मकवानपुर । मकवानपुरको कैलाश गाउँपालिकाले ६ जना महिलालाई सम्मान गरेको छ । पालिकाले चेलि प्रोत्साहन कार्यक्रम अन्तरगत बुधबार ६ जना महिला चेलीलाई सम्मान गरेको हो ।
पालिकाले कैलाश ६ की संगिता ढुंगाना, प्रतिभा अर्याल र लक्ष्मी श्रेष्ठ, कैलाश १० का सरुया प्रजा र उर्मिला थिङ र कैलाश २ कि लक्ष्मी मुक्तानलाई गाउँपालिकाका अध्यक्ष लोकबहादुर मुक्तान र उपाध्यक्ष बालकुमार मल्ल ठकुरीले नगद २० हजार र सम्मानपत्र सहित सम्मान गरेका हुन् । ‘विवाह अघि कम्तिमा पनि १० जोड २ पास गर्नुपर्छ र २० बर्ष पूरा हुनुपर्छ भन्ने सन्देश दिनका लागि प्रोत्साहन कार्यक्रम राखिएको हाे’ गाउँपालिका अध्यक्ष मुक्तान भने– ‘चेली सम्मान देशभरका स्थानीय तहहरुमध्ये पृथक कार्यक्रमको सुरुवात गरेका छाैं ।’
पालिकाको बार्षिक नीति तथा कार्यक्रममा समाबेश भएकाे यो कार्यक्रमले “गाउँघरमा छोरीलाई वालविवाह गर्ने, पढाइबाट बञ्चित गर्ने चलन अझै रहेको र यस्ता कार्यक्रमले सकारात्मक सन्देश जाने कुरामा विश्वास लिएकाे अध्यक्ष मुक्तानले बताए ।
सम्मान कार्यक्रममा पालिका उपाध्यक्ष ठकुरीले आगामी वर्षबाट कार्यक्रमलाई अझै बृहत रुपमा विस्तार गरिदै लगिने बताए । त्यसैगरी प्रमुख प्रशासकिय अधिकृत अशोक बिष्टले वालविवाह अन्त्यका लागि पालिकाले चेली सम्मान सहित अन्य कार्यक्रम समेत गर्दै आएकाे जानकारी दिए ।
गाउँपालिका सामाजिक बिकास समिति संयोजक राजेन्द्र घिसिङले यो बर्ष ६ जनालाई सम्मान गरेजस्तै अर्काे बर्ष अझ धेरै चेली सम्मान गर्ने वातावरणका लागि आ–आफ्नो क्षेत्रबाट सबैले काम गर्नुपर्ने बताए । सम्मानित चेलीहरुले गाउँपालिकाले प्रोत्साहन कार्यक्रम मार्फत सम्मान गरेकोमा आफूहरु उत्साहित भएकाे र सामाजिक समस्याको रुपमा रहेको वालविवाह, विद्यालय नजाने जस्ता समस्या समाधनमा लाग्न उर्जा मिलेको बताएका छन् ।
मकवानपुर । टोलविकास संस्था नगर समन्वय समिति हेटौंडा उपमहानगरपालिकाले हेटौंडामा विश्व वातावरण दिवस ७ दिन बिबिध कार्यक्रम गरी मनाउने भएको छ । समितिले उपमहानगरपालिकामा ५१ औं विश्व वातावरण दिवस सप्ताहब्यापी कार्यक्रम आयोजना गरी मनाउने भएको हो ।
“प्लाष्टिकजन्य प्रदूषण निमूल पारौं, वातावरणमैत्री विकल्पको उपयोग गरौं ” भन्ने मुल नाराका साथ जेष्ठ १६ गते देखि जेष्ठ २२ गतेसम्म सप्ताहव्यापी कार्यक्रम आयोजना गरिने मुल आयोजक समारोह समितिका संयोजक ध्रुव प्रसाद अधिकारीले जानकारी दिए ।
सप्ताहव्यापी कार्यक्रम अन्तर्गत पहिलो दिन जेठ १६ गते मंगलबार राप्तिखोला सरसफाई र वातावरण संरक्षण सम्बन्धि चेतना मुलक टिकटक प्रतियोगिता आयोजना गरिने छ । दोस्रो दिन अर्थात जेठ १७ मा पर्यावरण संरक्षण सम्बन्धी खुल्ला कविता प्रतियोगिता र सार्वजनिक सवारी साधानमा स्टिकर टास्ने तथा डस्बिन बितरण कार्यक्रम गरिनेछ । त्यस्तै तेस्रो (जेठ १८) मा वातारण संरक्षण तथा लागुपदार्थ दुव्र्यसनी बिरुद्द सडक नाटक प्रदर्शनी र ४० माईक्रोन भन्दा कमको प्लाष्टिक झोलामा लगाईएको प्रतिबन्ध सम्बन्धि सरोकारवालाहरुसंग अन्तरक्रिया कार्यक्रम गरिने अधिकारीले जानकारी दिए ।
त्यसैगरी रक्तदान कार्यक्रम, बाल क्लब स्तरीय वकृत्वकला प्रतियोगिता र हेटौंडाको हुप्राचौर र राजपानीमा वृक्षारोपणको कार्यक्रम चौथो दिन जेठ १९ गते हुनेछ । पाँचौ दिन जेठ २० गते सफा हेटौंडा अभियान अन्तर्गत उमहानगरको १९ वडामा सरसफाई कार्यक्रम र वातावरण सचेतना सम्बन्धी साईकल र्याली तथा सम्मान कार्यक्रम हुने उनले बताए । जेठ २१ छैठौँ दिनमा म आफ्नै डस्टबिन बोक्छु अभियान अन्तर्गत नगरका विद्यालयहरुमा सचेतना मुलक कार्यक्रम गरिने छ भने खेर गएका वस्तुहरुबाट उत्पादित सामग्रीको नगर विद्यालय स्तरीय प्रतिस्पर्धा गराइने छ ।
सप्ताहव्यापी कार्यक्रमको अन्तिम दिन जेठ २२ गते कपडाको झोला वितरण र उत्कृष्ट टोल विकास संस्थालाई पुरस्कृत गरिने छ भने बाजा तथा झाकी सहितको वातावरण सचेतना सम्बन्धी र्यालीले नगरपरिक्रममा गरिनेछ । नगरपरिक्रममा गरी हेटौंडाको हुप्राचौरमा एक सहमारोहबीच सप्ताहव्यापी कार्यक्रमको समापन गरिने संयोजक अधिकारीले जानकारी दिए । सप्ताहव्यापी कार्यक्रम अन्तर्गत भएका प्रतियोगितामा विजयी तथा सहभागीलाई समापन कार्यक्रमको दिन पुरस्कार वितरण तथा सम्मान अधिकारीले बताए ।
सप्ताहव्यापी कार्यक्रमलाई सव्य र भव्य बनाउनका लागि टोल विकास संस्था, विद्यालय, खेलकुद संघसंस्था, क्लब, आमा समुह, स्वयंसेविका, धार्मिक, जातिय तथा सांस्कृतिक समूह, संचारकर्मी र नागरीक समाजका व्यक्तित्वहरुसंग समन्वय गरिएको उनले जानकारी दिए ।
मकवानपुर । मकवानपुरका भूमिहीन तथा अव्यबस्थित बसोबासीहरुले जनस्तरबाट सरकारकाे ध्यानाकरकर्षण गराउन थालेका छन् । निर्वाचनकाे समयमा भाेट माग्न आउँदा लालपूर्जा दिलाउने आश्वासन मात्र दिने गरेकाे बन्दै उनीहरुले नेताहरुलाई भाेट बैक मात्रै बनाइरहने कि लालपूर्जा दिने भन्दै प्रश्न गरेका छन् ।
मकवानपुरकाे पश्चिमक्षेत्रकाे मनहरी गाउँपालिकामा रहेको भूमिहीन तथा अब्यवस्थित बसोबासीहरुले जनस्तरबाट बृहद् प्रदर्शनी गरी सरकारको ध्यानाकर्षण गराएका छन् । उनीहरुले तीन किलोमिटर दूरी सडक जाम गरेरै ¥याली निकालेका छन् भने लालपुर्जा दिलाउने प्रक्रिया नै रोक्न खोज्ने पर्सा राष्ट्रिय निकुन्जलाई ऐन कानून ठूलो कि, जनताको माग ठूलो भन्दै चेतावनी दिएका छन् ।
मनहरीमा भूमिहीनहरुले सरोकारवालालाई बोलाएर मागका सम्बन्धमा प्रतिबद्धता माग गरे भने आफूहरुकाे माग पूरा नगर्ने भए मनहरी निर्वाचनमा ‘भोट बैँक’ का लागि मात्रै होइन भन्ने सन्देश दिएका छन् । संघीय सांसद महेशकुमार बर्ताैला, बागमती प्रदेशको सामाजिक विकास मन्त्री कुमारी मोक्तान, प्रदेश सांसद इन्द्रबहादुर बानियाँ, संविधानसभा सदस्य राजाराम स्याङ्तान, बागमती प्रदेशका पूर्व राज्यमन्त्री सन्तबहादुर चेपाङ, पूर्व सांसद ओमबहादुर ग्लान, कैलाश गाउँपालिका अध्यक्ष लोकबहादुर मुक्तान र मनहरी गाउँपालिका अध्यक्ष रन्जन कालाखेतीसहितलाई साक्षी राखेर ‘भोट बैँक’ को रुपमा मात्र मनहरीलाई नलिन चेतावनी दिएका हुन् ।
यसरी जनस्तरबाट प्रश्न उठिरहँदा नेपाली काँग्रेसका जिल्ला सभापति बुद्ध लामा, नेकपा एमाले मकवानपुरका अध्यक्ष तथा पूर्वमन्त्री एकालाल श्रेष्ठ, राष्ट्रिय भूमि आयोगका अध्यक्ष समेत रहनु भएका नेकपा एकीकृत समाजवादी जिल्ला अध्यक्ष बिष्णुप्रसाद दाहाल, माओवादी केन्द्रका बागमती प्रदेश सदस्य बीरबहादुर घलान ज्वाला लगायतका जिल्लास्तरका नेता पनि सहभागी थिए ।
भूमिहीनको तर्फबाट हरिचन्द्र शाही ठकुरीले संघीय सांसद, प्रदेशका मन्त्री र सांसद तथा स्थानीय सरकारलाई छुट्टा छुट्टै प्रश्न गरे ‘तपाईहरु कानमा तेल हालेर बस्नु भएको हो कि ? काम पनि गर्नुहुन्छ ?’ ‘हरेक ठाउँमा राजनीति गर्नका लागि गठबन्धन गर्न मिल्छ भने लालपुर्जा प्रदान गर्न किन गठबन्धन गर्नुहुन्न ?’ शाहीले भने । भूमिहीन सुकुम्बासी अब्यवस्थित बस्ती संघर्ष समितिका संयोजक क्षेत्रबहादुर मुक्तानले पर्सा राष्ट्रिय निकुन्जले अबरोध खडा गरेकाले अबरोध हटाएर तत्कालै लालपुर्जाको प्रक्रिया सुरु गर्नुपर्ने बताए । उनले दिखित दस्ताबेज प्रस्तुत गर्दै भने–‘राष्ट्रिय भूमि आयोग गठन भएर स्थानीय सरकारले लालपुर्जाका लागि गरेको प्रयत्नमा समेत निकुन्जको तर्फबाट पत्राचार गरी किन अबरोध गरियो ?’ यसको जबाफ भूमिहीनले खोजेकाेले सडक संघर्षको मैदानमा आफूहरु उत्रिएको उनले जानकारी दिए।
मकवानपुर क्षेत्र नं. २ का संघीय सांसद महेश कुमार बर्ताैलालले आफूले नवनियुक्त वन तथा वातावरण मन्त्रीलाई मध्यवर्तीका देशभरिका समस्या हल गर्नका लागि वार्ता गर्न समय मागेको र त्यसबेला संघर्ष समितिका प्रतिनिधिशरुलाई पनि लिएर भेट्न जाने प्रतिबद्धता जनाए । ‘म तपाईहरुले भनेजस्तो कानमा तेल हालेर बसेको छैन’, बर्तौलाले भने– ‘सम्मानित सदनमा यहाँको समस्या जस्ताको त्यस्तै उठाइरहेको छु र अब विवेक प्रयोग गरेर आपसी सहमति कायम गरी यो गाँठोलाई फुकाउनुपर्नेछ ।’
बागमती प्रदेश सरकारी सामाजिक विकास मन्त्री कुमारी मोक्तानले प्रदेश भरकै समस्या समाधानका लागि सरकार सक्रिय रहेको बताइन् । उनले मध्यवर्ती क्षेत्रमा पर्ने मकवानपुरका केही स्थानीय तहका वडाहरुका समस्या समाधानका लागि ऐन नै संशोधन गर्नुपर्ने अबस्था रहेको र त्यो समस्याको समाधानका लागि सहजीकरण गर्ने प्रतिबद्धता जनाइन् । त्यसैगरी बागमती प्रदेश सांसद इन्द्रबहादुर बानियाँले लालपुर्जा प्राप्त हुने ठोकुवा गर्दै जनस्तरबाट कुरा उठ्न अझै ढिला भएको टिप्पणी गरे । ‘मध्यवर्ती क्षेत्रभित्रका बासिन्दाको जग्गा नापी नहुने भन्ने कुरा बाहिर आएपछि तपाईहरु तात्तिनु भएको हो’, उनले भने–‘तपाईहरु यसरी तात्तिएपछि हामीलाई पनि काम गर्न सजिलो भएको छ, हामी पनि ऐन संशोधनका लागि घच्घच्याउने छौँ ।’ बानियाँले भूमिहीनको समस्या समाधानका लागि रकम संकलन गरेर दुरुपयोग नगर्न समेत आग्रह गरे ।
संविधानसभा सदस्य राजाराम स्याङ्तान, बागमती प्रदेशका भौतिक पूर्वाधार विकास राज्यमन्त्री सन्तबहादुर चेपाङ, जिल्ला समन्वय समिति मकवानपुरका प्रमुख ललित घलान, राष्ट्रिय भूमि आयोगका अध्यक्ष बिष्णुप्रसाद दाहाल, मनहरी गाउँपालिका अध्यक्ष रन्जन कालाखेती, नेपाली काँग्रेस मनहरीका सभापति प्रकाश बर्ताैला लगायतले आन्दोलनप्रति प्रतिबद्धता ब्यक्त गरेका थिए ।
मनहरी ७ मनकामना मन्दिर परिसरमा अन्तरक्रिया कार्यक्रम सुरु हुनुअघि रमन्टार र सिमपानीबाट छुट्टाछुट्टै ¥यालीको आयोजना भएको थियो । ¥यालीमा सहभागी सयौँका संख्याका भूमिहीनहरुले लालपुर्जाको माग गर्दै भ्रष्टाचार विरुद्ध समेत नाराबाजी गरेका थिए । स्वतस्फूर्त रुपमा नागरिकको तहबाट आन्दोलन थालिएको र यसले निरन्तरता पाउने संघर्ष समितिका संयोजक क्षेत्रबहादुर मुक्तानले बताए ।
मनहरीका भूमिहीन तथा अव्यबस्थित बसोबासीहरुले मुद्दामा महेश कुमार बर्तौलाले के भने हेर्नुहाेस
मकवानपुर । मकवानपुरकाे मनहरी गाउँपालिका ९ रजैयामा मिनीट्रकले हात चुडाल्दा मृत्यु भएकाे पुरुषकाे पहिचान खुलेकाे छ । मृत्यु हुनेमा भारतको विहार बेतिया–१२ का १८ वर्षीय पोशन शेख रहेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिए ।
शनिबार बिहान ११ बजेर २५ मिनेटको समयमा मनहरी ९ रजैया स्थित पूर्व पश्चिम राजमार्गमा हेटौँडाबाट चितवनतर्फ जाँदै गरेको ग १ क २२९७ नम्बरको मिनि ट्रकले विपरित दिशाबाट आउँदै गरेको बा ३ ख ८३९४ नम्बरको बसमा सवार शेखले झ्यालबाट हात बाहिर निकाल्दा ठक्कर दिएकाे थियाे ।
मिनी ट्रकले ठक्करबाट हात चुडिएर गम्भीर घाइते भएका शेखलाई उपचारको लागि हेटौंडा अस्पतालमा ल्याइएकोमा शनिबार दिउँसो १२ बजेको समयमा डाक्टरले मृत घोषणा गरेका थिए । प्रहरीका अनुसार बस चालकको सिटभन्दा पछाडी सिटमा बसेका शेखले झ्यालबाट हात बाहिर निकालिरहेको अवस्थामा ट्रकले ठक्कर दिँदा दाहिने हातको पाता भन्दा मुनिको भाग चुडिएकाे चुडालेको दिएको थियो । मिनी ट्रक र चालक प्रहरी नियन्त्रणमा रहेको र थप अनुसन्धान भइरहेको प्रहरीले जनाएको छ ।
मिनि ट्रकले हात चुडाल्दा १ जनाको मृत्यु
Tags: No Comments
मकवानपुर । मकवानपुरको मनहरी गाउँपालिका ९ रजैयामा मिनिट्रकले बसमा सबार १ जनाको हात चुडाल्दा मृत्युु भएको छ ।
शनिबार बिहान साडे ११ बजेको समयमा मनहरी -९ रजैया स्थित पुर्व-पश्चिम सडकखण्डमा हेटौडाबाट चितवन तर्फ जादै गरेको ग १ क २२९७ नम्बरको मिनी ट्रकले चितवनबाट हेटौंडा आउदै गरेको बा ३ ख ८३९४ नम्बरको बसमा सबार ब्यक्तिले हात झ्यालबाट बाहिर निकालेको अबस्थामा चुडालेको थियो ।
बसमा सवारी चालकको सिट भन्दा पछाडी बसी झ्यालबाट हात बाहिर निकालेको अबस्थामा नाम थर नखुलेको अन्दाजी ३०/३२ वर्षको पुरुष ब्यक्तिको दाहिने हातको पाता भन्दा मुनिको भाग मिनी ट्रकले चुडालेको इलाका प्रहरी कार्यालय नेवारपानीका प्रहरी नायब निरीक्षक भीमप्रसाद दुलालले जानकारी दिए ।
मिनी ट्रकले हाल चुडालिदिएको ब्यक्तिलाई चुडिएको हात सहित उक्त बसमा थप उपचारका हेटौंडा अस्पतालमा ल्याइएकोमा उपचारमा संलग्न डाक्टरले मृत्युु घोषणा गरेको जिल्ला प्रहरी कार्यालय मकवानपुरका प्रवक्ता टेक बहादुर कार्कीले जानकारी दिए ।
मिनी ट्रक र चालक प्रहरी नियन्त्रणमा रहेको र थप अनुसन्धान भइरहेको प्रहरीले जनाएको छ ।