मकवानपुर । राष्ट्रिय मानव अधिकार आयोगका सचिव मुरारीप्रसाद खरेलले अभिव्यक्ति स्वतन्त्रताको माध्यम पत्रकारिता भएकाेले हनन गर्न नपाइने बताएका छन् । राष्ट्रिय मानव अधिकार आयोगको आयोजना र फ्रिडम फोरमको संयोजनमा हेटौँडामा आइतबार भएको अभिव्यक्ति स्वतन्त्रता र पत्रकार सुरक्षा सम्बन्धी प्रादेशिक अभिमुखीकरण कार्यक्रममा उनले यस्तो बताएका हुन् ।
अभिव्यक्ति स्वतन्त्रता सुरक्षा संयन्त्र कार्यविधि निर्देशिका २०७५ ले सुरक्षा संयन्त्रको गठन, निर्देशक समिति, द्रूत उद्धार टोली, प्रदेश र जिल्ला स्तरमा संयन्त्र र सञ्जाल गठन गर्ने व्यवस्था गरेको उनले बताए । नियमनका नाममा नागरिकको अभिव्यक्ति स्वतन्त्रता हनन गर्न नपाइने उनले बताए । ‘कुनै पनि बहाना बनाई नागरिकलाई अभिव्यक्ति स्वतन्त्रतामाथि बन्देज लगाउन तथा वञ्चित गर्न पाइदैन’ उनले भने । कसैको असक्षमता र नबुझेका कारण प्रेस तथा अभिव्यक्ति स्वतन्त्रता ठिक होइन र छैन भन्नु उचित होइन भन्दै उनले पत्रकारिता अभिव्यक्ति स्वतन्त्रताको माध्यम भएको बताए ।
आयोगका सहसचिव यज्ञप्रसद अधिकारीले पछिल्लो समयमा पत्रकारमाथि हुने भौतिक आक्रमणका घटना कम भएपनि सुरक्षा चुनौतीका स्वरुप परिवर्तन भएको बताए । ‘अभिव्यक्ति स्वतन्त्रता मानव अधिकारको केन्द्र विन्दु हाे’ उनले भने ‘प्रेस तथा अभिव्यक्ति स्वतन्त्रताको प्रत्याभूति दिने दायित्व सरकारको रहेकाे छ ।’ फ्रिडम फोरमका कार्यकारी प्रमुख तारानाथ दाहालले नियन्त्रण र नियमनको नाममा अभिव्यक्ति स्वतन्त्रमाथि चुनौती बढेको बताउँदै सबैको साझा प्रयासमा नागरिकको अभिव्यक्ति स्वतन्त्रताको सुनिश्चितता गर्न सकिने बताए ।
कार्यक्रममा मानव आधिकार आयोग बागमती प्रदेशका कार्यालय प्रमुख पवनकुमार भट्टले प्रदेश स्तरीय अभिव्यक्ति स्वतन्त्रता संरक्षण संयन्त्रको गतिविधि र संयन्त्रका समस्या सम्बन्धमा जानकारी गराएका थिए । यसैगरी फ्रिडम फोरमकी अभिव्यक्ति स्वतन्त्रतासम्बन्धी अनुगमनकर्ता नानीमैया खड्काले प्रेस तथा अभिव्यक्ति स्वतन्त्रताको अवस्था र घटनाहरुको जानकारी गराएकी थिइन् ।
कार्यक्रममा सञ्चारकर्मीहरु कृष्ण सारु, कुमार अधिकारी, सुरेश श्रेष्ठ, वसन्त पराजुली, माधव न्यौपाने, राजन सिंह, अधिकारकर्मीहरु कुमारी वाइवा, कमल विश्वकर्मा, शर्मिला श्रेष्ठ, बागमती प्रदेशका सञ्चार रजिष्ट्रार रेवती सापकोटा, बागमती प्रदेशका मुख्यमन्त्री कार्यालयका उपसचिव विनोद अमात्यलगायतले अभिव्यक्ति स्वतन्त्रता सुरक्षा संयन्त्रको भूमिकालाई प्रभावकारी बनाउनुपर्नेमा जोड दिए ।
मकवानपुर । नेपाल भाषाको संरक्षण र प्रवर्द्धनमा सरकारहरुलाई झकझक्याउदै गर्नु पर्ने एक कार्यक्रममा सहभागीहरुले बताएका छन् । नेपाल भाषाकाे संरक्षणमा नेवार समुदायहरु सक्रिय हुनुपर्ने नेपाल भाषा प्रवर्द्धन कार्यक्रम जोड दिइएकाे हाे ।
बागमती प्रदेशको संस्कृति तथा पर्यटन मन्त्रालय अन्तरगतको पर्यटन कार्यालय काठमाडौं र नेपाल भाषा एकेडेमीको संयुक्त आयोजनामा हेटौंडामा शनिबार भएकाे नेपाल भाषा प्रवर्द्धन कार्यक्रममा बागमती प्रदेश सरकारले तामाङसँगै नेपाल भाषालाई सरकारी कामकाजको भाषाको रुपमा कार्यान्वयन गरिरहेकोले नेवार समुदाय जागरुक हुनु पर्ने बताइएकाे छ ।
कार्यक्रममा हेटौंडा उपमहानगरपालिका २ का वडा अध्यक्ष विष्णुगोपाल महर्जनले भाषा मासिएपछि जातमात्रको खासै अस्थित्व नहुँने भन्दै भाषा संरक्षण र प्रवर्द्धनमा नेवार समुदाय सचेत हुनुपर्ने बताए । ‘भाषा, संस्कृति भनेको जात, समुदायसँगै देशको साझा सम्पती हो’ उनले भने ‘राज्य र सरकारलाई खबरदारी गर्दै नेपाल भाषाको विकास र विस्तारमा नेवार समुदाय सक्रिय हुनुपर्दछ ।’
भाषा अभियान्ता पौभा सायमीले नेपाल भाषाको महत्त्व नेवार जातिको लागि मात्र नभएर देशकै सम्पत्ति भएकोले सबै सचेत र जिम्मेवार हुनुपर्ने बताए । ‘भाषा विलिन हुनु भनेको सम्पदा, संस्कृति, विचार बिलिन हुनु हो’ उनले भने ‘नेपाल भाषा सिक्न र जगेर्ना गर्न सबैले भूमिका खेल्न ढिला गर्नु हुन्न ।’ अंग्रेजी, जर्मन, कोरियन, जापानिज भाषा पढेर विदेशिनेको संख्या अत्याधिक बढेको प्रति उनले आफ्नो भाषाप्रति गर्व गर्ने र प्रयोग, संरक्षण नगर्नाले आफ्नै अस्थित्व लोप हुने भन्दै चेतावनी दिए ।
नेपाल भाषा एकेडेमीका प्राज्ञ विद्या चित्रकार, पाटन क्याम्पसका प्राध्यापक किशोर नेपाली, नेपाली काँग्रसका नेता अशोक शाक्य, सामाजिक विकास मन्त्रालयकी लैङ्गीक सम्पर्क व्यक्ति चन्द्र कुमारी व्यञ्जनकार, नेवा: देय् दबु: बागमती प्रदेशका प्रमुख सचिव गणेशकुमार श्रेष्ठ लगायतले कार्यक्रममा मन्तव्य व्यक्त गरेका थिए ।
मकवानपुरसहित नुवाकोट, दोलखामा पनि शनिबार नै नेपाल भाषा प्रवर्द्धन कार्यक्रम गरिएकाे नेपाल भाषा एकेडेमीका व्यवस्थापक शान्तराज शाक्यले बताए । कार्यक्रम आयोजना गरिने ९ जिल्ला मध्ये चितवन, धादिङ र काभ्रेपलाञ्चोक यसअघी नै सम्पन्न भईसकेको उनले जानकारी दिए । बाँकी ३ जिल्लामा चाँडै कार्यक्रम गरिने बताईएको छ ।
नेपाल भाषा एकेडेमीले नेपाल भाषालाई बागमती प्रदेश सरकारले कामकाजको भाषा घोषणा गरेको सन्दर्भमा भाषिक जागरण अभिमुखीकरणका लागि आधारपत्र प्रस्तुत गरेको थियो । कार्यक्रम हेटौंडा उपमहानगरपालिका २ का वडा अध्यक्ष विष्णुगोपाल महर्जनको प्रमुख आतिथ्य तथा भाषा अभियान्ता पौभा सायमीको अध्यक्षतामा भएको हाे ।
एसइईको परीक्षा ७ चैतबाट सुरु भएको छ। अभिभावकहरूमा आफ्ना बालबालिकालाई कसरी राम्रो परीक्षा दिन सहयोग गर्ने भन्ने चिन्ता छ । यस्तै अर्कोतिर सहयोगका लागि उपाय के हुन सक्छ भन्ने जिज्ञासा उब्जिरहेको छ । यस्तो अवस्थामा चिन्तालाई भन्दा परीक्षा राम्रो गराउने प्रमाणित उपायहरूलाई ठाउँ दिँदा राम्रो परिणाम प्राप्त गर्न सकिने मनोविद् भगवती भट्टराई बताउँछिन् ।
परीक्षा तनावपूर्ण हुन सक्छ, तर सही तरिकाले अध्ययन गर्दा विद्यार्थीहरुलाई निकै राम्रो उपलब्धि प्राप्त गर्न सहयोग मिल्छ। परीक्षामा उत्कृष्ट प्रदर्शन गर्न र तनाव कम गर्न विद्यार्थीहरूले योजना, संगठन, र स्मार्ट अध्ययन प्रविधिहरूलाई अपनाउँदा राम्रो हुन्छ। यहाँ केही महत्वपूर्ण चरणहरू छन् जसलाई अपनाउँदा परीक्षाको तयारीलाई निकै प्रभावकारी बनाउन सकिने उनकाे भनाई रहेकाे छ ।
अभिभावकहरूले यी कुराहरुलाई ध्यानमा राखी आफ्नो बालबालिकालाई सहयोग गर्ने हो भने राम्रो परिणाम ल्याउने वातावरण बालबालिकालाई दिन सकिने तथा सहज किसिमले परीक्षा उत्तीर्ण गर्ने बताउने भट्टराइले दिएका १० उपायहरुः
१. योजनाबद्ध ढंगले अध्ययन गर्ने
विद्यार्थीहरूले राम्रोसँग संगठित अध्ययन योजना तयार गर्नुपर्छ ताकि सबै विषयहरू व्यवस्थित रूपमा समेट्न सकियोस्। आफ्नो पाठ्यक्रमलाई साना भागहरूमा विभाजन गरी प्रत्येक विषयका लागि समय छुट्याउनुपर्छ। जुन विषयमा सुधार आवश्यक छ, तिनलाई प्राथमिकता दिनुपर्छ।
२. अध्ययन सामग्री व्यवस्थित गर्नुपर्छ
विद्यार्थीहरूले सबै आवश्यक अध्ययन सामग्रीहरू, जस्तै नोट्स, पाठ्यपुस्तकहरू, अघिल्लो परीक्षा पत्रहरू, र सन्दर्भ सामग्रीहरू सङ्कलन गरी व्यवस्थित रूपमा राख्नुपर्छ ताकि अध्ययनको क्रममा समय जोगियोस् र सामग्री खोज्ने तनावले अध्ययनलाई असर नपरोस्। बस्ने ठाउँ सामग्रीको पहुँच आदि जस्ता कुरालाई जति सहज बनाउँछौं त्यति नै अध्ययनमा जाँगर पनि लाग्दछ । अन्तिम समयसम्म कहाँ के गर्ने के पढ्ने भन्ने जस्ता कुरा बाँकी राख्यौं भने पढाइ प्रभावकारी हुँदैन।
३. परीक्षाको ढाँचा बुझ्ने
अघिल्लो प्रश्नपत्रहरूको समीक्षा गरेर वा शिक्षकसँग सोधेर परीक्षा को ढाँचा बुझ्न आवश्यक छ। प्रश्नहरूको प्रकार (बहुविकल्पीय, निबन्ध, वा समस्या समाधान) बुझ्दा तयारीको सही दिशा तय गर्न सकिन्छ।कहिलेकाहीँ विद्यार्थीले परीक्षाका लागि महत्त्वपूर्ण सामग्रीमा भन्दा कम महत्वका सामग्रीमा बढी काम गर्छन् वा सम्पूर्ण सामग्रीलाई उति नै महत्व दिएर पढ्दछन् । ज्ञान प्राप्त गर्नको लागि गर्नुपर्ने त्यही कुराहरू नै हुन् तर हाम्रो फोरमेटिभ भन्दा सबमेटिवलाई बढी महत्व दिने अर्थात् परीक्षाले ज्ञान वृद्धि गर्ने भन्दा पनि अन्तिम समयमा जानेका कुरा सबै लेखेर बुझाउने प्रणालीमा (जसमा विद्यार्थीले अन्तिम समयमा प्राप्त गरेको प्रतिफललाई बढी महत्व दिइन्छ ) देश अनुसारको भेष भनेजस्तै कस्ता प्रश्न आउँछन् भन्ने कुरालाई बुझ्न निकै जरुरी हुन्छ।
४. प्रभावकारी अध्ययन प्रविधिहरू अपनाउनुपर्छ
अध्ययनलाई प्रभावकारी बनाउने अनेक विधिहरू विकास भएका छन्। तीमध्ये सक्रिय पुनरावृत्ति (Active Recall) केवल पढ्ने मात्र होइन, आफूलाई प्रश्न सोधेर उत्तर दिने प्रयास गर्ने , विस्तारित पुनरावृत्ति (Spaced Repetition) निश्चित अवधिमा अध्ययन सामग्री दोहोर्याएर सम्झने क्षमता बढाउने , अघिल्लो परीक्षा पत्रहरू अभ्यास गरेर आत्मविश्वास बढाउने , नेमोनिक्स (Mnemonics) र माइन्ड म्याप जस्ता जटिल अवधारणाहरू सम्झन सजिलो बनाउने जस्ता बिधिहरु प्रयोग गर्न सकिन्छ ।
३. स्वस्थ जीवनशैली अपनाउनुपर्छ
विद्यार्थीहरूले शारीरिक र मानसिक स्वास्थ्यको ख्याल राख्नुपर्छ ताकि प्रभावकारी रूपमा अध्ययन गर्न सकियोस्। आतिएर २४सै घण्टा पढ्नेभन्दा पनि कम्तीमा सात -आठ घण्टाको पर्याप्त निद्रा पुर्याउनु पर्दछ जसले मस्तिष्कलाई सहज राख्न र स्मरण शक्ति सन्तुलित राख्न सहयोग मिल्दछ।मस्तिष्कलाई ऊर्जा दिन सन्तुलित आहार खानुपर्छ। सम्पूर्ण पोषण पुग्ने खाना खाने तर अत्याधिक माछामासु सेवन गर्ने जस्ता कार्यलाई कम गर्ने । नियमित रूपमा व्यायाम गरे तनाव समेत कम हुन्छ। तर व्यायाम गर्दा धेरै थाक्ने खालको भन्दा पनि शरीरलाई स्फुर्त राख्ने खालको हलुका मध्यम खालका विकल्पहरू चयन गर्दा राम्रो हुन्छ जस्ले रक्त सञ्चारलाई गतिशील राख्नका साथसाथै मस्तिष्कमा अक्सिजनको मात्रालाई समेत राम्रोसित प्रवाह गर्छ।शरीरमा पानीको मात्रालाई सन्तुलित रुपमा कायम राख्नुपर्छ जसले विविध शारीरिक प्रक्रियाहरूमा मद्दत पुर्याउँदछ।शरीर हाइड्रेटेड राख्दा पढ्दा टाउको आँखा दुख्ने जस्ता समस्याहरुलाई समेत निकै कम गर्न सकिन्छ । बीच-बीचमा ब्रेक समेत लिँदा राम्रो हुन्छ।
६. रट्ने बानी हटाउनुपर्छ
विद्यार्थीहरूले रट्ने प्रवृत्तिलाई त्यागेर विषयहरूलाई गहिरो रूपमा बुझ्न प्रयास गर्नुपर्छ। गहिरोसित अध्ययन गरेका कुरा दीर्घकालीन स्मरणमा बस्ने भएकोले हतपत बिर्सिइँदैन ।
७. अध्ययन समूहहरू बनाई तयारी गर्दा राम्रो
साथीहरूसँग अध्ययन गर्दा विषयलाई बुझ्न सजिलो हुन्छ र शंका समाधान गर्न सकिन्छ।कहिलेकाहीँ एकोहोरो बुझाइले गलत तयारी भइरहेको हुनसक्छ यस्तो अवस्थामा संगठित तयारीले भुल्चोक हुने अवस्थालाई निकै न्यूनीकरण गर्छ। सामूहिक तयारीका क्रममा विद्यार्थीहरूले अरूलाई सिकाउने प्रयास पनि गर्नुपर्छ, जसले ज्ञानलाई अझ प्रभावशाली बनाउँछ, उपलब्धिको भावनालाई जागृत गराउँछ र अध्ययनमा समेत रुचि बढ्दछ।
८. परीक्षा सम्बन्धी तनाव व्यवस्थापन गर्नुपर्छ
विद्यार्थीहरूले शान्त र आत्मविश्वासी रहने प्रयास गर्नुपर्छ। तनाव व्यवस्थापन गर्न गहिरो सास लिने विधिहरूका साथसाथै माइन्डफुलनेस अभ्यास गर्न सकिन्छ। शरीरलाई आरामदाय स्थितिमा राखेर लामो स्वास तान्ने र फाल्ने यसलाई केही समय निरन्तरता दिने । परीक्षाकै क्रममा धेरै तनाव हुँदा पनि यस कार्यलाई गर्न सकिन्छ। आफूलाई वर्तमानमा महसुस गरी आफुमा कस्तो भावनाहरू आइरहेका छन् मस्तिष्कमा कस्ता विचारहरू चलिरहेका छन् र शरीरमा कस्तो अनुभूति भइरहेको छ जस्ता कुरामा ध्यानलाई केन्द्रित समेत गर्न सकिन्छ। यी कुराहरुले तनावलाई निकै कम गर्न सहयोग गर्दछ। सकारात्मक सोच र सफलता को कल्पना गर्नाले पनि आत्मबल निकै बढ्दछ ।
९. प्रभावकारी पुनरावृत्ति गर्नुपर्छ
परीक्षाको केही दिन अघि पुनरावृत्तिको लागि समय छुट्याउनुहोस्। मुख्य अवधारणाहरू, सूत्रहरू, र सारांशहरूमा ध्यान केन्द्रित गर्नुहोस्, अन्तिम समयमा आतिएर यो पनि आउँछ कि त्यो पनि आउँछ कि भन्दै नयाँ विषयहरू खोज्नु भन्दा पनि आफूले जानेका कुराहरुलाई राम्रोसित परीक्षामा लेख्ने हिसाबले तयारी गर्दा राम्रो । शतप्रतिशत ल्याउने भन्दा सतप्रतिशत दिने प्रयास गर्नुस्।
१०. परीक्षा दिने दिनको तयारी राम्रो गर्नुपर्छ
परीक्षा अघिको रात राम्रोसँग निद्रा लिनुपर्छ र परीक्षा केन्द्रमा पनि समयमै पुग्दा तनाव कम हुन्छ।आवश्यक सामग्री (कलम, क्याल्कुलेटर, परिचय पत्र , घडी आदि ) व्यवस्थित हुनुपर्दछ। बसाइको पोजिसन समेत सजिलो छ कि छैन ध्यान दिनुपर्छ ।
आतिएर एन्जियस हुँदै प्रश्नपत्रलाई खोतल्ने बानी गर्नु हुँदैन । आरामदाय स्थितिमा रहेर सरल रुपमा प्रश्नहरूलाई हेर्ने र सजिलो हुनेगरी उत्तर लेख्न सुरु गर्नु पर्दछ। उत्तर लेख्दा घडी आदिको प्रयोग गरी समयलाई व्यवस्थापन गर्दै जाँदा अन्तिम समयमा हतारो हुँदैन। खासगरी व्यक्तिपरक सबजेक्टिभ लामाउत्तर माग्ने प्रश्नलाई सुरुमा नै क्यालकुलेट गरेर निश्चित समय छुटाउँदा राम्रो हुन्छ। प्रश्नका समूहहरूलाई समेत निश्चित समय छुट्याउँदा राम्रो हुन्छ।
विद्यार्थीले मात्र नभई परीक्षा केन्द्रमा रहेका गार्डहरूले समेत ध्यान भङ्ग हुनेगरी कार्य गर्नु हुँदैन । बाहिरभित्र गरिराख्ने , एउटा विद्यार्थीले गल्ती गर्दा सबैलाई डिस्टर्ब हुने गरी कार्यबाही गर्ने जस्ता कुराहरु निरन्तर भइरहन्छन् । यसले खासगरी ध्यान केन्द्रीकरण गर्न अप्ठ्यारो हुने विद्यार्थीलाई यसै पनि गाह्रो भइरहेको अवस्थामा झनै अप्ठ्यारोमा पार्दछ। यी कुरालाई व्यवस्थापनले समेत ध्यानमा राखी व्यवस्थित रुपमा अगाडि बढाउनु पर्दछ।
अन्त्यमा, विद्यार्थीहरूले परीक्षाको तयारीलाई निरन्तर प्रक्रिया मान्नुपर्छ जसमा अनुशासन र प्रभावकारी रणनीतिहरूको आवश्यकता हुन्छ। यी चरणहरू पालना गरेर, विद्यार्थीहरूले आफ्नो प्रदर्शनलाई उच्च बनाउन सक्दछन् र आत्मविश्वासका साथ परीक्षा दिन सक्दछन्। पछिलाई नसाँची छिटो तयारी सुरु गर्ने, व्यवस्थित रहने, र सकारात्मक दृष्टिकोण राख्ने।
एसइई मात्र नभई जुनसुकै तहकाे परीक्षाकाे लागि माथिका उपाय उपयोगी हुन सक्ने उनी बताउँछिन ।
भगवती भट्टराई हाल नेपाल एकेडेमी अफ साइकोलोजीमा अध्यक्ष तथा प्रमुख मनोविद्का रुपमा कार्यरत छिन्
मकवानपुर । मकवानपुरकाे अग्रणी साहित्य संस्था साहित्य संगम मकवानपुरकाे ३५३ औं साहित्य सन्ध्या संगीतमय भएकाे छ । शनिबार संगमले नियमित सन्ध्यमा विभिन्न स्थानीय कलाकारले सांगितिक प्रस्तुति दिएर सन्ध्यालाई संगीतमय बनाए ।
नियमित सन्ध्यामा स्वस्तिका बाँनिया, राज कुमार लामिछाने, स्वस्तिका दहाल, एसके निधन, राम कार्की, देवराज तिवारी, दिबिसा रुम्बा लगायतले रचना वाचन गरेका थिए । यसैगरी सांगितिक कार्यक्रम अन्तरगत सुस्केरा परिवार तथा विभिन्न स्थानीय कलाकारहरुले गीत प्रस्तुत गरेका थिए । प्रमेन्द्र महर्जन, सुरेश न्यौपाने, डोल्मा लामा, राम कार्की, यादव श्रेष्ठ, मनोज साही, पुरुषोत्तम आचार्य लगायतले सांगीतिक प्रस्तुतीले कार्यक्रमकाे रौनक बढाएकाे थियाे ।
संगम अध्यक्ष डीबी बर्तौलाले नियमित सन्ध्या अन्तरगत बर्षकाे अन्त्यमा आयोजना हुने सन्ध्यामा साहित्यका अन्य विधाका साथै संगीतलाई पनि जोडिदै ल्याइएकाे बताए । वसन्त ऋतुकाे आगमन हुने चैत्र महिनामा सृजनाकाे उत्सव मनाउन सांगीतिक कार्यक्रम समेत सन्ध्यासँगै गर्ने गरिएकाे सचिव मनोज पाेखरेल जानकारी दिए ।
संगम अध्यक्ष डीबी बर्तौलाकाे सभाध्यक्षता तथा संगमका संस्थापक केशवलाल तौजलेकाे प्रमुख आतित्थता र कवि तुलसी घिमिरेकाे विशिष्ट आतित्थतामा भएकाे ३५३ औं सन्थ्यामा श्याम कुमार बानियाँ, देबराज खरेल, सुवास खनाललगायतकाे उपस्थिति रहेकाे थियाे । संगम उपाध्यक्ष सानु खनालले स्वागत गरेकाे कार्यक्रमकाे सहजीकरण सचिव पोख्रेलले गरेका थिए ।
चितवन । बागमती प्रदेशका स्वास्थ्य मन्त्री किरण थापाले चितवनको बकुलहर रत्ननगर अस्पताल र आयुर्वेद तथा वैकल्पिक चिकित्सालयको शुक्रबार छड्के अनुगमन गरेका छन् । स्वास्थ्य मन्त्रालयका सचिव डा. सुमित्रा गौतम र चिकित्सा महाशाखा प्रमुख डा. खगेश्वर गेलाल सहित मन्त्री थापाले बकुलहर रत्ननगर अस्पतालको आकस्मिक अनुगमन गरेका हुन् ।
अनुगमनका क्रममा उनले अस्पतालको सेवा प्रवाह, उपलब्ध स्रोत-साधन अवस्था तथा संरचनाको जानकारी लिए। अनुगमनपछि मन्त्री थापाले अस्पतालले आफ्नो क्षमता भन्दा बढी बिरामीको चाप भएपनी सेवा दिइरहेको बताए। उनले भने ‘हामी सेवाका क्रममा कुनै कन्जुस्याइँ गर्दैनौं। प्राथमिकता अनुसार बजेट समावेश गरेर अस्पताललाई थप सहयोग गर्नेछौं।’ स्वास्थ्य मन्त्रालयले अस्पतालका समस्या समाधानका लागि मार्गनिर्देशन गर्ने, आवश्यक आर्थिक तथा भौतिक सहयोग प्रदान गर्ने उनले प्रतिबद्धता जनाए।
उनले डाक्टर तथा स्वास्थ्यकर्मीले एप्रोन र परिचयपत्र अनिवार्य रूपमा लगाउन निर्देशन दिँदै अस्पताल व्यवस्थापनलाई यसमा थप ध्यान दिन आग्रह गरे। अनुगमनलाई नियमित बनाउने र सेवा बिस्तारलाई आवश्यक अध्ययनपछि मात्रै अघि बढाउने उनले जानकारी दिए । बकुलहर रत्ननगर अस्पतालमा ग्रामीण भेगका सेवाग्राहीको चाप बढी रहेको भन्दै मन्त्री थापाले सेवाको गुणस्तर कम हुन नदिने प्रतिबद्धता जनाए । अस्पताल व्यवस्थापनलाई बिरामीहरूको सुविधाका लागि प्रभावकारी योजना बनाउन समेत उनले निर्देशन दिए ।
सचिव डा. गौतमले अस्पतालको सेवामा केही सुधार देखिएको भन्दै सन्तोष व्यक्त गरिन् । उनले भनिन् ‘केही समयअघिको तुलनामा अहिले सेवा विस्तार भएको देखिन्छ, जुन सकारात्मक पक्ष हो। तर, अझै सुधार आवश्यक छ।’ प्रदेश सरकारको ध्यान स्वास्थ्य सेवा सुदृढीकरणमा रहेकाले आगामी दिनमा अस्पतालको सेवा प्रवाह थप गुणस्तरीय बनाउने उनले बताइन् ।
चिकित्सा महाशाखा प्रमुख गेलालले टीम वर्क गरेर सेवा प्रवाहलाई थप प्रभावकारी बनाउन सुझाव दिएका छन्। अनुगमन टोलीले अस्पताल भवनको निर्माण कार्य समयमै सम्पन्न गर्न निर्माण व्यवसायीलाई ताकेता गर्ने मन्त्रालयले जनाएको छ । साथै, आँखा सेवामा सुधार गर्दै अन्य आँखा अस्पतालहरूसँग समन्वय गरी १३ वटा अस्पतालमा सेवा विस्तार गर्ने योजना बनाइने बताइएकाे छ।
अस्पताल व्यबस्थापन समितिका अध्यक्ष गोपाल कर्मचार्य र मेडिकल सुपरिटेन्डेन्ट डा. मदन ज्ञवालीले मन्त्रालयको सुझाव र निर्देशन अनुसार सेवा बिस्तार तथा सुधार गर्दै लगिने बताएका छन् ।