मकवानपुर । अबकाे केही दिन पछी प्रदेश राजनीतिमा केही परिवर्तन हुने संकेत देखिएको छ । बागमती प्रदेश, प्रदेश १ र कर्णाली प्रदेशका मुख्यमन्त्री परिवर्तन हुने संकेत देखिएको हो । केन्द्रमा नेपाली कांग्रेस सभापति शेरबहादुर देउवा नेतृत्वमा बनेको सरकारमा माओवादी केन्द्र, नेकपा ऐकिकृत समाजवादी, जसपा र जनमोर्चा गरी पाँच दल सरकार सहभागी छ ।
गठबन्धन नै बनाएर सत्ता सञ्चालन गरिरहेका उनीहरूले प्रदेश सरकार परिवर्तनका विषयमा समेत भद्र सहमति गरेका छन् । मन्त्रिपरिषद् विस्तारकाे समयमा बागतमी र प्रदेश १ को मुख्यमन्त्री नेकपा एकिकृत समाजवादीलाई दिने भद्र सहमति पछी केन्द्रीय सरकारमा नेकपा एसकाे प्रतिनिधित्व खुम्चिएकाे छ । नेकपा एसबाट ६ जना मन्त्री हुने पक्कापक्की भएकाेमा प्रदेश मुख्यमन्त्री २ जना बनाउने सहमति पछि उसले केन्द्रीय सरकारमा ४ जना मन्त्रीलाई पठाएकाे हाे ।
दशैं सकिए लगतै बागमती, प्रदेश १ र कर्णाली प्रदेशको मुख्यमन्त्री परिवर्तन हुने लगभग निश्चत जस्तै भएकाे हाे । एकिकृत समाजवादीले बागमती प्रदेश र प्रदेश १ मा आफ्नो दाबी पेश गर्दै आएकोमा साेही अनुसार सहमति भएकाे हाे । दशैं लगत्तै बागमती प्रदेश र प्रदेश १ मा समाजवादीले मुख्यमन्त्री पाउने सम्भावना छ । बागमती प्रदेशकी मुख्यमन्त्री अष्टलक्ष्मी शाक्यले विश्वासको मतका लागि संसदमा प्रस्ताव पेश गरेकी छिन् । प्रस्ताव पेश गरेसँगै दशैंका लागि संसद् अधिवेशन कार्तिक ४ गते सम्म स्थगित भएको थियो । साेही दिन मुख्यमन्त्री शाक्यको भाग्य निर्धारण हुनेछ ।
केन्द्रीय राजनीतिमा भएकाे भद्र सहमति अनुसार शाक्यले विश्वासको मत नपाएको खण्डमा समाजवादीका नेता राजेन्द्र पाण्डे मुख्यमन्त्री बन्ने छन् । प्रदेशकाे समीकरण हेर्दा मुख्यमन्त्री शाक्यलाई विश्वासको मत लिन सहज छैन । १ सय ९ सांसद रहेको प्रदेशसभामा शाक्यलाई आफ्नो पद जोगाउन ५५ सांसद चाहिन्छ । तर, उनको दल एमालेसँग ४३ सांसद मात्र छन् ।
एमाले बाहेकको गठबन्धनमा आवद्ध दलसँग ५८ मत रहेको छ । तर, प्रदेश सभामा २२ सिट रहेको कांग्रेसले बागमतीमा आफ्नो नेतृत्वमा सरकार बनाउन चाहेकाे ले कुन दलको नेतृत्वमा सरकार बनाउने भन्ने अनिश्चित जस्तै रहेकाे छ । प्रदेश संसदीय दलका नेता इन्द्र बानियाँ कस्सीएर आफ्नो नेतृत्वमा सरकार बनाउने कसरतमा छन् । बानियाँ पनि पार्टी सभापति तथा प्रधानमन्त्री शेर बहादुर देउवाको निर्णय अनुसार नै अगाडी बढ्ने मनस्थितिमा रहेकाे देखिन्छन् ।
त्यस्तै प्रदेश १ मा मुख्यमन्त्री भीम आचार्यले दशैंपछि विश्वासको मत लिदैंछन् । दशैंपछि विश्वासको मत लिन लागेका मुख्यमन्त्री आचार्यको पद पनि धरापमै छ । प्रदेश १ नेकपा एसकै राजेन्द्र राई गठबन्धनका तर्फबाट मुख्यमन्त्रीका दाबेदार हुन् । गठबन्धनले सहयोग गरेको खण्डमा राई मुख्यमन्त्री हुनेछन् ।
दशैंपछि कर्णाली प्रदेशमा मुख्यमन्त्री परिवर्तन हुने विषयले चर्चा पनि चर्चा पाइरहेको छ । नेकपा (माओवादी केन्द्र) बाट मुख्यमन्त्री बनेका महेन्द्रबहादुर शाहीले बैशाख ३ गते विश्वासको मत लिँदा ६ महिनापछि पदबाट राजीनामा दिने र नेपाली कांग्रेस कर्णाली प्रदेश संसदीय दलका नेता जीवनबहादुर शाहीलाई मुख्यमन्त्री बनाउने सहमति गरेका थिए । त्यही सहमतिअनुसार नै मुख्यमन्त्री परिवर्तनको चर्चा चलेको हो ।
तर मुख्यमन्त्री को हुने केन्द्रको राजनीतिमा भर पर्ने छ । राजनीतिक उथलपुथल नभए कार्तिकको पहिलाे साता वा प्रक्रिया पुरा गर्दा कार्तिक १० गतेसम्म कर्णालीकाे मुख्यमन्त्रीकाे टुंगाे लाग्ने छ । यस विषयकाे टुंगाे नेपाली काँग्रेसकाे निर्णयमा भर पर्ने देखिन्छ भने मुख्यमन्त्री शाही र कांग्रेस संसदीय दलका नेता शाहीबीच भएको सहमति अनुसार दशैंपछि सरकार परिवर्तन हुनसक्छ । तर, त्यसका लागि केन्द्रको राजनीतिले कस्तो निर्णय गर्न सक्छ त्यसमा भर पर्छ ।
मकवानपुर । मकवानपुरमा गुडिरहेको बसबाट खसेर १ जना घाइते भएका छन् । गुडिरहेको बसबाट खसेर एकजना सहचालक गम्भिर घाईते भएका छन् । सोमबार बिहान ११ बजे कान्तिलोक पथ सडकखण्ड अन्तर्गत मकवानपुरगढी गाउँपालिका वडा नंबर २ को मोहरेमा गुडिरहेको बसबाट खसेर मोडभन्ज्याङ बस्ने १९ वर्षीय बिर बहादुर गोले गम्भिर घाईते भएकाे मकवानपुर प्रहरीले जनाएकाे छ ।
ठिंगनबाट हेटौंडा बजार आउँदै गरेको गरेको ना ४ ख १०७४ नंबर बसबाट सहचालक गाेले एक्कासी खस्दा टाउकोमा चोट लागि गम्भिर घाईते भएका हुन् । घाईते गाेलेलाई उपचारको लागि हेटौंडा अस्पताल ल्याइएकाेमा थप उपचारको लागि पुरानो मेडिकल कलेज भरतपुर चितवन पठाईएको जिल्ला प्रहरी कार्यलय मकवानपुरले जनाएको छ ।
मकवानपुर । मकवानपुर प्रहरीले हेटौंडा–काठमाडाैं चल्ने सुमाले ताेकिएकाे भन्दा बढी भाडा लिएकाे गुनासाे आए पछी नियन्त्रणमा लिएकाे छ । चाडवाडकाे समयमा यात्रुसँग तोकिएको भन्दा बढी रकम लिएको भन्दै प्रहरीले ५ वटा सुमो नियन्त्रणमा लिएको हाे ।
बढी भाडा लिएको गुनासो आएसंगै प्रहरीले आईतबार चेकजाँचलाई कडाई गर्दा ५ वटा सुमोले तोकिएको भन्दा दोब्बर भाडा लिएको पाईएको जिल्ला प्रहरी कार्यलय मकवानपुरका निमित्त प्रहरी प्रवक्ता देवेन्द्र दासले बताए ।
‘आईतबार हेटौंडाबाट काठमाडाैं जाँदै गरेको ५ वटा सुमोलाई नियन्त्रणमा लिएको र यात्रुको भाडा रकम फिर्ता गरिएको छ’ निमित्त प्रहरी प्रवक्ता दासले भने । उनका अनुसार बढी भाडा लिने ना १ ज १७५२, ना १ ज ७४४०, ना १ ज २०८८, ना १ ज ६४०३ र ना १ ज ५०७६ नम्बरका सुमो नियन्त्रणमा लिइएकाे छ ।
मकवानपुर । हेटाैडामा रहेकाे मानव सेवा आश्रमलाई आर्थिक सहयोग गरिएकाे छ । नेपाली कांग्रेस बागमती प्रदेश संसदीय दलका नेता एवं मकवानपुर सभापति ईन्द्रबहादुर बानियाँले मानव सेवा आश्रमलाई १ लाख आर्थिक सहयोग गरेका छन् ।
बानियाँले आफ्नो सेवा सुविधाबापत प्राप्त रकममबाट सहयोग स्वरुप उक्त रकम आश्रमका संस्थापक केन्द्रीय अध्यक्ष रामजी अधिकारीलाई हेटौंडा आश्रममा पुगेर हस्तान्तरण गरेका छन् ।मानवीय सेवामा अनुकरणीय काम गरिरहेको आश्रममा आश्रितहरूको सेवामा सहयोग पुगोस् भन्ने उद्धेश्यले आफ्नो सेवासुविधाबापतको रकम हस्तान्तरण गरेको बानियाँले बताए । उनले आश्रम र संस्थापक अध्यक्ष रामजी अधिकारीसहित आश्रम परिवारको कामको प्रशंसा समेत गरेका छन् ।
बानियाँले आश्रममा आश्रित अग्रजबाट टीका ग्रहणका साथै बालबालिकाहरूलाई दशैंको टीका समेत लगाई दिएका थिए । बानियाँले आश्रमलाई नियमित सहयोग गर्दै आएका छन् । प्रदेशसभा सदस्य बानियाँबाट प्राप्त सहयोग आश्रममा आश्रितहरूको गाँसबास र उपचारमा सदुपयोग गर्ने अधिकारीले बताए ।
बानियाँले केही दिन अघि मकवानपुरको भीमफेदी कारागारमा रहेका कैदीबन्दीलाई दशैं मनाउन ६० हजार रूपैयाँ सहयोग गरेका थिए । उनले सांसद बापत प्राप्त सेवा सुविधा सामाजिक हितमा खर्चिदै आएका छन् ।
मकवानपुर । साफ च्याम्पियनसिपको उपाधि भारतले जितेकाे छ । साफ च्याम्पियनसिपको इतिहासमा पहिलोपटक फाइनलमा पुगेको नेपाली टोली यसअघि सात पटकको विजेता भारतसँग ३–० गोलले पराजित भएको हो । याेसँगै साफ च्याम्पियनसिपको उपाधि जितेर इतिहास रच्ने नेपालको सपना अधुरै रहेकाे छ ।
माल्दिभ्सको राजधानी मालेस्थित राष्ट्रिय रंगशालामा भएको खेल वर्षाले प्रभावित बनेको थियो । पहिलो हाफमा नेपालले सुरुवातमा नै गोलको अवसर गुमाएको थियो । सुजल श्रेष्ठको क्रसलाई नवयुग श्रेष्ठले जाली चुमाउन सकेनन् । उता, भारतको निरन्तर आक्रमणलाई गोलकिपर किरण चेम्जोङले बचाऊ गरेका थिए । पहिलो हाफ गोलरहित बराबरीमा सकिए पनि खेलकाे दाेस्राे हाफकाे ४९ औँ मिनेटमा कप्तान सुनिल क्षेत्रीले गोल गर्दै भारतलाई अग्रता दिलाएको थिए। पहिलाे गाेल गरेकाे १ मिनेट खेलकाे ५० औँ मिनेटमा सुरेश सिंह वाङ्जामले गोल गर्दै भारतको अग्रता दोब्बर पारे। यस्तै खेलको इन्जुरी समयमा भारतका साहल अब्दुल सामदले तेस्रो गोल गर्दै भारतलाई सहज जीत दिलाए ।
नेपालले साफमा खेलेको चार खेलमध्ये २ खेलमा जित हात पारेको थियो भने एक खेल बराबरीमा रोकिएको थियो । यसअघि भएको खेलमा भारतसँग नेपाल १–० गोल अन्तरले पराजित भएको थियो । नेपालले लिग चरणको अन्तिम खेलमा बंगलादेशलाई १–१ गोलको बराबरीमा रोक्दै नेपाल फाइनल प्रवेश गरेको थियो । उता भारत भने २ खेलमा बराबरी र २ खेलमा जित निकाल्दै फाइनल प्रवेश गरेको थियो ।
नेपालमाथि हावी भएको भारतले नेपाली पोष्टमा १९ पटक प्रहार गरेको थियो, जसमध्ये ८ सही दिशामा थियो । नेपालले भने सिंगो खेल अवधिभर जम्मा ६ पटक भारतीय पोष्टमा प्रहार गरेको थियो र त्यसमध्ये एउटा मात्र सही दिशामा थियो ।
यसअघि दुई टोलीबीच भएका २२ खेलमा भारतले १५ मा जीत हासिल गरेको थियो भने नेपालले मात्र २ खेलमा जीत हासिल गरेको थियो । ५ खेल बराबरीमा सकिएका थिए । नेपालले पछिल्लो पटक भारतलाई सन् २०१३ मा साफमा २–१ ले हराएको थियो । त्यसपछि सन् १९९३ मा ढाकामा नेपाल पेनाल्टीमा विजयी भएको थियो ।
योसँगै अब्दुल्लाह अलमुताइरीको नेपालको मुख्य प्रशिक्षकका रुपमा अन्तिम खेल वियोगान्त अन्त्य भएको छ । यसअघि नै फाइनल खेल आफ्नो लागि अन्तिम हुने बताएका अलमुताइरी फाइनल खेलमा निलम्बनका कारण टचलाइनमा उपस्थित हुन पाएनन् ।