हेटाैडाकाे १६ वडामा एमालेकाे वडा अध्यक्ष सिफारीस
Tags: No Comments
मकवानपुर /स्थानीय तहको निर्वाचन नजिकिदै गर्दा नेकपा एमाले मकवानपुरले हेटौंडा उपमहानगरपालिकाको १९ मध्ये १६ वटा वडाका अध्यक्षहरू सिफारिस गर्ने काम टुङ्याएको छ ।
उपमहानगरपालिकाको मेयर उपमेयरबारे आज २५ चैतमा उमेदवार टुङ्याउने भनिएता पनि आगामी २७ चैतसम्मको लागि म्याद लम्ब्याईएको छ । पार्टी भित्र आकाक्षि बढि भएपछि मिति लम्ब्याईएको हो ।
बागमती प्रदेश राजधानी तथा प्रदेशको एक मात्रै उपमहानगर हेटौंडा उपमहानगरपालिकाको वडा ३, १० र १७ बाहेक अन्य वडामा वडाअध्यक्ष भने टुङ्याएको छ । पार्टी अध्यक्ष एकालाल श्रेष्ठका अनुसार यी मध्ये केहि वडाहरुमा सर्वसम्मत उमेद्वार छनौट भएका छन्, भने केहि वडाले वडा अध्यक्षमा ३ जनासम्मको नाम जिल्ला कमिटीलाई सिफारिस गरेको थियो ।
वडा अध्यक्षको लागि हेटौंडाको वडा नम्बर १ मा सर्वसम्मत उमेद्वार छनौट भएको छ । १ नम्बर वडामा उत्तमप्रसाद पौडेललाई अध्यक्षको उम्मेदवार बनाउने निर्णय गरेको छ । वडा कमिटीको अध्यक्ष समेत रहेका पौडेलको नेतृत्वमा वडा सदस्यमा खुलातर्फ सोनामसिं स्याङ्तान र रामकृष्ण अधिकारी, महिला सदस्यमा मनु दाहाल र दलित महिला सदस्यमा ईश्वरी रसाईलीलाई उम्मेदवार बनाउने निर्णय गरेको छ । वडा सदस्यमा ईश्वरी रसाईली र खुला सदस्यमा सोनामसिंह स्याङ्तान २०७४ सालको स्थानीय तहको निर्वाचनमा निर्वाचित वडा सदस्यहरु हुन् ।
वडा नम्बर २ बाट बर्तमान वडाध्यक्ष हरि राउत पुनः उम्मेद्वार बनेका छन् । वडा कमिटिको बैठकले राउतलाई सर्वसम्मत रुपमा वडाध्यक्षको उम्मेद्वार बनाएको हो । वडा नम्बर २ को दलित महिला सदस्यमा सुमित्रा सुनार कामीलाई सर्वसम्मत गर्दा बाँकी रहेको खुल्ला वडा सदस्य र महिला सदस्यहरुमा भने ८ जनालाई सिफारिस गरिएको छ । सिफारिस हुनेहरुमा रामकृष्ण तिमल्सिना, महेश्वरमान श्रेष्ठ, रेनु गुरुङ, शिशिर सुवेदी, जितेन्द्र श्रेष्ठ, चन्द्रावति पनेरु, सिता तिमल्सिना र अञ्जु अधिकारी रहेका छन् ।
वडा नम्बर ४ को अध्यक्षमा नेकपा एमालेले नवीन सिग्देललाई सिफारिस गर्ने निर्णय गरेको छ । एमाले ४ नम्बर वडा कमिटीको बैठकले सर्वसम्मत वडा अध्यक्ष र सदस्यहरुको नाम सिफारिस गर्ने निर्णय गरेको हो । बैठकले वडा सदस्यमा जनरल श्रेष्ठ, जगन्नाथ पाण्डे, गीता त्रिपाठी र विष्णुदेवी देउलालाई सिफारिस गरेको छ । वडा अध्यक्षमा सिग्देल र सदस्यमा जनरल श्रेष्ठ दोस्रो कार्यकालका लागि उम्मेदवार हुने भएको छ भने पाण्डे, त्रिपाठी र देउला नयाँ अनुहार हुन् ।
एमालेले हेटौंडा–५ को वडा अध्यक्षमा सुशील घिमिरेलाई उम्मेदवार बनाउने भएको छ । वडा कमिटीले वडा अध्यक्षमा घिमिरेलाई उम्मेदवार बनाउने सर्वसम्मत निर्णय गरेको हो । ५ नम्बर वडा कमिटीले वडा सदस्यमा ज्ञानु थापा, राम बहादुर राई, भगवती बिक र रञ्जीता सिलवालको नाम सिफारिस गर्ने निर्णय गरेको छ । ज्ञानु थापा र भगवती बिक अहिले पनि वडा सदस्य हुन्, भने राई र सिलवाल नयाँ हुन् ।
हेटौंडा–६ को वडा अध्यक्षमा विश्वराज राई सर्वसम्मत सिफारिस भएका छन् । वडा कमिटीले राईको नाम सर्वसम्मत सिफारिस गर्ने निर्णय गरेको हो । अन्य सदस्यहरू नाम सिफारिस बाकी रहेको छ ।
यस्तै एमाले ७ नम्बर वडा कमिटीले वर्तमान अध्यक्ष राजन थापालाई नै आगामी निर्वाचनमा उम्मेदवार बनाउने निर्णय गरेको छ । थापालाई सवसम्मत उमेदवार बनाउने निर्णय गरेको हो । यस्तै सदस्यमा देवराज रिमाल र नरबहादुर भ्लोन, दलित महिला सदस्यमा सपना बिक र महिला सदस्यमा तुलसा अधिकारी सर्वसम्मत चयन हुनुभएको छ । रिमाल हाल जिसस सदस्य हुन् ।
त्यसैगरी हेटौंडा ८ को अध्यक्षमा एमालेको तर्फबाट तीनजनाको नाम सिफारिस भएको छ । सिफारिस हुनेहरुमा युवा नेता बोलबहादुर कार्की, यसोधा उप्रेती र रमेशकुमार पौडेल छन् । वडा सदस्य खुल्लामा गोपाल श्रेष्ठ र राजु मुक्तान सर्वसम्मत हुँदा महिला सदस्यमा मञ्जु भुर्तेल, सुशिला मल्ल र सुमित्रा पाण्डे सिफारिस हुनु भएको छ । दलित महिला सदस्यमा कल्पना विक र ममता देउला सिफासिर हुनु भएको छ ।
त्यस्तै एमालले वडा नम्बर ९ मा युवा नेता नरेन्द्र भण्डारी सहित ३ जनाको नाम वडा अध्यक्षमा सिफारिस गरेको छ । पार्टी वडा कमिटीको बैठकले नरेन्द्र भण्डारीसँगै हालका वडा अध्यक्ष लक्ष्मण भण्डारी र गोमा शाहको नाम सिफारिस गर्ने निर्णय गरेको छ । यस्तै २ जना खुला सदस्यमा ६ जनाको नाम सिफारिस गरिएको छ । खुला सदस्यमा मदन न्यौपाने, यदुवंश खतिवडा, नारायण खतिवडा, रामकुमार श्रेष्ठ, टिका प्रसाद भट्टराई र सिताराम पौडेलको नाम सिफारिस गर्ने निर्णय भएको छ । महिला सदस्यमा मीना अर्याल र दलित महिलामा लक्ष्मी नेपालीको नाम सिफारिस गरिएको छ । लक्ष्मी नेपाली हालपनि पनि वडा सदस्य हुन भने अर्याल नयाँ हुन् ।
हेटौंडा–११ को वडा अध्यक्षमा तीनजनाको नाम सिफारिस गरेको छ । वडा कमिटीको बैठकले वडा अध्यक्षमा जुना दाहाल, रामचन्द्र न्यौपाने र दीपक सिवाकोटीको नाम सिफारिस गरेको छ । यस्तै वडाबाट सदस्यमा खुलातर्फ अक्कल बहादुर रोक्का (तीर्थ) र सूर्यबहादुर खुलाल, महिला सदस्यमा गोपिनी सापकोटा र दलित महिला सदस्यमा गीता सुनारको नाम सिफारिस गर्ने निर्णय सर्वसम्मत भएको छ । दाहाल र न्यौपाने हाल वडा सदस्य हुन् ।
यसैगरी हेटौंडा–१२ को अध्यक्षमा राजेश नगरकोटीलाई उम्मेदवार बनाउन सर्वसम्मत सिफारिस गर्ने निर्णय गरेको छ । वडा कमिटीले नगरकोटीलाई सर्वसम्मत अध्यक्ष पदको उम्मेदवार बनाउने निर्णय गरेको हो ।
खुला सदस्यतर्फ ज्ञानबहादुर श्रेष्ठ र महेश भट्टराई, महिला सदस्यतर्फ रुक्मिणी स्याङ्तान र दलित महिलातर्फ गीता परियारलाई सर्वसम्मत सिफारिस गर्ने निर्णय गरेको छ ।
हेटौंडा– १३ मा नेकपा एमालेका तर्फबाट वडाध्यक्षमा पेम्बा लामा सर्वसम्मत चयन भएका छन् । सदस्यहरुमा आशिष थापा, बुद्द गोले, बिष्णुमाया परियार र बिष्णुमाया थिङ सर्बसम्मतरुपमा सिफारिस भएको पार्टी अध्यक्ष श्रेष्ठले बताए।
त्यस्तै वडा नम्बर १४ मा पनि सर्वसम्मत रुपमा वडाध्यक्ष सिफारिस भएको छ । वडा कमिटिको बैठकले बर्तमान वडाध्यक्ष तथा नेकपा एमालेका जिल्ला सचिवालय सदस्य दिपक खड्कालाई वडाध्यक्षको उम्मेद्वार बनाउने निर्णय गरेको छ ।
त्यस्तै हेटौंडा–१५ को वडा अध्यक्षमा सुनिल मोक्तानलाई उम्मेदवार बनाउन सिफारिस गरेको छ । वडा कमिटीको बैठकले वडा अध्यक्षसहित सदस्यहरु पनि सर्वसम्मत सिफारिस गर्ने निर्णय गरेको छ । वडा कमिटीले वडा सदस्यमा महिलातर्फ पातलीमाया गोङ्बा, दलि महिलातर्फ मिनु विश्वकर्मा, खुलातर्फ राजेन्द्र तितुङ र सिंह बहादुर लोलाई उम्मेदवार सिफारिस गर्ने निर्णय गरेको छ ।
त्यस्तै एमालले हेटौँडा–१६ बाट बसन्तप्रसाद लामिछानेलाई वडाध्यक्ष बनाउन सिफारिस गरेको छ । वडा कमिटीको बैठकले लामिछानेलाई वडाध्यक्षमा सर्वसम्मत चयन गरेको हो । वडा सदस्यमा खुलातर्फ राजेन्द्र गरन्जा र कृष्ण बहादुर रुम्बा, दलित महिलातर्फ पवित्रा बिश्वकर्मा र महिलातर्फ अस्मिता भुषाललाई उम्मेदवार बनाउने निर्णय गरेको छ ।
त्यस्तै एमालेले हेटौँडा–१८ मा हालका अध्यक्ष अनिलकुमार बानीयाँलाई नै वडाध्यक्षमा उम्मेद्वार बनाएको छ । वडा कमिटिको बैठकले बर्तमान वडाध्यक्ष समेत रहेका बानीयाँलाई वडाध्यक्षको उम्मेद्वार बनाउने निर्णय गरेको हो । सदस्यहरुमा तोयानाथ तिमल्सिना, विश्वनाथ ढुंगाना, महिला सदस्यमा कल्पना कुईकेल र दलित महिला सदस्यमा पुजा मग्रातीलाई उमेदवार बनाउने सर्वसम्मत निर्णय गरेको छ ।
त्यस्तै हेटौंडा–१९ मा अध्यक्षका लागि तीनजना आकांक्षीको नाम सिफारिस गरिएको छ । वडा कमिटीको बैठकबाट अध्यक्षका आकांक्षी बाहालवाल वडा अध्यक्ष नरनाथ सुवेदी सहित रत्नबहादुर ब्लोन र इन्दिरा तामाङको नाम सिफारिस गर्ने निर्णय भएको छ । सदस्यमा दलित महिलामा शान्ति बिक र महिलामा रमा गोले सर्वसम्मत सिफारिस भएका छ्न । २ जना खुला सदस्यमा कृष्णमान स्याङ्तान, प्रताप थिङ र राजकुमार बज्युको नाम सिफारिस गरिएको छ । इन्दिरा तामाङ र शान्ति बिक हाल पनि वडा सदस्य हुन् ।
बाकी ३ वटा वडामा सक्दो चांडो उम्मेदवारी टुङ्याइने पार्टीले जनाएको छ ।
मकवानपुर/नजिकीदै गरेको स्थानीय तहको निर्वाचनमा मकवानपुरमा सत्तारुढ दलबीच वडास्तरबाटै गठबन्धन गर्ने सहमति भएको छ ।
आज नेपाली कांग्रेस मकवानपुरको पार्टी कार्यालयमा बसेको सत्तारुढ गठबन्धनको बैठकले ३० वैशाखमा हुने स्थानीय तह निर्वाचनमा वडा तहबाटै गठबन्धन गर्ने सहमित गरेको हो । अब आगामी निर्वाचनमा जिल्लाको १०२ वटै वडा र दशवटा स्थानीय तहमा गठबन्धन कांग्रेस मकवानपुर सभापति बुद्ध लामाले बैठक पश्चात् आयोजित पत्रकार सम्मेलनमा बताए ।
केन्द्रको निर्देशन अनुसार जिल्ला, स्थानीय तह र वडा तहमै गठबन्धनको संयन्त्र तयार गरिने सभापति लामाले बताए ।“गठबन्धनको सहमति जुटेको भएपनि कुन पार्टीले उम्मेदवार को उठाउने भन्ने बारेमा टुंगो लागेको छैन” लामाले भने “प्रारम्भिक छलफल भएको हो, केन्द्रीय निर्देशन अनुसार हामी अगाडि बढ्नेछौं।”
गठकन्धनले निर्वाचनको लागि कांग्रेसको जिल्ला सभापति बुद्ध लामाको संयोजकत्वमा पाँच सदस्यीय सचिवालय बनाउने समेत निर्णय गरेको छ । जिल्लाको सचिवालयमा नेकपा माओवादी केन्द्रका सर्केश घलान, नेकपा (एकीकृत समाजवादी) का जिल्ला अध्यक्ष श्रीधर पाखरेल, जनता समाजवादी पार्टीका सोनामसिं स्याङ्तान र राष्ट्रिय जनमोर्चाका प्रतिनिधि सहभागी रहनेछन् ।
निर्वाचन लक्ष्यित सचिवालय स्थानीय तह र वडासम्मै नै यही संरचनामा निर्माण हुनेछ । बैठकले स्थानीय तह र वडासम्मै गठबन्धनको संयन्त्र निर्माण गर्न आवश्यक थप छलफल र बैठक बस्न समेत पार्टीको तल्लो संरचनालाई निर्देशन दिएको छ ।
हामी एक्लै काफि छौः एमाले अध्यक्ष श्रेष्ठ
गठबन्धनलाई पराजित गर्ने सार्मथ्य नेकपा एमाले एक्लैसंग भएको पार्टीका जिल्ला अध्यक्ष एकालाल श्रेष्ठले बताएका छन् ।
नेकपा एमाले मकवानपुरका अध्यक्ष श्रेष्ठले पाँच दलीय गठबन्धनलाई पराजित गर्ने सार्मथ्य नेकपा एमालेसँग रहेको दाबी गरेका हुन् ।

पार्टीको निर्वाचन लक्ष्यित कार्यक्रमलाई सम्बोधन गर्दै नेता श्रेष्ठले गठबन्धनका बिरुद्ध एमाले कार्यकर्ता एक हुनेबेला आएकोले कार्यकर्ता जनताको घरदैलोमा पुग्नुपर्ने बताए । सत्तारुढ गठबन्धन एउटै कित्तामा उभिएसँगै एक्लिएको एमालेले मकवानपुरमा राप्रपासँग तालमेल गर्ने तयारी गरेको छ यद्यपि राप्रपा पनि हालै मात्रै फुटेको कारण राप्रपाबाट एमालेलाई कति बल पुग्ला विचारणीय छ । “हामी विरुद्ध पहिला पनि गठबन्धन भएको हो, हामीलाई केही फरक पर्दैन” श्रेष्ठले भने ।
बागमती गाउँपालिकामा गठबन्धन भत्कीन्छः राष्ट्रिय सभा सदस्य राई
नेकपा एमाले बागमती प्रदेश कमिटि सदस्य तथा राष्ट्रिय सभाको सदस्य रामचन्द्र राईले सत्तागठबन्धनको अप्राकृतिक गठबन्धनलाई बागमती गाउँपालिकाका जनताले भत्काईदिने दाबि गरेका छन् ।
नेकपा एमाले बागमती गाउँपालिकाले आयोजना गरेको निर्वाचन लक्षित प्रशिक्षण कार्यक्रमलाई सम्बोधन गर्दै राइले गठबन्धन जनताको इच्छा विपरीत भएकोले त्यो जनताले नमान्ने बताए । पार्टीको जिल्ला सहईन्चार्ज समेत रहेका राईले निर्वाचनमा उम्मेदवार तय गर्नेदेखि सर्वसाधारण माझ पार्टीको एजेन्डा लैजाने विषयमा एमाले अगाडि रहेको बताए ।
मकवानपुरे जनता एमालेको पक्षमा ः पूर्व मुख्यमन्त्री पौडेल
बागमती प्रदेशका प्रथम मुख्यमन्त्री डोरमणि पौडेलले स्थानीय तहको निर्वाचनमा मकवानपुरे जनताले एमालेको पक्षमा मतदान गर्ने दाबि गरेका छन् ।

एमालेको नेतृत्वमै हेटौँडा प्रदेशको राजधानी बनेको विषय मकवानपुरे जनताले बुझेको उनले स्मरण गराए । हेटौँडा उपमहानगरपालिकाका नेतृत्व लिएको एमालेले नगरमा गरेका विकास निर्माणको काम देखेर यो पटक पनि यहाँका सर्वसाधारणले एमालेकै पक्षमा मतदान गर्ने उनले बताए । कार्यक्रममा पार्टीको केन्द्रीय निर्वाचन आयोगका सदस्य अनन्त पौडेलले सत्ता गठबन्धन अत्तालिएको भन्दै एमालेको पक्षमा जनलहर देखिएको दाबी गरे ।
एमाले एक्लै मैदानमा जाने
गत निर्वाचनको मतपरिणाम अनुसार नेकपा एमाले मकवानपुरको सबैभन्दा ठूलो दल हो । तर निर्वाचनको केही महिना मात्रै अघि पार्टी विभाजनको पीडा भोगेको एमाले अब एक्लै मैदानमा ओर्लदै छ ।
नेकपा एमाले स्थानीय तह निर्वाचनको आन्तरिक तयारीमा जुटीरहेको बेला सत्तापक्षको गठबन्धनले एमालेलाई धक्का पुग्ने विश्लेषकहरुको भनाई छ । एमालेविरुद्ध जिल्लाका सत्तारुढ गठबन्धन एक भएर निर्वाचनमा होमिने भएपछि एमालेले तयारीलाई अझै चुस्त बनाउनु पर्ने चुनौती देखिएको छ ।
अघिल्लो स्थानीय तह निर्वाचनमा एमालेले मकवानपुरमा ६ वटा स्थानीय तह तथा नेपाली कांग्रेस र माओवादीले २ /२ वटा स्थानीय तह जितेका थिए । एमालेले आमरुपमा पार्टी विभाजनको असर नपरेको दावी गरे पनि नेकपा (एकीकृत समाजवादी) को वडा तहैसम्म संरचना निर्माण भएको छ । एमालेबाट विभाजन भएको निर्माण भएको नेकपा (एस), नेपाली कांग्रेस, माओवादी केन्द्र, जनता समाजवादी र राष्ट्रिय जनमोर्चाले एक भएर वडा तहबाटै गठबन्धन गर्ने सहमति गरेसँगै मकवानपुरे राजनीतिमा एमाले एक्लो भएको छ ।
मकवानपुरगढी गाउँपालिका नेपालको दोस्रो बालमैत्री स्थानीय तह घोषित
Tags: No Comments
मकवानपुर । तोकिएको ५१ वटा सूचकहरुमाथि सफलता हासिल गरेपछि शानिबार बागमती प्रदेशका मुख्यमन्त्री राजेन्द्र पाण्डेले मकवानपुरगढी गाउँपालिकालाई बालमैत्री स्थानीय शासन लागु भएको स्थानीय तहको रुपमा घोषिणा गरेका छन् ।
यसरी घोषित हुने यो नेपालकै दोस्रो गाउँपालिका हो ।
यस अघि घोषित पाल्पाको रम्घा गाउँपालिका ५१ वटा सूचकमा सफलता हासिल गर्ने पहिलो स्थानीय तह बनेको थियो भने अन्य २ गाउँपालिका यसअघि तोकिएको ३९ वटा सूचकमा सफलता हासिल गरेर बालमैत्री घोषित भएका थिए । नेपालमा हालसम्म ४ वटा गाउँपालिकालाई बालमैत्री घोषणा गरिएकोमा मकवानपुर जिल्लाकै ३ वटा रहेका छन् । मकवानपुरगढीसहित मकवानपुरको मनहरी, बकैया र पाल्पा रम्घा गाउँपालिकामा बालमैत्री शासन लागु भएको छ । मकवानपुरगढी नेपालको चौथो, बागमती प्रदेशको तेस्रो र ५१ वटा सुचकमा नेपालकै दोस्रो बालमैत्री स्थानीय शासनयुक्त गाउँपालिका भएकाे छ ।
गाउँपालिकाले बालमैत्री स्थानीय शासनको सबै सूचकहरु पूरा गरी जिल्ला समन्वय समिति मकवानपुर र बागमती प्रदेश सरकारको अनुगनम तथा अनुमति तथा सिफरिसमा शनिबार गाउँपालिका बालमैत्री गाउँपालिका घोषणा गरिएको हो ।
बागमती प्रदेशका मुख्यमन्त्री पाण्डेको प्रमुख आतिथ्य र अर्थ समितिको सभापति तथा प्रतिनिधिसभा सदस्य कृष्ण प्रसाद दहाल, प्रदेशको सामाजिक विकास मन्त्री कुमारी मोक्तान लगायतको सहभागीतामा मकवानपुरगढी गाउँपालिकालाई स्थानीय बालमैत्री शासन लागू भएको गाउँपालिका घोषणा गरीएको हो ।
गाउँपालिकाले ५ वटा मुख्य सूचक भित्रका ५१ वटा सूचकहरु चरणबद्ध रुपमा पारेर गाउँपालिका भित्र बालमैत्री शासन लागू गरेको हो । बाल बचाउँ, बाल विकास, बाल संरक्षण, बाल सहभागिता र संस्थागत विकास मुख्य सूचक रहेका छन् । बालमैत्री घोषणा आवश्यक ५१ वटा सूचकहरुमा ४० वटामा शतप्रतिशत र बाँकी ११ वटा सुचकमा ९९ दशमलब ७५ प्रतिशत नतिजा हासिल गरेको मकवानपुरगढी गाउँपालिका अध्यक्ष विदुर हुँमागाईंले बताए ।

आर्थिक बर्ष २०७६/०७७ को बार्षिक बजेट नीति तथा कार्यक्रममा गाउँपालिकाले बालमैत्री स्थानीय शासन नीतिगत अबलम्बन गर्ने निर्णय गरेको थियो । त्यसपछि गाउँपालिकाले २०७७ माघ १९ र २० गते बालमैत्री स्थानीय शासन नीतिगत अवलम्बन तथा घोषणाको लागि गाउँपालिकास्तरमा हस्ताक्षर गर्दै सामुहिक प्रतिवद्धता गरेको थियो । गाउँपालिकाको ८ वटै वडामा टोल, विद्यालय, वडा तथा पालिका स्तरमा बाल समुहहरुको गठन तथा क्रियाशिलतालाई तिब्र बनाएको थियो ।
आर्थिक बर्ष २०७७/७८ को बार्षिक बजेट नीति तथा कार्यक्रममा २०७८ को मंसिरभित्र बालमैत्री घोषण गर्ने निर्णय गरेको थियो । त्यस्तै आर्थिक वर्ष ०७८/७९ को नीति तथा कार्यक्रममा,“बालमैत्री स्थानीय शासन, मकवानपुरगढी गाउँपालिकाको मुख्य अभियान” शुरु गरी यही फागुन २९ गते गाउँपालिकाको ८ वटै वडालाई बालमैत्री घोषणा गरिएको थियो ।
हाल गाउँपालिकामा १ सय ३ वटा विद्यालयमा आधारित र १४ वटा समुदायमा आधारित बालविकास केन्द्र संचालनमा रहेको अध्यक्ष हुँमागाईंले बताए । १ सय ३ वटा बाल समुहहरु, वडा र गाउँपालिका बालसमुह सञ्जाल ९ वटा गरी पालिकाभित्र १ सय १२ वटा बालसमुहमा १७ सय ६२ बालबालिकाहरुको प्रत्यक्ष सहभागिता रहेको उनले बताए । बालमैत्री स्थानीय कार्यान्वयन तथा दिगोपनाको लागि वडास्तरको लगानी योजना र पाँच बर्षे रणनितिक योजना बनाइएको छ ।
घरधुरी सर्वेक्षण २०७७ अनुसार गाउँपालिकामा ४ हजार ६ सय २४ बालक र ३ हजार ६ सय ७२ बालिका गरी कुल ८ हजार २ सय ९३ बालबाललिका रहेका छन् । ५ हजार ३ घर धुरी रहेको गाउँपालिकामा महिला १२ हजार ६२ र पुरुष १३ हजार ४३ गरी कुल जनसंख्या २५ हजार १ सय ५ रहेको छ ।

बालमैत्री स्थानिय शासन राष्ट्रिय रणनीति एवं बालमैत्री स्थानीय शासन कार्यान्वयन कार्यविधि २०६८, घोषणा कार्यविधि २०७०, बालमैत्री स्थानीय शासन कार्यन्वयन निर्देशिका २०७८, स्थानीय सरकार संचालन ऐन २०७४ परिच्छेद ३ दफा १२ को ग बमोजिम बालमैत्री स्थानीय शासन अवधारणाको अवलम्बन गरेर कार्यान्वयनमा ल्याएको छ ।
नेपालले अन्तराष्ट्रिय बालअधिकार महासन्धी १९८९ लाई २०४७ भाद्र २९ गते अनुमोदन गरेको थियो । त्यसपश्चिात नेपाल सरकारले बालअधिकारलाई संस्थागत गर्नका लागि बालअधिकार ऐन २०७५, नेपालको संविधान २०७२ को भाग ३ मैलिक हक धारा ३९ मा कानुनी नीतिगत व्यवस्था गरेको थियो । सोही अनुरुप सरकारले नेपालका सबै स्थानीय तहलाई सन २०३० सम्ममा बालमैत्री घोषणा गर्ने लक्ष्य लिएको छ ।
मकवानपुर /विमेन इन रोटरी डिष्ट्रिक ३२९२ कमिटीले चेपाङ् महिलाको आर्थिक वृद्धिमा चासाे राखेकाे छ । कमिटीले मकवानपुरकाे राक्सिराङ्ग गाउँपलिका ८ का चेपाङ् महिलाहरुको आर्थिक हैसियत बढाउनको लागि मौरी पालन प्रदान गरेको छ ।
कमिटीले चेपाङ महिलाहरुलाई तालिमपछि मौरी घार वितरण गरेको छ । चेपाङ महिलाहरुको आर्थिक आर्थिक सशक्तिकरणका लागि सहयोग गरिएको हो । विमेन इन रोटरी कमिटी ३२९२ ले गत पौष महिना पुतलिको घर नाटक च्यारिटि मन्चन गरेको थियो । चर्चित रगकलाकार निशा शर्माको मुख्य भुमिका रहेको नाटकबाटै रकम संकलन गरेको थियो । महिलाहरुको लागि महिला नै भन्ने नाराका साथ संकलन गरिएको रकम राक्सिराङ गाउँपालिकाको समन्वयमा उक्त स्थानका चेपाङ महिलाहरुको लागि तालिम तथा मौरी घार वितरण गरिएको थियो ।
१५ जना चेपाङ महिलाहरुको सहभागिता रहेको तालिममा युनिक मौरी पालन उद्योग सञ्चालक तथा व्यवस्थापक सालिकराम बानियाँले सहजिकरण गरेका थिए । तालिममा मौरीपालनको परिचय, महत्व, वस्तुस्थिति, चुनौती, मौरीको जीवनचक्र र वर्ग विभाजन, मौरीपालनमा प्रयोग हुने घार तथा सामग्रीहरु, मौरीगोलामा हुने वार्षिक जीवनचर्या र समसामयिक गोला व्यवस्थापन, मौरीको गृहत्याग, गोला विभाजन, कृत्रिम आहारा र आधार चाका तथा चाका व्यवस्थापन, मौरी गोलामा हुने लुट लडाईं र रोकथाम, बितपाते मौरी, तिनको नियन्त्रण तथा व्यवस्थापन सम्बन्धी प्रशिक्षणका गराइएको बानियाँले बताए ।
महिलाहरुलाई आर्थिक रुपमा शसक्त बनाई समाजमा विद्यमान चेलिवेटि वेचविखन, वालविवाह, अशिक्षा जस्ता कुरितिहरुलाई हटाउन आर्थिक शसक्तिकरण जरुरी रहेकोले आफूरुहरुले सानो प्रयास स्वरुप यो कार्यक्रमको आयोजना गरिएको विमेन इन रोटरी प्रमुख सपना रिजालले बताइन् ।

कार्यक्रममा राक्सिराङ् गाउँपालिका ८ का वडा अध्यक्ष रामकृष्ण प्रजाले चेपाङ महिलाहरुको आर्थिक विकासको लागि तालिमले महत्वपुर्ण भुमिका निर्वाह गर्ने बताए ।
विमेन इन रोटरि कमिटी ३२९२ नेपाल भुुटानको आर्थिक सहयोग तथा राक्सिराङ गाउपालिकाको समन्वयनमा सञ्चालन भएको उक्त कार्यक्रम मिति २९ फागुनदेखि ३ दिनसम्म सञ्चालन गरिएको स्थानिय स्तरमा कार्यक्रमको व्यवस्थापन गरेका चिरञ्जिवी पौडेलले बताए ।
मकवानपुर /जिल्ला प्रहरी कार्यालय मकवानपुरले लागु औषध सहति २ जनालाई नियन्त्रणमा लिएको छ । प्रहरीले गोप्य सूचनको आधारमा हेटौंडा १४ घर घई हेटौंडा ५ मा डेरा गरी बस्ने २६ वर्षीय सन्देश दुलालको डेराकोठामा तलासी गर्दा लागु औषध भेटेको हो ।
जिल्ला प्रहरी कार्यालय मकवानपुरका प्रवक्त प्रहरी नायव उपरीक्षक जयश्वर रिमालका अनुसार लागुऔषध डाईजेपाम १८ एम्पुल, फेनारगन १६ एम्पुल, नुफिन १६ एम्पुल गरी ५० एम्पुल सहित दुलाललाई नियन्त्रणमा लिएको हो ।
यसैगरी प्रहरी हेटौंडा ४ बाट अर्का युवालाई पनि नियन्त्रणमा लिएको छ । ओखलढुंगा जिल्ला पोखरेली गाउँपालका ४ घर भई मकवानपुर हेटौंडा ४ मा डेरा गरी बस्ने ३० वर्षीय गणेश प्रसाद घिमिरेलाई नियन्त्रणमा लिएको हो । घिमिरेको हाउभाउमा शंका लागेपछि जाँच गर्दा निजको साथबाट लागुऔषध डाईजेपाम ५ एम्पुल, फेनारगन ४ एम्पुल, नुफिन ५ एम्पुल गरी १४ एम्पुल बरामद गरिएको रिमालले बताए ।