मकवानपुर । राष्ट्रिय युवा संघ नेपाल केन्द्रीय अध्यक्ष क्षितिज थेवेले युवा आन्दोलन मार्फत नेपालको राजनीतिलाई परिवर्तन गर्दै अहिलेकाे अवस्थासम्म ल्याउन अग्रणी भूमिका खेलेको संगठन राष्ट्रिय युवा संघ नेपाल भएकाे बताएका छन् ।
युवा संघ नेपाल जिल्ला समिति मकवानपुरकाे १० औ जिल्ला अधिवेशनलाई शुक्रबार सम्बोधन गर्दै उनले भने ‘मकवानपुरकाे अधिवेशनले जिल्लालाई नेकपा एमालेको लाल किल्ला बनाएर अगाडी बढ्न अहम् भूमिका खेल्नेछ।’ संस्थापक अध्यक्ष केपी शर्मा औली नेपालीको आशा र भरोसाको केन्द्र बिन्दु हुनुमा संघकाे नेतृत्व गर्दाकाे भूमिकाले भएकाे उनले बताए ।
‘एमालेकाे मिसन ८४ मा सफल हुन युवाहरुको नेतृत्वलाई प्राथमिकतामा राखिन पर्छ‘ थेवेले भने ‘हामीले पनि एक मन र एक मत बनाउदै एकता कायम गर्नु पर्छ ।’ युवाहरू बिदेशिनुमा राजनीति गर्नेहरु दाेषी देख्नेलाई लक्षित गर्दै उनले भने ‘१ करोड युवाहरु देशमै छन् ।’ जस्ले देशमा युवा छैनन् भन्छन् उनीहरुको सोच युवा मैत्री नभएकाे उनले बताए । ‘संगठनमा लागेपछि हामीले कति समय दिन सक्यौं भन्ने कुराले बढी महत्व राख्ने गर्छ’ उनले भने संगठकाे जोडिएर पदमा बस्दैमा साङ्गठनिक सदस्य भइदैन् ।’ हामीले लिएको संगठनको पद अनुसार समय दिन तयार रहनु पर्ने उनले बताए ।
उनले युवाहरुको अबकाे अभियान संविधान अनुसार देशलाई सुशासन र समृद्धिको बाटोमा अघि बढाउने हुनु पर्ने बताए । युवाकाे अभियानले आगामी दिनमा नेकपा एमालेलाई एकल बहुमतको पार्टी बनाउँछ भन्ने आशा बोकेको उनले बताए । । ‘युवाहरुलाई रोजगार, उद्यमशिलता, खेलकुद, मनोरञ्जन लगायत क्षेत्रमा जोड्न सके मात्र संगठन प्रती प्रतिवद्ध हुनेछन्’ उनले भने । ‘नयाँ नेपाल बनाउने, देशलाई समृद्ध बनाउने काम बिदेशीले गर्दैनन् राष्ट्रिय युवा संघ नेपालले गर्नेछ’ उनले भने ।
नेपालको राजनीति लाई स्थिरता दिनु नेकपा एमालेको प्रमुख उद्देश्य रहेकाेले पटकपटक को सरकार परिवर्तनले नेपाली जनता दुखी भएका बताउँदै थेबेले भने दिगो सरकार निर्माणको लागि संसदको ठुलो दलहरू मिलेर हालको सरकार निर्माण गरिएको हो ।’
शुक्रबार हेटौडा उपमहानगरपालिका १३ पदमपोखरीमा राष्ट्रिय युवा संघ नेपाल जिल्ला समिति मकवानपुरकाे १० औ जिल्ला अधिवेशन सुरु भएकाे हाे । अधिवेशन दुई दिनसम्म चल्ने बताइएकाे छ । अधिवेशनमा जिल्लाका २५० प्रतिनिधिले भाग लिएकाे आयोजक कमिटीले जनाएकाे छ । अधिवेशनले आगामी २ बर्षको लागि ६ पदाधिकारी सहित ७५ सदस्यीय जिल्ला कमिटी चयन गर्ने छ ।
हालका जिल्ला संयोजक नगरकाेटी अध्यक्षकाे आकांशी रहेका छन् । युवा संघ मकवानपुरकाे नेतृत्व लिन आफू तयार रहेको नगरकोटीले बताउँछन् । आफूलाई संगठनको जिम्मेवारी प्राप्त भएको अवस्थामा हरघरमा युवा संघको सदस्य बन्ने वातावरण बनाउने उनले बताए ।
केन्द्रीय अध्यक्ष थेबेलाई युवा संघले पदमपोखरी गुम्बाचोकमा स्वागत गरेपछि सुरु भएकाे झाँकीसहितको मोटरसाइकल र्याली बजार प्रवेश गराउदै कार्यक्रम स्थल पुगेकाे थियाे । र्यालीकाे व्यवस्थापन हेटौंडा १२, १३,१४ का संगठन तथा पार्टी नेतृत्वले व्यवस्थापन गरेकाे थियाे । उद्घाटन कार्यक्रममा सांस्कृतिक प्रस्तुति समेत रहेकाे थियाे ।
अधिवेशन जिल्ला संयोजक राजेश नगरकोटीको अध्यक्षता एवम् राष्ट्रिय युवा संघ नेपाल केन्द्रीय अध्यक्ष क्षितिज थेवेकाे प्रमुख आतित्थतामा भएकाे अधिवेशनमा नेकपा एमाले केन्द्रीय सदस्य तथा मकवानपुर जिल्ला इन्चार्ज रामेश्वर राना, नेकपा एमाले केन्द्रीय सल्लाहकार समिति सदस्य डोरमणी पौडेल, संघीय संसद सत्ता पक्ष मुख्य सचेतक महेश बर्तौला, युवा संघ केन्द्रीय उपाध्यक्ष महाराज गुरुङ, केन्द्रीय महासचिव सुमन पुरी , एमाले मकवानपुर अध्यक्ष श्रीधर पोखरेल लगायतकाकाे उपस्थिति थियाे ।
मकवानपुर । मकवानपुरकाे हेटौंडामा जारी तेस्रो संस्करणको रोटरी मकवानपुर पिप्ले क्याम्पा राष्ट्रिय भेट्रान्स फुटबल प्रतियोगिताको क्वार्टरफाइनल समीकरण पूरा भएको छ । शुक्रबार बिहान पहिलो चरणको अन्तिम एक खेल सम्पन्न भएसँगै प्रतियोगिताको क्वार्टरफाइनल समीकरण पूरा भएको हो ।
शुक्रबारकाे पहिलाे चरणकाे अन्तिम खेलमा वीरगञ्ज एकेडेमी भेट्रान्सलाई ४–१ गोलले हराउदैं पोखराको बगरभाइ भेट्रान्सल क्वार्टरफाइनलमा प्रवेश गरेकाे छ । बिहीबारकाे खेल वर्षाकाे कारण राेकिएपछि शुक्रबार खेलाइएकाे थियाे । यस अघि बिहीबार भएकाे नव जनजागृति भेट्रान्स, सिमराले सानो गौचरण नाईट किङ भेट्रान्सलाई ४–३ गोल अन्तरले पाखा लगाउँदै क्वाटरफाइनल प्रवेश गरेको थियाे । निर्धारित समयमा दुबै टाेलीबाट २–२ गोलकाे बराबरी भएपछि खेलकाे निर्णय टाइब्रेकरबाट लिइएकाे थियाे । टाइब्रेकरमा नव जनजागृतिले सानो गौचरणलाई ४-३ ले पराजित गरेको हो ।
यो सँगै शुक्रबार दिउँसोबाट दोस्रो चरणका खेल हुने आयोजकले जनाएकाे छ । प्रतियोगिता अन्तर्गत सेमिफाइनल प्रवेशका लागि शुक्रबार दुई खेल हुँदै छ । हेटौंडा–५, पिप्लेस्थित पिप्ले क्याम्पा रंगशालामा हुने पहिलो खेल पुर्वेली भेट्रान्स क्लब झापा र सिमरा भेट्रान्स बारा बीच हुनेछ भने दोस्रो खेल चितवन भेट्रान्स क्लब र फ्रिडम फाइटर भेट्रान्स काठमाण्डौं बीच हुनेछ ।
३१ भदौ गतेसम्म सञ्चालन हुने प्रतियोगिताको १५ टिमले सहभागिता जनाएका छन् । जलन प्राथमिक उपचार केन्द्र निर्माण सहयोगकाे लागि आयोजना गरिएकाे प्रतियोगिताको विजेताले २ लाख २ हजार २२२ रुपैयाँ र उपविजेताले एकलाख १ हजार १११ रुपैयाँ प्राप्त गर्नेछ । प्रतियोगिताको उत्कृष्ट प्रशिक्षकले १० हजार प्राप्त गर्नेछन् भने उत्कृष्ट खेलाडी, गोलरक्षक, डिफेन्डर, मिडफिल्डर र फरवार्डले जनही नगद ५ हजार रुपैयाासहित ट्रफी प्राप्त गर्ने छन् ।
रोटरी मकवानपुरको आयोजनामा २०७२ सालमा पहिलो पटक राष्ट्रिय र २०७३ सालमा दोस्रो पटक अन्तराष्ट्रिय प्रतियोगिता संचालन भएकाे थियाे । हेटौंडामा नै पहिलो पटक आयोजना गरिएकाे ८ ए साईड भेट्रान्स प्रतियोगिताकाे पहिलाे र दोस्राे संस्करण चितवन भेट्रान्स क्लबले हात पारेकाे थियाे ।
मकवानपुर । मकवानपुरकाे हेटौडामा जारी जिल्ला लिग फुटबल प्रतियोगिता अन्तर्गत बिहीबारकाे खेलमा परेली युवा क्लब, ईन्टरनेट सिटि, राप्तीरिभर युवा क्लव, पिप्ले युवा क्लव विजयी भएकाे छ ।
बिहीबार हेटौडा ११ सिमलटार खेल मैदानमा एफसी इन्टरनेटलाई २–० ले हराउँदै परेली समूह क को शीर्षस्थानमा उक्लिएको छ । हेटौंडा १९ बस्तीपुरको परेलीले ५ खेलबाट ११ अंक जोड्दै शीर्षस्थानमा उक्लिएको हो । लिगमा परेलीले ५ खेल खेल्दा अपराजिता यात्रामा रहेको छ । परेलीले ५ मध्ये ३ जित र २ खेल बराबरी खेलेको हो ।
परेलीका लागि कप्तान राम लामा र होमराज स्याङ्तानले गोल गरेका हुन् । खेलको म्यान अफ द म्याच परेलीका होमराज स्याङ्तान घोषित भए । यसैगरी बिहीबारकाे खेलमा पिप्लेले महाबीर क्लवलाई ७–० ले गाेल अन्तरले हराएको हो । पिप्लेका लागि निरब घलानले ४ तथा सुसन वाइबा र आर्यन थापा मगरले समान एक/एक गोल गरेका हुन् । एक गोल भने उपहार स्वरुप पाएको थियो । यो खेलसंगै पिप्ले युवा क्लबले लिगको सुरुवाती जित निकालेको हो । ४ गोल गरेका घलान नै खेलको म्यान अफ द म्याच घोषित भए ।
हेटौडा ६ स्थित गौरिटार रंगशालामा भएको खेलमा आरआरवाइसीले विजय यूथ क्लवलाई १–० ले हराउदा सन्देश राईले गरेको गोल नै निर्णायक बन्यो । राई खेलको म्यान अफ द म्याच घोषित भए । बिहीबारै भएको खेलमा इन्टरनेट सिटीले हेटौंडा फुटबल एकेडेमीलाई ४–२ काे गोलले पराजीत गरेकाे छ ।
जारी प्रतियोगितामा शुक्रबार पनि ४ वटा खेल सञ्चालन हुनेछ । गौरीटार रंगशालामा पहिलाे खेल न्यु डाँफे र रियल स्टार क्लब बिच हुनेछ भने एफसी मल्टिभिजन र एफसी नामटार बिच दाेस्राे खेल हुनेछ । यस्तै सिमलटार खेल मैदानमा सानाेपाोखरा क्लब र ७ नम्बर फुटबल क्लब बिच पहिलाे खेल र हटिया स्पाेर्टस् र पदमपाेखरी बिच खेल हुने आयोजकले जनाएकाे छ ।
आयोजकका अनुसार प्रत्येक समूहबाट उत्कृष्ट तीन क्लवले ए डिभिजनस्तरको मान्यता प्राप्त गर्नेछन् भने समूहको पहिलो र दोस्रो हुने क्लवले मात्र नकाउट चरणका खेल खेल्नछन् ।
१४ भदौबाट सुरु लिगको प्रतियोगिताको फाइनल खेल ९ असोजमा हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्नेछन् । जिल्लामा रहेका २८ वटा क्लवलाई वर्गीकरण गर्ने गरी जिल्ला लिग सुरु गरिएको हो । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन भइरहेकाे छ ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्पोटर्स एकेडेमीले उपविजेतामा चित्त बुझाएकाे थियो।
मकवानपुर । बागमती प्रदेश प्रहरी प्रमुख र प्रदेश अन्तर्गतका प्रहरी प्रमुखबीच कार्यसम्पादन सम्झौता भएकाे छ । बागमती प्रदेश प्रहरी प्रमुख प्रहरी नायव महानिरीक्षक कृष्ण हरि शर्माले प्रदेश अन्तर्गतका प्रहरी प्रमुखहरुसँग वार्षिक कार्यसम्पादन सम्झौता गरेका हुन् ।
बागमती प्रदेश प्रहरी कार्यालय हेटौंडामा बिहीबार आयोजित एक कार्यक्रमका बीच प्रत्यक्ष एवं भर्चुअल माध्यमबाट आर्थिक वर्ष २०८०।०८१ को कार्य सम्पादन सम्झौता भएकाे हाे । चालु आर्थिक वर्षको लागि प्रदेश अन्तर्गतका १० वटा जिल्ला प्रहरी कार्यालय, बागमती प्रदेश प्रहरी तालिम केन्द्र, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, नेपाल प्रहरी विशेष सुरक्षा गण, बागमती प्रदेश प्रहरी गण गरी १४ वटा कार्यालयका प्रमुखसँग कार्यसम्पादन सम्झौता गरिएकाे हाे ।
कार्यसम्पादन अन्तर्गत जिल्ला प्रहरी कार्यालयको लागि ४० वटा, बागमती प्रदेश प्रहरी तालिम केन्द्र र ट्राफिकको लागि १८ र प्रहरी गणहरुको लागि १९ वटा वार्षिक कार्यसम्पादन क्रियाकलापहरु समावेश गरी सम्झौता गरिएकाे हाे । कार्यक्रममा नेपाल प्रहरी प्रदेश कार्यालय बनेपा काभ्रे सहित बागमती प्रदेश प्रहरी कार्यालय मातहत प्रहरी प्रमुखहरुले प्रस्तुतिकरण गरेका थिए ।
सोही अवसरमा उपस्थित कार्यालय प्रमुख सहित मातहतका इलाका प्रहरी काकार्यालयसँग भर्चुअल माध्यमबाट प्रदेश प्रहरी प्रमुख शर्माले प्रहरीको प्रमुख कार्य अपराध अनुसन्धान, गस्ती व्यबस्थापन, विशेष योजना, ट्राफिक व्यवस्थापन, वार्षिक कार्यसम्पादन सम्झौताको प्रभावकारी कार्यान्वयन गर्ने र चाडपर्व लक्षित सुरक्षा योजना बनाई प्रहरी परिचालन गर्ने लगायतको आवश्यक निर्देशन दिएकाे प्रहरी नायव उपरीक्षक सूचना अधिकारी जितेन्द्र कुमार बस्नेतले जानकारी दिए ।
मकवानपुर । कर्मचारी संचयकाेषकाे वार्षिकोत्सवमा शाखा कार्यालय हेटौंडाले बिहीबार निःशुल्क स्वास्थ्य शिविर गरेकाे छ । काेषकाे ६३औँ वार्षिकोत्सवकाे उपलक्ष्यमा काेषका सञ्चयकर्ता लगायतकाे लागि स्वास्थ्य शिविर आयोजना गरिएकाे ।
कर्मचारी मिलन केन्द्र मकवानपुरकाे समन्वय र सीएमसी चुरेहिल हस्पिटलकाे प्राविधिक सहयाेगमा भएकाे शिविरकाे मकवानपुरका सहायक प्रमुख जिल्ला अधिकारी लोकमान श्रेष्ठले उद्घाटन गरे । शिविरको उदघाटन गर्दै श्रेष्ठले निःशुल्क स्वास्थ्य शिविरले स्वास्थ्य अवस्थालाई परोक्ष रूपमा जाँच गरी स्वस्थ राख्न मद्दत पुर्याउने बताए । ‘कोषको यस प्रकारको पहलले कर्मचारीहरूको सामाजिक सुरक्षामा महत्वपूर्ण योगदान पुर्याएको छ’ उनले भने ‘स्वास्थ्य जाँच कार्यक्रमले कर्मचारीहरूको शारीरिक र मानसिक स्वास्थ्यको महत्त्वलाई उजागर गरेको छ, जसले स्वस्थ्य कमर्चारीले, स्वस्थ्य बाताबरणमा सेवा प्रवाह गर्न सक्षम हुनेछन् ।’
संचय कोष हेटौंडा शाखा प्रमुख डा. दिलिपराज पौडेलले कर्मचारी सञ्चय कोषले विगत ६२ वर्षदेखि देशको समृद्धिका लागि महत्त्वपूर्ण भूमिका निर्वाह गर्दै आएको बताए । संस्था आजसम्म आइपुग्दा लाखौँ कर्मचारीहरूको भविष्य सुरक्षित गर्न सफल भएको भन्दै सञ्चयकर्ताहरूलाई आर्थिक सुरक्षा र सामाजिक सुरक्षामा पनि काम गरेका जानकारी दिए । ‘एक स्वस्थ कर्मचारी नै सक्षम कर्मचारी हो, र सक्षम कर्मचारीले नै आफ्नो काममा उत्कृष्टता देखाउन सक्छ ’ उनले भने ‘निःशुल्क स्वास्थ्य शिविरले कोषको सञ्चयकर्ताहरूलाई अझ स्वस्थ र सक्षम बनाउने उद्देश्य पूरा गरेको छ ।’

शाखा कायर्लय हेटैडाकी उप प्रबन्धक निमा डोमा शेर्पाले स्वास्थ्य शिविरमा सञ्चयकर्ताहरूले आफ्नो स्वास्थ्य जाँच गराउँदै निःशुल्क परामर्श, र अन्य स्वास्थ्यसम्बन्धी सेवाहरू प्राप्त गरेकाकाे बताए । कर्मचारी मिलन केन्द्रकी कार्यबाहक आध्यक्ष शान्ति बिकले निःशुल्क स्वस्थ्य शिविरले कर्मचारीलाई आफ्नो स्वास्थ्यमा सम्बेदनशिल हुन् र आफ्नो स्वास्थ्य प्रति सदैब सचेत रहन प्रेरित गर्ने बताइन् ।
स्वास्थ्य शिविरमा जनरल फिजिसियन सेवा, प्रेशर, सुगर, दम, रुघा, खाेकी, पेट, छाति, मुटु, उपचार तथा परामर्श सेवा निःशुल्क जाँच गरिएकाे कर्मचारी संचयकाेष हेटौडा शाखा प्रमुख डा. दिलिपराज पौडेलले जानकारी दिए । शाखा कार्यालय परिसरमा भएकाे स्वास्थ्य जाँच सीएमसी चुरे हस्पिटलका डाक्टर तथा नर्सलगायतकाे प्राविधिक टोलीले सेवा दिएका हुन् । शिविरमा सामान्य किसिमका रोगकाे औषधी दिइएकाे थियाे भने जटिल रोगकाे लागि हस्पिटल रिफर गरिएकाे छ । शिविरबाट रिफर भएका विरामीकाे लागि अस्पतालले छुट सहितकाे सेवा उपलब्ध गराउने बताइएकाे छ ।
चितवन मेडिकल कलेज (सीएमसी) सञ्चयकाेषकाे स्वास्थ्य उपचार योजना अन्तर्गत सुचिकृत अस्पताल समेत हाे । काेषकाे कार्यालयले ‘सुरक्षित भविश्यकाे लागि निवृत्तभरण तथा सञ्चय काेष’ भन्ने नाराका साथ ३१ भदौमा वार्षिकोत्सव मनाउँदै छ । हेटौंडा शाखाले उक्त दिन प्रभातफेरी कार्यक्रम गरी दिउँसो वार्षिकोत्सव मनाउने शाखा प्रमुख पौडेलले बताए । काेषकाे हेटौंडा कार्यालयले मधेस प्रदेशका धनुषा, महाेत्तरी, बारा र पर्सा तथा बागमती प्रदेशका मकवानपुर, चितवन र सिन्धुलीका सञ्चयकर्तालाई सेवा उपलब्ध गराउँदै आएकाे छ ।