मकवानपुर । जिल्ला युवा समिति मकवानपुरको आयोजनामा भएको वक्तृत्वकला प्रतियोगितामा आकृति घिमिरे प्रथम भएकी छिन। “युवा र नबप्रबर्तन” शिर्षकमा हेटौडामा सोमबार भएको जिल्ला स्तरिय खुल्ला वक्तृत्वकला प्रतियोगितामा घिमिरेले प्रथम स्थान हासिल गरेकी हुन् ।
यस्तै, प्रतियोगीतमा सरोज बिक द्वितीय र कृतिका लैडारी तृतीय भएका छन्। प्रतियोगितामा प्रथम, द्वितीय र तृतीय हुनेहरुले क्रमश: १५ हजार, १० हजार र ५ हजार नगद तथा प्रमाण पत्र प्राप्त गरेका छन्।
कार्यक्रममा जिल्ला समन्वय समितिको प्रमुख ललितबहादुर घलानले ‘युवा एक किसिमको सोच हो, युवाले कस्तो किसिमको समाज व्यवस्था र राज्यको स्वरुप रुपान्तरणमा युवाको सहभागिताको सम्बन्धी युवा परिषदले विभिन्न कार्यक्रम गर्दै आईरहेको प्रति खुशी व्यक्त गरे ।
त्यस्तै, प्रदेश युवा परिषदका कार्यकारी उपाध्यक्ष सन्तोष चौलागाईंले अबको युवाले बोल्ने कला मात्र हैन, ब्यबहारमा पनि देखाउने युवाको खाचो रहेको बताए । समाजको बिग्रेको अवस्था सुधार्ने भनेकै युवा हो, क्षमता भएका युवाहरुलाई देशमै केही गरेर खाने वातावरण रहेकोले बताए ।
जिल्ला समन्वय समिति मकवानपुरको प्रमुख घलानको प्रमुख आतिथ्यतामा भएको कार्यक्रममा जिल्ला युवा समितिको संयोजक सुमन पाख्रिनको सभाध्यक्षतामा भएको कार्यक्रममा प्रदेश युवा परिषद कार्यकारी उपाध्यक्ष चौलागाई, हेटौंडा जेसिसका अध्यक्ष श्रवणकुमार बर्तौला, मकवानपुर बहुमुखी क्याम्पस स्ववियु सभापती छोईसाङ लामा लगायतको आतिथ्यता रहेको थियो।
कार्यक्रममा निर्णायकमा मकवानपुर बहुमुखी क्याम्पसका प्राध्यापक लोकराज शर्मा, प्राध्यापक निरा शर्मा र पुर्व हेटौंडा जेसिस अध्यक्ष दिपक मिश्र रहेका थिए। प्रतियोगितामा प्रथम हुने घिमिरेले जेष्ठ २७ गते हुने प्रदेश स्तरिय बक्तृत्वकलामा सहभागिता जनाउने जिल्ला युवा समितिले जनाएको छ ।
मकवानपुर । विश्व वातावरण दिवस हेटौडामा विविध कार्यक्रम गवरी मनाइएकाे छ । टोल विकास संस्था नगर समन्वय समिति, हेटौंडा उपमहानगरपालिकाको आयोजनामा हेटौंडामा ५१ औं विश्व वातावरण दिवस मनाइएको हाे । साेमबार विश्व वातावरण दिवसको दिन वातावरणीय सचेतना मुलक बृहत र्यालि तथा पुरस्कार वितरण र सम्मान कार्यक्रम गरी दिवस मनाइएकाे हाे ।
प्लास्टिकजन्य प्रदूषण निर्मूल पारौँ, वातावरणमैत्री विकल्पको उपयोग गरौँ’ भन्ने नाराका साथ वातावरण दिवस मनाइएको हो । प्लाष्टिक प्रदूषणले विश्वमा असर परिरहेको भन्दै याे वर्ष प्लाष्टिकको प्रयोगलाई रोकथाम गर्न प्ररित गर्ने उद्देश्यले सरकारले दिवसको नारा तय गरेकाे हाे । हेटौंडाका १९ वटै वडाहरुमा रहेका टोल विकास संस्थाहरुले आफ्नै क्षेत्रमा र हेटौंडाको मुख्य बजार वरपरका क्षेत्रका टोल विकास संस्थाहरुले बजार क्षेत्रमा र्याली समेत निकालेर यो दिवस मनाएका हुन् ।
हेटौंडामा ५१ औँ विश्व वातावरण दिवसको अवसरमा हुप्रचौरबाट सुरु भएको र्यालि शितलमहल चोक, पारिजातपथ, ओम भवन, बुद्ध चोकहुँदै रोयल पार्टी प्यालेसमा गएर कार्यक्रम गरि समापन गरिएकाे थियाे । कार्यक्रममा टोल विकास संस्थाको विवरणहरू समेटिएको टोल विकास दर्पण पुस्तिका समेत विमोचन गरिएको छ । टोल विकासमा रहेर वातावरण संरक्षणमा सहयोग पुर्याएकाे भन्दै रामकृष्ण थापा र वातावरण संरक्षण र अभियान संचालनमा महत्वपूर्ण योगदान पुर्याएकाे भन्दै ज्ञान बहादुर थापालाई वातावरण सम्मान २०८० द्वारा सम्मान गरिएको थियो ।

वातावरण दिवसकाे समापन कार्यक्रममा सप्ताहव्यापीरुपमा आयोजना भएका विभिन्न कार्यक्रममा उत्कृष्ट हुने प्रतियोगीहरुलाई पुरस्कृत गरिएको छ । कार्यक्रममा उत्कृष्ट र्यालि पुरस्कार तर्फ विकास टोल विकास संस्था हेटौंडा-८ प्रथम, अब्बल डाडा टोल विकास संस्था हेटौंडा-५ दोश्रो, सिमलटार टोल विकास संस्था हेटौंडा-११ तेश्रो, मैदाटोल विकास संस्था हेटौंडा-८, सामुदायिक विकास तथा सचेतना नेपाल र पच्चेबाजा समुह हेटौंडा- १ सान्तवना भएका छन ।
र्यालि कार्यक्रममा १७० भन्दा बढी संघसंस्थाको उपस्थिति रहेको र करिब ७ हजार भन्दा बढी व्यक्तिको उपस्थिति रहेको टोल विकास संस्था नगर समन्वय समिति अध्यक्ष ध्रुव अधिकारीले जानकारी दिए । समापन कार्यक्रममा उपमहानगरपालिकाका प्रमुख मिना कुमारी लामाले २०८१ जेठ देखि प्लास्टिक झोला रहित हेटौंडा बनाउन अभियानहरू संचालन गरिने बताइन् ।
कार्यक्रम टोल विकास संस्था नगर समन्वय समितिका अध्यक्ष ध्रुब प्रसाद अधिकारीको अध्यक्षतामा तथा बागमती प्रदेशका मुख्यमन्त्री शालिकराम जम्कट्टेलको प्रमुख आतिथ्यतामा भएको समापन कार्यक्रममा बागमती प्रदेश सभा सदस्य प्रेम बहादुर पुलामी, भारती पाठक, एकालाल श्रेष्ठ, प्रमुख जिल्ला अधिकारी राजेन्द्रदेव पान्डे, मकवानपुर जिल्ला प्रहरी प्रमुख बामदेब गौतम, हेटौँडा उपमहानगरपालिकाका वडा अध्यक्षहरु, विभिन्न सरकारी एवम् गैर सरकारी संघ संस्थाहरूको प्रमुख एवम् प्रतिनिधिहरू, टोल विकासका संस्थाका प्रतिनिधिको उपस्थिति रहेको थियो ।
मकवानपुर । नेपाली कांग्रेसका केन्द्रीय महामन्त्री गगन थापा मकवानपुर आउने भएका छन् । कांग्रेस मकवानपुर प्रतिनिधिसभा क्षेत्र २ (ख) को आयोजनामा जेठ २९ गते सोमबार हुने क्षेत्रीय सम्मेलनलाई सम्बोधन गर्न महामन्त्री थापा मकवानपुर आउन लागेका हुन् ।
करिब १ हजार जनाको सहभागिता रहने सम्मेलनमा महामन्त्री थापाले मकवानपुर कांग्रेसमा देखिएको समस्या हल गराउन समन्वयकारी भुमिका खेल्न सक्ने क्षेत्र नम्बर २ (ख) का प्रदेशसभा सभापति रञ्जन कालाखेतीले बताए । ‘चुनावसम्म हामी कुनै नेताको समूहसँग निकट थियौं होला । चुनाव सक्कियो अब हामी कुनै गुट उपगुट होइन नेपाली कांग्रेस हौं भनेर हिड्न जरुरी छ ।’- कालाखेतीले भने ।
सोमबार हेटौंडामा पत्रकार सम्मेलन गर्दै क्षेत्र नम्बर २ का संघीय सभापती लोकबहादुर मोक्तानले उक्त सम्मेलनमा कांग्रेस मकवानपुर प्रतिनिधिसभा क्षेत्र २ (ख) का सबै वडाका पदाधिकारी, वडाका प्रतिनिधि र क्रियाशील सदस्यहरुको सहभागितामा रहने बताएका छन् ।
नेपाल प्रेस युनियन मकवानपुरका अध्यक्ष सुबास बिडारीको सभाध्यक्षतामा पत्रकार सम्मेलन आयोजना भएको थियो ।
- चन्दा खड्का
सन् १९७२ मा स्विडेनको राजधानी स्टक होममा संयुक्त राष्ट्र सम्मेलन बाट ५ जुन मा विश्व वातावरण दिवस मनाउन सभाले आह्वान गरेको हो । संयुक्त राष्ट्रसंघीय वातावरण कार्यक्रमको आह्वानमा सन् १९७३ देखि हरेक वर्ष जुन ५ तारिखको दिनलाई विश्व वातावरण दिवसका रूपमा मनाइन्छ। यो दिवस सन् १९७४ मा ‘मात्र एक पृथ्वी’ वा वन्ली वन अर्थ को नाराका साथ विश्वव्यापी रुपमा मनाईयो ।
विश्व वातावरण दिवसको मुख्य उद्देश्य प्रकृतिलाई जोगाउनु र विभिन्न वातावरणीय मुद्दाहरूको सम्बोधन गरी स्वस्थ र सुरक्षित वातावरणका लागि विश्वव्यापी रूपमा जनमानसलाई प्रोत्साहन गर्नु हो । सन् १९९२ को रियो शिखर सम्मेलनले दिगो विकासका सिद्धान्तहरूलाई लक्ष्यका रूपमा हासिल गरी सबै प्रकारका गरिबी उन्मूलन गरी मानव पृथ्वी र समृद्धिका लागि एक समान न्यायपूर्ण र सुरक्षित विश्व निर्माण गर्ने संयुक्त राष्ट्र संघको परिकल्पनालाई मूर्त रूप दिन पनि विश्व वातावरण दिवसले विशेष भूमिका खेल्छ । प्रत्येक वर्ष जुन ५ मा विश्व वातावरण दिवशको अवसरमा विश्वव्यापी रुपमा विभिन्न कार्यक्रम गर्दै मनाउँदै आईरहेको छ। यस वर्ष संयुक्त राष्ट्रसंघले solutions to plastic pollution लाई मूल विषय र Beat Plastic Pollution भन्ने मूल नाराका साथ मनाउन लागिएको छ। यस नारालाई स्थानीयकरण गर्दै “प्लास्टिक जन्य प्रदुषण निर्मुल पारौ: वातावरणमैत्री विकल्पको उपयोग गरौं” भन्दै विश्व वातावरण दिवस २०८० नेपालमा पनि मनाइदैछ ।
यो पटकको वातावरण दिवसको मुख्य उद्देश्य प्लाष्टिकजन्य वस्तुको प्रयोगबाट हुने प्रदुषणबारे जनचेतना बढाउँदै त्यस्ता बस्तुको प्रयोगमा कमी ल्याउन के कस्ता उपायहरु अपनाउनुपर्छ भन्ने कुरामा केन्द्रीत छ। प्लाष्टिकको सबैभन्दा बढि मात्रमा कार्बन उत्सर्जन हुन्छ । दक्षिण एसिया प्लास्टिक प्रदुषणबाट ग्रस्त छ । वर्षेनी ३३० मिलियन मेट्रिक टन फोहर डम्पिङ्ग साईटमा पुग्दछ जस मध्य ४० मिलियन प्लास्टिक जन्य फोहर छन् । हाम्रो क्रियाकलापहरुबाट हरितगृह ग्यास उत्पादन हुन्छन जसलाई हामी carbon footprint भन्छौं। विश्वको प्लास्टिक carbon footprint विश्वको हरित गृह ग्यास उतसर्जनको ४.५% रहेको छ ।यो क्रम अझै बढ्दो छ।
धेरै जस्तो खानेकुराको प्याकेजिङ र पिउने पानीको बोतल प्लाष्टिककै हुन्छ र उपभोक्ताले सो उपयोग गरिसकेपछि जथाभावी फाल्नाले प्लाष्टिक नपुगेको ठाउँ नै छैन । प्लाष्टिक जन्य फोहोरलाई जलाउँदा निस्किने पोलिक्लोरोनेटेड बाइफिनाएल (polychlorinated biphenyl)- डाइअक्सिन, फ्युरान (Dioxin, furan) धुँवा विषाक्त हुन्छ । प्लाष्टिकजन्य फोहरले माटो, पानी र हावाको प्रदुषण गर्छ र अन्ततः मानिस तथा पशुपंक्षी र जनावरहरूको स्वास्थ्यको लागि पनि हानिकारक हुन्छ । यसले भूमिको प्रजनन क्षमतालाई कम गर्दछ साथै नदी, सिमसार प्रदुषण र जलीय प्रणालीलाई समेत असर गर्दछ । पोलिस्टेरेन पोलिमरहरूबाट बनेका फोम कप, दही र डेली कन्टेनर जस्ता प्लास्टिकका समानहरु जलाउँदा स्टिरेन ग्याँस उत्सर्जन हुन्छ जुन सजिलै छाला र फोक्सोबाट अवशोषित भई हृदय रोगको जोखिम बढाउनका साथै श्वासप्रश्वास समस्या पनि निम्त्याउँछ ।प्लाष्टिकका साना कण (microplastic) पानीमा मिसिएर हाम्रो शरीरमा प्रवेश गर्दा प्लास्टिकले शरीर भित्र रहेको इन्डोक्राइन हर्मोनको उत्पादनमा रोकावट गरी दिर्घ रोग लाग्ने गर्दछ ।
प्लास्टिकमा हुने डाइअक्सिन र फुरान्सको जैविक संचय स्वभावका (Persistent organic pollutant or POPs) करण, यी रसायनहरू धेरै समयसम्म वातावरणमा रहिरहन्छन। बिशेष गरि अन्डा, मासु , र डेरी उत्पादनहरुको सेवनबाट यी तत्वहरु मानव शरिरमा प्रवेश गर्छन् । प्रयोगमा नआउने प्लास्टिक झोलालाई उपयुक्त स्थानमा विसर्जजन गर्ने, सकेसम्म एउटै झोला बारम्बार प्रयोग गर्ने, ५–आर कार्यलाई प्रोत्साहन गर्ने (सकेसम्म प्लास्टिक झोला प्रयोग नगर्ने Refuse प्लास्टिक झोलालाई वातावरणमैत्री विकल्पले विस्थापन गर्ने, खेर जाने झोलाको परिमाण घटाउने Reduce, खेर जाने झोलालाई पुनः प्रयोग गर्ने Reuse, , खेर जाने प्लास्टिकलाई पुनः प्रशोधन गर्ने Recycle र पुनः प्रयोगमा आउन नसक्ने प्लास्टिकबाट ऊर्जा उत्पादन गर्ने Recover) यसलाई circular economy अर्थात चक्रिय अर्थ व्यवस्था पनि भनिन्छ।
प्लाष्टिकजन्य पदार्थको अर्को डरलाग्दो जोखिम भनेको जमिन मुनीको पानीलाई प्रदुषित गर्ने हो। क्लोरिनेटेड प्लाष्टिकलाई माटोमा जथाभावी मिसाउँदा सो वरीपरीको माटोमा खतराजन्य पदार्थ छोडन पुग्छ जुन पदार्थ जमिनमुनी रहेको पानी र नजिकका नदीनालामा मिसिन पुग्दा उक्त पानी प्रयोग गर्ने सम्पूर्ण प्राणीलाई निकै घातक असर परिरहेको छ।नेपाल सरकारले प्लास्टिकजन्य पदार्थबाट हुने वातावरणीय प्रदूषण न्यूनीकरण गर्न ४० माइक्रोनभन्दा पातलो प्लास्टिकको झोला, आयात, बिक्री वितरण र प्रयोगमा २०७९ श्रावण १ गते बाट प्रतिबन्ध गर्ने निर्णय गरेको छ। स्वच्छ वातावरण नै हामी सबैको आवश्यकता हो । त्यसैले प्लस्टिकजन्य पदार्थको प्रयोग सकेसम्म नगरौं।
वातावरण दिवस हरेक वर्ष मनाइन्छ । यसकाे सार्थकता दिवस मनाउनु मात्रमा छैन । वातावरणमैत्री क्रियाकलाप हरेक दिन आवश्यक छ । हामीले गर्ने दैनिक क्रियाकलापले वातावरणलाई असर परिरहेकाे तर्फ सोच्नु जरुरी छ । हामीले हाम्रै लागि, हाम्रा पुस्ताका लागि, अरुका लागि र पृथ्वीकाे लागि समेत वातावरणमैत्री क्रियाकलाप गर्नु जरुरी भइसकेकाे छ । वातारवण स्वच्छ भए हामी स्वच्छ रहन्छाै । हाम्रा गतिविधि वातावरण मैत्री हुन जरुरी छ । तव मात्र वातावरण दिवसकाे सार्थकता रहन्छ ।
वातावरण इन्जिनियर, हेटौडा उपमहानगरपालिका
मेयर कपः साेमबारबाट क्वार्टरफाइनल खेल
Tags: No Comments
मकवानपुर । हेटौडा उपमहनागरपालिकामा जारी मेयर कप फुटबल अन्तरगत साेमबारबाट क्वार्टरफाइनलका खेलहरु संचालन हुने छन् । आइतबार भएकाे तीन खेलबाट क्वार्टरफाइनलकाे समिकरण पुरा भए पछी साेमबारबाट क्वार्टरफाइनलका खेल हुने भएकाे हाे ।
हेटौँडा उपमहानगरपालिका नगर खेलकुद विकास समितिको आयोजना संचालन भएकाे तेस्रो संस्करणको हेटौँडा मेयर कप फुटबल प्रतियोगिताको क्वार्टरफाइनल १ नम्बर, २ नम्बर, ९ नम्बर, ११ नम्बर, १३ नम्बर, १४ नम्बर, १५ नम्बर र १९ नम्बर वडाकाे फुटबल टिमले स्थान बनाएका हुन ।
आइतबार भएको खेलमा १३ नम्बर, १४ नम्बर र १५ नम्बर वडा विजयी हुँदै क्वाटरफाइनलमा प्रवेश गरेको छ । आइतबार भएको खेलमा १० नम्बर वडालाई २–१ गोलअन्तरले हराउँदै १३ नम्बर वडा क्वार्टरफाइनल प्रवेश गरेको हो । यस्तै १८ नम्बरलाई टाइब्रेकरमा ५–४ गोलअन्तरले हराउँदै १५ नम्बर वडा क्वार्टरफाइनल प्रवेश गरेकोे हो । यस्तै, आइतबार बिहान भएको खेलमा १२ नम्बर वडालाई ३–२ गोलअन्तरले पराजित गर्दै १४ नम्बर क्वार्टरफाइनल प्रवेश गरेको हो ।
यसअघी भएका खेलहरुमा ९ नम्बरले १६ नम्बर र ११ नम्बर वडाले ७ नम्बर वडालाई हराउँदै क्वार्टरफाइनलमा प्रवेश पाएका हुन् । यस्तै १ नम्बरले ५ नम्बरलाई, २ नम्बरले १७ नम्बरलाई र १९ नम्बरले ८ नम्बर वडालाई हराउँदै क्वार्टरफाइनलमा स्थान बनाएका हुन ।
सोमबारको पहिलो क्वाटरफाइनल खेल ९ नम्बर वडा र १४ नम्बर वडाबीच प्रतिस्पर्धा हुनेछ । सोमबारको दोसो क्वार्टरफाइनल खेलमा १ नम्बर वडाले ११ नम्बर वडाकाे सामना गर्ने हेटौडा उपमहानगरपालिका खेलकुद शाखा अधिकृत बसन्त सिटौलाले बताए । यसैगरी क्वार्टरफाइनल अन्तर्गत मंगलबार १५ नम्बर वडा र १९ नम्बर वडा र २ नम्बर वडा र १३ नम्बर वडाबीच खेल हुने सिटौलाले जानकारी दिए । प्रतियोगिताको सेमिफाइनलका खेलहरु बुधबार र बिहिबार हुनेछ भने फाइनल शनिबार कार्यतालिका रहेकाे उनले बताए ।
प्रतियोगिताको विजेता टिमले नगद २ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले नगद १ लाख ५० हजार रुपैयाँ प्राप्त गर्नेछन् । सेमिफाइनल प्रवेश गर्ने दुई टिमले ५०–५० हजार रुपैयाँ प्राप्त गर्नेछन् । यस्तै विधागत उत्कृष्ट खेलाडीहरुले ५–५ हजार रुपैयाँ प्राप्त गर्ने आयाेजकले जनाएको छ ।
