मकवानपुर । राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले भ्रष्टाचार र कुशासनको अन्त्य हुने बताएका छन् । सोमबार राप्रपा मकवानपुरद्वारा हेटौंडामा आयोजना गएको कार्यकर्ता भेलालाई सम्बोधन गर्दै उनले यस्तो बताएका हुन् ।
विगतदेखि नै भ्रष्ट व्यवस्था र भ्रष्ट शासकबाट मुक्तिको लागि राप्रपा नेपालले निरन्तर आन्दोलन गर्दै आएको छ’ अध्यक्ष थापाले भने विभिन्न कारणले गर्दा त्यसबखत सफल हुन नसके पनि जेनजी पुस्ताको आन्दोलनपछिको र बलिदानले परिवर्तनको ढोका खोल्न संभव भएको छ।’ भ्रष्टाचारीहरूले टाउको उठाउन नसक्ने गरी कानूनको कठघरामा उभिनुपर्छ भन्ने जनताले आशा गरेको उनले बताए ।
उनले भदौ २४ गते मध्यरातमा जेन्जी युवा पुस्ताको आन्दोलनलाई देशीविदेशी शक्तिहरूले ‘हाइज्याक’ गरेको समेत बताए। ठूलो जुक्ति लागाएर’ व्यवस्था जोगाएको गर्व गर्दै उनले भने ‘गणतन्त्रका अवशेषहरूले भ्रष्ट व्यवस्थालाई निरन्तरता दिने घोषणा गरेका छन्।’ २४ गते राति जनता र युवा पुस्ताको परिवर्तनको चाहना माथि तुषारापात गरेको उनले जिकिर गरे।
‘विगतमा सडकबाटै सरकारसहित व्यवस्था नै परिवर्तन गर्न उद्यत रहेका दलहरु अहिले निर्वाचनको विरोध गरिरहेका छन्’ थापाले भने ‘अहिले संविधानको दुहाइ दिएर भ्रष्ट व्यवस्थालाई निरन्तरता दिन खोजिरहेका छन्।’ जनताले आगामी निर्वाचनमा कांग्रेस र कम्युनिस्टलाई कुनै पनि हालतमा भोट नदिने उनको भनाई थियो ।
देशमा देखिएको संकट र जनआक्रोशको मूल कारण संघीय व्यबस्था, धर्मनिरपेक्ष र गणतन्त्रको असफलता भएको उनले बताए । ‘उक्त विषयलाई संबोधन नगरी यथास्थितिलाई निरन्तरता दिनु भनेको जेन्जी आन्दोलन र जनताको परिवर्तनको चाहनाप्रति बेईमानी हुनेछ’ उनले भने ‘राज्य संरचना, शासकीय स्वरुप, निर्वाचन प्रणाली, संवैधानिक परिषद् र न्याय परिषद् सम्बन्धी व्यवस्था यथावत कायम राखेर गरिने निर्वाचनको कुनै औचित्य रहँदैन।’
जेन्जी युवाहरूको चाहना अनुरुप भ्रष्टाचार र कुशासन अन्त्य गर्ने वाचा गरेर सुशीला कार्कीले प्रधानमन्त्रीको जिम्मेवारी लिनुभएको भएको बताउदै उनले भने ‘वर्तमान निर्वाचन प्रणाली, संवैधानिक अंगहरुमा नियुक्तिको व्यवस्था, राज्य संरचना र शासकीय स्वरूपलाई यथावत् कायम राखेर कसरी परिवर्तनको चाहना पुरा हुन्छ देश र जनतालाई प्रम कार्कीले जानकारी दिनुपर्छ ।’ अहिले कै निर्वाचन प्रणालीलाई कायम राखेर हुने चुनावपछि राजनीतिक स्थिरता कायम हुनेछ भन्ने ग्यारेन्टी के प्रधानमन्त्रीले दिन सक्नुहुन्छ? उनले प्रश्न गरे ।
जेनजी पुस्ताको आन्दोलन सङ्गठित र संस्थागत नभएकोले परिवर्तनको स्पष्ट खाका तयार नभएको उनले बताए । भ्रष्टाचार र कुशासनको अन्त्य उनीहरूको एकमात्र लक्ष्य रहेको उनले जानकारी दिए । ‘आन्दोलनको दौरानमा प्रदेश संरचनाको खारेजी, शासकीय स्वरूपमा परिवर्तन, हिन्दुराष्ट्र र संवैधानिक राजसंस्थाको स्थापना जस्ता मागहरु पनि सडकमा उठेका थिए’ उनले भने उठेका सबै मागहरु पूरा गर्न तत्काल सम्भव नभएपनि कमसेकम सरोकार वालाहरूको सर्वपक्षिय बैठक बोलाएर कति मागहरु पूरा गर्न सकिन्छ भन्ने बारेमा छलफल गर्न सकिन्थ्यो।’
‘आन्दोलनमा कार्यपालिका, व्यवस्थापिका र न्यायपालिकाको भवन ध्वस्त हुनु भनेको लोकतन्त्र माथिको प्रहार हो’ उनले भने ‘ती निकायहरू देशको राष्ट्रिय स्वतन्त्रता र सार्वभौमिकताका प्रतीक हुन्।’ उक्त कार्य गलत भएकाे बताउँदै कार्यपालिका व्यवस्थापिका र न्यायपालिकाको भवन ध्वस्त बनाइएको सम्भवतः विश्व इतिहासमा यो पहिलो घटना भएकाे उनले जानकारी दिए । जहाँ सिंहदरबार, संसद भवन र सर्वोच्च अदालतको सुरक्षा हुन सक्दैन त्यहाँ कसरी सुरक्षित रहने भन्ने अहिले सर्वसाधारणकाे चिन्ता रहेको उनले बताए । अन्तरिम सरकारले जनतालाई कसरी आश्वस्त पार्न सक्दछ त्यो भने हेर्न बाँकी रहेकाे उनकाे भनाई थियाे ।
मुलुकमा हाल विद्यमान विषम परिस्थितिलाई दृष्टिगत गर्दै राष्ट्रको सुरक्षा तथा पार्टीले अवलम्बन गरेको हिन्दूराष्ट्र राजसंस्था र सुशासनको एजेन्डाको रक्षाका निमित्त सम्पूर्ण राष्ट्रवादी शक्तिहरू एक ठाउँमा उभिनु जरुरी रहेकाे समेत अध्यक्ष थापाले बताए । ‘देशमा एउटा बलियो राष्ट्रवादी शक्ति निर्माण अहिलेको आवश्यकता हो’ उनले भने ।
राप्रपा नेपालका महामन्त्री राजाराम बर्तौला, गुरु सापकोटा, मन डीसी, दिलबहादुर बल, रमेश चौलागाईं, भृगु कार्की लगायतकाे उपस्थितिमा अगुवा कार्यकर्ता भने भएकाे हाे ।
मकवानपुर । नेपाल प्रेस युनियन मकवानपुर शाखाले प्रदान गर्दै आएको सीतादेवी स्मृति प्रेस युनियन पत्रकारिता पुरस्कारको राशी बढ्ने भएकाे छ । १५ हजार रुपैयाँ रहेको उक्त पुरस्कारको राशी बढाएर ५० हजार रुपैयाँ पुर्याइने घोषणा शुक्रबार पुरस्कार संस्थापकले गरेकाे छन् ।
पुरस्कार संस्थापक चिरञ्जीबी ढकालले हेटौंडामा आगामी वर्षदेखि पुरस्कार राशी ५० हजार रुपैयाँ पुर्याउने घोषणा गरेका हुन् । हेटौंडामा प्रेस युनियन मकवानपुरको टोलीसँगको भेटघाटमा गैरआवासीय नेपाली संघ (एनआरएनए) का संस्थापक समेत रहेका ढकालले उक्त पुरस्कारकाे राशी बढाउने घोषणा गरेका हुन् । अव मकवानपुरे पत्रकारिता क्षेत्रमा उक्त पुरस्कार सर्वाधिक नगद राशीको पत्रकारिता पुरस्कार हुनेछ । यस पुरस्कारबाट पहिलो पटक नेपाल प्रेस युनियन मकवानपुरका संस्थापक अध्यक्ष राममणि दाहाल सम्मानित भइसकेका छन् ।
भेटघाटकामा ढकालले पत्रकारहरुलाई संगठित हुँदै व्यावसायिक नेतृत्व विकासमार्फत पत्रकारितालाई अझ सशक्त बनाउनुपर्ने बताए । उनले प्रेस स्वतन्त्रता र पत्रकारको पेशागत सम्मान सुदृढ गर्न युनियनको भूमिकाको प्रशंसा गर्दै निरन्तर सहयोग गर्ने प्रतिबद्धता समेत जनाएका छन् । प्रेस युनियन मकवानपुर अध्यक्ष सुवास विडारीले ‘मकवानपुरको पत्रकारिता क्षेत्रमा यो एक ऐतिहासिक क्षण भएकाे बताए । ‘पत्रकारितालाई मुल पेशा बनाई आफ्नो कर्ममा निरन्तर लागिरहेका मकवानपुरका पत्रकारहरुलाई नगद ५० हजार सहित सम्मान गर्न पाउनु हामी युनियनकर्मीका लागि समेत गर्वको विषय हो’ उनले भने ।
‘यसले पत्रकारिता क्षेत्रमा लागिरहेकालाई प्रोत्साहन गर्ने र संस्थागत विकासमा समेत टेवा पुग्ने हामीले विश्वास लिएका छौं’ विडारीले भने । उक्त पुरस्कार प्रेस युनियन मकवानपुरको मात्र नभई मकवानपुरे पत्रकारहरूको पुरस्कार हुने उनले बताए । युनियनले उक्त पुरस्कार प्रत्येक दुई वर्षमा प्रदान गर्ने अध्यक्ष बिडारीले जानकारी दिए । ‘युनियनले स्थापना गरेको अरु तीनवटा पुरस्कार रहेको छ । हामी अन्य तीनवटा पुरस्कारलाई साधारणसभा र अधिवेशनको समयमा वितरण गर्नेछौं’ उनले भने ।
युनियनले प्रदान गर्ने सम्मानलाई विशेष कार्यक्रमको आयोजना गरी वितरण गर्ने बताइएकाे छ । अध्यक्ष विडारीले आन्तरिकरुपमा कार्यविधि निर्माण गरेर मकवानपुरे पत्रकारलाई विशेष प्राथमिकतामा राखेर पुरस्कार वितरण गरिने बताए ।
मकवानपुर । पुर्व पश्चिम राजमार्ग अन्तर्गत मकवानपुरकाे हेटौंडा उवमहानगरपालिका वडा नम्बर १५ र बाराको जितपुर सिमरा उपमहानगरपालिका वडा नम्बर २२ काे सिमानासुथित चुरियामाई मन्दिरको उकालोमा भएको सवारी दुर्घटना हुँदा २ जनाकाे मृत्यु भएकाे छ ।
बुधबार बिहान भएकाे दुर्घटनामा घाइते ६ मध्ये २ जनाको मृत्यु भएको प्रहरीले जनाएकाे छ । जनकपुरबाट काठमाडौं जान आउँदै गरेको ना ७ ख ८५३७ नम्बरको बस चुरियामाई मन्दिर नजिक उकालोमा ब्रेक फेल भई पछाडि गुड्दा ना १२ प ३३६० र म.प्र. ०३–०२४ प ४४९५ नम्बरका दुई वटा मोटरसाइकललाई ठक्कर दिदाँ ६ जना घाइते भएका थिए ।
मृत्यु हुनेमा ना. १२ प ३३६० नम्बरका मोटरसाइकल चालक बाराको फेटा गाउँपालिका-१ भरवलिया बस्ने २५ वर्षीय मकेश्वर पटेल र मधेश प्रदेश ०३-०२४ प ४४९५ नम्बरको मोटरसाइकल चालक कञ्चनकुमार पटेलको श्रीमती २६ वर्षीय कविता देवी रहेकाे बारा प्रहरीले जनाएकाे छ । गम्भीर घाइते दुवैलाई प्रादेशिक अस्पताल कलैया लैजाने क्रममा बाटोमै मृत्यु भएको जनाइएकाे छ ।
पटेलकी २२ वर्षीया श्रीमती कलिता देवी र २० महिनाकी छोरी तानेया पटेल घाइते भएका छन् । कलिता र छोरीको मकवानपुरको सहकारी अस्पतालमा उपचार भइरहेको मकवानपुर प्रहरी जनाएकाे छ । त्यस्तै, अर्को मोटरसाइकलमा सवार पर्सा, वीरगञ्ज–३१ का मृतक कविता देवीका श्रीमान् मोटरसाइकल चालक २७ वर्षीय कञ्चनकुमार पटेल र ३ वर्षीय छोरा आयुष पटेल पनि घाइते भएका छन् । कञ्चन र आयुषको सहकारी अस्पताल मकवानपुरमा उपचार भइरहेको छ।
बस दुर्घटनापछि फरार रहेका बस चालक सर्लाही लालबन्दीका ४७ वर्षीय विश्वनाथ चौधरीलाई प्रहरीले नियन्त्रणमा लिइएको छ ।
मकवानपुर । जेनजीको आन्दोलनका क्रममा क्षति पुगेको हेटौंडा उपमहानगरपालिका ४ नम्बर वडाले बुधबारबाट सेवा सुरु गरेको छ ।
आन्दोलनको क्रममा गत भदौ २४ गते ४ नम्बर वडा कार्यालयको सबै सामान जलाइएको थियो । वडाको सामाग्री जलेपछि अत्यावश्यक सामानको जोहो गर्दै वडाले १५ दिनपछि बुधबारबाट सबै सेवा सुचारु गरेको हो । वडा कार्यालयले आन्दोलनको क्रममा भएको क्षतिको विवरण सार्वजनिक र चार्ड पर्वको अवसरमा शुभकामना आदानप्रदान कार्यक्रमको आयोजना गरेर सेवा सुरु गरेको हो ।
आन्दोलनको क्रममा आगजनीबाट वडा कार्यालयको कम्प्युटर पाँच थान, स्क्यान र प्रिन्टर ७ थान, ल्याप्टप २ थान, मोटरसाइकल १ थान र दराज, टेबल, कुर्सी, फ्रिज, सोफा, बायोमेट्रिक्स मेसिनलगायतका कार्यलयका जिन्सी तथा प्रशासन लेखा र योजनाको फाइन जलेर पूर्ण रूपमा क्षति भएको वडाध्यक्ष नवीन सिग्देलले जानकारी दिए।
“देशैभरि भएको क्षति दुःखद हो, वडा कार्यालय, स्वास्थ्य कार्यालयमा क्षति पुग्दा सेवा प्रवाह प्रभावित भएको छ, शून्य अवस्थामा वडा कार्यालय छ, छोटो समयमा न्यूनतम आवश्यक स्रोत साधन जुटाएर वडाको सेवा वडावासीसम्म प्रवाह गर्दै छौँ,’’ वडाध्यक्ष सिग्देलले भने । जस्तो सुकै सङ्कटमा पनि एक ढिक्का भएर अगाडि बढ्न कार्यालयको व्यवस्थापन गरेर सेवा प्रवाह सुरु गरिएको उनले बताए।
आन्दोलनको क्रममा वडा कार्यालयसहित नगर विकास समितिकाे समेत जिन्सी सामग्री समेत जलाइएकाे वडा सचिव आरपी गुरागाईले जानकारी दिए । उनका अनुसार अनुमानित लागत २५ लाख बराबरको सरकारी सम्पत्तीकाे क्षती भएको छ ।
यसैवीच टोल विकास नगर समन्वय समिति हेटौंडाले वडा कार्यालयलाई एक थान कम्प्युटर सहयोग गरेको छ । समितिले हेटौंडाको क्षती पुगेको ६ वटा वडा कार्यालयलाई १/ १ थान कम्प्युटर सहयोग गरेको अध्यक्ष ध्रुव अधिकारीले जानकारी दिए । समितिले ४ नम्बर वडा सँगै ३,१०,११,१५ र १९ नम्बर वडालाई कम्प्युटर सहयोग गरेकाे हाे ।
सेवा सुचारुसहितको शुभकामना कार्यक्रममा जनप्रतिनिधि कर्मचारी, टोल विकास सस्थाका प्रतिनिधि, स्थानीयवासी, राजनीतिक दलका प्रतिनिधि, सञ्चारकर्मी लगायतकाले सहभागिता रहेको थियो ।
मकवानपुर । मकवानपुरकाे हेटौंडामा मंगलबारदेखि सुपथ मूल्यको खाद्यान्न बजार संचालनमा आएकाे छ । नेपालीहरूको महान पर्व दशैंलाई लक्षित गर्दै मकवानपुर उद्योग वाणिज्य संघले सुपथ बजार संचालनमा ल्याएकाे हाे ।
मकवानपुर अधिकृत बिक्रेता व्यवसायी संघ संयोजक रहेकाे सुपथ मूल्य बजारको उद्घाटन जिल्ला प्रशासन कार्यालय मकवानपुरका प्रमुख जिल्ला अधिकारी स्किम श्रेष्ठले गरिन् । बजार ११ असोज शनिबारसम्म बिहान ११ बजेदेखि बेलुकी ६ बजेसम्म सञ्चालन हुनेछ । हेटौंडा–२, पल्पसा सदन सुरू भएको बजारकाे अवधी कारोबारको अवस्था हेरी थप गर्न सकिने आयोजकले जनाएको छ ।
सुपध बजारमा १६ वटा स्टलमार्फत चिनी, नुन, तेल, साबुन, सर्फ, चिउरा, फुरनदाना, दालमोठ, भुजिया, जिरा, धनियाँ, मसला, चियापत्ती, पिठो जस्ता दैनिक उपभोग्य वस्तुहरू राखिएका छन् । दुग्ध विकास संस्थान र साल्ट ट्रेडिङ कर्पोरेसनका सामग्रीहरू समेत खरिद गर्न सकिने सुपथ बजारमा मासुजन्य तथा अण्डा अन्य परिकार समेत थप्ने तयारी भइरहेको मउवा संघले जनाएकाे छ ।