नेपालको राजनीति अत्यधिक विकृत हुदै गएपछि र लामो समयसम्म अस्थिर हुने सम्भावना देखिएपछि दुई प्रमुख दल नेपाली कांग्रेस र एमाले मिलेर अगाडि बढ्नुपर्ने दबाब दुवै दलका नेतालाई पर्न थालेको छ ।
गत निर्वाचनमा पहिलो ठूलो दल बनेको कांग्रेस र दोस्रो ठूलो बनेको एमाले मिलेरै सरकार बनाउँदा अन्य साना दललाई चलखेल गर्ने ठाउँ बन्द हुने र राजनीति पनि विकृत नहुने भन्दै दुवै दल मिलेर सरकार बनाउन दबाब परेको हो । राष्ट्रपतिको निर्वाचनमा पनि दुवै दल मिल्न सके उपयुक्त हुन सक्ने सुझाव नेतालाई दिइएको छ । एमाले र कांग्रेस मिलेर राजनीतिलाई सही ढंगले हेन्डलिङ गर्नुपर्ने भन्दै नयाँ मोड’bout दुवै दलभित्र बहस सुरु भएको हो । दुवै दल जनआन्दोलन १ र २ तथा संघीय लोकतान्त्रिक गणतन्त्र स्थापना गर्दाका समेत सहयात्री हुन् ।
विशेषगरी कांग्रेस र एमालेमा रहेका इमानदार र पुराना नेताले अहिलेको राजनीति अत्यधिक विकृत बनेको र अनावश्यक चलखेल बढेको भन्दै त्यसलाई रोक्न पनि एमाले र कांग्रेस मिल्नुको विकल्प नभएको भन्दै नेतृत्वलाई सम्झाउन थालेको स्रोतले जानकारी दिएको छ ।
स्रोतका अनुसार दुवै दलले पाँच वर्षसम्म आधा आधा कार्यकाल प्रधानमन्त्री चलाउने र त्यसपछिको निर्वाचनमा मित्रवत् प्रतिस्पर्धा गर्नेगरी आवश्यक गृहकार्य अघि बढाउनु पर्ने विषयमा छलफल सुरु भएको छ । कांग्रेसका केही इमानदार र सुशासन चाहने नेताले राजनीतिक स्थिरताका लागि र राजनीतिमा देखिएको अस्वाभाविक चलखेल र वद्मासी रोक्न पनि एमाले र कांग्रेस मिल्नु पर्ने भन्दै पार्टी सभापति शेरबहादुर देउवाको ध्यानाकृष्ट गराउन थालेका छन् ।
उता एमालेका पुराना र इमानदार नेताले पनि पार्टी अध्यक्ष केपी शर्मा ओलीसँग भेट गरी राजनीतिक स्थिरता कायम गर्न र अहिले देखिएको फोहोरी खेल रोक्न कांग्रेससँग मिलेर जानुपर्ने प्रस्ताव गर्न थालेका छन् । अध्यक्ष ओलीले पनि यो विषयलाई गम्भीरताका साथ लिएको एमालेका एक नेताले दाबी गरे । ‘कांग्रेस र एमाले मिल्दा अरू कसैले पनि चलखेल गर्न पाउँदैनन्, राजनीति स्थिरतातर्फ अघि बढ्छ, त्यसैले राजनीतिक स्थिरताका लागि हामीले अध्यक्षलाई यो विषयमा पनि छलफल अघि बढाउन आग्रह गरेका छौं ।’ एमालेका एक नेताले राजधानीसँग भने ।
गत प्रतिनिधिसभाको निर्वाचनमा कांग्रेसले ८९ सिटमा विजयी हासिल गरेको थियो भने एमालेले ७८ सिट जितेको थियो । दुवैको सिट जोड्दा झन्डै दुईतिहाइ नजिक हुने भएकाले उनीहरूले चाहेमा जे जस्ता निर्णय पनि गर्न सक्छन् भने अन्य कुनै पनि दललाई चलखेल गर्ने बाटो पाँच वर्षका लागि बन्द हुन्छ ।
कांग्रेस र एमाले मिलेर सरकार चलाउँदा अन्य कुनै पनि दलले चलखेल गर्न सक्ने अवस्था रहँदैन । अहिले निर्वाचनमा पहिलो र दोस्रो दलभन्दा निकै कम ल्याएर तेस्रो दल बनेको माओवादी केन्द्रले पहिलो दल कांग्रेस र दोस्रो दल एमालेलाई लडाएर प्रधानमन्त्रीको बाजी मारेको भन्दै अब त्यस्तो खेल बन्द गराउनका लागि पनि एमाले र कांग्रेस मिल्नुको विकल्प नरहेको भन्दै एमाले र कांग्रेसभित्र नयाँ छलफल थालिएको हो । यद्यपि, यस्तो प्रयासले सार्थक रूप भने लिन सकेको छैन ।
स्रोतका अनुसार कांग्रेस र एमाले पाँच वर्षसम्म मिल्ने र त्यसपछिको निर्वाचनमा मित्रवत् प्रतिस्पर्धा गर्ने गरि लिखित सहमति भएमा राष्ट्रपतिको विषयमा पनि थप सहमति खोज्न सकिने बताइएको छ ।
पार्टीभन्दा बाहिरको तटस्थ भूमिका खेल्न सक्ने नागरिक समाजका इमानदार अगुवालाई राष्ट्रपति बनाउँदा सकारात्मक सन्देश जाने र राजनीतिमा सुधार आएको देखिने भन्दै त्यस विषयमा पनि आन्तरिक छलफल गर्न दुवै दलका नेतृत्वलाई दबाब परेको स्रोतको दाबी छ । अहिले राजनीति विकृत हुदा र अत्याधिक चलखेल हुँदा दिनदिनै राष्ट्रपति हुने व्यक्तिको नयाँ नयाँ नाम सार्वजनिक हुँदै आएको छ ।
जसका कारण राष्ट्रपति पदको गरिमा नै अत्याधिक रुपमा घट्दै जान थालेको छ । यसका कारण मुलुकको
वेइजत हुन थालेको नागरिक समाजका अगुवाहरुको तर्क छ । नागरिक समाजका केहि अगुवाहरुले पनि कांग्रेस र एमालेका शीर्ष नेताहरुलाई भेट गरि राजनीतिलाई चलखेल र दूषित हुनबाट बचाउन दुवै दल मिलेर अगाडि बढ्न सुझाव दिएको बताइएको छ ।
ओली देउवा दुवै सकारात्मक !
निर्वाचनमा निकै कम सिट ल्याएका दलले बढी चुरीफुरी देखाएको र राजनीतिलाई बढि विकृत बनाउन खोजेकाले एमाले र कांग्रेस मिलेर त्यस्तो विकृति रोक्नुपर्ने सुझाव आएपछि एमाले अध्यक्ष केपी शर्मा ओली र कांग्रेस सभापति शेरबहादुर देउवा त्यसमा सकरात्मक देखिएको निकटस्थहरूले बताएका छन् ।
कांग्रेसका एक केन्द्रिय सदस्यका अनुसार निर्वाचनमा कम सिट ल्याएकाले कांग्रेस एमालेलाई भिडाएर राजनीतिलाई विकृत बनाएको ’boutमा सभापति देउवा समेत सचेत देखिएका छन् । उता एमालेका अध्यक्ष ओलीले पनि निर्वाचनमा नीकै कम सिट ल्याउने दलहरुले विकृत खेल खेल्न थालेपछि राजनीतिक कोर्स फेर्न सकिने र त्यसका लागि कांग्रेससँग समेत छलफल थाल्न सकिने निकटस्थसँग बताएको स्रोतको दाबी छ । राजधानी दैनिकबाट
मकवानपुर । नेकपा एमाले मकवानपुरले बलियाे र सशक्त संगठन बनाउने भएको छ । पार्टी सुदृढ र विस्तार गरि सबैभन्दा बलियाे र सशक्त संगठन बनाउने नेकपा एमाले, मकवानपुरले निर्णय गरेकाे हो ।
पार्टी केन्द्रीय कमिटीले सञ्चालन गरेकाे २ महिने मिसन ग्रासरूट (पार्टी सुदृढीकरण तथा विस्तार अभियान-२०७९) कार्यान्वयन गर्न बुधबार बसेकाे जिल्ला कमिटीकाे साताैँ पूर्ण बैठकले यस्तो निर्णय गरेकाे हाे ।
बैठकले पार्टी सदस्य नवीकरण तथा विस्तार, पार्टीले टाेल, जनसंगठनहरूकाे वडा, प्रतिष्ठान र विद्यालयसम्म संगठन चुस्तदुरूस्त बनाउने, अवधि पुगेका र निष्कृय कमिटीहरूकाे अधिवेशन गर्ने, जनप्रतिधिहरूलाई जनताकाे काम र दिगाे विकास अभियानकाे लागि प्रभावकारी रूपमा परिचालन गर्ने, सामुदायिक र सामाजिक संघसंस्थाहरूलाई व्यापक जनताकाे पक्ष र सामाजिक रूपान्तरणकाे लागि परिचालन गर्ने निर्णय गरेकाे नेकपा एमाले जिल्ला कमिटीका सचिव नवीन सिग्देलले बताए ।
बैठकले फागुन १५ गतेभित्र पालिका र विशेष ईलाका कमिटीकाे बैठक, फागुन २० गतेभित्र सबै जनसंगठनकाे बैठक तय गर्दै चैत्र ५ गते हुने स्ववियु निर्वाचनमा अनेरास्ववियुलाई विजयी गराउन जिल्ला कमिटीका उपसचिव तथा जनसंगठन संयन्त्र प्रमुख हिदम लामाकाे संयाेजकत्वमा स्ववियु निर्वाचन परिचालन संयाेजन समिति समेत जिल्लास्तरमा गठन गरेकाे सचिव सिग्देलले जानकारी दिए ।
प्रमुख अतिथि नेकपा एमाले स्थायी कमिटीका सदस्य तथा बाग्मती ईन्चार्ज काशिनाथ अधिकारीले जनताकाे समस्या समाधानकाे नेता पार्टी बनाउन पार्टीका नीति, विचार र मुद्वालाई बाेक्ने जनतामा पुर्याउने सशक्त पार्टी संगठन निर्माण गर्ने मिसन ग्रासरूटकाे उद्देश्य रहेकाे बताए । अधिकारीले पार्टीभित्र देखापर्ने गलत, वेथिति, अवसरवाद र अराजकताकाे अन्त्य गर्दै विचारले स्पष्ट र निर्णय कार्यान्वयन समयमै गर्नसक्ने पार्टी पंक्ति तयार गर्नु अभियानकाे मूख्य उदेश्य रहेकाे जानकारी ।
यस्तै स्थायी कमिटीका सदस्य अधिकारीले राजनीतिक क्रान्ति पूरा भएपनि सामाजिक, आर्थिक र साँस्कृतिक क्षेत्रमा रूपान्तरण आवश्यक रहेकाेले आज पनि राजनीतिमा त्याग, निष्ठा र समर्पणलाई अनुशरण गर्दै पार्टी र जनताकाे काममा जुट्न बैठकमा निर्देशन दिएका थिय ।
पार्टी जिल्ला अध्यक्ष एकालाल श्रेष्ठकाे अध्यक्षतामा बसेकाे बैठकमा मकवानपुर जिल्लाका मिसन ग्रासरूट अभियानका केन्द्रीय प्रतिनिधिहरू केन्द्रीय पाेलिटव्यूराे सदस्य देवि ज्ञवाली, केन्द्रीय सदस्यहरू खेम लाेहनी, वालिका गिरी, कमलजंग राई, केन्द्रीय सदस्यहरू जुनेली श्रेष्ठ, भारती पाठक, प्रदेश कमिटी उपसचिव तथा प्रतिनिधिसभा संसद महेश बर्ताैला, राष्ट्रिय सभा संसद रामचन्द्र राईलगायतकाे उपस्थिति रहेकाे थियाे ।
निर्वाचन आयोगले मतदाता नामावली सूचीबाट २ लाख १५ हजार ४ सय ३४ मतदाताको नाम हटाएको छ । आयोगले मतदाता नामावली शुद्धीकरणअन्तर्गत २ लाख १५ हजार ४ सय ३४ जनाको नाम मतदाता नामावली सूचीबाट हटाएको हो ।
त्यस्तै, आयोगले प्रतिनिधि तथा प्रदेशसभा निर्वाचनपछि स्थगित नयाँ नामावली दर्ता र अद्यावधिक कार्यसमेत सुचारु गरेको छ । आयोगले गत २ माघबाटै नामावली दर्ता र नामावली अद्यावधिक गर्न सुरु गरेको हो ।
आयोगका प्रवक्ता शालिग्राम शर्मा पौडेलले मतदाता नामावलीमा दोहोरो नामावली रहेका र मृत्यु भइसकेका मतदाताको नामावली मतदाता नामावलीबाट हटाएको जानकारी दिए ।
‘विगतका दिनमा कतिपयको नाम नामावली सूचीमा दोहोरिएको गुनासो आयो, कतिले स्वर्गबाट पनि मत हाले भन्ने गुनासो गरे, त्यसपछि आयोगले मतदाता नामावली शुद्धीकरण गर्न नाम दोहोरिएका र मृत्यु भइसकेकाको नाम सूचीबाट हटाउने प्रक्रिया थालेको हो,’ आयोग प्रवक्ता पौडेलले राजधानीसँग भने ।
आयोगले स्थानीय तहसँगको समन्वय तथा राजनीतिक दलका प्रतिनिधिसहितको सहयोगमा मतदाता नामावलीमा दोहोरो नाम भएका र मृत्यु भइसकेकाको नाम मतदाता सूचीबाट हटाइएको जनाएको छ ।
आयोगका प्रवक्ता पौडेलका अनुसार मतदाता नामावली शुद्धीकरण अभियानलाई आयोगले निरन्तररूपमा अघि बढाउने छ । आयोगले ३ मंसिर २०७९ अर्थात् प्रतिनिधिसभा तथा प्रदेशसभा निर्वाचनको अघिल्लो दिनसम्म १८ वर्ष उमेर पुगेका र मतदाता नामावलीमा नाम दर्ता गराएकालाई मतदानका लागि योग्य मानेको थियो ।
गत ४ मंसिरमा सम्पन्न प्रतिनिधि तथा प्रदेशसभा निर्वाचनमा १ करोड ७९ लाख ८८ हजार ५ सय ७० मतदाता कायम भएका थिए । जसमध्ये ८८ लाख ४७ हजार ५ सय ७९ महिला, ९१ लाख ४० हजार ८ सय ६ पुरुष र १ सय ८५ अन्य मतदाता थिए ।
गत निर्वाचनमा १ सय ६५ प्रतिनिधिसभा र ३ सय ३० प्रदेशसभा निर्वाचन क्षेत्रमा गरी कुल १० हजार ८ सय ९२ मतदान स्थल तथा २२ हजार २ सय २७ मतदान केन्द्र कायम गरिएको थियो । निर्वाचनमा १ सय ४१ अस्थायी मतदान केन्द्रमार्फत ४५ हजार अस्थायी मतदातालेसमेत मतदान गरेको निर्वाचन आयोगले जनाएको छ ।
सो निर्वाचनमा आयोगमा दर्ता कायम भएका १ सय १६ राजनीतिक दलमध्ये निर्वाचन प्रयोजनका लागि ८६ वटा राजनीतिक दल दर्ता भएका थिए । त्यसमध्येमा पनि समानुपातिक निर्वाचन प्रणालीतर्फ बन्दसूची पेस गर्ने दल ४७ वटा थिए भने प्रत्यक्षतर्फ ६१ दलले निर्वाचनमा सहभागिता जनाएका थिए । तर, निर्वाचनमार्फत संसदमा १२ वटा राजनीतिक दलको मात्रै प्रतिनिधित्व भएको छ ।
निर्वाचन आयोगले प्रतिनिधिसभा तथा प्रदेशसभा निर्वाचन सम्पन्न भए र सबै परिणाम आएपछि गत २ माघबाट नै मतदाता नामावलीमा नाम दर्ता खुला गरिसकेको छ । आयोगले सोही मितिबाट नामावली संकलन र अद्यावधिक कार्य सुचारु भइसकेको जनाएको हो । समाचार राजधानी दैनिकबाट
मकवानपुर । बागमती प्रदेश सभामा दलिय सहमति नजुट्दा प्रदेश सभा बैठक बस्नै सकेन सोमबार मध्यान्ह १२ बजेको लागि बोलाईएको बैठक दलिय सहमति नजुट्दा पटक पटक स्थगित भयो, अन्तत: सांझ बस्ने भनिएको बैठक पनि बस्न सकेन ।
प्रदेशसभाका सातवटा विषयगत समितिका सदस्यहरु मनोनीत गर्न बस्ने भनिएको बैठक नेपाली कांग्रेस र नेकपा एकीकृत समाजवादीले सदस्यहरुको नाम नपठाएपछि बैठक बस्न नसकेको हो। आइतबारको प्रदेशसभा बैठकले कार्यव्यवस्था तथा परामर्श समितिका सदस्यहरु मनोनीत गरेको थियो ।
सोमबार बाँकी सातवटा विषयगत समितिहरुको सदस्य मनोनीत गर्ने कार्यसूची रहे पनि नेपाली कांग्रेस र नेकपा एकीकृत समाजवादीले समितिमा सहभागी हुने सदस्यहरुको नाम नपठाएपछि बैठक स्थगित भएको प्रदेशसभा सचिवालयले जनाएको छ ।
बागमती प्रदेशसभामा संसदीय समितिहरू गठन गर्ने कार्यसूची तय भए पनि नेपाली कांग्रेस र नेकपा एकीकृत समाजवादीले सदस्यहरूको नाम नपठाउँदा प्रदेशसभा बैठक प्रभावित भएको हो। आइतबार सर्वदलीय बैठक बसेर सोमबारको बैठकमा संसदीय समिति गठन गर्ने सहमति भए पनि सोमबार कांग्रेस र एकीकृत समाजवादीले सदस्यहरूको नाम पठाउन अरुचि देखाएपछि १२ बजेका लागि बोलाएको प्रदेश सभा बैठक निर्धारित समयमा बस्न सकेन । त्यसपछि ४ बजेको लागि बोलाइयो ।
४ बजे पनि बैठक बस्न नसकेपछि ५ बजेलाई बोलाइयो । फेरि पनि बैठक बस्न दलिय सहमत जुटेन । अन्ततः बैठक माघ २६ गते बिहीबार दिउँसो १ बजे बस्ने गरि स्थगित गरिएको हो । माघ २६ गतेको बैठकमा प्रदेश प्रमुख यादवचन्द्र शर्माले सम्बोधन गर्ने कार्यसूची रहेको बताइएको छ । प्रदेश प्रमुख शर्माले संवैधानिक ब्यबस्था अनुसार प्रदेशसभा बैठकलाई सम्बोधन गर्ने भएका हुन् ।
कांग्रेस र समाजवादीका नेताहरू सङ्घीय सरकारमा समेत समितिहरू गठन नभएको भन्दै प्रदेशमा अहिले नै हतार गर्न नपर्ने भन्दै दुई दलले नाम दिएनन् । उनीहरुले प्रदेश संसद् सचिवालयका सचिव र सभामुख मिलेर सत्तापक्षलाई बल पुग्ने गरी समिति गठनको प्रक्रिया अघि बढाएको आरोप लगाउँछन् ।
“सत्तापक्षलाई बल पुग्ने गरी एकलौटी गर्न खोजियो त्यसैले काँग्रेसले अहिले नै नाम पठाउँदैन” कांग्रेसका एक सांसदले “हामीमा नाम फाइनल छ, उता नदिएका मात्रै हौं ।” त्यस्तै नेकपा एकीकृत समाजवादीका सांसद कृष्ण खनाल पनि आफ्नो पार्टीबाट समितिमा पठाउने सदस्यहरूको नाम तयार भए पनि अहिले नै नपठाउने बताएछन् । खनालले भने “नामहरू फाइनल छ तर अहिले पठाउँदिन ।”
प्रदेश सचिवले कार्यव्यवस्था परामर्श समितिलाई बेवास्ता गर्दै सर्वदलीय बैठक बोलाएको उनीहरूको दाबी छ।
मकवानपुर । बागमती प्रदेश सरकारका श्रम रोजगार तथा यातायात मन्त्री एकालाल श्रेष्ठले पत्रकारहरुलाई हरेक क्षेत्रमा प्रदेश सरकारको सहयोग रहने बताएका छन् ।
प्रेस चौतारी नेपालको २५ औ स्थापना दिवसका अवसरमा आइतबार हटौंडामा आयोजित अन्तरक्रिया कार्यक्रम मन्त्री श्रेठले यस्तो बताएका हुन् । प्रेस चौतारी मकवानपुरको आयोजनामा सामाजिक उत्तरदायित्व सहितको पत्रकारिता विषयक अन्तरक्रिया कार्यक्रममा बोल्दै मन्त्री श्रेष्ठले भने “पत्रकार र पत्रकारिता क्षेत्रलाई हरेक क्षेत्रबाट सहयोग गरिनेछ,अहिलेको अवस्थामा कुनैपनि व्यावसायहरु धारासाही बन्दै गएको छ, पत्रकारिता क्षेत्रमा पनि समस्या शृजना भएप्रति हाम्रो ध्यानाकर्षण भएको छ ।”
नेकपा एमाले मकवानपुरका अध्यक्ष समेत रहेका श्रेष्ठले पत्रकारका निम्ती आफ्नो मन्त्रालयबाट पनि सक्दो सहयोग गर्ने बताए । उनले बिशेषगरी श्रम र रोजगार मुलक तालिम दिएर रोजगारी सृजना गर्ने तर्फ मन्त्रालय लागि परेको बताए ।
पत्रकारहरुले मन्त्री र सरकारलाई खुइल्याउने मात्र भन्दा पनि रचनात्मक सुझाब र सहयोग गर्न उनले आग्रह गरे । यातायात कार्यालयहरुमा हुँदे आएको समस्या र बिचौलीयाको समस्या हटाएरै छाड्ने उनले बताए ।
कार्यक्रममा प्रेस चौतारी नेपालका केन्द्रीय सदस्य तथा मकवानपुर इन्चार्ज हरि हुमागाँईले पत्रकारका विभिन्न संघसंस्था र महासंघलाई स्थानीय र प्रदेश सरकारले सहयोग गर्न आग्रह गरे । पत्रकारलाई परेका समस्या समाधानका लागि मकवानपुरबाट पत्रकार पेन्सन कोष र उपचार कोष स्थापना गरिएकाले त्यसका लागि सरकारले थप सहयोग गर्न आग्रह गरे ।
प्रेस चौतारी मकवानपुरका अध्यक्ष बालकृष्ण अधिकारीको अध्यक्षतामा भएको कार्यक्रममा नेकपा एमाले मकवानपुरका सचिब तथा हेटौंडा–४ का वडा अध्यक्ष नविन सिग्देल, पार्टीका उपसचिब तथा भीमफेदी गाउँपालिकाका अध्यक्ष हिदम लामा, बागमती प्रदेश युवा समितिका कार्यकारी उपाध्यक्ष सन्तोष चौलागाई, पत्रकार महासंघका महासचिब कृष्ण सारु मगर, प्रेस चौतारी नेपा बागमती प्रदेशका महासचिब प्रकाश दाहाल लगायतले सामाजिक उत्तरदायित्व सहितको मर्यादित पत्रकारीताको तर्फ सबैले ध्यान दिनुपर्ने बताएका थिए ।
कार्यक्रममा नेपाल पत्रकार महासंघका केन्द्रीय सदस्य सुनिल खड्का, पत्रकार महासंघ बागमती प्रदेशका संस्थापक अध्यक्ष प्रताप विष्ठ, वर्तमान उपाध्यक्ष रुपेश दुलाल, पत्रकार महासंघ मकवानपुरका कार्यबाहक अध्यक्ष ध्रुब अधिकारी, प्रेस सेन्टर मकवानपुरका अध्यक्ष अन्जली थापालगायत मकवानपुरका पत्रकारहरुको उपस्थिति रहेको थियो ।