मकवानपुर । बागमती प्रदेशसभामा प्रतिनिधित्व गर्ने विपक्षी दलहरुले प्रदेश सरकारले चालु हिउँदे अधिवेशन अन्त्य गर्ने निर्णय सरकारको निरंकुशता भएकाे आरोप लगाएका छन्।
बुधवार पत्रकार भेटघाट गर्दै नेकपा माओवादी केन्द्र, राप्रपा र नेकपा एकीकृत समाजवादीले आफ्नो कमीकमजोरी र असफलता ढाकछोप गर्न सरकारले संसद छल्न अधिवेशन अन्त्य गरेकाे आरोप लगाएका हुन्। नेकपा एकीकृत समाजवादी प्रदेश संसदीय दलका नेता कृष्ण शर्मा खनालले बागमती प्रदेश सरकारले गरेकाे संसद अधिवेशन अन्त्य गर्ने हर्कतले सरकार पूर्णतः असफल सावित भएको बताए ।
आफ्नो कमीकमजोरी र असफलतालाई ढाकछोप गर्न संसद छल्ने कार्यले चाँडै हुने वर्षे अधिवेशनलाई समेत प्रभावित पार्नेछ’ उनले बताए ।‘बजेट अधिवेशनसमेत अनिश्चित दिशामा धकेलिने सम्भावना बढेको छ। दलहरुबीचको सहमति र सहकार्यबाट भाग्ने सरकारले नीति, कार्यक्रम र बजेटसमेत ल्याउने नैतिकता गुमाएकोले यस प्रकारको गैरजिम्मेवार हर्कत छोडेर वार्ता र सहमतिमार्फत अगाडि बढ्न हामी जोडदार माग गर्दछौं’ उनले भने ।
नेकपा माओवादी केन्द्र संसदीय दलका प्रमुख सचेतक रत्नप्रसाद ढकालले प्रदेशसभामा प्रतिनिधित्व गर्ने सबै दलहरुको साझा एजेन्डालाई गम्भिरतापूर्वक कार्यान्वयन गर्नुको सट्टा आलटाल गर्ने र अलमल्याउने नीति सरकारको देखिएको आरोप थियो।
उनले विगतका सहमति कार्यन्वयन गरी प्रदेशसभा संचालन गर्ने वातावरण बनाउन मंगलवार दिनभर वार्ता र संवादपश्चात बुधवार १ बजे बस्नेगरी सहमति हुँदाहुँदै बुधवार बिहान अधिवेशन अन्त्य गर्ने निर्णयले सरकार संसद छलेर गैरजिम्मेवार ढङ्गबाट प्रस्तुत भएको आरोप लगाए। दलहरूबीच छलफल चलिरहँदा अधिवेशन अन्त्य गर्ने निर्णयले सरकारको अपरिपक्वता मात्र देखिएन ठूला दलहरु मिलेर बनेको सरकारको दम्भ, घमण्ड र निरंकुश शैलीसमेत उदाङ्गिएको छ’ उनले भने ।
मंगलबार प्रदेशसभा संचालनकाे लागि भएकाे सर्वदलीय बैठकमा सरकार निकै गैरजिम्मेवार ढङ्गबाट प्रस्तुत भएकाे राप्रपा संसदीय दलका उपनेता गिरबहादुर तामाङले बताए । उक्त छलफलमा विपक्षी दलहरु लचिलो भइ वार्ता र छलफल भइरहँदा बुधवार विहानकाे मन्त्रिपरिषद् बैठकले चालू अधिवेशन अन्त्य गर्ने हठात् निर्णय गर्नुले कार्यपालिका र व्यवस्थापिकाबीचको दूरी बढाउने दिशामा सरकार उन्मुख देखिएको उनले आरोप लगाए । सरकारले यसैगरी पेलेर गइरहे वर्षे अधिवेशन समेत प्रभावित हुने विपक्षी दलहरुले चेतावनी दिएका छन्।
मंगलवार विहानदेखि बसेको प्रदेशसभाका ७ दलको बैठकसमेत निष्कर्षविहीन बनेको थियो। प्रदेशसभाका सभामुख भुवनकुमार पाठकले आह्वान गरेको बैठकमा सत्तापक्ष र प्रतिपक्षबीचको विगतको बजेटमाथिको सहमति र पछिल्लो समय भएको सहकारीमन्त्री मदुकुमार श्रेष्ठको स्वकीय सचिवको आत्महत्या प्रकरणमा छानबिन समिति गठनका विषयमा सहमति जुट्न नसक्दा बैठकमा सहमति हुन सकेको थिएन।
बुधवार बसेको मन्त्रिपरिषद्को बैठकले मध्यराती १२ बजेबाट प्रदेश सभाकाे हिउँदे अधिवेशन अन्त्य गर्ने निर्णय गर्दै प्रदेश प्रमुख समक्ष सिफारिस गरेकाे थियाे । प्रदेश प्रमुख दिपक प्रसाद देवकाेटाले बुधबारनै प्रदेशसभाको बैठक अन्त्य गरिएकाे लिखित जानकारी सभामुख भुवनकुमार पाठकलाई गराएका छन् ।
प्रदेश सभा सचिवालयले सभामुखकाे आदेशले अर्को सूचना जारी नहुन्जेलसम्मका लागि प्रदेश सभाकाे बैठक स्थगित गरिएको जानकारी गराएकाे छ ।
हिउँदे अधिवेशनमा के के भए ?
बागमती प्रदेशसभाको हिउँदे अधिवेशन १८ माघबाट सुरु भएकाे थियाे । प्रदेशसभाको हिउँदे अधिवेशन अन्तर्गत २३ माघमा २ वटा, २३ माघमा १ वटा र २६ माघमा २ वटा बैठकहरु संचालन भएकाे छ । सो पश्चात अनिश्चितकालका लागि स्थगित भएको बैठक २ महिनापछि मंगलबारकाे लागि बोलाइएकाेमा सभा चल्दै नचली स्थगित गरियो ।
२६ माघकाे प्रदेशसभा बैठकले प्रदेश खेलकुद विकास ऐन २०७५ लाई संशोधन गर्न बनेको विधेयक पारित गरेको थियो । यसैगरी अन्य ४ विधेयकलाई संसदीय समितिमा छलफलका लागि पठाएको थियो । प्रदेश सभा सचिवालयका अनुसार बैठकले विषयगत समितिमा रहेको मदन भण्डारी स्वास्थ्य विज्ञान प्रतिष्ठान २०७६ लाई संशोधन गर्न बनेको विधेयक, कृषि विकास सम्बन्धमा व्यवस्था गर्न बनेको विधेयक, प्रदेश औद्योगिक व्यवसाय ऐन, २०७६ लाई संशोधन गर्न बनेको विधेयक, प्रादेशिक व्यापार तथा व्यवसायी सम्बन्धी ऐन २०७६ लाई संशोधन गर्न बनेको विधेयकको प्रतिवेदन सभामा पेश गरिएकाे थियाे ।
यस्तै प्रदेश प्रमुखबाट फिर्ता आएको प्रदेश कृषि विकास विधेयक सम्बन्धमा व्यवस्था गर्न बनेको विधेयक पनि २६ माघकाे बैठकमा संशोधन सहित पेश गरिएकाे थियाे ।
मंगलबारकाे बैठकमा गत माघ मै संसदमा पेश भएका संसोधन विधेयकहरु पेश गरिने कार्यसुची रहेकाे थियाे । प्रदेशसभाका सभामुख पाठक दलहरु बीच विगतको बजेट माथिको सहमतिका विषयहरु समेट्ने सहमति बनेको र सोही अनुसार बैठक आह्वान गरिएको बताउँछन् ।
उक्त विधेयकका प्रतिवेदनहरुलाई छलफल गरेर पारित गर्नुपर्ने भएकाले केही दिन प्रदेशसभा चलाउने गरी विषेश समयको कार्यसूचि राखेर बैठक संचालन गरिने गरी बैठक आव्हान गरिएकाे पाठक बताउँछन् । सरकारपक्ष र प्रतिपक्षिय दल सहमतीमा नपुगेकाेले महत्वपूर्ण निर्णय गर्नु पर्ने प्रदेश सभा अनिश्चित भएकाे छ ।
११० सदस्यीय बागमती प्रदेशसभाका ७ दलको प्रतिनधित्व रहेको छ । जसमा कांग्रेस ३७, एमाले २७ (उपसभामुखसहित), राप्रपा १३ (सभामुखसहित), एकीकृत समाजवादी ७, नेमकिपा ३ र हाम्रो नेपाली पार्टी २ जना सदस्य छन् ।
मकवानपुर । बागमती प्रदेश सरकारले प्रदेश सभाकाे हिउँदे अधिवेशन अन्त्यका लागि सिफारिस गर्ने निर्णय गरेको छ । बुधबार बिहान बसेको प्रदेश सरकारको मन्त्रिपरिषद् बैठकले प्रदेश सभाकाे हिउँदे अधिवेशन अन्त्य गर्न प्रदेश प्रमुख समक्ष सिफारिस गर्ने निर्णय गरेको हो ।
सरकारका प्रवक्ता एवम् आन्तरिक मामिला तथा कानून मन्त्री सुरजचन्द्र लामिछानेका अनुसार चैत २० गते राती १२ बजेबाट संसद्को अधिवेशन अन्त्य गर्नेगरी प्रदेश प्रमुख समक्ष सिफारिस गर्ने निर्णय गरेकाे हाे । नेपालको संविधानको धारा १८३ को उपधारा २ बमोजिम प्रदेश सभाकाे चालु हिउँदे अधिवेशन अन्त्यका लागि सिफारिस गरिएको हाे । प्रदेशसभाको बैठक चल्न सक्ने अवस्था नरहेकाले अधिवेशन अन्त्यको निर्णयमा सरकार पुगेको उनले जानकारी दिए ।
संसद् बैठक सञ्चालनका लागि मंगलबार बसेको सर्वदलीय बैठकले निष्कर्ष दिन नसकेपछि संसद प्रभावित भएको थियो । प्रदेश सभाकाे हिउँदे अधिवेशन गत १८ माघमा आव्हान गरिएकाे थियाे । २६ माघमा बसेर अनिश्चित कालकाे लागि स्थगित भएकाे बैठक २ महिना पछि मंगलबारकाे लागि आव्हान गरिएकाे भए पनि दलहरु बीच सहमति जुट्न नसक्दा संचालन हुन सकेन । आज बुधबार दिउँसो १ बजेकाे लागि बैठक बाेलाइएकाे भए पनि आजकाे बैठक समेत प्रभावित हुन सक्ने एक नेताले बताए ।
मकवापुर । बागमती प्रदेश प्रमुख दीपक प्रसाद देवकोटाले ६८ औँ राष्ट्रिय सहकारी दिवसको अवसरमा सहकारीकर्मी, सहकारी अभियन्ता र सहकारीमा संलग्न सबैलाई शुभकामना व्यक्त गर्नु भएको छ ।
‘मर्यादित सहकारी समुन्नत समाज’ भन्ने नाराका साथ मनाउन लागिएको दिवसको अवसरमा उहाँले सहकारी क्षेत्रको सामाजिक, सांस्कृतिक र आर्थिक रूपान्तरणमा ठूलो योगदान रहेको बताउनु भएको छ । निम्न आय भएका किसान, श्रमिक र मजदुरको समुदायभित्रकै पूँजी परिचालन मार्फत् आर्थिक संकट टार्ने, उद्यमशीलता विकास गर्ने र बचतको संस्कृति मार्फत् आर्थिक उपार्जनमा मद्दत गर्ने सहकारी क्षेत्रको अभियान प्रशंसनीय रहेको प्रदेश प्रमुख देवकोटाले शुभकामना सन्देशमा उल्लेख गर्नु भएको छ ।
नेपालको संविधानले सार्वजनिक, निजी र सहकारी क्षेत्रको सहभागिता तथा विकासमार्फत् समृद्ध अर्थतन्त्रको परिकल्पना गरेको छ। प्रमुख देवकोटाले सहकारीको विकास र विस्तार समृद्धिको महत्वपूर्ण पाटो हुनसक्ने कुरामा उहाँले जोड दिनु भएको छ । तर, केही व्यक्तिहरूको संलग्नतामा बचतकर्ताहरूको रकम हिनामिना गरी आर्थिक अपराध गर्ने र सम्पूर्ण सहकारी क्षेत्रलाई बदनाम गराउने क्रियाकलापहरू भएको सन्दर्भमा सहकारीकर्मीहरू सचेत र गम्भीर भई गलत प्रवृत्तिको पुनरावृत्ति हुन नदिन पहल गर्नु पर्ने समेत उहाँले बताउनु भएको छ ।
सम्बन्धित निकायले बचतकर्ताको बचत सुरक्षणमा कुनै कसर बाँकी राख्न नहुनेमा उहाँले जोड दिनुभएको छ। उहाँले सहकारी संस्थाहरू पारदर्शिता, उत्तरदायित्व र सुशासनका आधारमा मर्यादित तथा अनुशासित रूपमा सञ्चालन गरिनुपर्ने बताउनु भयो। सहकारी दिवसले सहकारीको गरिमालाई उच्च राख्न सबैलाई प्रेरणा दिने उहाँले सन्देशमा बताउनु भएकाे छ ।
मकवानपुर । सिस्नुपानी नेपाल मकवानपुरले २ जना हास्यव्यङ्ग्यकारलाई सम्मान गर्ने भएको छ । सिस्नुपानी नेपालको स्थापना दिवसको अवसरमा कृष्ण मुरारी गौतम ‘चट्याङ मास्टर’ र सुबाेध गौतमलाई हास्यव्यङ्ग्य पुरस्कारबाट सम्मान गरिने भएकाे हाे ।
सिस्नुपानी मकवानपुरले २० बैशाख २०८२ मा हेटौंडामा हास्य व्यङ्ग्यात्मक कार्यक्रम आयोजना गरी उनीहरुलाई सम्मान गर्न लागिएकाे संस्थाका सचिव सुमार्गी हुमागाईंले जनाकारी दिए ।
सिस्नुपानी नेपाल तथा एजिङ नेपालका संस्थापक हास्यव्यङ्ग्य स्रष्टा ‘चट्याङ मास्टर’लाई डा. गणेशकुमार पौडेल स्मृति सम्मान २०८१ बाट सम्मानित गरिने भएको हो । उक्त पुरस्कारको राशी २५ हजार रुपैंया रहेको छ । यस अघि हास्यव्यङ्ग्यकार आरसी रिजाल र उत्तमकृष्ण मजगैयालाई उक्त पुरस्कारबाट सम्मानित गरिएको थियो । उक्त पुरस्कार सिस्नुपानी नेपाल मकवानपुरका पूर्व अध्यक्ष गणेश पौडेलको स्मृतिमा परिवारजनले स्थापना गरेका हुन् ।
यस्तै युवा हास्यव्यङ्ग्य कलाकार सुबोध गौतमलाई आरसी रिजाल हास्यव्यङ्ग्य सम्मान २०८१ बाट सम्मानित गरिने भएकाे छ । १५ हजार ५५५ रूपैयाँ राशिको उक्त सम्मान सिस्नुपानी नेपाल मकवानपुरका संस्थापक तथा बुढ्यौली साहित्य समाज मकवानपुरका अध्यक्ष आरसी रिजालले स्थापना गरेका हुन् । अघिल्लो वर्ष उक्त पुरस्कारबाट हास्यव्यङ्ग्य कवि अनिल पौडेललाई सम्मानित गरिएकाे थियाे ।
संस्थाका अध्यक्ष संप्रस पौडेलका अनुसार गाईजात्रा पर्व र तिहारमा देउसी भैलोकाे अवसरमा हास्य व्यङ्ग्यात्मक कार्यक्रम गर्दै आइरहेको सिस्नुपानी मकवानपुरले अघिल्लो वर्ष स्थापना दिवसमा राष्ट्रिय स्तरको हास्यव्यङ्ग्य कविता प्रतियोगिता आयोजना गरेको थियाे ।