मकवानपुर । हिन्दु धर्मावलम्बीले विशेष पूजा गरी हरिबोधिनी अर्थात ठुलो एकादशी पर्व आज मनाइँदैछन्। ठूलो एकादशीमा तुलसीको दामोदरसँग विवाह र पुजापाठ गरिन्छ ।
हरिबोधनी एकादशी वर्षमा पर्ने चौबीसवटा एकादशीमध्ये सबैभन्दा ठूलो एवं महत्वपूर्ण एकादशीकाे रुपमा मानिने भएकाेले यसलाई ठूलो एकादशी पनि भनिन्छ। हिन्दू धर्ममा एकादशीलाई भगवान् विष्णुको उपासना गर्ने पर्वको रूपमा लिइन्छ। कार्तिक शुक्ल एकादशीका दिनमा भगवान् विष्णुको प्रतीकका रुपमा तुलसीको पुजा गरि मनाउने गरिन्छ ।
आज देशका सबै जसो विष्णु/नारायण मन्दिरहरुमा पुजाआजा गरि मेला लाग्ने गर्दछ । हरेक वर्ष झै मकवानपुरको भीमफेदी गाउँपालिका वडा नम्वर – १ भैसे स्थित त्रिखण्डीमा बिशेष मेला लागेकाे छ । यसैगरी जिल्लाकाे मकवानपुरगढी गाउँपालिका वडा नम्वर–२ स्थित गढी दरबार र थाहा नगरपालिका वडा नम्वर –४ स्थित ऋषेश्वर मन्दिरमा मेला लागेकाे छ ।
आषाढ शुक्ल एकादशी अर्थात् हरि शयनी एकादशीका दिनमा क्षीरसागरमा सुतेका विष्णु ब्युँतिने भएकाले आजको एकादशीलाई हरिबोधिनी वा प्रवोधिनी एकादशी पनि भनिन्छ। हरि शयनीदेखि हरि बोधिनी एकादशीका दिनसम्म चार महिना विष्णुका भक्तले तुलसीको व्रत गरी विशेष पूजा गर्दछन्। विष्णु क्षीर सागरमा सुतेकाले यी चार महिना विवाह व्रतबन्ध जस्ता माङ्गलिक कार्य नगरिने परम्परा छ। यस समयमा खोला, नदीनालामा बाढीपहिरो आउने र सर्पजस्ता जीवको भयका कारण यात्रा नगर्नु शुभ मानिन्छ।
हरिशयनी एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर सिँगारी फूल मालाले सजाएर विवाह गरिन्छ। तुलसी विष्णुप्रिया भएकाले यस दिन तुलसीको दामोदरसँग विवाह गर्ने परम्परा बसेको हो। तुलसीको मठ नजिकै विष्णुको प्रतीकका रुपमा निगालाको लिङ्ग गाडेर विधिपूर्वक पूजा गरिन्छ। कार्तिक महिनाभर सबै देवदेवी तुलसीमै निवास गर्छन् भन्ने धार्मिक विश्वास छ। कात्तिक महिनामा तुलसीको माला लगाउँदा र एक लाख तुलसी पत्र विष्णुलाई अर्पण गर्दा मनोकाङ्क्षा पूरा हुने विश्वास समेत गरिन्छ ।
आदिकालदेखि पूजाको परम्परा बसेको तुलसीको महिमा वैज्ञानिकरुपमा पनि लाभदायक प्रमाणित भएको छ। यसैले तुलसीको मठ हुने घरलाई तीर्थ समान मानिन्छ। तुलसीको सुगन्धले दश दिशा पवित्र हुन्छ भनिन्छ। तुलसीको पूजा गरिएको घरमा यमदूत पनि पस्दैनन् भन्ने आस्थाका कारण हिन्दू धर्मावलम्बीले घरमा तुलसीको मठ बनाउँछन्। तुलसीको पात, डाँठ वा फूलको रस रुघाखोकी, औलोलगायत रोगका लागि औषधि हुन्छ। यो रस शरीरमा लगाएर सुतेमा लामखुट्टेले टोक्दैन। तुलसीको मठ भएको स्थल वरपर विषालु सर्प पनि आउँदैन। मठको वरपर बहने हावाले विषालु कीटाणुलाई नष्ट गर्दछ। शरद ऋतुभर सबै प्राणीका लागि तुलसीलाई महा औषधि मानिन्छ।
तुलसीबाट बनेको चिया मानव शरीरमा रोग प्रतिरोधी क्षमता वृद्धि गर्न उपयुक्त मानिन्छ। कोरोनाबाट बच्न तुलसीको चिया नियमित सेवन गर्नाले लाभ मिल्ने चिकित्सक बताउँछन । कार्तिक महिनामा तुलसीको माला लगाउँदा र एक लाख तुलसी पत्र विष्णुलाई अर्पण गर्दा मनोकाङ्क्षा पूरा हुन्छ भन्ने विश्वास छ। गरुड पुराणमा उल्लेख भएअनुसार यस महिनामा एउटा तुलसी पत्र भगवान् विष्णुलाई अर्पण गर्दा १० हजार गाई दान गरे बराबरको फल मिल्दछ।
आजको दिन अन्न खान नहुने भएकाले सखरखन्ड, पिँडालु र वनतरुल उसिनेर फलाहार गरिन्छ। यसरी व्रत गरेमा पापको नाश भई पुण्य वृद्धि हुने र मोक्ष प्राप्ति हुन्छ भन्ने धार्मिक विश्वास छ। आजकाे एकादशी व्रतले हजार अश्वमेध यज्ञ तथा राजसूय यज्ञ गरे बराबरको फल पाइने शास्त्रीय मान्यता छ। कार्तिक महिनामा भगवान् विष्णुलाई भक्तिपूर्वक सम्झी गरिएको स्नान, दान, जप र होमले फल पाइने एवम् सय जन्मका पापबाट मुक्ति मिल्ने प्रसङ्ग विभिन्न ग्रन्थमा वर्णन गरिएको छ।
काठमाडौँ उपत्यकाका चार नारायण, भक्तपुरको चाँगुनारायण, ललितपुरको विशङ्खुनारायण, काठमाडौँका शेषनारायण र इचँगुनारायण स्थानमा विशेष मेला लाग्दछ ।
मकवानपुर । नेपाली कथानक चलचित्र अग्निदहन ७ मंसिर २०८१ बाट प्रदर्शनमा आउने भएकाे छ । चलचित्रमा बोक्साबोक्सी कुप्रथाको नाममा अझैपनि नेपाली समाजमा भइरहेको अन्याय र अत्याचार तथा त्यसविरुद्धको संघर्षको कथा रहेकाे निर्माण टिमले जनाकारी दिएकाे छ ।
चलचित्र विकास बोर्डले ‘विशेष चलचित्र अवार्ड’ प्रदान गरेको अग्निदहन ७ मंसिरबाट देशैभरका चलचित्र घर (सिनेमा हल) हरुमा प्रदर्शन हुने सोमबार हेटौंडामा पत्रकार भेटघाट मार्फत निर्माण पक्षले जानकारी दिएको हो । मान्छे बोक्सी हुन्न कहिल्यै राष्ट्रिय जागरण प्रतिष्ठानले निर्माण गरेको चलचित्र हलमा प्रदर्शनअघि नेपाल र भारतका विभिन्न ठाउँमा च्यारिटी प्रदर्शन गरिएको छ ।
चलचित्र निर्देशक धनश्याम लामिछानेले हाम्रो समाजमा घटेको सत्यघटनामा आधारित विषयवस्तुमा चलचित्र निर्माण भएको बताए । चलचित्रका संरक्षक मोहनराज शर्मा पौडेलले बोक्साबोक्सी कुप्रथाको उन्मुलन गर्ने अभियानमा चलचित्र सार्थक हुने विश्वास व्यक्त गरे । कलाकार प्रकाश घिमिरेले चलचित्रमा आफ्नो भूमिका र आफ्नो विचार मिलेकाले काम गरिएकाेले नयाँ अनुभव मिलेकाे बताए ।
चलचित्रलाई भोजपुरी र मैथिली भाषामा डबिङ गरिसकिएको छ भने हिन्दीमा पनि डबिङ भइरहेको निर्माण पक्षले जनाएको छ । घनश्याम लामिछानेले निर्देशन गरेकाे चलचित्र करिब एक करोडको लगानीमा निर्माण गरिएको बताइएकाे छ । चलचित्रमा लोकमणि पौडेलको कथा, पटकथा तथा संवाद र कोविदशरण उपाध्यायको परिकल्पना रहेको छ ।
प्रकाश घिमिरे, प्रमिला तुलाचन, माओत्से गुरुङ, अनुपमा भण्डारी, तुलसी क्षेत्री, विष्णु बास्तोला, निर्मल लामिछाने र तारा गुरुङलगायतकाे अभिनय चलचित्र देख्न सकिन्छ । १ महिना अघी टिजर सार्वजनिक भएकाे अग्निदहनकाे टेलर ४ दिन अघि सार्वजनिक भएकाे छ ।
मकवानपुर । मकवानपुर प्रहरीले हेटौडाबाट १६२ किलाे गाँजा बरामद गरेकाे छ । गाजाँसहित सहित प्रदेश ३-०१-०२४ च ६३६१ नम्बर योद्धा पिकअप गाडीका चालकलाई पक्राउ गरिएकाे जिल्ला प्रहरी कार्यालय मकवानपुरले जनाएकाे छ ।
प्रहरीले हेटौंडा १९ नेवारपानी स्थित पुर्व पश्चिम लोकमार्गकाे सडकखण्डमा मनहरीबाट हेटौंडातर्फ आउदै गरेको उक्त पिकअप गाडीबाट १६२ किलो ५८० ग्राम लागूऔषध बरामद गरेकाे हाे । आइतबार बिहान इलाका प्रहरी कार्यालय नेवारपानी मकवानपुरबाट खटिएको टोलीले उक्त गाडीका चालक काभ्रेपलाञ्चोक धुलिखेल नगरपालिका १२ बस्ने २९ वर्षीय किरण वाग्ले तथा गाडी समेतको जाँच गर्दा उक्त गाँजा बरामद भएकाे हाे ।
गाडीको पछाडीको भागमा खाली प्लाष्टिकको क्रेटहरू मुनी लुकाई राखिएको अवस्थामा फेला पारेकाे १६२ किलो ५८० ग्राम लागूऔषध गाँजा, योद्धा गाडी सहित किरण वाग्लेलाई नियन्त्रणमा लिइएकाे जिल्ला प्रहरी कार्यालय मकवानपुरले जनाएकाे छ । प्रहरीका अनुसार मकवानपुर जिल्ला अदालतबाट ४ दिनको म्याद लिइ थप अनुसन्धान भईरहेको छ ।
मकवानपुर । १६ मंसिर २०८१ मा हुने स्थानीय तहकाे उपनिर्वाचन हुँदैछ । देशभरका ४४ पदका लागि हुने निर्वाचन अन्तरगत मकवानपुरकाे हेटौडा उपमहानगरपालिकाकाे वडा नम्बर १२ पनि एक हाे ।
उक्त स्थानमा वडाध्यक्ष पद रिक्त छ। वडाध्यक्ष पद १ का लागि मकवानपुरमा क्रियाशील राजनीतिक दलहरुले उम्मेदवार टुंगो लगाउँदैछन् । राष्ट्रिय प्रजातन्त्र पार्टीले पनि हेटौंडा १२ को अध्यक्ष पदको उम्मेदवार टुंग्याएको छ । राप्रपाले प्रेम लामा भ्लोनलाई उम्मेदवार बनाउने निर्णय गरेको हाे ।आइतबार बसेको राप्रपाको जिल्ला र नगर कार्यसमितिको बैठकले वडा अध्यक्ष पदका लागि भ्लोनलाई उम्मेदवार बनाउने सर्वसम्मत निर्णय गरेको हो ।
विभिन्न सामाजिक कार्यमा संलग्न रहेका भ्लोनलाई उम्मेदवारकाे टिकट दिने निर्णय सर्वसम्मत भएकाे राप्रपा हेटौंडा उपमहानगरपालिका अध्यक्ष अरुण लामाले जानकारी दिए । हेटौंडा–१२ का स्थानीय बासिन्दा भ्लोनलाई जिताउन राप्रपाले चुनावी अभियान संचालन गर्ने तयारी समेत गरिएको उनले बताए ।
यसअघि नेपाली कांग्रेसबाट अर्जुन तिवारी, नेकपा एमालेबाट राजेश नगरकोटी र नेकपा माओवादी केन्द्रबाट रविन प्रधान वडाध्यक्षको उम्मेदवार हुने टुंगो लगाइसकेकाे ती दलहरुले जनाएका छन् । २०७९ सालमा भएको निर्वाचनबाट वडाध्यक्ष निर्वाचित ललित बहादुर घलान जिल्ला समन्वय समितिको प्रमुख निर्वाचित भएपछि वडाध्यक्षको पद रिक्त रहेकाे थियो ।
मकवानपुर । हेटाैंडा उपमहानगरपालिका वडा नम्बर ४ का वडाध्यक्ष नवीन सिग्देलले शैक्षिक सुधारलाई प्राथमिकता राखिएकाे बताएका छन् । नन्दस्थान टाेल विकास संस्थाकाे साधारणसभा उद्घाटन गर्दै उनले यस्तो बताएका हुन् ।
‘हेटाैंडालाई शैक्षिक केन्द्रकाे रूपमा विकास गर्न आवश्यक छ’ वडाध्यक्ष सिग्देलले भने धेरै शैक्षिक संस्था रहेकाेवडा भएकाेले यस वडाका शैक्षिक संस्थामा शैक्षिक गुुणस्तर कायम गर्नु पर्छ । शैक्षिक सुधारमा गुणस्तरमा वडाले ध्यान दिएर अभियान सञ्चालन गरिरहेकाे उनले बताए । विद्यालयकाे गुणस्तर सुधार्न स्थानीय सरकारले प्रत्यक्ष रूपमा ध्यान दिनपर्ने र पर्याप्त लगानी गर्नुपर्ने उनले जनाकारी दिए ।
विकासमा जनताकाे लागि भएकाेले विकासमा जनसहभागिता र परिचालन महत्व पूर्ण हुने भन्दै वडालाई व्यवस्थित सुविधा सम्पन्न बस्ती र व्यवसायिक शहर बनाउन सबै तहकाे सरकारसँग समन्वय गरिरहेकाे उनकाे भनाई रहेकाे छ । ‘खेलकुद क्षेत्र अगाडि बढाउन र धार्मिक पर्यटनकाे रूपमा वडालाई विकास गर्न विशेष ध्यान दिइएकाे छ‘ उनले भने । सामाजिक रूपान्तरणकाे लागि सबै खाले विभेद, विकृति र हिँसा अन्त्य गर्ने र हरियाली र उज्यालाे वडा बनाउन सामाजिक अभियान सञ्चालन गर्नुकाे साथै भाषा, संस्कृति र साहित्यलाई जनस्तरमा पुर्याउन वडा कार्यालय लागि परेकाे उनले बताए ।
साधारणसभाले पुन: देवकुमारी ढकालकाे अध्यक्षतामा उपाध्यक्ष उत्तरा कुमारी रूपाखेती, सचिव किसाेर दुलाल, सहसचिव निर्मल श्रेष्ठ र काेषाध्यक्ष उत्तम थापा सहित ९ सदस्यीय कार्य समिति चयन गरेकाे छ ।
कार्यक्रममा हेटाैंडा उपमहानगरपालिका सामुदाय परिचालन शाखा प्रमुख गंगा चाैलागाई, अरनिकाे टाेल विकास संस्थाका अध्यक्ष बीरेन्द्र ढुङ्गाना, संस्थाका प्रमुख सल्लाहकार उत्तम शर्मा ढकाल, सल्लाहकार राम श्रेष्ठलगायतले मन्तव्य व्यक्त गरेका थिए ।