खेलकुद तथा व्यापार महोत्सवः प्रमोदले नचाए हेटौंडेली दर्शक
Tags: No Comments
मकवानपुर । मकवानपुरकाे हेटौंडामा सञ्चालन भैरहेको खेलकुद तथा व्यापार महोत्सवमा सोमबार गायक प्रमोद खरेलले हेटौडेलीलाई नचाएका छन् । खरेलकाे सांगीतिक प्रस्तुति सुन्न हेटौडामा दर्शकहरुको भीड लागेको थियो ।
युवा पुस्ताले निकै रुचाएका गायक खरेलले महाेत्सवकाे आफ्ना करिब एक दर्जन गीत गाएका थिए । महोत्सवका दर्शकहरुले नाच्दै र गाउँदै उनलाई साथ दिएका थिए । सोमबार खरेलसंगै गायिका सहिमा श्रेष्ठ, गायक असिमकुमार कटुवाल र जादुगर बलराम सरकारको प्रश्तुती रहेको थियो । महोत्सवमा मंगलबार लोक गायक पशुपति शर्मा, लोक गायिका ज्योति मगरसहित मनोज गोर्खाली, ध्रुव विस्को, केको सिङ लगायतको प्रश्तुती रहने आयोजकले जनाएको छ ।
प्रत्येक दिन राष्ट्रिय तथा स्थानीय कलाकारहरुको प्रस्तुति रहँदै आएको महोत्सवमा दैनिक दर्शकको उपस्थिति बढ्दै गएकाे आयोजकले जनाएकाे छ । पुस १७ गतेसम्म सञ्चालन हुने महोत्सवमा २६० वटा विभिन्न स्टल रहेको छ । महोत्सवमा कृषि, पर्यटन, हस्तकला, अटो मोबाइलका साथै बाल उद्यान लगायत राखिएको छ । महोत्सवबाट खेलकुद विकास समितिलाई प्राप्त हुने रकमबाट वर्षभर खेलकुद प्रतियोगिता आयोजना गर्ने आयोजकले लक्ष्य राखेको छ । महोत्सवबाट मकवानपुर जिल्ला खेलकुद विकास समितिले करिब २५ लाख रुपैयाँ प्राप्त गर्ने बताइएकाे छ ।
बृहत् खेलकुद तथा व्यापार महोत्सवः राष्ट्रिय तेक्वान्दोमा ज्योति डोजाङ प्रथम
Tags: No Comments
मकवानपुर । बागमती प्रदेशकाे राजधानी हेटौंडामा जारी बृहत् खेलकुद तथा व्यापार महोत्सव अन्तर्गत सोमबार भएको राष्ट्रिय तेक्वान्दो प्रतियोगितामा ज्योति तेक्वान्दो डोजाङ प्रथम भएको छ ।
१२ वटा तौल समूहमा भएको प्रतियोगितामा ज्योतिले ३ स्वर्ण, ३ रजत र ३ कास्य पदकसहित पहिलाे भएको हो । ३ स्वर्ण र एक काश्यसहित किरणचोक तेक्वान्दो डोजाङ द्वितीय भएको छ भने २ स्वर्ण, ४ रजत र एक काश्यसहित क्रियटिभ डोजाङ तृतीय भएको छ ।
पशुपति डोजाङले २ स्वर्ण, २ रजत र ३ कास्य पदक जितेको छ भने माउण्ट एभरेष्ट डोजाङले १ स्वर्ण र एक रजत जितेको छ । यस्तै टिसिएन डोजाङले एक स्वर्ण र एक रजत, जेनिथ डोजाङले ५ कास्य र ज्ञानोदय डोजाङले २ कास्य जितेको आयोजकले जानकारी दिएको छ । प्रतियोगितामा मकवानपुरको ८ वटा डोजाङले सहभागिता जनाएका थिए ।
विजेता खेलाडीहरुलाई नेपाली कांग्रेस मकवानपुरका नेता आनन्दराम पराजुली, हेटौंडा उपमहानगरपालिका १ नम्बर वडा अध्यक्ष सविन न्यौपाने, ६ नम्बर वडा अध्यक्ष विष्णु दाहाल, ८ नम्बर वडा अध्यक्ष राम थापा, ९ नम्बर वडा अध्यक्ष शुकराम केसी, १० नम्बर वडा अध्यक्ष फुर्वादोर्जे लामा, मकवानपुर जिल्ला खेलकुद विकास समितिका अध्यक्ष बेष खड्की, पूर्व अध्यक्ष सानु लामा लगायतले पुरस्कार वितरण गरेका हुन् । महोत्सवमा दैनिक विभिन्न खेलकुद प्रतियोगिता सञ्चालन भैरहेको छ ।
महोत्सवमा राष्ट्रिय, प्रदेश तथा जिल्लास्तरीय गरी १३ वटा विधाका खेलमा स्पर्धा सैचालन हुनेछ । महोत्सव आयोजक समितिका संयोजक तथा मकवानपुर जिल्ला खेलकुद विकास समितिका अध्यक्ष वेष खड्कीले खेलकुद क्षेत्रको विकासका लागि आयोजना भएको महोत्सवमा सबै क्षेत्रको सहयोग प्राप्त भैरहेको बताए ।
मकवानपुर । मकवानपुरकाे हेटौडामा आइचरकाे रिसेल मेला सुरु भएकाे छ । बतास एमए डब्लु कमर्सियल भेइकल प्रालिले आफ्ना ग्राहक लक्षित गर्दै हेटौंडामा रिसेल मेलाको आयोजना गरेको छ ।
बतास एमए डब्लु कमर्सियल भेइकल प्रालि नेपालका लागि आइचर कमर्सियल भेइकलको एकमात्र आधिकारिक वितरक हाे । मेला औपचारिक रुपमा आइतबाटबाट सुरु भएको हो । नेपाल ट्रक यातायात महासंघ र नारायणी यातायात व्यवसायी संघका अध्यक्ष हिरालाल श्रेष्ठ, निर्माण व्यवसायी संघ मकवानपुरका अध्यक्ष बालगोपाल कँडेल, प्रालिका पूर्व एरिया प्रमुख विजय पुडासैनी र प्रालिकै रिसेल प्रमुख परीक्षण धिमालले संयुक्त रुपमा मेलाको उद्घाटन गरेका हुन् ।
उद्घाटन कार्यक्रममा श्रेष्ठले आइचर ट्रकको विशेषताले ग्राहकले रुचाएकाे बताउँदै विशेष माइलेज र पावर उत्कृष्ट रहेको जानकारी दिए । यस्ता मेलाहरुले मध्यम वर्गका ग्राहकले पनि सजिलै स्वरोजगार भइ आत्मनिर्भर हुन सक्ने श्रेष्ठले बताए । उनका अनुसार चालकलाई लक्षित गरी २५ लाखको आकस्मिक थप उर्जा दिइने छ । कार्यक्रम आइतबार ८ पुषबाट पुष १० गतेसम्म संचालन हुने छ । ‘प्रालिले ग्राहकहरुको आवश्यकता महसुस गर्दै यस्ता कार्यक्रम समयसमयमा गर्ने गरेकाे छ’ पूर्व एरिया प्रमुख पुडासैनीले भने ‘जसका कारण नेपाल सहित विश्व बजारमा आइचर ग्राहकहरुको रोजाइमा पर्ने गरेको हाे ।’
यसअघि आइचरले आफ्ना ग्राहकहरुलाई लक्षित गर्दै सिद्धार्थ प्रिमियर इन्स्योरेन्स लिमिटेडसँग क्यासलेस इन्स्योरेन्स सम्बन्धि सम्झौतामा हस्ताक्षर गरेको उनले बताए । क्यासलेस योजनामार्फत् दुर्घटना भएको अवस्थामा आइचर मोटरका खरिदकर्ताहरुले बतास एमएडब्लु आधिकारिक सर्मिस सेन्टरहरुमा पुगेर गाडि मर्मत वा बीमा रकम दावी गर्न सक्ने उनको भनाई छ ।
क्यासलेस इन्स्योरेन्स अन्तरगत ग्राहकहरुले सवारी साधन दुर्घटनामा परेको खण्डमा सोझै आइचरको ओर्क सपमा गई मर्मत गराउन सक्ने र ग्राहकले बीमा रकम बाहेकको रकम मात्र तिर्नुपर्ने जनाइएको छ । बाँकी रकम बीमा कम्पनी र प्रालिबीच कारोबार हुने छ । तीनदिनसम्म सञ्चालन हुने मेलामा ५ सय भन्दा बढी ग्राहकहरुले अवलोकन गर्ने आयोजकले जनाइएको छ ।
मकवानपुर । विभिन्न प्रलोभनमा भारत पुर्याइएका ८ जना बालक उद्धार गरि अभिभावकको जिम्मा लगाइएको छ । विभिन्न प्रलोभनमा परी बालश्रम गर्न भारत पुर्याइएकाे उनीहरुलाई ग्रामीण विकास केन्द्र रौतहट र सामुदायिक विकास तथा सचेतना नेपालकाे समन्वयमा उद्धार गरि शनिबार नेापलमा अभिभावककाे जिम्मा लगाइएकाे हाे ।
ग्रामीण विकास केन्द्र, रौतहट र सामुदायिक विकास तथा सचेतना नेपाल, मकवानपुरले, राष्ट्रिय बाल अधिकार परिषद र मिसन रेसक्यू अपरेशन इन्डीयाको समन्वयमा बालकलाई भारतबाट उद्धार गरी नेपाल ल्याएर अभिभावककाे जिम्मा लगाएकाे हो । उद्धार गरि ल्याइएका बालकहरु शनिबारनै जिल्ला प्रहरी कार्यालय गौरमा प्रहरी प्रमुख, र राष्ट्रिय बाल अधिकार परिषदको प्रतिनिधि लगायतका सरोकार वालाहरुको रोहवरमा अभिभावकको जिम्मा लगाएको सामुदायिक विकास तथा सचेतना नेपालका सचिव अनन्त बानियाँले बताए ।
उद्धार गरेका बालकहरु सवै रौतहटका छन् । जसमध्य राजपुर नगरपालिकाका २ जना, स्नाथ नगरपालिका २ जना, दुर्गा भगवती गाँउपालिकाका २ जना र गढीमाई नगरपालीकाका २ जना छन् । बालकहरु ६ देखि ८ महीना पहिले विभिन्न प्रलोभनमा परि चिनजानका आफन्तहरुबाट नै भारत पुगेका बानियाँले जानकारी दिए । उनीहरुलाई मुम्बइको नागपाडा क्षेत्रमा रहेको व्याग पसलमा बालश्रम गरिरहेको अवस्थामा मिसन रेसक्यू अपरेशन इन्डीयाले भारतीय प्रहरीको सहायतामा गत अगस्टमा उद्धार गरेको थियो ।
ग्रामीण विकास केन्द्र रौतहटका प्रतिनिधि कुमारी ममता झा र सामुदायिक विकास तथा सचेतना नेपालको कार्यकारी निर्देशक दिलिप कोइराला, सचिव अनन्त बानिया भारतको मुम्बई पुगी बाल कल्याण समीति मुम्बई शहर–२ र महिला तथा बालबालिका विभागसँग छलफल तथा समन्वय गरि बालकहरुलाई नेपाल ल्याई अभिभावकको जिम्मा लगाएका हुन् । १७ वर्ष मुनिका बालललाई १२ देखि १८ घण्टासम्म काममा लगाउने र काम गरे बापतको पैसा माग्दा रेल स्टेशनमा ल्याएर छोड्ने जस्ता शोषण गरिएकाे बताइएकाे छ ।
६ महीना अघि घरमा खबर नगरी सम्पर्क विहीन भएको छोरालाई खोजी गर्दै जादाँ १ महिना अघिमात्र भारतको बालगृहमा छ भन्ने खबर पाएका एक अभिभावक नुसरत बेगम छोरालाई भेट्दा खुसी हुदै अव घरमै राखेर पढाउने २५ वर्ष नपुगेसम्म बाहिर काममा नपठाउने बताउछिन् । सामुदायिक विकास तथा सचेतना नेपालका कार्यकारी दिलीप कोइरालाका अनुसार अझै भारतका विभिन्न बालगृहमा बालश्रममा परेका ६ बालकहरु रहेको र उनीहरुलाई नेपाल फर्काउन कागजी प्रक्रिया पुरा गर्ने काम भइरहेकाेले चाडै नेपाल फर्काइने छ ।
मकवानपुर । मकवानपुरकाे हेटौडामा शैक्षिक गुणस्तर सुधार गर्न असल अभ्यासकाे आदान प्रदान गरिएकाे छ । हेटौंडा उपमहानगरपालिका वडा नम्बर–४ कार्यालयको आयोजना तथा शैक्षिक गुणस्तर सुधार समितिको व्यवस्थापनमा असल अभ्यास तथा शैक्षिक कार्ययोजना आदान प्रदान गरिएकाे हाे ।
४ नम्बर वडा भित्र रहेका सामुदायिक तथा संस्थागत विद्यालयसँग सरोकारवाला समेतकाे सहभागितामा आदान प्रदान कार्यक्रममा भएकाे हाे । हेटौंडा उपमहानगरपालिका वडा नम्बर–४ कार्यालयले विकास निर्माणका कामसँगै शैक्षिक क्षेत्रमा गर्दै आएको छ । शिक्षामा थप गुणस्तर कायम गर्न वडा कार्यालयले वार्षीक बजेट विनियाेजन गरेर काम गर्दै आएकाे छ ।
‘विकासमा शैक्षिक विकास महत्वपूर्ण हुने भएकाेले विगतका वर्षमा शिक्षा क्षेत्रमा वडाले काम गर्दै आएकाे छ‘ वडा अध्यक्ष नविन सिग्देलले भने ‘चालु आर्थिक वर्षमा शिक्षा क्षेत्रमा गुणस्तरीयता कायम गर्न थप काम गर्ने योजना रहेकाे छ ।’ शैक्षिक गतिविधि बढाउँदै यस क्षेत्रमा बजेट पनि पर्याप्त छुट्याएर काम गरिएकाे उनले जानकारी दिए ।
शैक्षिक क्षेत्रको विकासमा सधैं अग्रसर रहने बताउँदै सिग्देलले वडाको लागि विनियोजन भएको बजेट मध्ये ३३ प्रतिशत बजेट शिक्षामा लगानी गरिने गरी छुट्याइएको जानकारी दिए । ‘हेटौडाकाे ४ नम्बर वडा मकवानपुरको शैक्षिक केन्द्र रहेकाेले स्थानीयसँगै जिल्ला बाहिरका विद्यार्थी यही अध्ययनरत छन् त्यसैले भावनात्मक मात्र नभएर राष्ट्रिय एकता पनि यहाँ जोडिएको छ’ सिग्देलले भने ।
छलफल कार्यक्रममा वडा भित्रका ८ वटा विद्यालयहरुले शैक्षिक प्रगति, विद्यालयले गरेका अतिरिक्त क्रियाकलाप तथा विद्यालयको समस्या र चुनौतीहरु प्रस्तुत गरेका थिए । शिक्षा क्षेत्रमा सधैं अग्रसर रहेकाेले वडाले थुप्रै शैक्षिक गतिविधिहरु गर्दै आइरहेको उनले बताए । गतबर्ष सामुदायिक तथा संस्थागत विद्यालयवीच प्रतिस्पर्धा, शैक्षिक अध्ययन तथा गुणस्तर सुधार एवम् विद्यार्थीको सिर्जनशील प्रतिभाको उजागर गर्न वडा कार्यालयले शैक्षिक मेला आयोजनामा गरेको थियो ।
वडाभित्र रहेका विद्यालयहरुको शैक्षिक प्रगति,शिक्षा क्षेत्रमा आईपर्ने समस्या समाधान र शैक्षिक पृष्ठपोषणका लागि अध्यक्ष सिग्देल लगायत शिक्षक र सरोकारवालाको छलफलबाट २०७९ साल मंसिर २६ गते शैक्षिक गुणस्तर सुधार समिति गठन गरि शिक्षा क्षेत्रकाे सुधारका लागि काम गर्दै आएकाे श्रमिक माविका प्रअ श्रीराम दाहालले बताए। सामुदायिक विद्यालय र संस्थागत विद्यालयको सम्बन्ध प्रगाढ बनाउने, शिक्षक तालिम र अन्तर्क्रिया कार्यक्रमहरु सञ्चालनमा ल्याउने, वडा स्तरीय खेलकुद तथा शैक्षिक मेला प्रर्दशनी गर्ने, तथा वडा भित्रको शैक्षिक गुणस्तरलाई अभिवृद्धि गर्ने जस्ता क्रियाकलापहरु यस समिति निर्माण पश्चात भईरहेकाे उनले जानकारी दिए ।
शैक्षिक क्षेत्रको विकासमा लम्किरहेको मकवानपुर जिल्लाको हेटौंडा ४ मा रहेकाे विद्यालयमा मात्रै झण्डै १६ हजार विद्यार्थीहरु छन् । ३ वटा सामुदायिक र ५ वटा संस्थागत गरी ८ वटा विद्यालय वडा भित्र रहेका छन् । केहि समय अगाडी मात्र गुणस्तर सुनिश्चितता प्रत्यायन प्रमाणपत्र (क्युएए) प्राप्त गरेको हेटौंडा क्याम्पस पनि यस वडामा अवस्थित छ । पटकपटक उत्कृष्ट नतिजा ल्याउने र छुट्टै पहिचान बोकेको आधुनिक राष्ट्रिय मावि, आमसाइ स्कुल, श्रमिक मावि, भुटनदेवी मावि, नवोदय शिशु सदन मावि ब्रह्मदिक एकेडेमी, सत्यम जेभियर्स मावि, र रोज एकेडेमी यस वडाभित्र रहेका छन्।
कार्यक्रममा सामुदायिक विद्यालय र संस्थागत विद्यालयका शिक्षक, शिक्षाविद्, हेटौडा उपमहानगरपालिका शिक्षा विकास महाशाखा प्रमुख हरिश्चन्द्र सापकाेटा, वडा सदस्यलगायतकाे उपस्थिति रहेकाे थियाे ।