मकवानपुरमा भदौ १६ पछि निषेधाज्ञाको स्वरुप परिर्वतन हुने
Tags: No Comments
मकवानपुर । हेटाैडा उपमहानगरमा सहित मकवानपुरका विभिन्न स्थानीय तहमा लागु भएकाे निषेधाज्ञा आगामी भदौ १६ गते पछि आवश्यक व्यवस्थापनका साथ स्वरुप परिर्वतन गर्नु पर्ने सराेकारवालाहरूले माग गरेका छन् । जिल्लाको हेटौंडा उपमहानगरपालिका र मनहरी गाँउपालिकाकाे राजमार्ग क्षाेत्रमा साउन २६ गते राती बाट लागू भएकाे सहित विभिन्न स्थानीय तहहरुमा भदौ १५ गतेसम्म जारी निषेधाज्ञाको आवश्यक व्यवस्थापन गरेर खुकुलो पार्दै स्वरुप परिर्वतन गर्न जिल्लाकाे सर्वपक्षिय बैठकमा सुझाव दिइएकाे हो ।
बिहीबार जिल्ला समन्वय समिति मकवानपुरको आयोजनामा बसेको सर्वपक्षिय/सर्वदलिय बैठकले आवश्यक तयारी गरेर निषेधाज्ञाको स्वरुप परिर्वतन गर्न सुझाव दिएको हाे । जिल्ला समन्वय समिति मकवानपुरका प्रमुख रघुनाथ खुलालको अध्यक्षतामा कोरोना रोकथाम तथा नियन्त्रणका लागि आगामी कार्यदिशा तय गर्न बसेको बैठकले स्वास्थ्य सम्बन्धी मापदण्डको कार्यान्वयन व्यवस्थित गर्दै निषेधाज्ञाको स्वरुपमा परिर्वतन गर्नुपर्ने साथै निषेधाज्ञा खुकुलो पार्दै परिस्थितीलाई क्रमश सहज बनाउदै लानुपर्ने सुझाव दिएको छ ।
प्रमुख खुलालले निषेधाज्ञाको स्वरुप परिर्वतन गर्दै लानु पर्ने सबैको सुझाव आएको बताए । बैठकमा प्रमुख खुलालले सुरक्षा निकाय र स्वास्थ्यकर्मीको मनोबल उच्च बनाउने कुरामा सबैले ध्यान दिनुपर्ने बताए । कोरोना संक्रमितलाई अपमान गर्ने काम नगर्न, स्वास्थ्यकर्मी तथा सुरक्षाकर्मीलाई दुर्वव्यहार नगर्न, होम आइसोलेसनमा बस्नेहरुलाई नियमको पालना गर्न, राजनैतिक दलहरुलाई सकारात्मक समाज निर्माण योगदान गर्न खुलालले आग्रह गरे । ‘सबैले आ–आफ्नो स्थानबाट सहयोग गर्नु अहिलेकाे आवश्यकता हाे’ उनले भने । साथै जिल्लाभरिको कोरोनाको अवस्था निर्क्याैल गर्न स्थानीय तह समन्वय बैठक तुरुन्त बस्ने समेत उनले जानकारी दिए ।

बैठकमा नेपाली कांग्रेसका जिल्ला सभापति ईन्द्र बहादुर बाँनियाले समुदायमा कोरोना संक्रमण बढ्दो रहेकाले सचेत बन्नु पर्ने तर, सधैंभरी निषेधाज्ञा राख्न नहुने बताए। उनले हेटौंडाका होटलहरुलाई क्वारेन्टाई र आइसोलेसनका रुपमा प्रयोग गर्नुपर्ने, परीक्षणको दायरा फराकिलो बनाउनुपर्ने, तुरुन्त रिपोर्ट आउने वातावरण बनाउनु पर्ने, जसका लागि मेसिन खरिद गर्नुपर्ने, दक्ष र भरपर्दो चिकित्सक प्राविधिकको व्यवस्था गर्नुपर्नेलगायतका सुझाव दिए । यस्तै राप्रपाका जिल्ला अध्यक्ष मधु अधिकारीले निषेधाज्ञालाई तयारी गर्ने समयका रुपमा प्रयोग गर्नु पर्ने धारणा राख्नुभयो । उहाँले स्वाब दिएकालाई बाहिर निस्कन नदिने साथै कन्ट्रयाक ट्रेसिङ प्रभावकारी बनाउनु पर्ने र कोरोना नियन्त्रणमा सबै जुट्नु पर्ने धारणा राखेका छन् । बैठकमा हेटौंडा उपमहानगरपालिकाकी उपमेयर मिना कुमारी लामाले स्थानीय तहले थुप्रै कामहरु गरेको भएपनि जस भने पाउन नसकेको बताइन ।
त्यस्तै बैठकमा नेकपा मकवानपुरका नेता एकालाल श्रेष्ठले संक्रमितको नाम सार्वजनीक नगर्दा उनिहरु बहिर हिडडुल गर्ने गरेकाले नाम सार्वजनकि गर्नुपर्ने जसले अरु व्यक्ति सचेत भएर संक्रमण हुने सम्भावना कम हुने धारणा राखेका थिए । उनले संकलन गरिएको स्वाबको तत्काल रिपोर्ट आउने वातावरण मिलाउनु पर्ने, बैंकिङ क्षेत्र सुचारु गर्नुपर्ने, बजार खुलाउने समय थप गर्नुपर्ने, बिस्तारै बजार खुकुलो पार्दै लानु पर्ने, चेतना अभिबृद्धि तर्फ लाग्नु पर्ने र मास्क प्रयोग नगर्ने तथा स्वास्थ्य सम्बन्धि अन्य मापदण्ड पालना नगर्नेलाई कारकाही गर्नुपर्ने धारणा राखेका थिए ।
पत्रकार महासंघ बागमती प्रदेशका अध्यक्ष प्रताप बिष्टले सधैंभरी निषेधाज्ञाले मात्र नहुने भन्दै निषेधाज्ञा खोल्दा बिहान ६ बजे देखि साँझ ६ बजे सम्मको सिफ्टमा उद्योगहरु संचालन गर्नुपर्ने, सार्वजनीक यातायात पुर्ण रुपमा रोक लगाउनु पर्ने, सिमा नाकामा कडाई गर्नुपर्ने, स्वास्थ्य सम्बन्धी मापदण्डको कडा रुपमा प्रयोग गर्न लगाउने साथै स्थानीय तहहरु अहिले भन्दा बढी सक्रिय रहनु पर्ने धारणा राखेका थिए । बैठकमा हेटौंडा अस्पताल विकास समितिका अध्यक्ष प्रकाश पौडेलले सबै कुरामा अस्पतालको मात्र भर पर्दा समस्या आएकाले सबैले मिलेर काम गर्नुपर्ने बताए ।
त्यस्तै जिल्ला सहकारी संघका अध्यक्ष नारायण प्रसाद देवकोटाले थोरै कर्मचारी राखेर सहकारीहरु सञ्चालन गर्नुपर्ने धारणा राखे । सहकारीबाटै संक्रमित फैलिने संभावना भएकाले त्यसलाई ध्यानमा राखेर थोरै कर्मचारीको उपस्थितिमा स्वास्थ्य मापदण्डको पुर्ण पालना गरेर सहकारी संस्थाहरु संचालन गर्नुपर्ने उनकाे भनाइ थियो । उद्योग वाणिज्य संघका उपाध्यक्ष माधव न्यौपानेले बजारका अन्य पसलहरुलाई पनि सहज बनाउँदै लानु पर्ने सुझाव दिएका छन् । न्याैपानेले मापदण्डको परिपालना नगर्नेलाई तुरुन्त बन्द गर्नुपर्ने र बजार बिस्तारै खुलाउनु पर्ने बताए। यस्तै उद्योगसंघ मकवानपुरका अध्यक्ष लेखराज पोखरेलले मापदण्ड बनाएर उद्योग स१चालन गर्नुपर्ने धारणा राखेका छन् । मापदण्ड नियमानुसार कायान्वयन हुनु पर्ने तर उद्योग संचालन गर्नुपर्ने उनकाे भनाई थियो ।
बैठकमा जिल्ला स्वास्थ्य कार्यालयका प्रमुख प्रणय उपाध्यायले कोरोना संक्रमण समुदायमै गइसकेकाले थप सजगता अपनाउनु पर्ने धारणा राखेका थिए । उपाध्यायले सधैं निषेधाज्ञा मात्र गरेर नहुने भन्दै देखिएका समस्याको समाधान गर्न तर्फ सचेत हुनु पर्ने बताए। पिसीआर गर्न स्वाब दिन भिड गर्ने तर स्वाब दिएर बजार डुल्ने प्रबृतिका कारण समस्या थपिदै गएको उनले बताए । यस्तै कन्ट्रयाक ट्रेसिङका क्रममा भेटिएको भोलिपल्टै पिसिआएका लागि जाने गरेको समेत जानकारी गराए । उनले होम आइसोलेसनमा बसेको कम्तीमा १४ देखि २१ दिनमा मात्र पिसिआरका लागि जानु पर्ने बताए । शंका लाग्ने वित्तिकै क्वारेन्टाईनमा बस्न समेत उनले सुझाव दिए । ‘लक्षण देखिएकालाई मात्र आइसोलेसनमा राख्नुपर्छ’ उनले भने ‘अनुशासन आइसोेलेसन र क्वारेन्टाई नै कोरोनाबाट बच्ने उपाए हाे ।’
प्रमुख जिल्ला अधिकारी दिपक राज नेपालले आएका सुझावका आधारमा आगामी कार्य तय गरिने बताए । प्राप्त सुझावहरुका आधारमा कमाण्ड पोष्टको बैठकले थप निर्णय गर्ने समेत प्रजिअ नेपालले जानकारी दिए ।
मकवानपुर / मकवानपुरका युवा कलाकार भूपेन्द्र रानाले अभिनयमा पहिलो म्युजिक भिडियो सार्वजनिक भएको छ । मकवानपुर भिमफेदीका आशिष अस्लामीको स्वरमा तयार ‘तिम्रो माया’ बोलको गीतमा रानासँगै मकवानपुरकी रीता केसीले अभिनय गरेका हुन् ।
भूपेन्द्र र रीताले यस म्युजिक भिडियो मार्फत् मोडलिङमा डेब्यु गरेका हुन् । एजे टीम हेटौंडाका अजय वाइबाको निर्देशन एवम् सम्पादनमा भिडियो तयार पारिएको हो । मकवानपुरको दामन, चित्लाङ, राक्सिराङलगायतका क्षेत्रमा भिडियो छायांकन गरिएको जनाइएको छ ।
भिडियोको कथावस्तु भने गायक अस्लामीले नै तयार गरेका हुन् । भिडियोमा अस्लामीको समेत अभिनय रहेको छ । आफ्नो विशेष चाखको विषय रहेको भन्दै गायक अस्लामीले यो क्षेत्रमा निरन्तरताको लागि मेहनत गरिरहेको बताए । “मलाई सुझावसँगै हौसला पनि दिनुहोस्” गायक अस्लामीले भने ।
मकवानपुर/बागमती प्रदेशमा बाढी पहिरोको कारण घरबास उठेकाहरुले समस्यामा रहनु नपर्ने प्रदेशका मुख्यमन्त्री डोरमणि पौडेलले बताएका छन् । बाढी पीडितहरुको लागि प्रदेश सरकारको जिम्मेवारी पुरा गर्न कुनै कसर बाँकी नराख्ने मुख्य मन्त्री पौडेलले बताएका हुन् । विशेषतः बागमती प्रदेशको सिन्धुपाल्चोक जिल्लाको बाढी पहिरोको बिषयमा भएको छलफलमा मुख्यमन्त्री पौडेलले यस्तो बताएका हुन् ।
तीनै तहको सरकारले गर्ने काम बाँडफाड गरेर आफ्नो तहको सरकारले गर्ने काम पुरा गर्ने उनले बताए । प्रतिनिधि सभाका सभामुख अग्नि सापकोटाको संयोजनमा सिंहदरबारमा आयोजित विपद व्यवस्थापनका लागि सरोकारवालाबिच छलफल भएको थियो । छलफलमा मुख्यमन्त्री पौडेलले सिन्धुपाल्चोकको जुगल गाउँपालिका २ लिदीमा आफू पुगेको र त्यस क्षेत्रको स्थिति अत्यन्तै दयनीय रहेको बताएका थिए । “त्यहाँको जमिन सबै तिर धुजाधुजा भएर फाटेको र चर्केका जमिनमा पाल टाँग्ने समेत ठाँउको अभाव छ” मुख्यमन्त्री पौडेलले भने । छलफलमा उनले त्यहाँको बस्ती सक्दो चाँडै स्थानान्तरण गर्नु पर्ने भएकोले बताए । प्रदेश सरकारले यहाँको बस्ती स्थानान्तरणको लागि पहल थालेको र यसकार्यको लागि संघीय र स्थानीय सरकारको पनि समन्वय र सहकार्य जरुरी भएको उनले बताए ।
उनले बस्ती स्थानान्तरण गर्दा रोजगारीको समेत ग्यारेन्टी गरि हुन जरुरी रहेको बताए । सिन्धुपाल्चोक जिल्लामा तीनै तहबाट जाने बजेटमा बस्ती स्थानान्तरणका लागि निश्चित बजेट छुट्टाएर कार्यान्वयनमा लैजानु पर्ने उनले बताए । छलफलमा गृहमन्त्री राम बहादुर थापा, अर्थमन्त्री युवराज खतिवडा, भौतिक पुर्वाधार मन्त्री बसन्त नेमवाङ,बागमती प्रदेशका उद्योग, पर्यटन, वन तथा वातावरण मन्त्री अरुण नेपाल, संघीय सरकारका पुर्वमन्त्री शेर बहादुर तामाङ,भौतिक मन्त्रालयका सचिव, राष्ट्रिय पुननिर्माण र विपद व्यवस्थापनका प्रतिनिधिहरु प्रभावित क्षेत्रका जनप्रतिनिधिहरु एवम् सरोकारवालाहरुको उपस्थिति रहेको छलफलमा मुख्यमन्त्री पौडेलले स्थानीयवासीको सुरक्षाको लागि प्रदेश सरकारले स्थानीय र संघीय सरकारको हातेमाले आवश्यक भएको बताए ।
काठमाडौं । गायक दुर्गेश थापा यतिबेला आफ्नो एउटा गीतका कारण युट्युब नेपालको ट्रेन्डिङमा पहिलो नम्बरमा छन् । बिहीबार बेलुकी रिलिज गरिएको दुर्गेशको पप गीत आलुजस्तो गायक…अहिले युट्युब ट्रेन्डिङमा छ । गायक थापा यसलाई गीतभन्दा पनि आफ्नो गायनको अवस्थाको एउटा कथाको रूपमा व्याख्या गरेका छन् । आफूले गीत गाउन र मोडलिङ गर्न जानेकाले आफ्नो पछिल्लो पीडालाई यो गीतमा प्रस्तुत गरेको उनले बताए ।
गत महिना पत्रकार ऋषि धमलालाई एउटा टेलिभिजनमा अन्तर्वार्ता दिनेक्रममा यी गायकले नारायण गोपालको गीत भन्दै भक्तराज आचार्यको गीत गाए । अनि यम बरालको गीत भन्दै रामकृष्ण ढकालको गीत गाए । त्यसपछि उनले आलुजस्तो गायकको उपमा खेप्नुप-यो । जसका कारण आफू केही साता ट्रोलको सिकार बन्नुपरेको व्यथा पोख्दै उनले भने, ‘त्यसपछि त मेरो यति धेरै ट्रोल बन्यो कि केही दिन निकै तनाव झेल्नुप-यो । धेरैले मलाई आलुजस्तो गायक भनेपछि मैले मेरो गायनको यथार्थ दर्शक–श्रोतालाई बताउन आलुजस्तो गायक बोलको यो गीत ल्याएको हुँ ।’
लोकगायक तथा संगीतकार वसन्त थापाको शब्द, संगीत रहेको यो गीतमा आफ्नो गायन यात्राबारे खुलाएको पनि गायक दुर्गेशले प्रकाश पारे ।दुर्गेशको भनाइमा आधा दशकअघि मोडलिङ व्यस्त रहेको बेला उनले एउटा गीत गाए । त्यो लोक पप गीतलाई दर्शकले रुचाए । अनि उनको पाइला मोडलिङसँगै गायनतर्फ मोडियो । अझ त्यसपछि गायनमा बिस्तारै चर्चा कमाउँदै गएका दुर्गेशलाई गत वर्षको तीज गीत बिच्च बिच्चमाले भाइरल नै बनायो । यही गीतलाई प्रोमोस्नल गीतको दीपकराज गिरी र दीपाश्री निरौलाले छ माया छपक्कैमा पनि प्रयोग गरे ।
मैले आजसम्म गायनसम्बन्धी एक दिनको कक्षा पनि लिएको छैन । नायक बन्न काठमाडौं आएको मान्छे मैले मोडलिङबाट अभिनय यात्रा थालें र रहर पूरा गर्न गीत गाएँ ’
यसपटक तीजमा पनि दुर्गेशले बीच्च बीच्चमा २ र बीच्च बीच्चमा–३ गरी दुईवटा तीज गीत ल्याएर चर्चासँगै विवादमा पनि परे । यी दुई गीतको चर्चासँगै टेलिभिजनमा दिइएको अन्तर्वार्तामा सम्बन्धित कलाकारको नाममा अर्का कलाकारको गीत गाउँदा आफू विवादमा परेको दुर्गेशले खुलाए । उनले नजानेरै यस्तो गरेका हुन् त भन्ने हाम्रो जिज्ञासामा दुर्गेशले भने, ‘हजुरआमा अस्पतालमा सिरियस अवस्थामा हुँदाहुँदै ऋषि सरको अन्तर्वार्ता रद्द गर्न सकिनँ । थाहा भएर पनि सोही तनावमा दिएको अन्तर्वार्तामा अग्रज गायकहरूको एउटाको गीत अर्काको नाममा गाएछु ।’ तथापि, रामकृष्ण ढकाल, यम बराल, आलोकश्री, अन्जु पन्तजस्ता अग्रज गायक गायिकाहरूले आफ्नो गल्तीलाई पनि नकरात्मक रूपमा नलिई प्रोत्साहन गरेकोमा थप हौसला बढेको दुर्गेशले बताए ।
आफ्नो गायनयात्राबारे दुर्गेशले भने, ‘मैले आजसम्म गायनसम्बन्धी एक दिनको कक्षा पनि लिएको छैन । नायक बन्न काठमाडौं आएको मान्छे मैले मोडलिङबाट अभिनय यात्रा थालें र रहर पूरा गर्न गीत गाएँ ।’
गायक दुर्गेश थापाको भनाइमा दिवंगत अग्रज गायक धर्मराज थापाको गीत हरियो डाँडामाथि हलो जोत्ने साथीजस्ता थुप्रै गीत सुन्दै उनी हुर्किएँ । त्यसैले, उनले आफ्नो आलुजस्तो गायक गीतको प्रारम्भका हरियो डाँडामाथि गीतको केही अंश राखेका छन् । आफ्ना परिवारमा बुबाआमा, आफन्त कोही पनि गायक, गीतकार संगीतकार नभएको दुर्गेशको कथन छ । आफूले प्रकृतिबाट जे सिकेको हो, त्यही सिकाइको भरमा रहर पूरा गर्न गीत गाइरहेको पनि यी गायकले स्पष्ट पारे । दर्शकले नै आफूलाई आलुजस्तो गायक भनेर टीकाटिप्पणी गरे पनि हरेकपटक दर्शकको माया पाइरहेकाले गायनमा प्रोत्साहित भएको पनि दुर्गेशले बताए ।
आलुजस्तो गायकमा उनी पूर्ण आक्रोशित र दुःखी भावमा प्रस्तुत भएका छन् । हँसिलो स्वभावका यी गायकलाई आलुजस्तो गायक…गीतमा यो भावभंगिमा नृत्य निर्देशक शिव विकले प्रस्तुत गरेका रहेछन् । गीतमा अतिथि कलाकारका रूपमा अभिनेताद्वय पुष्पल खड्का र पल शाहले दुर्गेशलाई साथ दिएका छन् । ट्रोलको सिकार भएर फेरि गायनमा आउँदा आफूलाई यी दुई अभिनेताले एकै वचनमा गीतमा अतिथि कलाकारको रूपमा साथ दिएर हौसला बढाएको पनि यी गायकले स्पष्ट पारे ।
आलुजस्तो गायकको उपमा पाएपछि उनले चुनौती मोलेरै यो गीत ल्याएका रहेछन् । तर, टीकाटिप्पणी गर्दै आफ्नो कमजोरी केलाइदिएका दर्शकले आफूलाई अझै पनि त्यतिकै माया गरेको दुर्गेशले बताए । सोही कारण अहिले युट्युब नेपाल ट्रेन्डिङमा उनी पहिलो स्थानमा छन् ।
सोखका रूपमा गायनमा लागेको भए पनि समयअनुसार आफूलाई परिवर्तन गर्दै लैजाने यिनको कथन छ । अब उनी समय निकालेर संगीतसम्बन्धी केही समय अध्ययन गरेर आफूमा संगीतको ज्ञान बढाउने पक्षमा छन् । राजधानीबाट
काठमाडौं । भदौ ४ गतेदेखि विक्री खुला भएको रिलायन्स लाइफ इन्स्योरेन्स र समाज लघुवित्त वित्तीय संस्थाको आईपीओमा आवेदन दिने आज सोमवार अन्तिम दिन रहेको छ । समाज लघुवित्तले ८० हजार ७०० कित्ता र रिलायन्स लाइफले ५६ लाख ७० हजार कित्ता आईपीओ सर्वसाधारणका लागि सार्वजनिक निष्कासन मार्फत विक्री खुला गरेका हुन् ।
प्राथमिक बजार पूर्ण प्रविधिमैत्री बनिसकेको अवस्थामा कोरोनाको कारण जारी निशेधाज्ञाका बीच पनि दुवै कम्पनीहरुले आईपीओ विक्री खुला गरेका हुन् । रिलायन्स लाइफको विक्री प्रबन्धकमा सानिमा क्यापिटल र समाज लघुवित्तको सिद्धार्थ क्यापिटल रहेको छ ।
समाज लघुवित्तले प्रतिशेयर रू. १०० अंकित दरको ८६ हजार कित्ता शेयरमध्य १ हजार कित्ता कर्मचारीहरुका लागि र ४ हजार ३०० कित्ता सामूहिक लगानीकोषका लागि सुरक्षित गरी बाँकी ८० हजार ७०० कित्ता शेयर सार्वजनिक निष्कासन मार्फत विक्री खुला गरेको हो ।
त्यस्तै रिलायन्स लाइफले प्रतिशेयर रू. १०० अंकित दरको कुल ६३ लाख कित्ता शेयरमध्ये ३ लाख १५ हजार कित्ता सामूहिक लगानीकोषका लागि बाँडफाँट पश्चात ३ लाख १५ हजार कित्ता कर्मचारीहरुका लागि सुरक्षित गरी बाँकी रहेको ५६ लाख ७० हजार कित्ता सर्वसाधारणका लागि विक्री खुला गरेको हो ।
रिलायन्सको आईपीओ खरीदका लागि छिटोमा भदौ ८ गते र ढिलोमा भदौ २२ गते र समाजको छिटोमा भदौ ८ र ढिलोमा भदौ १८ गतेसम्मको समय तोकिएको छ । छिटो अवधिभित्रै माग भन्दा बढी आवेदन परिसकेकाले विक्री बन्द गर्न लागिएको हो ।
समाज लघुवित्तले बिहिबारदेखि बिक्रीमा ल्याएको आइपीओमा आइतबार साँझ सम्ममा १२७ गुणा भन्दा धेरै आवेदन परेको छ। लघुवित्तको आइपीओमा १२७.७३ गुणा बढी आवेदन परेको हो। बिक्री प्रबन्धक सिद्धार्थ क्यापिटलले दिएको जानकारी अनुसार आइतबार पाँच बजेसम्ममा ४ लाख ८५ हजार ४८३ वटा आवेदनबाट १ करोड ३ लाख ८ हजार ४५० कित्ता शेयर खरिदको लागि आवेदन परेको छ ।
रिलायन्स लाइफ इन्स्योरेन्सले बिक्रीमा ल्याएको आइपीओमा आइतबारसम्म ३ गुणा भन्दा धेरै शेयर खरिदको लागि आवेदन परेको छ। विक्री प्रबन्धक सानिमा क्यापिटलले दिएको जानकारी अनुसार आइतबार साँझ सम्ममा ३.६० गुणा धेरै शेयर खरिदको लागि आवेदन परेको छ। ५ लाख ३ हजार ८०२ जना आवेदकबाट २ अर्ब ४ करोड १४ लाख १९ हजार रुपैयाँ बराबरको २ करोड ४ लाख १४ हजार १९० कित्ता शेयर खरिदको लागि आवेदन परेको हो।
रिलायन्सको आईपीओ खरीदका लागि न्यूनतम १० कित्ता र अधिकतम ६३ हजार कित्तासम्म माग गर्न सकिनेछ भने समाज लघुवित्तको शेयर खरिदका लागि न्यूनतम १० कित्ता र अधिकतम ५ हजार कित्तासम्म आवेदन दिन सकिनेछ ।
प्राथमिक बजारमा सार्वजनिक निष्कासनका क्रममा आस्बा सेवा अनिवार्य गरिएकाले आस्बा सेवामा सहभागी सम्पूर्ण बैंक तथा वित्तिय संस्था र मेरो शेयर खाता मार्फत घरमै बसेर आवेदन दिन सकिनेछ ।
नयाँ जीवन बीमा कम्पनीको रुपमा सञ्चालित रिलायन्स लाइफले आईपीओ विक्री गर्न साउन १६ गते र समाज लघुवित्तले साउन २१ गते नियामक निकाय नेपाल धितोपत्र बोर्डको अनुमति पाएको हो ।
समाज लघुवित्तको जारी पूँजी रू. २ करोड रहेको छ । हाल संस्थापकहरुबाट चुक्ता भएको पूँजी रू. १ करोड १४ लाख रहेको छ । सर्वसाधारणका लागि यो आईपीओ जारी पश्चात समाज लघुवित्तको जारी पूँजी अनुसारको रकम कायम हुनेछ ।
त्यस्तै हाल रू. १ अर्ब ४७ करोड चुक्तापूँजी रहेको रिलायन्स लाइफले बीमा समितिले तोके बमोजिम रू. २ अर्ब चुक्तापूँजी कायम गर्न आईपीओ जारी गर्न लागेको हो । आईपीओ पश्चात कम्पनीको चुक्तापूँजी रू. २ अर्ब १० करोड पुग्नेछ ।