मकवानपुरमा एसइईकाे २८ केन्द्र, कैलाशमा पहिलाे पटक केन्द्र थप
Tags: No Comments
मकवानपुर । २०८१ सालकाे माध्यमिक शिक्षा परीक्षा (एसइई) काे लागि मकवानपुरमा २८ वटा परीक्षा केन्द्र निर्धारण गरिएकाे छ । २८ वटा परीक्षा केन्द्रबाट नियमित र ग्रेडवृद्धि गरी ७ हजार ४५६ जना विद्यार्थी एसइईमा सहभागी हुने भएका छन् ।
आगामी ७ चैतबाट सुरु हुने एसइई परीक्षाकाे लागि नियमिततर्फ ५ हजार ८ सय ६५ जना तथा ग्रेडवृद्धितर्फ १ हजार ५ सय ९१ जना विद्यार्थीले परीक्षा फारम भरेकाे शिक्षा विकास तथा समन्वय इकाई मकवानपुरले जनाएकाे छ । इकाईका अनुसार जिल्लाका सामुदायिक र संस्थागत गरी १ सय ३९ वटा विद्यालयबाट एसइईमा विद्यार्थी सहभागी हुँदैछन् ।
मकवानपुरको कैलाश गाउँपालिकामा पनि यस वर्षदेखि एसईईको केन्द्र निर्धारण गरिएको छ । शिक्षा विकास तथा समन्वय इकाईले एसइईकाे लागि कैलाश गाउँपालिका ९ नामटारस्थित कालिका माविमा समेत केन्द्र निर्धारण गरिएको विवरणमा सार्वजनिक गरेको छ । इकाईका अनुसार गत २५ माघमा बसेको माध्यमिक शिक्षा परीक्षा समन्वय समिति मकवानपुरको बैठकले प्राविधिककाे लागि एक तथा कैलाशमा एक समेत गरी २८ वटा परीक्षा केन्द्र निर्धारण गर्ने निर्णय गरेको इकाई प्रमुख सुदिप गिरीले जानकारी दिए ।
प्राविधिक विषयको लागि एउटा केन्द्र र कैलाशमा एउटा केन्द्र थप भएसँगै मकवानपुर जिल्लामा यस वर्षदेखि एसइईको केन्द्र २८ वटा पुगेको छ ।मकवानपुरका १० वटै पालिकामा परीक्षा केन्द्र कायम भएको छ । गत वर्षको एसइईमा राक्सिराङ गाउँपालिकामा परीक्षा केन्द्र निर्धारण गरिएको थियो । यस वर्षदेखि प्राविधिक विषयका विद्यार्थीका लागि हेटौंडा ४ कर्रास्थित श्रमिक माविमा केन्द्र तोकिएको छ ।
एसइई परीक्षाकाे लागि मकवानपुरकाे बागमती गाउँपालिकाकाे जनता मावि फापरवारीमा केन्द्र ताेकिएकाे छ । उक्त परीक्षा केन्द्रमा ४ वटा विद्यालय नियमित तर्फ १५९ जना तथा ग्रेडवृद्धितर्फ ५६ जना परीक्षार्थीले परीक्षा दिने भएका छन् । यसैगरी बकैया गाउँपालिका हात्तीसुडेस्थित बुद्ध मावि परीक्षा केन्द्रबाट ७ विद्यालयका नियमित तर्फ २४५ जना र ग्रेडवृद्धितर्फ ११२ जना परीक्षार्थी एसइईमा सहभागी हुने छन् ।
यस्तै बकैया गाउँपालिका महेन्द्र मावि छतिवन परीक्षा केन्द्रमा ६ विद्यालयका २४१ जना नियमित तथा ४३ जना ग्रेडवृद्धि तर्फका परीक्षार्थीले परीक्षा दिने छन् । हेटौंडा उपमहानगरपालिका हटियाकाे जनप्रीय मावि परीक्षा केन्द्रमा ७ वटा विद्यालयका नियमित २०१ जना र ग्रेडवृद्धि तर्फ ६० जना परीक्षार्थी परीक्षामा सहभागी हुने भएका छन् । यसैगरी महेन्द्र मावि भीमफेदी परीक्षा केन्द्रमा ५ विद्यालयका नियमिततर्फ ११३ जना र ग्रेडवृद्धि ६० जना परीक्षार्थीले परीक्षा दिने छन् ।
थाहानगर पालिकास्थित जनकल्याण मावि पालुङ्ग परीक्षा केन्द्रमा ८ विद्यालयका नियमित तर्फका १७२ जना तथा ग्रेडवृद्धि तर्फका ४४ जना परीक्षामा सहभागी हुने छन् भने थाहा नगरकै मत्स्य नारायण मावि परीक्षा केन्द्रमा ३ विद्यालयका १०२ जना नियमित तथा ४५ जना ग्रेडवृद्धिका परीक्षार्थीले परीक्षा दिदैछन् । सरस्वती बालबाेधनी मावि मार्खु परीक्षा केन्द्रबाट ५ विद्यालयका नियमित तर्फ ९० जना र ग्रेडवृद्धि तर्फ २० जना विद्यार्थी परीक्षामा सहभागी हुँदैछन् ।
मनहरी गाउँपालिकाकाे राष्ट्रिय राेटरी मावि परीक्षा केन्द्रमा ४ विद्यालयका नियमिततर्फ १७३ जना तथा ग्रेडवृद्धि तर्फ २२ जना परीक्षामा सहभागी हुने भएका छन् भने मनहरीकै महेन्द्र किरण मावि ज्यामिरे परीक्षा केन्द्रबाट ४ वटा विद्यालयका नियमिततर्फ १४८ जना र ग्रेडवृद्धितर्फ २३ जना विद्यार्थीले एसइई दिने छन् ।
हेटौंडा उपमहानगरपालिका बसामाडीस्थित महेन्द्र किरण मावि केन्द्रबाट ३ वटा विद्यालयका नियमिततर्फ १९९ जना र ग्रेडवृद्धि तर्फ ८९ जना विद्यार्थी परीक्षामा सहभागी हुने भएका छन् । हेटौंडा १९ बस्तिपुरकाे निर्मल मावि परीक्षा केन्द्रबाट ७ वटा विद्यालयका नियमित १९२ जना र ग्रेडवृद्धितर्फ १२५ जना परीक्षार्थी सहभागी हुनेछन् । हेटौंडा ६ स्थित वंशगोपाल मावि चौघडा परीक्षा केन्द्रबाट ३ वटा विद्यालयका १५७ जना नियमिततर्फ र २२ जना ग्रेडवृद्धितर्फका परीक्षार्थीले परीक्षा दिने भएका छन् ।
हेटौंडाकै आधुनिक मावि परीक्षा केन्द्रबाट ८ वटा विद्यालयका नियमिततर्फ ३९८ र ग्रेडवृद्धितर्फ ७५ जना विद्यार्थीले परीक्षा दिने भएका छन् भने बालज्योति मावि हेटौंडा पिप्ले परीक्षा केन्द्रबाट ३ वटा विद्यालयका नियमित ४२९ र ग्रेडवृद्धितर्फ २४ जनाले एसइई परीक्षा दिदैछन् । हेटौंडा १० ज्ञानदा मावि परीक्षा केन्द्रबाट ३ वटा विद्यालयका नियमिततर्फ १९२ र ग्रेडवृद्धि ३ जना परीक्षार्थीले परीक्षा दिदैछन् । हेटौंडा ४ स्थित भुटनदेवी मावि परीक्षा केन्द्रबाट ७ वटा विद्यालयका ३९३ जना नियमिततर्फ र ४० ग्रेडवृद्धितर्फका परीक्षार्थीले परीक्षा दिने भएका छन् ।
हेटौंडा २ स्थित सिद्धार्थ मावि परीक्षा केन्द्रबाट ७ वटा विद्यालयका ३४२ जना नियमिततर्फ र ७३ जना ग्रेडवृद्धितर्फका विद्यार्थीले एसइई दिने भएका छन् । मकवानपुरका २ वटा संस्थागत विद्यालयमा समेत एसइईकाे परीक्षा केन्द्र निर्धारण गरिएकाे छ । हेटौंडा ५ स्थित जीएस निकेतन परीक्षा केन्द्रबाट ३ वटा विद्यालयका २३० जना नियमिततर्फ र ५७ जना ग्रेडवृद्धितर्फका परीक्षार्थी परीक्षामा सहभागी हुँदै छन् भने हेटौंडा १० स्थित साेलिड्यारिटी इङ्गलिस एकेडेमी परीक्षा केन्द्रबाट ६ वटा विद्यालयका ११९ जना नियमिततर्फ र ३० जना ग्रेडवृद्धितर्फका परीक्षार्थी सहभागी हुनेछन् ।
हेटौंडा ९ स्थित प्रगति मावि परीक्षा केन्द्रबाट ६ वटा विद्यालयका नियमित तर्फ २७९ र ग्रेडवृद्धितर्फ १०८ जना विद्यार्थी एसइईमा सहभागी जनाउँदै छन् । थाहा नगरपालिका स्थित बज्रवाराही मावि परीक्षा केन्द्रबाट ७ वटा विद्यालयका २०६ जना नियमित तर्फ र ३३ जना ग्रेडवृद्धितर्फका परीक्षार्थी एसइईमा सहभागी हुने छन् । हेटौंडा १ स्थित अमर मावि परीक्षा केन्द्रबाट २ वटा विद्यालयका नियमिततर्फ २२३ जना र ग्रेडवृद्धितर्फ २१ जना विद्यार्थीले परीक्षा दिनेछन् ।
मकवानपुरगढी ६ स्थित जालपादेवी मावि परीक्षा केन्द्रबाट ६ वटा विद्यालयका नियमिततर्फ १३१ जना र ग्रेडवृद्धितर्फ ५९ जना विद्यार्थीले परीक्षा दिने छन् । हेटौंडा ८ स्थित चन्द्रोदय मावि परीक्षा केन्द्रबाट ६ विद्यालयका २१४ जना नियमिततर्फ र ४० जना ग्रेडवृद्धितर्फका परीक्षार्थीले एसइई दिने भएका छन् । प्रजा जागृति मावि राक्सिराङ परीक्षा केन्द्रबाट ५ वटा विद्यालयका नियमिततर्फ १३९ जना र ग्रेडवृद्धितर्फ १०७ जना परीक्षामा सहभागी हुने भएका छन् ।
यस्तै यस वर्ष थप गरिएकाे कैलाश गाउँपालिका–९, नामटारस्थित कालिका मावि परीक्षा केन्द्रमा ५ वटा विद्यालयका नियमित तर्फ १४९ र ग्रेडवृद्धितर्फ ६७ जना एसइईमा सहभागी हुने भएका छन् । यस्तै प्राविधिक तर्फका परीक्षार्थीहरुकाे लागि थप गरिएकाे हेटौंडा ४ स्थित श्रमिक मावि परीक्षा केन्द्रबाट १० वटा विद्यालयका नियमिततर्फका २२९ जना र ग्रेडवृद्धितर्फ १३३ जना विद्यार्थी एसइईमा सहभागी हुदैछन् ।
एसईईका लागि शिक्षा विकास तथा समन्वय इकाईले उत्तरपुस्तिका परीक्षा केन्द्रमा पठाउने कार्य २४ फागुन शनिबारबाट सुरु गरेको जनाएको छ । परीक्षा केन्द्रका केन्द्राध्यक्षहरुका लागि अभिमुखीकरणको कार्यक्रम समेत गरिने इकाई प्रमुख गिरीले जानकारी दिए । उनका अनुसार एसईईका लागि सम्पूर्ण तयारी अन्तिम चरणमा पुगेकाे छ ।
मकवानपुर । शिक्षा ऐनकाे माग गर्दै बागमती प्रदेशका मुख्यमन्त्री बहादुर सिंह लामाकाे ध्यानाकर्षण गराइएकाे छ । नेपाल शिक्षक महासंघ मकवानपुरको नेतृत्वमा शिक्षा ऐन जारी गर्न माग गर्दै शिक्षकहरुले ध्यानाकर्षणपत्र बुझाएका हुन् ।
शिक्षक तथा विद्यालय कर्मचारी मैत्री विद्यालय शिक्षा ऐन संसदको चालु अधिवेशनबाटै जारी गर्नु पर्ने माग गर्दै मुख्यमन्त्री लामालाई ध्यानाकर्षणपत्र बुझाइएको हो । चरणबद्व आन्दोलन अन्तर्गत बिहीबार शिक्षा ऐन जारी गर्न सरकारले अनेक बाहना गर्दै टार्न खाेजेकाे भन्दै विगतमा भएका सहमति सम्बोधन हुने गरी शिक्षा ऐन जारी गर्न ध्यानाकर्षण गराइएको हाे ।
विद्यालय कर्मचारी र संस्थागत विद्यालयका शिक्षकको उचित तलबमान, शिक्षकको ग्रेड मिलान, शिक्षकको मर्यादाक्रम, शिक्षक अस्पताल, मासिक तलब भुक्तानी, बालकक्षा शिक्षककाे न्यूनतम तलबमान व्यवस्थापन लगायतका विषय अब आउने शिक्षा ऐनमै सम्बोधन गर्न माग गर्दै ध्यानाकर्षणपत्र बुझाइएको हो ।
गत माघ १६ र १७ गते बसेको नेपाल शिक्षक महासंघको राष्ट्रिय समितिको बैठक निर्णयअनुसार गत फागनु ६ गतेबाट पहिलो चरणको आन्दोलन सुरु गरिएको हो । सोही क्रममा नेपाल शिक्षक महासंघका विभिन्न समितिले बिहीबार ७ वटै प्रदेशका मुख्यमन्त्रीलाई ध्यानाकर्षण पत्र बुझाएको छ ।
बागमती प्रदेशका मुख्यमन्त्री लामाले ध्यानाकर्षण पत्र बुझ्नुहुँदै शिक्षकको ध्यानाकर्षणपत्रलाई संघीय सरकारसमक्ष पुर्याउने प्रतिबद्धता व्यक्त गरे । यसअघि शिक्षक महासंघले सबै स्थानीय सरकारका साथै शिक्षा विकास तथा समन्वय इकाई प्रमुखलाई ध्यानाकर्षणपत्र बुझाइसकेको छ । नेपाल शिक्षक महासंघ आन्दाेलन परिचालन समिति बागमती प्रदेशकाे आयाेजनामा एकीकृत अखिल नेपाल शिक्षक संगठन बागमती प्रदेशकाे नेतृत्वमा ध्यानाकर्षणपत्र बुझाइएकाे हाे ।
दिपक सिंखडा अध्यक्ष, नेपाल शिक्षक संघ, बागमती प्रदेश समिति, राजेन्द्रकुमार श्रेष्ठ अध्यक्ष, नेपाल राष्ट्रिय शिक्षक संगठन, बागमती प्रदेश समिति, शंकर अधिकारी अध्यक्ष, एकीकृत अखिल नेपाल शिक्षक संगठन, बागमती प्रदेश समिति, विनोद सुबेदी अध्यक्ष, अखिल नेपाल शिक्षक संगठन, बागमती प्रदेश समिति, हरिबहादुर थापा अध्यक्ष, प्रगतिशील नेपाल राष्ट्रिय शिक्षक संगठन, बागमती प्रदेश समिति, गंगा पौडल अध्यक्ष, अखिल नेपाल शिक्षक संघ, बागमती प्रदेश समिति, रामशरण फुयाँल अध्यक्ष, नेपाल विद्यालय कर्मचारी परिषद्, बागमती प्रदेश समितिद्वारा ध्यानाकर्षण पत्र बुझाइएकाे थियाे ।
ध्यानाकर्षण पत्र बुझाउनु अघि शिक्षकका विभिन्न संघ संगठनका पदाधिकारी तथा शिक्षकहरुकाे उपस्थितिमा विधालय शिक्षा ऐन जारी गर्न माग सहित खवरदारी जुलुस गरिएकाे थियाे । जुलुसपछिकाे काेण सभलाई सम्बोधन गर्दै एकीकृत अखिल नेपाल शिक्षक संगठन बागमती प्रदेश अध्यक्ष शंकर अधिकारीले हाम्रो भाग्य र भविश्य सामुदायिक विद्यालय नै भएकाे बताए ।
‘सामुदायिक विद्यालयबाट उत्कृष्ट नतिजा ल्याउन विद्यार्थीलाई शिक्षण सहजिकरण गर्दै आएका शिक्षकहरु नीजि तथा सरकरी कोटामा रहेका छौ ’ उनले भने ‘विद्यार्थीको भविश्यको निम्ति लागिरहँदा आफ्नै भविश्यको टुंगो नभएकाले आन्दोलन गर्नु परेकाे हाे ।’ उनका अनुसार शिक्षा ऐेन जारी गर्न माग गर्दै फागुन २४ गते काठमाडौंको सिंहदरबार केन्द्रित आन्दोलन समेत गरिने छ ।
मकवानपुर । मकवानपुरकाे हेटौंडा उपमहानगरपालिकामा महिला शिक्षक भलिवल प्रतियोगिता आयोजना हुने भएको छ । नगरस्तरीय शैक्षिक समन्वय समिति हेटौडाको आयोजनामा १६ र १७ फागुनमा नगरमा पहिलाे पटक महिला शिक्षक मैत्रीपूर्ण भलिवल प्रतियोगिता हुने भएकाे हाे ।
आधुनिक राष्ट्रिय माध्यमिक विद्यालयको खेल मैदानमा हुने प्रतियोगितामा नगरका १० विद्यालयको सहभागिता रहने बिहीबार आयोजकले पत्रकार भेटघाट गर्दै जानकारी दिएकाे हाे । प्रतियोगितामा हेटौंडाका श्रीकृष्ण आधारभूत विद्यालय, वंश गोपाल मावि, भूटनदेवी मावि, चन्द्रोदय मावि, आधुनिक राष्ट्रिय मावि, त्रिभुवन मावि, प्रगति मावि, जनप्रिय मावि, ज्याेति मावि र सिद्धार्थ माविकाे सहभागी रहने अतिरिक्त क्रियाकलाप संयोजक बालकुमार श्रेष्ठले जानकारी दिए ।
प्रतियोगितामा प्रथम, द्वितीय र तृतीय हुने विद्यालयले क्रमशः ७ हजार, ५ हजार र ३ हजार नगद, शिल्ड, मेडल र प्रमाणपत्र प्राप्त गर्ने अतिरिक्त क्रियाकलाप संयोजक बालकुमार श्रेष्ठले जानकारी दिए । प्रतियोगिताको उत्कृष्ट खेलाडी १ जनालाई ट्रफि,मेडल र प्रमाणपत्र प्रदान गरिने छ ।बिहीबार नै प्रतियोगिताकाे खेलतालिका सार्वजनिक गरिएको छ । उद्घाटन खेल ज्याेति माध्यमिक विद्यालय हेटौंडा हर्नामाडी र सिद्धार्थ माध्यमिक विद्यालय हेटौंडा २ बिच हुने भएकाे छ ।
महिला शिक्षकलाई हेर्ने नजर परिवर्तनका साथै सहभागी विद्यालयबिच सम्बन्ध सुमधुर बनfउँदै शैक्षिक सहयाेग आदानप्रदानमा समेत सहकार्यकाे भावना वृद्धि गर्ने उद्देश्यले प्रतियोगिता आयोजना गर्न लागिएकाे नगरस्तरीय शैक्षिक समन्वय समिति अध्यक्ष भोगेन्द्र लुँइटेलले बताए । ‘शिक्षणमा महिला सहभागिता वृद्धि भइरहेकाे सन्दर्भमा सामुदायिक विद्यालयकाे शैक्षिक गुणस्तर अभिवृद्धिका लागि शैक्षणिक योजनाका अन्तरवस्तुहरुलाई खेल विधिबाट सिकाउन समेत सकिने भएकाेले प्रतियाेगिता आयोजना गरिन लागिएकाे हाे’ उनले भने ।
जिल्ला भलिवल संघको प्राविधिक सहयोगमा प्रतियोगिता आयोजना हुन लागेको हो । प्रतियोगिता सञ्चालनका लागि ७० हजार खर्च हुने आयोजकको अनुमान छ । नगर शैक्षिक समन्वय समिति हेटौंडा उपमहानगर भित्रका सामुदायिक विद्यालयहरुकाे अध्ययन अध्यापनसँग सम्बन्धित समस्याहरु पहिचान गरी शैक्षिक गतिविधिहरुलाई सञ्चालन गर्ने तथा शैक्षिक गुणस्तर विकास गर्न सहयाेग पुर्याउने छाता संगठनकाे रुपमा २० बैशाख २०५३ मा स्थापना भएकाे संस्था हाे ।
मकवानपुर । मकवानपुरको हेटौंडा क्याम्पसले ३५ औँ स्थापना दिवस मनाएको छ । हेटौंडा उपमहा नगरपालिका वडा नम्बर ४ मा रहेको क्याम्पसले साताव्यापी कार्यक्रम गरि स्थापना दिवस मनाएको हो ।
क्याम्पसले ३५ औँ स्थापना दिवसका अवसरमा भएको अतिरिक्त क्रियाकलाप सप्ताहका विजयीलाई मङ्गलबार एक कार्यक्रम आयोजना गरी पुरस्कार वितरण तथा सम्मान गरेको हो । स्थापना दिवसको समापन कार्यक्रमका प्रमुख अतिथि बागमती प्रदेशका आर्थिक मामिला तथा योजना मन्त्री कुन्दनराज काफ्ले देशको समग्र विकासका लागि शिक्षा क्षेत्रको विकास अनिवार्य भएको बताए ।
प्रदेश सरकारले सामुदायिक शैक्षिक संस्थाको विकासलाई प्राथमिकतामा राखेको बताउँदै आगामी दिनमा सामुदायिक क्याम्पसको शैक्षिक गुणस्तर वृद्धिमा थप सहयोग गरिने प्रतिवद्धता उनले व्यक्त गरे । कार्यक्रममा हेटौंडा क्याम्पस व्यवस्थापन समितिका अध्यक्ष आनन्दराम पराजुलीले हेटौंडा क्याम्पसको जिल्लाको शैक्षिक विकासमा महत्वपूर्ण योगदान रहेको बताए । प्रदेश सरकारले सामुदायिक क्याम्पसमा गरिने लगानीमा वृद्धि आवश्यक भएको उनले बताए ।
कार्यक्रममा क्याम्पस प्रमुख बालकृष्ण शर्मा, हेटौंडा उपमहानगरपालिका वडा नम्बर १६ का वडाध्यक्ष रामकृष्ण कोइराला, क्याम्पस व्यवस्थापन समितिका कोषाध्यक्ष नमूना पाण्डे, स्वतन्त्र विद्यार्थी युनियनका सभापति अभि मैनालीलगायतले शुभकामना मन्तव्य राखेका थिए ।
कार्यक्रममा शिक्षक सेवा आयोगबाट लिइएको परीक्षामा प्राथमिक तहतर्फ १ नम्बरमा नाम सिफारिस भएका क्याम्पसका छात्रा एलिषा घिमिरेलाई सम्मान गरिएको थियो ।
क्याम्पसका अतिरिक्त क्रियाकलाप विभागका प्रमुख मनोज पोखेरेलले साताव्यापी रुपमा भएको भलिवल, फुटबल, दौड, चित्रकला, हाजिरीजवाफ, ब्याडमिण्टन लागयतका प्रतियोगिताका विजयीहरुलाई पुरस्कार तथा प्रमाणपत्र वितरण गरिएको जानकारी दिए ।
मकवानपुर । मकवानपुरकाे हेटौंडामा आधारभूत तह तथा माध्यमिक तहको प्रश्नपत्र निर्माणसम्बन्धी तालिम भएकाे छ । विज्ञान शिक्षक समाज नेपाल मकवानपुरको आयोजनामा शनिबार विज्ञान शिक्षकहरुकाे लागि तालिम आयोजना गरिएकाे हाे ।
हेटौंडा–२ स्थित सिद्धार्थ माध्यमिक विद्यालयमा सम्पन्न गरिएकाे कार्यक्रममा जिल्लाका ६३ जना विज्ञान शिक्षकहरूले सहभागिता जनाएका थिए । तालिमकाे विज्ञान शिक्षक भरत पोखरेल, दुर्गा पराजुली, खेम बिक र ओमप्रकाश सापकोटाले सहजीकरण गरेका थिए । आधारभूत तह र माध्यमिक तह गरी दुई समूहमा विभाजन गरी तालिम सञ्चालन गरिएको हाे ।
तालिमबाट विशिष्टिकरण तालिका अनुसार प्रश्नपत्र निर्माण गर्न ध्यान पुर्याउनुपर्ने, संज्ञानात्मक तहहरू पहिचान गरी त्यस अनुसार प्रश्नपत्र निर्माण गर्ने सीपको विकास र प्रश्नपत्र निर्माणपूर्व तय गर्नुपर्ने नमुना मेट्रिक्स निर्माण लगायतका विषयमा शिक्षकहरुलाई प्रशिक्षित गरिएकाे विज्ञान शिक्षक समाज नेपाल मकवानपुरका सचिव सुवास खनालले जानकारी दिए ।
प्रशिक्षार्थीहरूको तर्फबाट गीतावर आधारभूत विद्यालय बकैया ५ की अमृता लामिछाने र मत्स्यनारायण मावि थाहा नगरपालिकाका राजेश तिमल्सिनाले यस्ता तालिम कार्यक्रमहरु समय समयमा आयोजना भइरहनुपर्ने बताए । प्रशिक्षक शिक्षक तथा सहभागी शिक्षकलाई प्रमुख अतिथि लगायतले प्रमाणपत्र प्रादन गरेका थिए ।
कार्यक्रमको समापन समाजका अध्यक्ष खेमराज लामिछानेको अध्यक्षता तथा जिल्ला समन्वय समिति मकवानपुर प्रमुख ललित बहादुर घलानको प्रमुख अतिथ्यतामा भएकाे तालिम कार्यक्रममा शिक्षा विकास तथा समन्वय इकाई प्रमुख सुदीप गिरीको विशिष्ट आतिथ्य रहेकाे थियाे । समापन कार्यक्रममा सिद्धार्थ माध्यमिक विद्यालयका सहायक प्रधानाध्यापक सागरप्रसाद खतिवडा, विज्ञान शिक्षक रामकुमार ठाकुर, विनोदप्रसाद गुप्ता, मनिलकुमार कर्ण, ग्यालेक्सी बुक्स सेन्टरका अमृत मगर, लिंकेज टेक्निकल एकेडेमीका कमल कोइरालालगायतको आतिथ्यता रहेको थियो ।