मकवानपुर । मकवानपुरकाे हेटौंडामा शुक्रबारबाट सञ्चालन भएकाे बृहत खेलकुद, कृषि तथा पर्यटन महोत्सव अन्तर्गत पहिलो दिन आज जिल्लास्तरीय महिला तथा पुरुष १० किलोमिटर खुला दौड प्रतियोगिता भएको छ ।
हेटौंडामा भएकाे १० किलोमिटर दौड प्रतियोगितामा पुरुषतर्फ राक्सिराङ १ का सुवास हेमजन प्रथम भएका छन् भने महिलातर्फ हेटौंडा १३ की साधना लोप्चन प्रथम भइन् । हेमजनले अन्य २२ प्रतिस्पर्धीलाई उछिन्दै प्रथम स्थान हाँसिल गरेका हुन् । दौडमा मनहरी ८ का सन्दिप विक द्वितीय र बकैया ८ का राजकुमार गोले तृतीय भए ।
यस्तै महिलातर्फ लोप्चनले अन्य ६ प्रतिस्पर्धीलाई पछि पार्दै दौडको उपाधि जितेकी हुन् । महिलातर्फ हेटौंडा १३ कै अमृता मोक्तान द्वितीय, हेटौंडा ४ की सुविना गोले तृतीय र राक्सिराङ १ की निलिमा थिङ सान्त्वना भइन् । दुवैतर्फको प्रथम, द्वितीय, तृतीय र सान्त्वना हुनेलाई क्रमशः २० हजार, १० हजार, ५ हजार र एकहजार रुपैयाँसहित ट्रफी, मेडल र प्रमाणपत्रको व्यवस्था गरिएको आयोजकले जानकारी दिएको छ ।
मकवानपुर जिल्ला खेलकुद विकास समितिको आयोजनामा खेलकुद महोत्सव सुरु भएको हो । महोत्सव अन्तर्गत विभिन्न ६ वटा विधामा खेलकुद प्रतियोगिता हुनेछ । दौडमा इच्छा भएका खेलाडीहरुको पहिचानसहित खेल क्षेत्रको विकासका निम्ति जिल्लास्तरीय महिला तथा पुरुष दौडको आयोजना गरिएको खेलकुद विकास समिति मकवानपुरका अध्यक्ष राजकुमार मोक्तानले जानकारी दिए ।
शुक्रबारबाट नै जिल्लास्तरीय डबल्स ब्याड्मिन्टन प्रतियोगिता समेत सुरु भएको छ । हेटौंडा ११ थानाभर्याङस्थित कभर्ड हलमा मकवानपुर उद्योग वाणिज्य संघका पूर्व अध्यक्ष अरुणराज सुमार्गीले ब्याड्मिन्टन प्रतियोगिताको उद्घाटन गरे । ब्याड्मिन्टन प्रतियोगिताको विजेताले २० हजार, उपविजेताले १० हजार तथा सान्त्वनाले ५÷५ हजार रुपैयाँसहित ट्रफी, मेडल र प्रमाणपत्र प्राप्त गर्ने आयोजक मकवानपुर खेलकुद विकास समितिका सदस्य मदन उप्रेतीले जानकारी दिए ।
खेलकुद महोत्सवकाे आज बागमती प्रदेशका मुख्यमन्त्री इन्द्र बहादुर बानियाले उद्घाटन गरेका छन् । उद्घाटन कार्यक्रममा बानियाँले गौरीटार रङ्गशालामा आगामी एक महिनाभित्र बागमती प्रदेशस्तरीय खेल महोत्सव आयोजन गर्न लागिएको जानकारी दिए । खेलाडीहरू समाज र राष्ट्रका पहिचान भएकाले अन्तरराष्ट्रियस्तरका खेलाडी उत्पादनका लागि प्रदेश सरकारले सङ्घीय सरकार र स्थानीय सरकारसँग समन्वय, सहकार्य गरेर अघि बढ्ने प्रतिबद्धता व्यक्त गरे
खेलकुद क्षेत्रको विकास प्रदेश सरकारको प्राथमिकतामा रहेको बताउँदै उनले भने ’कृषि, पर्यटन क्षेत्रको विकास गरी प्रदेशका जनताको आयस्रोत वृद्धि गर्ने विषयमा प्रदेश सरकार गम्भीर छ । प्रदेशभित्र रहेका पर्यटकीय क्षेत्रहरूको संरक्षण, संवर्द्धन गरी पर्यटक क्षेत्रको विकास गर्न प्रदेश सरकारले काम अघि बढाएको छ।’
कार्यक्रममा जिल्ला समन्वय समिति मकवानपुरका प्रमुख ललितबहादुर घलान, मकवानपुरका प्रमुख जिल्ला अधिकारी वसन्त अधिकारी, मकवानपुर उद्योग बाणिज्य सङ्घका अध्यक्ष प्रमोदराज रानाभाट, नेपाल पत्रकार महासंघ मकवानपुर अध्यक्ष बालकृष्ण अधिकारीलगायत उपस्थित थिए ।
मकवानपुर । मकवानपुरको हेटौंडा १९ नेवारपानीमा कन्टेनर र ट्रक ठोकिदा १ जनाको मृत्यु भएको छ ।
शुक्रबार बिहान ६ बजेको समयमा हेटौडा १९ नेवारपानी स्थित पुर्व पश्चिम सडकखण्डमा हेटौडाबाट चितवनतर्फ जादै गरेको ना ४ ख ९९२३ नम्बरको कन्टेनर (टेलर) गाडी र चितवनबाट बिरंगंजतर्फ जान आउदै गरेको बा.प्र. ०३-००१ ख ०३९८ नम्बरको ट्रक एकआपसमा ठोकिएको जिल्ला प्रहरी कार्यालय मकवानपुरले जनाएको छ ।
उक्त दुर्घटनामा मृत्यु हुनेमा कन्टेनर चालक सर्लाही बरहथवा १५ पिपराभिट्टा घर भई हाल पर्सा बिरंगज २ छपकैया बस्ने ३८ वर्षीय गोबिन्द चौधरी रहेका छन् । घाईते भएका चौधरीको सीएमसी चुरेहिल अस्पताल ल्याइएकोमा डाक्टरले उपचारको क्रममा मृत घोषणा गरेको प्रहरीले जनाएको छ ।
ट्रक चालक चितवन खैरेनी ९ बस्ने ४२ वर्षीय धनेश्वर चौधरी सकुशल रहेकोमा प्रहरीले उनलाई नियन्त्रणमा लिएको छ ।
मकवानपुर । मकवानपुरगढी १ लेनडाँडामा २ वटा ट्रक एक आपसमा ठोकिएर दुर्घटना भएको छ । बुधबार भएको उक्त घटनामा १ जना घाइते भएका छन् ।
बुधबार राती साढे ११ बजेको समयमा हेटौंडा- काठमाडौ जोड्ने कान्तिलोकपथ सडक खण्ड अन्तरगत लेनडाँडामा काठमाडौ तर्फ जाँदै गरेको म.प्र.०३-०० २ ख ४६४१ नं.को सिमेन्ट लोड ट्रक र बिपरित दिशा काठमाडौ तर्फ बाट हेटौडा तर्फ आउदै गरेको म.प्र.०३-०० २ ख ४५०१ नं.को खालि ट्रक एक आपसमा ठक्कर खाई दुर्घटना भएको मकवानपुर प्रहरीले जनाएको छ ।
उक्त दुर्घटनामा ४६४१ नं.को ट्रक चालक सिन्धुली दुधौली न.पा.१४ बस्ने २४ वर्षीय टुल्कु सिंह तामाङको घाईते अवस्थामा उद्वार गरी हेटौडा अस्पताल ल्याइएको जिल्ला प्रहरी कार्यालय मकवानपुर जानकारी दिएको छ । ४५०१ नं. को ट्रक चालक मकवानपुर बागमती ७ बस्ने ४३ वर्षीय बेल कुमार स्याङतानलाई प्रहरीको नियन्त्रणमा लिएको बताइएको छ ।
प्रहरीका अनुसार दुवै ट्रक घटनास्थलमै रहेको तथा बाटो एक तर्फी सुचारु रहेको छ ।
मकवानपुर । मकवानपुरकाे हेटौडामा आगामी फागुन २९ गतेदेखि सुरु गर्न लागिएको दोस्रो खेलकुद, कृषि तथा पर्यटन महोत्सवको तयारी तिव्र पारिएको छ ।
मकवानपुर जिल्ला खेलकुद विकास समितिको आयोजनामा हेटौंडा १० स्थित टिसिएनको चौरमा महोत्सव हुन लागेको हो । जिल्लाको खेलकुद क्षेत्रको विकासका लागि आयोजना गर्न लागिएको महोत्सवको तयारीलाई तिव्रता दिइएको आयोजकले जनाएको छ ।
जेन्जी आन्दोलनको क्रममा भएको भौतिक क्षति पुनःस्थापना तथा खेलकुद सामग्री खरिद एवम् खेलकुद क्षेत्रको विकासका लागि महोत्सवको आयोजना गर्न लागिएको खेलकुद विकास समिति मकवानपुरका अध्यक्ष राजकुमार मोक्तानले जानकारी दिए ।
‘दोस्रो वृहत् खेलकुद, कृषि तथा पर्यटन महोत्सवको तयारीलाई तिव्र पारिएको हो । अहिले महोत्सव स्थलको घेराबारासहित स्टल निर्माण, खेलकुद प्रतियोगिता आयोजनास्थलको मर्मत सम्भारलगायतका कार्य भैरहेको छ’, अध्यक्ष मोक्तानले भने । महोत्सवबाट बचेको रकमले मकवानपुर जिल्ला खेलकुद विकास समितिको भवन निर्माण र खेल सामग्री खरिद गरिनेछ ।
महोत्सव सञ्चालनमा करिब ८० लाख रुपैयाँ खर्च हुने बताइएको छ । ४ सयवटा व्यावसायिक स्टल रहने महोत्सवमा खेल, व्यापार, कृषि र पर्यटनलाई एउटै थलोमा जोड्ने उद्देश्य राखिएको अध्यक्ष मुक्तानले बताए ।
महोत्सवमा राष्ट्रिय महिला भलिबल, राष्ट्रिय तेक्वान्दो, जिल्लास्तरीय पुरुष भलिबल, ब्याडमिन्टन र कराँते प्रतियोगिता, १० किलोमटिर महिला तथा पुरुष दौड प्रतियोगिता हुनेछ । महोत्सवमा विभिन्न जातजातिका सांस्कृतिक झाँकी प्रदर्शन समेत हुने बताइएको छ ।
महोत्सवमा दैनिक राष्ट्रिय तथा स्थानीय कलाकारबाट सांगीतिक प्रस्तुति समेत रहने खेलकुद विकास समितिका सदस्य मदन उप्रेतीले बताए । खेलकुद महोत्सवमा खेल क्षेत्रका १० जनालाई जनही नगद २५ हजार रुपैयाँसहितम सम्मान समेत गर्ने आयोजकको तयारी रहेको छ ।
खेलकुद विकास समितिले यसअघि पनि महोत्सवको आयोजना गरेको थियो । महोत्सवबाट बचेको रकम खेलाडीको हितका लागि कोषमा राखिएको छ ।