मकवानपुर । बागमती प्रदेशकाे मन्त्रिपरिषद्ले पूर्णता पाएकाे छ । प्रदेशमा मन्त्रालय घटाउन गठित कार्यदलले मुख्यमन्त्री शालिकराम जम्कट्टेल समक्ष प्रतिवेदन बुझाएको भाेलीपल्ट बुधबार मन्त्रिपरिषद्ले पूर्णता पाएकाे हाे । प्रदेश प्रमुख सचिव मुकुन्दप्रसाद निरौलाको संयोजकत्वमा गठन भएको कार्यदलले मंगलबार मुख्यमन्त्री जम्कट्टेलसमक्ष प्रतिवेदन बुझाएकाे थियाे ।
प्रदेश सरकारको नेतृत्व माओवादी केन्द्र बागमती प्रदेश संसदीय दलका नेता समेत रहेका जम्मकट्टेलले गरिरहेका छन् । उनले गत पुष २६ गते सपथ लिए लगत्तै मन्त्रालयकाे संख्या पुनरावलाेकन गर्न कार्यदल गठन गरेका थिए । मुख्यमन्त्रीमा नियुक्त भएकै दिन जम्कट्टेलले नेकपा एमालेका जगन्नाथ थपलिया र राप्रपाका उद्धव थापालाइ मन्त्रीमा नियुक्ति गरेका थिए तर कार्य विभाजन गरेका थिएनन् । कार्यदलले प्रदेशमा मन्त्रालयकाे संख्या ९ देखि ११ वटा कायम गर्न सिफारिस गरेसँगै बुधवार मुख्यमन्त्री जम्कट्टेलले थप ८ मन्त्री नियुक्त गर्दै सरकारलाई पूर्णता दिएका छन् ।
बागमती प्रदेश सरकारले पूर्णता पाएसँगै मकवानपुर जिल्लाबाट २ जना मन्त्रीमा नियुक्त भएका छन् । मकवानपुरबाट नेकपा एमालेका १ जना र नेकपा माओवादी केन्द्रका १ जना मन्त्रीमा नियुक्त भएका हुन् । मकवानपुर प्रतिनिधि सभा क्षेत्र नम्बर १ को २ बाट निर्वाचित एमालेका एकालाल श्रेष्ठ र सभा क्षेत्र नम्बर २ को १ बाट निर्वाचित नेकपा माओवादी केन्द्रकी कुमारी मुक्तान मन्त्री भएका हुन् । मुक्तान यस अघी प्रदेशकाे सामाजिक विकास मन्त्रीको जिम्मेवारीमा थिइन । यस पटक पनि उनले साेही मन्त्रालयकाे कार्यभार पाएकी छिन् । पहिलो पटक बागमती प्रदेशमा निर्वाचित भएका श्रेष्ठले श्रम तथा राेजगार मन्त्रालयकाे जिम्मेवारी पाएका छन् ।
७ जना पहिलाे प्रवेश मै मन्त्री
नेकपा एमाले, माओवादी केन्द्र र राप्रपाको गबठन्धन तथा अन्य दलकाे समेत समर्थमा गठन भएकाे प्रदेश सरकारमा मुख्यमन्त्रीसहित कुल ११ मन्त्री छन् । जसमध्ये ७ जनाले प्रदेशसभाको पहिलो प्रवेशमै मन्त्री हुने अवसर पाएका छन् ।
गठबन्धन ३ वटै दलबाट पहिलो पटकमै मन्त्री हुने छन् । प्रदेशसभा प्रवेशको पहिलो पटकमै मन्त्री हुनेमा एमालेका एकालाल श्रेष्ठ, जगन्नाथ थपलिया, रामेश्वर श्रेष्ठ रहेका छन् । यसैगरी, राप्रपाका ३ जना मन्त्रीहरू उद्धव थापा, राजु विष्ट र डम्बर तामाङ पनि पहिलो पटकमै मन्त्री भएका हुन् । माओवादी केन्द्रको चुनाव चिह्नबाट चुनाव लडेका बाबुराम भट्टराई नेतृत्वको नेपाल समाजवादी पार्टीका गंगा नारायण श्रेष्ठ पनि पहिलाे पटक मन्त्री बनेका छन् ।
चितवनबाट प्रदेश सभकाे सदस्यमा निर्वाचित थपलिया प्रदेश सरकारकाे अघिल्लो कार्यकालका मुख्यमन्त्री डोरमणि पौडेलका राजनीतिक सल्लाहकार थिए । प्रदेश सरकारमा थपलियाले आर्थिक मामिला तथा योजना मन्त्रालयकाे जिम्मेवारी प्राप्त गरेका हुन् । नेकपा माओवादी केन्द्र र नेकपा एमाले बागतीमा आधा–आधा कार्यकाल सरकारको नेतृत्व गर्ने गठबन्धनकाे भागवण्डा अनुसारकाे सहमति कायम रही रहे एमाले संसदीय दलका नेता थपलिया मुख्यमन्त्रीका दाबेदार समेत हुन् ।
पहिलोपटक प्रदेशसभामा आएका एमाले मकवानपुरका अध्यक्षसमेत श्रेष्ठ श्रम, रोजगार तथा यातायातमन्त्री हुँदा ललितपुरका सांसद रामेश्वर श्रेष्ठले स्वास्थ्य मन्त्रालयकाे जिम्मेवारी सम्हालेका छन् । माओवादी केन्द्रको चुनाव चिह्नबाट चुनाव लडेका सिन्धुलीका गंगानारायण श्रेष्ठ आन्तरिक मामिला तथा कानुनमन्त्रीमा नियुक्ति भएका छन् । याे मन्त्रालय प्रदेशमा पाेर्टफाेलियाेमा दोस्रो वरियतामा छ ।
प्रदेश सभाकाे २०७४ सालकाे निर्वाचनबाट राप्रपाबाट २ जना महिला समानुपातिक सांसद निर्वाचित भएका थिए । गत निर्वाचनबाट प्रत्यक्ष र समानुपातिक गरी राप्रपाले १३ जना सांसद जितेकाे छ । राप्रपाकाे सांसद बागमतीमा सरकार गठनका लागि निर्णायक बनेकाे थियाे । सरकारको मुख्यमन्त्रीमै दावी समेत गर्दै अाएकाे राप्रपा संसदीय दलको नेता उद्धव थापा खानेपानी, उर्जा तथा सिँचाईमन्त्रीमा नियुक्ति भएका छन् । थापा काठमाडाैंबाट प्रदेश सभामा निर्वाचित भएका हुन् ।
धादिङ जिल्लाबाट निर्वाचित प्रपाका डम्बर तामाङ पर्यटन, उद्योग तथा सहकारी मन्त्री र काठमाडौं जिल्लाबाट प्रदेशमा सांसद निर्वाचित राप्रपाका राजु विष्ट वन तथा वातावरणमन्त्रीमा नियुक्त भएका छन् ।
३ जना पुनः दोहोरिए
यसैगरी, वर्तमान सरकारमा यस अघीकाे प्रदेश सरकारमा रहेका ३ जना पुनः दोहोरिएका छन् । अघिल्लो कार्यकालमा आन्तरिक मामिला तथा कानुनमन्त्री र आर्थिक मामिला तथा योजनामन्त्रीकाे जिम्मेवारी सम्हाली सकेका जम्मकट्टेल हाल मुख्यमन्त्री छन् । जम्मकट्टेल धादिङबाट निर्वाचित हुन् । माओवादीकै कुमारी मुक्तान पुनः सामाजिक विकास मन्त्रीमा नियुक्त भएकी छिन् ।
२०७४ सालमा गठन भएकाे पहिलाे प्रदेश सरकारमा सामाजिक विकासमन्त्री रहेका युवराज दुलालले भौतिक पूर्वाधार विकासमन्त्रीकाे जिम्मेवारी सम्हाल्दै पुन दाेहाेरिएका हुन् । कृषि तथा पशुपन्छी विकास मन्त्रीमा नियुक्त एमालेका केशवप्रसाद पोखरेल भने यसअघि प्रदेशसभा अन्तर्गतकाे समिति सभापति रहेका थिए ।

मकवानपुर । बागमती प्रदेशमा आज मन्त्री परिषद विस्तार हुँदै छ । ५ दलको सहभागीता रहेको बागमतीमा ३ दलबाट मन्त्रीहरु सहभागी हुनेछन् । २ दलले भने मन्त्रालयको दाबि छाडेको छ । प्रदेश सरकारमा सहभागी एकीकृत समाजवादी र हाम्रो नेपाली पार्टीले मन्त्रालय पाएनन् ।
मुख्यमन्त्री, आर्थिक योजना मन्त्री र अर्को एक मन्त्रालयको लागि ३ सदसिय मान्त्री परिषद हाल रहेको छ । अब आज ८ जना मन्त्रीहरु नियुक्त हुनेछन् ।
जसको अन्तिम टुङ्गो लगाइ सकिएको छ । तीन दलको सहभागिता रहने यस प्रदेशमा नेकपा एमाले, माओबादी केन्द्र र राष्ट्रिय प्रजातन्त्र पार्टीले मन्त्रालय भागवण्डा गरेर लिएका छन् ।
सरकारमा रहेको सबैभन्दा ठुलो दल नेकपा एमालेले पाउने मन्त्रालयमा मकवानपुरका सांसद एकालाल श्रेष्ठले श्रम, रोजगार तथा यातायात मन्त्रालयको जिम्मेवारी पाउने भएका छन् । त्यसैगरी एमालेका सांसद रामेश्वर श्रेष्ठले स्वास्थ्य मन्त्रालय, एमालेका अर्का सांसद केशब पोख्रेलले प्रदेशको पशुपन्छी तथा कृषि मन्त्रालयको जिम्मेवारी पाउने भएका छन् ।
यसैगरी नेकपा माओवादी केन्द्रले सांसद युवराज दुलाललाई भौतिक मन्त्रालयको जिम्मेवारी दिने भएको छ । माओबादीकी सांसद कुमारी मोक्तानलाई फेरी पनि सामाजिक विकास मन्त्री बनाउने तयारी भएको छ ।
यसैगरी माओबादी केन्द्रले आन्तरिक मामिला मन्त्री पाउने भएको छ । आन्तरिक मामिला मन्त्रीमा माओबादीका गंगानारायण श्रेष्ठलाई नियुक्त गर्ने तयारी गरिएको छ ।
यस अघि नै मन्त्री भएका राप्रपाका उद्धब थापाले खानेपानी, उर्जा तथा सिंचाइ मन्त्रालय पाएका छन् । त्यसैगरी पर्यटन, उद्योग तथा सहकारी मन्त्री र वन तथा वातावरण मन्त्रालय राप्रपाले पाउने भएको छ । राप्रपाले भने मन्त्री हुने अन्यको नाम सार्वजनिक गरेको छैन ।
विभिन्न समूहमा विभाजित पाँच कम्युनिस्ट पार्टीबीच एकीकरणका लागि छलफल तीव्र पारिएको छ । नेपाल कम्युनिस्ट पार्टी (माओवादी केन्द्र), जनता समाजवादी पार्टी नेपाल (जसपा) र नेपाल कम्युनिस्ट पार्टी (एकीकृत समाजवादी)बीच एकीकरण छलफल तीव्र बनेको हो ।
नेकपा माओवादी केन्द्र र नेपाल समाजवादी पार्टी (नेसपा)बीच एकीकरण विषय टुंगो लागिसकेको छ । माओवादी केन्द्र, जसपा र एकीकृत समाजवादी तीनै पार्टीले एकीकरणका लागि वार्ता टोली गठन गरेर छलफल थालेका छन् । तीनै पार्टीले एकअर्काको दस्तावेज लिएर अध्ययनसमेत गरिरहेका छन् ।
जसपासँग एकीकरणका लागि छलफल गरेको एकीकृत समाजवादीले माओवादी केन्द्रसँग पनि छलफल थालेको छ । तीनै पार्टीबीच छुटाछुटै छलफल भएको छ ।
जसपा र एकीकृत समाजवादीबीच विभिन्न चरणमा छलफल भइसकेको छ । अहिले दुवै पार्टीको वार्ता टोलीमा रहेका नेताले एकअर्काको दस्तावेज अध्ययन गरिरहेका छन् ।
उता, एकीकृत समाजवादी माओवादी केन्द्रसँग समेत एकीकरणका लागि दस्तावेज अध्ययन गरिरहेका छन् । माओवादी केन्द्र र एकीकृत समाजवादीबीच स्थानीय निर्वाचनपछि एकीकरणका लागि वार्ता टोली गठन गरेर छलफल भएको थियो । तर, संघीय र प्रदेशसभा निर्वाचनमा जुटेकाले एकीकरण प्रक्रिया रोकिएको थियो ।
नेकपा माओवादी केन्द्र, जसपा, एकीकृत समाजवादी, आजपा र नेसपा प्रतिनिधिसभा ५५ सिटसहित शक्तिशाली दल बन्ने रणनीतिमा
निर्वाचनअघि नै माओवादी केन्द्र र डा. बाबुराम भट्टराई नेतृत्वको नेसपाबीच एकीकरण सहमति भइसकेको छ । सो सहमतिअनुसार नेसपाका नेता माओवादी केन्द्रको चुनाव चिह्न र घोषणापत्र लिएर निर्वाचनमा सहभागी भए । केही दिनभित्रै दुवै पार्टी एकीकरणको औपचारिक घोषणा तयारीमा छन् ।
तर, सो एकीकरणअघि अन्य दलबीचसमेत सहमति जुटाएर एकै चरणमा एकीकरण घोषणा तयारीमा शीर्षनेता छन् । विभिन्न चरणमा पार्टी एकताका लागि जुटेका दलले प्रभु साह नेतृत्वको आम जनता पार्टी (आजपा)लाई समेत एकीकरण प्रक्रियामा सहभागिता लागि पहल थालेका छन् ।
एकीकृत समाजवादी उपमहासचिव एवं वार्ताटोली सदस्य प्रकाश ज्वाला पार्टी एकीकरणका लागि भइरहेको छलफल सकारात्मक रूपमा अगाडि बढेको बताउँछन् । विभिन्न चरणमा छलफल भएको बताउँदै उनले धेरै विषयमा सहमति जुटिसकेको दावी गरे ।
‘अहिले हामी एकअर्काको दस्तावेज अध्ययन गरिरहेका छौं । यसबीच पटकपटक छलफल भयो, साझा विषय त्यतिकै सहमति हुने नै भयो, सहमति हुन नसकेको विषयमा शीर्षनेता बसेर टुंगो लगाउनुहुन्छ,’ ज्वालाले राजधानीसँग भने ।
एकीकृत समाजवादीबाट वार्ता टोली संयोजकमा महासचिव डा. बेदुराम भुसाल, उपमहासचिव ज्वालासहित अर्का उपमहासचिव डा. विजय पौडेल वार्ता टोली सदस्य छन् ।
यसैबीच, मंगलबार एकीकृत समाजवादी अध्यक्ष माधवकुमार नेपाल र नेकपा एकता राष्ट्रिय अभियान संयोजक वामदेव गौतमबीच एकता छलफल भएको छ ।
एकीकृत समाजवादी केन्द्रीय कार्यालय आलोकनगरमा भएको छलफलमा अध्यक्ष नेपालले एकीकृत समाजवादीमा प्रवेश गरी एकताबद्ध तरिकाले अगाडि बढ्न प्रस्ताव गरेको ज्वाला बताउँछन् । नेपालको प्रस्तावमा गौतमले छिट्टै निर्णय गरेर जवाफ दिने बताएका छन् ।
माओवादी केन्द्रले उपाध्यक्ष कृष्णबहादुर महराको संयोजकत्वमा नेता उपमहासचिवद्वय गिरिराजमणि पोखरेल र शक्ति बस्नेत सदस्य रहेको वार्ता टोली गठन गरेको छ ।
यसैगरी, जसपाबाट वार्ताटोली संयोजकमा वरिष्ठ नेता राजेन्द्र श्रेष्ठ, सदस्यमा रकम चेम्जोङ र गोविन्द चौधरी रहेका छन् ।
टोलीमा सहभागी एक नेताका अनुसार माओवादी केन्द्र अध्यक्ष एवं प्रधानमन्त्री पुष्पकमल दाहाल ‘प्रचण्ड’, एकीकृत समाजवादी अध्यक्ष माधवकुमार नेपाल र
जसपा अध्यक्ष उपेन्द्र यादवबीच ‘गोप्य छलफल’पछि पार्टी एकीकरणका लागि वार्ता टोलीले आन्तरिक गृहकार्य तीव्र पारेको हो ।
‘राष्ट्रपति निर्वाचनअघि नै पार्टी एकीकरण गर्नेगरी गृहकार्य भइरहेको छ । यदि कुनै कारण एकीकरण नभए कार्यगत एकता’मा समेत छलफल भएको छ,’ ती सदस्यले भने, ‘तीनै पार्टीका अध्यक्ष एकताका लागि सकारात्मक छन् । त्यसअनुसार हामीले पनि छलफल थालेका छौं, केही दिन केही हुन्छ ।’
गत साता एकीकृत समाजवादी र जसपाका वार्ता टोलीबीच छलफल भएको थियो । तीनै पार्टीका अध्यक्षको संयुक्त छलफलपश्चात् शनिबार र आइतबार गरी वार्ता टोलीबीच सघन छलफल भयो । सोमबारसमेत आन्तरिक छलफल गर्दै एकीकरण कार्य टुंगो लगाउने’ कुराकानी भएको छ ।
स्रोतका अनुसार मुख्यत वैचारिक र सैद्धान्तिक विषयमा मिलनविन्दु खोजी जारी छ । अरु विषय मिले पनि वैचारिक र सैद्धान्तिक मिलाउन वार्ताटोलीलाई सकस परेको छ ।
माओवादी केन्द्रका अध्यक्ष प्रचण्डले सरकारको नेतृत्व गरिरहेका छन् । एमालेसहितका दलको समर्थनमा प्रधानमन्त्री बनेका प्रचण्ड नेतृत्वको सरकारलाई एकीकृत समाजवादी र जसपाले समेत विश्वासको मत दिएका छन् ।
मन्त्रिपरिषद विस्तारअघि भएको भागबन्डाप्रति असन्तुष्टि जनाउँदै जसपा सरकारमा सहभागी छैन । एकीकृत समाजवादी कांगेस नेतृत्वको विपक्षी गठबन्धनमा रहेको छ ।
प्रतिनिधि र प्रदेशसभा निर्वाचनअघि माओवादी केन्द्र, एकीकृत समाजवादी, जसपा कांग्रेस नेतृत्वको गठबन्धनमा थियो । सिट बाँडफाँटमा सहमति नजुटेपछि जसपा एमाले नेतृत्वको गठबन्धनमा सहभागि भयो ।
पछिल्लो समय सरकार निर्माणअघि माओवादी केन्द्रसमेत एमाले गठबन्धनमा सहभागी भयो । तर, एकीकृत समाजवादी अझै कांग्रेस नेतृत्वकै गठबन्धनतर्फ छ । राजधानी दैनिकबाट
मकवानपुर । नेकपा एमाले मकवानपुरको छैटौ पूर्ण कमिटी बैठकले सिंगाे पार्टी पंक्ति संगठन निर्माणमा परिचालित गर्ने निर्णय गरेकाे छ ।
जिल्ला कमिटी बठैक्ले माघ देखि चैत्रसम्म पार्टी नयाँ सदस्यता सिफारिस, पार्टी सदस्य नवीकरण गर्ने, पार्टीकाे पालिका, वडा र टाेलसम्म, जनसंगठनकाे जिल्ला, पालिका र वडासम्म संगठन व्यवस्थित बनाउने निर्णय गरेकाे पार्टी जिल्ला कमिटीका सचिव नवीन सिग्देलले बताए ।
जनप्रतिनिधि र सामाजिक तथा सामुदायिक संगठनहरूलाई जनहितमा प्रभावकारी रूपमा परिचालन गर्ने समेत निर्णय बैठकले गरेकाे सिग्देलले जानकारी दिए ।
बैठकमा प्रमुख अतिथि पार्टी स्थायी कमिटीका सदस्य काशिनाथ अधिकारीले संघ र प्रदेशकाे निर्वाचनले एमाले मुलुककै लाेकप्रिय र बलियाे पार्टी भएकाे प्रमाणित गरेकाेले एमालेप्रति लगाईएका आराेपहरू जनमतले नै असत्य सावित गरेकाे बताए । अधिकारीले बैचारिक स्पष्टता, संगठननत्मक चुस्तता, जनमूखी कार्यशैली र जनसराेकारका विषयहरू पार्टी र कमिटीकाे प्रमुख कार्य भएकाेले यसलाई अनुशरण गर्न बैठक मार्फत पार्टी पंक्तिमा अनुराेध समेत गरेका थिए ।
बैठकमा पार्टी केन्द्रीय सदस्य रामेश्वर रानाले संगठनलाई सुदृढ गर्दै राजनीतिक, सामाजिक, आर्थिक र साँस्कृतिक रूपान्तरणमा ध्यान केन्द्रीत गर्नुपर्ने भनाई राखेका थिए । जिल्ला अध्यक्ष एकालाल श्रेष्ठले मकवानपुरमा एमाले जनमतले पहिलाे र सशक्त पार्टी पुन:सावित भईसकेकाेले यसलाई आत्मसाथ गर्दै अगाडि बढ्नु पर्ने बताए ।
जिल्ला अध्यक्ष एकालाल श्रेष्ठको अध्यक्षतामा भएको बैठकमा पार्टी केन्द्रीय सदस्यहरू कृष्णप्रसाद दाहाल, जुनेली श्रेष्ठ, भारती पाठक तथा प्रदेश कमिटीका सदस्यहरूकाे उपस्थिति रहेकाे थियो ।
मकवानपुर । प्रतिपक्षमा हुँदा आफैंले उठाउँदै आएको एजेण्डा आफू सत्तामा पुगेपछि पुरा गरेर देखाउने नैतिक दबाबमा अहिले बागमती प्रदेश सरकारमा रहेको एमालेले भोग्दै आएको छ ।
त्यो सवाल हो मन्त्रालयको संख्या घटाउने बारे । एकै घरको झ्याल झ्यालमा दर्जन मन्त्रालय राखेर देशैभर चर्चा पाएको बागमती प्रदेशमा यसपटक मन्त्रालयको संङ्ख्या घटाउने रस्साकस्सी चोटीलो बनेको छ ।
५ दलको सहभागीता रहेको प्रदेश सरकारमा सबैलाई मन्त्रालय पु-याउनु पर्ने दबाब र अर्थहिन मन्त्रालय घटाएर खर्च कटौति गरेर देखाउनु पर्ने सवाल छ अहिले एमालेका सामू ।
अघिल्लो सत्ता गठबन्धनले मन्त्रालय टुक्र्याएरपछि मन्त्रालय घटाउनै पर्ने बारे निरन्तर दबाब दिंदै आएको नेकपा एमाले अहिले सत्ताको सबैभन्दा ठुलो दल हो । सत्ता गठबन्धन एकाएक बदलिएपछि सत्ताको पहिलो दल बनेपछि एमाले आफैंले विगतमा भने जसरी मन्त्रालय संख्या घटाउनको लागि नैतिक दबाबमा छ ।
नव गठित सत्ता गठबन्धनबाट नेकपा मओवादी केन्द्रका संसदीय दलका नेता शालिकराम जम्कट्टेलले मुख्यमन्त्रीमा सपथ लिएकै दिन मन्त्रालय संख्या घटाउन कार्यदल नै गठन गरिएको थियो । बागमती प्रदेशमा मन्त्रालयको संख्या निर्धारण गर्न अध्ययन कार्यदल समिति गठन भएको आज सोमबार १५ औं दिन हो । अर्थात कार्यदलले प्रतिवेदन बुझाउनु पर्ने अन्तिम म्याद हो आज ।
बागमती प्रदेशको मुख्यमन्त्री शालिकराम जम्मकट्टेलले शपथग्रहणलगत्तै पहिलो निर्णय गर्दै मन्त्रालयको संख्या निर्धारण गर्न कार्यदल गठन गरेका थिए।
मुख्यमन्त्री तथा मन्त्रिपरिषद् कार्यालयका प्रमुख सचिव मुकुन्द प्रसाद निरौलाको संयोजकत्वमा जम्मकट्टेलले ५ सदस्यीय कार्यदललाई १५ दिनभित्र प्रदेशको मन्त्रालयहरुको अध्ययन गरेर संख्या निर्धारण गर्दै प्रतिवेदन बुझाउन निर्देशन दिएका थिए।
५ दलको समर्थन रहेको प्रदेश सरकारमा सत्ता गठबन्धनको ठूलो दल नेकपा एमालेले ५ वटा, नेकपा माओवादी केन्द्रले ४ वटा, एकीकृत समाजवादीले २ वटा, राप्रपाले २ वटा, हाम्रो नेपाली पार्टीले १ वटा मन्त्रालयमा दाबी गरेका छन् । यस हिसाबले पनि १४ वटै मन्त्रालयको माग दाबि देखिन्छ । मन्त्रालय संख्या घटाएर मन्त्रालयको भागबण्डा मिलाउन सौहार्दपूर्ण वातावरण बनाउनको लागि हाल शिर्ष नेताहरु लभिङको केन्द्रसँग दौडुधपमा छन् ।
हाल बागमती प्रदेशमा १४ वटा मन्त्रालय रहेको छ। सुरुवातमा ७ वटा मन्त्रालय रहेको बागमती प्रदेशको दोस्रो मुख्यमन्त्री अष्टलक्ष्मी शाक्यले सामाजिक विकास मन्त्रालयबाट स्वास्थ्य मन्त्रालयलाई विभाजन गर्दै ८ वटा पुर्याएकी थिइन्।
त्यसपछि प्रदेशको तेस्रो मुख्यमन्त्री राजेन्द्र पाण्डेले गठबन्धन दलहरुमा भागवण्डा पुर्याउन ८ मन्त्रालयलाई विभाजन गरेर १४ पुर्याएका थिए। भागबण्डा पुर्याउन मन्त्रालय विभाजन गरेपछि मुख्यमन्त्री पाण्डे र बागमती प्रदेशको देशैभरि आलोचना भयो।
उक्त समयमा मन्त्रालय विभाजन गर्न मुख्यमन्त्री पाण्डेलाई लिखित सहमति दिएका वर्तमान मुख्यमन्त्री जम्मकट्टेल अहिले कुनै पनि हालतमा मन्त्रालय घटाउनुपर्ने दबाबमा छन्।
५ दलको समर्थनमा मुख्यमन्त्री बनेका जम्मकट्टेल मन्त्रालय घटाउने दबाबसँगै भागबण्डा पुर्याउनुपर्ने दबाबमा पनि छन्। त्यसैले उनले बागमती प्रदेशको १४ मन्त्रालयलाई ११ वटामा झार्ने बताउँदै आएका छन्।
मुख्यमन्त्री जम्मकट्टेलले विभाजित मन्त्रालयहरुको काम, उनीहरुको प्रभावकारिता र औचित्यको अध्ययन गर्न गठित समिति सुझाव दिने छ ।
समितिले आज सोमबार बेलुका मात्रै मुख्यमन्त्रीलाई प्रतिवेदन बुझाउने तयारी गरेको बुझिएको छ। हालसम्मको आन्तरीक तयारी अनुसार प्रदेशमा ११ वटा मन्त्रालय कायम रहने विषयमा मुख्यमन्त्रीसहित सत्ता गठबन्धन लगभग तयार रहेको बुझिएको छ ।
मन्त्रालयको अध्ययन गर्न बनेको समिति अध्ययनको चरणमा रहदा नै मुख्यमन्त्रीसहित मन्त्रीहरुले ११ मन्त्रालय रहने अभिव्यक्ति सार्वजनिक कार्यक्रमहरुले दिंदै आएका छन् । विभिन्न दृष्टिकोणले प्रदेशको मन्त्रालयहरुको अध्ययन गरेको समितिका संयोजक मुकुन्दप्रसाद निरौला बताए ।
प्रदेश सरकारको १४ वटै मन्त्रालयहरुको विषयगत रूपमा अध्ययन गरेको निरौलाले बताए। सबै मन्त्रालयको सूक्ष्म रूपमा अध्ययन गर्दा विभाजित केही मन्त्रालयको काम राम्रो र आवश्यक भए पनि ३ वा ४ मन्त्रालय भने तत्कालको लागि आवश्यक नरहेको समितिको ठहर छ । यस अनुसार कुन कुन मन्त्रालयलाई कुन मन्त्रालयमा गाभिने वा खारेज गरिने भन्नेबारे भने प्रतिवेदनले नै सार्वजनिक गर्नेछ ।
प्रदेशको उद्योग तथा वाणिज्य मन्त्रालय, युवा तथा खेलकुद मन्त्रालय, संस्कृति तथा पर्यटन मन्त्रालय, भूमि व्यवस्था,सहकारी तथा गरिबी निवारण मन्त्रालयको काम त्यति उत्कृष्ट नदेखिएको संकेत कार्यदलले गरेको छ ।
हामीले अध्ययन गर्दा अहिले १० वटा मन्त्रालय मात्रै आवश्यक देखेका छौ। तर, मुख्यमन्त्रीसँग सल्लाह गरेर उहाँको चाहानाअनुसार १० वा ११ वटा मन्त्रालय कायम गर्न सुझाव दिन्छौ’,निरौलाले भने। उनले सरकारको निर्देशनअनुसार नै आफूहरु चल्ने भएकोले सोहीअनुसार मन्त्रालय संख्या निर्धारण गर्न सुझाव दिने बताए। तर मुख्यमन्त्री जम्मकट्टेल सहकारी मन्त्रालय नघटाउने पक्षमा देखिएका छन्।
प्रदेशमा रहेको १४ मन्त्रालयमध्ये सहकारी मन्त्रालय सबैभन्दा कम बजेट भएको मन्त्रालय हो। चालू आर्थिक वर्षमा सरकारले यो मन्त्रालयलाई २४ करोड मात्रै बजेट दिएको थियो। मुख्यमन्त्री राजेन्द्र पाण्डेले सहकारबाट बाहिरिदा १४ वटै मन्त्रालयबाट भएका कार्यप्रगतिलाई विषयगत रुपमा उल्लेख गरेर सार्वजनिक गरेका थिए।
जसमा सहकारी मन्त्रालयको काम सबैभन्दा थोरै थियो। तर,वर्तमान मुख्यमन्त्री जम्मकट्टेलले उक्त मन्त्रालय घटाउन ईच्छा नदेखाएपछि समितीले सो मन्त्रालय पनि राख्नुपर्ने सुझावसहितको प्रतिवेदन दिने संभावना रहेको समितीका एक सदस्यले बताए । समितीले अध्ययन गरेर तयार पारेको प्रतिवेदनको बारेमा सरकारका मन्त्रीहरुलाई जानकारी गराइसकिएको समिति संयोजक निरौलाले बताए ।