मकवानपुर । मकवानपुर प्रहरीले ६ हजार ४४३ एम्पुल लागुऔषध डाईजेपामसहित ४ जना भारतीय नागरिक पक्राउ गरेकाे छ ।
पक्राउ पर्नेमा देश भारत जिल्ला मोतीहारी गाँउ पाञ्चायत सुगौली पोष्ट थाना बन्जरीया ग्राम सुगौलीका २४ वर्षीय शेख गुल्जार, २५ वर्षीय बसिम अहमद, १९ वर्षीय नेसाब आलम र ४३ वर्षीय शेख सकुत रहेका छन्।
शनिबार कुलेखानी हुदै काठमाण्डौ जादै गरेको BR05PA9093 नम्बरको भारतीय स्कारपियो गाडीलाई रोकी चेक गर्दा उक्त गाडी भित्र बिभिन्न भागमा फल्स बटम बनाई ल्याईएको अवस्थामा डाईजेपाम २ हजार २२६ एम्पुल, नुर्फिन २ हजार ३५६ एम्पुल, प्रोमेथाईजिन हाईड्रोक्लोराईड १ हजार ८६१ एम्पुल गरी जम्मा ६४४३ एम्पुल र ट्रामाडोल ४९ ट्याबलेट फेला पारी बरामद गरिएकाे जिल्ला प्रहरी कार्यालय मकवानपुरले जानकारी दिएकाे छ ।
शनिबार सशस्त्र प्रहरी बल नेपाल बिपद व्यवस्थापन बेस कुलेखानी र इलाका प्रहरी कार्यालय भिमफेदीबाट खटिएकाे प्रहरी टोलीले शनिबार बेलुका इन्द्रसरोवर गाउँपालिका – २ हेवीबाट उक्त लागुऔषध डाईजेपामसहित उनीहरुलाई पक्राउ गरिएकाे प्रहरीले जनाएकाे छ ।
उक्त लागुऔषध, सवारी साधन उनीहरुलाई नियन्त्रणमा लिई अनुसन्धान भई रहेको प्रहरीले जानकारी दिएकाे छ ।
मकवानपुर । साहित्य सङ्गम मकवानपुरको ३५७ औं सन्ध्या अप्सरा तिम्सिना स्मृति बिशेष आयोजना गरिएको छ । साहित्य सङ्गम र आँचल साहित्य कला पुञ्ज मकवानपुरले संयुक्त रुपमा शनिबार ३५७ औं नियमित सन्ध्या तिम्सिना बिशेष आयोजना गरेको हो ।
स्रष्टा तिम्सिनाको तस्बिरमा माल्यार्पण तथा पुष्पगुच्छा अर्पण गर्ने कार्य संगै प्रगतिशील लेखक संघ बागमती प्रदेश अध्यक्ष शान्तिप्रिय वन्दनाले दिवङ्गत साहित्यकार अप्सरा तिम्सिनाको कृतित्व र व्यक्तित्वमाथि प्रकाश पारेकी थिइन् । नियमित सन्ध्यामा विजनेश सिग्देल, स्वस्तिका बानियाँ, मनोज मधुर, सानुभाइ विक, राजकुमार चौधरी, देवराज खरेल, यश लामा, गोकर्ण लामा, जनार्दन खनाल, राजकुमार लामिछाने, निरा शर्मा, सावित्री ढुङ्गाना, सानु खनाल र तुलसी घिमिरेलगायतले रचना वाचन गरेका थिए ।
त्यसैगरी नियमित सन्ध्यामा सङ्गमको अक्षयकोष निर्माणार्थ सहयोगीहरूलाई कदरपत्रसहित सम्मान समेत गरिएको छ । सङ्गमको अक्षयकोष निर्माण अभियानमा सहयोग गरी सम्मानित हुनेहरुमा रमेशमोहन अधिकारी, भरत लौडारी, दीपक दाहाल, सीताराम दाहाल, मधु ढुङ्गाना, रिदम घिमिरे, रिना आचार्य, गोविन्द चौलागाईं, राजकुमार बिक, पुरुषोत्तम लामिछाने,वकेशव श्रेष्ठ ‘ज्योति’ र देवीराम लामा रहेका छन् ।
अक्षयकोष निर्माण अभियानमा सहयोग गर्ने महानुभावलाई अन्य कार्यक्रममा सम्मान गरिने सङ्गम अध्यक्ष डीबी बर्तौलाले जानकारी दिए । उनका अनुसार ३५७ औं सन्ध्याकै अवसरमा साहित्यकार राजकुमार लामिछाने सङ्गमको अक्षयकोष निर्माणका लागि १७ हजार ७ सय १७ सहयोग गरेका छन् । २८ भदौ २०८० देखि सङ्गमले सञ्चालन गरेकाे अक्षयकोष निर्माण अभियानमा हालसम्म ८ लाख २३ हजार ७० रुपियाँ सङ्कलन भएको उनले बताए ।
कार्यक्रममा हेटौंडा उपमहानगरपालिका ४ नम्बर वडाध्यक्ष नवीन सिग्देलले भाषा साहित्यको उन्नयनमा निरन्तर लागिपरेकाे बताउँदै अप्सरा तिम्सिनाको स्मृति ग्रन्थ प्रकाशनमा सहयोग गर्ने बताए । ‘सङ्गमको अक्षयकोष निर्माणमा समेत वडाकाे साथ रहन्छ’ उनले भने । साहित्यकार तुलसी घिमिरेले सङ्गमले गुणात्मक कार्यक्रम गर्ने गरेकाे बताउँदै संस्थाको निरन्तर प्रगति भएकोकाे खुसी व्यक्त गरे । अक्षयकोष निर्माणमा सहयोग गर्ने तर्फबाट साहित्यसेवी मधु ढुङ्गानाले आफ्नो भनाइ राखेका थिए ।
सङ्गमका अध्यक्ष डीबी बर्तौलाको अध्यक्षता तथा ४ नम्बर वडाध्यक्ष नवीन सिग्देलकाे प्रमुख आतिथ्यता तथा साहित्यकार तुलसी घिमिरेकाे विशेष आतिथ्यतामा भएकाे विशेष सन्ध्याकाे सहजिकरण सङ्गमका उपाध्यक्ष सानु खनालले गरेका थिए ।
मकवानपुर । राष्ट्रिय युवा संघ नेपाल मकवानपुरले वृक्षारोपण गरेको छ । युवा संघको एक महिने अभियान अन्तर्गत शनिबार जिल्ला कमिटीको आयोजनामा हेटौडा-९ को कर्णावती छ्योदेन गुम्बा परिसरमा वृक्षारोपण गरिकाे हाे ।
गुम्बा परिसरमा फलफुल जातका कागती, अम्बा, लिच्ची, जामुन, तेजपत्तालगायत १०० भन्दा बढी बिरुवा रोपिएको हो । ‘हरियाली हाम्रो पहिचान, वृक्षरोपण हाम्रो अभियान’ भन्ने नारासहित राष्ट्रिय युवा संघ नेपालले १४ असार २०८२ देखि १४ साउन २०८२ सम्म १ महिनालाई विशेष कार्यक्रमका साथ वृक्षरोपण अभियान चलाएको युवा संघ मकवानपुरका अध्यक्ष राजेश नगरकोटीले जानकारी दिए । उनका अनुसार युवासघ थाहा नगर कमिटीले पनि शनिबार नै पालुङमा वृक्षारोपण कार्यक्रम गरेको छ।
राष्ट्रिय युवा संघ नेपाल मकवानपुर अध्यक्ष राजेश नगरकोटीको अध्यक्षतामा भएको कार्यक्रममा नेकपा एमाले केन्द्रीय कमिटी सदस्य एवं मकवानपुर इन्चार्ज रामेश्वर राना, बागमती प्रदेश कमिटी सदस्य एवं पुर्वमन्त्री एकलाल श्रेष्ठ, एमाले जिल्ला कमिटी उपाध्यक्ष हिदम लामा, सचिव सीता बिष्ट, उपसचिव आरती पाठक र फुर्वा लामा, युवा संघका केन्द्रीय कमिटी सदस्य एवं मकवानपुर इन्चार्ज प्रतिमा श्रेष्ठ केन्द्रीय सदस्य सागर पाण्डे लगायतको सहभागिता रहेको थियो।
मकवानपुर । हेटौंडा उपमहानगरपालिका ४ नम्बर वडा कार्यालयले एसइई २०८१ मा उत्कृष्ट जीपीए ल्याउने विद्यार्थी र विषय शिक्षकलाई सम्मान गरेकाे छ । शुक्रबार ४ नम्बर वडा कार्यालयकाे आयोजना र शैक्षिक गुणस्तर सुधार समितिकाे व्यवस्थापनमा विद्यार्थी र शिक्षकलाई सम्मानित गरेको हाे।
हेटौंडा – ४ नम्वर वडामा रहेका सामुदायिक तथा संस्थागत विद्यालयबाट एसइई २०८१ मा जीपीए ४ सहित उत्कृष्ट नतिजा हासिल गर्ने विद्यार्थी तथा विषय शिक्षकलाई सम्मान गरिएकाे शैक्षिक गुणस्तर सुधार समिति हेटौंडा – ४ का अध्यक्ष श्रीराम दाहालले जानकारी दिए । एसइईमा जीपीए ४ प्राप्त गर्ने नवोदय शिशु सदन अङ्ग्रेजी माध्यमिक विद्यालयका विमर्श श्रेष्ठ र अनुषा उप्रेतीलाई नगद १० हजार रुपैयाँसहित सम्मान गरिएकाे हाे ।
त्यसैगरी वडामा संचालनमा रहेका सामुदायिक तथा संस्थागत गरी ६ वटा माविबाट जीपीए ३.२ भन्दा माथिको नतिजा ल्याउने विद्यार्थीलाई दोसल्ला र प्रमाणपत्रसहित सम्मानित गरिएकाे हाे । यसैगरी विषयगत ९५ प्रतिशतभन्दा बढी विद्यार्थीलाई उत्तीर्ण गराउन सफल शिक्षकहरूलाई समेत सम्मान गरिएकाे छ ।
शैक्षिक गुणस्तर सुधार समितिका अध्यक्ष श्रीराम दाहाल सभाध्यक्ष, जिल्ला समन्वय समिति मकवानपुरका अध्यक्ष ललित घलानको प्रमुख आतिथ्य तथा वडाध्यक्ष नवीन सिक्देलको विशेष आतिथ्यमा सम्मान कार्यक्रम भएकाे हाे ।
हेटौंडामा दुई जना बालश्रमिक भेटिए
Tags: No Comments
मकवानपुर । हेटौंडा उपमहानगरपालिका भित्र ७ वटा वडामा बालश्रम अनुगमन गरिएको छ । हेटौंडाका वडाहरु ६, ७, ८, ९, १६, १७ र १८ नं. का होटल, ग्यारेज, वर्कशप, किराना पसलहरुमा अनुगमन गरिएको हो ।
यस क्रममा हेटौंडा ८ कमाने निम चोकमा अवस्थित चाँद मोटरसाइकल वर्कशपमा १७ वर्षिय दुई बालकहरु बालश्रम गरिरहेको अवस्थामा अनुगमन टोलीले फेला पारेको छ । सो वर्कशप सञ्चालकहरुलाई श्रम तथा रोजगार कार्यालयले दश हजार रुपियाँ जरिवाना गराइएको श्रम तथा रोजगार कार्यालय हेटौंडाका प्रमुख रुद्र नारायण शाहले जानकारी दिनुभयो । उद्धार गरिएको दुई बालकहरुलाई सञ्चालकले १२ घण्टा बिना पारिश्रमिकमा काममा लगाइएको सञ्चालक स्वयमुले बताएका छन् । बालकहरुले काम सिकिरहेको अवस्था भएकाले पारिश्रमिक नदिएको उनको भनाइ छ । २ बालक मध्ये एक बालक रौतहट र अर्का बालक पर्सा जिल्लाका रहेको छन् ।
टोलीले चुच्चेखोला, पुतलीबजार, कमाने, नागसोती, हटिया, हर्नामाडी, पशुपतिनगर, तल्लो सिमेन्ट रोडका होटल, किराना, खुवा पसल, वर्कशप ग्यारेजहरुमा अनुगमन गरिएको हो । ५ वडामा जम्मा ११ वटा ग्यारेज तथा वर्कशपहरु, ७ होटल, २ वटा किराना पसलहरुमा गरिएको अनुगमनमा ८ नं. वडाका वर्कशपमा मात्रै २ बाल श्रम फेला पर्नुले व्यवसायीहरु बालश्रम प्रयोगमा तुलनात्मक रुपमा निकै सचेत भएको पाइएको बाल कल्याण अधिकारी बिनामाया थिंगले बताउनु भयो ।
हेटौंडा उपमहानगर बालमैत्री गाउँपालिका घोषणा भए तापनि यदाकदा बालश्रम भेटिइराख्ने हुँदा यो सवालमा सबै सरोकारवाला पक्षबाट निरन्तर सहयोग गरिरहन आवश्यक भएको अनुगमन समिति संयोजक बर्तौैलाले बताए ।
पहिले अनुगमनमा होटलहरुमा बालश्रमिक धेरै मात्रामा भेटिने गरेको थियो हाल छिटफुट मात्रा भेटिने गरेको छ तर वर्कशपहरुमा अझै पनि तुलनात्मक रुपमा सुधार त भएको छ तापनि केही मात्रामा फेला पर्ने गरेको बाल हेल्पलाइन मकवानपुर प्रमुख ज्ञवालीले अनुगमनको ताजा अनुभव बताउनु भयो । अनुगमनका क्रममा बाल श्रम प्रयोग नगर्नुभएका व्यवसायीहरुलाई प्रंशशासहित धन्यवाद समेत व्यक्त गरिएको उहाँले बताउनु भयो ।
श्रम तथा रोजगार कार्यालय, हेटौंडा उपमहानगरपालिका, प्रहरी, बाल हेल्पलाइनलगायतका सरोकारवालाहरुको सहभागितामा अनुगमन गरिएको थियो । टोलीमा हेटौंडा उपमहानगरपालिकाको बाल श्रम अनुगमन समितिका संयोजक सुरज बर्तौला, सदस्यहरुः श्रम तथा रोजगार कार्यालय हेटौंडाका नायब सुब्बा रेणु तामाङ्ग र सर्मिला राई, बाल कल्याण अधिकारी बिनामाया थिङ्ग, नासु निर्मल सिं रावल, प्रहरी चौकी चोकीटोलका असई निर्दोश लामा, हेटौंडा ६ नं. वडा सदस्य विजय पौडेल, सिविन बाल हेल्पलाइन १०९८ का प्रबन्धक झबिन्द्र ज्ञवाली र कार्यक्रम अधिकृत एवम् मनोविमर्शकर्ता सम्झना अधिकारीलगायतको उपस्थिति रहेको बाल हेल्पलाइन मकवानपुरले जनाएको छ ।