै रिलिज डेट तोकेको हुँ। अहिले यो कुरा कसैले उठाउँदैन। यदि हामीले पछि तोकेको भए यो भिड्न आयो भनेर भन्थे। चलचित्रसम्बन्धित संघसंस्थाहरूको नि काम छैन। राजनीति गर्ने ठाउँ मात्रै हो। हाम्रोमा अर्काको फिल्म फ्लप हुँदा पार्टी गर्ने चलन छ।
हुन त यो क्षेत्र व्यापार हो, कसैलाई रोक्न सकिन्न। तर, अस्वाभाविक रूपमा आउनु ठिक होइन। त्यसको निर्क्यौल दर्शकले पक्कै गर्लान्। छक्का पञ्जाको स्वाद थाहा पाउने दर्शकहरूले हाम्रो फिल्म हेर्नुहुन्छ। सिनेमाको सबै सामग्री आइसकेका छन्। सिनेमा आफैँ बोल्नुपर्छ जस्तो लाग्छ।
छक्का पञ्जाजस्तो हिट सिरिज बक्सअफिसमा फ्लप भयो भने के होला? त्यसबारे सोच्नुभएको छ?
म दुवै कुराको लागि तयार छु। एउटा मान्छे निरन्तर सफल भएपछि त्यसलाई असफल भएको हेर्न चाहने जमात ठूलो हुन्छ। हामी पनि बलियो टिम अर्जेन्टिना र साउदीबीच खेल हुँदा साउदीतिर लाग्छौँ। हाम्रो मानसिकता नै जितिरहेको मान्छेले हारोस् भन्ने हुन्छ। भोलि कदाचित् हारिए पनि तयार छु।
जिन्दगीभर हिटको ठेक्का त कसले लिएको छ र? भारतमा पनि शोले बनाउने मान्छे पछि फ्लप भए। यो संसार नै अस्थायी छ। एकदिन हामी फ्लप भएर घाटतिर जान्छौँ। सिनेमाको के कुरा गर्नु! मेरो भाग्यमा यहाँभन्दा बढी प्राप्त गर्न लेखेको छैन भने म त्यहाँभन्दा बढी पाउँदिनँ। तर, मलाई खुसी चाहिँ के लाग्छ भने यत्रो ठूलो आक्रमण गर्ने अवस्थामा पुगेछु।
तर, हारिएछ भने मलाई दु:ख चाहिँ अहिले जुन खालको कुरा भएको छ। यो सफल हुँदा अब एकले अर्कोलाई यस्तै हतियार प्रयोग गर्छ। यो हतियार फिल्म राम्रो बनाउनेले भन्दा पनि फिल्मतिर ध्यान नदिनेले फोकस हुन्छ।
मलाई के विश्वास छ भने दर्शकले फिल्म हेर्ने हो र रमाइलो गर्ने हो। जति नै गाली आए पनि हाम्रो सिनेमा हेर्ने बानी लागेकाले फिल्म हेर्नुहुन्छ। फिल्म जुधाएर उहाँहरूले हाम्रो केही रकम कम गराउन सक्नुहोला। तर, त्यसले हाम्रो उत्साह, जाँगर र लगनशीलतामा फरक पर्दैन।
फिल्मको कथावस्तु के छ र अघिल्ला सिरिजभन्दा कसरी फरक छ?
हुन त ट्रेलरले नै फिल्मको कथावस्तुबारे हिन्ट दिइसकेको छ। यो फिल्म राजनीति र कर्मचारीतन्त्रको बारेमा बढी छ। अहिले देश र समाजको स्थिति जे छ, त्यही नै फिल्मको कथा हो। भ्रष्टाचारको बारेमा मिसन कसरी अगाडि बढ्छ भन्ने फिल्मभित्र छ। रमाइलोसहित मनछुने कुरा पनि छन्। यो फिल्म सबै कुराको मिश्रण हो।
पाँचसम्म आउँदा हाम्रो हरेक फिल्मको कथा एकअर्कासँग मिल्दैन। फरकफरक मुद्धा उठाएका हुन्छौँ। यसपटक पनि हामीले फरक विषय उठाएका छौँ। त्यो फरक इस्युमा मेरो र माग्ने बुढाको पात्र उही होला। अरु पात्रहरू नयाँ छन्।
पाँच सिरिजसम्म बनिसकेको छ, कहिलेसम्म ब्याज खाइरहने?
एउटै कथामा बनाउँदा ब्याज खाने भन्ने हुन्छ। हामी हरेकपटक नयाँ कथा भनिरहेका छौँ। पहिलो श्रृंखलामा वैदेशिक रोजगारीको सामाजिक आयामको कथा थियो। दोस्रोमा विदेशको पीआरका लागि जबर्जस्ती बिहे गर्ने कुरा उठान गरिएको थियो। तेस्रो श्रृंखलाले स्कुलमा हुने राजनीति र चौथोमा सामाजिक सञ्जालको प्रयोगमार्फत सत्तामा पुग्ने दलीय प्रवृत्तिलाई चित्रण गरिएको थियो।
नयाँ नभएको भए दर्शकले माया गर्दैनथे होला। अरु सिक्वेल पनि त छन् नि। हामी नयाँनयाँ घटनामा स्टोरी भनिरहेका हुन्छौँ। जसकारण यसलाई ब्याज ठ्याक्कै भन्न मिल्दैन। यो सहकर्मीहरूको आशीर्वाद हो। नामको कुरा गर्दा छक्का पञ्जा भएनि सत्ता अठ्ठा भएनि के फरक पर्छ र?
छक्का पञ्जा सिरिजबाहेक अरु बनाउने सोच छ कि नाइँ?
छ माया छपक्कै भन्ने फिल्म हामीले नै बनाएको हो। हामी हरेकपटक फिल्ममा नयाँ नयाँ भेराइटी दिइरहेका छौँ। एउटै चिज भएको भए दर्शकले हेर्दैनन्। नयाँ नामको हिसाबले पनि जान सकिन्छ। यसमा पनि सोच्दैछौँ।
फिल्ममा समावेश बिहे भाको छैन र ब्रेकअप सङ विवादमा तानिएका छन्, यसमा के छ तपाईंको प्रतिक्रिया?
गीत विवादित हुनु त्यही समूहकै काम हो। कुमारी होइन भन्नु कसरी छाडा भयो? केटाले कुमार छैन भन्दा हुने तर केटीले भन्दा यत्रो समस्या।
यदि फिल्मको गीत हिट नभएको भए फ्लप भनेर हल्ला गरिन्थ्यो। तर, उनीहरू यो पटक जे आउँछ, छोड्दिनँ भनेर रेडी छन्। अर्को कुरा सिनेमा र गीत भनेको नैतिक शिक्षा होइन। गीतमा त मनोरञ्जन हुन्छ।
यदि नैतिक शिक्षा दिनु कलाकारको दायित्व हो भने फिल्ममा किन बलात्कारका सिन राख्छन्। सिनेमामा त्यस्तो सिन राख्दा पनि त बच्चाले रेप गर्न सिक्छ नि। यो रेप गर्नु राम्रो होइन भनेर सिकाउने अभिभावकको काम हो।
ब्रेकअप सङमा पनि सुन्न नसकिने गाली छैनन्। सामान्यतया रिस उठ्दा ढाडै सर्कियोस् र घुट्टै मर्कियोस् भनिन्छ नि। फेरि हामीले गाली गर्नु सामाजिक अपराध हो पनि राखेका छौँ। अब जे गरे पनि यसको विरोध गर्छु भन्ने लागेपछि कसको बाउको के लाग्छ र! यो नकारात्मतासँग हामीहरू एक्लै लडिरहेका छौँ। सफलताको विपक्षमा मान्छे लाग्छन्।
वर्षा शिवाकोटीसँग पहिलो सहकार्य कस्तो रह्यो र कुन अभिनेत्रीसँग बढी जोडी सुहाएजस्तो लाग्छ?
वर्षाजीले एकदमै राम्रो काम गर्नुभएको छ। उहाँसँग मेरो केमेस्ट्री मिलेको जस्तो लाग्छ। दर्शकले पनि वर्षासँग राम्रो देखिँदोरहेछ भनेर प्रतिक्रिया दिनुभएको छ।
सबैसँग राम्रो छ, एउटासँग भन्दा अन्याय होला। तैपनि अलि बढी खेलेको भएर प्रियंकासँग बढी सुहाउँछ कि लाग्छ। संख्यात्मक हिसाबले उहाँसँग बढी सहकार्य भएकाले राम्रो देखिन्छजस्तो लाग्छ।
अन्त्यमा दर्शकहरूलाई के भन्न चाहनुहुन्छ?
अहिले कस्तो खालको सञ्जाल विकसित भयो भने केहीलाई प्रयोग गरेर राम्रोलाई नराम्रो, चोरलाई साधु र साधुलाई चोर बनाउने बेला आएको छ। त्यसमा सचेत भइदिनोस्। सिनेमा चले पनि उहाँहरू चलचित्रबारेमा नकारात्मकता फैलाउन तयार हुनुहुन्छ। त्यस्तो चिजहरू नसुन्दिनुहोला। यस्ता युट्युब र फेसबुकका कमेन्टमा विश्वास नगर्नुहोला। आफ्नो हिसाबले जज गर्नुहोला भन्न चाहन्छु।
#नेपाल खबर डटकममा प्रकाशित अन्तर्वार्ता साभार गरिएकाे
मकवानपुर । हाल देशभर मनसुनी र पश्चिमी वायुको प्रभाव कायम रहेको छ ।
मौसम पूर्वानुमान महाशाखाका अनुसार कोशी, मधेश, बागमती, गण्डकी र लुम्बिनी प्रदेशमा मनसुनी वायुको प्रभाव रहेको छ भने साथै कर्णाली प्रदेश र सुदूरपश्चिम प्रदेशमा पश्चिमी वायुको प्रभाव रहेको छ ।
यसैगरी देशको पूर्वी र मध्य भागमा भारतको बिहार तथा आसपासको क्षेत्रमा रहेको न्यून चापीय प्रणालीको आंशिक प्रभाव रहेको छ । मनसुनी वायु तथा न्यून चापीय प्रणालीको आशिक प्रभावका कारण देशको पहाडी भूभागमा आंशिक बदली रही कोशी प्रदेश र बागमती प्रदेशको एक–दुई स्थानमा हल्का वर्षा भइरहेको महाशाखाले जनाएको छ ।
मंगलबार दिउँसो कोशी, मधेस, बागमती र गण्डकी प्रदेशमा आंशिकदेखि साधरणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ । यस्तै कोशी, मधेश, बागमती र गण्डकी प्रदेशका थोरै स्थानहरूमा तथा बाँकी प्रदेशका पहाडी भूभागका एक–दुई स्थानमा चट्याङ्गसहित हल्का देखि मध्यम वर्षाको सम्भावना रहेको छ।
महाशाखाका अनुसार मंगलबार राति कोशी, मधेश, बागमती र गण्डकी प्रदेशमा आंशिकदेखि साधरणतया बदली रही बाँकी भूभागमा आंशिक बदली देखि मौसम मुख्यतया सफा रहने छ । कोशी, मधेस र बागमती प्रदेशका थोरै स्थानहरूमा तथा गण्डकी प्रदेशका एक–दुई स्थानमा चट्याङ्गसहित हल्का देखि मध्यम वर्षाको सम्भावना रहेको छ।
मकवानपुर । मकवानपुर हेटौंडामा रही पत्रकारितामा सक्रिय नेपाल पत्रकार महासंघ मकवानपुर शाखा अध्यक्ष मणिराज गौतमकाे पुस्तक “प्रवासका फूलहरु” विमाेचन भएकाे छ । गौतमकाे उक्त पुस्तक आइतबार बेल्जियममा बिमोचन गरिएको हाे ।
अन्तरराष्ट्रिय साहित्य समाज (अनेसास) बेल्जियम च्याप्टरले आयोजना गरेको कार्यक्रममा बेनेलक्सका लागि नेपाली राजदुत गेहेन्द्र राजभन्डारी, एनआरएनए बेल्जियमका अध्यक्ष सीता सापकोटा लगायतकाले पुस्तकको बिमोचन गरेका थिए ।
पुस्तक बिमोचन कार्यक्रममा राजदुत राजभन्डारीले बिदेशमा बस्ने नेपालीहरुका अनुभबलाई देशका नीति निर्माताहरुले बुझ्न सकेमा देश बिकासमा सहयोग पुग्ने बताए । ‘पुस्तक युरोपका नेपालीहरुको दस्ताबेजको रुपमा रहने भएकाले पनि ईतिहास बन्नेछ’ उनले भने ‘पुस्तक मार्फत बिदेशमा रहने नेपालीहरुको प्रतिनिधि भोगाइ अनि सत्य कथाबाट युवा पुस्तालाई सकारात्मक उर्जा प्रदान गर्ने विश्वाश छ ।’
यस्तै एनआरएनए बेल्जियमका अध्यक्ष सीता सापकोटाले बिदेशमा बसोबास गरिरहेका नेपालीहरुले धेरै चुनौतिका बिचमा पनि नेपाली पहिचानलाई निरन्तरता दिने र यसको प्रचार प्रसारका लागि लेखक गौतमले उदाहरणीय काम गरेको बताइन् । सापकाेटाले सबैका आ-आफ्नै भोगाई हुने, ति भाेगाइलाई पुस्तासामु जानकारी दिन पुस्तकले भूमिका खेल्ने बताइन् । नेपाल पत्रकार महासंघ बेल्जियमका अध्यक्ष ओम शर्माले गौतमकाे पुस्तकमा सुन्दर भविश्यको कल्पना गरेर देश छोडेका युरोपका नेपालीहरुका सत्य कथाहरु संकलन गरेको बताए । ‘आफ्नो जनभूमि छोडेर फरक भूगोल संस्कार र संस्कृतिमा आफूलाई स्थापित गर्न नेपालीहरुले युरोपमा गरेका संघर्षका कथाहरु प्रेरणादायी बन्नेछ’ उनले भने ।
अन्तरराष्ट्रीय नेपाली साहित्य समाज केन्द्रिय उपाध्यक्ष डिल्ली अंमाईले गौतमले युरोप भित्रका अधिकतम देशका बिभिन्न पेशा वा सेवामा कार्यरत नेपाली प्रतिनिधिहरुसँग प्रत्यक्ष सम्बाद गरेर प्रकाशन गरेकाे “प्रवासका फूलहरु” पुस्तक अभिलेखका रुपमा रहने भएकाले यसको महत्व उच्च्तम हुने बताए । अनेसास बेल्जियमका महासचिब गोपाल दाहालले निकै संघर्ष गरेर तयार गरिएको पुस्तकले आम नेपालीको कथा बोल्ने बताए ।
यस्तै अनेसास बेल्जियम अध्यक्ष सौरभ कारन्जितले प्रवासका नेपालीहरुको संघर्षको अन्तरकथामा तयार गरिएकाे पुस्तकले युरोपमा नेपालीहरुका दिब्य आशा, उन्मुक्त मनोभाब, उत्तेजना, सफलता-असफलताका कथा र संकल्पहरु समाबेश गरिएको कलात्मक कृतिका रुपमा रहकाे बताए ।
लेखक गौतमले नेपाल बाहिर रहेका असल छोराछोरीका जीवन्त कथा लेखिएको अनुभव सुनाउँदै भने ‘करिब डेढ बर्षको अन्तरालमा पुस्तक तयार गरेर बिदेशी भूमिमा बिमोचन गर्ने अबसर पाएकोमा अनेसास प्रति आभार ब्यक्त गर्दछु ।’ पुस्तकमा युरोपमा रहेका ३९ जना नेपालीहरुको बाल्यकाल,शैक्षिक अबस्था,राजनीति,परिबारिक अबस्था, बैदेशिक संघर्ष लगायतका वास्तविक कथा समावेश गरिएको उनले जानकारी दिए ।
कार्यक्रममा एनआरएनए आइसीसी सदस्य मदन दवाडी, हरी भट्टराई, उपाध्यक्ष कासी दनै, ओेएनएफ बेल्जियमका अध्यक्ष बिनोद न्यौपाने, जन सम्पर्क समिति बेल्जियमका उपसभापती बिराट जोशी लगायतले कृति सफलताको शुभकामना दिए । दुई सय अठासी पेज रहेको पुस्तक अन्तर्वार्तामा आधारित रहेकाे छ ।
पुस्तकमा लेखक संघ केन्द्रिय सदस्य हयागृब आचार्यको भाषा सम्पादन,मकवानपुरे कवि,लेखक सम्प्रस पौडेलको कथा सम्पादन, श्रीराम दहाल र बिना देबकोटाको श्रुति लेखन रहेको छ । प्रकाशन,लेआउट डिजाइन आकृति क्रियसनका राम अबिकासले गरेकाे पुस्तकको बितरकमा किताब घर हेटौंडा रहेको छ ।
मकवानपुर । १६ मंसिर २०८१ मा हुने स्थानीय तह उपनिर्वाचनका लागि २५ वटा दल दर्ता भएका छन् ।
राष्ट्रिय स्वतन्त्र पार्टी (रास्वपा) सहितका २५ दल उपनिर्वाचन प्रयोजनका लागि दर्ता भएकाे निर्वाचन आयोगले जनाएकाे छ । संसदको चौथो ठुलो दल रास्वपा पहिलो पटक स्थानीय निर्वाचनमा सहभागी हुन लागेको हो ।
निर्वाचन आयोगले यसअघि असोज १० देखि १६ गतेसम्मसमय दिएर दल दर्ताका लागि आह्वान गरेका थियाे । आयोगकाे सूचना अनुसार २६ राजनीतिक दलले निवेदन दिएकाेमा कानूनी रीत पूरा भएका २५ राजनीतिक दलहरुलाई दर्ता गरिएकाे आयोगले जनाएकाे छ । राजनीतिक दल सम्बन्धी नियमावली, २०७४ को नियम १७ को उपनियम (४) बमोजिम आयोगको आइतबारको निर्णयअनुसार २५ वटा दल स्थानीय तह उपनिर्वाचनकाे लागि दर्ता गरिएको प्रवक्ता नारायण प्रसाद सापकोटाले जानकारी दिए ।
आयोगले यसअघि सार्वजनिक निर्वाचन तालिका अनुसार २ मंसिर २०८१ मा बिहान १० देखि बेलुका ५ बजेसम्म निर्वाचन अधिकृतको कार्यालयमा उम्मेदवारको मनोनयन दर्ता हुनेछ । त्यही दिन बेलुका ५ देखि ६ बजेसम्ममा उम्मेदवारको सूची प्रकाशन हुनेछ ।
उल्लिखित सूचीमा रहेका उम्मेदवारको विरोधमा उजुरी दिने अवधि ३ मंसिर बिहान १० बजेदेखि दिउँसो ३ बजेसम्म हुने गरी तालिका सार्वजनिक भइ समेकाे छ । त्यही दिन दिउँसो ३ बजेपछि मंसिर ४ गते बेलुका ५ बजेसम्ममा मनोनयनपत्र र उजुरीउपर जाँचबुझ एवम् निर्णय गरी मंसिर ४ गते बेलुका ५ बजेदेखि ६ बजेसम्ममा निर्वाचन अधिकृतको कार्यालयमा उम्मेदवारको नामावली प्रकाशन गर्ने कार्यक्रम छ ।
मंसिर ५ गते बिहान ९ बजेदेखि दिउँसो १ बजेसम्म उम्मेदवारको नाम फिर्ता लिन सकिनेछ भने सोही दिन दिउँसो १ बजेदेखि ३ बजेसम्ममा निर्वाचन अधिकृतको कार्यालयमा उम्मेदवारको अन्तिम नामावली प्रकाशन गरी दिउँसो ३ बजेदेखि ५ बजे सम्ममा उम्मेदवारलाई निर्वाचन चिह्न प्रदान गरिने आयोगले जनाएको छ ।
अहिले स्थानीय तहका ३९ पद रिक्त छन्। जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ३, गाउँपालिका वडाध्यक्ष नौ, नगरपालिका प्रमुख एक, उपप्रमुख एक र वडाध्यक्षका २१ पद रिक्त छन्। नेपालको संविधान तथा स्थानीय तह निर्वाचन ऐन, २०७३ मा पदावधि समाप्त नहुँदै पद रिक्त भएमा र एक वर्षभन्दा बढी समय बाँकी रहेको अवस्थामा उपनिर्वाचन गर्नुपर्ने व्यवस्था छ।

मकवानपुर । बागमती प्रदेश सरकारले बाढीपहिरोले क्षति पुर्याएको ४५ वटा स्थानीय तहलाई ५ करोड ८० लाख रुपैयाँ सहायता प्रदान गर्ने भएको छ ।
शनिबार हेटौंडामा बसेको प्रदेश मन्त्रिपरिषद् बैठकले प्रदेशका ७ वटा स्थानीय तहलाई २० लाख, १२ वटा स्थानीय तहलाई १५ लाख र २६ वटा स्थानीय तहलाई १० लाखका दरले रकम दिने निर्णय गरेकाे हाे ।
असोज १० गतेदेखि १२ गतेसम्म परेकाे वर्षाका कारण बाढीपहिरोबाट धेरै क्षति पुगेको मकवानपुरको इन्द्रसरोबर गाउँपालिका काभ्रेपलाञ्चोकको रोशी, बेथानचोक र तेमाल गाउँपालिका तथा पनौती नगरपालिका, सिन्धुलीको सुनकोशी गाउँपालिका, ललितपुरको महांकाल गाउँपालिकालाई बढी जोखिमयुक्त क्षेत्र भएकाले २० लाखका दरले १ करोड ४० लाख रकम निकासा गरिने सरकारका प्रवक्ता आन्तरिक मामिला तथा कानूनमन्त्री सुरजचन्द्र लामिछानेले जानकारी दिए ।
यसैगरी मकवानपुरको बागमती गाउँपालिका, काठमाडौंको चन्द्रागिरी र नागार्जुन नगरपालिका, ललितपुरको गोदावरी नगरपालिका, कोन्ज्योसोम गाउँपालिका, बागमती गाउँपालिका, सिन्धुपाल्चोकको जुगल र लिसंखुपाखर गाउँपालिका, भक्तपुरको सूर्यविनायक नगरपालिका, रामेछापको खाँडादेवी गाउँपालिका, दोलखाको बिगु र धादिङको गजुरी गाउँपालिकामा १५ लाखका दरले १ करोड ८० लाख रुपैयाँ रकम निकासा गर्ने निर्णय भएको मन्त्री लामिछानेले बताए ।
यस्तै दोलखाको शैलुङ, गौरीशंकर र तामाकोशी गाउँपालिका, धादिङको बेनिघाट रोराङ, नेत्रावती डब्जोङ गाउँपालिका र धुनिवेशी नगरपालिका, रामेछापको मन्थली र रामेछाप नगरपालिकासहित गोकुलगंगा, दोरम्बाशैलुङ, सुनापति, लिखुतामाकोशी र उमाकुण्ड गाउँपालिकामा १० लाखका दरले रकम निकासा हुने भएको छ ।
यस्तै, मकवानपुरको बकैया गाउँपालिका, सिन्धुलीको गोलन्जोर र फिक्कल गाउँपालिका सिन्धुपाल्चोकको मेलम्ची नगरपालिका, भोटेकोशी, पाँचपोखरी थाङपाल र हेलम्बु गाउँपालिका, काभ्रेको नमोबद्ध र मण्डनदेउपुर नगरपालिका तथा चौरीदेउराली, महाभारत गाउँपालिका र चितवनको माडी नगरपालिका र इच्छाकामना गाउँपालिकालाई १०–१० लाख गरी २ करोड ६० लाख रुपैयाँ निकासा दिने निर्णय भएको कानूनमन्त्री लामिछानेले जानकारी दिए ।
उक्त रकम प्रदेश विपद् व्यवस्थापन कोषबाट सम्बन्धित स्थानीय तहको विपद व्यवस्थापन कोषमा पठाइने भएकाे छ । प्रदेश विपद् व्यवस्थापन कोषमा रकम न्यून रहेको भन्दै मन्त्रिपरिषद्ले आर्थिक मामिला तथा योजना मन्त्रालयबाट १० करोड ५० लाख रुपैयाँ निकासा गर्ने निर्णय समेत गरेकाे मन्त्री लामिछानेले बताए ।
यसैगरी प्रदेश सरकारले चणिकलाल तामाङलाई १ लाख ५० हजार रुपैयाँसहित सम्मान गर्ने भएको छ । प्रदेश मन्त्रिपरिषद् शनिबारकाे बैठकले तामाङलाई नगदसहित सम्मान गर्ने निर्णय गरेको हो ।
गत असोज १२ मा नख्खु खोलामा आएको बाढीमा पसेका २ जनाको जीवन रक्षा गरेको भन्दै उनलाई प्रदेश सरकारले सम्मान गर्ने निर्णय गरेको हो ।
मुख्यमन्त्री तथा मन्त्रीहरूकाे १५ दिनको तलब विपद् कोषमा
बागमती प्रदेशका मुख्यमन्त्री तथा मन्त्रीहरूले १५ दिनको तलब विपद् कोषमा जम्मा गर्ने भएका छन् । शनिवार प्रदेश राजधानी हेटौँडामा मन्त्रीहरूको छलफलले विपद् प्रभावित नागरिकहरूका लागि १५ दिनको तलब प्रदेश विपद् कोषमा जम्मा गर्ने निर्णय गरेको हो ।
उक्त रकम प्रदेशका विपद् प्रभावित नागरिकको उद्धार राहत तथा पुनः स्थापनाको लागि खर्च गरिने छ । प्रदेश सरकारका प्रवक्ता सुरजचन्द्र लामिछानेका अनुसार प्रदेश विपद् कोषमा १३ जना मन्त्रीको १५ दिनको तलब बापत ४ लाख २७ हजार ४४५ रुपैयाँ जम्मा हुनेछ ।
मन्त्रीहरूले मासिक प्राप्त गर्दै आएको ६० हजार २२० रुपैयाँको आधा रकम ३० हजार १६० रुपैयाँ र मुख्यमन्त्रीलाई मासिक प्राप्त हुने ७० हजार ७३० रुपैयाँको आधा रकम ३५ हजार ३६५ रुपैयाँ प्रदेश विपद् काेषमा जम्मा हुनेछ ।
प्रदेशमा विपदबाट क्षतिको यकिन विवरण तयार गर्न प्रदेश नीति तथा योजना आयोगलाई निर्देशन दिइएकाे छ । आयोगले विषयगत मन्त्रालय र क्षेत्रका आधारमा क्षति विवरण सङ्कलन गरी प्रतिवेदन बुझाउने छ ।