मकवानपुर । मकवानपुरको बागमती गाउँपालिकामा भएकाे सातौं संस्करणको बागमती गोल्डकप फुटबल प्रतियोगिताको उपाधी चर्च ब्वाइज युनाइटेडले हात पारेका छ । । चर्च ब्वाइजले पहिलो सहभागितामै गोल्डकपको उपाधि पोल्टामा पारेकाे हाे ।
सोमबार भएको फाइनल खेलमा साबिक विजेता मच्छिन्द्र क्लबलाई १-० गोलले पाखा लगाउँदै चर्च ब्वाइजले उपाधि जीतेकाे हो । बागमती गाउँपालिका–४, झुरझुरेस्थित शहीद स्मृति रंगशालामा भएकाे फाइनल उपाधि जीतसँगै चर्च ब्वाइजले १० लाख रुपैयाँसहित शिल्ड, मेडल तथा प्रमाणपत्र प्राप्त गर्यो । उपविजेतामा चित्त बुझाउँदै मछिन्द्रले ५ लाख रुपैयाँसहित शिल्ड, मेडल तथा प्रमाणपत्र प्राप्त गर्यो ।
चर्च ब्वाइजलाई उपाधि दिलाउन खेलको ४७ मिनेटमा समीर तामाङ गरेको गोल नै निर्णायक बन्यो । खेलको म्यान अफ द म्याच तामाङ घोषित हुँदै १० हजार रुपैयाँ प्राप्त गरे ।
प्रतियोगिता अन्तरगत शुक्रबार भएको पहिलो सेमिफाइनल खेलमा विभागीय टोली एपीएफलाई ३–२ गोलले हराउँदै चर्चब्वाइज फाइनलमा प्रवेश गरेको थियो । शनिबार भएको दोस्रो सेमिफाइनल खेलमा थ्रीस्टार क्लबलाई ३–१ गोलले हराउँदै साविक विजेता मछिन्द्रले फाइनल चर्चब्याइजसँग भेट पक्का गरेको थियो ।
प्रतियोगिताको सर्वोत्कृष्ट खेलाडी चर्च ब्वाइजका सन्तोष खत्री घोषित भए । उनले १ लाख १ हजार १ सय १ रुपैयाँ प्राप्त गरे । यस्तै उत्कृष्ट गोलरक्षक चर्च ब्वाइजकै टेकेन्द्र थापा, डिफेन्डर मच्छिन्द्रका देवेन्द्र तामाङ, मिडफिल्डर मच्छिन्द्रकै रोशन राना मगर, फरवार्ड चर्च ब्वाइजका समीर तामाङ र प्रशिक्षक चर्च ब्वाइजका सुमन श्रेष्ठ घोषित भए । विधागत उत्कृष्ट सबैले जनही २५-२५ हजार रुपैयाँ प्राप्त गरेका छन् ।
गाउँपालिकाकाे खेलकुद विकास समितिको आयोजनामा भएकाे प्रतियोगितामा ७ वटा विभागीय क्लब तथा ३ वटा मोफसलका क्लबकाे सहभागिता रहेकाे थियो ।
मकवानपुर। नेकपा (एकीकृत समाजवादी) बागमती प्रदेश कमिटीका पूर्वसदस्य शिवहरि बर्तौलासहित २ दर्जन नेता कार्यकता नेकपा (एमाले)मा फर्किएका छन् ।
सोमबार हेटौंडास्थित पार्टी कार्यालयमा बसेको एमाले मकवानपुरको पूर्ण बैठकमा उनीहरु एमालेमा प्रवेश गरेका हुन् । उनीहरुलाई एमाले वरिष्ठ उपाध्यक्ष तथा पूर्वउपप्रधानमन्त्री ईश्वर पोखरेल, एमाले स्थायी कमिटी सदस्य तथा बागमती ईन्चार्ज डा. राजन भट्टराई, एमाले केन्द्रीय सदस्य तथा मकवापुर ईन्चार्ज रामेश्वर रानालगायतका नेताहरुले एमाले पार्टीमा स्वागत गरेका थिए ।
बर्तौलासहित समाजवादी मकवानपुरका जिल्ला कमिटी सदस्य मानबहादुर बल, पूर्व जिल्ला कमिटी सदस्य कर्णबहादुर पाख्रिन, देवलाल गोले, सुनिलकुमार गोले, लोकबहादुर घिसिङ एमालेमा प्रवेश गरेका हुन् । यसैगरी, समाजवादी भीमफेदी गाउँपालिका कमिटीका सचिवालय सदस्य रवि खड्का, पालिका कमिटी सदस्य वीरबहादुर बल, शेरमान थापा, हेटौंडा–१ उपसचिव भुपाल थिङलगायत २ दर्जन नेता कार्यकर्ता एमालेमा फर्किएको कार्यक्रमको सहजीकरण गरेका एमाले मकवानपुरका उपाध्यक्ष हिदम लामाले जानकारी दिए ।
एमालेमा फर्किएका बर्तौलाले समाजवादी पार्टीबाट देश नबन्ने निष्कर्षसहित एमालेमा समाहित भएको बताए । उनले समाजवादीमा रहेकाहरुलाई एमालेमा फर्कन र पार्टी काममा लाग्न आग्रह गरे । उनले एमालेको मिसन ८४ मा कटिवद्ध भएर लाग्ने प्रतिवद्धता समेत व्यक्त गरे ।
उपाध्यक्ष लामाले पार्टीको ३ महिने वडा केन्द्रीत जरा अभियानअन्तर्गत पार्टी प्रवेश कार्यक्रम भएको बताए । उनले अभियानअन्तर्गत जिल्लाको १० वटै स्थानीय तहको १०२ वटै वडा कमिटीमा बैठक सञ्चालन भएको र पार्टीको जरा अभियान सक्रिय रुपमा सञ्चालन भइरहेको जानकारी दिए ।
सोमबारबाट सुरु भएको दुईदिने जिल्ला कमिटी बैठकमा सबै स्थानीय तह कमिटीको रिर्पोटिङ लिने र अभियानलाई अझ बृहत ढंगले अगाडि बढाउने छलफल हुने बताइएको छ । पार्टी जिल्ला अध्यक्ष श्रीधर पोखरेलको अध्यक्षतामा बसेको जिल्ला कमिटी बैठकमा एमाले एमाले स्थायी कमिटी सदस्य तथा बागमती ईन्चार्ज भट्टराईले निर्देशनात्मक मन्तव्य राख्नेछन् ।
मकवानपुर । नेकपा एमालेका वरिष्ठ उपाध्यक्ष ईश्वर पोखरेलले देशकाे संकट समाधानको लागि एमालेकाे बहुमत आवश्यक रहेकाे बताएका छन् । सोमबार एमाले जिल्ला कमिटी मकवानपुरको बैठकमा सम्बोधन गर्दै पोखरेलले उक्त कुरा बताएका हुन् ।
एमालेले बहुमत ल्याउन नसक्दा मुलुक फेरि पनि राजनीतिक अस्थिरताको भूमरीमा फस्छ उनले भने ‘त्यसैले सबै मिलेर एमालेलाई देशको निर्णायक राष्ट्रिय शक्ति बनाउनु पर्छ ।’ उनले लोकतन्त्रलाई सबल बनाउन पनि एमाले बलियो हुनुपर्ने बताए । एमालेको नेतृत्वलाई बदनाम गराउन विभिन्न तत्वहरु क्रियाशील हुँदा कार्यकर्ता पंक्ती चुप लागेर बस्न नमिल्ने उनको भनाई छ ।
वरिष्ठ उपाध्यक्ष पोखरेलले वडा तहबाटै एमालेलाई बलियो बनाउनुपर्ने बताए । जनताको मन जितेमात्र मत प्राप्त गर्न सकिने भएकोले जनचाहना बुझेर काम गर्न उनले कार्यकर्तालाई निर्देशन दिए।
यसैगरी वर्तमान सरकार कसैले पनि ढाल्न नसक्ने उनले बताए । ‘कांग्रेस र एमालेमा बईमानी पलाए मात्र सरकार ढल्छ’ उनले भने ‘दुबै दल इमानदार हुँदासम्म ओली नेतृत्वको सरकार ढल्दैन ।’ राजनीतिक स्थायित्वको लागि वर्तमान सत्ता समीकरण निर्माण भएको उनले बताए । ’२०७९ को निर्वाचन पछि राजनीतिक अस्थिरतको बढेकाेले दुबै दलले आपसमा सहकार्य गरेको हुन्’ उनले भने ।
वरिष्ठ उपाध्यक्ष पोखरेलले कांग्रेस म्याजिकल नम्बरको चक्करमा फस्दा २०७९ को निर्वाचनपछि राष्ट्रिय सहमतिको सरकार बन्न नसकेको जिकिर गरे । कांग्रेससँग मिल्दै गर्दा आगामी चुनावीमा कांग्रेस नै मुख्य प्रतिस्पर्धी दल हो भन्ने कुरालाई नभुल्न पनि उनले कार्यकर्तालाई आग्रह गरे ।
मकवानपुर । अहिले देशमा पश्चिमी वायुका तथा स्थानीय वायु पनि प्रभाव रहेको छ। कोशी प्रदेश र बाग्मती प्रदेशका पहाडी भू-भागका एक-दुई स्थानमा हल्का वर्षा भइरहेको छ।
उक्त वायुको कारण देशका पहाडी भू-भागमा आंशिकदेखि साधारणतया बदली रही बाँकी भू-भागमा आंशिक बदली देखि मौसम मुख्यतया सफा रहेको जल तथा मौसम बिज्ञान विभागको मौसम पूर्वानुमान महाशाखाले जनाएको छ ।
महाशाखाका अनुसार देशको पहाडी भू-भागको एक-दुई स्थानमा मेघ गर्जन र चट्याङसहित हल्का वर्षाको सम्भावना रहेको छ । कोशी प्रदेश, बाग्मती प्रदेश र गण्डकी प्रदेशको उच्च पहाडी तथा हिमाली भू-भागका थोरै स्थानहरूमा तथा बाँकी प्रदेशका उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको छ ।
यसको प्रभावले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने हुँदा त्यसबाट हुन सक्ने असरबाट समेत बच्न आवश्यक उपायहरू तथा सतर्कता अपनाउन महाशाखाको अनुरोध गरेको छ।
काठमाडौं । अन्तर्राष्ट्रिय महिला च्याम्पियनसिपमा अन्तर्गत समूह चरणको अन्तिम खेलमा नेपालले म्यानमारले बराबरी खेलेका छन् । अखिल नेपाल फुटबल संघ (एन्फा) द्वारा आयोजित प्रतियोगितामा चार राष्ट्र सम्मिलित इन्टरनेशनल वुमन्स च्याम्पियनसिप अन्तरगत आइतबारकाे खेल २-२ गोलको बराबरीमा सकिएको हो ।
सबै गोल पहिलो हाफमै भएका थिए । काठमाडौंकाे त्रिपुरेश्वरस्थित दशरथ रंगशालामा जारी फाइनलमा पुगिसकेका दुई टोलीबिचको खेलमा निकै रोमाञ्चक प्रतिस्पर्धा भएकाे थियाे । घरेलु टोली छैटौँ मिनेटमा नै पछि परेको थियो । म्याट नोई खिनको फ्रिकिक गोलमा परिणत भएकाे थियाे । तर, म्यानमारको अग्रता लामो समय टिक्न सकेन ।
११ औँ मिनेटमा साबित्रा भण्डारीको शानदार पासमा सविता रानामगरले नेपाललाई खेलमा फर्काइन् । यद्यपि, १७ औँ मिनेटमा म्यानमारले पुनः अग्रता लियो । मे हेट लुले प्रतियोगितामा गोल गर्दै टोलीलाई अग्रता दिलाइन् । खेलमा नेपालले दुईपटक कम्ब्याक गर्दै खेल बराबरी गरेको हो ।
नेपालले ४१ औँ मिनेटमा पुनः कम्ब्याक गर्यो । यसपटक प्रीति राईको पासमा साबित्रा भण्डारीले गोल गर्दै नेपाललाई खेलमा फर्काइन् । खेलमा दुवै टोलीले गोल गर्ने थुप्रै अवसरको सदुपयोग गर्न सकेनन् । फाइनल खेल आगामी बुधबार हुनेछ ।