मकवानपुर । अखिल नेपाल फुटबल संघ (एन्फा) अध्यक्ष पंकज विक्रम नेम्वाङविरुद्धको अविश्वासको प्रस्ताव बहुमतले अस्वीकृत भएको छ । मकवानपुरको हेटौंडामा भएकाे एन्फाकाे विशेष साधारणसभामा विहीबार नेम्वाङविरुद्ध अविश्वासको प्रस्ताव दर्ता भई मतदान भएको थियो ।
मतदानमा ५२ जनाले अविश्वासको प्रस्तावको विपक्षमा मतदान गरेका छन् । एन्फाका कूल ८७ मतदातामध्ये ५३ जनाले मतदानमा सहभागिता जनाएका थिए । जसमध्ये ५२ जनाले अध्यक्षबाट नेम्वाङलाई हटाउन नहुने अर्थात अविश्वासको प्रस्तावको विपक्षमा भोट हाले भने १ भोट बदर भएको थियो । अध्यक्ष हटाउने पक्ष अर्थात अविश्वासको प्रस्तावको पक्षमा भने एक भोट पनि परेन । साधारणसभामा २ सय १० जना प्रतिनिधिको उपस्थिति रहेकाे भएपनि ८७ जना सदस्यसँग मात्र मताधिकार रहेकाे थियाे । नेम्वाङ एन्फाको इतिहासमा अविश्वासको प्रस्ताव सामना गर्ने पहिलो अध्यक्ष हुन् ।
अध्यक्ष नेम्वाङविरुद्ध अविश्वासको प्रस्ताव दर्ता गराउने एन्फाका पूर्वअध्यक्ष कर्माछिरिङ शेर्पा पक्षमा रहेका भनिएका ३४ मतदाताले भने मतदान प्रक्रिया नै बहिष्कार गरेका छन् । उद्घाटन सत्र नै नराखी विशेष साधारणसभाकाे कार्यक्रम सुरु गरिएकाे थियाे । साधारण सभामा विवाद हुने सक्ने आंकलन गरी सुरक्षा व्यवस्थामा कडाइ गरिएकाे थियाे ।
नेम्वाङ वर्तमान नेतृत्वले काम गर्न नसकेको भन्दै उनीसहित महासचिव किरण राईलाई एन्फाका बहुमत सदस्यले गत भदौमा बर्खास्तीको माग गर्दै निवेदन पेश गरेका थिए । उनीहरूले वर्तमान नेतृत्वप्रति १९ बुँदे आरोपसहित निष्कासनको माग गरेका थिए । तर अध्यक्ष नेम्वाङले आफू मात्र बर्खास्तीको प्रस्तावको सामना गर्ने निर्णय सहित विशेष साधारण सभामा उक्त एजेन्डा लगेका हुन् ।
विधान अनुसार महासचिवको नियुक्ति र बर्खास्तीको अधिकार कार्यसमितिलाई दिइएको भन्दै अध्यक्ष नेम्वाङले आफ्नो मात्र एजेन्डा समावेश गरेका हुन् । एन्फाको असोज १७ गते बसेको बैठकले अविश्वासको प्रस्ताव सामना गर्न मकवानपुरमा विशेष साधारणसभा गर्ने निर्णय गरेको थियो ।
मकवानपुर । अखिल नेपाल फुटबल संघ (एन्फा)को विशेष साधारणसभा सुरु भएको छ । विशेष साधारणसभा हेटौंडा-४ मा सुरु भएको हो । विशेष साधारणसभामा एन्फा अध्यक्ष पंकज विक्रम नेम्वाङमाथि अविश्वासको प्रस्ताव पेश गर्ने एक मात्र एजेन्डा रहेको एन्फा केन्द्रीय समिति सदस्य टीकाराम लामाले जानकारी दिए ।
कुल १ सय १० प्रतिनिधि रहेकोमा साधारण सभामा ८९ जनाले मताधिकार प्राप्त गरेका छन् । आजको विशेष साधारणसभामा अध्यक्ष नेम्वाङमाथिको अविश्वास प्रस्तावमाथि मतदान हुने बताइएको छ । कडा सुरक्षा घेरा वीच विशेष साधारण सभा सुरु गरिएकाे छ । विशेष साधारण सभाको मुख्य एजेन्डा एन्फा अध्यक्ष पंकजविक्रम नेम्वाङको बर्खास्तीसँग सम्बन्धी निर्णयको छिनोफानो गर्ने बताइएको छ ।
नेम्वाङ वर्तमान नेतृत्वले काम गर्न नसकेको भन्दै उनीसहित महासचिव किरण राईलाई एन्फाका बहुमत सदस्यले गत भदौमा बर्खास्तीको माग गर्दै निवेदन पेश गरेका थिए । उनीहरूले वर्तमान नेतृत्वप्रति १९ बुँदे आरोपसहित निष्कासनको माग गरेका हुन् । तर अध्यक्ष नेम्वाङले आफू मात्र बर्खास्तीको प्रस्तावको सामना गर्ने निर्णय सहित विशेष साधारण सभामा उक्त एजेन्डा लगेका हुन् । विधान अनुसार महासचिवको नियुक्ति र बर्खास्तीको अधिकार कार्यसमितिलाई दिइएको भन्दै अध्यक्ष नेम्वाङले आफ्नो मात्र एजेन्डा समावेश गरेका हुन् ।
नेम्वाङको बर्खास्तीको विषयमा आजै विशेष साधारण सभाले मतदान गर्नेछ । एन्फा विधान अनुसार अध्यक्षको बर्खास्तीका लागि दुई तिहाइ मतकाे आवश्यक पर्नेछ ।
मकवानपुर । मेची–महाकाली साइकल यात्रामा सहभागी १३ जनाले १० दिनमा मेचीमहाकालीकाे दुरी पार गरेकाे छ । १२ दिनमा मेचीमहाकालीकाे १०२८ किमि दुरीकाे यात्रा पुरा गर्ने लक्ष्यका साथ साइकलयात्रा सुरु गरेका थिए ।
हेटौंडाका साइकलप्रेमी ११ जना र बुटवलका २ जना गरी १३ जनाले समूहले कात्तिक ११ गते शनिबार झापाको मेचीनगरबाट सुरु गरेको साइकलयात्रा मंगलबार समापन गरी बुधबार हेटौंडा फर्केको हो ।
कोजाग्रत पूर्णिमाको दिन बिहान ८ बजे मेचीनगरस्थित नेपाल–भारत सीमानाकाको मेची पुलबाट साइकलयात्रा सुरु गरेको टोलीले १० दिनमा यात्रा सम्पन्न गरी ११ औ दिनको बिहान कञ्चनपुरको गड्डाचौकी भन्सार नाकामा पत्रकार सम्मेलन गरी यात्रा समापन भएको जनाएका थिए ।
स्वास्थ्य, पर्यावरण, पर्यटन र साइकल संस्कृति विकासको निम्ति साइकल भन्ने सकारात्मक सन्देस प्रवाह गर्दै हिमालयन राईडर्स सोसाइटी हेटौंडाको समन्वयमा सोसाइटीका संस्थापक अध्यक्ष चेतनाथ आचार्यको नेतृत्वमा यात्रा सुरु गरिएको थियो ।
सोसाइटीका उपाध्यक्ष राजु थापामगरका अनुसार यात्राअवधिमा बिभिन्न जिल्लाका साइकल साथीहरुले सहयोग गरेका थिए । आगामी दिनमा निर्माण गरिने सार्वजनिक यातायातका पूर्वाधारमा साइकल लेन, साइकल पार्किङ, अपाड्डमैत्री लेन समाबेश गर्न पनि सोसाइटीले आग्रह गरेको सोसाइटीका अध्यक्ष रामकुमार श्रेष्ठले बताए ।
साइकलयात्रामा १ जना महिलाको पनि सहभागिता रहेको थियो । हेटौंडा–४ की सीता श्रेष्ठले मेचीमहाकाली साइकलयात्रा सफलतापूर्वक सम्पन्न गर्ने मकवानपुरको पहिलो महिलाको रुपमा परिचय बनाएकी छिन् । ३५ वर्षदेखि ६५ वर्षसम्मका १३ जनाले साइकलयात्रा गरेका थिए ।
२०५४ माघ महिनामा सामान्य साइकलमा हेटौंडाका ११ जनाले मेचीमहाकाली यात्रा गरेका थिए । भिजिट नेपाल ९८ को अवसरमा हेटौंडाको सहीद स्मारकलगायतका पर्यटकीयस्थलको जानकारी दिनका लागि ब्यक्तिगत खर्चमा उनीहरुले साइकलयात्रा गरेका थिए । ११ जनामध्ये २ जनाले पूर्वबाट हेटौंडासम्म साइकलयात्रा गरी बीचैमा यात्रा स्थगित गरेका थिए भने ९ जनाले १६ दिन लगाएर मेची–काली साइकलयात्रा पूरा गरेका थिए ।
टोलीमा लक्ष्मीचरण श्रेष्ठ, भानुभक्त आचार्य, चेतनाथ आचार्य, बुद्धिबहादुर आलेमगर, राजु थापामगर, लेखनाथ ढकाल, सरोज लामिछाने, ओकिलराज बानियाँ, दुर्गाप्रसाद लामिछाने, सुशीलकुमार चौधरी (बुटवल), सुरज खत्री (बुटवल), विकास बानियाँ, सीता श्रेष्ठ रहेका थिए ।
साइकलयात्रामा सहभागी सदस्यमध्ये लक्ष्मीचरण श्रेष्ठ र भानुभक्त आचार्यले २५ वर्षको अन्तरालमा दोस्रो पटक मेची–महाकाली साइकल यात्रा गगरेका छन् ।
२५ वर्षअघिको पूर्वपश्चिम राजमार्गको अवस्था र बर्तमान अवस्थामा निकै फरक आएको र अहिले गियर सहितको साइकल उपलब्ध भएका कारण १० दिनभित्र यात्रा सम्पन्न गर्न सकिएको उनीहरुले बताएका छन् । ब्यक्तिगत खर्चमा उनीहरुले मेची–काली साइकलयात्रा गरेका हुन् ।
मकवानपुर । बागमती प्रदेशेका राजधानी हेटौडामा यू २१ हेटौंडा च्यालेन्ज कप फुटबल प्रतियोगिता हुने भएको छ ।एफसी मुण्डियाल क्लब हेटौंडाको आयोजनामा प्रतियोगिता हुने हेटौडामा पत्रकार भेटघाट गरी जानकारी दिइएकाे हाे ।
मंसिर ५ गते देखी १३ गते सम्म हुने प्रतियोगितामा जिल्ला बाहिरका ३ टिम र जिल्लाका ११ वटा टिम सहित १४ वटा टिमले प्रतिस्पर्धा गरिने जनाइएको छ । स्व. सुदर्शन घिमिरे स्मृतिमा हुन लागेकाे प्रतियाेगिताकाे नारा ‘राष्ट्रिय खेलाडी बन्ने होड, उत्पादनमा जोड’ भन्ने रहेकाे छ । सर्वाधिक राशी सहित मकवानपुर जिल्लाका युवा लक्षित खेलाडीको प्रोत्साहन गर्न प्रतियोगिताको आयोजना गरिन लागिएको कार्यक्रम संयोजक सुदीप सिं ठकुरीले बताए ।
विजेताले १ लाख ११ हजार १ सय ११ रुपैयाँ प्राप्त गर्ने छन् भने उपविजेताले ५५ हजार सहित शिल्ड र मेडल प्राप्त गर्ने उनले जानकारी दिए । विधागत तर्फ उत्कृष्ट हुनेले ५ हजार प्राप्त गर्नेछन् भने म्यान अफ द म्याचमा प्रत्येकले २ हजार ५ सय प्राप्त गर्ने एफ.सी मुण्डियालका अध्यक्ष सुविन घिमिरेले बताए ।
प्रतियोगितामा हिली फिल्डर्स गोरखा एफसी, नव जागृति यूवा क्लब सिमरा, वीरगञ्ज स्पोटर्स पर्सा, न्यू डाँफे युथ क्लब हेटौंडा, एफसी रिगल हेटौंडा रिसोर्ट, पदमपोखरी फुटबल एकेडेमी, निल गगन युवा क्लब हेटौंडा, सहिद स्मृति क्लब बागमती गाउँपालिका, हेटौंडा फुटबल एकेडेमी, थाहा नगरपालिका, रियल स्टार क्लब हेटौंडा, कमाने फुटबल एकेडेमी हेटौंडा, नागस्वती यूथ क्लब हेटौंडा र आयोजक एफसी मुण्डियाल हेटौंडाले सहभागिता जनाउने कार्यक्रम संयोजक ठकुरीले बताए ।
हेटौंडा ५ स्थित पिप्ले क्याम्पा रंगशालामा हुने एफसी मुण्डियाल अध्यक्ष घिमिरेले जानकारी दिए । प्रतियोगिताको लागि प्रथम पुरस्कार घिमिरे परिवारबाटै सहयोग प्राप्त भएको प्रतियोगिता ‘विशुद्ध नयाँ खेलाडीको खेल प्रतिभा उजागर गर्ने उद्देश्यले आयोजना गर्न लागिएको उनले बताए । मुख्य प्रायोजक हेटौंडा सिटी कलेज, सह प्रायोजक दाजुभाई स्वीट्स सहित अन्य विभिन्न व्यक्ति तथा संघसंस्थाकाे प्रतियोगितामा सहयोग रहने छ । २१ वर्ष मुनीको यस प्रतियोगितालाई आगामी वर्षहरु पनि निरन्तरता दिँदै जाने योजना रहेको अध्यक्ष घिमिरेले बताए ।
प्रतियाेगितामा खर्च भएर बचत भएकाे रकम जाजरकोट तथा रुकुम पश्चिमका भूकम्प पीडितका लागि सहयोग गरिने आयोजकले जनाएकाे छ ।
मकवानपुर । नेपालले सन् २०१८ मा क्रिकेटमा एक दिवसीय मान्यता प्राप्त गर्दा अन्तर्राष्ट्रिय मापदण्डको रंगशालाकाे लागि चौतर्फी आवाज उठ्न थालेकाे थियाे । नमुना नेपालकाे परिकल्पना गरिरहेका सिताराम कट्टेलकाे ‘नमुना नेपाल कि क्रिकेट रंगशाला पहिला’ भन्ने नमूना मत सर्वेक्षण प्रश्नमा शतप्रतिशत उत्तर क्रिकेट रंगशालाको मागमा आएपछि नमुना नेपालकाे परियाेजनालाई थाती राखेका उनीहरूले रंगशालाकाे परियोजना अगाडि बढाउने निर्णय गरेका थिए ।
वर्षाै अघि सामाजिक संजालका प्रतिक्रियामै करोडौं रकम घोषणा भए पछि रंगशाला निर्माण जुटेकाे धुर्मस सुन्तली फाउण्डेसन निर्माण कार्यकाे पहिलाे चरणकाे कार्य सकिदा कराेडौं रुपैयाँ ऋण लागेसँगै निर्माण राेकिएकाे रंगशालाकाे निर्माण पुनः सुरु हुने भएकाे हाे । । चितवनको भरतपुरमा निर्माणाधीन गौतमबुद्ध अन्तर्राष्ट्रिय क्रिकेट रंगशाला निर्माणको लागि बागमती प्रदेश सरकारले सहयाेग गर्ने भएकाे छ । बागमती प्रदेश सरकारले सहयाेग गर्ने भएपछि रंगशाला निर्माणकाे कार्य अघि बढ्ने भएको हाे ।
मंगलबार बागमती प्रदेश सरकार र भरपुर महानगरपालिका चितवनले रंगशाला निर्माण गर्ने सम्झौता गरेसँगै निर्माण हुने भएको हो । मुख्यमन्त्री शालिकराम जम्कट्टेल र भरतपुर महानगरपालिकाकी प्रमुख रेणु दाहालले रंगशाला निर्माणका समझदारी पत्रमा हस्ताक्षर गरेका छन् । रंगशाला निर्माण गर्दाको ऋणको जिम्मा भने संघीय सरकारलाई नै छोड्ने गरी प्रदेश सरकार र भरतपुर महानगरपालिकाले तत्काल निर्माणका लागि लगानी गर्ने भएको हो ।
बागमती प्रदेश खेलकुद विकास परिषद्का सदस्य सचिव सूर्यलाल भण्डारीका अनुसार अहिले पहिलो चरणमा १० हजार दर्शक क्षमताको रंगशाला निर्माणको कामलाई अघि बढाउने सहमति भएको छ । यसका लागि ७५ करोड रुपैयाँ खर्च लाग्ने प्राविधिक मूल्याङ्कन भएको उनले जानकारी दिए । बागमती प्रदेश सरकारले ७० प्रतिशत र भरतपुर महानगरपालिकाले ३० प्रतिशत रकम लगानी गर्ने सहमति भएको छ ।
रंगशाला प्रस्तावित क्षमता ३० हजार दर्शकको रहेकाे भएपनि तत्काल पहिलो चरणमा १० हजार दर्शक क्षमताकाे बनाउन सुरु गरिने र बाँकी पछिल्लो चरणमा निर्माण गर्दै जाने सदस्य सचिव भण्डारीले बताए । धुर्मुस सुन्तली फाउण्डेसनले निर्माण सुरु गरेको रंगशाला निर्माण कार्य ऋण लागेकाे भएको भन्दै रोकिएको थियो । सदस्य सचिव भण्डारीका अनुसार ३ अर्ब रुपैयाँमा बन्ने रंगशालामा अहिलेसम्म ५७ करोड रुपैयाँ बराबरकाे काम भएको छ ।
निर्माणकाे सुरुवाती समयमा व्यक्तिबाट रकम संकलन हुँदै आएकाेमा स्थानीय तहले समेत रंगशाला निर्माणकाे लागि सहयाेग गर्दै आएका थिए । हेटौडा उपमहानगरपालिकाले समेत ३० लाख रुपैंया निर्णय विनै सहयाेग गरेर पछि अनुमाेदन गरेकाे थियाे । तत्कालिन मेयर हरि बहादुर महतले उपमहानगरपालिकाकाे ३० लाख रुपैया रंगशालाकाे निर्माणकाे लागि सहयाेग गरेका थिए ।

यसरी सुरु गरिएकाे थियाे रंगशाला निर्माण
फाउन्डेसनले भरतपुर महानगरपालिकासँगको सहकार्यमा शिलान्यासको दुई वर्षभित्र निर्माण सक्ने गरी २०७५ माघ १६ गते बुधबार अन्तर्राष्ट्रिय क्रिकेट रङ्गशाला निर्माणको घोषणा गरेको थियो। माघ १६ गते सहिद दिवसको दिन रङ्गशाला निर्माणको लागि फाउन्डेसन र भरतपुर महानगरबीच जग्गा प्राप्ति सम्बन्धी सम्झौता भएको थियो। सम्झौतामा फाउन्डेसनका अध्यक्ष सिताराम कट्टेल (धुर्मुस) र भरतपुर महानगरपालिकाकी मेयर रेणु दाहालले हस्ताक्षर गरेका थिए ।
राज्यको सहभागितामा चितवनको रामपुरमा गौतम बुद्ध अन्तर्राष्ट्रिय क्रिकेट रंगशाला परियोजना घोषणा भएको थियो । तत्कालीन प्रधानमन्त्री केपी शर्मा ओली, हालका प्रधानमन्त्री पुष्पकमल दाहाल, कांग्रेस महामन्त्री शशांक कोइराला, त्रिभुवन विश्वविद्यालयका उपकुलपति, कृषि वन विश्वविद्यालयका उपकुलपतिलगायत मन्त्री, सांसद, खेलाडीको उपस्थितिमा घोषित परियोजनाकाे कार्य अगाडि बढाइएकाे थियाे ।
कृषि तथा वन विश्वविद्यालयले भोगचलन गरिरहेको त्रिभुवन विश्वविद्यालयको स्वामित्वमा रहेको भरतपुर– १६ को उक्त जग्गा क्रिकेट रङ्गशाला बनाउने भएपछि त्रिभुवन विश्वविद्यालयले भरपुर महानगरपालिका मार्फत फाउन्डेसनलाई उपलब्ध गराएको थियो। २० विगाह ८ कठ्ठा क्षेत्रफलमा बन्ने गरी डिजाइन तयार गरिएकाे रङ्गशाला रङ्गशाला कमलको फुल आकारको बन्ने भनिएकाे थियाे । बहुउपयोगी हुने रङ्गशालाभित्र क्रिकेट प्रशिक्षण मैदान, फुटबल, भलिबल बास्केटबल, ब्याडमिन्टन, स्वीमिङपुल र फिटनेस सेन्टरसम्म रहने बताइएकाे थियाे । रङ्गशालामा बाहिरी भागमा नेपाल चिनाउने सम्पदाहरु समावेश गरिनुका साथै साथै एक सिंगे गैँडा, हात्ती, पाटेबाघ लगायत जनावरहरूको धातुको मुर्ति रहने तथा नेपालका पर्यटकीय स्थलहरूलाई चिनाउने सामग्रीहरु समेत रहने गरी निर्माण गरिने गरी निर्माण थालिएकाे थियाे ।
क्रिकेट खेलाडीहरू उत्पादन गर्न एकेडेमी समेत रहने रङ्गशालाकाे निर्माणको लागत ३ अर्ब अनुमान गरिएको थियाे । देश–विदेशका नेपालीहरूबाट प्राप्त हुने स्वैच्छिक सहयोगबाट आर्थिक स्रोत जुटाइने गरी निर्माण थालिएकाे थियाे । प्रारम्भिक चरणमा फाउन्डेसनको मौज्दात २ करोड ८६ लाख ३७ हजार ११ रुपैयाँ खर्च गर्ने निर्णयसँगै रंगशाला निर्माण अगाडि बढाइएकाे थियाे ।
‘धुर्मुस–सुन्तली फाउन्डेसन’ले आर्थिक अभाव भन्दै रंगशालाकाे निर्माण राेकिए पछि गत वर्ष सरकारले रंगशाला निर्माणको बाँकी काम पूरा गर्न गर्ने नीति लिएकाे थियाे । रंगशाला निर्माण सम्पन्न गर्न भरतपुर महानगरपालिकाले सहयोग गर्ने प्रतिबद्धता जनाए पछि संघीय सरकारले निर्माणको बाँकी काम पूरा गर्ने नीति लिएको थियाे ।
निर्माणकाे काम गर्दै जादाँ सहयाेग रकम पर्याप्त जुट्न नसकेकाेले फाउण्डेसनलाई ऋण लागेपछि निर्माण कार्य राेकिएकाे थियाे । देश भरका स्थानीय तहबाट समेत फाउण्डेसनलाई सहयाेग गरिएकाे थियाे । तर पर्याप्त सहयाेग जुट्न नसक्दा ऋण लागेपछि फाउण्डेसनले रंगशालाकाे निर्माण राेकेकाे थियाे ।