मकवानपुर । पत्रकार वीरेन्द्र साहको हत्यामा संलग्न थप एक जना अभियुक्तलाई बारा प्रहरीले बिहिबार अपरान्ह बाराको कोल्हवी नगरपालिका ४ सपहीबाट पक्राउ गरेको छ ।
जिल्ला प्रहरी कार्यालय बाराका प्रहरी निरिक्षक रुद्र कडेलको नेतृत्वमा खटिएको टोलीले फरार अभियुक्त बारा महागढीमाई नगरपालिका–२ तेलकुवा निवासी तत्कालिन माओबादीका कार्यकर्ता ४५ वर्षीय हरेराम प्रसाद कुर्मी (पटेल) लाई अपरान्ह ३ बजे पक्राउ गरेको बाराका प्रहरी प्रमुख प्रहरी उपरिक्षक कृष्ण पंगेनीले जानकारी दिए ।
बारा जिल्ला अदालतबाट दोषी ठहर भई झन्डै १३ वर्ष देखी लुकीछिप्पी बस्दै आएका पटेललाई पक्राउ गरिएको उनले जानकारी दिए । ईनर्वासिरा गाविस–९ हाल जितपुरसिमरा उपमहानगरपालिका–१९ ईनवौसिरा निवासी पत्रकार विरेन्द्र साहलाई ३४ बर्षको उमेरमा तत्कालीन नेकपा माओवादीका कार्यकर्ता समेत रहेका पटेल सहितका ५ जनाले अपहरण गरी निर्ममता पुर्वक हत्या गरेका थिए ।
पत्रकार साहको अपहरणमा संलग्न बाराका तत्कालिन जनसरकार प्रमुख लालबहादुर चौधरी, कुन्दन भनिने नरेन्द्र फौदार, हरेराम पटेल, रामएकबाल सहनी र मनेजर गिरी समेतले २०६४ असोज १८ गते ढोढियाको पिपरा बजारबाट अपहरण गरी टांगिया बस्ती नजिकको जंगलमा लगेर गोली हानी हत्या गरेका थिए । पत्रकार साहको शव अपहरण भएको ३४ दिन पछि साविक गाविस डुमरवाना–७ को टाँगिया बस्तीको जंगलमा गाडिएको अवस्थामा कातिक २२ गते फेला परेको थियो ।
पत्रकार साहका हत्यामा संलग्न रहेका साविक गाविस ईनर्वासिरा गाविस–९ बस्ने ३४ वर्षीय मनेजर गिरी, र साविक गाविस खोपवा–८ निवासी २६ वर्षीय रामएकबाल सहनीलाई बारा जिल्ला अदालतले २०६८ जेठ १६ गते सर्वस्व सहित जन्म कैदको फैसला गरेको थियो । गिरीलाई ०६५ असोज १९ गते तथा सहनीलाई ०६५ पुस २१ गते बारा प्रहरीले पक्राउ गरी अदालतमा पेस गरेको थियो ।
हत्याका मुख्य अभियुक्त कुन्दन भनिने नरेन्द्र फौदार, हरेराम प्रसाद पटेल र लालबहादुर चौधरीको हकमा पुनरावेदन अदालत हेटौडाले ०६९ साउन १६ गते र सर्वोच्च अदालतले ०७३ पुस २० गते फरार रहेकाले करार सुचीमा राखी मुद्दा मुल्तबिमा राखेको थियो । पत्रकार साहको हत्या अभियोगमा मनेजर गिरी, रामएकबाल सहनी र कुन्दन फौजदार वीरगंजमा कारागारमा छन । हत्याका मुख्य अभियुक्त लालबहादुर चौधरी अझै फरार रहेको प्रहरी उपरीक्षक पगेनीले बताए ।
स्वर्गिय पत्रकार साह तत्कालिन अवस्थामा एभिन्यूज टेलिभिजन, हिमाल पार्थी, नेपाल खबर पत्रिका, दृष्टि सप्ताहिक, रेडियो नेपाल, मनकामना एफएम लगायत आधा दर्जन बढी मिडियामा कार्यरत थिए ।
साहका श्रीमतिले हत्यारालाई फाँसीको सजाय दिन सरकारसित माग गरिन् ।
एक सातादेखि जंगल बिच गोठमा बस्दै ३ बालिका
Tags: No Comments
मकवानपुर /कोरोना भाइरसको संक्रमण भएको पुष्टि भएपछि आफूमाथि सामाजिक सद्भावपूर्ण व्यवहार नपाएको गुनासो धेरैले गर्ने गरेका छन् । तर यहाँ आफूहरुमा कोरोना संक्रमण नै नभइकन दुर्व्यवहार भोगिरहेका छन् ३ जना बालिकाहरु । मकवानपुरको राक्सिराङ् गाउँपालिका २ सुनारीसौरामा ३ जना बालिकाहरु हेटौंडा बजारबाट फर्केकै कारण एक हप्तादेखि जंगलबीचको गोठमा बस्न बाध्य भएका हुन् । ११ वर्षीकी स्किन मोक्तान तथा १२ वर्षका सुशिला स्याङ्बो र स्वस्तिका दोङ ।
हेटौंडा बजारमा कोठामा बस्दै आएका उनीहरु कोरोना संक्रमणपछि जारी लकडाउन, निषेधाज्ञाको कारण कोठाको खानेकुरा सकिएपछि घर गए मकवानपुरको राक्सिराङ गाउँपालिका २ सुनारीसौरा । लामो समयदेखि हेटौंडा–१० आनन्द टोलको एउटा कोठामा बस्दै आएका उनीहरु घर फर्केर आमा बाबुसँग रमाउने रमाइलो कल्पना गर्दै गाउँ पुगेका थिए । “बजारबाट गाउँ हिडेपछि मन चरी जसरी उडेको थियो, गाउँका पाखाबारीमा आमाबाबाको साथ खुब रमाउँला भन्ने थियो, तर एक साता बित्यो, डरै डरले दिनरात काट्दै आएका छौं” १२ वर्षीया स्वस्तिका दोङले भनिन् ।
“बिहान भएपछि आमाले खाना र पिउने पानी लिएर आउनु हुन्छ, तीन दिदी बहिनी खान्छौ” ११ वर्षीया स्किनले भनिन् “जब रातमा दिदीहरु नै डराउनु हुन्छ मलाई झन् डर लाग्छ ।”
उनीहरुले हेटौंडा बजारबाट घर जानु अगाडि कोरोना संक्रमण भए नभएको बुझ्न पीसीआर जाँच पनि गरेको र रिपोर्ट नेगेटिभ आएपछि घर आएको बताए । “ल्याबबाट रिपोर्ट नेगेटिभ आयो भनेर फोन आयो, अनि दिदीहरुले घर जान सुझाव दिनु भए अनुसार नै हामी घर आएका हौ, तर स्थानीयहरुले पत्याएनन् र हामी गोठमा छौं ।”
जंगलको बिचमा रहेको खरले छाना छाएको गोठमा बस्नुपर्दा डरैडरमा समय काट्नु परेको सुशिला स्याङ्बोले बताइन् । “पानी पर्दा सबै चुहिन्छ, हावा चल्दा गोठ उडाउला जस्तो हुन्छ, कतै बारबेर पनि छैन, खुल्ला छ, राति खुब डर लाग्छ, गाई बस्तुको लागि घाँस राख्ने भुँईमै सुत्ने गरेका छौं, निन्द्रा पटक्कै लाग्दैन” १२ वर्षीया सुशिलाले भनिन् “केही भइहाल्यो भने चिक्याउँदा पनि घरकाले झ्वाट्ट सुनिने ठाउँ छैन ।”
“बिहान भएपछि आमाले खाना र पिउने पानी लिएर आउनु हुन्छ, तीन दिदी बहिनी खान्छौ” ११ वर्षीया स्किनले भनिन् “जब रातमा दिदीहरु नै डराउनु हुन्छ मलाई झन् डर लाग्छ ।” “हामीलाई यसरी वस्तुसँगै घरभन्दा टाढाको गोठमा राखिएला भन्ने सोचेकै थिएनौ” १२ वर्षीया स्वस्तिका दोङले भनिन् । बुबा आमालगायत परिवारका सबै सदस्यहरुले आफूहरुलाई होम क्वारेण्टाइनमा राख्न खोज्दा स्थानीयवासीहरुले परिवारलाई नै गाउँबाट खेद्ने कुरा आएपछि आफूहरुलाई गोठमा गाई वस्तुसँगै राखिएको स्वस्तिकाले बताइन् । “‘सबैले हेटौंडाबाट आको हौ, कोरोना ल्याका छौं, भनेर गालिमात्रै गरे, हाम्रो कुरा कसैले सुनेनन्” उनले भनिन् ।
उनीहरुसँगै कोठामा बस्दै आएकी दिदीलाई कोरोना संक्रमण भएपछि उनीहरु स्थानीयवासीले यस्तो व्यवहार गरेको राक्सिराङ गाउँपालिका वडा २ का वडा अध्यक्ष सुर्यबहादुर मोक्तानले बताए । गाउँपालिकाले क्वारेण्टाइन नबनाएको र, स्थानीयवासीले सम्बन्धित व्यक्तिलाई सम्बन्धित परिवारको जिम्मा लगाएर होम क्वारेण्टाइनमै राख्ने व्यवस्था गर्नै पनि नदिएको कारण बालिकाहरुले दुःख पाएको उनले स्वीकारे ।
कोठामा सँगै बस्दै आएको व्यक्तिमा कोरोना संक्रमण पुष्टि भएसँगै आइसोलेशन पठाए पश्चात ति बालिकाहरुमा पीसीआर टेष्ट गर्दा रिपोर्ट नेगेटिभ आएको सञ्चारकर्मी तथा सुशिलाकी दिदी कुमारी स्याङ्बोले बताइन् । “उनीहरु हेटौंडाबाट गाउँमा आएकै कारण यसरी अमानवीय व्यवहार गर्न पाइन्न,गाउँमा परिवारको पीडा सुन्ने कोही भएन” सञ्चारकर्मी स्याङ्बोले भनिन् “गाउँका मानिसहरुले घरमा आउन निषेध गरे, कोरोनाको कारण डरत्रास मात्रै बढेन,आपसी माया ममता हराए जस्तो लागिरहेको छ ।”
कोरोना संक्रमण पुष्टि भएका बालिकाका दिदीहरु हेटौंडा–६ मारहेको आइसोलेसनमा १७ दिन बसेर निको भएर आफ्नो कार्यक्षेत्रमा फर्केको पनि एक साता हुन लाग्यो तर नानीहरुले घर जान पाएनन्” स्याङ्बोले भनिन् । “दिदीलाई आइसोलेनमा लगिएको दिनदेखि नै हामी कोठामा होमक्वारेन्टाइनमा बसेका थियौं । २१ दिनसम्म होमक्वारेन्टाइमा बसेपछि बल्ल हामी घर आएका हौ सुशिलाले भनिन् यहाँ आएपछि बस्न झन् गाह्रो भो ।”
परिवारका मान्छेले हामीलाई खाना पु-याउन आउँदा पनि भेट्न गएको भन्दै स्थानीयले गाउँबाटै लखेट्नु पर्ने धम्की दिएको कुमारी स्याङ्बोले बताइन् । कोरोना जाँच गर्दा नेगेटिभ आएकै कारण गाउँमा आएको तर गाउँको मान्छेले नबुझ्ने १२ वर्षीया सुशिला बताइन् । उनीहरुले गाईबस्तुसँगै ७ रात काटीसके, अझै कति रात काट्नु पर्ने हो थाहा छैन । “कोरोना पोजेटिभ आएकालाई अपराध गरे जस्तो व्यवहार भयो,त्यो त स्वीकार गरियो, रोगसँग जितियो, यि नानीहरुलाई के को सजायँ हो यो ?” कुमारीले भनिन् । जङ्गल नजिक भएको गोठमा जंगली जनावरभन्दा नानीहरुमाथि यौन दुर्व्यवहार होला भन्ने डर बढी भएको कुमारीले बताइन् । अभिभावहरुलाई पनि यसै विषयको बढी चिन्ता रहेको उनले बताइन् ।
“गोठमा नै भन्दा पनि छुट्टै घरमा राख्ने निधो गरेका थियौ, कसैले घर नदिएपछि यसो गरिएको हो” वडाअध्यक्ष मोक्तानले भने ।
“कोरोना लागेकालाई त घृणा ग-यो ग-यो तर नलाग्नेले पनि घृणा सहेर बस्नुपर्ने अवस्था भयो” अभिभावक धनराजले भने । बाहिरबाट आउने मानिसको क्रम नरोकिएकोले यस्तो भएको राक्सिराङ गाउँपालिकाका अध्यक्ष राजकुमार मल्लले बताए । बाहिरबाट आउनेलाई राक्सिराङ गाउँपालिका ३ को श्री सुर्योदय माविमा रहेको क्वारेन्टाइनमा राख्ने गरेको उनले बताए । बालिकाहरुको सवालमा आफूलाई वडा अध्यक्षले जानकारी नगराएको र आफूले अब चाँडै केही गर्ने बताए ।
राक्सिराङ गाउँपालिकामा अहिले सम्म ६ जनामा कोरोना संक्रमण पुष्टि भएको छ । सबैको अवस्था सामान्य छ । हाल गोठमा बसिरहेका ३ जनालाई बालिकाहरुमा कोरोना नेगेटिभ आएको कारण छुट्टै राख्नु नपर्ने अध्यक्ष मल्लले बताए । “गोठमा राख्नेहरु अब कारबाहीको दायरामा ल्याउँछौं” गाउँपालिका अध्यक्ष मल्लले भने । गाउँपालिकाबाट नै घरमा जान पाउने अनुमति दिएर पठाएको मल्लले जानकारी दिए । तर वडा २ का वडा अध्यक्ष सुर्यबहादुर मोक्तानले स्थानीयवासीको रायको खिलापमा आफू जान नहुने भएकोले गोठमा पठाएको बताए । समाज र समुदायले उनीहरुलाई गाउँमा छिर्न नदिन दबाब दिएको र आफ्नो वडामा क्वारेण्टाइन पनि नभएको कारण गोठमा राखिएको उनले स्वीकार गरे ।
“गोठमा नै भन्दा पनि छुट्टै घरमा राख्ने निधो गरेका थियौ, कसैले घर नदिएपछि यसो गरिएको हो” वडाअध्यक्ष मोक्तानले भने । झण्डै एक महिना अगाडी कोरोना संक्रमण भएर हाल निको भएकी ती बालिकाको दिदीलाई दशै तिहार मान्न समेत गाउँ नआउन स्थानीयवासीहरुले धम्कि दिएको बताइएको छ ।
राैतहट । माधवनारायण नगरपालिका-२ खेसरहिया चौकस्थित हनुमान मन्दिरको पूजारी ६५ वर्षीय श्रीराम साहको भदौ ३ गते हत्या गरी फरार रहेको अभियोगमा २ जनालाई बुधबार प्रहरीले पक्राउ गरेको छ ।
पक्राउ पर्नेहरुमा देवाही गोनाही नगरपालिका-१ करुनिया बस्ने ३६ वर्षीय नरेश भन्ने राम नरेश राउत पटेल र २८ वर्षीय बाल कुमार पटेल रहेका छन् ।अज्ञात व्यक्तिले पूजारी साहको कञ्चटमा गोली प्रहार गरी हत्या गरेको घटनाको अनुसन्धान गर्ने क्रममा उनीहरु लगायत अन्य व्यक्तिहरु पनि संलग्न रहेको भन्ने खुल्न आएपछि २ नम्बर प्रदेश प्रहरी कार्यालय जनकपुर र जिल्ला प्रहरी कार्यालय रौतहटबाट खटिएको प्रहरी टोलीले बौधिमाई नगरपालिका-७ वडकी बंकुल एरियाबाट उनीहरुलाई पक्राउ गरेको हो ।
प्रारम्भिक अनुसन्धानबाट राम नरेशको बुवाले पूजारीसँग ब्याजमा रकम लिएको र रकम तिर्ने क्रममा विवाद भएको प्रदेश प्रहरी कार्यालय जनकपुर जानकारी दिएकाे छ । पुजारी बस्ने मन्दिर नजिक ३ वटा रक्सी पसल रहेको र रक्सी सेवन पश्चात मन्दिरको धारामा आई खुट्टा धुने, पानी खाने र घटना हुनुभन्दा ३ दिन अघि राम नरेश पटेल र पूजारी बिच बिवाद भएको थियो ।
यसैगरी गाउँमा विभिन्न विषयहरुमा छलफल हुँदा पूजारीले फरक मत राख्ने क्रममा राम नरेश पटेल लगायत अन्यसँग धेरै पटक विवाद भएपछि उनले कटुवा पेस्तोल प्रयोग गरी हत्या गरेको र बालकुमार पटेल घटनास्थल नजिक रहि मानिसको आवत जावतलाई निग्रानी गरेको खुल्न आएको छ । घटनामा संलग्न अन्य फरार अपराधीको खोजी भइरहेको र पक्राउ अभियुक्तहरुलाई जिल्ला अदालत गौरबाट १० दिनको म्याद थप भई अनुसन्धान सुरु गरिएको २ नम्बर प्रदेश प्रहरी कार्यालय जनकपुरले जनाएको छ ।
मकवानपुर । जिल्ला समन्वय समिति (जिसस) मकवानपुरका प्रमुख रघुनाथ खुलालले स्वास्थ्य सतर्कता अपनाउन सम्पूर्ण मकवानपुरवासीमा आग्रह गरेका छन् । सोमबार एक विज्ञप्ती जारी गर्दै प्रमुख खुलालले समुदाय स्तरमै कोरोना भाइरसको संक्रमण देखिन थालेकाले आम जिल्लाबासीमा आवश्यक स्वास्थ्य सर्तकता अपनाउन आग्रह गरेका हुन ।
कोरोना भाइरसको अहिलेसम्म कुनैपनि उपचार बिधि आइनसकेको र थोरै सावधानी अपनाइएमा यस भाइरसको सङ्क्रमणबाट बच्न सकिने हुँदा स्वास्थ्य सम्बन्धी मापदण्ड पुरा गर्दै अनुसाशित भएर कार्यहरू गर्नुहोस विज्ञप्ती मार्फत प्रमुख खुलालले भने लामो समयको बन्दाबन्दीका कारण आम सर्वसाधारण जनताको दैनिकीमा ठुलो असर परेको छ । सधैभरी बन्दाबन्दीमै बस्न समेत नसकिने हुँदा जिल्लामा जारी निषेधाज्ञा समेत केही खुकुलो बनाउँदै स्वरुप परिर्वतन गरेर जनतालाई आफ्नो दैनिकीमा फर्काउने लक्ष्य लिईएको छ । खुलाले विज्ञप्तीमा भनेका छन् ।
बन्दाबन्दी वा निषेधाज्ञाको स्वरुप परिर्वतन गर्दैमा पनि यस समस्याको समाधान हुनसक्ने अवस्था नरहेकाले आम मकवानपुरबासी आफै सचेत भएर सुरक्षित हुन खुलालले आग्रह गरेका छन् ।
उनले स्वास्थ्य सम्बन्धी मापदण्डको परिपालना गर्दै सामाजिक दुरी कायम गर्ने, भीडभाड नगर्ने, नियमित रुपमा साबुनपानीले हात धुने, अनिवार्य रुपमा मास्कको प्रयोग गर्ने, सकेसम्म घर बाहिर ननिस्कन र निस्कनै परेमा स्वास्थ्य सुरक्षा सम्बन्धी सावधानी अपनाउन आव्हान गरेका छन् ।
कोरोना भाइरसको सङ्क्रमण भई हालेमा पनि स्वास्थ्य सर्तकता र सावधानी अपनाएमा यस रोगबाट निको हुन सकिने हुँदा त्यसतर्फ ध्यान दिन सबैमा आग्रह समेत उनले गरेका छन ।
त्यस्तै उनले यदाकदा समुदाय स्तरमा कोरोना सङ्क्रमण भएका व्यक्ति, स्वास्थ्यकर्मी, सुरक्षाकर्मीलाई अभद्र व्यहार भएका खबरहरू समेत आएकाले त्यसो नगर्न समेत आग्रह गर्दै समुदायमा कसैलाई कोरोना संक्रमण भईहालेमा नआत्तिकन आफ्नो वडाअध्यक्ष मार्फत उपचार विधिमा जान आग्रह गरेका छन् ।
साथै उनले कोरोना भाइरसको महामारीमा सबै एकजुट भएर लाग्ने र जुट्नेभन्दा विकल्प नभएकाले स्वास्थ्य सुरक्षा अपनाएर सचेत, सुरक्षित भएर कार्य गर्न सम्पूर्ण मकवानपुरबासीलाई आव्हान गरेका छन् ।
प्रमुख खुलालले जारी गरेकाे विज्ञप्ती हेर्नुहाेस
मकवानपुरका स्थानीय तहमा लगाइएको निषेधाज्ञा भदाै १६ बाट हटाउने
Tags: No Comments
मकवानपुर । मकवानपुरका स्थानीय तहमा जिल्ला प्रशासन कार्यालय मकवानपुरले लगाएको निशेधाज्ञा भोलीबाट निरन्तरता नहुने भएकाे छ । हेटाैडा उपमहानगर सहित मनहरी गाँउपालिका थाहा नगरपालिका र भिमफेदी गाँउपालिकामा लगाइएकाे निषेधाज्ञा नहुने तर अत्यावश्यक सेवाकाे अादेशकाे निर्णय भएकाे हाे । निषेधाज्ञाकाे भन्दा व्यवसाय, कार्यालय, बैंक लगायत संस्था संचालनकाे स्वरुप भने परिवर्तन गरिने भएको छ ।
हेटौंडा उपमहानगरपालिका सवै क्षेत्र र मनहरी गाउँपालिकाको राजमार्ग क्षेत्रमा साउन २६ गतेदेखि जारी निषेधाज्ञा भदाै १६ गते नहुने मकवानपुरका प्रमुख जिल्ला अधिकारी दिपकराज नेपालले बताए । साेमबार बिहान बसेको कमाण्ड पोष्टको बैठकले निषेधाज्ञाकाे स्वरूप खुकुलाे वनाउने तर दिउँसोको समयमा बजार र यातायात भने बन्द राख्ने निर्णय भएको प्रजिअ नेपालले बताए । यसै गरी मकवानपुरको थाहा नगरपालिका र भीमफेदी गाउँपालिकामा लगाइएको निषेधाज्ञा पनि हटाईने उनले बताए ।
निषधाज्ञाकाे हालकाे स्वरुपलाई भोलिबाट भने केही सहज बनाइने भएको छ । विहान १० बजेसम्मका लागि सबै प्रकारका व्यवसाय संचालन गर्न दिइने तर यातायात भने विहानकाे समयमा बन्द नै गरिने भएको छ । बैठकले निषेधज्ञा हटाउने निर्णय गरेको भएपनि बजार सञ्चालन भने बिहान १० बजेसम्म मात्र गर्न दिने निर्णय गरेको छ । यो निर्णय भदौ २५ सम्म लागु हुनेछ ।
बैकहरु भने बिहान १० वजेदेखि दिउँसाे ३ बजेसम्म खुल्ने भएकाे छ । बैंक तथा सहकारी सस्थाहरु भदौ १६ गतेबाट सञ्चलनमा आउने भएको छ । बैंक तथा सहकारीको लागि बिहान १० बजेदेखि ३ बजेसम्मको खाेलिने बताइएकाे छ । एकै भवनमा रहेका बैंक तथा वित्तिय सस्थाले भने अालाेपालाे आफ्नो बैंक तथा वित्तिय सस्था सञ्चालन गर्नपर्ने छ । एकै भवनमा धेरै सस्था भएकोले भिड हुने भएपछि यस्तो नियम बनाइएकाे प्रजिअ नेपालले बताए ।
बिहान बजार सञ्चालन भएपनि सबारीसाधन भने रोक लगाईएको छ । दिउँस १० बजेबाट भने टिफर सञ्चालन गर्न पाईने छ भने लोड सबारीहरु साँझ सातबजेपछि मात्र सञ्चालन हुनेछन् । उद्योगको हकमा भने मजदुरलाई क्वारेन्टिनको ब्यवस्थापन गरेर मात्र सञ्चालनमा आउनुपर्नेछ । सार्वजनिक यातायात भने सञ्चालनमा पूर्ण रोक लगाईएको छ ।
हेर्नुहाेस निर्णय