मकवानपुर । बागमती प्रदेशका मुख्यमन्त्री किरण थापा मगरले विश्वविद्यालयलाई ज्ञान निर्माण, अनुसन्धान र नयाँ विचारको केन्द्रका रूपमा विकास गर्नुपर्ने बताउनु भएकाे छ। शुक्रबार वन विज्ञान अध्ययन संस्थान, हेटौँडा क्याम्पसद्वारा आयोजित फर्स्ट ग्राजुएट कन्फ्रेन्समा मुख्यमन्त्री थापामगरले यस्तो कुरा बताउनु भएकाे हाे ।
वन क्षेत्र वातावरणीय सन्तुलन, जैविक विविधता संरक्षण, जलाधार तथा माटो संरक्षणसँगै नागरिकको जीविकोपार्जनको महत्त्वपूर्ण आधार रहेको छ’ मुख्यमन्त्री थापामगरले भने ‘शिक्षा र ज्ञानलाई समाज, राष्ट्र तथा वातावरणको हितमा प्रयोग गर्नुपर्ने हुन्छ ।’ वनले वातावरणीय सन्तुलन, जैविक विविधता, जलाधार, -माटो संरक्षण र जीविकोपार्जनमा महत्वपूर्ण भूमिका खेल्ने भएपनि जलवायु परिवर्तन, वन डढेलो, जैविक विविधता ह्रास र मानव–वन्यजन्तु द्वन्द्व प्रमुख चुनौतीका रूपमा रहेको उहाँले जानकारी दिनुभयो ।
‘वन तथा वातावरण संरक्षणका लागि सरकार, विश्वविद्यालय, अनुसन्धान संस्था, समुदाय र निजी क्षेत्रबीच सहकार्य आवश्यक छ’ उहाँले भन्नुभयो । वन विज्ञानबाट उत्पादित दक्ष जनशक्तिको ज्ञान, अनुसन्धान र सीप प्रदेशको वन तथा प्राकृतिक स्रोत व्यवस्थापनमा प्रयोग गर्नुपर्ने उहाँले बताउनु भयो। बागमती प्रदेशमा प्राकृतिक स्रोत संरक्षण र आर्थिक विकासबीच सन्तुलन कायम गर्दै दिगो विकासमा जोड दिनुपर्ने बताउँदै उहाँले भन्नुभयो ‘अनुसन्धानलाई नीति निर्माण र स्थानीय समस्याको समाधानसँग जोड्नुपर्छ ।’
मुख्यमन्त्री थापाले भन्नुभयो ‘युवाहरूले आफ्नो ज्ञान र सीपलाई स्थानीय आवश्यकता, वन, वातावरण र जैविक विविधताको संरक्षणमा प्रयोग गर्नुपर्छ।’ सम्मेलनले विद्यार्थी, प्राध्यापक, अनुसन्धानकर्ता र नीति निर्माताबीच ज्ञान तथा अनुभव आदान–प्रदान गर्ने अवसर प्रदान गर्ने भएकाेले वन तथा वातावरणसँग सम्बन्धित विषयमा दक्ष जनशक्ति उत्पादनसँगै उनीहरूले हासिल गरेको ज्ञान, अनुसन्धान र सीपलाई प्रदेशको वन तथा प्राकृतिक स्रोत व्यवस्थापनमा प्रभावकारी रूपमा उपयोग गर्नुपर्नेमा मन्त्री थापाको जोड दिनुभयो ।
मुख्यमन्त्रीले पछिल्लो समय जलवायु परिवर्तन, वन डढेलो, जैविक विविधताको ह्रास तथा मानव–वन्यजन्तु द्वन्द्व वन तथा वातावरण संरक्षणका प्रमुख चुनौतीका रूपमा देखापरेको उल्लेख गर्दै यस्ता चुनौतीको सामना गर्न सरकारको एकल प्रयास पर्याप्त नहुने बताउनु भयो ।
मकवानपुर । नेपाली काँग्रेसकाे १५ औं महाधिवेशन अन्तरगत मकवानपुर जिल्लाकाे संघीय निर्वाचन क्षेत्र नं. १ काे सभापतिमा सुशान्त कुमार श्रेष्ठ तथा क्षेत्र नं. २ मा रञ्जन कालाखेती निर्वाचित भएका छन् ।
क्षेत्र नं. १ अन्तरगत भएकाे निर्वाचनमा कुल ९ सय ९२ मत खसेकोमा श्रेष्ठले ४ सय ७५ मत प्राप्त गर्दै सभापतिमा निर्वाचित भएका हुन्। उनका प्रतिस्पर्धी उत्सव इटेनीले ४ सय ४९ मत प्राप्त गरेका छन्। यसैगरी अर्का उम्मेदवार शिव प्रसाद खतिवडा राजु ले ४३ मत प्राप्त गरे ।
यसैगरी क्षेत्र नं. २ को सभापतिकाे लागि कुल १ हजार २ सय ९० मतमध्ये ७ सय ३९ मत प्राप्त गर्दै रञ्जन कालाखेती विजयी भएका छन्। उनका प्रतिस्पर्धी शंकर न्यौपानेले ५ सय २७ मत प्राप्त गरे। कालाखेतीले निर्वाचन पार्टीभित्रको लोकतान्त्रिक प्रक्रियामा आफू केही मतको अन्तरले विजयी भए पनि नेपाली कांग्रेसको जित भएको बताए ।

यसैबीच नेपाली कांग्रेसको १५औँ राष्ट्रिय महाधिवेशनअन्तर्गत मकवानपुर प्रतिनिधि सभा क्षेत्र नं. १ बाट हेटौंडा–९ की १८वर्षीया अभिप्सा पौडेल महाधिवेशन प्रतिनिधिमा निर्वाचित भएकी छन्। पौडेल यसअघि कांग्रेसको वडा अधिवेशनबाट क्षेत्रीय प्रतिनिधिमा सर्वसम्मत चयन भएकी थिइन्। महाधिवेशन प्रतिनिधिमा निर्वाचित भएपछि पौडेलले १८ वर्षकै उमेरमा प्राप्त जिम्मेवारीलाई व्यक्तिगत उपलब्धिभन्दा राजनीतिक पुस्तान्तरणसँग जोडेर हेरेको बताइन्।
मकवानपुर । नेकपा एमाले मकवानपुर जिल्ला कमिटी र हेटाैँडा उपमहानगरपालिकाकाे अन्तिम लेखा परीक्षण गरिएकाे छ । अन्तिम लेखा परीक्षण गर्नु अघि जिल्ला र नगरका लेखा कमिटीकाे आन्तरिक लेखापरीक्षण गरिएकाे थियाे ।
एमाले केन्द्रीय लेखा आयाेगका सदस्यहरू शान्ति पाख्रिन, नवीन सिग्देल र डिल्लीध्वज बराईलीले अन्तिम लेखा परीक्षण गर्नु भएकाे हाे । लेखा परीक्षण प्रतिवेदन केन्द्रीय लेखा आयाेगले मकवानपुर जिल्ला कमिटीकाे कावा जिल्ला अध्यक्ष हिदम लामा र हेटाैंडा नगरकाे लेखा परिक्षण प्रतिवेदन उपाध्यक्ष राजकुमार बाँस्ताेलालाई हस्तान्तरण गरिएकाे छ ।
लेखा परिक्षण प्रतिवेदन हस्तान्तरण गर्दै केन्द्रीय लेखा आयाेगका सदस्य शान्ति पाख्रिनले पार्टी केन्द्रीय लेखा आयाेगले प्रदेश, जिल्ला र पालिका सम्मकाे लेखा परीक्षण गर्ने व्यवस्था रहेकाे बताउनु भयाे । परीक्षणकाे क्रममा लेखाकाे दाेहाेराे लेखा प्रणाली अनुसार व्यवस्थित हरहिसाव राखिएकाे, आम्दानीमा पारदर्शी र खर्च मितव्ययी रहेकाे उहाँले बताउनु भयो ।
मकवानपुर जिल्लामा विगतदेखि नै लेखाकाे नियम अनुसार हरहिसाव व्यवस्थित गर्दै लेखा परीक्षण नियमित गर्दै आईरहेकाे केन्द्रीय लेखा आयाेग सदस्य नवीन सिग्देलले बताउनु भयाे । बागमती प्रदेशका १० जिल्लाहरूमा मकवानपुर र पालिकामा हेटाैंडा उपमहानगरबाट पहिलाे पटक लेखा परीक्षण शुरू गरिएकाे उहाँले बताउनु भयाे । उहाँले अन्य जिल्ला र पालिकाहरूमा मंसिर मसान्तसम्म लेखा परिक्षण गरिसक्ने जानकारी दिनुभयाे । मकवानपुर जिल्ला कै राजनीति दलमा पार्टीकाे आन्तरीक हरहिसाव व्यवस्थित र पारदर्शी राख्ने पार्टी पहिलाे एमाले भएकाे समेत आयाेगका सदस्य सिग्देलले बताउनु भयाे ।
लेखा परीक्षण प्रतिवेदन हस्तान्तरण केन्द्रीय सदस्य तथा मकवानपुर ईञ्चार्ज रामेश्वर राना, केन्द्रीय सदस्य महेकुमार बर्ताैला, प्रदेश कमिटी सदस्य बलराम बल, जिल्ला कमिटी र उपहानगरपालिकाकाे पदाधिकारीलगायतकाे उपस्थिति गरिएकाे थियाे । लेखा परिक्षण प्रदेश लेखा कमिटीका अध्यक्ष श्यामकृष्ण श्रेष्ठ र प्रदेश कमिटी कार्यालय सचिव घनश्याम श्रेष्ठले लेखा परीक्षणमा प्राविधिक सहयाेग रहेकाे थियाे ।
मकवानपुर । नेकपा (एमाले) बागमती प्रदेश कमिटीकाे मकवानपुरकाे हेटौंडामा सम्पर्क कार्यालय स्थापना गरिएकाे छ । हेटौंडा उपमहानगरपालिका वडा नं. ५ मा रहेको एमाले मकवानपुर पार्टी कार्यालय भएकाे भवनमा बुधबार प्रदेश कमिटीकाे सम्पर्क कार्यालय स्थापना गरिएकाे हाे ।
प्रदेश संगठन कमिटीका गतिविधि तथा सांगठनिक कामलाई समन्वय गरिने गरी स्थापना भएकाे सम्पर्क कार्यालयकाे एमाले केन्द्रीय सचिव तथा बागमती प्रदेश इन्चार्ज महेश बस्नेतले उद्घाटन गरेका हुन् । कार्यालय उद्घाटन गर्दै सचिव महेश बस्नेतले राजनीतिक चेतना, सैद्धान्तिक तथा वैचारिक ज्ञान र संस्थागत अनुभवविनाको नेतृत्वले देशलाई सही दिशामा अघि बढाउन नसक्ने बताए । ‘राज्य सञ्चालनको जिम्मेवारी पाउने नेतृत्वमा राजनीतिक चेतनासँगै संस्थागत अनुभव र वैचारिक स्पष्टता आवश्यक हुन्छ’ उनले भने ।
सचिव बस्नेतले राष्ट्रिय स्वतन्त्र पार्टी नेतृत्वको सरकारको कार्यशैलीमाथि प्रश्न उठाउँदै बालेन्द्र शाहको नेतृत्वमा सरकार गठन भएको छ महिनामै देश कुन दिशातर्फ अघि बढिरहेको छ भन्ने विषय क्रमशः स्पष्ट हुँदै गएको दाबी गरे । विगतमा दुर्गा प्रसाईंले अध्यक्ष केपी शर्मा ओलीको कम्बोडियामा लगानी रहेको दाबी गरेको विषयलाई सामाजिक सञ्जालमा ठूलो मुद्दाका रूपमा उठाइएपनि अहिले ‘ग्रे जोन’ को रिपोर्टमा उल्लेख विषयबारे पर्याप्त बहस हुन नसकेको उनले बताए । उक्त रिपोर्टमा उल्लेख गरिएका विषयलाई जनतामाझ लैजानुपर्ने समेत उनकाे भनाइ थियाे ।
एक अर्काे प्रसंङ्गमा सचिव बस्नेतले पछिल्लो समय डिजिटल प्लेटफर्म एमालेविरुद्ध प्रयोग भइरहेको दाबी गरे । ‘सामाजिक सञ्जालमा पार्टीविरुद्ध चलाइएका अभियानको सामना गर्न छुट्टै जनशक्तिको मात्र भर पर्नु हुँदैन’ उनले भने ‘पार्टीकै नेता तथा कार्यकर्ता डिजिटल माध्यममा सक्रिय भएर पार्टीको धारणा प्रस्तुत गर्नु पर्छ ।’
एमाले प्रदेश संगठन कमिटी अध्यक्ष कैलाश ढुंगेलको अध्यक्षतामा भएकाे कार्यक्रममा एमाले मकवानपुर जिल्ला इन्चार्ज रामेश्वर राना, केन्द्रीय सदस्य महेश बर्तौला, प्रदेशसभा सदस्य एकालाल श्रेष्ठ, एमाले मकवानपुर अध्यक्ष हिदम लामा, एमाले केन्द्रीय लेखा आयोग सदस्य नवीन सिग्देल, अनेम संघ मकवानपुर अध्यक्ष सुमित्रा काफ्लेलगायतकाे उपस्थिति थियो ।
मकवानपुर । नेपाली कांग्रेसको १५औं महाधिवेशन अन्तर्गत मकवानपुरकाे हेटाैडा उपमहानगरपालिका सभापतिमा रामकृष्ण काेइराला निर्वाचित हुनु भएकाे छ । बुधबार भएकाे निर्वाचनमा सभापतिका अर्का उम्मेदवार कविन सांगामीलाई हराउँदै कोइराला निर्वाचित हुनु भएकाे हाे ।
कोइराला कूल खसेको ५८१ मतमध्ये २८४ मत सहित निर्वाचित हुनु भएकाे हाे भने । सांगामीले २७५ मत प्राप्त गर्नु भएकाे थियाे । त्यस्तै उपसभापति पदमा कुलप्रसाद चौलागाईं (३०७ मत) निर्वाचित हुनु भएकाे हाे । चौलागाईंले कृष्णप्रसाद दुलाललाई २४१ सहित हराउनु भएकाे हाे । नगर सचिव पदमा भने विजय पुडासैनी सर्वसम्मत चयन भएका छन् । सचिव पदमा उम्मेदवारी घाेषणा गरेका रामकृष्ण थापाले उम्मेदवारी फिर्ता लिएका थिए ।
काँग्रेस मकवानपुरकाे १० वटै स्थानीय तहको अधिवेशन बुधबार सम्पन्न भएको छ । अधिकांश पालिकामा नयाँ नेतृत्व सर्वसम्मत चयन भएका छन् । केही पालिकामा निर्वाचनबाट नयाँ नेतृत्व चयन गरिएको छ ।
जिल्लाको ७ वटा पालिकाहरूमा सर्वसम्मत रूपमा नेतृत्व चयन हुँदा ३ वटा पालिकामा भने निर्वाचनमार्फत नयाँ नेतृत्व चयन गरिएको हो । हेटौँडा उपमहानगरपालिकासहित राक्सिराङ, बागमती, बकैया र मनहरि गाउँपालिकामा सभापतिसहित केही पदका लागि निर्वाचित भएको थियो भने केही पदमा पदाधिकारीहरू निर्विरोध रूपमा निर्वाचित भएका थिए ।
यसैगरी काँग्रेस थाहा नगरपालिका समितिको सभापतिमा राजेन्द्रभक्त श्रेष्ठ चयन हुनु भएकाे छ । उपसभापतिमा सुरेश लामिछाने र इन्दीरा गोपाली, सचिवमा विरुजु लाल थिङ, सहसचिवमा विजय मल्ल तथा कोषाध्यक्षमा धनश्याम बलामी चयन भएका छन् । यस्तै, मकवानपुरगढी गाउँपालिकामा आकाशकुमार गोले सभापतिमा चयन हुनुभ भएकाे छ । यसअघि सभापतिका लागि आकाश गोले, आइत सिंह लो र बलराम घिमिरेको नाम चर्चामा रहे पनि अन्तिममा गोलेलाई चयन गरिएको हो । उपसभापतिमा सदीप अधिकारी र सुशीला फुयाँल, सचिवमा आइत सिंह लो तथा सहसचिवमा रामप्रसाद चौरेल चयन भएका छन् ।
कैलाश गाउँपालिकामा उदास कुमार ब्लोन सभापतिमा निर्विरोध चयन हुनु भएकाे छ । उपसभापतिमा भुवन सिंह घलान र लक्ष्मी तामाङ, सचिवमा तेजबहादुर ब्लोन तथा सहसचिवमा कृष्ण मोक्तान चयन हुनु भएकाे हाे । भीमफेदी गाउँपालिकामा मित्रबन्दु सिजाली सभापति चयन हुनु भएकाे छ । उपसभापतिमा सुमित्रा नेगी र रमेशकुमार थिङ, सचिवमा हरि लामा तथा सहसचिवमा जीतकुमार बल चयन हुनु भएकाे हाे ।
इन्द्रसरोवर गाउँपालिकामा सुमन श्रेष्ठ सभापतिमा चयन हुनु भएकाे छ । श्रेष्ठको सभापतित्वमा २४ सदस्यीय गाउँपालिका कार्यसमिति सर्वसम्मत चयन गरेको हो । बागमती गाउँपालिकाको सभापतिमा चोकबहादुर ठाडा मगर निर्वाचित हुनु भएकाे छ । ठाडा मगरले आफ्ना निकटतम प्रतिस्पर्धी दीपप्रसाद घोरासैनीलाई एक मतको अन्तरले पराजित गर्नु भएकाे हाे । मगरले ७५ मत प्राप्त गर्दा घोरासैनीले ७४ मत प्राप्त गरे ।उपसभापतिमा कुमारबहादुर केसी र अप्सरा थोकर, सचिवमा सुदीप पाख्रिन तथा सहसचिवमा राजु लोप्चन चयन भएका छन् ।
त्यसैगरी मनहरि गाउँपालिकामा राजकुमार श्रेष्ठ निर्वाचित हुनु भएकाे छ । प्रतिस्पर्धी राजेश अधिकारी र विष्णप्रसाद उप्रेतीलाई पराजित गर्दै श्रेष्ठ सभापतिमा निर्वाचित हुनु भएकाे हाे । श्रेष्ठले १३९ मत प्राप्त गरेका थिए भने अधिकारीले ६१ मत र उप्रेतीले ४ मत मात्र प्राप्त गरेका थिए । उपसभापतिमा अन्ततप्रसाद अर्याल पुरुषतर्फ र शान्ति अधिकारी महिलातर्फ निर्विरोध निर्वाचित भएका छन् । सचिवमा दीपकप्रसाद रिमाल र सहसचिवमा विष्णुमाया बल चयन भएका छन् ।
राक्सिराङ गाउँपालिकाको सभापतिमा देव लामा निर्वाचित हुनु भएकाे छ । निर्वाचनमा १२४ मत प्राप्त गर्दै सभापति बनेका लामा दोस्रो प्रयासमा निर्वाचित हुनु भएकाे हाे । यसअघि १४ औँ महाधिवेशन अन्तर्गत लामाले राक्सिराङको सभापतिमा वीरेन्द्र जिम्बासँग पराजित हुनु परेकाे थियाे ।बुधबारकाे निर्वाचनमा लामाले प्रतिस्पर्धी वर्तमान उपसभापति बुद्धराम मोक्तानलाई ५८ मत पराजित गर्नु भएकाे हाे । उपसभापतिमा महिलातर्फ दीपा सुनार निर्वाचित हुनु भएकाे छ भने उपसभापतिमा पुरुषतर्फ रामचन्द्र ब्लोन निर्वाचित हुनु भएकाे छ । सचिवमा टीकाराम थिङ निर्वाचित हुनु भएकाे छ ।
बकैया गाउँपालिकाको सभापतितर्फ मात्र भएको निर्वाचनमा विजय लामा थिङ र सुनिल भोम्जनलाई हराउँदै गोपालबहादुर न्यासुर निर्वाचित हुनु भएकाे छ । न्यासुरले १३९ मत प्राप्त गर्दै विजयी हासिल गर्दा प्रतिस्पर्धी सुनिल भोम्जनले ४५ मत र विजय लामा थिङ ३७ मत प्राप्त गरेका थिए ।
उपसभापति (पुरुषतर्फ) ज्ञानेन्द्र बजागाईं र उपसभापति (महिलातर्फ) सरिता सञ्जेल निर्वाचित हुनु भएकाे छ । सचिवमा सुशासन्त ब्लोन र सहसचिवमा गणेश सेञ्चुरी चयन हुनु भएकाे छ ।