मकवानपुर । हरेक वर्ष जस्तै याे वर्ष पनि लैंगिक हिंसा विरुद्धकाे १६ दिने अभियान चलिरहेकाे छ । २५ नाेभेम्बर महिला हिंसा अन्त्य दिवसदेखि १० डिसेम्बर अन्तर्राष्ट्रिय मानवअधिकार दिवससम्म १६ दिनसम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ ।
संयुक्त राष्ट्रसंघको महासभाले प्रत्येक वर्ष २५ नोभेम्बरलाई महिला हिंसा निर्मूल सम्बन्धी अन्तर्राष्ट्रिय दिवसको रूपमा विश्वभर मनाउने निर्णय गरे बमोजिम सन् १९९१ देखि बिश्वब्यापी रुपमा नोभेम्बर २५ देखि डिसेम्बर १० सम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ । नेपालमा बि.सं. २०५४ साल देखी यो अभियान सञ्चालन हुँदै आईरहेकोमा नेपाल सरकारको २०७६ साल जेठ ६ गते वर्ष २०७६ लाई लैंगिक हिंसा बिरुद्धको अभियान बर्ष घोषणा गरेको थियाे ।
याे वर्ष “लैंगिक हिंसा अन्त्यको सुनिश्चितता, महिला र बालबालिकामा लगानीको ऐक्यबद्धता ” भन्ने राष्ट्रिय नाराका साथ लैंगिक हिंसा विरुद्धकाे १६ दिने अभियान मनाइँदैछ । अभियानकाे क्रममा सरकारी कार्यालय, सुरक्षा निकाय, सामुदायिक सेवा केन्द्र, महिला सम्बद्ध संघ संस्थाहरुले अभियानमा विभिन्न कार्यक्रम गरी मनाउँदै आएका छन् ।
हरेक वर्ष लैंगिक हिंसा विरुद्धकाे १६ दिने अभियान मनाइने गरेकाे भए पनि तथ्याङ्कले लैंगिक तथा घरेलु हिंसाकाे घटना बढेकाे देखाउँछ । यस्तै लैंगिक तथा घरेलु हिंसाकाे घटना बढेकाे तथ्याङ्क बागमती प्रदेश प्रहरी कार्यालय हेटौंडाले अभियानकाे अवसरमा गरेकाे अन्तरक्रियमा समेत देखाइएकाे थियाे । तथ्याङ्क अनुसार प्रदेशका १० जिल्लामा आर्थिक वर्ष २०७७/०७८ को तुलनामा गत आर्थिक वर्ष २०७९/०८० मा लैङ्गिक तथा घरेलु हिंसाका घटना १४ प्रतिशतले बढेको छ ।
कार्यालयका अनुसार आर्थिक वर्ष २०७७/०७८ मा बागमती प्रदेशका १० जिल्लामा २ हजार २१९ वटा लैङ्गिक तथा घरेलु हिंसाका घटना भएको थियो भने आर्थिक वर्ष २०७८/०७९ मा २ हजार ५२८ र गत आर्थिक वर्ष २०७९/०८० मा २ हजार ५२० वटा घटना भएको छ । १० जिल्लामा चालु आर्थिक वर्षमा ७८६ वटा लैङ्गिक तथा घरेलु हिंसाका घटना भएको बागमती प्रदेश प्रहरी कार्यालय हेटौंडाका प्रहरी नायव महानिरीक्षक किरण राणाले जानकारी दिइन् ।
गत आवमा चितवनमा सबैभन्दा बढी लैङ्गिक तथा घरेलु हिंसाका घटना भएको तथ्याङ्क छ । चितवनमा गत आवमा ७३९ हिंसाका घटना भएकोमा चाुल आवकाे हालसम्म समेत चितवनमा २ सय ४८ दर्ता भएकाे राणाले बताइन् । यसैगरी , गत आवमा मकवानपुरमा ६ सय ३ तथा चालु आवकाे हालसम्म १ सय ५७ जना, सिन्धुलीमा गत आवमा २ सय ६ तथा चाुल आवकाे हालसम्म ५३, धादिङमा गत आवमा १ सय ७१, चालु आवमा ६०, काभ्रेमा गत आवमा २ सय ९८, चालु आवमा १ सय २२, रामेछापमा गत आवमा ८१, चालु आवमा १७, सिन्धुपाल्चोकमा गत आवमा १ सय ७७, चालु आवमा ५१, दोलखामा गत आवमा ९८, चालु आवकाे हालसम्म २६, नुवाकोटमा गत आवमा १४७ चालु आवमा ४९ र रसुवामा गत आवमा शुन्य चालु आवकाे हालसम्म ३ वटा हिंसाकाे घटना दर्ता भएकाे बागमती प्रदेश प्रहरी कार्यालयकाे तथ्याङ्कले देखाउँछ ।
जिल्लागत रुपमा तथ्याङ्क अनुसार उपत्यकाका ३ जिल्ला बाहेक चालु आवकाे हालसम्म चितवनमा ८१ वटा, काभ्रेमा ६२ वटा, मकवानपुरमा ५५, धादिङमा ३७ वटा, सिन्धुलीमा ३४ वटा नुवाकोटमा ३१ वटा, दोलखामा २० वटा, सिन्धुपाल्चोकमा ३० वटा, रामेछापमा १२ वटा र रसुवामा २ वटा लैङ्गिक हिंसाका घटना भएका छन् । यस्तै चालु आर्थिक वर्षमा प्रदेशका १० जिल्लामा मध्ये चितवनमा १ सय ६७ वटा, काभ्रेमा ६० वटा, मकवानपुरमा १ सय २ वटा, धादिङमा २३ वटा, सिन्धुलीमा १९ वटा, नुवाकोटमा १८ वटा, दोलखामा ६ वटा, सिन्धुपाल्चोकमा २१ वटा, रामेछापमा ५ वटा र रसुवामा १ वटा घरेलु हिंसाका घटना भएका छन् ।
गत आर्थिक वर्ष चितवनमा ८ सय र रसुवामा २७ वटा लैङ्गिक हिंसाका घटना भएका थिए । घरेलु हिंसातर्फ भने मकवानपुरमा १ हजार १ सय ४६ वटा र सबैभन्दा कम रसुवामा ५ वटा घटना भएको तथ्याङ्कमा उल्लेख छ । तथ्याङ्क अनुसार गत आर्थिक वर्षमा प्रदेशका १० जिल्लामा ७ हजार ३ सय २१ वटा लैङ्गिक हिंसाका घटना भएको थियो भने ४ हजार ४६ वटा घरेलु हिंसा भएको थियो ।
गत तीन आर्थिक वर्षमा राजधानी उपत्यकासहित ७ वटै प्रदेशमा ५५ हजार २ सय १४ लैंगिक हिंसा भएकाेमा मधेस प्रदेशमा सबै भन्दा बढी १३ हजार ६ सय ७६ वटा लैंगिक हिंसा भएको तथ्याङ्कमा उल्लेख छ । उक्त अवधीमा सबै भन्दा कम कर्णाली प्रदेशमा ३ हजार ४४ वटा घटना भएकोमा बागमती प्रदेश बढी उपत्यका र लुम्विनी प्रदेश पछि ४ औ स्थानमा रहेको तथ्याङ्क प्रदेश प्रहरी कार्यालयले प्रस्तुत गरेकाे छ ।
लैङ्गिक तथा घरेलु हिंसा न्यूनीकरणका लागि प्रदेश प्रहरी कार्यालय हेटौंडा मार्फत् विभिन्न क्रियाकलाप भएको प्रहरी नायव महानिरीक्षक राणाले बताइन् । उनका अनुसार लैङ्गिक तथा घरेलु हिंसा न्यूनीकरणका लागि प्रदेशका १० जिल्लामा १० वटा जिल्लास्तरीय समिति गठन गरिएको छ भने महानगरस्तरीय एक वटा, नगरपालिकास्तरीय २५ वटा, गाउँपालिकास्तरीय ६१ वटा र वडास्तरीय ७७५ वटा सहित ८७२ वटा लैङ्गिक हिंसा नियन्त्रण सञ्जाल समिति गठन गरिएको उनले बताइन् ।
‘लैङ्गिक हिंसा विरुद्ध एकिकृत सेवा दिन जिल्ला अस्पतालमा एकद्वार संकट व्यवस्थापन केन्द्र स्थापना गरिएको छ’ उनले भनिन् जसले लैगिंक हिंसाका पिडितलाई आश्रय दिने, घाइते भए उपचार गर्ने, सामाजिक मनोविमर्श दिने, कानूनी सल्लाह उपलब्ध गराउने र पूर्नस्थापनाको लागि पहल गर्ने कार्य गरिरहेको छ ।’ उनका अनुसार हालसम्म १ हजार ६ सय १६ जनाले एकद्वार संकट व्यवस्थापन केन्द्र मार्फत सेवा लिएका छन् ।
प्रहरी कार्यालय तथा सामुदायिक सेवा केन्द्र र प्रहरी सेवा केन्द्रद्वार स्थानिय स्तरमा सचेतना अभिबृद्धी गर्ने कार्य गरिदै आएको छ भने लैंगिक हिंसा र घरेलु हिंसामा संलग्न पिडकलाई नियन्त्रण तथा पक्राउ गरी कानुनी दायरामा ल्याउने गरिएको बताइएकाे छ। हिंसा न्युनीकरणमा बागमती प्रदेश प्रहरी कार्यालयले समुदायसँग प्रहरीद्वारा सञ्चालित कार्यक्रमहरुमा सक्रिय सहभागिता, समन्वय र सहकार्य, पिडितलाई परामर्श र सहयोग, पिडतको उद्दार तथा पुनस्थापनामा सहयोग प्रदान गर्न सहयाेगकाे अपेक्षा समेत गरेका राणाले बताइन् ।
चितवन । दुई दशकअघि गैँडाकोट नगरपालिका–९, थुम्सीलाई पाते ढिँडोले चिनायो । ढिँडो खान थुम्सी जाने क्रम सुरु भयो । राजमार्गका यात्रुमात्र नभई गैँडाकोट, नारायणगढ, भरतपुर र आसपासका क्षेत्रबाट ढिँडो खान थुम्सी पुग्नेको लर्को लाग्न थाल्यो ।
पाते ढिँडो सुरु गरेका बृखलाल गुरुङ भन्छन्, ‘२०५६ सालको मंसिर १७ गते पाते ढिँडो सुरु भएको थियो । २४ वर्ष पूरा हुनै लाग्दा भरतपुर महानगरपालिका–१० मा पहिलो शाखा खोलेका छौँ । मंसिर १७ गते आइतबारदेखि भरतपुरबाट पाते ढिँडोको विशिष्ट सेवा उपलब्ध हुनेछ ।’ अढाई दशकअघि थुम्सीमा खुलेको पाते ढिँडो होटल एण्ड रेष्टुरेण्ट भरतपुर शाखासम्म आइपुग्दा पाते ढिँडो एण्ड बिच रिसोर्ट प्रा.लि. भएको छ ।
‘थुम्सीमा नारायणी किनारमा होटल रहेकोले पाते ढिँडो नामसँगै बिच रिसोर्ट थपेका हौँ’ भरतपुर शाखाबाट सेवा सुरु गर्नेबारे जानकारी दिन बुधबार आयोजित पत्रकार भेटघाटमा बोल्दै अध्यक्ष गुरुङले भने । उनले भरतपुर शाखा पहिलो आधिकारिक शाखा भएकोसमेत प्रष्ट पारे । पाते ढिँडो भरतपुर शाखा संचालक पर्यटन व्यवसायी मीनबहादुर गुरुङले गुरुङ भाषामा पातेको अर्थ माइली छोरी हुने जानकारी गराउँदै भने, ‘हामीले रिसोर्टको लुक्सलाई फरकपन दिने कोशिस गरेका छौँ ।
रिसोर्टमा प्रवेश गर्नेबित्तिकै काउण्टर अगाडि भुइँमा घरेलु रक्सी बनाइरहेकोजस्तो सांकेतिक दृश्य देख्न पाइन्छ । घरेलु रक्सीलाई ब्रान्डिङ गरी दर्ता गरेर विदेशी रक्सीको खपत कम गराउनु पर्छ भन्ने सन्देश पनि हो ।’ बजारमा पाते ढिँडोको नाममा धेरै होटल खुल्न थालेको विषयमा पनि ध्यानाकर्षण भएको बताउँदै गुरुङले भने, ‘हाल पाते ढिंडो होटल एण्ड रेष्टुरेण्टको शाखा भन्दै हामीसँग मिल्ने गरी उस्तै नाम राखेर विभिन्न स्थानमा होटल खोली आमग्राहक महानुभावहरूमा भ्रम सिर्जना गर्ने कार्य भइरहेको छ । त्यसप्रति हाम्रो ध्यानाकर्षण भएको छ। र, हामीले पहिलोपटक शाखा खोलेको जानकारी गराउँछौँ ।’
नाम अनुसार पाते ढिँडोमा मकै र फापरको ढिँडो त पाइन्छ नै, अन्य परिकार पनि पाइने बताइएको छ । कुखुरा, खसी, बंगुर, राँगाको मासुका सेकुवालगायत विविध परिकार पाइने रिसोर्टले प्रेस विज्ञप्तिमार्फत् जानकारी दिएको छ । करिब दुई करोड रुपैयाँ लगानीमा सुरु भएको पाते ढिँडोको भरतपुर शाखाले हाल २२ जनालाई प्रत्यक्ष रोजगारी दिएको छ । यसले मंसिर १७ गते सफ्ट ओपनिङ र जनवरी १ अर्थात् पुस १६ गते ग्रान्ड ओपनिङ गर्दैछ ।
देशका प्रमुख शहरहरुमा थप शाखा खोल्ने लक्ष्य लिइएको अध्यक्ष बृखलाल गुरुङले बताए । उपभोक्ताहरूको माग र चाहनाअनुसार अन्य स्थानमा पनि क्रमशः शाखा खोल्दै लैजाने योजनासहित काम गरिरहेको उनको भनाइ छ । ढिँडोसँगै धराने बङ्गुरको सेकुवा, चिकेन सेकुवा, मटन सेकुवा, बफ सेकुवा र स्वादिष्ट फास्टफुड पस्कने उनले बताए ।
साथै विभिन्न संघसंस्था, व्यावसायिक प्रतिष्ठानका लागि आवश्यक सभा, सेमिनार, गोष्ठी गर्न, बर्थ–डे, एनिभर्सरीको उत्सव मनाउनका लागि १ सयजना सम्मको क्षमता भएको सुविधा सम्पन्न वातानुकुलीत (एसी) सेमिनार हल र १५ जनासम्मका लागि ६ वटा प्राइभेट वातानुकुलीत (एसी) डाइनिङ हलकोसमेत सुविधा थप गरिएको उनको भनाइ छ ।
मकवानपुर । नेपाली कांग्रेस बागमती प्रदेश सम्मेलन पुस ७ गते हुने भएको छ । नेपाली कांग्रेस बागमती प्रदेश कार्य सम्पादन समितिको विहीबार काठमाडौँमा बसेको बैठकले पुस ७ गते प्रदेश सम्मेलन गर्ने निर्णय गरेको हो ।
प्रदेश कार्यसमिति गठनपछि पहिलोपटक बागमती प्रदेशको सम्मेलन गर्ने भएको हो । कांग्रेस बागमती प्रदेशको सम्पर्क कार्यालय काठमाडौंमा विहिबार बसेको कार्यसम्पादन समितिको बैठकले पुस ७ गते प्रदेशको पहिलो सम्मेलन गर्ने निर्णय गरेकाे कांग्रेस बागमती प्रदेश प्रवक्ता तिलक रुवालीले जानकारी दिए ।
कार्यसम्पादन समितिको बैठकले सम्मेलन तयारीका लागि विभिन्न समितिहरु गठन गरेकाे छ । प्रदेश सभापति ईन्द्रबहादुुर बानियाँको संयोजकत्व तथा सबै पदाधिकारी सदस्य रहेको मूल आयोजक समिति गठन गरेको छ । त्यस्तै राजनीतिक प्रस्ताव तयारी उपसमिति संयोजक उपसभापति चन्द्र महर्जन, आर्थिक व्यवस्थापन उपसमिति संयोजक उपसभापति मोहन बस्नेत, सांगठनिक प्रस्ताव तयारी उपसमिति संयोजक महामन्त्री कन्चनचन्द्र वादे तथा सहसंयोजक सहमहामन्त्री ऋषिराम घिमिरे र आगामी वर्षको कार्यक्रम (क्यालेण्डर) तयारी उपसमिति संयोजक महामन्त्री राजु श्रेष्ठ तथा सहमहामन्त्री जीवन डंगोललाई तोकिएको छ ।
त्यसैगरी कार्यसम्पादन बैठकले आर्थिक प्रतिवेदन तयारी उपसमितिमा कोषाध्यक्ष दीर्घमान श्रेष्ठ, सम्मान उपसमिति सहमहामन्त्री ऋषिराम घिमिरे, खाना ब्यवस्थापन उपसमिति सहमहामन्त्री हरिशरण श्रेष्ठ, स्वागत उपसमिति सहमहामन्त्री जीवन डंगोल, प्रचारप्रसार उपसमिति प्रवक्ता तिलक रुवाली, शुभकामना प्रायोजन तथा रजिष्ट्रेशन उपसमिति निमा लामा, निमन्त्रणा उपसमिति दीपेन्द्र आचार्य, कार्यपछिको प्रतिवेदन तयारी उपसमितिमा उज्जवलराम घिमिरे, हल, मञ्च, स्वागत गेट र व्यवस्थापन उपसमितिमा कोकी अस्तानी मगर, स्वास्थ्य शिविर डा. अमित सिं कार्की, सांस्कृतिक कार्यक्रम धनकुमारी थापा सरु, स्वयमसेवक परिचालन प्रज्वल दवाडी र रक्तदान कार्यक्रम संयोजकमा कुमार दुलाललाई तोकेको छ ।
संयोजकहरुले आवश्यक्ता अनुसार प्रदेश कार्यालयमा जानकारी दिई सदस्यहरु थप्न सक्ने प्रवक्ता रुवालीले जानकारी दिए । उनका अनुसार काठमाडौंमा हुने पहिलो सम्मेलनमा नेपाली कांग्रेसका केन्द्रीय सभापति शेरबहादुर देउवाको प्रमुख आतिथ्यता तथा केन्द्रीय पदाधिकारीहरु र सातै प्रदेशका प्रदेश सभापतिहरुको उपस्थिति रहेन छ ।
मकवानपुर । बागमती प्रदेशको उद्योग, वाणिज्य, भूमि तथा प्रशासन मन्त्रालयले भवन प्राप्त गरेकाे छ । मन्त्रालय स्थापनाको सय दिन पूरा भएको अवसरमा मन्त्रालयले बुधबार सरकारी भवनबाट सेवा सुरु गरेकाे हाे । मुख्यमन्त्री तथा मन्त्रिपरिषद्को कार्यालय परिसरमा रहेको तत्कालीन जिल्ला विकास समितिको भवनमा उक्त मन्त्रालय सरेको हो।
उद्योग, वाणिज्य, भूमि तथा प्रशासन मन्त्री रामकृष्ण चित्रकारले राज्यलाई आर्थिक भार बढ्ने भन्दै भाडाकाे घरमा मन्त्रालय संचालन गरेनन् । विभागीय जिम्मेवारी पाएको दिनमा नै मन्त्री चित्रकारले भाडाको घरमा मन्त्रालय सञ्चालन नगर्ने घोषणा नै गरेका थिए।
तत्कालिन जिविसकाे जीर्ण अवस्थामा रहेको भवनलाई मर्मतसम्भार गरेर मन्त्रालय सारिएको हाे । मन्त्रालयको भवनमा प्रवेश गर्दै मन्त्री चित्रकारले भने, ‘भाडा लिएकाे घर नयाँ थियाे तर मासिक एक लाखभन्दा बढी भाडा राज्यकाे काेषबाट खर्च हुने हुँदा आर्थिक भार कम गर्न पुरानै भाडा नपर्ने सरकारी भवनमा मन्त्रालय सारिएको हो।’
प्रदेश संरचान निर्माणकाे जग्गा प्राप्ती अन्तिम चरणमा
बागमती प्रदेशका मुख्यमन्त्री शालिकराम जमरकट्टेलसहितकाे उपस्थितिमा बुधबार उद्योग, वाणिज्य, भूमि तथा प्रशासन मन्त्रालयकाे भवन प्रवेश कार्यक्रम भएकाे हाे । भवन प्रवेश कार्यक्रममा मुख्यमन्त्री जमरकट्टेलले मन्त्रालयले पुरानै भएपनि सरकारी कार्यालयमा भवन प्राप्त गरेर सरेकोमा खुसी व्यक्त गरे । हेटौंडा–१७ मा प्रदेश सरकारका कार्यालयहरु निर्माण गर्नका निम्ति जग्गा प्राप्तिको प्रक्रिया अन्तिम चरणमा पुगेको समेत उनले बताए ।
‘सार्वजनिक क्षेत्रमा खर्च कटौती गर्ने र उत्पादनको क्षेत्रमा बजेट लगानी गर्ने कुरामा प्रयत्नरत छाै’ उनले भने । त्यस्तै प्रदेश नीति तथा योजना आयोग र मुख्य न्यायधिवक्ताको कार्यालय केहिदिन भित्रै अर्काे सरकारी कार्यालयमा सर्न लागेको समेत उनले जानकारी दिए । कृषि क्षेत्रमा जोड दिने र यहि महिना भित्र लगभग ८० वटा पालिकालाई पकेट क्षेत्र घोषणा गर्न लागेको उनले जनाए । हेटौंडामा रहेको मकवानपुर बहुमूखी क्यामपसलाई प्रदेशको सार्वजनिक विद्यालय बनाउने निर्णय भएको उनले बताए ।
मन्त्री रामकृष्ण चित्रकारले गरे १०० दिनको प्रगति विवरण
बागमती प्रदेशका उद्योग, वाणिज्य, भूमि तथा प्रशासन मन्त्री रामकृष्ण चित्रकारले आफूले कार्यभार सम्हालेको एक सय दिनको अवधिमा भएका प्रगति विवरण सार्वजनिक गरेका छन् । गत श्रावण २१ गते मन्त्री नियुक्ति भई कार्यभारसम्हालेका चित्रकारले सय दिनको अवधिमा राम्रो कामको थालनी गरेकाे दाबी गरे ।
आफ्नाे सय दिनकाे अवधीमा मेला, महोत्सव, प्रदर्शनी सञ्चालन तथा व्यवस्थापन कार्यविधि २०८० मन्त्रीपरिषदबाट स्वीकृत, प्रदेश औद्योगिक व्यवसाय ऐन तथा प्रादेशिक व्यापार तथा व्यवसाय सम्बन्धी ऐनको संशोधन गर्न आवश्यक प्रक्रिया सूरु भएको, संविधान दिवसको अवसरमा हेटौंडामा प्रदेश हस्तकला प्रर्दशनी भएको उनले बताए ।
यसैगरी ‘प्रदेश स्तरीय संयुक्त बजार अनुगमन निर्देशिका, २०७५’ लाई विस्थापन गरी ‘प्रदेश स्तरीय संयुक्त बजार व्यवस्थापन अनुगमन निर्देशिका, २०८०’ मन्त्रीपरिषदबाट स्वीकृतिको अन्तिम चरणमा रहेको जानकारी दिए । विद्यमान नीतिगत एवम् कानूनी व्यवस्थाहरुका सम्बन्धमा सरोकारवालाहरुको राय ,परामर्श सुझाव ग्रहण गर्ने कार्यलाइ प्राथमिकता दिइएको, तल्लाे तह देखि उद्योगी व्यवसायीहरुका पीरमर्का तथा गुनासो सुनुवाई, उपभोक्ता हकहित संरक्षण सम्बन्धी कानूनको मस्यौदा तयार गर्ने प्रक्रिया अघि बढाइएको, बर्हिगमन सेवा सहज बनाउन मन्त्रालयबाट निर्मित उद्योग व्यवसाय तथा व्यापार व्यवसाय सम्बन्धी अनलाइन सफ्टवेयरहरुलाई समय सापेक्ष अपग्रेड गरी सेवाग्राहीलाई घरबाटै सेवा दिने सम्बन्धी छलफल भैरहेको उनले बताए ।
त्यस्तै बजार अनुगमनको कार्यलाई नियमित र प्रभावकारी बनाइएको मन्त्री चित्रकारले बताए । उनका अनुसार चाडपर्वको समयमा आकस्मिक तथा अन्य समयमा नियमित रुपमा गरी १ हजार ५ सय १३ वटा व्यवसायिक फर्महरुको अनुगमन गरिएकाे छ । व्यावसायिक फर्मकाे अनजुगमनबाट करिब ६ लाख रुपैँया जरिवाना गराई ४ लाख रुपैँया बराबरका म्याद नाघेका सामग्रीहरु बरामद गरी नष्ट गर्ने कार्य भएको उनले सार्वजनिक गरेको प्रगति विवरणमा उल्लेख छ ।
यसैगरी चालु आ.व २०८०/८१ मा १३ वटा जिल्लाका घरेलु तथा साना उद्योग कार्यालयहरुबाट करिब २ हजार ३ सय ४० औद्योगिक तथा व्यवसायिक फर्महरु दर्ता भएको, उद्योग स्थापनाका लागि कोरिया, चीन, तथा जापानका व्यवसायीहरुसँग भेटघाट र लगानीतर्फ प्रेरित, हेटौंडाका उद्योगहरुको स्थलगत भ्रमण लगायतका कामहरु भएको उनले जनाए ।
चितवन । लामो समयदेखि अलपत्र रहेकाे गौतमबुद्ध अन्तर्राष्ट्रिय क्रिकेट रंगशालालाई नेपाल सरकारले राष्ट्रिय गौरवको आयोजनामा राखेर अघि बढाउने निर्णय गरे संगै निर्माणले गति लिने बताइएकाे बेला रंगशालाकाे सरसफाइ गरिएकाे छ ।
बागमती प्रदेश सरकार र भरतपुर महानगरपालिकाले सहकार्य गरी रंगशाला बनाउने निर्णय समेत गरेका छन् । सरकारका तीन वटै निकायले रंगशाला निर्माणमा चासो देखाएपछि अलपत्र परेको रंगशालामा सरसफाइ अभियान सुरु गरिएको हो ।
निर्माणाधीन गौतमबुद्ध अन्तर्राष्ट्रिय क्रिकेट रंगशालामा भरतपुर महानगरपालिकाले सरसफाइ अभियान सुरु गरेको हो । चितवनस्थित कृषि तथा वन विज्ञान विश्वविद्यालय रामपुरको जग्गामा निर्माणाधीन गौतमबुद्ध अन्तर्राष्ट्रिय क्रिकेट रंगशाला लामो समयदेखि अलपत्र हुँदा काँसघारीमा परिणत भएकाे छ ।
सरसफाइमा स्थानीय, विद्यार्थी, सामाजिक अभियन्ता, नेपाल प्रहरी, सशस्त्र प्रहरी, नेपाली सेना र नगर प्रहरी लगायतको उपस्थिति रहेको थियो । सरसफाइ अभियनमा भरतपुर महानगरपालिकाकी नगर प्रमुख रेनु दाहालले रंगशालालाई सरकारले राष्ट्रिय गौरवको आयोजनामा राखेकाले अब रंगशाला बन्नेमा ढुक्क हुन सबैलाई आग्रह गरिन् ।
भरतपुर महानगरपालिकाका उपमेयर चित्रसेन अधिकारीले सरकारले राष्ट्रिय गौरवमा राखेपछि अब स्थानीय सरकार र स्थानीयहरुले पनि यसलाई आफ्नो सम्झेर सहयोग गर्नुपर्ने बताए । बागमती प्रदेश खेलकुद परिषद्का सदस्य सचिव सूर्यलाल भण्डारीले निर्माण सँगसँगै सञ्चालनमा ल्याउने गरी काम गरिनु पर्ने बताए । उनले निर्माण पनि भइरहने विभिन्न खेलकुद प्रतियोगिता पनि भइरहने गरी काम अघि बढाउनुपर्ने बताए ।
३ अर्ब लागत अनुमानसहित जनस्तरबाटै सहयोग उठाएर निर्माण सम्पन्न गर्ने लक्ष्य लिएकाे धुर्मुस सुन्तली फाउण्डेशनले २०७५ सालमा क्रिकेट रंगशाला निर्माणको थालनी गरेको थियो । ५० करोडभन्दा बढी रकम खर्च भइसकेको, १८ करोड ऋण रहेको र थप सहयोग जुट्न नसकेको भन्दै धुर्मुस सुन्तली फाउण्डेशनले भरतपुर महानगरपालिकालाई रंगशालाको जिम्मेवारी सुम्पेर २०७८ पुसमा कामबाट हात झिक्यो । त्यसयता रंगशाला निर्माणको काम अघि बढ्न सकेको छैन ।