मकवानपुर । नेकपा (माओवादी केन्द्र) हेटौंडा नगर कमिटीले आफ्नाे सगठनमा आवध्द ३ जनालाई स्पष्टीकरण सोध्ने भएको छ । उनीहरुलाई प्रतिगमनमा लागेको भन्दै लिखित स्पष्टीकरण सोध्ने लागिएकाे हाे ।
माओवादी केन्द्र हेटौंडा नगर कमिटीको बिहीबार बसेको बिस्तारित बैठकले तत्कालिन नेकपाको नगर कमिटी सचिवालय सदस्य दिपक खड्का, नगर सदस्यद्वय शालिकराम ढकाल र उत्सव चौलागाईसँग लिखित स्पष्टीकरण माग्ने निर्णय गरेको हो ।
बैठकले हेटौंडाको १९ वडाको पार्टी इन्चार्ज र अध्यक्ष तोकेको माओवादी केन्द्रका नगर अध्यक्ष तीर्थबहादुर थापा मगरले बताए । उनका अनुसार हेटौंडा उपमहानगरपालिकाको वडा कमिटीहरुको बैठक चैत्र २३ देखि ३१ गतेसम्म गर्ने र पार्टीको मोर्चा तथा जनवर्गीय संगठनहरुको कमिटीलाई पूर्णता दिँदै नगरस्तरीय भेला बैशाख पहिलो हप्तामा गर्ने निर्णय गरिएको छ ।
बैठकले माओवादीको जनवर्गीय संगठन अन्तर्गतको महिला संगठनको नगर फ्राक्सन इन्चार्जमा चमेली सिञ्जाली र योङ कम्यूनिस्ट लिग (वाइसीएल) नगर संयोजकमा वीरबहादुर गोलेलाई तोकेको छ । कार्यक्रममा माओवादीका हेटौंडा नगर कमिटीका सदस्य तथा वडा कमिटीका अध्यक्षहरूले राजनैतिक, बैचारिक र संगठनात्मक प्रतिवेदन पेश गरेका थिए ।
माओवादी केन्द्रका मकवानपुर अध्यक्ष प्रेमबहादुर पुलामीको प्रमुख आतिथ्य तथा हेटौंडा नगर अध्यक्ष तीर्थबहादुर थापा मगरको अध्यक्षतामा बैठक भएको थियो ।
मकवानपुर । नेकपा (एमाले) संसदीय दलको विधान संशोधनका लागि समिति निर्माण गर्दै बागमती प्रदेशको पार्टी संसदीय दलको बैठक सकिएको छ ।
बागमती प्रदेशका मुख्यमन्त्री डोरमणि पौडेलको अध्यक्षतामा बसेको बैठकमा पौडेलले विगतका कमि कमजोरीलाई त्यागेर अघि बढ्नु पर्ने धारण व्यक्त गरे । बैठकमा नेपाल समूहको तर्फबाट प्रदेशसभा सदस्य अष्टलक्ष्मी शाक्यले नेकपा एमालेलाई बलियो बनाएर अघि बढ्नु पर्ने भएकाेले पार्टीलाई एकताबद्ध बनाउन मुख्यमन्त्री पौडेल विरुद्धकाे अविश्वास प्रस्ताव फिर्ता लिएको बताइन् ।
उनले कम्युनिष्ट आन्दोलनको उपलब्धिलाई लत्याएर विधि र विधान मिच्दै अघि बढ्दा कम्युनिष्ट पार्टी धरासायी बनेको बताइन् । नेकपा एमालेलाई जनताले विश्वास गरेर बहुमत दिएको भएपनि सरकारले जनता हितमा काम गर्न नसकेको धारणा व्यक्त गरिन् । बैठकमा मुख्यमन्त्रीविरुद्धको अविश्वास प्रस्ताव फिर्ता भएका कारणले सो विषयमा छलफल नभएको नेकपा एमालेका प्रमुख सचेतक केशव राज पाण्डेले बताए ।
बैठकले पाण्डेको नेतृत्वमा ३ जना सदस्य रहने गरी नेकपा एमाले बागमती प्रदेश संसदीय दलको विधान संशोधन समितिसमेत गठन गरेको छ । समितिको सदस्यमा प्रदेशसभा सदस्य नारायण सिलवाल र उर्मिला कर्माचार्य रहेका छन् ।
मकवानपुर । बागमती प्रदेशका मुख्यमन्त्री डोरमणि पौडेलविरुद्ध दर्ता भएकाे अविश्वास प्रस्तावमा हस्ताक्षर गरेका नेपाल पक्षका सांसदले नाम फिर्ता लिएका छन् । मगलबार नेपाल पक्षका २२ जना सांसदले बागमती प्रदेश सभा सचिवालयलाई पत्र लेखेर अविश्वास प्रस्तावबाट नाम फिर्ता लिएकाे प्रदेश सभाले जनाएकाे छ ।
तत्कालिन नेकपाको दाहाल–माधव नेपाल पक्षका ४५ प्रदेश सांसदले मुख्यमन्त्री पौडेल विरुद्ध अविश्वास प्रस्ताव हस्ताक्षर गरेर स्थायी कमिटी सदस्य एवं प्रदेश सांसद अष्टलक्ष्मी शाक्यलाई मुख्यमन्त्री बनाउने प्रस्ताव सहित मुख्यमन्त्रीविरुद्ध पुस १० गते अविश्वास प्रस्ताव दर्ता गराएका थिए । सो प्रस्ताव गत माघ ९ गते प्रदेशसभामा टेबुल भएको थियो ।
सर्वोच्च अदालतले नेकपाको पार्टी एकीकरणलाई खारेज गरेसंगै नेकपा एमाले र माओवादी केन्द्र ब्युतिएसंगै नेपाल पक्षका प्रदेश सांसदले मुख्यमन्त्री पौडेल विरुद्धको अविश्वास प्रस्ताव हस्ताक्षर फिर्ता लिएका हुन् । अविश्वास प्रस्तावकाे फिर्ता लिएपछि पौडेल नेतृत्वको सरकारको आयु लम्बिएको छ ।सरकार गठनका लागि ५६ मत आवश्यक पर्ने बागमती प्रदेशमा ५७ सांसद रहेको एमालेको एकल बहुमत रहेकाे छ ।
यसंगरी नेकपा माओबादी केन्द्रले भने अविस्वासको प्रस्ताब फिर्ता लिएका छैनन् । २३ जना सांसद रहेको माओवादी केन्द्रले प्रदेश सरकारलाई दिएको समर्थन फिर्ता भने लिने भएको छ । प्रदेश पार्टी कार्यालय बबरमहलमा बसेको संसदीय दलको बैठकले समर्थन फिर्ता लिने निर्णय गरेको हो ।
‘तत्कालिन अवस्थामा अविश्वास प्रस्ताव अगाडि बढ्न सक्दैन । त्यसकारण सरकारलाई दिएको समर्थन तत्काल फिर्ता लिने निर्णय गरेका हौं,’ माओवादी केन्द्रको प्रदेश संसदीय दलका नेता शालिकराम जम्मकट्टेलले भने ।
यसैगरी प्रदेश १ का मुख्यमन्त्री शेरधन राईविरुद्ध दर्ता गराइएको अविश्वासकाे प्रस्ताव पनि फिर्ता भएकाे छ । मुख्यमन्त्री शेरधन राईविरुद्ध अविश्वास प्रस्तावमा हस्ताक्षर गरेका नेकपा एमालेका १६ जना सांसदले नाम फिर्ता लिएका छन् ।
उनीहरुले मंगलबार प्रदेशसभा सचिवालयलाई पत्र लेखी अविश्वास प्रस्तावबाट नाम फिर्ता लिएका हुन् । यसअघि गत पुस १२ गते तत्कालिन नेपाल कम्युनिस्ट पार्टीको प्रचण्ड–माधव समूहले मुख्यमन्त्री राईविरुद्ध अविश्वास प्रस्ताव दर्ता गरेका थिए ।
एमाले सांसदहरुले अविश्वास प्रस्तावबाट नाम फिर्ता लिएपछि तत्काललाइ मुख्यमन्त्री शेरधन राईको पद जोगिने भएको छ । प्रदेश १ प्रदेशसभामा एमालेको ५१ सांसद छन् । ९३ सदस्य रहेको प्रदेशसभामा सरकार निर्माणका लागि ४६ सांसद भए बहुमत पुग्नेछ ।
मकवानपुर । नेकपा माओवादी केन्द्र बागमती प्रदेशको संसदीय दलको संसदीय दलकाे नेतामा शालिकराम जम्मकट्टेल चयन भएका छन् । केन्द्रकाे संसदीय दलकाे बैठकले दलको नेतामा जम्मकट्टेललाई चयन गरेको हाे ।
काठमाडौंमा बसेको दलको बैठकले संसदीय दलको नेतामा पूर्व मन्त्री समेत रहेका प्रदेश सांसद शालिकराम जम्मकट्टेललाई चयन गरेको नेकपा माओवादी केन्द्रका प्रदेश सांसद युवराज दुलालले जानकारी दिए । यसै गरी उपनेतामा कुमारी मोक्तान, प्रमुख सचेतकमा बुद्धिमान माझी र सचेतकमा प्रतिमा श्रेष्ठलाई चयन गरेको सांसद दुलालले बताए ।
संसदीय दलको बैठकले प्रदेशको मुख्यमन्त्री विरुद्ध दर्ता गरेको अविश्वासको प्रस्ताव फिर्ता लिने निर्णय गरेको छ । अब नेकपा माओवादी प्रमुख विपक्षीको भूमिकामा रहने सांसद दुलालले जानकारी दिए ।
मकवानपुर । बागमती प्रदेश नेकपा एमालेकाे संसदीय दलकाे बैठक चैत्र १८ गते बस्ने भएकाे छ । बागमती प्रदेशका मुख्यमन्त्री डोरमणि पौडेलले नेकपा एमालेको संसदीय दलको बैठक चैत्र १८ गते बस्ने गरी बाेलाएका छन् ।
प्रदेश सभामा एमाले संसदीय दलका नेतासमेत रहनुभएका पौडेलले संसदलिय बैठकमा प्रदेशसभामा दर्ता गरेको अविश्वासको प्रस्ताव फिर्ता लिन निर्देशन दिने बुझिएको छ । बागमती प्रदेशमा एमालेको एकल बहुमत छ । बुधबारको संसदीय दलको बैठकमा एमालेकै माधवकुमार नेपाल समूहका सांसद सहभागी हुन्छन् या हुँदैनन भन्ने बारे अझै टुंगो लागेको छैन ।
सर्वोच्चको फैसलाबाट एमाले र माओवादी केन्द्र ब्युँतिनुअघि तत्कालीन नेकपाको प्रचण्ड-माधव नेपाल पक्षले मुख्यमन्त्री पौडेलविरुद्ध अविश्वासको प्रस्ताव दर्ता गरेका थिए । एमाले ब्युँतिसकेपछि अविश्वासको प्रस्ताव फिर्ता लिन नेपालपक्षीय सांसदहरूमाथि दबाब छ ।