मकवानपुर । बागमती प्रदेशका कृषि तथा पशुपन्छी विकास मन्त्री डा. राजेन्द्रमान श्रेष्ठले जाति, भाषा र संस्कृति प्रदेशसँगै देशकै सम्पत्ति भएकाले संरक्षण र प्रबर्द्धनमा सबैपक्ष गम्भीर बन्नुपर्ने बताएका छन् । केन्द्रीय मानन्धर संघले हेटौंडामा आयाेजना गरेकाे साँस्कृतिक कार्यक्रममा मन्त्री श्रेष्ठले उक्त कुरा बताएका हुन् ।
नेपालको गौरबको रुपमा रहेको नेपाल भाषा, नेवार संस्कृतिसँगै नेपाल सम्बत महत्वपूर्ण रहेकाले दैनिक प्रयोगमा ल्याउनुपर्नेमा उनले जोड दिए । ‘नेपाल सम्बतलाई सरकारी कामकाजमा प्रयोगमा ल्याईनु खुशीको कुरा हो, उनले भने, ‘राष्ट्रिय विभूती शंखधर साख्वाले चलाउनु भएको नेपालको मौलिक नेपाल सम्बत् भएकाले पूर्ण कार्यान्वयन गर्नु जरुरी छ ।’
बागमती प्रदेश सभा सदस्य एकालाल श्रेष्ठले प्रदेशमा नेवार र तामाङ भाषालाई सरकारी कामकाजको भाषा बनाउने गरी ऐन आएकाे बताउदै नेपाल भाषा, संस्कृति जगेर्ना गर्न सरकार, नेवार समुदाय र संघसंस्थाहरु एकजुट भएर काम गर्नुपर्नेमा जोड दिए । यसैगरी प्रदेश सभा सदस्य शैलेन्द्र बज्राचार्यले संघीयताको बारेमा नकारात्मक धारणा फैलाईएको भन्दै राजनीतिक, भाषिक, साँस्कृतिक अधिकार पाउन संघीयताले महत्त्वपूर्ण भूमिका खेलिरहेको बताए ।
कार्यक्रममा मौलिक धिमे बाजा, धा: बाजा, बाँसुरी, बे बाजा, नाय् खिं बाजा, ढोलक बाजाको प्रस्तुतीसँगै नेवारी पहिरनमा नेपाल भाषाका गीत तथा नृत्यहरु प्रस्तुत गरिएको थियो । कार्यक्रम अघि हेटौंडाको बुद्ध चोकमा भेला भई प्रभातफेरी गरिएकाे थियाे । काठमाडौं महानगरपालिकाको लागत साझेदारी, संघको युवा र सञ्चार उपसमितिको संयोजन तथा हेटौंडाका मानन्धर गुठीहरुसँगको सहकार्यमा शनिबार साँस्कृतिक कार्यक्रम गरिएको हो । हेटौंडामा जस्तै साँस्कृतिक कार्यक्रम पर्साको विरगञ्ज र बारामा आयोजना गरिने नेवाः पत्रकार राष्ट्रिय दबूका केन्द्रीय महासचिव तथा केन्द्रीय मानन्धर संघका केन्द्रीय सदस्य केके मानन्धरले जानकारी दिए ।
कार्यक्रम बागमती प्रदेशका कृषि तथा पशुपन्छी विकास मन्त्री डा. राजेन्द्रमान श्रेष्ठको प्रमुख आतिथ्य तथा केन्द्रीय मानन्धर संघका केन्द्रीय अध्यक्ष मनोजकुमार मानन्धरको सभाध्यतामा भएको थियो । कार्यक्रममा बागमती प्रदेशका सांसदहरु एकालाल श्रेष्ठ र शैलेन्द्र बज्राचार्यको विशेष आतिथ्य रहेको थियो ।
कार्यक्रममा नेपाल राष्ट्र बैंक विरगञ्जकी सहायक निर्देशक अमृता मानन्धर, वन विज्ञान अध्ययन संस्थान हेटौंडा क्याम्पसका उपप्राध्यापक डा. विक्रम मानन्धर, विश्व साईकलयात्री रामचन्द्र मानन्धर, डिभिजन वन कार्यालय सिन्धुलीका डिभिजन वन अधिकृत अजय विक्रम मानन्धर लगायतको आतिथ्य रहेको थियो ।
मकवानपुर । हेटौडा राष्ट्रिय रन २०८० काे उपाधी मुकेश पालले हात पारेका छन् । उपाधीसँगै काठमाडाैका पालले ६० हजार नगद प्राप्त गरे ।
हेटौंडा उपमहानगरपालिकाको सहयोग तथा नगर खेलकुद बिकास समितिको आयोजनामा शुक्रबार भएकाे प्रतियोगितामा निर्धारित ५ किलोमिटरको दुरी १५ मिनेट २२ सेकेन्डमा पार गरी पाल प्रथम भएका हुन् । विगत वर्षमा हेटौडा रनमा सिमित हुँदै आएकाे प्रतियाेगिता यस वर्षबाट राष्ट्रिय रुपमा संचालन गरिएकाे हाे । १८ जिल्लामा ९२ जना प्रतिस्प्रर्धिलाई पछि पार्दै पालले उपाधि हात पार्दा जुम्लाका दुर्गाबहादुर बुडा द्वितीय भए । उनले १५ मिनेट २४ सेकेन्डमा निर्धारित दुरी पार गर्दै नगद ५० हजार रुपियाँ प्राप्त गरे ।
प्रतियाेगितामा तेस्रो स्थान काठमाडौंका सञ्जय श्रेष्ठ हुँदा टंक कार्की र नागेश्वर ऐरीले सान्त्वना पुरस्कार प्राप्त गरेका थिए । श्रेष्ठले ३० हजार, कार्की र ऐरीले सन्त्वना स्वरुप नगद १०/१० हजार प्राप्त गरेका छन् । प्रतियोगितामा सहभागी ९२ जना मध्ये हेटौंडा–२ का ६९ बर्षीय प्रेमजी श्रेष्ठलाई सम्मान गरिएकाे हाे । जेष्ठ उमेरमा पनि खेल प्रतिको लगाब र लगनशीलताका लागि सम्मन गरिएकाे आयोजकले जनाएकाे छ ।
प्रतियोगितामा विजयी भएका धावकहरूलाई नगरप्रमुख मिनाकुमारी लामा, उपप्रमुख राजेश बाँनिया, प्रमुख प्रशासकीय अधिकृत शिवराज चौलागाई, नगर खेलकुद बिकास समिति अध्यक्ष रविन्द्र घिमिरेलगायतले नगद पुरस्कार, प्रमाणपत्र र मेडल प्रदान गरेका थिए। प्रतियोगिता बुद्धचोकबाट सुरु भई पुनः बुद्धचोकमा सकिएको थियो।
मकवानपुर । बागमती प्रदेश सभाकाे विहीबारकाे पहिलाे बैठकबाट विशेष समिति गठन गरिएको छ । प्रतिपक्ष दलहरुसँग भएकाे सहमती कार्यान्वयनकाे लागि विशेष समिति गठन गरिएकाे हाे ।
मुख्य प्रतिपक्ष दल नेकपा एमालेलगायतका प्रतिपक्ष दलहरुसँग भएकाे सहमती कार्यान्वयनकाे लागि सर्वदलीय बैठकहरुबाट सहमती जुट्न नसकेपछि विवाद समाधान गर्न विशेष समिति गठन गरिएको छ । बजेट विनियाेजनकाे सहमति कार्यान्वयनका साथै संसद्को गतिरोध अन्त्यका लागि विशेष समिति गठन गरिएकाे बताइएकाे छ । संसद्को बैठकले प्रदेशसभा नियमावली २०७४ पहिलो संशोधनको नियम १५२ बमोजिम विशेष समिति गठन गरेको हो ।
आर्थिक वर्ष २०८०/०८१ को बजेट समानुपातिक नभएको भन्दै विपक्षी दलहरूले विरोध गर्दै आएका थिए । विपक्षी दलहरूको विरोधपछि गत असार १८ गते सरकारले बजेट पारित गर्न प्रतिपक्ष दलहरूसँग सहमति गरेको थियो । विपक्षी दलका सांसदहरूले दिएका योजना समावेश गर्ने गरी भएकाे सहमति कार्यान्वयन नगरेको भन्दै विपक्षी दलहरूले प्रदेश सभा अवरुद्ध समेत गर्दै दबाब दिदै आएका थिए ।
प्रतिपक्ष दलहरुले प्रदेश सभाकाे वर्षे अधिवेशका आधा दर्जन बैठक अवराेध गरेका थिए । वर्षे अधिवेशन सकिएकाे करिब ५ महिनापछि गत मंगलबार प्रदेश सभाकाे हिउँदे अधिवेशनकाे पहिलाे बैठक बसेकाे थियाे । मंगलबारकाे बैठक सञ्चालनका लागि सर्वदलीय बैठकहरु भए पनि निष्कर्ष विहिन रहे । विहीबार संसदीय समिति गठन गर्ने सहमति गरेसँगै संसद् बैठक सञ्चालन भएकाे हाे ।
नेकपा माओवादी केन्द्र बागमती प्रदेश संसदीय दलका प्रमुख सचेतक रत्नप्रसाद ढकालको पेस गरेको विशेष समिति गठन सम्बन्धी प्रस्तावलाई नेपाली कांग्रेस संसदीय समितिका सचेतक गोविन्द लम्साल, नेकपा एमाले संसदीय दलका मुख्य सचेतक मधुसूदन पौडेल र राप्रपाका सांसद राजेन्द्र प्रजापतीले समर्थन गरेका थिए । समिति गठन सम्बन्धी प्रस्ताव सर्वसम्मत स्वीकृत भएको हाे ।
समितिमा नेकपा माओवादी केन्द्र, नेकपा एकीकृत समाजवादी, नेकपा एमाले, राप्रपाबाट २–२ जना र हाम्रो नेपाली पार्टीबाट एक जना सांसद सदस्य रहनेछन् । नेमकिपाले भने उक्त समितिमा सहभागिता जनाएकाे छैन । समितिको संयोजकमा सत्तापक्ष नेपाली कांग्रेस बागमती प्रदेश संसदीय दलका सचेतक गोविन्द लम्साल रहेका छन् । यसैगरी समितिको सदस्यहरुमा कांग्रेसका प्रभात तामाङ, नेकपा एकीकृत समाजवादीका रमा आले मगर, वसन्त मानन्धर, नेकपा माओवादी केन्द्रका रत्न प्रसाद ढकाल, इन्द्रप्रसाद गोतामे र हाम्रो नेपाली पार्टीबाट संसदीय दलका नेता शैलेन्द्रमान बज्राचार्य रहेका छन् ।
प्रमुख प्रतिपक्ष दल नेकपा एमालेकाे तर्फबाट समितिको सदस्यमा मधुसूदन पौडेल, दिनेशचन्द्र देवकोटा तथा प्रतिपक्ष दल राप्रपा संसदीय दलका नेता उद्धव थापा, गिर बहादुर तामाङ रहेका छन् । ११ सदस्यीय समितिको काम कारबाही निर्धारण गर्ने कार्यविधि आफैले तोके बमोजिम हुने व्यवस्था गरिएको छ । समितिले आगामी फागुन २९ गते दिउँसो ३ बजे बस्ने बैठकमा प्रतिवेदन पेस गर्ने गरी समयसीमा ताेकिएकाे छ ।
यसैगरी प्रदेश सभाकाे पहिलाे बैठकमा उद्योग वाणिज्य भूमि तथा प्रशासन मन्त्रालयबाट संसदमा दर्ता भएको प्रदेश हस्तकला ग्राम स्थापना सम्बन्धी विधेयक पेस गरिएको थियो । उक्त विधेयक पेश भएसँगै पश्चात १५ मिनेटका लागि स्थगित गरिएको प्रदेशसभा बैठककाे दाेस्राे बैठक बसेको थियो । सो बैठकमा संसदमा पेस भएको प्रदेश हस्तकला ग्राम स्थापना सम्बन्धी विधेयकको सैद्धान्तिक छलफल भएको थियो । विधेयकमाथि सांसद शैलेन्द्रमान बज्राचार्यले मात्र विधेयक माथिको छलफलमा भाग लिएका थिए । विधेयक माथि उठेका प्रश्नको जवाफ मन्त्री चित्रकारले दिएका दिए ।
छलफल पश्चात् मन्त्री चित्रकारले उक्त विधेयकलाई विचार गरियोस् भन्ने प्रस्ताव संसदमा पेस गरेका थिए । मन्त्री चित्रकारले पेस गरेको उक्त विधेयकलाई विचार गरियोस् भन्ने प्रस्तावलाई सभामुख पाठकले निर्णायार्थ पेस गर्दा सर्वसम्मतिले स्वीकृत भएकाे हाे ।
उक्त विधेयक स्वीकृत भएसँग प्रदेशसभाको बैठक फागुन २९ गतेसम्मका लागि स्थगित गरिएको सभामुख भुवन कुमार पाठक जानकारी दिए ।
मकवानपुर । मकवानपुरकाे बकैया गाउँपालिकालाई मौरीपालन पकेट क्षेत्रकाे रुपमा विकास गरिने भएकाे छ । कृषिको विकासलाई प्राथमिकता दिँदै आएको गाउँपालिकाले मौरीपालन पकेट क्षेत्रको रुपमा विकास गर्ने तयारी थालेको हाे ।
मौरीपालनको सम्भावना रहेको क्षेत्रका किसानलाई पालिकाले मौरीको घार वितरण गरेर पकेट क्षेत्रकाे विकास गर्न सुरु गरेकाे हाे । बकैयाकाे वडा नम्बर ११ स्थित आहालेमा आइतबार पालिकाको वडा नम्बर १०, ११ र १२ किसानलाई १ सय ३३ वटा मौरीको घार वितरण गरेको हो । गाउँपालिकाले यसअघि वडा नम्बर ११ र १२ का किसानलाई लक्षित गरी एक हप्ते मौरीपालन सम्बन्धी तालिम दिएकाे थियाे ।
पालिकाले सेरेना जातको मौरीपालनको लागि ६ लाख ६५ हजार रुपियाँ बराबरको मौरी घार वितरण गरेको छ । मौरीकाे घार वितरण गर्दै बागमती प्रदेशका उद्योग, वाणिज्य, भूमि तथा प्रशासनमन्त्री रामकृष्ण चित्रकारको कृषि ग्राम निर्माणलगायतका कृषि क्षेत्रमा बकैया गाउँपालिकाले गरेको लगानीको प्रसंशा गरे । रोजगारी देश विकासको आधार भएको बताउँदै रोजगारीका लागि उद्यमशीलता आवश्यक भएको उनले बताए ।
‘सडक, विजुली, विद्यालयको भवनमा निर्माणलगायत भौतिक पूर्वाधार विकाससँगै दैनिकी चलाउन आर्थिक श्रोत आवश्यक पर्छ’मन्त्री चित्रकारले भने ‘उद्यमशीलता र रोजगारीबाट आर्थिक उपार्जन गर्न सकिने भएकाेले त्यसकाे लागि अग्रसर रहनु पर्ने बताए । लगानी भएपछि त्यसको उपलब्धी हुने गरी विकासको कार्य गर्न आवश्यक रहेको उनले बताए । आयआर्जनका लागि उद्यमशीलता, व्यवसायीकरण पनि आवश्यक भएकोले कृषिलाई उद्योगका रुपमा विकास गर्नु अहिलेकाे आवश्यकता भएकाे उनकाे भनाई थियाे ।
यसैगरी बागमती प्रदेश सभा सदस्य श्रीराम लामिछानेले कृषिमा आधुनिकीकरणसँगै व्यावसायीकरण समेत आवश्यक भएको बताउँदै कृषि उत्पादनलाई बजारसम्म पु¥याउन प्रदेश सरकारले सहयोग गर्ने बताए । ‘प्रदेश सरकारले कृषि उद्यमशीलतालाई जोड दिएको छ’ लामिछानेले भने ‘स्थानीय तहलाई बजेट उपलब्ध गराउने र स्थानीय तहले पकेट क्षेत्र बनाएर उत्पादनमा जोड दिनुपर्ने हुन्छ ।’

कार्यक्रममा बकैया गाउँपालिकाका अध्यक्ष धर्मराज लमिछानेले बकैयामा मौरीपालनको राम्रो सम्भावना रहेको अध्ययनले देखाएको बताए । उनले किसानको आयआर्जन वृद्धिमा सहयोग गर्दै आत्मनिर्भर बनाउन पालिकाले मौरी घार उपलब्ध गराएको जानकारी दिए । पालिकाका किसानले उत्पादन गर्ने कृषिजन्य उत्पादनको बजारीकरणका लागि पालिकाले सहजीकरण गर्ने उनले बताए । ‘कृषकलाई प्रोत्साहित गर्न मौरीको घार वितरण गरेका छौ’ अध्यक्ष लामिछानेले भने ‘तपाईहरु उत्पादन गर्नुहोस् म तपाईहरुले उत्पादन गरेको मह बजारीकरणको लागि व्यवसायीसँग समन्वय र सहकार्य गर्छु।’
उत्पादन भएको महका लागि बजारको समस्या नहुने उनले जानकारी दिए । किसानलाई कृषि क्षेत्रमा प्रोत्साहन गर्न पालिकाले विभिन्न कार्ययोजना अघि सारेको बताउँदै लामिछानेले मौरी घार वितरण गरिएको क्षेत्रमा फलफूलका बिरुवा समेत वितरण गर्ने योजना रहेको जानकारी गराए ।गाउँपालिकाका प्रमुख प्रशासकीय अधिकृत महेश श्रेष्ठ र कृषि ईन्जिनियर बुद्धिनाथ तिमिल्सिनाले मौरी पालनबाट राम्रो आम्दानी लिन सकिने बताउँदै पालिकाले कृषिमा लगानीलाई प्राथमिकतामा राखेर काम गरिरहेको बताए ।
कार्यक्रमका बकैया १० नम्बर वडा वडाध्यक्ष कमला कुमारी वाईबा, ११ नम्बर वडा अध्यक्ष गोपाल न्यासुर लामा, १२ नम्बर वडा अध्यक्ष ज्ञानेन्द्र बजगाई, गाउँपालिकाका कृषि अधिकृत सचित रिजाललगायतकाे उपस्थिति रहेको थियो ।
मकवानपुर । मकवानपुरको हेटौंडामा खुल्ला राष्ट्रिय पुरुष हेटौंडा रन प्रतियोगिता हुने भएको छ ।
हेटौंडा उपमहानगरापालिकाको सहयोग र नगर खेलकुद बिकास समितिको व्यवस्थापनमा फागुन १८ गते प्रतियोगिता सञ्चालन हुने आईतबार पत्रकार भेटघाट गरी जानकारी दिइएको हो । गत वर्षमा जिल्ला स्तरीय प्रतियोगितामा सिमित रहेको हेटौंडा रनलाई यस बर्ष पहिलो पटक राष्ट्रिय प्रतियोगिताको रुपमा सञ्चालन गर्न लागिएको नगर खेलकुद विकास समिति अध्यक्ष रबिन्द्र घिमिरेले जानकारी दिए ।
हेटौडा रन प्रतियाेगिता ५ किमिकाे हुनेछ । हेटौंडाको बुद्धचोकबाट हेटौंडा–५ पिप्ले पुगि पुनः बुद्धचोकमा फर्किएर दौडपुरा हुने बताइएकाे छ ।दौडमा १६ बर्ष उमेर पुरा भएका नेपाली नागरीक सहभागी हुन पाउने छन् । प्रतियोगितामा प्रथम, द्वितीय, तृतीय हुनेले क्रमश: ६० हजार, ५० हजार, ४० हजार रुपैयाँ पुरस्कार प्राप्त गर्ने खेलकुद शाखा प्रमुख बसन्त सिटौंलाले जानकारी दिए ।
यसैगरी प्रोत्साहन स्वरुप दुई जना १०/१० हजार रुपियाँ सान्त्वना पुरस्कार प्रदान गरिने सिटौंलाले बताए । उनका अनुसार प्रतियोगितामा सहभागी हुनेले फागुन १८ गते विहानसम्म नाम दर्ता गर्न सक्नेछन् । करिब ४ लाख रुपैयाँ लागत अनुमान गरिएको प्रतियोगितामा १ सय जनाको सहभागिता रहने अनुमान आयोजकले गरेको छ ।