मकवानपुर । मकवानपुरको हेटौंडा उपमहानगरपालिक वडा नम्बर १२ मा पुरुष भलिबल प्रतियोगिता हुने भएको छ ।
१२ नम्बर वडा खेलकुद विकास समितिको आयोजनामा माघ १६ गतेदेखि १९ गतेसम्म भलिबल प्रतियोगिता हुन भएको हो । समितिले मंगलबार पत्रकार भेटघाट गरि प्रतियोगिता सम्बन्धी जानकारी गराएको हो । प्रतियोगिताका संयोजक मनोज लामाले हात्तीगौडास्थित बुद्ध माध्यमिक विद्यालयको भलिबल कोर्टमा खेल हुने जानकारी दिए ।
प्रतियोगिताको उपाधि विजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ । यसैगरी उपविजेता टिमले ३० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ । यस्तै, विधागत उत्कृष्ट खेलाडीहरुका लागि पनि ट्रफी र नगद पुरस्कारको व्यवस्था गरिएको आयोजकले जनाएको छ ।
प्रतियोगिता आयोजनाका लागि वडा कार्यालयले एक लाख २५ हजार रुपैयाँको बजेट विनियोजन गरेको छ ।यसैगरी प्रतियोगिताको प्रथम पुरस्कार हेटौंडा–१० स्थित नारायणी कलेजले प्रायोजन गर्ने बताइएको छ । प्रतियोगितामा १९ वटै वडाबाट १/१ टिमको सहभागिता जनाउन पाउने आयोजकले जनाएको छ । हेटौंडा उपमहानगरपालिकाका १९ वटै वडालाई समेट्ने गरी प्रतियोगिताको आयोजना गर्न लागिएको संयोजक लामाले बताए ।
प्रतियोगिताको लागि करिब ३ लाख रुपैयाँ खर्च हुने आयोजकको अनुमान गरेको छ । कार्यक्रममा नारायणी कलेजका प्राचार्य रघुनाथ खराल, १२ नम्बर वडा खेलकुद विकास समितिका अध्यक्ष दिनेश चौलागाईंको आतिथ्यता रहेको थियो ।
मकवानपुर । मकवानपुरकाे हेटौंडामा खेलकुद महाेत्सव हुने भएकाे छ । हेटौंडा उपमहानगरपालिका ४ नम्बर वडाले ९ माघदेखि १७ फागुनसम्म हेटौंडामा एक महिने खेलकुद महोत्सव गर्ने भएको हाे ।
४ नम्बर वडा कार्यालयकाे आयोजना तथा शैक्षिक गुणस्तर सुधार समिति हेटौंडा ४ को व्यवस्थापनमा दोस्रो खेलकुद महोत्सव हुन लागेको हो । आइतबार हेटौंडामा पत्रकार भेटघाट गरी आयोजक ४ नम्बर वडा कार्यालयले खेलकुद महोत्सव सम्बन्धी जानकारी दिएको हो ।विद्यालयहरुबाट खेलाडी उत्पादन गर्ने उद्देश्यले कार्यक्रम आयोजना गर्न लआगिएको ४ नम्बर वडाध्यक्ष नवीन सिग्देलले बताए ।
विद्यालयलाई ‘फोकस’ एक महिनासम्म सञ्चालन हुने महोत्सवमा वडास्तरीय, नगरस्तरीय र जिल्लास्तरीय गरी २१ वटा खेलकुदका क्रियाकलाप सञ्चालन हुने उनले जानकारी दिए । २१ विधा मध्ये २ वटामा जिल्लास्तरीय र ४ वटामा नगरस्तरीय क्रियाकलाप हुने उनले बताए ।
महाेत्सव अन्तरगत ९ माघमा नवोदय माविमा हाजिरी जवाफ प्रतियोगिता, १३ माघमा आधुनिक माविमा वक्तृत्वकला प्रतियोगिता, १४ माघमा सत्यम जेभियर्स माविमा वादविवाद प्रतियोगिता, १५ माघमा श्रमिक माविमा नेपाली हिज्जे प्रतियोगिता र स्लो स्कुटी प्रतियोगिता, २४ माघमा ब्रम्हदिक माविमा कविता प्रतियोगिता हुने आयोजकले जनाएको छ । त्यस्तै २५ माघमा भुटनदेवि माविमा निबन्ध लेखन प्रतियोगिता हुनेछ ।
यसैगरी २ फागुनमा विभिन्न दौड प्रतियोगिता, ३ फागुनमा आधुनिक माविमा नगरस्तरीय भलिबल प्रतियोगिता, सोही दिन श्रमिक माविमा नगरस्तरीय फुटबल प्रतियोगिता तथा नगरस्तरीय क्रीकेट प्रतियोगिता आयोजना गरिने आयोजकले जनाएकाे छ । यस्तै ५ फागुनमा सत्यम जेभियर्स स्कुलमा अफ वार प्रतियोगिता, सोही दिन नवोदय स्कुलमा नगर स्तरिय बास्केटबल प्रतियोगिता र १६ र १७ फागुनमा शैक्षिक गुणस्तर सुधार समितिको व्यवस्थापनमा जिल्लास्तरीय शिक्षक भलिबल प्रतियोगिता आयोजना हुनेछ ।
उनका अनुसार १५ माघमा शहीद दिवसको अवसरमा नेपाल राष्ट्रिय शिक्षक संगठनको व्यवस्थापन र वडा कार्यालयको आयोजनामा शिक्षकहरुको दौड प्रतियोगिता र महिला शिक्षकलाई लक्षित गरी स्लो स्कुटी रेस हुनेछ । विभिन्न प्रतियाेगिताका विजेतालाई १७ फागुनमा प्रमाणपत्र, शिल्ड र मेडल प्रदान गरि महाेत्सवकाे समापन गरिने आयोजकले जनाएकाे छ ।
मकवानपुर । राष्ट्रिय तेक्वान्दो संघ जिल्ला कार्य समिति मकवानपुर अन्तर्गतका डोजाङ तथा विद्यालयहरूमा प्रशिक्षणरत खेलाडीहरूको बेल्ट टेस्ट भएको छ । संघको वार्षिक कार्यक्रम अनुसार शनिबार ७ डोजाङका १०७ जना खेलाडीहरूको बेल्ट टेस्ट भएको हो ।
कार्यक्रममा मकवानपुर जिल्लाका विभिन्न ७ वटा डोजाङका ह्वाईट बेल्ट देखी रेड बेल्ट सम्मका खेलाडीहरूको सहभागिता रहेको राष्ट्रिय तेक्वान्दो संघ बागमती प्रदेश सचिव भोजराज पराजुलीले जानकारी दिए । बेल्ट टेस्टको नतिजा एक साताभित्र आउने पराजुलीले बताएका छन् ।
संघका केन्द्रीय सदस्य नारायण सिंह थिङको उपस्थितिमा भएको कार्यक्रममा जिल्ला अध्यक्ष मदन कुमार श्रेष्ठ, उपाध्यक्ष केशव बहादुर कार्की, सचिव रवीन्द्र राई, सहसचिव रावन कीष्म राई र कोषाध्यक्ष दीपेन्द्र नेपालीको सहभागिता रहेको थियो ।
सिनियर खेलाडीहरु सन्तोष बस्नेत, रिमेश अधिकारी, आदित्य पराजुली, श्रीया अधिकारी, सविना मोक्तान र अन्य खेलाडीहरु ले कार्यक्रम मा सहजीकरण गरेका थिए भने विभिन्न डोजाङको अविभावकको पनि सहभागिता रहेको थियो ।
मकवानपुर । मकवानपुरकाे हेटौंडा भएकाे दोस्रो संस्करणको बागमती प्रदेश लिग फुटबल प्रतियोगिताको उपाधी काठमाडौंले हात पारेकाे छ । शनिबार प्रदेश राजधानी हेटौंडामा भएकाे फाइनलमा दोलखाकाे टाइगर टिम तिखालाललाई ३–० गोल अन्तरले पाखा लगाउँदै काठमाडौंकाे पशुपति शिवजी चित्लाङ फुटबल क्लबले उपाधीमा कब्जा जमाएकाे हाे ।
उपाधी रक्षासँगै काठमाडौंले २ लाख रुपैयाँसहित शिल्ड, मेडल तथा प्रमाणपत्र प्राप्त गरेकाे छ भने उपविजेतामा चित्त बुझाएकाे दोलखाले १ लाख रुपैयाँसहित शिल्ड, मेडल तथा प्रमाणपत्र प्राप्त हात पार्याे । काठमाडौंकाे लागि पहिलो हाफको २५ औँ मिनेटमा सुजित बुढाथोकीले गोल गर्दै टिमलाई अग्रता दिलाए । यसैगरी दोस्रो हाफको ७४ औँ मिनेटमा सुजितले पुनः एक गोल गर्दै अग्रता दोब्बर बनाएका थिए । खेलकाे इन्जुरी समयमा काठमाडौंकै आयुष कुँवरले गोल गर्दै टिमकाे जित सुनिश्चित गरेका थिए ।
काठमाडौंका सुजित बुढाथाेकी फाइनलकाे म्यान अफ द म्याच, माेस्ट भ्यालुएवल प्लेयर तथा सर्वाधिक गोल कर्ता घोषित भइ विधागत पुरस्कार प्राप्त गरे । यसैगरी बेष्ट मिडफिल्ड काठमाडौंका विज्ञान खड्का, वेष्ट गोलकिपर काठमाडौका चन्द्र शेखर श्रेष्ठ, बेष्ट डिफेन्डर काठमाडौं जनक काेइराला घाेषित हुँदै नगर ५ हजार हात पारे । यसैगरी दोलखाका सुजन माफी बेष्ट फरवार्ड घोषित हुँदै नगद ५ हजार हात पारे । बेष्ट काेचकाे उपाधी काठमाडोंका रुपेश क्षेत्री घाेषित हुँदै ५ हजार प्राप्त गरे ।
काठमाडौंकाे पशुपति शिवाजी चित्लाङ फुटबल क्लबले लिगमा पहिलाे पटक सहभागिता जनाएकाे हाे । प्रतियोगित अन्तरगत बिहीबार भएकाे दोस्राे सेमिफाइनल खेलमा काठमाडौंले ललितपुर फुटबल क्लबलाई ३–१ गोलअन्तरले पराजित गर्दै फाइनल यात्रा तय गरेको थियाे । यस्तै बुधबारकाे पहिलाे सेमिफाइनल खेलमा दोलखाले सिन्धुली ब्लु अल्पाइन क्लबलाई हराउँदै फाइनलमा स्थान बनाएकाे थियाे ।
प्रदेश फुटबल संघ बागमतीकाे आयोजनामा भएकाे प्रतियाेगितामा ११ जिल्लाका जिल्ला लिग च्याम्पियन फुटबल टिमकाे सहभागिता रहेकाे थियाे । रसुवा र रामेछाप जिल्लाको क्लबले भने एन्फामा आबद्ध नभएका कारण प्रतियोगितामा सहभागी जनाएनन् । मकवानपुरको पदमपोखरी युथ क्लबसहित, काठमाडौंको चित्लाङ फुटबल क्लब, सिन्धुलीको ब्लु अल्पाइन क्लब, दोलखाको टाइगर टिम तिखालाल, धादिङको धुनिबेसी युवा समाज, नुवाकोटको बटार युथ क्लब, सिन्धुपाल्चोकको चौतारा स्पोर्टस् क्लब, चितवनको बिएफसी क्लब, ललितपुर र काभ्रेको माउण्ट एभरेष्ट फुटबल क्लबकाे प्रतियोगितामा सहभागिता रहेको थियाे ।
अखिल नेपाल फुटबल संघ (एन्फा) को मुख्य सहयोगमा सञ्चालन भएको प्रतियोगितामा प्रदेश खेलकुद विकास परिषद् बागमती र हेटौंडा उपमहानगरपालिकाको सहयोग रहेको थियाे । गत वर्षकाे पहिलो संस्करणको प्रदेश लिग फुटबल प्रतियोगिता नुवाकोट जिल्लामा भएको थियो ।
मकवानपुर । दोस्रो संस्करणको बागमती प्रदेश लिग फुटबल प्रतियोगिताको उपाधी रक्षाका लागि काठमाडौं र दोलखा भिड्ने भएकाे छन् ।बागमती प्रदेश राजधानी हेटौंडामा बिहीबार भएकाे सेमिफाइनलबाट काठमाडौं फाइनलमा प्रवेश गरेसँगै दोलखासँग भेट पक्का गरेकाे हाे ।
प्रतियोगित अन्तरगत बिहीबार भएकाे दोस्राे सेमिफाइनल खेलमा काठमाडौंको चित्लाङ फुटबल क्लबले ललितपुर फुटबल क्लबलाई ३–१ गोलअन्तरले पराजित गर्दै फाइनल यात्रा तय गरेको हो । यसअघि प्रतियोगिता अन्तरगत बुधबारकाे पहिलाे सेमिफाइनल खेलमा दोलखाले सिन्धुलीलाई हराउँदै फाइनलमा स्थान बनाएकाे हाे ।
बिहीबारकाे सेमिफाइनलकाे पहिलाे हाफकाे तेस्राे मिनेटमा काठमाडौंले गोल गर्दै अग्रता कायम गरेकाे थियाे । यसैगरी खेलकाे ४२ औं मिनेटमा ललितपुरले जवाफी गोल गर्दै खेललाई १–१ गोलको बराबरी पुर्याएकाे थियो । खेलको ४८ औं मिनेटमा काठमाडौंकाे तर्फबाट १ गोल थप गर्दै टिमले २–१ को अग्रता लिएकाे थियाे । खेलको ६६ औं मिनेटमा काठमाडौंले पुनः गोल गरेकाे थियाे ।
प्रतियोगिताकाे म्यान अफ द म्याच काठमाडौंका यमन महर्जन घोषित भए । उनले टिमलाई फाइनल प्रवेश गर्न २ गोल गरेका थिए । म्यान अफ द म्याच हुँदै उनले ३ हजार रुपैयाँको नगदसहित ट्रफी हात पारे । बुधबारकाे पहिलाे सेमिफाइनल खेलमा सिन्धुलीको ब्लु अल्पाइन क्लबलाई २–१ गोल अन्तरले पाखा दोलखाले फाइनल यात्रा तय गरेकाे थियाे ।
प्रतियोगिताको उपाधि विजेता टिमले २ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले १ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ । २० पुस शनिबार दिउँसो २ बजे हेटौंडा–५ स्थित पिप्ले–क्याम्पा रंगशालामा फाइनल खेल हुने आयोजक प्रदेश फुटबल संघले जनाएको छ ।
प्रतियोगितामा सुवा र रामेछाप जिल्लाको क्लब सहभागी भएनन् । मकवानपुरको पदमपोखरी युथ क्लबसहित, काठमाडौंको चित्लाङ फुटबल क्लब, सिन्धुलीको ब्लु अल्पाइन क्लब, दोलखाको टाइगर टिम तिखालाल, धादिङको धुनिबेसी युवा समाज, नुवाकोटको बटार युथ क्लब, सिन्धुपाल्चोकको चौतारा स्पोर्टस् क्लब, चितवनको बिएफसी क्लब, ललितपुर र काभ्रेको माउण्ट एभरेष्ट फुटबल क्लबकाे प्रतियोगितामा सहभागिता रहेको थियाे ।
अखिल नेपाल फुटबल संघ (एन्फा) को मुख्य सहयोगमा सञ्चालन भएको प्रतियोगितामा प्रदेश खेलकुद विकास परिषद् बागमती र हेटौंडा उपमहानगरपालिकाको सहयोग रहेको छ । गत वर्ष पहिलो संस्करणको प्रदेश लिग प्रतियोगिता नुवाकोट जिल्लामा भएको थियो ।