हामी एघार वर्षमा प्रवेश (प्रकाशकीय)
Tags: No Comments
संघर्षमय यात्रामा आजबाट हामी दशौं वर्ष पार गरेर एघारौं वर्षमा प्रवेश गरेका छौं । अहिले देश आर्थिक समृद्धिका खातिर लम्किरहेको छ । संघीयताको अभ्यासमा रहेको नेपालले पहिलो पाँच वर्षको यात्रा पुरा गर्दैगर्दा आर्थिक अवस्था अनपेक्षित रुपमा ओरालो झरीरहेको छ । आमसर्वसाधारणको दैनिकी आर्थिक रुपमा कष्टकर बन्दै आएको छ । नेपालको अर्थतन्त्रमा कसरी सुधार ल्याउने भन्ने बारे बहस जरुरी छ ।
राजनीतिक रुपमा विषम परिस्थिती हुँदाको पल हामीले सहीखबर साप्ताहिकको प्रकाशन सुरु गरेका थियौ । आर्थिक तथा सामाजिक विकासलाई राजनीतिले नेतृत्व गर्न नसेकेकोले राजनीतिक स्थिरताको लागि हामीले दबाब दिंदै आयौ । संगसंगै महिलालगायत सिमान्तकृत समुदायको अग्रसरताको लागि हामीले आफ्नो मार्गदर्शन प्रदान गर्दै आयौ । यस धर्तीमा सबैले समान रुपमा बाँच्न र आफ्नो अस्तित्वलाई मर्यादीत र जिवन्त राख्न पाउनु पर्छ भन्ने फराकिलो सोच हाम्रो मुख्य एजेण्डाको रुपमा रह्यो र रहनेछ ।
दश वर्षको यात्रा पुरा गर्दै गर्दा हामीले धेरै तीता मिठा अनुभुतिहरु संगालेका छौ, र ति अनुभुतीहरुलाई सम्हालेर राखेका छौ । स्थानीय तहको निर्वाचन र त्यसपछिको नेतृत्व अनि स्थानीय सरकारसँगै प्रदेश र संघीय सरकारको जिम्मेवारी र कर्तव्यलाई पनि हामीले नजिकैबाट नियाल्ने हौका पायौ । राजनीतिक विषम परिस्थितिमा जन्मेको सहीखबर साप्ताहिक यहाँहरुको माया ममतामा पुलोकित हुँदै आजको यात्रासम्म आएको हो । रहरलाई जिम्मेवार बनाउँदै हामीले आमनागरिकको सूचनाको हकलाई व्यवहारीक बनाउने प्रयत्नलाई जारी राख्यौ । जस्तोसुकै विषय परिस्थितीमा पनि सहीखबर साप्ताहिकले आफुलाई ज्युँदो राख्न सफल भएको छ, र जिम्मेवारी पूर्णरुपमा निर्वाह गर्दै आएको छ ।
कोभिड जस्तो महामारीमा पनि हामीले कुनै पनि अंक बन्द गरेनौ, निरन्तर पत्रिका प्रकाशनसँगै अनलाइन सञ्चालन जारी राख्यौ । यो पत्रिकालाई आजको अवस्थासम्म आईपुग्न जिल्लाबासी कै अथाह योगदान रहेको कुरा हरपल स्मरणीय छ । सहीखबर साप्ताहिकले आफ्नाे जिम्मेवारी सफलता पूर्वक पुरा गर्दै आएकै कारण नेपाल सरकारकाे वर्गिकरणमा पत्रिका हाल ‘क’ वर्गमा रहेकाे छ।
प्रकाशन सुरु गरेदेखि नै राजनीतिक विषय वस्तुलाई भन्दा सामाजिक विषय वस्तुलाई प्राथमिकतामा राख्दै आएका छौं । यो सहीखबरको आफ्नो पहिचान पनि हो । समतामुलक समाज निर्माण, महिला सशक्तिकरण, महिला अधिकार, सामाजिक न्याय, मानव अधिकार, बाल अधिकार, समाजको सकारात्मक रुपान्तरणमा जस्ता क्षेत्रमा आम सञ्चारको तर्फबाट झकझक्याउने हाम्रो अभियान जारी छ ।
प्रविधिको युगलाई अनुसरण गर्दै पछिल्लो २ वर्षबाट हामीले साप्ताहिकको अनलाइन संस्करण पनि सुरु गरेका छौं । साप्ताहिक रुपमा मात्रै नभई हरपल यहाँहरुलाई अनलाईन मार्फत पनि सूचना, जानकारी www.saheekhabar.com मा पस्कदै आएका छौ ।
यो सुखद अवसरमा हामी हाम्रा आदरणीय सहयोगी मनहरु, हाम्रा स्तम्भकारहरु, विज्ञापन दाताहरु, पाठक वर्गहरु, हामीसँग प्रत्यक्ष/परोक्ष रुपमा जोडिनु भएका असाध्यै प्रिय शुभचिन्तकहरु, हाम्रो यात्राको होस्टेमा हैसें गरी सहयोग गर्नुहुने अग्रज, तथा समकक्षी र अनुज सबै सञ्चारकर्मीहरुप्रति हार्दिक आभार । आगामी यात्रामा पनि यहाँहरुको यस्तै अमिट सहयोग सहकार्यको अपेक्षा राख्दछौ । धर्तीका सबैको अस्तित्वलाई बचाउँन फराकिलो सोचको विकासमा लागि पर्न र खबरदारी गर्न हामीलाई सदा बल र आशिर्वाद प्राप्त होस् । हाम्रो यात्रा जारी रहनेछ ।
चिट ल्याएको आशंका गर्दै छात्रामाथि दुर्व्यवहार गरेको आरोप
Tags: No Comments
मकवानपुर । मकवानपुर हेटौंडा स्थित हेटौंडा क्याम्पसमा स्नातक तह दोश्रो वर्षको वार्षिक परीक्षा सञ्चालन गर्ने क्रममा छात्रामाथि यौन दुर्व्यवहार भएको प्रति विद्यार्थीहरुले गम्भिर ध्यानाकर्षण भएको बताएका छन् ।

अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले छात्राहरुमाथि भएको दुव्र्यवहारको तत्काल छानविन गर्न माग गरेको छ । ३ साउनमा मकवानपुर बहुमुखी क्याम्पसबाट बि.एड. दोस्रो वर्षको परीक्षा दिन गएको दुई जना छात्रालाई हेटौंडा क्याम्पसमा चिट ल्याएको भन्दै सबै कपडा खोल्न लगाई प्याडसम्म खोल्न लगाई गरेको अभद्र व्यवहार भन्दै अनेरास्ववियु मकवानपुर बहुमुखी क्याम्पस कमिटीले भत्सना गरेको छ ।
“घटना एकदमै आपत्तिजनक छ, त्यस्तो व्यवहार गर्ने व्यक्ति कुनै कोणबाट शिक्षक हुन सक्दैन” विज्ञप्तिमा भनिएको छ । “घटनाको तत्काल छानबिन गरि दोषीलाई तत्काल पक्राउ गरि कारवाहीको माग गर्दछौ” अनेरास्ववियु मकवानपुर बहुमुखी क्याम्पस कमिटी अध्यक्ष प्रसिद्ध रेग्मीद्वारा हस्ताक्षरीत विज्ञप्तिमा भनिएको छ ।
यसैबिच परीक्षा दिन जाँदा चेकजाँचको क्रममा आफूहरुमाथि भएको घटना बारेमा छात्राहरुले लेखेको म्यासेज सामाजिक सञ्जालमा भाइरल भएपछि हेटौंडा क्याम्पसले पनि विज्ञप्ति जारी गरेको छ । क्याम्पस प्रमुख देव मानन्धरद्वारा हस्ताक्षरीत विज्ञप्तिमा क्याम्पसले घटनाको छानविन गर्ने बताएको छ ।

“विद्यार्थीहरुलाई परीक्षा हलमा प्रवेशपूर्व परीक्षामा संलग्न कर्मचारीहरुबाट व्यक्तिगत गोपनियता हनन हुने गरी चेकजाँच गरिएको भनी विभिन्न विद्यार्थी सङ्गठन तथा सामाजिक सञ्जालहरुमा प्रकाशित सामग्रीप्रति क्याम्पस प्रशासनको गम्भीर ध्यानाकर्षण भएको छ” विज्ञाप्तिमा भनिएको छ । यस बारेमा सम्बन्धित पीडित पक्षका विद्यार्थी, अभिभावक तथा जिल्लामा क्रियाशील विभिन्न विद्यार्थी सङ्गठनका प्रतिनिधिहरुसँग छलफल भइरहेको क्याम्पसले जनाएको छ ।
“छानबिन गरी दोषी प्रमाणित भएमा दोषीमाथि कारबाही गर्ने प्रतिबद्धता व्यक्त गर्दछु” विज्ञप्तिमा भनिएको छ “यस घटनाको सत्यतथ्य पत्ता लगाउन सरोकारवालाहरुसँग छलफल भइरहेकोले सम्बन्धित सम्पूर्ण पक्षहरुलाई संयमित भइदिनुहुन समेत अनुरोध गर्दछु ।”
परीक्षा हलमा प्रवेश गर्नुपूर्व चिट लिएर आएका छौ भन्दै पाइन्ट र भित्री कपडा सबै खोल्न लगाइएको छात्राहरुको आरोप छ । उनीहरु मध्ये एक जना छात्रा महिनावारी भएको र आफू संग चिट नभएको बताउँदा पनि प्याड समेत खोल्न लगाइएको उनीहरुले बताएका छन् ।
यसैगरी पब्लिक क्याम्पस प्राध्यापक सङ्घ, नेपाल एकाइ समिति मकवानपुर बहुमुखी क्याम्पसले पनि घटनाको छानविनको माग गरेको छ।
परीक्षामा सहभागी छात्रा विद्यार्थीमाथि परीक्षा केन्द्र हेटौंडा क्याम्पस, हेटौंडामा भएको घटनाको संघले विरोध जनाएको छ । यस अघि पनि समयमा उत्तरपुस्तिका तथा प्रश्नपत्र उपलब्ध नगराउने, समय अगावै उत्तरपुस्तिका लिने, अनावश्यक डर त्रास सिर्जना गरी विद्यार्थीलाई आतकिंत पार्नेलगायतका गुनासाहरू सुनिन आएको समेत उल्लेख गर्दै पब्लिक क्याम्पस प्राध्यापक सङ्घ, नेपाल मकवानपुर बहुमुखी क्याम्पस इकाइ समितिले गम्भीर ध्यानाकर्षण जनाएको छ ।

शैक्षिक संस्थाहरूमा विद्यार्थीले निर्भयतापूर्वक परीक्षामा सामेल हुन पाउनुपर्ने उल्लेख गर्दै विज्ञप्तिमा भनिएको छ “वर्षभरिको मेहनतको भाग्यरेखा कोर्ने परीक्षाहलमा भयमुक्त वातावरणमा परीक्षामा सहभागी हुन पाउनु विद्यार्थीको अधिकार हो ।”
परीक्षाको मर्यादा कायम गराउनु प्रशासनको कर्तव्य भएको तर परीक्षाको मर्यादा कायम गराउने निहुँमा परीक्षार्थीलाई आतकित पार्ने र मनोवैज्ञानिक त्रास सिर्जना गराउने कार्य कदापि क्षम्य हुन विज्ञप्तिमा भनिएको छ ।
यस प्रकारका गतिविधिहरूले विद्यार्थीलाई शैक्षिक संस्थाप्रति नै नकारात्मक सोच विकास हुने भएकाले घटनाको सत्य तथ्य जाँचबुझ गरी दोषीमाथि कार्वाहीका लागि गर्दै प्राध्यापक संघ मकवानपुर बहुमुखी क्याम्पस इकाइ समिति अध्यक्ष केशवप्रसाद तिमल्सिनाद्वारा हस्ताक्षरीत विज्ञप्तिमार्फत माग गरेको छ ।
परीक्षा सम्बन्धी कुनै ऐनले बालिकाकाे गाेप्य संबेदनशील अँगकाे खानतलासिकाे अधिकार नदीएकाे अधिवक्त्ता बालकृष्ण शर्मा अधिकारीले बताए ।
मकवानपुर । कोरोना भाइरसको संक्रमण बढेपछि जिल्ला कोभिड व्यवस्थापन समिति मकवानपुरले यसबारे चासो राखेको छ ।
समितिको आज बसेको बैठकले हेटौडा अस्पताल, हेटौडामा कोभिड १९ संक्रमित व्यक्तिहरूको निशुल्करूपमा उपचार गर्ने सम्बन्धमा कोभिड १९ को उपचारमा कार्यरत जनशक्तिहरूको म्याद थप र उपचारको शोधभर्नाको व्यवस्थाका लागि स्वास्थ्य तथा जनसंख्या मन्त्रालय, सिंहदरबार, काठमाडौं र स्वास्थ्य मन्त्रालय, बागमती प्रदेश, हेटौडालाई अनुरोध गर्ने निर्णय गरेको छ ।
विगत केही हप्तादेखि निरन्तर बढ्दै गइरहेको सन्दर्भमा सोको रोकथाम, नियन्त्रण तथा व्यवस्थापनका लागि जिल्लाभित्र स्वास्थ्य संस्थाहरूमा आवश्यक वेड, स्वास्थ्य सामाग्री, जनशक्ति, औषधी र अक्सिजनलगायतलाई तयारी अवस्थामा राख्न जिल्लास्थित अस्पताल तथा स्थानीय तहहरूलाई अनुरोध गरेको प्रमुख जिल्ला अधिकारी राजेन्द्रदेब पाण्डेले बताए ।
कोभिड १९ को परीक्षणको दायरा बढाउन स्थानीय तहहरूलाई अनुरोध गर्ने निर्णय गर्दै केन्द्रले कोभिडको संक्रमण बढ्दै गइरहेकोले जनस्वास्थ्यको मापदण्ड पालना गर्न समेत अनुरोध गरेको छ।
यसैगरी कोभिड १९ को खोप तथा बुष्टर खोप लगाउन छुटेका समूहहरूको पहिचान गरी त्यस्ता समूहलाई लक्षित गरी खोप र बुष्टर खोप कार्यक्रम अभियान सञ्चालन गर्न स्वास्थ्य कार्यालय, मकवानपुरले स्थानीय तहहरूसँग समन्वय गर्ने निर्णय गरिएको छ।
स्वास्थ्य मापदण्ड पालना गराउन स्थानीय तहहरू, स्वास्थ्य कार्यालय, मकवानपुर, मकवानपुर उद्योग वाणिज्य संघ, उद्योग संघ, मकवानपुर, नेपाल पत्रकार महासंघ र गैर सरकारी संघसंस्थाहरूलाई सन्देशमूलक जानकारी प्रचार प्रसार गर्न अनुरोध गर्ने निर्णय गरेको छ।
मदन भण्डारी स्वास्थ्य विज्ञान प्रतिष्ठानमा उच्च राजनीति, जाेशी सहित प्रसाई र चुडाल विरुद्ध रिट
मकवानपुर । प्रदेश सरकारमा राजनीतिक नेतृत्व फेरबदल भएसँगै मदनभण्डारी स्वास्थ्य विज्ञान प्रतिष्ठानमा विभिन्न आरोप प्रत्यारोपमा मुद्दा दायर गर्ने र अदालतको आदेशले पद बहाली गर्ने जुहारी चलेको छ ।
पछिल्लो पटक फेरी मंगलबार मदन भण्डारी स्वास्थ्य विज्ञान प्रतिष्ठान हेटौंडाका उपकुलपति डा. विश्वराज जोशीलगायत रजिष्टार र संयोजक विरुद्ध अदालतमा रिट दायर गरिएको छ ।
उपकुलपति जोशीले प्रतिष्ठानलाई सही नेतृत्व नदिएको र अन्य पदाधिकारीले पनि आफू अनुकुल नियमावली र कार्यविधि बनाएर प्रतिष्ठानलाई सक्रिय बनाउन पहल नगरेकाले आरोप लागउँदै उच्च अदालत पाटन हेटौंडा इजलाशमा रिट दायर गरिएको हो ।
नेकपा एकीकृत समाजवादी पार्टीको भातृ संगठन युवा संघ मकवानपुरका उपाध्यक्ष सफल अधिकारीले उच्च अदालत हेटौँडामा प्रतिष्ठानका उपकुलपति डा. जोशी, रजिस्ट्रार राजेश प्रसाईं, संयोजक चिरञ्जीवी चुडालविरुद्ध निषेधाज्ञासहितको उत्प्रेषण परमादेश माग गर्दै अदालतमा रिट दायर गरेको बताए ।
७६ वर्षका उपकुलपति जोशीले कुलपति, सहकुलपतिको निर्देशन नमानेको, शिक्षाध्यक्षले लगेका प्रस्तावहरु सुनुवाई नगरेको, डिन नियुक्त गर्नु पर्नेमा नियमावली संयोजक पद खडा गरेको आरोप लगाएका छन् ।
अन्य कुनै स्वास्थ्य विज्ञान प्रतिष्ठानमा नभएको संयोजक पद खडा गरी स्वास्थ्य विज्ञान नपढेको व्यक्ति नियुक्त गरेको अधिकारीको आरोप छ । प्रतिष्ठानको नाममा २ करोड ६० लाख रुपैयाँ बेरुजु देखिएको, ६ करोड रुपैयाँ भन्दा बढी रकम हिनामिना भएको भन्दै अख्तियारमा उजुरी पर्दासमेत प्रतिष्ठानको हितमा काम गर्न नखोजेको आरोप लगाइएको छ ।
प्रतिष्ठानको आर्थिक कारोबारको आन्तरिक लेखापरीक्षणसमेत नगराएको, प्रतिष्ठानको सभामा पनि यो विषय पेश नगरी आर्थिक बदमासी लुकाउन खोजिएको आरोप दायर रिटमा उल्लेख छ ।
उपकुलपतिले अनुभव र कानुनी मापदण्ड नपुगेका रजिस्ट्रार नियुक्तिमा पनि मौनता साँधेको प्रशासनिक र आर्थिक अनुभव नभएका व्यक्तिहरुलाई प्रतिष्ठानको रकमको कारोबार गर्न दिँदा बदमासीका अलावा बेरुजु देखिएको विषय पनि रिटमा उल्लेख छ ।
प्रतिष्ठानका पदाधिकारीहरु दायित्वबाट पन्छिएर असक्षम र अयोग्य देखिएकाले प्रतिष्ठानकै भविष्य अन्योलमा पर्ने गरी काम भइरहेकाले तत्काल रोक्न, पदाधिकारीहरुलाई पदमुक्त गरी नयाँ पदाधिकारी राखेर प्रतिष्ठानको भविष्य जोगाउन रिटमा अपिल गरिएको छ। अघिल्लो सरकारले नियुक्त गरेको ब्यक्ति हटाउने शिलशिलाको शिकार भएका उपकुलपति प्राध्यापक डा. जोशीमाथि फेरी यो मुद्दा दायर भएको हो।
प्रा.डा जोशीमाथि बागमती प्रदेश सरकारका मुख्यमन्त्री राजेन्द्र पाण्डेले छानविन गर्न समिति गठन गरिएसँगै गत १४ बैशाख २०७९ मा उनी निलम्बित भएका थिए । मुख्यमन्त्री पाण्डेले छानविन समिति गठन गरेसँगै मदन भण्डारी स्वास्थ्य विज्ञान प्रतिष्ठान ऐन २०७६ को उपदफा (३) बमोजिम उपकुलपति स्वतः निलम्बित भएका जोशीलाई २८ बैशाखमा पुनः पद बहालको लागि कानुनी बाटो खुलेको थियो ।
उपकुलपति जोशीलाई निलम्बन गर्ने बाग्मती प्रदेश सरकारको निर्णय कार्यान्वयन नगर्न सर्बोच्च अदालतले अन्तरिम आदेश दिएपछि काममा फर्केका थिए । सर्बोच्चका न्यायधिश कुमार चुँडालको इजलाशले जोशीलाई निलम्बन गर्ने निर्णय कार्यान्वयन नगर्न आदेश गरेको थियो । सर्बोच्चको अन्तरिम आदेशसंगै भिसी जोशीलाई पदमै रहेर काम गर्ने बाटो खुलेको थियो ।
प्रा.डा. जोशीलाई बागमती प्रदेशका प्रथम मुख्यमन्त्री डोरमणि पौडेलले २०७७ साल साउन १६ गते ४ बर्षे कार्यकालका लागि नियुक्त गरेका थिए । पाण्डे नेतृत्वको सरकारले अघिल्लो सरकारले नियुक्त गरेको व्यक्ति हटाउने श्रीखलाबद्व योजना रहेको र यो गलत भएको नेकपा एमालेले बताउंदै आएको छ, भने नेकपा एकीकृत समाजवादीले उनलाई पदमा रहेर काम गर्न अयोग्य भन्दै आएको छ ।
मकवानपुर । बागमती प्रदेश अन्तरगत मकवानपुर जिल्लाको मकवानपुरगढी गाउँपालिकाले विगत ५ वर्षदेखि करारमा काम गर्दै आएका कर्मचारीको करार सम्झौता नविकरण नगर्ने निर्णय गरे लगतै यसै प्रदेशको ललितपुर जिल्लाको अर्को पालिकाले पनि कर्मचारीलाइ सेवाबाट हटाएको छ ।
ललितपुरको बागमती गाउँपालिकाका यस अघि करार सम्झौतामा काम गर्दै आएका ११ जना कर्मचारीलाई सेवामा नविकरण नगर्ने भएको हो । गाउँपालिकाको कार्यपालिका बैठकले करार अवधि नथप्ने निर्णय गरेसँगै ११ जनाले सेवाबाट हट्नु पर्ने भएको छ ।
गाउँपालिकामा ४५ जना करार सेवामा कार्यरत कर्मचारी रहेकोमा ११ जनाको करार थप नभएको हो । कर्मचारीहरूलाई आजै आइतबार मात्रै करार अवधि नथप्नेबारे जानकारी गराइएको थियो ।
गाउँपालिकाको स्वास्थ्य संस्थामा काम गर्ने कर्मचारीहरूलाई समेत सेवाबाट हटाइएपछि स्वास्थ्य सेवा प्रभावित हुने भएको छ । स्वासथ्य जस्तो संवेदनशील क्षेत्रमा वर्षौंदेखि काम गरिरहेका र राज्यले प्रसूति सेवालगायतमा तालिम दिएर लगानी गरेका कर्मचारीलाई सेवाबाट हटाइदा राज्यको लगानी समेत खेर गरेको गुनासो गरिएको छ ।
गाउँपालिकाको निर्णयबाट उत्तरी मकवानपुर जिल्लाको दक्षिणभागमा बसोबास गर्ने स्थानीयहरु समेत प्रभावित हुने भएका छन् । ललितपुर जिल्लाको आश्राङ, गिम्दी, प्युटार र ठूलादुर्लुङलगायत ठाउँबाट उपचार गर्न आउने सेवाग्राही प्रभावित हुने भएका छन् । गाउँपालिकाका उपाध्यक्ष भक्तबहादुर दर्लामीले कर्मचारी धेरै भएर करार थप नभएको बताए । उनले कर्मचारी निकालेर अरू भर्ना गर्ने भन्ने तयारी नभएको दाबि गरे ।
२ दिन अघि मकवानपुर जिल्लाको मकवानपुरगढी गाउँपालिकाले डण् जना कर्मचारीलाई सेवा अवधि नथप्ने सूचना जारी गरेको थियो ।
