मकवानपुर / हेटौंडा उपमहानगरपालिका उपपप्रमुख मिनाकुमारी लामाले गैरसरकारी संस्थाहरू सामाजिक विकासको क्षेत्रमा स्थानीय तहको सहयोगी भएको बताएकी छिन् । मकवानपुर महिला समूहको १८ औं बार्षिक साधारण सभा तथा अधिबेशनमा लामाले यस्तो बताएकी हुन् ।
स्थानीय तहहरूले गर्नुपर्ने सामाजिक विकासका क्षेत्रमा गैरसरकारी संस्थाले समन्वयकारी भूमिका निर्वाह गर्दै आएको उनले बताइन् । मकवानपुर महिला समूह अध्यक्ष कमला सुबेदीको अध्यक्षतामा भएको कार्यक्रम हेटौंडा उपमहानगरपालिका ४ नम्बर वडा अध्यक्ष नवीन सिग्देलले सामाजिक क्षेत्रमा कामगर्दा गैससहरूले स्थानीय तहसंग अनिवार्य अनुमती लिनु पर्ने र कार्यक्रमको पुर्व जानकारी गराउनु पर्ने बताए ।
मकवानपुर महिला समूहले एचआईभी संक्रमित तथा प्रभावित महिलाहरूको क्षेत्रमा कार्य गर्दै आएको छ । संस्थाले संक्रमित प्रभावित महिलाको आय आर्जन वृद्धि, बालबालिकाहरूको शिक्षा, महिलाको आर्थिक तथा सामाजिक सशक्तीकरणको लागि काम गर्दै आएको अध्यक्ष कमला सुबेदीले बताइन् ।
कार्यक्रम अध्यक्ष सुबेदीले संस्थागत प्रतिवेदन, सचीव सावित्री लामिछानेले प्रगति प्रतिवेदन तथा कोषाध्यक्ष मन्जु लामाले आर्थिक प्रतिवेदन प्रस्तुत गरेका थिए ।
संस्थाले कोरोना महामारीको बेलामा नियमित कामलाई स्थगित गरेर राहत वितरण, स्वारेण्टाईनहरूमा सहयोग जस्ता कार्यलाई प्राथमिकता दिंदै बाल विवाह, लैङ्गिक हिंसा न्यूनीकरण, मनोसामाजिक समस्या न्यूनीकरण जस्ता कार्यमा भूमिका निर्वाह गर्दै आएको अध्यक्ष सुवेदीले बताइन् ।
कार्यक्रममा गैसस मकवानपुर उपाध्यक्ष रमिला सापकोटा, समूहको संस्थापक अध्यक्ष राधिका अधिकारी, जिल्ला कानुन सहायता समिती अधिवक्ता अप्सरा बस्नेत, माइती नेपाल रोकथाम गृह मकवानपुर प्रमुख माया लामाको उपस्थिति रहेको कार्यक्रम संयोजन निशा लामाले बताइन्।
अधिवेशनले पुनः कमला सुबेदीलाई अध्यक्ष, सुमित्रा लामा उपाध्यक्ष,साबित्र लामिछाने सचिव, मन्जु लामा कोषाध्यक्षमा चयन गरेकाे छ । यसैगरी सदस्यहरूमा सम्झना बिष्ट, उमा घिमिरे र मनिता विसङ्खेलाई चयन गरेको छ ।
मकवानपुर । नेपाली कांग्रेस बागमती गाउँपालिकाको सभापतिमा फणिन्द्र तिमल्सिना निर्वाचित भएका छन् । शनिबार भएको कांग्रेसको गाउँ अधिवेशनबाट तिमल्सिना निर्वाचित भएका हुन् । उनले निकटतम प्रतिद्वन्दी दिल्ली प्रसाद घोरासाइनीलाई १४ मतले पराजित गरेका हुन् ।
सभापति तिमल्सिनाले कूल खसेको १ सय ५१ मत मध्ये ७५ मत प्राप्त गरेका थिए भने उनका निकटतम प्रतिद्वन्दी घोरासाइनीले ६१ मत प्राप्त गरेका थिए । १ मत भने बदर भएको र केही मतदाता निर्वाचन प्रक्रियामा सहभागि नभएको मतदान अधिकृत राजेश प्रसाद घिमिरेले जानकारी दिए ।
त्यसैगरी उपसभापतिमा जगतबहादुर लामा र मंगललाल वाइवा तथा सचिवमा सुदिप पाख्रिन र सिरित कुमार राई निर्वाचित भएको जनाइएको छ । सहसचिवमा भानु सोराली मगर र बीरबहादुर थोकर सर्वसम्मत चयन भएका हुन् ।
त्यस्तै कुल ५१ सदस्यीय गाउँ समितिका लागि शनिबार भएको निर्वाचन कार्यक्रमबाट तिमल्सिनाको नेतृत्वमा ४५ सदस्य चयन भएका छन् । बाँकीलाई कार्यसमितिको पहिलो बैठकबाट मनोनित गरिने जनाइएको छ ।
मकवानपुर । नेपाली कांग्रेस हेटौंडा नगर सभापतिमा उत्सव इटेनी विजयी भएका छन् । इटेनीकाे प्यानलले नै जीत हासिल गरेको छ। शनिबार सम्पन्न हेटौंडा उपमहानगरको अधिवेशनले हेटौंडा नगर सभापतिमा इटेनी र अन्य पदका इटेनी प्यानलकै उम्मेदवार विजयी भएका हुन्।
उनले सभापतिका अर्का उम्मेदवार महेन्द्र राउतलाई पराजित गरी विजयी बनेका हुन। नगर सभापति इटेनीले २ सय ८४ मत प्राप्त गर्दा अर्का उम्मेदवार महेन्द्र राउतले १ सय ३२ मत प्राप्त गरेका छन।
उपसभापतिमा इटेनी प्यानलबाट उम्मेदवार रहेका डोल्मा स्याङ्बोले २ सय ५७ र रामकृष्ण कोइरालाले ३ सय मत प्राप्त गरी विजयी बनेका हुन,अर्का उपसभापतिका उम्मेदवार ज्योती कोइराला १ सय २६ शेशन गोले ९३ ले प्राप्त गरेका छन।
त्यसैगरी सचिवमा सविन न्यौपानेले २ सय ९७ मत र हर्क रत्नलामाले २ सय २२ मत प्राप्त गरी विजयी भएका छन। सचिवका अर्का उम्मेदवार कुमार पोखरेलले १ सय ६३ गंगा प्रसाद पौडेलले १ सय १० मत प्राप्त गरेका थिए ।
त्यसैगरी सहसचिवमा निगम श्रेष्ठले २ सय ५८ मत र विकास बानियाँले २ सय ६५ मत प्राप्त गरी विजयी हुँदा सहसचिवका अर्का उम्मेदवार अञ्जनी पराजुलीले १ सय ५७ मत , र राजकुमार जोशीले ८४ मत प्राप्त गरेका छन। ४ सय २३ क्षेत्रीय प्रतिनिधिले मतदान गर्ने नगर अधिवेशनमा ४ सय २१ मत मात्र खसेको थियो।
मकवानपुर । महिलाविरुद्ध हुने हिंसा न्यूनिकरण गर्ने र महिला अधिकार सुनिश्चित गराउने उद्देश्यसहित युवा तथा पुरुषलाई मानव अधिकार तथा महिला अधिकारसम्बन्धी दुई दिने तालिम प्रदान गरिएको छ ।
अधिकार तथा आर्थिक विकासमार्फत महिला सशक्तिकरण परियोजना अन्तर्गत मनहरी गाँउपालिकाका युवा तथा पुरुषहरूलाई असोज ७ र ८ गते “मानव अधिकार तथा महिला अधिकार” तालिम दिइएको हो । अनौपचारिक क्षेत्र सेवा केन्द्र (इन्सेक) को आयोजना र डब्लूपिडीको पर्यवेक्षणमा तालिम दिइएकाे थियाे ।
तालिममा कार्यक्रमको उद्देश्यबारे प्रष्ट पार्दै इन्सेककी व्यवस्थापन प्रमुख शुभेक्षा खड्काले महिला हिंसा न्यूनिकरणको लागि पुरुषको पनि समान दायित्व हुने भएकोले युवा तथा पुरुषलाई तालिमको आयोजना गरेको बताइन् । उनले पुरुषले दिनानुदिन गर्ने व्यवहार हिंसा हो होइन, के गर्दा हिंसा हुन्छ, के गर्दा हुँदैन भन्ने ज्ञान नहुँदा पनि घरेलु हिंसाले निरन्तरता पाइरहने हुनाले त्यस्ता घटनाको न्यूनिकरणका लागि तालिममा पुरुष सहभागीता गराइएको बताइन् ।
कार्यक्रममा इन्सेकका मानव अधिकार शिक्षा विभागका प्रमुख मदन पौडेलले मानव अधिकारको ऐतिहासिक अवधारणागत प्रस्तुत गरेका थिए । उनले नेपालमा मानव अधिकारको कार्यान्वयनको अवस्था ऐन नियम र महिलाको अधिकारको संरक्षणको लागि गरिएको व्यवस्था समेत अवगत गराएका थिए । कार्यक्रम संयोजक कृष्णप्रसाद नेपालले नेपालको संबिधान र मौलिक हक तथा मानव अधिकारको विकास क्रमबारे तालिममा प्रस्तुतिकरण गरेका थिए । नेपालले नेपालको संविधन २०७२ ले नागरिकका लागि प्रत्याभूति गरेको भाग ३ को धारा १६ देखि ४७ सम्मको मौलिक हकमा भएको व्यवस्था र धारा ४८ मा भएको नागरिकको कर्तव्य बारे सहजिकरण गरेका थिए ।
यस्तै इन्सेक बागमती प्रदेशका कार्यक्रम संयोजक गणेश भण्डारीले आर्थिक, सामाजिक तथा साँस्कृतिक अधिकारबारे सहभागीहरूलाई जानकारी दिए । भण्डारीले नेपालको संविधानको मौलिक हकमा व्यवस्था गरिएका शिक्षा, स्वास्थ्य, खाद्य र आवासको अधिकारको सरकारले जनतालाई सुनिश्चितता गरेको उल्लेख गरेका थिए । निशुल्क तथा गुणस्तरीय शिक्षा, बालबालिका मैत्री विद्यालय, छात्रावृति, दिवा खाजा कार्यक्रमको व्यवस्था सरकाले गरेको भण्डारीले जानकारी गराएका हुन् ।
यसैगरी जनताको आधारभूत स्वास्थ्य उपचारको व्यवस्था, स्थानीय स्वास्थ्य चौकीमा निशुल्क औषधिको व्यवस्था, कोभिड–१९ सङ्क्रमण विरुद्ध निशुल्क उपचार, दीर्घ रोगको लागि आर्थिक सहयोग, स्वास्थ्य बिमा कार्यक्रम र जेष्ठ नागरिकलाई निशुल्क उपचारको व्यवस्था बारे जानकारी दिइएको थियो ।
साथै खाद्य अधिकार सुनिश्तिताका लागि कृषि र पशुपालनको क्षेत्रमा सरकाले ल्याएको अनुदान कार्यक्रम र सामाजिक सुरक्षा भत्ताको व्यवस्था तथा विपन्न, एकल र पिछडिएका वर्गका लागि सुरक्षित आवास र फुसको छानो रहितको घर कार्यक्रम पनि यही मौलिक हकको कार्यान्वयनको चरण रहेको पनि उल्लेख गरिएको थियो ।
अधिवक्ता अप्सरा बस्नेतले घरेलु हिंसा र कानुनी प्रावधानका बारेमा धारणा राखेकी थिइन् । उनले महिलामा माथि हुने हिंसाका प्रकार, हिंसाबाट हुने शारीरिक र मानसिक असर तथा हिंसा पीडित महिला लागि भएको कानुनी व्यवस्था बारे जानकारी गराएकी थिइन् । तालिममा मनहरी गाउँपालिकाका ३५ जना युवा तथा पुरुषहरूको सहभागिता रहेको थियो ।
मकवानपुर । नेकपा (एकीकृत समाजवादी)का अध्यक्ष माधवकुमार नेपालले मन्त्रिपरिषदले पूर्णता पाए पछी प्रदेश सरकार फेरबदल हुने बताएका छन् । ‘केही दिनमा मन्त्रिपरिषदले पूर्णता पाउने छ शनिबार हेटौंडामा आयोजित पार्टीको जिल्ला भेलामा उनले भने ‘केन्द्रमा मन्त्रिपरिषदले पूर्णता पाएसँगै बागमती र प्रदेश १ को सरकार फेरबदलमा लाग्ने छाैं।
अध्यक्ष नेपालले नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाको गठबन्धन प्रदेश हुँदै जिल्ला र वडा तहसम्म पुग्ने बताए । नेता नेपालले नेकपा एमालेका अध्यक्ष केपी ओलीलाई तानाशाह, स्वेच्छाचारी, अंहकार र दम्भले भरिएको व्यक्ति भएको आरोप लगाए । उनले ओलीले तानाशाही प्रवृत्ति देखाएकोले विद्रोह गर्न परेको भन्दै आगामी निर्वाचनमा ओलीको पार्टीलाई टर्च बालेर खोजेर पनि नभेटिने दाबी गरे ।
‘हामीले एमालेभित्र रहँदा उनको कमजोरी र गलत कार्यको विरुद्धमा पटक पटक आवाज उठायौं तर, आलोचना गर्नेलाई सिध्याउने नीति ओलीले लिए’, उनले भने, ‘आलोचना गरेका कारण हामीलाई सिध्याउन कारबाही गरेर पार्टीमा एकलौटी रुपमा अघि बढ्ने नीति लिइयो, हामीले त्यसैविरुद्ध विद्रोह गरेका हौं ।’

यसै बीच नेता नेपालले आउँदो चुनावमा केपी ओली नेतृत्वको पार्टी नेकपा एमालेलाई टर्च बालेर खोज्नु पर्ने दिन आउने बताएका छन् । मकवानपुरको जिल्ला स्तरीय भेलालाई सम्बोधन गर्दै अध्यक्ष नेपालले आउँदो चुनावको नतिजाले एमालेलाई र्टच बालेर खोज्नुपर्ने दिन आउने दाबी गरेका हुन् ।
उनले केपी ओलीको कारण एमाले फुट भएको बताए । उनले ओलीले पार्टीमा पार्टी विपरित विभिन्न एकल निर्णय गरेको कारण पार्टी फुट भएको बताए । उनले आफ्नो पार्टी समाजवादी नेपाल कम्युनिस्ट आन्दोलनको नेतृत्व गर्ने बताए । उनले देशभर संगठन निर्माण भईरहेको बताउँदै समाजवादी अभियानमा जोडिनेको संख्यामा कमी नभएको दाबी गरे ।
यसैगरी नेपालले आफ्नो पार्टी समाजवादीले जनताको बहुदलीय जनवाद (जबज) को मान्यता र विशेषताालाई आत्मसात गरेको बताए । उनले एकीकृत समाजवादीका विरोधीहरुले समाजवादीले जबज नमानेको भन्दै गलत प्रचार गरेको भन्दै भ्रममा नपर्न आग्रह गरे । उनले एकीकृत समाजवादीले सबै विचारहरु बोकेको भन्दै मर्क्सवाद–लेनिनवाद मार्गदर्शक सिद्धान्तलाई आत्मसात गरेको बताएका थिए ।

यस्तै नेकपा एकीकृत समाजवादी पार्टीका नेता एवम् प्रतिनिधिसभा सदस्य विरोध खतिवडाले नेकपा एमालेले सरकारलाई असफल पार्नका लागि संसदमा नाराबाजीको नाटक मञ्चन गरेको आरोप लगाएका छन् ।
शनिबार हेटौंडामा एकीकृत समाजवादी मकवानपुरको जिल्लास्तरीय भेलालाई सम्बोधन गर्दै नेता खतिवडाले बारम्बार संसद्को हत्या गर्नेहरुले संसदीय सर्वोच्चता कायम गर भन्ने नारा लगाएको देख्दा आश्चर्य लागेको बताए । उनले संसद्को रक्षाका लागि सडकदेखि अदालतसम्म पुगेर लड्नेले गरेकोचाहीं संसदीय मर्यादा विपरित हुने अनि संसद्को हत्याराले गरेको नाराबाजीचाहीं कसरी मर्यादित भयो भन्ने प्रश्न गरे ।
कम्युनिष्टका नेता मदन भण्डारी, मनमोहन अधिकारी र पुष्पलालले व्यक्तिवाद नसिकाएको भन्दै ओलीको व्यक्तिवादी सोच र सिद्धान्तका कारण एमालेको भविष्य नै संकटमा परेको उनले बताए । केपी ओलीलाई कटाक्ष गर्दै नेता खतिवडाले भने ‘देशको ढुकुटीमा मुख गाड्न पल्केका मुसाहरु बिरालो गएर बसेपछि भागाभाग भएका छन् ।’