पशुपति,पोताला,सक्षम,न्यु डाँफे,परेली र हेटौडा एकेडेमी विजयी
Tags: No Comments
मकवानपुर । मकवानपुरकाे हेटौडामा जारी मकवानपुर जिल्ला लिग फुटबल प्रतियोगितामा शुक्रबार ६ खेल भए । मकवानपुर जिल्ला फुटबल संघको आयोजना भएकाे प्रतियोगिता अन्तरगत शुक्रबारकाे खेलमा पशुपति युवा क्लब, एफसी पोताला, सक्षम, न्यु डाँफे, परेली र हेटौडा फुटबल एकेडेमी विजयी भएका छन् ।
बिहीबार वर्षाका कारण भएका २ खेलहरु शुक्रबार बिहान हेटौंडा ६ स्थित गौरीटार रंगशाला र हेटौंडा–११, स्थित सिमलटार मैदानमा खेलाइएकाे थियाे । सिमलटार मैदानमा भएको खेलमा एफसी चाइना क्वाटरलाई १–० गोलअन्तरले हराउँदै पशुपति युवा क्लब विजयी भयाे । यसैगरी गौरीटार रंगशालामा भएको खेलमा विजय युथ क्लबलाई ५–३ ले हराउँदै एफसी पोताला विजयी भयाे ।
यसैगरी शुक्रबार गौरीटार रंगशालामा भएकाे खेलमा सक्षमले एफसी ईन्टरनेटलाई २-० गोल अन्तरले पराजीत गरेकाे छ भने न्यु डाफेले एफसी ईन्टरनेट सिटिलाई ५-१ ले पाखा लगाएकाे छ । शुक्रबार नै सिमलटार मैदानमा भएकाे खेलमा परेली युवा क्लबले हेटौंडा भेट्रान्सलाई ६ -० ले पराजीत गरेकाे छ भने हेटौंडा फुटबल एकेडेमीले महावीर क्लबलाई १-० गोल हराउँदै जीत हात पारेकाे छ ।
यस्तै शनिबार जिल्ला लिग अन्तरगत ४ खेल हुनेछ । गौरीटार रंगशालामा २ खेल तथा सिमलटार मैदानमा २ खेल हुने आयोजकले जनाएकाे छ । गौरीटार रंगशालामा पहिलाे खेल दिउँसाे १ बजे पदमपोखरी युथ क्लब र सानाेपाेखरा क्लब बीच हुनेछ भने दाेस्राे खेल दिउँसाे ४ बजे ७ नम्बर फुटबल क्लब र एफसी मल्टिभिजन बीच हुनेछ । यसैगरी सिमलटारमा दिउँसो १ बजे रियल स्टार र गोर्खा व्वाइज बीच तथा दिउँसो ४ बजे न्यु कम्बाइन र एफसी नामटार बीच हुने आयोजकले जनाएकाे छ ।
१४ भदौबाट सुरु लिगको प्रतियोगिताको फाइनल खेल असोज ९ गते हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्नेछन् । जिल्लामा रहेका २८ वटा क्लवलाई वर्गीकरण गर्ने गरी जिल्ला लिग सुरु गरिएको हो । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन गरिएकाे हाे ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्र्पोटर्स एकेडेमी उपविजेता बनेको थियो।
मकवानपुर । मकवानपुरको हेटौंडा उपमहानगरपालिका ११ थानाभर्याङमा म्याजिक भ्यानले मोटरसाइकललाई ठक्कर दिंदा १ जनाको मृत्यु भएको छ ।
शुक्रबार बेलुका पूर्व पश्चिम राजमार्ग अन्तर्गत थानाभर्याङ राप्तिपुल नजिकै नवलपुरबाट हेटौडा बजार तर्फ आउदै गरेको ना १५ प ४१५७ नम्बरको मोटरसाइकललाई हेटौडा बजारबाट नवलपुर तर्फ जादै गरेको बागमती प्रदेश ०३-००१ज ०२५७ नम्बरको म्याजिकले ठक्कर दिएको थियो ।म्याजिकको ठक्करबाट मोटरसाइकल चालक हेटौडा – ११ थानाभर्याङ बस्ने २६ वर्षीय श्रीराम परियारको मृत्यु भएको जिल्ला प्रहरी कार्यालयले जनाएको छ ।
म्याजिकको ठक्करबाट टाउको र खुट्टामा चोट लागि घाईते भएका श्रीरामको उपचारको क्रममा मृत्यु भएको प्रहरीले जनाएको छ। माेटरसाइकललाई ठक्कर दिए लगत्ते उक्त म्याजिक ना १ ज ८१३१ नम्बरको म्याजिकमा समेत ठोक्किएको प्रहरीले जनाएको छ। उक्त घटनामा अन्य सबै सकुशल रहेको र दुई वटै म्याजिक, चालक र माेटरसाइकललाई प्रहरीले नियन्त्रणमा लिएको छ।
मकवानपुर । आज भाद्र शुक्ल तृतीया अर्थात हरितालिका तीज पर्वकाे दोस्राे दिन । हिन्दु नेपाली महिलाहरूले हरितालिका तीज पर्व हर्षोल्लासका साथ मनाउँदै छन् । भाद्र शुक्ल तृतीयाका दिनमा मनाइने हरितालिका तीज पर्व आज देवादिदेव महादेवको पूजा आराधना गरी मनाइँदैछ ।
भाद्र शुक्ल द्वितीयाको दिन दर खाएर सुरु हुने तीज पर्व ४ दिनसम्म मनाइन्छ । तीजमा व्रत बस्न सहज होस् भन्ने उद्देश्यले अघिल्लो दिन दर खाने परम्परा रहेको छ । भाद्र शुक्ल तृतीयाका दिन हरितालिका व्रत, चौथीका दिन गणेश भगवानको पूजा र पञ्चमीका दिन स्नान गरी अरुन्धतीसहित सप्तऋषिको पूजा गरी तीज पर्व समापन गरिन्छ ।
भाद्र शुक्ल तृतीयामा व्रत बसी शिव पार्वतीको पूजा, उपासना गरेमा पारिवारिक सुख, शान्ति र कल्याणको प्राप्ति हुने धार्मिक विश्वास छ ।धर्मशास्त्र अनुसार महिला र पुरुष दुवैले हरितालिका(तीज) को व्रत गर्नुपर्ने भए पनि प्रायः महिलाहरुले मात्रै व्रत वस्ने गरेका छन् । व्रत गर्ने पुरुषले विधुर हुनु नपर्ने, नारीले अटल सौभाग्य र अविवाहित पुरुष, महिलाले गुण सम्पन्न वर वा वधु पाउने शास्त्रीय वचन रहेको धर्मशास्त्रविद् बताउछन् ।
संस्कृत भाषाका ‘हरित’ र ‘आलिका’ दुई शब्द मिलेर हरितालिका शब्द बनेको छ । जसमा ‘हरित’ शब्दको अर्थ हरण गरिएको र ‘आलिका’ शब्दको अर्थ साथी भन्ने हुन्छ । सत्ययुगमा आजैको दिन नीराहार व्रत बसी पार्वतीले महादेव स्वामी पाएकोले आजको दिनमा व्रत बस्दा मनोकामना पूरा हुने विश्वास छ । तर यसको अर्थ सबै नारी नीराहार व्रत बस्नुपर्छ भन्ने नरहेको धर्मशास्त्रविद् बताउँछन् ।
सत्ययुगमा हिमालय पुत्री पार्वतीले गौरीघाटमा बसी तपस्या गरेर महादेवलाई पति पाउने वरदान पाएको विश्वासमा यो व्रत सुरु भएको पौराणिक मान्यता छ । वरदान विपरीत पिता हिमालयले पार्वतीको इच्छा विपरीत विष्णुसित विवाह गरिदिन खोजेपछि साथीहरूलाई आफ्नो समस्या सुनाइन् । पार्वती समस्यामा परेको थाहा पाएपछि उनका साथीहरूले हरण गरेर लगी कसैले नदेख्ने ठाउँमा लुकाएर राखिदिए । साथीहरूले लुकाएकै ठाउँमा पार्वतीले निराहार व्रत गरी महादेवलाई पतिका रूपमा प्राप्त गरिन् । यसरी पार्वती साथीहरूद्वारा हरण भएको दिन भाद्र शुक्ल तृतीयाको दिन भएकाले त्यही समयदेखि हरितालिका (तीज) को व्रत लिने प्रचलन सुरु भएको धर्मशास्त्रीय मत छ ।
“निराहार, जलाहार र फलाहार गरी व्रतका तीन किसिम छन् । सक्नेले निराहार, नसक्नेले जलाहार र जलाहार पनि नसक्नेले फलाहार व्रत बस्नु उत्तम हुने बताइन्छ । स्वास्थ्य ठीक नहुनेले गहुँको रोटी, मकैको रोटी, स्याउ, सुन्तला, केरा जस्ता फलाहार गरेर पनि व्रत बस्न सकिने धर्मशास्त्रविद् बताउँछन् ।
समग्रमा मनोकामना पूर्ण गराउने र सम्पूर्ण परिवारको कल्याणका लागि यो व्रतको प्रयोजन रहेको धार्मिक मान्यता छ । आत्मावादी र ईश्वरवादी दुवैले यो व्रत लिने गरेका छन् । समग्रमा परिवारको यस लोकमा सुख, शान्ति र पारलौकिक सद्गतिका लागि तीजको व्रतको महत्त्व छ । व्रत सकाम, निष्काम, नित्य, नैमित्तिक, र काम्य गरी पाँच किसिमका छन् । तीजको व्रत नित्य र काम्य दुवै खालको भएको धर्मशास्त्रीय मान्यता छ । तीजको व्रत हिन्दु मात्रका लागि नभई मानव मात्रका लागि भएको कुरा धर्मशास्त्रीय ग्रन्थहरूमा उल्लेख गरिएको छ ।
मकवानपुर । हरितालिका तिजको मौलिकतालाई कायम राख्दै यसको सांस्कृतिक महत्वको जगेर्ना गर्न यो पर्व मनाउने सन्दर्भमा देखिने गरेको भड्किलोपन र खर्चिलोपनलाई हटाउँदै जानु आवश्यक रहेकाे बागमती प्रदेशका प्रदेश प्रमुख दीपकप्रसाद देवकाेटाले बताएका छन् । नेपाली महिलाको महान् पर्व हरितालिका तिज २०८१ को पावन अवसरमा शुभकामना सन्देश दिंदै उनले यस्ताे बताएका हुन् ।
‘तीजकाे अवसरमा स्वदेश तथा विदेशमा रहनु भएका सम्पूर्ण नेपाली दिदी बहिनीहरूमा पारिवारिक सुख, शान्ति र समृद्धिकाे शुभकामना व्यक्त गर्दछु’ उनले सन्देशमा भनेका छन् । हरितालिका तिजलाई नेपाली महिलाले एक सनातन सांस्कृतिक पर्वको रूपमा मनाउँदै आएका छन् । ‘भाद्र शुक्लपक्ष तृतीया तिथीका दिन पर्ने यस पर्वको अवसरमा सम्पूर्ण दीदी, बहिनीहरुमा सुख, शान्ति, समृद्धि, सुस्वास्थ्य एवं दीर्घायुको कामना गर्दछु’ प्रदेश प्रमुख देवकाेटाले भनेका छन् ‘यस्ता सांस्कृतिक पर्वहरूले सबै नेपालीहरूको बिचमा विविधतामा एकता, धार्मिक सहिष्णुता तथा सामाजिक सद्भाव कायम गर्न सहयोग पु-याइरहेका छन् ।’
उनले शुभकामना सन्देशमा भनेका छन् ‘हरितालिका तिजले सम्पूर्ण नेपाली महिलाहरुलाई समाजमा विद्यमान लैंगिक विभेद, जातीय विभेदलगायत सबै प्रकारका असमानताहरूको अन्त्य गर्दै समतामूलक प्रगतिशील समाजको निर्माणतर्फ अग्रसर हुन उत्प्रेरित गर्न सकोस् भन्ने शुभेच्छा व्यक्त गर्दछु । मौलिक संस्कृति र परम्पराहरूलाई संरक्षण तथा प्रवर्द्धन गर्ने गरी यो चाड मनाउनु हुनेछ भन्ने आशा गर्दछु ।’
- सिम्रन क्षेत्री
हरितालीका तीज नेपालको एक विशेष पर्व हो र विशुद्ध रुपमा नेपाल र उत्तर भारतमा मनाइने महिलाहरुको चाड हो भनिएता पनि तीज भारतमा भन्दा नेपालमै बढि चल्दै आएको र मान्दै आएका छन् भन्न पनि सकिन्छ। यो पर्व नारीहरुले समृद्धि, दाम्पत्य जीवन र पतिको दिर्घायुको कामना गर्ने पर्व हो। यस पर्वले एउटा छुट्टै इतिहास बोकेको छ । नेपाली क्यालेण्डर अनुसार तीज पर्व भाद्र शु्क्ल पक्षको तेस्रो दिन हिन्दु महिलाहरुले भगवान शिवको पूजा अर्चना गरी व्रत बसी नाचगान गरी मनाउने गर्दछन् ।
जुन सामान्यतया अंगे्रजी क्यालेण्डर अनुसार सेप्टेम्वरको सुरु वा अगस्टको अन्त्यमा पर्दछ । मनसुनलाई स्वागत गर्न तीन दिन सम्म यस पर्व मनाउने गरीन्छ भन्ने पनि प्रचलन छ । गणेश चर्तुथी र ऋषि पन्चमी पनि तीजको अंगको रुपमा मानिन्छ । तीज शब्दको शाब्दिक अर्थ वर्षायाममा माटोबाट निस्कने रातो रङको किरा हो । सोहि किराबाट पर्वको नाम रहन गएको हो भन्ने किम्बदन्ति रहेको छ । त्यसै कारण रातो रङ सहित तीज मनाईने गरिन्छ भन्ने जनविश्वास पनि रहेको छ । अन्य चार्डपर्वहरु जस्तै यस तीज पर्वको पछाडी पनि विभिन्न पौराणिक मान्यता तथा सन्दर्भहरु जोडिएको पाइन्छ ।
शिव पुराण अनुसार, तीज पर्व हिमाल पुत्रि पार्वतीको प्रसङ्ग सँग जोडिएको छ । परापुर्वकालमा हिमालय पुत्रि पार्वतीले भगवान शिवलाई पतिदेवको रुपमा प्राप्त गर्न सकुँ भनि घोर तपस्यामा तल्लिन भइन् तर उनको यो तपस्या पुरा हुन सकेन । तपस्या सफल हुन नसकेपछि । जगतका पालनकर्ता भगवान विष्णुलाई आफ्नो तपस्यामा केहि कमिकमजोरी भएर होकि ! अथवा पूजा विधि नजानेर होकि ! कसरी तपस्या गर्नाले सफल भइन्छ भन्ने कुरा थाहा पाउनका लागि उनले भगवान विष्णुको प्राथना गरीन् । भगवान विष्णुलाई, शिवलाई प्राप्त गर्न के कस्तो व्रत, उपसना, पुजा विधिका सम्बन्धमा बताइदिनका लागि विन्ति चढाइन् ।
त्यसपछि भगवान विष्णुले पार्वतीलाई सम्पूर्ण पूजा विधि बारे जानकारी दिए । हरिले दिएको तालिका अनुसार गर्ने पूजा भएका कारण पनि यस पर्वलाई हरि तालिका तीज भनिएको हो भन्ने कथन रहेको छ । त्यस्तै, श्रीमद्भागवत महापुराणको प्रसङ्ग अनुसार भाद्र कृष्ण अष्टमीको दिन श्री कृष्णको जन्म भएको थियो । श्री कृष्णको जन्म भएको एघारौँ दिन नामाकरणको दिन गोकुलका गोपिनिहरुले बाजागाजा सहित नाचगान गरी खुशियाली साटासाट गरेर उत्सव मनाए । यसकारण पनि तीजमा महिलाहरु नाचगान गरी खुशियाली साटासाट गरेको सन्दर्भमा तीजमा महिलाहरुले नाचगान गर्ने पर्वको थालनी भएको प्रचलन पनि रहेको छ ।
त्यस्तै गरी, राजा हिमालयले आफ्नी छोरी पार्वतीको कन्यादान श्री विष्णु सँग गरीदिने वचन पार्वतीलाई मन नपरे पछि आफुले मन पराएको वर पाउन जङ्गलमा गएर शिवजीको तपस्या गर्न थालिन । पार्वतीले तपस्या गरेको एक सय वर्ष पुरा भइसक्दा पनि आफुले चाहेको फल नपाउँदा एक दिन उनले शिवलिङ्गको स्थापना गरिन पानी पनि नपिइकन निराहर व्रत बसिन् । यसरी पार्वतीको कठोर व्रतको कारण शिवजी प्रकट भई चिताएको कुरा पुगोस् भनि आर्शिवाद दिएपछि शिव पार्वतीको विवाह हुन पुग्यो । त्यो दिन भाद्र शुक्ल तृतीयाको दिन थियो । यसै तिथी देखी हिन्दु नारीहरुले यस दिनलाई उत्सवको रुपमा मनाउन थालेको पाइन्छ भन्ने कथन रहेको छ ।
यस पर्वमा विवाह गरेर पराइ घर गएका छोरीचेलीहरुलाई माईत ल्याइने प्रचलन रहेको छ । यस हरितालीका तीजमा महिलाहरुले पराइ घरको विभिन्न जिम्मेवारी तनावको साथसाथै दुःख र पिडालाई बिर्सने र एक आपसमा दुःख सुःख साटासाट गर्ने, मिठा मिठा परीकारहरु खाने तथा नाचगान गर्ने गरिन्छ । पुराना भाका र शैलीका गीतहरु गाउने ति गीतका भाकाहरुको माध्यमबाटै मनको वह पोख्ने तथा समाजमा घटेका घटनाहरुलाई गीतको माध्यमबाट प्रकट गर्ने गरीन्छ । महिलाहरु स्वतन्त्र भएर रमाउन पाउने अवसरको रुपमा पनि यस पर्वलाई लिइन्छ । शिव पार्वतीको पूजा अर्चना गर्ने, श्रिङ्गार गर्ने, दर खाने जस्ता कृयाकलापहरु यस पर्वमा समावेश छन् । अनदिको लट्ट, तिलको छोप हालिएको करेलाको अचारलाइ यस पर्वको विषेश परीकारको रुपमा लिइन्छ ।
धार्मिक महत्व अनुसार, हरितालिका तीज भाद्र शुक्ल तृतीयाका दिन मनाइन्छ । द्वितिया तिथिका राति दर खाइ्रन्छ । तीजका दिन अर्थात तृतीयाको विहान जलाशयमा गई स्नान गरी शुद्ध भई पानी पनि नपिइ निराहर भएर व्रत बस्ने प्रचलन रहेको छ । महिलाहरु शिव मन्दिर तथा ठूलो चौरमा भेला भई नाचगान गर्ने गर्दछन् । साँझमा शिवको पूजा गरी कन्यालाई टिका लगाई फलाहर गर्दछन् । भोलिपल्ट चौथीका दिन गणेश चतु्र्थी गरी व्रतको पालना गरेर खाना खाइन्छ ।
तीजको तेस्रो दिन पञ्चमिका दिन व्रतालु महिलाहरुले ३६५ वटा दत्तुनले दाँत माजेर माटोलेपन गरी स्नान गर्छन् । वैज्ञानिक खोज अनु्सार पनि दत्तुनलाई औषधिको रुपमा प्रयोग गरीन्छ । यस कारण पनि परापुर्वकाल देखि दत्तुनलाई हाम्रो जीवनमा समावेश गरेको पाइन्छ । परम्पारिक महत्व हिमालय पुत्रि पार्वतीबाट सुरु भएको तीजको परम्परा निकै पुरानो छ । हरितालीका तीजको व्रत सकिए पछि मनाइने पञ्चमीको परम्परागत महत्व भने फरक रहेको छ ।
चाहे विवाहित हुन् या अविवाहित हुन् सम्पुर्ण हिन्दु नारीले यो दिन आफ्ना लागी मनाउछन् । यो दिनलाई महिलाको रजस्वलासँग जोडेर हेर्ने परम्परा रहेको छ । युवतीहरु प्रथम रजस्वला पछि मात्र पञ्चमि पूजामा साविक ह्ुन्छन् भने विवाहित तथा प्रौढ एवम् महिलाहरु र रजस्वलाका वखत छुन नहुने चिज वा देविदेवतालाई भुलवस छोइएको भएपनि दत्तुन टोकेपछि सम्पूर्ण पाप पखालिने कुरामा विश्वास गर्छन । पञ्चमीको दिन ऋषिमुनी वशिष्ठ, कश्यप, विश्वामित्र, जमदग्नि, अत्रि गौतम र भारद्वाज ऋषिको पूजा गरी हलोले नजोतेको अन्नको भात र एक सुइरो भएर उम्रने कर्कलोको तरकारी तथा एकदलिए अन्न मात्र खाइन्छ । यस दिन श्रीमानले पकाएको भोजन खाए आपसी आत्मियता तथा सद्भाव बढ्ने विश्वास रहेको छ । तीज पर्वको परम्परागत महत्व सम्बन्धसँग जोडिएर आएको छ । सम्बन्ध सुधार गर्ने, यसलाई अझ प्रगाढ बनाउने तथा आपसमा भएका मनमुटावलाई प्रेममा बदल्ने पर्वको रुपमा मानिन्छ । अहिले पनि यसको आस्था र महत्व उत्तिकै रहेको छ ।
यस पर्वको सामाजिक महत्व पनि रहेको छ । नेपाल कृषिप्रधान मुलुक भएका कारण बालीनाली रोपीसकेपछि तीज फुर्सदको समयमा मनाईने पर्व हो । यस पर्वलाई आपसी प्रेम वढाउने पर्वको रुपमा पनि लिइन्छ । यो धार्मिक तथा र्सास्कृतिक महत्व वोकेको तीज पर्वले घर भित्र चुलोमा मात्रै रुमल्लीने महिलाहरुलाई बाहिर निस्कन प्रेरित गर्ने र आफ्नो दुःख सुःख अरु समक्ष पोख्न पाउने भएकाले पनि यस पर्वलाई नेपाली हिन्दु नारीहरुले धुमधामका साथ मनाउने गर्दछन् ।
यस पर्वले महिलाहरुको दुःख, वेदनाको पोकाहरुलाई फुकाउने वातावरण सिर्जना गरीदिन्छ । वालिनाली लगाईसकेपछि फुर्सदको समयमा बाबु दाजुभाई गएर छोरी चेलीलाई भेट्ने, माईती लिएर फर्कने चलन छ । जसलेगर्दा माईती र चेलीको आपसी संम्बन्धलाइ अझै बलियो बनाउन यस पर्वले ठूलो भुमिका खेल्दछ । विवाह भएर टाढा पुगेका दिदीवहिनीबिच भेट गराएर दुःख सुःख साटासाट अवसर पनि यस पर्वले जुराइदिन्छ ।
त्यस्तै, तीजमा प्रयोग हुने गहना र पहिरनको पनि आफ्नै महत्व रहेको छ । तीजका दिन महिलाले लगाउने रातो सारी सुःख समृद्धि एवम् साहसको प्रतिक मानिन्छ भने रातो रङले महिलालाई एक किसिमको शक्ति प्रदान गर्ने धार्मिक विश्वास रहेको छ । पोतेले शान्ति र आनन्द प्राप्त गर्छ भने रातो टिका सौभाग्यको प्रतिक हो भन्ने जनविश्वास रहेको छ ।
तर, आजभोली समय बित्दै जाँदा यि पवित्र पर्वहरु आधुनिकिकरणको नाउमा होटलमा भेला भएर एक महिना देखी पार्टी आयोजना गरी मदिरा सेवन गर्ने, नाचगान गर्ने एउटा नराम्रो विकृती भित्रिएको छ । त्यस्तैगरी आजभोली उत्श्रीङ्खल गीत गाउने तथा श्रीङ्गारको नाममा गरगहना प्रदर्शन गर्ने र नाचगानको नाममा अङ्ग प्रदर्शन गर्ने जस्ता भड्िकलो शैली अपनाएर दर खाने जस्ता विकृितले हाम्रो संस्कार र संस्कृतिका मुल्य मान्यतालाई घटाउदै गएको साथै लज्जित बनाउदै लगेको छ ।
साथै सामाजलाई दुषित बनाउँदै गएको हुनाले यस्ता नराम्रा विकृतिलाई हटाई हाम्रो रितिरिवाज, चाडपर्व, संस्कार संस्कृती सभ्यतालाई स्वच्छ बनाउन नितान्त आवश्यक छ । यधपि, अहिले हिन्दु महिलाहरुले मान्ने तीज अन्य समुदाय तथा अन्य जातीले पनि मनाउन थालेका छन् । यो हाम्रो लागि राम्रो पक्ष हो तर हिजोआज तिज केहि भड्किलो हँुदै गएको छ । तीजको रमझममा पनि आजभोली पश्चिमेली शैली भित्रीन पुगेको कारण तिज केहि उत्ताउलो हुनथालेको छ ।
यसलाई हामिले वेलैमा सुधार गर्नुपर्दछ र हाम्रो संस्कृतिलाई जोगाउन हामी सबैले आफ्नो – आफ्नो तर्फवाट हामीले सकेको सक्दो पहल गर्नुपर्छ । धार्मिक सांस्कृतिक, सामाजिक, वैज्ञानिक महत्व भएका यि चाडपर्वको रहस्य बुझेर सबैले सत्य तथा समानुचित ढङ्गले यिनको पालना गर्नु हामी सबैको कर्तव्य हो किनकी हाम्रा मूल्यमान्यता, संस्कार र संकृतिले हाम्रो देशलाई चिनाउँछ र हामीलाई चिनाउँछ ।