मकवानपुर । नागरिक समाज मंच मकवानपुरले जिल्लामा कार्यरत बिभिन्न गैरसरकारी संस्थाहरूले कामको दौडानमा आइपरेका समस्या, चुनौती तथा अनुभव आदनप्रदान कार्यक्रम गरेको छ ।
नागरिक समाज पारस्परिक जवाफदेहिता परियोजना अन्तरगत यो कार्यक्रम गरिएको डेक नेपालका मकवानपुर प्रमुख मान बहादुर वाइबाले बताए । कार्यक्रममा मकवानपुर महिला समूह कार्यक्रम संयोजक निशा लामाले कार्यालयले गर्दै आएको कार्यक्रम तथा त्यसको उपलब्धि बारे जानकारी गराएकी थिइन् । मकवानपुर जिल्लाको विभिन्न स्थानमा रहेका एच आई भी संक्रमित प्रभावित महिलालाई सामाजिकीकरणमा समस्या भएको,पैतृक सम्पत्ति ग्रहण तथा बालबालिकालाई शिक्षा आर्जनमा समस्या रहेको कार्यक्रम संयोजन लामाले बताइ ।
यसैगरी बालकल्याण समाज मकवानपुर कार्यक्रम संयोजक प्रकाश खतिवडाले बालबलिकाको संरक्षण र सम्बद्धनको लागि गर्दै आएको कार्यक्रम बारे जानकारी गराएका थिए । बालमैत्री उपचार, बालमैत्री हेरचाह तथा बालमैत्री अभिभावक शिक्षाको लागि समाजले गर्दै आएको कामका बारेमा खतिवडाले जानकारी गराएका थिए ।
कार्यक्रममा नारी सिप सिर्जना केन्द्र कार्यकारी निर्देशक चिरञ्जीवी पौडेल केन्द्रले ३० बर्षसम्म काम गर्दा धेरै महिलाहरू नेतृत्वको तहमा पुगेको र उल्लेख्य प्रगति गरेकोमा खुसी व्यक्त गरे । यसैगरी सियान पुनर्स्थापना केन्द्र सौजन डीसीले समाजमा लागुऔषधको प्रयोगकर्ताहरू बढेको प्रति ध्यानाकर्षण जनाए । “सामाजिक विकासको लागि मनोबैज्ञानिक बिकास पनि अनिवार्य छ” डीसीले भने । सरकारी तवरबाट लागु औषध नियन्त्रणमा पहल कम भएको उनले बताए।
यसैगरी डेक नेपाल कार्यक्रम संयोजक मान बहादुर वाइबाले डेक नेपालले काम थालेदेखि शिक्षा, स्वास्थ, कृषि बिपदको क्षेत्रमा भएको उपलब्धिहरू बारे जानकारी गराईएका थिए । समाजमा सबैलाई जवाफदेही बनाउने सबै वर्गको सशक्तीकरण आवश्यक भएको वाईबाले बताए । स्थानीय तहसंग काम गर्दा भौतिक विकासको सवालमा भन्दा सामाजिक विकासको सवाललाई बढि चासो दिने गरेको आफूले पाएको वाइबाले बताए ।
नगरिक समाज मंच मकवानपुर अध्यक्ष रमिला सापकोटाको अध्यक्षतामा भएको थियो । पारस्परिक जवाफदेहीता अभिबृद्विको लागि सरकार र गैरसरकारी संस्थाको समन्वय, सहकार्य तथा हातेमालो आवश्यक भएको अध्यक्ष सापकोटाले बताइन् ।
मकवानपुर । हेटौडा उपमहानगरपालिकाले शारीरिक रुपमा अशक्त भएका १ जनालाई ह्वील चेयर प्रदान गरेकाे छ । शारीरिक अशक्तता भई दैनिक जीवनमा समस्यामा परेका हेटौंडा–१७ का युवालाई उपमहानगरपालिकाले ह्वील चेयर वितरण गरेको छ ।
उपमहानगरको महिला तथा वालवालिका महाशाखाको समन्वयमा नगरप्रमुख मिनाकुमारी लामाले हेटौडा १७ का १६ बर्षिय भोजराज घिमिरेलाई ह्वीलचेयर हस्तान्तरण गरेकी हुन् । वडा कार्यालयको सिफारिसमा हेटौंडा–१७ का घिमिरेलाई घर बाहिरको वाताबरणमा हिड्डुल गर्न सहजताको लागि ह्वील चेयर हस्तान्तरण गरिएको महिला तथा वालवालिका विकास महाशाखाका प्रमुख जगन्नाथ सापकोटाले बताए । ह्वील चेयर घिमिरेका वुवा कृष्णप्रसादले बुझेका हुन । उनले उपमहानगरले दिएको सामग्रीले छोरालाई सहज हुने भन्दै खुशी व्यक्त गरे ।
उपमहानगरले चालु आर्थिक बर्षमा अहिले सम्म नगरका बिभिन्न वडामा रहेका शारीरिक अशक्तता भएकाहरुलाई पटक/पटक गरी ७० वटा भन्दा बढी ह्वील चेयर वितरण गरिएको महाशाखा प्रमुख सापकोटाले बताए ।
मकवानपुर । नेपाली काँग्रेस मकवानपुरले स्थानीय तह सदस्य निर्वाचन २०७९ मा मतदान गर्ने मतदातालाई धन्यवाद दिएको छ । मंगलबार पार्टी कार्यालयमा पत्रकार सम्मेलन गर्दै स्थानीय तह सदस्य निर्वाचन २०७९ मार्फत काँग्रेसलाई मकवानपुरमा ठुलो पार्टी बनाएको भन्दै सम्पुर्ण मतदाता र सहयोगीलाई धन्यवाद दिएको हो ।
पत्रकार सम्मेलनमा नेपाली काँग्रेस मकवानपुरका जिल्ला सभापति बुद्ध लामाले स्थानीय तहको निर्वाचनमा मकवानपुरमा मकवानपुरे जनताले दिएको मतप्रति आभार व्यक्त गरेका छन । अध्यक्ष लामाले आम मतदाता, गठबन्धन, सहयोगी सबैलाई धन्यवाद दिएका छन । बैशाख ३० गते सम्पन्न स्थानीय तह सदस्य निर्वाचनमा नेपाली कांग्रेस मकवानपुरले जिल्लाको १० वटा पालिका मध्ये ५ वटामा प्रमुख, ४ वटामा उप–प्रमुख र ४४ वटा वडामा अध्यक्ष पदमा जीत हासिल गरेको थियो ।
पत्रकार सम्मेलनमा नेपाली कांग्रेस बागमती प्रदेश सदस्य चम्फु लामा, काँग्रेस मकवानपुरका उपसभापती द्वय धर्मराज लामिछाने र आनन्द कठायत, सचिव भीमसेन महत, सहचिव द्वय इन्दिरा न्यौपाने र निशान बजागाई, प्रवक्ता अर्जुन चौलागाई लगायतकको सहभागिता रहेको थियो ।
मकवानपुर । स्थानीय तह सदस्य निर्वाचन २०७९ को नतिजा सार्वजनिक भएको २ सातापछि मकवानपुर कांग्रेसले जिल्ला समन्वय समिति मकवानपुरमा आफ्नो नेतृत्व हुनुपर्ने दावी गरेको छ ।
नेपाली कांग्रेस मकवानपुर जिल्ला पार्टी सभापति बुद्ध लामाले आज पत्रकार सम्मेलन गर्दै मकवानपुरमा कांग्रेस सबैभन्दा ठूलो दल भएकोले जिल्ला समन्वयमा आफ्नो दावी रहेको बताए ।
स्थानीय तह सदस्य निर्वाचनमा १० स्थानीय मध्ये थाहा नगरपालिका र हेटौंडा उपमहानगरपालिकाको नेतृत्व माओवादी केन्द्र र एकिकृत समाजवादीलाई दिएका कारण पनि जिल्लाको नेतृत्व दावी गर्ने अधिकार कांग्रेससँग रहको लामाले बताए ।
उनले जिल्ला समन्वय समितिको निर्वाचनमा काँग्रेसकै नेतृत्वमा अघि बढ्ने गरी गठबन्धन दलहरुबीच छलफल भइरहेको समेत बताए । जिल्ला समन्वय समितिको निर्वाचनमा मकवानपुरको हेटौंडा उपमहानगरपालिका, थाहा नगरपालिका र ८ वटा गाउँपालिकाका प्रमुख र उपप्रमुख गरी कूल २० जनाले मतदान गर्न पाउँछन् । नेपाली कांग्रेसका ९ जना, नेकपा माओवादी केन्द्रमा ७ जना, नेकपा एमालेका ३ जना र नेकपा एकीकृत समाजवादीको १ जना मतदाता रहेका छन् ।
सयैबिच मकवानपुर कांग्रेसले हालै निर्वाचित जनप्रतिनिधिहरूलाई जनभावना अनुरूप स्थानीय तहको विकास निर्माण तथा अन्य काम गर्न निर्देशन दिएको छ ।
मकवानपुर । हेटौंडामा जारी स्थानीय तह सहिद स्मृती अन्तराष्ट्रिय मकवानपुर गोल्डकप फुटबल प्रतियोगिता अन्तर्गत आज साेमबारकाे खेलमा त्रिभुवन आर्मी क्लब काठमाडाैं सेमिफाइनलमा प्रवेश गरेको छ । साविक विजेता विभागीय टोली आर्मी क्लब अर्काे विभागीय क्लब शसस्त्र प्रहरीकाे एपीएफलाई हराउँदै सेमिफाइनल प्रवेश गरेकाे हाे ।
हेटौंडा–५ स्थित पिप्ले क्याम्पा रंगशालामा साेमबारबाट सुरु भएकाे प्रतियोगिताको पहिलो क्वाटरफाइनल खेलमा आर्मीले एफिएफलाई ट्राइब्रेकरमा ५–४ गोल अन्तरले हराउँदै सेमिफाइनलमा प्रवेश गरेको हो । निर्धारित ९० मिनेटको खेलमा १–१ गोलको बराबरी भएपछि खेल ट्राइब्रेकरमा धकेलिएको थियो । खेलको पहिलो हाफमा डिबक्सभित्र एपिएफका कप्तान टोपबहादुर विष्टको हातमा बलले लागेपछि आर्मीले पेनाल्टी पाएपनि एपिएफका गोलरक्षक राजु नगरकोटीले रोकेका थिए ।
त्यस्तै दोस्रो हाफकोको ६७ औँ मिनेटमा एपिएफका खेलाडीले डिबक्सभित्र फाउल गरेपछि आर्मीले दोस्रो पटक पेनाल्टी भएको थियो । दोस्रो पटक पाएको पेनाल्टीलाई आर्मीका दिनेश हेम्जनले सहजै गाेलमा परिणत गरे। तर, त्यो अग्रता जितको लागि पर्याप्त भएन । खेलको थप समयको अन्तिम मिनेटमा एपिएफका युवराज खड्काले गोल गर्दै टोली खेलमा फर्काएका थिए । त्यसपछि खेल ट्राईब्रेकरको निर्णय ट्राईब्रेकरको साहारा लिनु परेको थियो ।
ट्राईब्रेकरमा आर्मीलाई जित दिलाउन गोलरक्षक विकेश कुथु नायक बने । उनले ४–४ गोलको स्थितीमा उनले एपिएफका मणि कुमार लामाको प्रहार रोक्न सफल भएका थिए । आर्मीका दिपक गुरुङ, सिमान्त थापा मगर, सन्तोष के.सी., कमल बहादुर थापा र दिनेश हेम्जनले गोल गरेका थिए । उता एपिएफका नविन लामा, सुदिप शिखरकार, सनिश श्रेष्ठ र नविन थिङ्गले मात्रै गोल गरेका थिए ।
ट्राईब्रेकरमा टोलीलाई जित दिलाउन महत्वपुर्ण पेनाल्टी बचाउँ गरेका आर्मीका विकेश कुथु म्यानअफ द म्यच घोषित भए । उनले नगद १० हजार सहित ट्रफि हात पारे । आर्मीले फाइनल प्रवेशको लागि चर्च ब्वाइज क्लब र एभेनिर एफसी, क्यामरुन बीचको विजेतासँग खेल्नेछ। प्रतियोगिताको दोस्रो क्वाटरफाइनल खेल भोली मंगलबार नेपाल पुलिस क्लब र स्टार खेलाडीले भरिएको मनाङ मर्स्याङ्दी क्लबबिच प्रतिस्पर्धा हुनेछ । खेल दिउँसो साढे ३ बजे सुरु हुने छ ।
प्रतियोगितामा विभागीय क्लबहरु नेपाल आर्मी क्लब, नेपाल पुलिस क्लब, सशस्त्र प्रहरीको (एपीएफ) क्लब, मनाङ मस्र्याङ्दी क्लब, फ्रेण्डस्, खुमलटार युथ क्लब, सिमरा, सर्लाहीको बागमती युवा क्लब, विजय युथ क्लब हेटौंडा, चितवन–११, चर्च ब्वाइज क्लब र क्यामरुनको एभिनियर एफसी सहभागी रहको आयोजकले बताएको छ ।
प्रतियोगिताको विजेताले १५ लाख र उपविजेताले १० लाख रुपैयाासहित ट्रफी प्राप्त गर्नेछन् । अघिल्लो बर्षको भन्दा यस बर्ष पुरस्कारर राशी बृद्धि गरिएको छ । अघिल्लो बर्ष विजेताले १० र उपविजेताले ५ लाख रुपैयाा प्राप्त गरेका थिए । प्रतियोगिताको लागि करिब १ करोड १७ लाख रुपैयाँ खर्च हुने अनुमान गरिएको आयोजकले बताएको छ । अघिल्लो संस्करणमा नेपाल आर्मी च्याम्पियन हुँदा घरेलु टिम उपविजेता बनेको थियो ।
प्रतियोगिताको उत्कृष्ट गोलरक्षक, डिफेन्डर, मिडफिल्डर, फरवार्ड, सर्वाधिक गोलकर्ता तथा उत्कृष्ट प्रशिक्षकलाई जनही २५ हजार रुपैयाँ तथा प्रत्येक खेलको म्यान अफ द म्याचलाई नगद १० हजार रुपैयाासहित ट्रफी प्रदान गरिनेछ । प्रतियोगिताको सर्वोत्कृष्ट खेलाडलाई बुलेट मोटरसाइकल प्रदान गरिने प्रतियोगिता संयोजक प्रताप विष्टले जानकारी दिए ।
अघिल्लो बर्षझैं यस बर्ष पनि सर्वोत्कृष्ट खेलाडीका लागि हेटौंडाको हेटौंडा स्कुल अफ म्यानेजमेण्ट एण्ड सोसियल साईन्सेज कलेजका संयोजक पुरणबहादुर जोशीले बुलेट मोटरसाइकल उपलब्ध गराउने भएका हुन् । प्रतियोगितामा एक करोड १७ लाख ९२ हजार रुपैयाँ कुल लागत लाग्ने अनुमान गरिएको आयोजकले बताएको छ ।