मकवानपुर । आज असोज ३ गते संविधान दिवस । संविधानसभाबाट संविधान पारित भइ नेपालको संविधान जारी भएकाे दिन । संविधान दिवस २०७९ काे अवसरमा बागमती प्रदेशका प्रदेश प्रमुख यादवचन्द्र शर्माले शुभकामना व्यक्त गरेका छन् । शुभकामना सन्देशमा प्रदेश प्रमुख शर्माले भनेका छन् ‘संविधानसभाबाट संविधान पारित भएकोमा हामी गौरवबोध गर्दछौं ।’
साेमबार शुभकामना सन्देश जारी गर्दै शर्माले भनेका छन् ‘नेपाली जनताको संघर्ष, त्याग र बलिदानपछि संविधान जारी भएको २०७२ असोज ३ लाई ऐतिहासिक दिवसको रुपमा स्मरण गरिरहेका छौं।’ ‘नेपालको स्वतन्त्रता, सार्वभौमिकता, भौगोलिक अखण्डता, राष्ट्रिय एकता,स्वाधीनता र स्वाभिमानलाई अक्षुण्ण राखी जनताको सार्वभौम अधिकार, स्वायत्तता र स्वशासनको अधिकारलाई आत्मसात् गर्दै देशमा संघीय लोकतान्त्रिक गणतन्त्रात्मक शासन प्रणाली मजबुत बनाउनका लागि संविधान जारी भएको सुखद् दिनका रुपमा संविधान दिवस’ मनाउने गर्दछौं । यस सुखद् अवसरमा समस्त नेपाली दाजुभाई तथा दिदिबहिनीहरुमा हार्दिक शुभकामना व्यक्त गर्दछु’ प्रदेश प्रमुख शर्माले सन्देशमा भनेका छन् ।
‘आर्थिक समानता, समृद्धि र सामाजिक न्याय सुनिश्चित गर्न समानुपातिक, समावेशी र सहभागितामूलक सिद्धान्तका आधारमा समतामूलक समाजको निर्माण गर्ने संकल्प गरी जारी गरिएको संविधानको मर्म र भावनालाई अक्षरस : पालना गर्दै त्यसको कार्यान्वयन गर्नु हामी सबैको दायित्व हो । साथै, संविधानवादको सिद्धान्तलाई अंगिकार गरी संविधान कार्यान्वयनको सवालमा देखा परेका चुनौती सामना गर्न तत्पर रहनु आजको आवश्यकता हो’ शुभकामना सन्देशमा भनिएकाे छ ।
संविधान दिवसकाे शुभकामनामा उनले भनेका छन् ‘दिगो शान्ति, सुशासन, विकास र समृद्धिको आकांक्षा पूरा गर्न संविधानसभाबाट संविधान पारित भएकोमा यस अवसरमा संघीय लोकतान्त्रिक गणतन्त्र स्थापनाको लागि भएका विभिन्न आन्दोलनको क्रममा आफ्नो अमूल्य जीवन उत्सर्ग गर्नुहुने नेपाल आमाका वीर सन्तानप्रति उच्च सम्मान प्रकट गर्दै भावपूर्ण श्रद्धान्जली अर्पण गर्दछु।’ प्रदेश प्रमुख शर्माले शुभकामना व्यक्त गर्दै दिवसले संविधानले परिकल्पना गरेको महान लक्ष्य प्राप्तिका लागि मन वचन र कर्मले समर्पित रहन हामी सबैलाई प्रेरणा प्रदान गरोस् भनेका छन् ।

मकवानपुर । बागमती प्रदेशका प्रदेश प्रमुख यादव चन्द्र शर्माले ५८ औं राष्ट्रिय बाल दिवसमा शुभकामना व्यक्त गरेका छन । हरेक बर्ष भदौ २९ गते मनाइने राष्ट्रिय बाल दिवसका अवसरमा प्रदेश प्रमुख शर्माले आज बुधबार विज्ञप्ति मार्फत शुभकामना व्यक्त गरेका हुन् ।
बालबालिकाको सवालमा व्यवस्था गरिएका विभिन्न संवैधानिक तथा कानूनी प्रावधानहरूको स्थानीय, प्रदेश तथा संघ तीनै तहका सरकारबाट प्रभावकारी कार्यान्वयन हुनुपर्दछ । ’ शर्माद्वारा जारी विज्ञप्तिमा भनिएको छ ।
जारी विज्ञप्तिमा नेपालले बालअधिकार सम्बन्धी महासन्धी १९८९ लाई १४ सेप्टेम्बर १९९० मा अनुमोदन गरेर बालबालिकाको विकास, बालअधिकारको संरक्षण र बालसहभागिता जस्ता विषयमा आफ्नो अन्तर्राष्ट्रिय प्रतिबद्धता गरेको दिनका अवसरमा हरेक वर्ष भदौ २९ गते राष्ट्रिय बाल दिवस मनाउँदै आएको उल्लेख गरिएको छ ।
प्रमुख शर्माले वर्तमानका साझेदार एवं भविष्यका कर्णधार मानिने बालबालिकालाई भोलिका दिनमा जिम्मेवार नागरिक बनाउन सम्बन्धित पक्ष लागिपरौं भन्ने आव्हान समेत गरेका छन् ।
‘‘बालमैत्री समाजको आधार : जिम्मेवार परिवार, उत्तरदायी सरकार’’ भन्ने नारासहित आज ५८ औं राष्ट्रिय बाल दिवस मनाइदै छ । २०२२ सालबाट भदौ ४ गते मनाइदै आइएको बाल दिवस २०६३ सालबाट भदौ २९ गते मनाउन थालिएको हो ।

मकवानपुर । लामखुट्टेको टोकाईबाट हुने डेंगु संक्रमण नेपालमा पछिल्लो समय बढ्दो क्रममा देखिएको छ । स्वास्थ्य तथा जनसङ्ख्या मन्त्रालयका अनुसार अहिलेसम्म ७२ जिल्लामा डेंगू संक्रमण देखिएको छ ।
बागमती प्रदेशमा सबै भन्दा बढी
देशभर साउनदेखि यता २ हजार एक सय ७९ जनामा डेंगु पुष्टि भएको स्वास्थ्य मन्त्रालयले जनाएको छ । मन्त्रालयका अनुसार सबैभन्दा बढी संक्रमित बागमती प्रदेशमा देखिएका छन् । हालसम्म बागमती प्रदेशमा १ हजार २ सय ९१ जनामा डेंगू संक्रमण पुष्टि भएको छ ।
यसैगरी, लुम्बिनी प्रदेशमा ५ सय ८३, प्रदेश नम्वर १ मा १ सय ४४, गण्डकी प्रदेशमा ५२, मधेश प्रदेशमा ४८, कर्णाली प्रदेशमा १७ र सुदूपश्चिम प्रदेशमा १४ जनामा संक्रमण पुष्टि भएको छ । देशभर २०७८ पुसदेखि यता ४ हजार १सय ४ जनामा डेंगु पुष्टि भएको मन्त्रालय अन्तर्गतको इपिडिमियोलोजी तथा रोग नियन्त्रण महाशाखाले जनाएको छ ।
हेटौंडामा डेंगु नियन्त्रण अभियान
हेटौँडा उपमहानगरपालिका क्षेत्रमा फैलदै गरेको डेंगु नियन्त्रणका लागि अभियान सुरु गरिएको छ । स्वास्थ्य कार्यालय मकवानपुरको समन्वयमा उपमहानगरले डेंगु नियन्त्रण अभियान सुरु गरेको हो । उपमहानगरपालिकाको जनस्वास्थ्य शाखाले नगरमा डेंगु रोग फैलाउने लामखुट्टेको लार्भा नष्ट गर्ने अभियान शनिबारबाट सञ्चालन गरिने जनाएको छ ।
शुक्रबार हेटौंडा उपमहानगरपालिकाले अभियानबारे अभिमुखिकरण कार्यक्रम गरि जानकारी गराएको हो । शनिवारबाट ४ दिने लार्भा नष्ट गर्ने अभियान सुरु गर्न लागिएको जनस्वास्थ्य निरीक्षक कृष्ण यादवले जानकारी दिए ।
साउन महिनादेखि अहिलेसम्म मकवानपुर जिल्लामा ५ सय ५८ जनामा डेंगी संक्रमण पुष्टि भएको स्वास्थ्य कार्यालय मकवानपुरले जनाएको छ । कार्यालयका सूचना अधिकारी लक्ष्मण घिमिरेका अनुसार सबैभन्दा बढी संक्रमित जिल्लाको हेटौंडा उपमहानगरपालिका–४ र ५ नंबर वडाका रहेका छन्
मकवानपुर । बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले योजना कार्यान्वयनमा ढिलाई नगर्न निर्देशन दिएका छन् । मातहतका कार्यालयका कर्मचारीहरुलाई चालु आर्थिक वर्षका छुट्याइएका याेजना कार्यान्वयन गर्न ढिलाई नगर्न उनले निर्देशन दिएका हुन् ।
प्रदेशभित्रका पूर्वाधार विकास कार्यालय र सहरी विकास तथा भवन कार्यालयका कार्यालय प्रमुखहरुबीच सोमबार मन्त्रालयमा भएको कार्यक्रम प्रजाले भने ‘योजना कार्यान्वयन गर्न कुनै कानुनी वा नीतिगत समस्या छ भने पहिचान गरी चाँडै मन्त्रालयलाई जानकारी गराउनूस्, नभए अब चाँडै नै योजना कार्यान्वयन गर्नतिर लाग्नुपर्ने हुन्छ ।’ छलफलमा राज्यमन्त्री प्रजाले डीपीआर गर्नुपर्ने योजनाहरुको डीपीआर सुरु गरी चाँडै ठेक्का लगाउन निर्देशन दिएका छन् ।
बहुवर्षीय ठेक्का लागेर काम भइरहेका सडक, भवन तथा सडक पुलका योजनाहरु चाँडै सम्पन्न गर्न सम्बन्धित कार्यालयहरुलाई दबाब दिनुपर्ने अवस्था सृजना नगर्नुस उनले भने । यसअघि डीपीआर भएर बसेका योजनाहरुमा आवश्यक बजेट विनियोजन गरिएको भन्दै राज्यमन्त्री प्रजाले कुनै योजनामा बजेट हाल्न छुटेको भए संशोधन गरी बजेट हालिने प्रतिवद्धता पनि जनाए । कार्यालयहरुमा कर्मचारीको अभाव भएको गुनासो आएको भन्दै उनले सबै कार्यालयहरुमा स्थायी कर्मचारी थप गर्ने प्रक्रिया अघि बढिसकेको पनि बताए ।
विगतमा कार्यालयका कर्मचारीको मनमुटाव तथा सल्लाह र समन्वय नहुँदा पनि योजना कार्यान्वयनमा असर परेको स्मरण गर्दै त्यस्तो अवस्थाको अन्त्य गर्न राज्यमन्त्री प्रजाले सचेत गराए । छलफलमा मन्त्रालयका सचिव शंकरप्रसाद पण्डितले कार्यक्रमहरु कार्यान्वयनमा कुनै समस्या भए प्रष्ट रुपमा राख्न कार्यालय प्रमुखहरुलाई आग्रह गरे । कानून र नीति नियमको परिधिभित्र रहेर कार्य सम्पादन गर्नसमेत मातहतका कार्यालय प्रमुखहरुलाई सचिव पण्डितले निर्देशन दिए ।
मकवानपुर । बागमती प्रदेश सभा सदस्य विराजभक्त श्रेष्ठले पार्टी परित्याग गरेका छन् । विवेकशील साझा पार्टीबाट प्रदेश सभा सदस्य बनेका श्रेष्ठले पार्टी भित्र अपारदर्शी गतिविधि बढेको भन्दै प्रदेशसभा सदस्य राजिनामा दिएका हुन् ।
पार्टी पद्धति, पारदर्शिता, जवाफदेहिता र लोकतान्त्रिक अभ्यासको मूल्य मान्यता र मर्म विपरीत रहेको भन्दै उनीसँगै उक्त पार्टीका ७ जना केन्द्रीय सदस्यले संयुक्त रुपमा विज्ञप्ति निकालेर राजिनामा दिएका हुन्। राजिनामा दिनेहरुमा प्रदेश सांसद् श्रेष्ठसहित केन्द्रीय सदस्य जमुना शर्मा, राज्यलक्ष्मी श्रेष्ठ, रोशनी अधिकारी, सस्मित पोखरेल, श्रीकृष्ण श्रेष्ठ र सुदन मानन्धर रहेका छन् ।
‘सुसंस्कृत सहभागितामूलक राजनीति र समतामूलक संवृद्धिलाई संस्थागत गर्ने कुनै प्रयास नदेखिएको आभास सहित हामीले पार्टीको केन्द्रीय समिति सदस्य नरहने गरी राजिनामा दिने निर्णय गरेका हौं” बिज्ञप्तिमा भनिएको छ । पद्धति, पारदर्शिता, इमानदारी, उत्कृष्टता जस्ता मूल्य र मान्यताका साथ सुसंस्कृत राजनीति र समतामूलक संवृद्धिलाई संस्थागत गर्न मूलधारे राजनीतिक दलहरूलाई चुनौती दिँदै विवेकशील साझा पार्टीको स्थापना भएको भएपनि पार्टी भित्र सो कायम नभएको भन्दै उनीहरुले पार्टीबाट संयुक्त रुपमा विज्ञप्ती जारी गरी राजिनामा दिएका हुन्।
२०७४ सालको सङ्घीय र प्रादेशिक निर्वाचनमा प्राप्त जनमतको सम्मान गरेर आम नागरिकहरूको समस्याहरूलाई सम्बोधन गर्दै सङ्गठन विस्तार गर्नुभन्दा पनि आन्तरिक कलहमा फस्दै, सम्भावनामा भन्दा बढि अरूको आलोचनामा अल्झिनु पर्ने बाध्यात्मक परिस्थिती सृजना भएको विज्ञप्तीमा उल्लेख छ । पटक पटक पत्रहरू पठाएर, औपचारिक र अनौपचारिक बैठकहरूमा इमानदारीपूर्वक सार्वभौम सदस्यहरूलाई प्रतिनिधित्व गर्दै उठाएका विषयहरू पनि पार्टी नेतृत्वले कहिल्यै पनि सम्बोधन गर्न नसकेको र पार्टीले न्यूनतम लोकतान्त्रिक अभ्यासको पालना गरेको आभाष सम्म पनि हुन सकेका उनीहरुको भनाई रहेको छ ।
उनीहरुले पार्टी स्थापना भएको लगभग पाँच वर्षसम्म पनि नयाँ सङ्गठन त बनाउन नसक्नु र भएका सङ्गठनहरू पनि भङ्ग गर्ने काम पार्टी नेतृत्वबाटै भएको आरोप लगाएका छन् । स्थापना कालदेखि नै अनवरत रूपमा सुसंस्कृत राजनीति स्थापना गर्न लागेका धेरै सदस्यहरू, नेताहरू र केही प्रदेश संयोजकहरूले प्रदेश समिति सहित पार्टी परित्याग गर्दै गएका कारण परिणामतः पार्टीले गत स्थानीय निर्वाचनमा लज्जास्पद हार व्यहोर्न पुगेको विज्ञप्तीमा उल्लेख छ ।