मकवानपुर । अबकाे केही दिन पछी प्रदेश राजनीतिमा केही परिवर्तन हुने संकेत देखिएको छ । बागमती प्रदेश, प्रदेश १ र कर्णाली प्रदेशका मुख्यमन्त्री परिवर्तन हुने संकेत देखिएको हो । केन्द्रमा नेपाली कांग्रेस सभापति शेरबहादुर देउवा नेतृत्वमा बनेको सरकारमा माओवादी केन्द्र, नेकपा ऐकिकृत समाजवादी, जसपा र जनमोर्चा गरी पाँच दल सरकार सहभागी छ ।
गठबन्धन नै बनाएर सत्ता सञ्चालन गरिरहेका उनीहरूले प्रदेश सरकार परिवर्तनका विषयमा समेत भद्र सहमति गरेका छन् । मन्त्रिपरिषद् विस्तारकाे समयमा बागतमी र प्रदेश १ को मुख्यमन्त्री नेकपा एकिकृत समाजवादीलाई दिने भद्र सहमति पछी केन्द्रीय सरकारमा नेकपा एसकाे प्रतिनिधित्व खुम्चिएकाे छ । नेकपा एसबाट ६ जना मन्त्री हुने पक्कापक्की भएकाेमा प्रदेश मुख्यमन्त्री २ जना बनाउने सहमति पछि उसले केन्द्रीय सरकारमा ४ जना मन्त्रीलाई पठाएकाे हाे ।
दशैं सकिए लगतै बागमती, प्रदेश १ र कर्णाली प्रदेशको मुख्यमन्त्री परिवर्तन हुने लगभग निश्चत जस्तै भएकाे हाे । एकिकृत समाजवादीले बागमती प्रदेश र प्रदेश १ मा आफ्नो दाबी पेश गर्दै आएकोमा साेही अनुसार सहमति भएकाे हाे । दशैं लगत्तै बागमती प्रदेश र प्रदेश १ मा समाजवादीले मुख्यमन्त्री पाउने सम्भावना छ । बागमती प्रदेशकी मुख्यमन्त्री अष्टलक्ष्मी शाक्यले विश्वासको मतका लागि संसदमा प्रस्ताव पेश गरेकी छिन् । प्रस्ताव पेश गरेसँगै दशैंका लागि संसद् अधिवेशन कार्तिक ४ गते सम्म स्थगित भएको थियो । साेही दिन मुख्यमन्त्री शाक्यको भाग्य निर्धारण हुनेछ ।
केन्द्रीय राजनीतिमा भएकाे भद्र सहमति अनुसार शाक्यले विश्वासको मत नपाएको खण्डमा समाजवादीका नेता राजेन्द्र पाण्डे मुख्यमन्त्री बन्ने छन् । प्रदेशकाे समीकरण हेर्दा मुख्यमन्त्री शाक्यलाई विश्वासको मत लिन सहज छैन । १ सय ९ सांसद रहेको प्रदेशसभामा शाक्यलाई आफ्नो पद जोगाउन ५५ सांसद चाहिन्छ । तर, उनको दल एमालेसँग ४३ सांसद मात्र छन् ।
एमाले बाहेकको गठबन्धनमा आवद्ध दलसँग ५८ मत रहेको छ । तर, प्रदेश सभामा २२ सिट रहेको कांग्रेसले बागमतीमा आफ्नो नेतृत्वमा सरकार बनाउन चाहेकाे ले कुन दलको नेतृत्वमा सरकार बनाउने भन्ने अनिश्चित जस्तै रहेकाे छ । प्रदेश संसदीय दलका नेता इन्द्र बानियाँ कस्सीएर आफ्नो नेतृत्वमा सरकार बनाउने कसरतमा छन् । बानियाँ पनि पार्टी सभापति तथा प्रधानमन्त्री शेर बहादुर देउवाको निर्णय अनुसार नै अगाडी बढ्ने मनस्थितिमा रहेकाे देखिन्छन् ।
त्यस्तै प्रदेश १ मा मुख्यमन्त्री भीम आचार्यले दशैंपछि विश्वासको मत लिदैंछन् । दशैंपछि विश्वासको मत लिन लागेका मुख्यमन्त्री आचार्यको पद पनि धरापमै छ । प्रदेश १ नेकपा एसकै राजेन्द्र राई गठबन्धनका तर्फबाट मुख्यमन्त्रीका दाबेदार हुन् । गठबन्धनले सहयोग गरेको खण्डमा राई मुख्यमन्त्री हुनेछन् ।
दशैंपछि कर्णाली प्रदेशमा मुख्यमन्त्री परिवर्तन हुने विषयले चर्चा पनि चर्चा पाइरहेको छ । नेकपा (माओवादी केन्द्र) बाट मुख्यमन्त्री बनेका महेन्द्रबहादुर शाहीले बैशाख ३ गते विश्वासको मत लिँदा ६ महिनापछि पदबाट राजीनामा दिने र नेपाली कांग्रेस कर्णाली प्रदेश संसदीय दलका नेता जीवनबहादुर शाहीलाई मुख्यमन्त्री बनाउने सहमति गरेका थिए । त्यही सहमतिअनुसार नै मुख्यमन्त्री परिवर्तनको चर्चा चलेको हो ।
तर मुख्यमन्त्री को हुने केन्द्रको राजनीतिमा भर पर्ने छ । राजनीतिक उथलपुथल नभए कार्तिकको पहिलाे साता वा प्रक्रिया पुरा गर्दा कार्तिक १० गतेसम्म कर्णालीकाे मुख्यमन्त्रीकाे टुंगाे लाग्ने छ । यस विषयकाे टुंगाे नेपाली काँग्रेसकाे निर्णयमा भर पर्ने देखिन्छ भने मुख्यमन्त्री शाही र कांग्रेस संसदीय दलका नेता शाहीबीच भएको सहमति अनुसार दशैंपछि सरकार परिवर्तन हुनसक्छ । तर, त्यसका लागि केन्द्रको राजनीतिले कस्तो निर्णय गर्न सक्छ त्यसमा भर पर्छ ।
मकवानपुर । बागमती प्रदेश प्रहरी कार्यालयले बागमती प्रदेश अन्तर्गतका मातहत जिल्ला प्रहरी कार्यालय तथा जिल्ला ट्राफिक प्रहरी कार्यालयलाई ब्यारिकेट वितरण गरेकाे छ । बढ्दो सवारी दुर्घटना न्युनिकरणका निमित्त ट्राफिक व्यवस्थापन एवम् सुरक्षा चेकजाँचलाई प्रभावकारीता दिन ब्यारिकेट वितरण गरिएको हाे ।
सवारी साधनको प्रयोग गरी दुर्घटना तथा विभिन्न अपराधिक घटना घटाई अपराधी फरार हुने हुँदा भरपर्दो सुरक्षा चेकजाँचका लागि बागमती प्रदेश अन्तर्गतका विभिन्न प्रहरी ईकाईहरुलाई १२ थान ब्यारिकेट वितरण गरिएको प्रदेश प्रहरी प्रवक्ता प्रहरी उपरीक्षक नवराज अधिकारीले जानकारी दिए ।
प्रहरीलाई साधनस्रोत सम्पन्न गराई समाजमा शान्ति सुरक्षा कायम गर्न तथा अपराध न्युनिकरणका लागि समुदाय प्रहरी साझेदारी कार्यक्रम अन्तर्गत प्रदेश प्रहरी कार्यालयको पहलमा उक्त ब्यारिकेट वितरण गरी प्रयोगमा ल्याईएको अधिकारीले बताए ।
मकवानपुर । बागमती प्रदेशका मुख्यमन्त्री अष्टलक्ष्मी शाक्यले आज असेाज २४ गते आइतबार विश्वासको मत लिँदैछिन् । सत्तारुढ दल एमाले विभाजनसँगै बागमती प्रदेशसभामा एमालेका १३ जना प्रदेशसभा सदस्यले माधवकुमार नेपाल नेतृत्वको नेकपा (एकीकृत समाजवादी) रोजेपछि शाक्य नेतृत्वको सरकार अल्पमतमा परेको हाे ।
अल्पमतमा परेपछि शाक्य नेतृत्वको सरकारले प्रदेशसभाबाट विश्वासको मत लिनुपर्ने अवस्था आएको हो । आइतबार दिउँसो ३ बजे बस्ने प्रदेशसभा बैठकमा शाक्यले विश्वासको मत लिन लागेकी हुन् । नेकपा एमाले पार्टीभित्रको विवादमा माधव नेपालाई साथ दिँदै आएकी शाक्यलाई पार्टी विभाजन हुँदा नेपाल पक्षकाे साथ टुटाउन एमाले अध्यक्ष केपी ओली खेमाले हतारमा मुख्यन्त्री नियुक्त गरेको थियो । बागमती प्रदेशका मुख्यमन्त्री डाेरमणि पाैडेललाई राजिनामा गर्न लगाएर गत भदाै २ गते राती मुख्यमन्त्रीकाे सपथ लिएका शाक्यले भने पार्टी जाेगाउन मुख्यमन्त्री स्वीकार गरेकाे बताउँदै आएकी छिन् ।
बागमती प्रदेशमा कुल १ सय १० जना सांसदमध्ये एक सिट रिक्त छ । कोरोनाका कारण दोलखाबाट निर्वाचित प्रदेशसभा सदस्य पशुपति चौलागाईको निधनपछि एक सिट खाली भएको हो । हाल बागमती प्रदेशसभामा १ सय ९ जना सांसद छन् । बागमती प्रदेशसभामा बहुमतका लागि कम्तीमा पनि ५५ जना सांसद आवश्यक हुन्छ । प्रदेशसभामा एमालेका सभामुखसहित हाल ४३ जनामात्रै सांसद छन् । त्यसैले मुख्यमन्त्री शाक्यले प्रदेशसभाबाट विश्वासको मत पाउने अवस्था देखिदैन ।
शेर बहादुर देउवा नेतृत्वकाे गठबन्धनले बागमती प्रदेश र प्रदेश १ मा नेकपा एस लाई मुख्यमन्त्री दिने सहमती गरेर संघीय सरकार विस्तार गरेकाे छ । अहिलेकाे गठवन्धनले शाक्य नेतृत्वको बागमती प्रदेश सरकारकाे विकल्पमा एकीकृत समाजवादीका संसदीय दलका नेता राजेन्द्र पाण्डे नेतृत्वमा नयाँ सरकार गठन गर्ने तयारी अघि बढाएका छन् । एकीकृत समाजवादीका पाण्डेलाई सत्तारुढ गठबन्धले मुख्यमन्त्री बनाउने सहमती गरि सकेकाेले राजनीतिक उथलपुथल नभएमा बागमती प्रदेशमा पाण्डे तेस्राे मुख्यमन्त्री बन्नेछन् ।
मकवानपुर । बागमती प्रदेश खेलकुद विकास परिषद्को कार्यालय हेटौंडाकाे गौरीटारमा सारिने भएकाे छ । शुक्रबार सामाजिक विकास मन्त्री विजय सुवेदीले हेटाैडा ६ गौरीटारमा रहेको साढे ३ तल्ले भवनमा प्रदेश खेलकुद विकास परिषद्को कार्यालय शुभारम्भ गर्न उद्घाटन गरेका छन् ।
कोरोना संक्रमितहरुको उपचारका लागि आइसोलेशन वार्डको रुपमा प्रयोग गरिएको उक्त भवनलाई औपचारिक रुपमा पहिलो पटक प्रदेश खेलकुद विकास परिषद्को कार्यालय रहने गरी उद्घाटन भएको हो । भवनमा रहेको ३९ वटै कोठालाई कार्यालयले प्रयोग गर्ने परिषद्ले जनाएकाे छ । उक्त भवन संघीय सरकारको बजेटबाट बनेकाे हाे ।
उक्त भवनमा ९ वटा खेलकुदका प्रदेश स्तरका कार्यालय समेत रहने सदस्य सचिव सूर्यलाल भण्डारीले जानकारी दिए । फुटबल, भलिबल, क्रिकेट, बक्सिङ, एथलेटिक्स, तेक्वान्दो, कराँते, व्याडमिन्टन र स्विमिङ खेल कार्यालयलाई समेत १-१ कोठा कार्यालयका रुपमा प्रयोग गर्न उपलब्ध गराइने भएकाे हाे । कार्यालयको औपचारिक रुपमा शुक्रबार उद्घाटन गरिएको भएपनि हेटौंडा–४ मा रहेको कार्यालयमा रहेका सामानहरु दशैंपछि मात्र सारेर त्यसपछि मात्र कार्यालय गौरीटारबाट सञ्चालन हुने बताइएकाे छ ।
कार्यालय उद्घाटन कार्यक्रममा सामाजिक विकास राज्यमन्त्री जुनेली श्रेष्ठ, प्रदेश खेलकुद विकास परिषद्का सदस्यद्वय माधव तिमल्सिना, कल्पना शर्मा, जिल्ला खेलकुद विकास समिति मकवानपुरका अध्यक्ष सानु लामा, मकवानपुर जिल्ला फुटबल संघका अध्यक्ष टिका लामा, नेपाल पत्रकार महासंघ मकवानपुरका अध्यक्ष मणिराज गौतम लगायतकाको उपस्थिति रहेको थियो ।
मकवानपुर/ बामगती प्रदेशमा आगामी २४ असोजमा मुख्यमन्त्री अष्टलक्ष्मी शाक्यले विश्वासको मत लिने भएकी छन् । २४ असोजको दिउँसो ३ बजे नवौं हिउँदे अधिवेशन बोलाउन प्रदेश प्रमुखलाई आग्रह गर्ने निर्णय प्रदेश सरकारले बुधबार गरेको छ ।
अल्पमतमा परेको बागमती प्रदेश सरकारले आगामी २४ असोजमा विश्वासको मत लिने भएको हो। बुधबार बसेको प्रदेश सरकारको बैठकले अधिवेशन आव्हानका लागि प्रदेश प्रमुखलाई आग्रह गर्ने निर्णय गरेको छ । प्रदेश सरकारका मन्त्री केशवराज पाण्डेले २४ असोजमा अधिवेशन आव्हानका लागि प्रदेश प्रमुख समक्ष आग्रह गर्ने निर्णय गरिएको जानकारी दिए ।
एमालेको एकल बहुमत रहेको बागमती प्रदेशमा १३ जनाले एकीकृत समाजवादी रोजेपछि मुख्यमन्त्री शाक्य अल्पमतमा परेर सरकार सञ्चालन गरिरहेकी छिन् । मुख्यमन्त्री शाक्यको दल एमालेसका ४३ सांसदको साथका साथ बागमती सरकार सञ्चालन भइरहेको हो।पार्टी विभाजनसँगै बागमती प्रदेशमा एमालेका १३ सांसदले नेकपा (एकीकृत समाजवादी) रोजेपछि शाक्य अल्पमतमा परेकी थिइन् । पार्टी विभाजनको ३० दिनभित्र विश्वासको मत लिनुपर्ने संवैधानिक व्यवस्था बमोजिम मुख्यमन्त्री शाक्यले नवौं अधिवेशनमार्फत विश्वासको मत लिने तयारी थालेको भएपनि उनले विश्वासको मत पाउँने अवस्था अहिले छैन ।
एमालेका १३ प्रदेश सभा सदस्य नेकपा (एकीकृत समाजवादी)मा लागेपछि मुख्यमन्त्री अष्टलक्ष्मी शाक्यले विश्वासको मत लिनुपर्ने बाध्यात्मक अवस्था आइलागेको हो । आफूले विश्वासको मत नपाउने अवस्था भए पनि नतिजा स्वीकार गर्न आफू तयार रहेको मुख्यमन्त्री शाक्यले बताउँदै आएकी छन् ।
५६ सांसद सहित एकल बहुमत रहेको एमाले प्रदेश सभा संसदीय दलको नेताका रूपमा २ भदौमा उनी मुख्यमन्त्री नियुक्त भएकी थिइन् । ११० सदस्यीय प्रदेश सभामा बहुमतका लागि आवश्यक सांसद सङ्ख्या नपुगेपछि मुख्यमन्त्री शाक्यले विश्वासको मत लिनुपरेको हो।संविधानको धारा १८८ (२) मा मुख्यमन्त्रीले प्रतिनिधित्व गर्ने दल विभाजन भए ३० दिनभित्र विश्वासको मत लिनका लागि प्रदेश सभामा प्रस्ताव राख्नुपर्ने व्यवस्था गरिएको छ ।
बागमती प्रदेश सभामा एमालेका ४३, नेकपा (माओवादी केन्द्र)का २३, नेपाली कांग्रेसका २२, नेकपा (एकीकृत समाजवादी)का १३, विवेकशील साझा पार्टीका तीन, नेपाल मजदूर किसान पार्टीका दुई, राष्ट्रिय प्रजातन्त्र पार्टीका दुई र एक जना स्वतन्त्र सांसद छन्।संघमा गठबन्धन गरेको कांग्रेस, माओवादी र एकीकृत समाजवादी यो प्रदेशमा मिल्ने हो भने मुख्यमन्त्री शाक्यको बहुमत नपुग्ने निश्चितप्रायः छ ।
विश्वासको मत लिनका लागि मुख्यमन्त्री शाक्यले अहिलेसम्म आफ्नै पार्टी एमाले बाहेक अरुसंग भरपर्ने आधार नभएको बताइएको छ । यस्तो अवस्थामा मुख्यमन्त्री शाक्य विश्वासको मत लिन असफल हुने र आफूहरुको सरकार बनाउँने विपक्षी गठबन्धनको तयारी छ।विपक्षी गठबन्धनमा रहेका माओवादी केन्द्र, कांग्रेस, एकीकृत समाजवादीले आफूहरु मध्येबाट नयाँ मुख्यमन्त्री बनाउँने तयारी गरेका छन् । उनीहरुका अनुसार गठबन्धनमा ५९ मत रहेको छ ।