मकवानपुर । मकवानपुरको हेटौंडामा कारको ठक्करबाट १ जनाको मृत्यु भएको छ । हेटौंडा–११ थानाभर्याङमा कारको ठक्करबाट पैदल यात्री ३८ वर्षिय शम्सेर सिंह नेगीको मृत्यु भएको मकवानपुर प्रहरीले जनाएको छ ।
सोमबार पूर्व-पश्चिम राजमार्ग अन्तर्गत बिरगजंबाट चितवनतर्फ जाँदै गरेको बा १६ च ३८७७ नंबरको कारले हेटौंडा ३ बसामाडीका नेगीलाई ठक्कर दिएको थियो । कारको ठक्करबाट घाइते भएका नेगीको उपचारको क्रममा गएराती पुरानो मेडिकल कलेज भरतपुरमा मृत्यु भएको प्रहरीले जनाएको छ ।
ठक्कर दिने कारसहित चालक नियन्त्रणमा रहेको र अनुसन्धान भइरहेको प्रहरीले जनाएको छ ।
मकवानपुर । मकवानपुर प्रहरीले लागूऔषध २६ बोतल वनरेक्स सहित २ जनालाई पक्राउ गरेकाे छ । पक्राउ पर्नेमा हेटौंडा–११ बस्ने ३२ बर्षका बुद्ध गोङ्वा र ११ कै २६ बर्षीय ईन्द्रबहादुर अधिकारी रहेका छन् ।
हेटौंडा उपमहानगरपालिका वडा नम्बर १५ रातोमाटे विक्रमचोक स्थित भित्री सडक खण्डमा पथलैयाबाट हेटौंडातर्फ आउँदै गरेको ना २६ प ५८४३ नम्बरको मोटरसाइकल आइतबार चेक गर्दा उनीहरु लागूऔषध सहित पक्राउ परेका हुन् । उनीहरुले मोटरसाइकलको ट्याङ्की भित्र लुकाएर ल्याएको अवस्थामा २६ बोतल वनरेक्स फेला पारेको जिल्ला प्रहरी कार्यालय मकवानपुरका प्रवक्ता डीएसपी टेकबहादुर कार्कीले जानकारी दिए ।
पक्राउ परेका दुवैजनालाई आवश्यक अनुसन्धान एवम् कारबाही प्रक्रिया अघि बढाइएको प्रहरीले जनाएकाे छ ।
मकवानपुर । मकवानपुरको राक्सिराङमा भिरबाट लडेर जनाकाे मृत्यु भएको छ ।
मृत्युु हुनेमा मनहरी गाउँपालिका-६ घर भई हाल राक्सिराङ गाउँपालिका-९ धुरु बस्दै आएका ४० वर्षीय मनोज राई रहेको मकवानपुर प्रहरीले जनाएको छ ।
जिल्ला प्रहरी कार्यालय मकवानपुरका अनुसार राईको भिरबाट लडेर मृत्यु भएको हो । शुक्रवार साँझ राक्सिराङ ९ ससुराली घरबाट मादक पदार्थ सेवन गरी आफुखुसी निस्किएका राई अबेरसम्म नफर्किएपछि आफन्तले खोजतलास गरेका थिए ।
राई शनिवार विहान ससुराली घरदेखि करिब २ किलोमिटर दक्षिण धुरु भिरबाट लडेर मृत अवस्थामा भेटिएको प्रहरीले बताएको छ । घटनास्थलमा प्रहरीको टोली पुगेर अनुसन्धान तथा मुचुल्का उठाउने कार्य भई रहेको छ ।
मकवानपुर । पूर्वपश्चिम राजमार्ग अन्तरगत बारा जिल्लाको अमलेखगञ्जस्थित तीन नम्वर पुल नजिकैको सडक खण्डमा विहीबार विहान भएको बस दुर्घटनामा हालसम्म १६ जनाले ज्यान गुमाएका छन ।
मृत्यु भएका मध्ये १२ जनाको सनाखत भएको मकवानपुर प्रहरीले जनाएको छ । ४ जनाको सनाखत हुन बाँकी रहेको जिल्ला प्रहरी कार्यालय मकवानपुरका प्रहरी निरीक्षक एवम् प्रवक्ता बलराम श्रेष्ठले जानकारी दिए ।
नारायणगढबाट वीरगञ्जतर्फ जाँदै गरेको बा ०६–००१ ख ०११० नम्बरको बस जितपुर सिमरा उपमहानगरपालिका २२ स्थित अमलेखगञ्जको तीन नम्वर पुलस्थित सडकखण्डबाट २० मिटर तल खोलामा खसेको थियो । बसमा ५० जना सवार रहेको बताइएको छ ।
मृत्यु हुनेमा बाराको कलैया उपमहानगरपालिका वडा नम्वर– २ बस्ने वर्ष ४० को लिलाराज चौधरी, चितवनको खैरहनी नगरपालिका वडा नम्वर ५ बस्ने वर्ष ६३ की नन्दकुमारी पुडासैनी, चितवनकै कालिका नगरपालिका रमाइलो चोक बस्ने शंकर कंडेलका १४ वर्षीय छोरा सफल कँडेल रहेका छन् ।
त्यस्तै पर्साको वीरजंग महानगरपालिका वडा नम्वर १६ वस्ने वर्ष ६५ को सोमबहादुर चौरसिया, सोही स्थान बस्ने वर्ष ३५ की मन्निदेवी चौरसिया, मकवानपुरको हेटौंडा उपमहानगरपालिका वडा नम्वर ७ बस्ने ५५ वर्षीया शुभलक्ष्मी श्रेष्ठ, हेटौंडा ७ कै २० वर्षकी स्वस्तिका श्रेष्ठ, बाराको कलैया उपमहानगरपालिका वडा नम्वर १० बस्ने वर्ष ३५ की नाजलिन खातुन, कलैया १० बस्ने इजाजत अन्सारी, बाराकै जितपुरसिमरा उपमहानगरपालिका वडा नम्वर २२ बस्ने वर्ष २८ को सुरेश विक रहेका छन् ।
सोही दुर्घटनामा परी सुरक्षाकर्मी लालबहादुर बोगटी र धनुषाको जनकपुर ५ बस्ने ५० वर्षका सन्तोष कुमार रायको पनि मृत्यु भएको प्रहरीले जनाएको छ ।
बसका चालक स्याङजा आदिखोला गाउँपालिका वडा नम्वर ६ बस्ने वर्ष ४० का कोदिप्ति नारायण ढकालको भने हेटौंडाकै चुरेहिल अस्पतालमा उपचार भइरहेको र उनको अवस्था सामान्य रहेको प्रवक्ता श्रेष्ठले बताए ।
बस ब्रेकफेल भएर दुर्घटना भएको हुन सक्ने प्रहरीले प्रारम्भिक अनुमान गरेको छ ।
मकवानपुर । मकवानपुरमा छुट्टाछुट्टै घटनामा २ जनाको मृत्यु भएको छ । मकवानपुरको राक्सीराङ गाउँपालिका वडा नंबर ६ मा घर नजिकैको ढिस्को खसेर पुरिदा ४७ वर्षका तोकबहादुर चेपाङको मृत्यु भएको छ । वडा नंबर ६ मागेनीमा रहेको घरमा एक्लै बसेको अवस्थामा एक्कासी ढिस्को खसेर पुरिदा उनको ज्यान गएको राक्सीराङ गाउँपालिकाका अध्यक्ष राजकुमार मल्लले बताए ।
यसैगरी मकवानपुरको कैलाश गाउँपालिका वडा नंब ३ मा रहेको कालिखोलाले बगाउँदा स्थानीय ६५ वर्षका दलबहादुर चेपाङको ज्यान गएको बागमती प्रदेश प्रहरी कार्यालय हेटौँडाले जनाएको छ । कालिका बजारबाट सामान किनेर घर फर्कने क्रममा खोलाले बगाएर उनको ज्यान गएको प्रहरीको भनाई छ ।