मकवानपुर / कृषि तथा पशुपंछी मन्त्री बसुन्धरा हुमगाईले कृषि पेशालाई आधुनिकीकरण गर्न मन्त्रालय लागिपरेको बताएका छन् ।
पशुपालक किसानलाई प्रोत्साहन गर्दै उनीहरुको समस्यालाई सम्बोधन गर्न सरकारले विशेष योजना बनाएको उनले बताए । पुश उपचारको लागि वडा वडामा पशु स्वास्थ क्लिनिक स्थापना गर्न प्रदेश सरकारले योजना बनाएको मन्त्री हुमगाइले बताए ।
यस बर्ष नै २० वटा क्लिनिक सन्चालनमा ल्याउने उनले बताए । हेटौंडा उपमहनगरपालिका १२ पदमपोखरी स्थित त्रिवेणी कृषि सहकारी संस्था लिमिटेडको नवौं वार्षिक साधारण सभा उनले यस्तो बताए हुन् । किसानको वर्गीकरण गरेर सहुलियत दिने, कर्जा लगानी गर्नेलगायतको कार्यक्रम ल्याएको उनले बताए ।
प्रदेश सरकारले कृषि व्यवसाय गर्नको लागि लघुबिक्त कार्यक्रमलाई निरन्तरता दिने योजना बनाएकोले उनले बताए । मन्त्री हुमगाईले युवा किसानलाई योजनामुताविक काम गर्दा सफलता मिल्ने हुंदा यसै अनुसार काम गर्न आग्रह गरे ।
कार्यक्रममा हेटौंडा उपहानरपालिका उपप्रमुख मिनाकुमारी लामाले वैदेशिक रोजगारभन्दा आफ्नो माटोमा पर्याप्त उत्पादन गर्न थालेको प्रती गौरव लागेको बताइन् । व्यवसायीक बन्नको लागि नगरपालिकाले आर्थिक लगानी सहजीकरण र प्रोत्साहन गर्ने कार्यक्रम ल्याउने उनले बताइन् ।

कार्यक्रममा कृषि विकास बैंक लिमिटेड हेटौंडा कान्तिराजपथ शाखा प्रबन्धक नुरप्रसाद गौतमले युवालाई सहुलियतपुर्ण कर्जा प्रवाह गरेकोले सहभागी हुन सक्ने अवसर लिन आग्रह गरे । सरकारले किसानले उत्पादन गरेको उपजको न्युनतम मुल्य तोक्नुपर्ने नत्र उद्यमशीलता मर्दै जाने जोखिम रहेको बताउँदै प्रदेश तथा स्थानीय सरकारले यसतर्फ योजनाहरु बनाउनु पर्ने गौतमले बताए ।

साधारण सभामा संस्थाका अध्यक्ष सुरज थिङले आर्थिक, प्राबिधिक तथा संस्थागत प्रतिवेदन प्रस्तुत गरेका थिए ।
सहकारीले साधारणसभा कै अवसरमा हेटौंडा १२ का प्रकाश स्याङ्तान, हेटौंडा १३ की सुमित्रा कुमारी वाइबा र हेटौंडा १४ का जीवन थिङ्गलाई उत्कृष्ट कृषकको रुपमा सम्मान गरेको सहकारीका उपाध्यक्ष फेन्चु लामाले बताए ।
‘उहाँहरुको लगावलाई हेरर अरुले पनि सिक्न जोश मिलोस भनेर हामीले सम्मान कार्यक्रम पनि राखेका हौं’ उपाध्यक्ष लामाले भने ।

सहकारीमा आवद्ध युवाहरुले पदमपोखरीको २० बिगाहा जग्गामा व्यवसायीक मेवा उत्पादन गरि ५० लाखभन्दा बढी नाफा गरेको अध्यक्ष थिङले बताए । यसैगरी ४ सयभन्दा बढी युवाहरू कृषि कर्ममा जोडिएको उपाध्यक्ष फेन्चु लामाले बताए । यसैगरी सोही सहकारीसंग जोडिएर ५ जनाले व्यवसायी ड्रागन फूड खेती गरेको लामाले बताए ।
पदमपोखरी क्षेत्रमा खरभुजाको खेती सुरूवात गरेर गत बर्ष नै बजारमा लैजान थालेको अध्यक्ष थिङले बताए । कोभिडको बेलामा पनि अनलाइन मार्फत होम डेलिभरी गर्ने गरेको थिङ्गले बताए । १० बिगाहामा व्यवसायी तरकारी खेती, बाख्रा पालन, पाडापाडी पालनमा समेत युवालाई प्रोत्साहन गर्दै आएको थिङ्गले बताए ।
सहकारीले कुल ४१ लाख ८१ हजार २ सय ९९ रुपियाँ कारोवार गर्दै आएको प्रतिवेदनमा प्रस्तुत गरिएको थियो । सहकारीले पदमपोखरीमा कृषिमा धेरै सकारात्मक कामहरु गरेको छ । साधारण सभापछि सहकारीले कृषि मन्त्रीलगायत अतिथिहरुलाई स्थानीय क्षेत्रमा स्थापित होम स्टेको समेत अवलोकन गराएको थियो ।
कार्यक्रममा हेउमनपा १२ का वडा अध्यक्ष ललित घलान, वडा १३ का अध्यक्ष मनोज वाइबा, हेटौंडा उपमहानगरपालिका सहकारी शाखा प्रमुख हिमप्रसाद पौडेल, राष्ट्रिय सहकारी बैंकका प्रबन्धक रामेश्वर अर्याललगायतको उपस्थिति रहेको थियो ।
मकवानपुर । हेटौंडा उपमहानगरपालिका १ नकौलीमा रहेकाे कालिका आधारभूत बिधालयकाका बिद्यार्थीलाई स्वीटर वितरण गरिएको छ । तामाङ समुदायको बालबालिका अध्ययन गर्ने उक्त बिधालयका १ सय ७० जना विद्यार्थीलाई न्यानाे कपडा स्वीटर वितरण गरिएको हो ।
सन अफ लाईफका सदस्य एवं स्वास्थकर्मी राजु गुरुङ्गको सहयोग तथा हेटौंडा उपमहानगरपालिका १ का अध्यक्ष सबिन न्यौपानेको समन्वयमा विद्यार्थीलाई स्वीटर प्रदान गरिएको हो । कार्यक्रममा वडा अध्यक्ष सबिन न्यौपानेले जाडोको समयमा न्यानो कपडाको अभावमा बिद्यार्थीहरु समयमा बिधालय नआउने समस्या समाधान हुने बताए । न्यानो कपडा वितरण गर्दै सहयोगी राजु गुरुङ्गले सस्थाले जिल्लाका विभिन्न बिधालयमा सहयोग पुर्याउदै आएको बताए ।
कार्यक्रममा बिधालयका प्रधानाध्यापक सुकदेव काफ्लेले आर्थिक अवस्था नाजुक रहेका विद्यार्थीहरु जाडोकै कारण बिधालय अनुपस्थित भैरहेका अवस्थामा सहयोगीदाताबाट बिद्यार्थीहरुलाई न्यानो कपडा सहयोगले राहत महसुस भएको भन्दै सहयोगीदातालाई धन्यवाद व्यक्त गरे ।
मकवानपुर । नेपाल राष्ट्रिय शिक्षक संगठन हेटौंडा उपमहानगर समितिको अध्यक्षमा गोपीरमण प्याकुरेल चयन भएका छन् । शनिबार सम्पन्न अधिवेशनले प्याकुरेलको अध्यक्षतामा ४२ सदस्यीय नगर समिति सर्वसम्मत चयन गरेको हो ।
यसैगरी संगठनको उपाध्यक्षमा रमेश कुमार बर्तौला, सचिवमा देवराज शर्मा, कोषाध्यक्षमा भरत पोखरेल, सहसचिवमा भगवती कट्टेल, सहकोषाध्यक्षमा शर्मिला ढकालसहित ४२ सदस्यीय नगर समिति सर्वसम्मत चयन गरेको हो । निर्वाचित समितिको कार्यकाल ३ वर्ष हुनेछ ।
नेपाल राष्ट्रिय शिक्षक संगठन हेटौंडा उपमहानगर समितिको दोस्रो अधिवेशनको उद्घाटन कार्यक्रम संगठनका हेटौंडा उपमहानगर समितिका अध्यक्ष मुकुन्द न्यौपानेको अध्यक्षतामा तथा संगठनका केन्द्रिय कोषाध्यक्ष विष्णु भण्डारीको प्रमुख आतिथ्यमा भएको थियो । कार्यक्रममा शिक्षक सेवाबाट निवृत्त भएका नगर भित्रका २७ जना शिक्षकहरुलाई सम्मान समेत गरिएको थियाे ।
कार्यक्रममा नेपाल राष्ट्रिय शिक्षक संगठनका केन्द्रिय सदस्य पद्मा पौडेल, राष्ट्रिय परिषद् सदस्य रमेश प्रसाद लामिछाने, संगठनका बागमती प्रदेश सचिवालय सदस्य मोहन प्रसाद शर्मा, जिल्ला अध्यक्ष श्रीराम दहाल लगायतकाे आतिथ्यता रहेको थियो ।
मकवानपुर । नेपालमा वित्तीय संघीयता सम्बन्धी पहिलो किताब प्रकाशन हुने भएकाे छ । शिखा बुक्सले उक्त किताबको प्रकाशक गर्ने भएकाे हाे । वित्तीय संघीयता सम्बन्धी पहिलो किताब कानुनका विधार्थी मकवानपुरका बिशभ अधिकारीका साथै सागर बराल र सम्पुर्ण बस्नेतले लेखेका हुन।
नेपालमा राजनीतिक संरचना सम्बन्धी संघीयताको बिभिन्न किताबहरू लेखियता पनि आर्थिक पाटोलाई फिल्डमै (स्थलगत अध्ययन) गरेर पहिलो चोटी अनुसन्धानमूलक किताब लेखिएको बताइएकाे छ। मुलुक भर्खरै संघीयतामा प्रवेश गरेकाले यसको आर्थिक पक्षको बिषयमा कम चर्चा भएको र संघीय सरकारले आफ्नो आर्थिक गतिविधि कसरी सन्चालन गरेका विषय किताबका विषयवस्तु रहेकाे लेखक बिशभ अधिकारीले बताए।
संघीयताको महत्वपूर्ण सम्बन्धी आधारभूत सिद्धान्तको बिषयमा किताबले जानकारी दिने अर्को लेखक सागर बरालले जनाए। किताबमा प्रक्कथन (शुभकामना) पुर्व अर्थमन्त्री तथा अर्थविद डा. प्रकाश चन्द्र लोहनी र राष्ट्रपतिको पुर्व प्रेस सल्लाहकार राजेन्द्र दाहालले दिएको लेखक सम्पुर्ण बस्नेतले बताए।
बालमैत्री स्थानीय शासन लागू गर्न सामुहिक प्रतिवद्धता
Tags: No Comments
मकवानपुर । मकवानपुरगढी गाउँपालिकालाई बालमैत्री स्थानीय शासन लागु भएको स्थानीय तहको रुपमा घोषणा गर्न तथा यस अभियानमा सहभागी हुन सरोकारवालाहरुले सामूहिक प्रतिवद्धता व्यक्त गरेका छन् ।

मकवानपुरगढी गाउँपालिकाका संघसंस्था, सम्बन्धित सरोकारवालाहरूले बालमैत्री स्थानीय शासन अभियानको प्रक्रियागत कार्यान्वयन, घोषणा तथा दीगोपनका लागि आ–आफ्नो कार्य प्रक्रियामा समायोजन गरी बालमैत्री पद्वतीको माध्यमले समाज रूपान्तरणको महाअभियानलाई सफल बनाउँने प्रतिवद्धता पत्रका हस्ताक्षर गरेका हुन् ।
बुधबार पालिकामा आयोजना गरिएको अन्तरक्रिया एवम् प्रतिवद्धता कार्यक्रममा गाउँपालिका अध्यक्ष विदुर हुमागाई, वडा नम्बर ५ का अध्यक्ष जीतबहादुर घिमिरे, गाउँपालिकाका प्रमुख कार्यकारी अधिकृत रामकुमार पुडासैनीलगायत सरोकारवालाहरुले हस्ताक्षर गरेका हुन् ।

कार्यक्रममा गाउँपालिका अध्यक्ष बिदुर हुमागाईले भौतिक विकासको पाटोलाई मात्रै महत्व दिने परीपाटीको अन्त्य हुनुपर्ने बताए । ‘भौतिक विकासलाई मात्रै विकास मानिदैन, भौतिक विकासको पाटो एकातिर छ, तर सामाजिक विकास र आर्थिक विकासको पाटोमा नसोचे शुसासन युक्त विकास संभव छैन’ हुमगाईले भने ‘सामाजिक विकास अन्तरगत बालमैत्री शासन धेरै महत्वपूर्ण पाटो हो ।’

बालमैत्री शासन किन भन्ने बुझाउने काम लगभग सकिएको र बालबालिकामाथिको लगानी सयौं बर्षको लागि लगानी हुने उनले बताए । बालमैत्रीमा गरेको लगानीले विकासका अरू अभियानलाई समेत दीगो बनाउने उनले बताए । आगामी माघको अन्त्यसम्म मकवानपुरगढी गाउँपालिकालाई बालमैत्री स्थानीय शासन लागु भएको स्थानीय तहको रुपमा घोषणा गर्ने कार्यक्रम रहेको बताउँदै अध्यक्ष हुमगाईले भने ‘ थोरै समयमा धेरै काम गर्न बांकी छ, सबैको समूहिक साथ चाहिन्छ ।’

गाउँपालिकामा हुने गरेको बाल बिबाह,बाल श्रम जस्ता कुराहरु अझै चुनौतीपूर्ण रहेको उनले बताए । चाँडो बिहे गर्दा आउने गम्भीर समस्याबारे अभिभावकले जानकारी गराउन पर्ने उनले बताए । ‘बाल विवाह विरुद्धको कानून बनिसक्यो अब चर्चामात्रै हैन, गम्भीर हुनुपर्छ’ उनले भने ।
कार्यक्रममा गाउँपालिकाको प्रमुख कार्यकारी अधिकृत रामकुमार पुडासैनीले गत
२०७७ माघ १९ बाट सुरू भएको अभियान कोभिडको कारण केही समय रोकिए पनि निरन्तर काम भैरहेको बताए । बालमैत्री स्थानीय शासन घोषणा गर्नको लागि हाल ५१ वटा सूचक पुरा गरेको हुनुपर्ने पुडासैनीले बताए ।
कार्यक्रममा कार्य पत्र पस्तुत गर्दै पुडासैनीले भने ‘‘बालबालिका समस्या सामाधानको लागि चाहिने स्रोत हुन्, उनीहरु माथि खर्च गरेको हैन लगानी गरेको सम्झनु पर्दछ ।’ गाउँपालिकामा बाल विवाह, बाल प्रेम विवाह, बाल श्रम, जातीय तथा लैङ्गिक विभेद, घरेलु हिंसा, यौन शोषण, शारीरिक तथा मानसिक हिंसा, बेचबिखन तथा ओसारपसार जस्ता कुरीतिहरु चुनौतिको रुपमा रहेको पुडासैनीले बताए ।

कार्यक्रममा सिविन बाल हेल्प लाइन मकवानपुरका प्रमुख झबिन्द्र ज्ञवलीले चुनौतिहरुलाई चिर्दै बालअधिकारको सवाल प्रत्याभुत गराउनु पर्ने बताए । ‘जन्मदर्ता नहुदा आईपर्ने समस्या यावत् छन्, सबै बालबालिकाको जन्मदर्ता हुनुपर्छ’ उनले भने ।
मकवानपुरगढी गाउँपालिका वडा ५ अध्यक्ष जितबहादुर घिमिरेको अध्यक्षतामा कार्यक्रम आयोजना गरिएको थियो । ‘मोबाइलको कारण बाल बिबाह बढाएको छ, सहकारी र टोल बिकासले बालमैत्रीको लागि महत्वपूर्ण योगदान गर्न सक्छ र गर्नुहुने छ भन्ने अपेक्षा हामीले गरेका छौ’ अध्यक्ष घिमिरेले भने ।
कार्यक्रममा बालमित्री अभियानको फोकल पर्सन रामप्रसाद दाहाल, अधिकारकर्मी कविराज हुमगाई, स्थानीय सहकारी, बालक्लब, आमा समूह, टोल विकासलगायतको प्रमुख तथा प्रतिनिधिहरुको उपस्थिति रहेको थियो ।