मकवानपुर । सामुदायिक विद्यालय माध्यमिक तहस्तरीय हाजिरी जवाफ प्रतियोगितामा ज्योति माध्यमिक विद्यालय प्रथम भएको छ ।
नगरस्तरीय शैक्षिक समन्वय समिति हेटौंडाको आयोजनामा भएको हाजिरी जवाफ प्रतियोगितामा हेटौंडा–१८ स्थित ज्योति माविका सलिना सुवेदी, शान्ती गोले र समिप घिमिरेको समुह प्रथम भएको हो । त्यसैगरी, हेटौंडा–१७ को बालबोध माविका श्रृष्टि भुजेल,स्मृति तिमल्सिना र सकृना पुडासैनीको समुह द्वितीय भए । त्यस्तै हेटौंडा–१६ को जनप्रिय माविका रामकृष्ण आचार्य, एरिना चौलागाई र कौस्तुभ सुवेदीको समुह तृतीय भएका थिए ।
विजेता समूहले क्रमशः ७ हजार, ५ हजार र ३ हजार नगद पुरस्कार र प्रमाणपत्र प्राप्त गरे । प्रतियोगितामा हेटौंडा नगरका २१ वटा सामुदायिक विद्यालयको सहभगागिता रहेको थिए ।
कार्यक्रममा हेटौंडा १६ का वडा अध्यक्ष रामकृष्ण कोईरालाले यस्ता प्रतियोगिता विद्यार्थीको समग्र विकासमा महत्त्वपूर्ण भूमिका हुने बताए । शैक्षिक समन्वय समिति अतिरिक्त क्रियाकलाप संयोजक बालकुमार श्रेष्ठले प्रतियोगिताले विद्यार्थीहरूको व्यक्तित्व, सामाजिक र बौद्धिक विकासमा योगदान र्पुयाउनुका साथै उनीहरूलाई आफ्नो ज्ञान र क्षमता प्रदर्शन गर्ने अवसर प्रदान गरेको बताए । ‘यस्ता प्रतियोगिताहरूले विद्यार्थीहरूमा स्वस्थ प्रतिस्पर्धाको भावना जगाउदै र उनीहरूको बौद्धिक क्षमता अभिवृद्धि गर्न मद्दत पुर्याउँछ’ उनले भने ।
कार्यक्रममा हेटौंडा उपमहानगरपालिकाका शिक्षा विकास महाशाखा प्रमुख सीताराम कोईराला, शिक्षा अधिकृत हरिचन्द्र सापकोटा , जनप्रिय मावि विद्यालय व्यवस्थापन समिति अध्यक्ष मोहन वस्ताकोटी, प्रधानाध्यापक भुपेन्द्र चौलागाईले सहभागी विद्यालय र विद्यार्थीहरूको सहभागिताको प्रशंसा गर्दै यस्ता कार्यक्रमको निरन्तरताले भविष्यमा स्थानीय शैक्षिक वातावरणलाई थप सुदृढ बनाउन मद्दत पुग्ने अपेक्षा गरे।
समन्वय समिति अध्यक्ष भोगेन्द्र लुईटेलको सभाध्यक्षतामा भएको प्रतियोगिता हेटौंडा १६ का वडा अध्यक्ष एवम् सामाजिक विकास समिति प्रमुख कोईरालाको प्रमुख आतिथ्यतामा भएको हो ।
समिति उपाध्यक्ष प्रतिमा गौतमले स्वागत गरेको कार्यक्रमको सहजीकरण सचिव जनकप्रसाद घिमिरेले गरेका थिए।
मकवानपुर । २०८० सालको एसइई परीक्षामा उत्कृष्ट नतिजा ल्याउने हेटौंडा उपमहानगरपालिकामा रहेका समुदायीक बिद्यालय तथा बिद्यार्थीलाई सम्मान गरीएको छ ।
नगर स्तरीय शैक्षिक समन्वय समितिले शनिबार हेटौंडामा उपमहानगरपालिका भित्र सञ्चालित सामुदायिक बिद्यालयहरु मध्य एसइईमा उत्कृष्ट नतिजा ल्याउने ८ बिद्यालय सहित ६६ विद्यार्थीलाई सम्मान गरेको हो । नगरभित्रका समुदायीक बिद्यालयमा अध्ययन गरी एसइईमा ३.६ जिपीए ल्याउने सिद्धार्थ, आधुनिक, भुटनदेवी, प्रगति, महेन्द्र किरण, जनप्रिय, बंशगोपाल माध्यमिक बिद्यालयका विद्यार्थीलाई सम्मान गरिएकाे हाे ।
हेटौंडा उपमहानगरपालिकाका नगर प्रमुख मीनाकुमारी लामाले उक्त बिद्यालय तथा बिद्यार्थीलाई सम्मानित गरेकी हुन् । समन्यव समितिले नगरका समुदायीक विद्यालयका शिक्षकहरुलाई शैक्षिक सुधारका तालिम सहित नगरमा सञ्चालन हुने आधारभुत तथा निम्न माध्यमिक तहको परीक्षाका लागि प्रश्नपत्र तयारीकाे कार्य गर्दै आएकाे छ । प्रश्नपत्र तयार बापत आधारभुत तहमा ३० रुपियाँ र निम्नमाध्यमिक तहमा ४५ रुपियाँ शुल्क लिने गरेको कार्यक्रममा जानकारी दिइएको थियो ।
नगर स्तरीय शैक्षिक समन्वय समितिका अध्यक्ष भोगेन्द्र लुइटेलको अध्यक्षतामा भएको कार्यक्रममा हेटौंडा १६ का वडाध्यक्ष एवम् समाजिक विकास समिति संयोजक रामकृष्ण कोईराला, नेपाल राष्ट्रिय शिक्षक संगठन मकवानपुर अध्यक्ष श्रीराम दाहाल, नेपाल शिक्षक संघ मकवानपुर अध्यक्ष गणेश हुमागाई, प्रगतिशिल नेपाल राष्ट्रिय शिक्षक संगठनका मुकेश मिश्र, एकीकृत अखिल नेपाल शिक्षक संगठन मकवानपुरका अध्यक्ष बसन्त राई, प्रगति माध्यमिक बिद्यालयका प्रधानाध्यापक निरञ्जन ढकाल र अभिभाबक फुर्वा आलेमगर लगाएतकाले मन्तव्य व्यक्त गरेका थिए ।
मकवानपुर । मकवानपुरको हेटौंडामा रहेको सामुदायिक विद्यालय भुटनदेवी माध्यमिक विद्यालयले वार्षिक योजना तथा बजेट निर्माण कार्यशाला गरेकाे छ ।
२०८० सालकाे एसइई परीक्षा गुणस्तरमा मकवानपुर जिल्ला मै प्रथम स्थान हासिल गर्न सफल विद्यालयले आगामी २०८१ वर्ष अझ व्यवस्थित शैक्षिक याेजनासहित अगाडि बढ्न कार्यशाला आयाेजना गरिएकाे हाे ।
विद्यालय व्यवस्थापन समिति अध्यक्ष नवीन सिग्देलले याेजनाबद्व र व्यवस्थित रूपमा शैक्षिक विकास र उन्नयनकाे लागि अगाडि बढ्न कार्यशाला आयाेजना गरिएकाे बताए । हेटाैडा-४ काे वडा अध्यक्ष समेत रहेका सिग्देलले विकासकाे महत्वपूर्ण क्षेत्र शिक्षा भएकाेले सामुदायिक र संस्थागत विद्यालय बीचकाे सहकार्य र प्रतिस्पर्धाद्वारा शिक्षामा गुणस्तर सुधार गर्न वडा कार्यालय लागिपरेकाे जानकारी दिए ।
जनप्रतिनिधि, व्यवस्थापन समिति, शिक्षक र कर्मचारी सहभागीता रहेकाे कार्यशालाकाे उदेश्यबारे प्रधानाध्यापक माधव दाहालले बताएका थिए । कार्यशालामा भाैतिक पूर्वाधारकाे विकास, शैक्षिक विकास, विद्यार्थीकाे समग्र विकासकाे लागि अतिरिक्त क्रियाकलाप र श्राेतकाे खाेजी, परिचालन र पारदर्शीता ४ वटा विषयमा समूह बनाई छलफल गरिएकाे थियाे ।
छलफल पश्चात भाैतिक पूर्वाधार विकासको सम्बन्धमा शिक्षक सरस्वती अधिकारी, शैक्षिक विकासको शिक्षक सूर्य घिमिरे, अतिरिक्त क्रियाकलापको शिक्षक सुमन श्रेष्ठ र श्राेतकाे खाेजी, परिचालन र पारदर्शीताको बालकृष्ण दाहालले समूहका सुझावहरू प्रस्तुत गरेको सहायक प्रअ भरत पाेखरेलले जानकारी दिए ।
कार्यशालामा समूहगत छलफलका निष्कर्षलाई विद्यालयकाे आगामी कार्ययाेजनाकाे रूपमा अगाडि बढाउन प्रधानाध्यापक माधव दाहालकाे संयाेजकत्वमा ७ सदस्यीय समिति समेत गठन गरिएकाे सहप्रअ भरत पाेखरेलले जानकारी दिए ।
१२ कक्षासम्म अध्ययन हुने यस विध्यालयमा करिव २३ सय विध्यार्थी अध्ययनरत छन् भने सिभिल ईन्जीनियरिङ्ग, व्यवस्थापन, विज्ञान विषय र सिटिभिटी तर्फ ३ वर्षे डिप्लाेमा ईन्जिनियरिङ्ग विध्यालयले अध्यापन गराउँदै आएकाे छ ।
मकवानपुर । मकवानपुरकाे हेटौडामा २ सय ५७ जना विद्यार्थी सम्मानित भएका छन् । एसइई २०८० मा उत्कृष्ट नतिजा ल्याउने उनीहरुलाई शुक्रबार निजी तथा आवासीय विद्यालय अर्गनाइजेसन नेपाल (प्याब्सन) मकवानपुरले सम्मानित गरेकाे हाे ।
एसईई परीक्षा २०८० मा उत्कृष्ट नतिजा ल्याउने जिल्लाका ३७ विद्यालयललाई समेत सम्मानित गरिएको थियो। सम्मानित भएका सबै विद्यार्थीले एसईईमा ३.६ भन्दा माथि जीपीए हासिल गरेका थिए।
कार्यक्रममा ४.० जीपीए प्राप्त गरी जिल्लामै सर्वोत्कृष्ट नतिजा हासिल गरेकी बालजागृती इङ्गलिस सेकेण्डरी बोर्डिङ स्कुलकी छात्रा रितिका छत्कुली र ३.९५ जीपीए नतिजा हासिल गरेका सरस्वती विद्या मन्दिर इङ्लिस बोर्डिङ्ग स्कूलका लखिन्द्र मुखिया विनलाई विशेष सम्मान गरिएको छ ।
प्याब्सन मकवानपुरका अध्यक्ष बिनोद सुवेदीले एसइईमा मकवानपुरको नतिजा सन्तोषजनक रहेको बताए। आफ्नो योग्यता र रुचि अनुसार उच्च शिक्षाको क्षेत्र छनौट गर्न बिद्यार्थीलाई उनले सुझाव दिए।
एसइई २०८० मा मकवानपुर जिल्लाबाट ५ हजा ९ सय २५ विद्यार्थी सहभागी भएका भएकाेमा २ हजार १ सय ६१ विद्यार्थी उत्तीर्ण भएका थिए ।
मकवानपुर । माध्यमिक शिक्षा परीक्षा (एसईई) को नतिजापछि अहिले सामाजिक सञ्जालका २ प्रकारकाे चर्चा उठिरहेका छन् । एउटा विद्यालय वा विद्यार्थीकाे सफलतापछी बधाईकाे चर्चा अर्काे नकरात्मक नतिजाकाे टिप्पणी । विद्यार्थी वा विद्यालयकाे नतिजा राम्राे नहुनुकाे दाेष कसकाे हाे ? विद्यार्थी, शिक्षक,अभिभावक वा विद्यालय व्यवस्थापन समिती कसकाे कमजाेरीकाे कारण नतिजा अपेक्षाकृत आएन ?
तर कसरी सुधार गर्ने एसईईकाे नतिजा भन्नेबारे भने बहस कतै भएकाे पाइदैन । मकवानपुर जिल्लामा २०८० सालको माध्यमिक शिक्षा परीक्षा (एसईई) को नतिजाले जिल्लाको शैक्षिक प्रणाली र शिक्षाको स्तरमा सुधार आवश्यक रहेको देखाएको छ। यस वर्षको एसईई परीक्षामा कुल ५ हजा ९ सय २६ विद्यार्थी सहभागी भएका थिए। तीमध्ये २ हजार १ सय ६७ विद्यार्थी उत्तीर्ण भएका छन् भने ३ हजा ७ सय ४१ विद्यार्थी अनुत्तीर्ण भएका छन्। उत्तीर्ण प्रतिशत ३६.६ प्रतिशत मात्र रहेको छ भने अनुत्तीर्ण प्रतिशत ६३.१२ प्रतिशत रहेको छ। यो परिणामले जिल्लाको शैक्षिक स्तरमा व्यापक सुधारको आवश्यकता दर्शाएको छ।
मकवानपुर जिल्लामा २०८० सालको एसईई परीक्षामा सामुदायिक र संस्थागत गरी १३८ विद्यालय सहभागी भएका थिए। तीमध्ये १६ विद्यालयको नतिजा सुन्य रहेको छ, अर्थात् १६ विद्यालयका कुनै पनि विद्यार्थी पास हुन सकेनन्। यो तथ्यले ती विद्यालयहरूको शैक्षिक स्तर र शिक्षण प्रणालीमा सुधारको आवश्यकता छ भन्ने कुरा प्रष्ट हुन्छ।
माध्यमिक शिक्षा परीक्षा (एसईई)को नतिजामा मकवानपुरको १० पालिका मध्ये हेटौंडा उपमहानगरपालिका अग्रस्थानमा रहेको पाइएको छ । हेटौंडाका २९ संस्थागतसहित ५८ विद्यालयबाट ३ हजार ५६ परीक्षार्थीले परीक्षा दिएकोमा १ हजार ७ सय ११ अर्थात ५५.९९ प्रतिशत उतीर्ण भएका छन् । हेटौंडाको एक सामुदायिक र एक संस्थागत विद्यालयको नतिजा भने शुन्य रहेको छ ।
जिल्लाको एक मात्र नगरपालिका थाहा जिल्लमै दोस्रो स्थानमा रहेको छ । थाहा नगरपालिकाको ६ संस्थागतसहित १७ विद्यालयबाट ५ सय ३९ परीक्षार्थीले परीक्षा दिएकोमा १ सय ४८ अर्थात २७.४६ प्रतिशत नतिजा हासिल गरेको छ । थाहा नगरपालिकाको कुनै पनि विद्यालयको नतिजा शुन्य रहेको छैन । जिल्लामै नतिजा शुन्य नभएको पालिका थाहा मात्र हो ।
जिल्लामा मकवानपुरको मनहरी गाउँपालिकाले तेस्रो स्थान लिएको छ । मनहरीबाट ३ संस्थागतसहित ११ विद्यालयबाट ४ सय ७७ परीक्षार्थीले एसइई परीक्षा दिएकोमा १ सय १५ अर्थात २४.११ प्रतिशत विद्यार्थी उतीर्ण भएका छन् । मनहरीको ३ वटा विद्यालयको नतिजा शुन्य रहेको छ । यो संख्या शुन्य नतिजा हुने पालिकामध्ये मकवानपुरकै सबैभन्दा बढि हो ।
त्यसैगरी इन्द्रसरोवर गाउँपालिकाका ६ सामुदायिक विद्यालयका ८४ जनाले एसइई परीक्षा दिएकोमा १४ जना अर्थात १६.६७ प्रतिशत परीक्षार्थी उतीर्ण भएका छन् । इन्द्रसरोवरमा एउटा विद्यालयको नतिजा शुन्य भएको छ । भमिफेदी गाउँपालिकाको ८ सामुदायिक विद्यालयबाट २ सय १४ परीक्षार्थीले परीक्षा दिएकोमा २१ जना मात्र अर्थात ९.८१ प्रतिशत विद्यार्थी उतीर्ण भएका छन् ।
भीमफेदीको २ वटा विद्यालयको नतिजा शुन्य छ । मकवानपुरगढी गाउँपालिकाबाट १० वटा सामुदायिक विद्यालयका ३ सय जनाले परीक्षा दिएकोमा ४६ जना अर्थात १५.३३ प्रतिशत विद्यार्थी उतीर्ण भएका छन् । मकवानपुरगढीका एउटा विद्यालयको नतिजा शुन्य भएको छ । बकैया गाउँपालिकाको ११ विद्यालयबाट ४ सय ४ जना परीक्षार्थीले परीक्षा दिएकोमा ५२ जना अर्थात १२.८७ प्रतिशत परीक्षार्थी उतीर्ण भएका छन् । बकैया गाउँपालिकाको २ वटा विद्यालयको नतिजा शुन्य रहेको छ ।
त्यसैगरी बागमती गाउँपालिकाका ५ वटा विद्यालयका २ सय ३५ परीक्षार्थीले परीक्षा दिएकोमा २७ जना अर्थात ८.६ प्रतिशत विद्यार्थी उतीर्ण भए । बागमतीको पनि २ वटा विद्यालयको नतिजा शुन्य रहेको छ । कैलाश गाउँपालिकाको ६ वटा विद्यालयबाट १ सय ९९ परीक्षार्थीले एसइई परीक्षा दिएकोमा ११ जना अर्थात ५.५३ प्रतिशत विद्यार्थी मात्र उतीर्ण भए । यो उतीर्ण संख्या जिल्लामै सबैभन्दा कम हो । कैलाको २ वटा विद्यालयको नतिजा शुन्य रहेको छ ।
राक्सिराङ गाउँपालिकाको ५ वटा विद्यालयबाट २ सय ३१ परीक्षार्थीले परीक्षा दिएकोमा २३ जना अर्थात ९.९६ प्रतिशत परीक्षार्थी उतीर्ण भएका छन् । राक्सिराङको एउटा विद्यालयको नतिजा शुन्य रहेको छ ।
मकवानपुरमा ३८ संस्थागत र ९९ सामुदायिक विद्यालयबाट ५ हजार ८ सय ३९ परीक्षार्थीले परीक्षा दिएकोमा २ हजार १ सय ६८ अर्थात ३७.१३ प्रतिशत विद्यार्थी उतीर्ण भएको तथ्याङ्कले देखाएको छ । जिल्लाभर १६ विद्यालयको नतिजा शुन्य रहेको छ । हेटौंडा, थाहा र मनहरीमा संस्थागत विद्यालयबाट मात्र विद्यार्थीहरुले एसइई परक्षिा दिएका थिए ।
नतिजा अपेक्षाकृत ल्याउनकाे लागि विद्यार्थी , अभिभावक, शिक्षक,विद्यालय व्यवस्थापन समिती सबैले आ आफ्नाे स्थानबाट आफ्नाे भूमिका पुरा गर्नु पर्ने संस्थागत विद्यालयतफबाट मकवानपुर जिल्ला प्रथम भएकाे प्रगती माविका विद्यालय व्यवस्थापन समित अध्यक्ष ज्ञानेन्द्र लामिछानेले बताए । ‘शिक्षककाे कामलाई विद्यार्थ, अभिभावक, विव्यास सबैले हाेस्टेमा हैंसे गर्नुपर्छ’ उनले भने ‘सफल हुँदा आफैं सफल भएकाे दाबि गर्ने अनि नकरात्मक नतिजा आउँदा एक अर्काेलाई दाेषाराेपण गर्ने गर्नु भएन ।’
हेटौँडा–९, पशुपतिनगरस्थित प्रगति माध्यमिक विद्यालयले एसईईमा ८१ जना विद्यार्थी उतिर्ण गराउन सफल भएकाे हाे । मकवानपुर जिल्लाको सामुदायिक विद्यालयतर्फ सबैभन्दा बढी प्रतिशत विद्यार्थी उत्तीर्ण गराउन सफल विद्यालयले एसईईमा उत्तीर्ण विद्यार्थीलाई सम्मान छ । प्रगति माविबाट एसईईमा १ सय ७ जना विद्यार्थी सहभागी भएकोमा ८१ जना (७५.७० प्रतिशत) विद्यार्थी उत्तीर्ण भएका हुन् ।