मकवानपुर । गीतकार किरण खरेल १ लाख राशीको पुरस्कारबाट हेटौंडामा सम्मानित भएका छन् ।
बागमती प्रदेशकाे राजधानी हेटौंडामा बिहीबार ‘बिजुलीमाया व:न श्रेष्ठ अन्तर्राष्ट्रिय सङ्गीत पुरस्कार’बाट गीतकार खरेललाई सम्मान गरिएको हो । भीम विराग सङ्गीत, साहित्य, कला प्रतिष्ठान नेपालले सम्मान तथा साङ्गीतिक कार्यक्रमको आयोजना गरि खरेललाई १७ औ सस्करणको उक्त पुरस्कार प्रदान गरिएको हो ।
व्यवसायी कन्हैयाकृष्ण श्रेष्ठले वि.सं. २०६४ मा आमा बिजुलीमाया व:न श्रेष्ठको नाममा उक्त पुरस्कार स्थापना गरेका थिए ।
२०२० को दशकमा बनेको नेपाली फिल्म माइतीघरको ‘वसन्त नै बस्न खोज्छ यहाँ … सदावहार गीतका सर्जक हुन गीतकार खरेल । नेपाली गीत लेखनको क्षेत्रमा विगत सात दशकदेखि निरन्तर कलम चलाउँदै आउनु भएका खरेलले आधुनिक गीतदेखि चलचित्र क्षेत्रमा समेत लोकप्रिय गीतहरू सिर्जना गरेका छन् । खरेलले त्यसयता सात सयभन्दा बढी गीत लेखेका छन् । माइतीघर अगाडि नै गीतकारका रुपमा नेपाली आधुनिक संगीत क्षेत्रमा परिचित भइसकेका थिए खरेलको ‘ए दूरका सितारा..’ बोलको गीत पहिलाे रचना हाे ।
खरेलले आफ्नो कलमको माध्यमबाट नेपाली गीत सङ्गीतलाई देश विदेशमा चिनाउन पुर्याएकाे योगदानको कदर गर्दै प्रतिष्ठानले यस वर्ष उक्त पुरस्कारबाट सम्मानित गर्ने निर्णय गरेको बताइएको छ ।
गीतकार खरेलका जिन्दगीलाई जीत होइन…, हिमालको काखमा छ मेरो सानो गाउँ…, मन्दिरमा छ कि मूर्तिमा माया…, तारामात्र होइन तिमीलाई… लगायतका गीतहरू कालजायी छन् ।
सोही अवसरमा खरेललाई गीतकार संघले समेत सम्मान गरेको छ । साङ्गीतिक कार्यक्रममा गीतकार खरेलका गीत गायीका निशा देसार, स्थानीय तथा दार्जिलिङका गायक पवन गोले (हावासँगै बगूँ भन्छ ..का गायक) लगायतले आफ्नो प्रस्तुतिले माहौल तताएको थिए ।
२०५९ भाद्र ७ गते स्थापना भएको प्रतिष्ठानले नेपाली सङ्गीत, साहित्य र कला क्षेत्रको उन्नयनमा देश तथा विदेशमा रहेर नेपाली वाङ्मय क्षेत्रमा उल्लेखनीय योगदान पुर्याउँदै आउनु भएका सर्जक, स्रष्टाहरूलाई सम्मान एवम् पुरस्कृत गर्दै आइरहेको छ ।
मकवानपुर । यस वर्षकाे ‘बिजुलीमाया वनः श्रेष्ठ अन्तर्राष्ट्रिय सङ्गीत पुरस्कार’ बाट गीतकार किरण खरेल सम्मानित हुने भएका छन् । भीम विराग सङ्गीत, साहित्य, कला प्रतिष्ठान नेपालले खरेललाई १ लाख राशीकाे उक्त पुरस्कारबाट हेटौंडामा आज (बिहीबार) सम्मान गर्न लागेकाे हाे ।
बिहीबार हेटौंडामा सांगीतिक कार्यक्रमसहित गीतकार खरेललाई १७ औं संस्करणकाे ‘बिजुलीमाया वनः श्रेष्ठ अन्तर्राष्ट्रिय सङ्गीत पुरस्कार’ प्रदान गरिने प्रतिष्ठानका अध्यक्ष केशवलाल श्रेष्ठ तौजलेले जानकारी दिए । व्यवसायी कन्हैयाकृष्ण श्रेष्ठले वि.सं. २०६४ मा आमा बिजुलीमाया व:न श्रेष्ठको नाममा उक्त पुरस्कार स्थापना गरेका हुन् ।
नेपाली गीत लेखनको क्षेत्रमा विगत सात दशकदेखि निरन्तर कलम चलाउँदै आउनु भएका खरेलले आधुनिक गीतदेखि चलचित्र क्षेत्रमा समेत लोकप्रिय गीतहरू सिर्जना गरेका छन् । खरेलले त्यसयता सात सयभन्दा बढी गीत लेखेका छन् । खरेलले २०२० को दशकमा बनेको नेपाली फिल्म माइतीघरको लागि लेखेकाे ‘वसन्त नै बस्न खोज्छ यहाँ’ गीत नसुनेका सायदै नेपाली होलान् ।
उमेरको ८७ औं वर्षमा रमाउँदै गरेका उनै खरेल बागमती प्रदेशकाे राजधानी हेटौंडामा सम्मानित हुने भएका हुन् । यसअघी भीम विराग सङ्गीत, साहित्य, कला प्रतिष्ठान नेपालले १७ औं संस्करणकाे उक्त पुरस्कार खरेललाई प्रदान गर्ने निर्णय गरेकाे थियाे । माइतीघर अगाडि नै गीतकारका रुपमा नेपाली आधुनिक संगीत क्षेत्रमा परिचित भइसकेका थिए । ‘ए दूरका सितारा..’ बोलको गीत उनकाे पहिलाे रचना हाे । खरेलका जिन्दगीलाई जीत होइन…, हिमालको काखमा छ मेरो सानो गाउँ…, मन्दिरमा छ कि मूर्तिमा माया…, तारामात्र होइन तिमीलाई… लगायतका गीतहरू कालजायी छन् ।
उक्त पुरस्कारबाट यसअघि अम्बर गुरूङ , प्रेमध्वज प्रधान, भक्तराज आचार्य, फत्तेमान राजभण्डारी, शान्ति ठटाल, दीप श्रेष्ठ, प्रकाश श्रेष्ठ, न्हुच्छेबहादुर डङ्गोल, मीरा राणा, कर्म योञ्जन, चेतन कार्की, दावा ग्याल्मो, दीपक जंगम, किरण प्रधान, राजेन्द्र थापा र निर शाह सम्मानित भइसकेका छन् ।
चारवटा गीत संग्रह प्रकाशित गरेका खरेलले तत्कालीन शाही नेपाल चलचित्र संस्थान तथा रेडियो नेपालको कार्यक्रम निर्माता तथा सञ्चालकको रुपमा जिम्मेवारी सम्हालेका थिए । छिन्नलता गीत पुरस्कारलगायत विभिन्न पुरस्कार एवम् विभूषणबाट विभूषित खरेलले आफ्नो कलमको माध्यमबाट नेपाली गीत सङ्गीतलाई देश विदेशमा चिनाउन पुर्याएकाे योगदानको कदर गर्दै प्रतिष्ठानले यस वर्ष उक्त पुरस्कारबाट सम्मानित गर्न लागेको जनाएको महासचिव छवि अनित्यले बताए ।
कार्यक्रमकाे तयारी पुरा भएकाे तथा खरेलका साथमा गीतकारहरु राजेन्द्र थापा तथा बी.बी. थापा र नारायणगोपाल प्रतिष्ठानका अध्यक्ष दिपक केसी समेत हेटौडा आइपुगेका छन् । सांगीतिक कार्यक्रममा गायिका निशा देशारसँगै दार्जिलिङबाट गायक पवन गोले समेतकाे सहभागिता रहने आयोजकले जनाएकाे छ । यसका साथै स्थानीय कलाकारहरुकाे समेत प्रस्तुति रहने बताइएकाे छ ।
प्रतिष्ठानले तुलसीमाया–शिवकुमारी सिर्जनशील नारी पुरस्कार, भीम विराग युवा सङ्गीत पुरस्कार, भीम–मथुरा बाल प्रतिभा पुरस्कार, कमला–भवानी सङ्गीत पुरस्कार, शीला नारी सङ्गीत पुरस्कार, हर्षनर बज्राचार्य स्मृती स्वर्ण पुरस्कार, विजय बानियाँ स्मृति लोक सङ्गीत पुरस्कार, चिनुकुमारी लामा स्मृति साहित्य पुरस्कार, मंगलादेवी श्रेष्ठ स्मृति स्वास्थ्य सेवा पुरस्कार, अजित सेन गुप्ता स्मृति भिन्न क्षमता पुरस्कार प्रदान गर्दै आएकाे प्रतिष्ठान महासचिव अनित्यले जानकारी दिए ।
२०५९ भाद्र ७ गते स्थापना भएको प्रतिष्ठानले नेपाली सङ्गीत, साहित्य र कला क्षेत्रको उन्नयनमा देश तथा विदेशमा रहेर नेपाली वाङ्मय क्षेत्रमा उल्लेखनीय योगदान पुर्याउँदै आउनु भएका सर्जक, स्रष्टाहरूलाई सम्मान एवम् पुरस्कृत गर्दै आइरहेको प्रतिष्ठानका अध्यक्ष श्रेष्ठले जानकारी दिए ।
मकवानपुर । २०८२ फागुन २१ गतेकाे लागि ताेकिएकाे प्रतिनिधि सभा निर्वाचनमा मकवानपुरकाे क्षेत्र नम्बर २ मा नेकपा एमालेबाट उम्मेदवारी दर्ता गराएका महेश कुमार बर्तौलाले चुनावी अभियान सुरु गरेका छन् । बर्तौलाले १०४ वर्षीया जेष्ट नागरिक कालिमाया मोक्तानको हातबाट टिका र आर्शिवाद लिएर चुनावी अभियान सुरु गरेका हुन् ।
बर्तौलाले सोमबार हेटौंडा उपमहानगरपालिका वडा नं. ३ बसामाडी स्थित जम्बु चौतारीमा कालिमायाको हातबाट आर्शिवाद ग्रहण गरेर चुनावी अभियान सुरु गरे । १०४ वर्षकी कालिमायाले बर्तौलालाई टीका, माला र खादा लगाउँदै जीतको शुभकामना दिइन् । राक्सिराङ गाउँपालिका स्थायी घर भएकी कालिमाया र उनका परिवार अस्थायी रुपमा बसामाडीमा बस्दै आएका छन् ।
जिउँदो भगवानको रुपमा रहेको जेष्ठ नागरिक आमाको हातबाट आर्शिवाद ग्रहण गरेर पार्टीको औपचारिक चुनावी कार्यक्रमको अभियान जम्बु चौतारीबाट सुरु गरिएको बर्तौलाले बताए । उनले २०७९ को निर्वाचनमा विजयी गराएर पठाएपछि निर्वाचन क्षेत्र र सिंगो मकवानपुरको लागि विभिन्न विकासका योजनाहरु ल्याउन सफल भएको बताए । सांसद निर्वाचित भएर काम गरिरहँदा ३२ महिनामै संसद विगठन भएपश्चात् काम गर्न बाँकी योजनाहरु पूरा हुन नसकेको बताए । ती योजनाहरु पूरा गर्नका लागि दोस्रो पटक अवसर दिनु बर्तौलाले आग्रह गरे । औपचारिक उद्घाटन पश्चात् अब चुनावी भेटघाटलाई तीव्रता दिइने बर्तौलाले बताए ।
कार्यक्रमा नेकपा एमाले मकवानपुरका उपाध्यक्ष हिदम लामाले देश जलाउनेहरु विरुद्धको चुनाव भएको कारण सोचेर देश बनाउनेहरुलाई मतदान गर्नुपर्ने बताए । देश बनाउने एमाले भएकाेले बहुमतको साथ विजय गराउनैपर्ने चुनाव भएको बताए । ‘पछिल्लो समय गाउँ बस्तीमा नकारात्मक भ्रमहरु सिर्जना भैरहेका छन्,’ लामाले भने, ‘राज्यको सम्पत्तिमा आगो लगाएर, राज्यको सम्पत्ति खर्च हुनेगरी ३२ महिनामै प्रतिनिधि सभालाई विघठन गर्ने काम भयो । त्यसैले मत दिनुअघि सोचेर मात्रै मतदान गरौँ ।’
नयाँ दल भनेर मतदातामा भ्रम फैलाए पनि विकासका कामहरु सबै पूराना दलले गरेको लामाले बताए । एमालेका युवा, शिक्षित, शालिन र देशभक्त युवा उम्मेदवारलाई जिताएर मकवानपुर–२ मा आफ्नो अधिकार सुनिश्चित गर्न लामाले अनुरोध गरे । नेकपा एमालेकी केन्द्रीय सदस्य भारती पाठकले बर्तौलाले गत निर्वाचनमा निर्वाचित भएर गएपछि गरेका कामहरु, सदनमा उठाएका आवाजलाई आधार मानेर मतदान गर्नुपर्ने बताइन् । मकवानपुरका समस्यालाई संघीय संसदमा उठाएर केन्द्रीय स्तरमै ध्यानाकर्षण गराउन सक्ने सक्षम उम्मेदवार एमालेले अघि बढाएको कारण यो पटक मकवानपुर–२ मा बर्तौला बाहेक अरुलाई मत दिन नहुने बताइन् ।
निर्वाचन आचार संहिताका कारण फागुन ४ अघि कुनै सभा, समारोह, आमसभा लगायतका कार्यक्रम भने नगरिने एमाले मकवानपुरले जनाएकाे छ । बर्तौलाले २०७९ को प्रतिनिधि सभा निर्वाचनमा यसै क्षेत्रबाट गठबन्धनका उम्मेदवार विरोध खतिवडालाई ४ हजार मतान्तरले पराजित गरेका थिए ।
मकवानपुर । हेटौंडा बजार क्षेत्रकाे सडक फराकिलो बनाउने क्रममा घरटहरा भत्काइएकाे विषयसँग सम्बन्धित विवादमा सर्वोच्च अदालतले सरोकारवाला निकायबाट आवश्यक कागजात पेश गर्ने आदेश दिएको छ ।
सोमबार न्यायाधीश विनोद शर्मा र शान्तिसिंह थापाको संयुक्त इजलासले यसअघि माग गरिएका अभिलेख उपलब्ध नभएको जनाउँदै सडक विस्तारसम्बन्धी निर्णय, प्रक्रिया र आधारसँग जोडिएका सम्पूर्ण मिसिल फाइल अदालतमा पेश गर्न निर्देशन दिएको हो ।
अघिल्ला आदेशअनुसार कागजात नआएपछि पुनः मिसिल झिकाउने आदेश जारी गरिएको सर्वोच्च प्रशासनले जनाएकाे छ । सडक विस्तारसम्बन्धी कानुनी प्रक्रिया, निर्णय र अधिकारसँग जोडिएका कागजातको अध्ययनपछि मात्र थप सुनुवाइ अघि बढाइने सर्वोच्च अदालतको आदेशमा उल्लेख छ ।
हेटौंडा बजार क्षेत्रमा सडक विस्तारको काम अघि बढाइएपछि राष्ट्रिय स्वतन्त्र पार्टीकी नेतृ तथा पूर्वसांसद विन्दवासिनी कंसकारसहित छ जना स्थानीयले सम्पत्तिको अधिकार उल्लंघन भएको र क्षतिपूर्ति नदिइएको भन्दै सर्वोच्च अदालतमा रिट निवेदन दर्ता गराएका थिए । डिभिजन सडक कार्यालय हेटौंडा, हेटौंडा उपमहानगरपालिका र जिल्ला प्रशासन कार्यालय मकवानपुरलगायत निकायले सडक विस्तार प्रक्रिया अघि सारेपछि प्रभावित पक्ष मङ्सिर १६ गते सर्वोच्च अदालत पुगेका थिए । सो रिटमा सडक विभाग, सहरी विकास मन्त्रालय तथा भौतिक पूर्वाधार तथा यातायात मन्त्रालयलाई समेत विपक्षी बनाइएको छ ।
यसअघि सर्वोच्च अदालतले मङ्सिर ९ गते अल्पकालीन अन्तरिम आदेश जारी गरेको थियो । त्यसपछि मङ्सिर २६ गते न्यायाधीश मेघराज पोखरेलको इजलासले विपक्षीका नाममा कारण देखाऊ आदेश जारी गर्दै अन्तरिम आदेशलाई निरन्तरता दिएको थियो । सोही दिन न्यायाधीश कुमार रेग्मी र महेश शर्मा पौडेलको इजलासबाट पनि मिसिल झिकाउने आदेश भएको थियो ।
गत मंसिर २० गते शनिबार बिहान ५ बजेबाट हेटौंडा बजारको राप्ती रोडबाट बुद्धचोक, मेन रोड हुँदै कर्रा, पशुपतिनगर, रातोमाटे तथा बुद्धचोकबाट पिपल बोट, चौकीटोल ओरालोसम्म सडक विस्तारको लागि घर टहरा भत्काइसकिएको छ । शनिबार बिहान ५ बजेबाट साँझ ५ बजेसम्म (१२ घण्टा) सडक कार्यालयले १० वटा मेसिन प्रयोग गरेर घर तथा टहरा भत्काएको थियो ।
डिभिजन सडक कार्यालयले ५ मंसिरमा सार्वजनिक सूचनामार्फत महेन्द्र राजमार्गकाे रातोमाटेदेखि बुद्धचोक हुँदै राप्ती पुलसम्म तथा त्रिभुवन राजपथकाे बुद्धचोकदेखि सामरी पुलसम्म सडकको दायाँ–बायाँ २५–२५ गज क्षेत्रभित्र पर्ने संरचना हटाउन आग्रह गरेकाे थियाे ।
मकवानपुर । नेकपा एमाले मकवानपुरले २ हजार २५ सदस्यीय निर्वाचन परिचालन समिति गठन गरेकाे छ । एमाले मकवानपुरकाे बैठकले मकवानपुर ईञ्चार्ज तथा प्रतिनिधिसभाका उम्मेदवार रामेश्वर रानाकाे संयाेजकत्वमा २ हजार २५ सदस्यीय प्रतिनिधिसभा निर्वाचन परिचालन समिति गठन गरेकाे हाे ।
आगामी २१ फागुनकाे लागि ताेकिएकाे प्रतिनिधि सभा निर्वाचनकाे लागि गठन गरिएङ्काे परिचालन समितिमा केन्द्रीय कमिटी सदस्य, केन्द्रीय निकायका सदस्य, प्रदेश कमिटी, प्रदेश निकाय सदस्य, जिल्ला कमिटी सदस्यहरू, जिल्ला लेखा कमिटीका सदस्यहरू, जिल्ला सल्लाहकार सदस्यहरू, जेष्ठ कम्युनिष्ट मञ्चका सदस्यहरू, पालिका तथा ईलाका कमिटीका सदस्यहरू, पालिका लेखा कमिटीका सदस्यहरू, वडा कमिटीका पदाधिकारीहरू, निर्वाचित जनप्रतिनिधि सबै,जनसंगठनका केन्द्र, प्रदेश, जिल्ला, पालिकाका पदाधिकारी, स्ववियुमा निर्वाचित पदाधिकारी र सदस्यहरू रहेका छन् ।
निर्वाचन परिचालन कमिटीकाे सचिवमा पार्टी जिल्ला उपाध्यक्ष हिदम लामा रहेका छन् । यस्तै ७७ सदस्यीय निर्वाचन परिचालन कमिटीकाे सचिवालय समिति समेत गठन गरिएकाे जिल्ला उपाध्यक्ष लामाले जानकारी दिए । पूर्व मूख्यमन्त्री डाेरमणि पाैडेलकाे संयाेजकत्वमा निर्वाचन परिचालन अनुगमन समिति, प्रतिनिधिसभा १ नं. क्षेत्र निर्वाचन परिचालन समितिकाे संयाेजक एकालाल श्रेष्ठ, सहसंयाेजक नवीन सिग्देल र कमल विष्ट, सचिव अनिल बानियाँ रहेका छन् ।
यसैगरी प्रतिनिधिसभा २ नं. क्षेत्र निर्वाचन परिचालन समितिकाे संयाेजक भारती पाठक, सहसंयाेजक बलराम बल र राजाराम स्याङ्तान र सचिव मेम्मर लाेलाई जिम्मेवारी दिईएकाे छ । निर्वाचन परिचालनकाे प्रचार समिति संयाेजकमा नवीन सिग्देललाई जिम्मेवारी दिइएकाे छ भने अनन्त पाैडेलकाे संयाेजकत्वमा निर्वाचन घाेषणा पत्र निर्माण समिति गठन भएकाे छ । आर्थिक व्यवस्थापन संयाेजक गाेपाल श्रेष्ठ, प्रशासनिक संयाेजन हिदम लामा, जनसाँस्कृतिक संयाेजक देवराज रिमाल, प्रचार सामग्री व्यवस्थापन संयाेजक सीता विष्टलाई जिम्मेवारी दिइएकाे एमाले मकवानपुरले जनाएकाे छ ।
यस्तै कार्यालय सञ्चालन व्यवस्थापन आरती पाठक, भूगाेल बाहिर रहेका मतदाता समन्वय समिति फूर्वादाेर्जे लामा, कानूनी परामर्श संयाेजक मदन दाहाल, उम्मेदवार फाेकल पर्सन १ नं. क्षेत्र दिलु घर्ती, २ नं. क्षेत्र आशिष अस्लामीलाई ताेकिएकाे पार्टीले जनाएकाे छ । बैठकले १० वटा पालिका, २ ईलाका कमिटी र १ सय २ वटा वडामा समेत निर्वाचन परिचालन समितिकाे संयाेजक, सहयाेजक र सचिव ताेकेकाे छ । माघ महिनाभित्र सबै जनसंगठनकाे जिल्ला र पालिकास्तरमा निर्वाचन सहयाेग समिति बनाउने तथा १० पालिका, २ ईलाकामा र १ सय २ वडामा निर्वाचन परिचालन समितिकाे कार्यालय स्थापना गरि कार्य अगाडि बढाउने निर्णय गरेकाे उपाध्यक्ष लामाले बताए ।
जिल्ला उपाध्यक्ष हिदम लामाकाे अध्यक्षतामा बसेकाे बैठकमा पार्टी केन्द्रीय सचिव महेश बस्नेतकाे प्रमुख आथित्यता, केन्द्रीय सदस्यहरू रामेश्वर राना, महेशकुमार बर्ताैला, भारती पाठक, एकालाल श्रेष्ठ, केन्द्रीय लेखा आयाेगका सदस्य नवीन सिग्देल, प्रदेश कमिटीका अध्यक्ष कैलाश ढुङ्गेल, प्रदेश कमिटीका उपसचिव भक्तकुमारी लामा, प्रदेश कमिटीका सदस्यहरूकाे उपस्थिति रहेकाे थियाे ।