मकवानपुर । बागमती प्रदेश प्रमुख दीपक प्रसाद देवकोटाले जेसीजलाई युवालक्षित उत्कृष्ट कार्यक्रम पहिचान गरि अगाडि बढ्न शुभकामना दिएका छन् । मकवानपुरमा हेटौंडा जेसीजको आयोजनामा भएको पब्लिक स्पिकिङ समापन कार्यक्रमकामा उनले यस्तो शुभकामना दिएका हुन् ।
युवालाई उद्धमशीलतामार्फत् स्वरोजगार र रोजगारी सृजनाको बाटाेमा युवा डाेर्याउने जेसीजको आर्थिक कृयाशीलताको योगदान उत्कृष्ट रहेको प्रदेश प्रमुख देवकाेटाले बताए । ‘संस्कृति जगेर्ना र सामाजिक कार्यको धरातलमा स्थापित जेसीजले नेतृत्व, ब्यक्तित्व र उद्यमशीलता विकासमा अहम् भूमिका खेलेको छ’ उनले भने ।
देशको भविष्य थाम्ने युवापिढी कुहिराको कागजस्तै गन्तव्यहीन दिशामा गुज्रेको हो कि भन्ने अवस्था आएको भन्दै यस्तो पिरलोबाट बचाउन जेसीजले नेतृत्व तथा व्यक्तित्व विकासकोलागि योगदान गर्दै आएको उनले बताए । उनले युवालाई संस्कार, शिक्षा, सहयोग, श्रमशीलता, ब्यक्तिगत विकास र सकारात्मकता उर्जा थप्ने युवालक्षित जेसीजका कार्यक्रमहरूको प्रशंसायोग्य रहेको बताए ।
“युवाकालमा व्यक्ती कृयाशील छ भने उसमा बुढ्यौलीको आभाष कहिल्यै हुदैन, मान्छे उमेरभन्दा सोच र सक्रियता विहिन हुँला बुढो देखिन्छ” उनले भने । मान्छे क्षमता नभएर होइन क्षमता नचिनेर पछि परेको उनको भनाइ थियोे । जेसीजले युवामा उत्साह उजागर गर्ने गरेको उनले बताए । ‘भनिन्छ ९६ प्रतिशत डर वास्तविक नभएर काल्पनिक हुन्छन्’ उनले भने ‘महानभन्दा महान विचार नबोल्दासम्म अर्थहीननै रहने गर्छन् ।’
युवालाई उच्च मनोबलका साथ प्रगति पथमा लम्किनको लागि उनले आग्रह समेत गरे । निरन्तर र अर्थपूर्ण अभ्यासले राम्रो वक्ता बन्न सकिने बताउँदै,यसैको बलमा ब्यक्तित्व विकास हुने उनकाे धारण थियाे ।
देशभरबाट सहभागी ५८ मध्येबाट उत्कृष्ट १० जनाबाट पुरस्कृत छनौटको लागि कार्यक्रम गरिएको अध्यक्ष बिकेशलाल श्रेष्ठले बताए । प्रतियोगिताबाट सुस्मा आचार्य (पोखरा), रमेश भुर्तेल (कावसोती) र बन्दना विश्वकर्मा (कावसोती) क्रमशः प्रथम द्वितीय र तृतीय भएका थिए । उनीहरूलाई २५ हजार, १५ हजार र १० हजार नगद प्रदान गरिएको अध्यक्ष श्रेष्ठले बताए । सन् २०२० बाट जेसीजले सुरु गरेकाे यो प्रतियोगिताकाे पाँचौ संस्करण भएको उनले बताए ।
मकवानपुर । कुमारी लामाकाे निबन्धसंग्रह ‘दर्ज्यु संलाप’ काे हेटौंडा विमर्श गरिएकाे छ । शनिबार उक्त निवन्ध संग्रहमाथि विमर्श गरिएकाे हाे ।
किताबघर हेटौंडा र ‘आह्वान’को संयुक्त आयोजनामा भएको कार्यक्रममा लामाले आफू हुर्केको परिवेशलाई साहित्यमा समेट्दा अझ प्रभावकारी बन्ने बताइन् । आफ्नो पछिल्लो निबन्धसङ्ग्रह ‘दर्ज्यु संलाप’ माथिको विमर्श कार्यक्रममा लामाले आफ्नै पृष्ठभूमिका भुइँमान्छेका विद्रोहलाई निबन्धात्मक रुपमा ल्याउँदा निबन्धको दायरा अझै फराकिलो बन्न पुगेको बताइन् ।
कवि तथा समीक्षक निमेष निखिलको सुशासन कायम गर्ने बेग्लै निकाय हुँदाहुँदै लेखकले प्रश्न मात्रै उठाउने हो वा समाधान पनि गर्ने हो ? भन्ने सवालमा लामाले प्रश्न उठाउनु आवश्यक रहेको बताइन् । संविधानले छोरीलाई अंश र वंशको अधिकार दिंदैमा व्यवहारमा परिवर्तन नहुने उनकाे भनाई थियो । निबन्धहरूलाई शृंखलात्मक रुपमा प्रस्तुत गरिएको ‘दर्ज्यु संलाप’मा उल्लेखित पात्र कान्छी तामाङको जीवन आफ्नो लागि प्रेरणादायी रहेको उल्लेख गरिन् ।
विगतमा न्युन पारिश्रमिक दिएर तामाङहरूको शोषण भएको, ज्यानै मास्न सकिने कानूनी व्यवस्थाले राजनीति, शिक्षा, अर्थमा विगतदेखि नै दमनका शृङ्खला रहेकोले पात्रहरूमा तामाङहरूकै बाहुल्यता रहेको लेखक लामाले बताइन् ।
यश लामा, सुबास सजल, वनस्तम थिङ लगायतले पाठकीय टिप्पणी राखेकाे कार्यक्रममा आख्यानकार उमा सुवेदीले ‘आह्वान’का गतिविधिबारे जानकारी गराएकी थिइन् ।
हेर्नुहाेस भिडियो
- दुर्गा वनवासी
उसले कविताहरु लेख्यो- राष्ट्रभक्तिका, धर्ती प्रेमका र विश्व शान्तिका, गान्धी र गौतमका, सेता परेवा र ढुकुरका, सामाजिक मेलमिलापका, परोपकार र अहिंसाका ।
त्यसपछि एउटा ख्यातिप्राप्त पत्रिकाका सम्पादकलाई भेट्न गयो । कविताका शिर्षकहरु सर्सर्ती हेरेपछि सम्पादकज्यू पड्किए- “यस्तो पनि कविता हुन्छ ? यी कोरा भावनामा डुबेर खेस्राहरु केर्दैमा कविता हुन्छ र ? कविताले त क्रान्ति ल्याउनु पर्छ, समाज परिवर्तन हुनुपर्छ, मान्छेका सोचहरु बद्लिनुपर्छ । जानोस्, क्रान्तिकारी कविताहरु लेख्नोस् ।”
ऊ फर्कियो अनि कविताहरु लेख्यो- जनजागृतिका, लैंगिक समानताका, जातीय स्वतन्त्रताका, वर्गीय आन्दोलनका, मार्क्सका, लेनिनका आदि, आदि । कविताहरु लिएर पुन जाँदा त्यहाँ त अर्का सम्पादक आइसकेका रहेछन् ।
कविताका टाउकाहरुमा एक नजर दौडाइसकेपछि कविताहरु फिर्ता गरेर नाक खुम्च्याउँदै सम्पादक महोदयले भने- “मुलुक यस्तो धर्मर अवस्थामा छ । हत्या र हिंसाको बाढी आएको छ, देशका युवाहरु बिदेश पलायन हुने क्रम बढ्दो छ । यस्तो स्थितिमा राष्ट्रिय एकताको भावना जगाउने, शान्ति र कल्याणको आव्हान गर्ने कविताहरु नलेखेर यस्ता क्रन्तिकारी कविताहरु लेख्न हुन्छ ? यसले त झन प्रलय ल्याउँछ, अशान्ति निम्त्याउँछ ।
जानोस्, शान्ति र मानवताका कविता लेख्नोस् । मान्छेका मनभित्र देशभक्ति, लोककल्याण र परोपकारको भाव जगाउनोस् ।”
हाम्रो लघुकथा केन्द्र, नेपालकाे फेसबुक ग्रुपबाट
मकवानपुर । मकवानपुरको राक्सिराङमा एक जना मृत फेला परेका छन् । शुक्रबार बिहान राक्सिराङ गाउँपालिका–५, इन्चराङमा राक्सिराङ –८, शिखरपुरका २१ वर्षीय समिर सुनार मृत फेला परेको जिल्ला प्रहरी कार्यालय मकवानपुरले जनाएकाे छ ।
उनी हाल बाराको जितपुर सिमरा उपमहानगरपालिका–२२ अमलेखगंज बस्ने गरेकाे बताइएकाे छ । प्रहरीका अनुसार सुनार इन्चराङ स्थित चैनपुरबाट काँकडा जाने भित्री सडक खण्डमा मृत अवस्थामा फेला परेकाे थिए । प्रहरी टोली घटनास्थल पुगी अनुसन्धान गर्दा मृतकको टाउकोमा चोट, नाक मुखबाट रगत बगेको अस्थामा फेला परेकाे थियो ।
घटनाबारे अनुसन्धानका लागि ३ जनालाई नियन्त्रणमा लिई थप अनुसन्धान भैरहेको मकवानपुर प्रहरीले जनाकारी दिएको छ । भिनाजु नाता पर्ने मिलन घतानेले मृतकको सनाखत गरेका थिए । प्रहरीका अनुसार मृतकको शव हेटौडा अस्पतालमा रहेको ।
मकवानपुर । नेपाल पत्रकार महासंघको नेतृत्व चयनका लागि आज निर्वाचन हुँदैछ । पत्रकार महासंघ अन्तर्गत केन्द्रीय समिति, प्रदेश समिति, जिल्ला समिति र प्रतिष्ठान शाखाको कार्यसमिति चयनका लागि देशैभर निर्वाचन हुन लागेको हो ।
नेपाल पत्रकार महासंघ केन्द्रीय निर्वाचन समितिका संयोजक चिरञ्जीवी खनालले तिनै तहको निर्वाचनको सम्पूर्ण तयारी पूरा भएको बताए । निर्वाचन हुने स्थानका सबै मतपत्रसहित निर्वाचन प्रतिनिधि पुगेर सम्पूर्ण तयारी गरिसकेको बताइएकाे छ । महासंघको आज हुने निर्वाचनले केन्द्रीय समिति, १० प्रदेश समिति र ७७ जिल्ला शाखा तथा ४१ प्रतिष्ठान शाखामा नेतृत्व चयन गर्नेछ ।
केन्द्रीय समितिका पदाधिकारी तथा सदस्य र लेखा समितिका लागि केन्द्रीय निर्वाचन समितिले मतपत्र छापेर प्रदेश निर्वाचन समितिमार्फत शाखाहरूमा पुर्याइसकिएको छ । केन्द्रीय पदाधिकारीका लागि हल्का निलो, प्रदेशबाट निर्वाचित हुने केन्द्रीय सदस्यका लागि सेतो र अन्य केन्द्रीय सदस्य तथा लेखा समितिका लागि हल्का गुलाबी रङको मतपत्र तयार गरिएको छ । प्रदेश कार्यसमिति र शाखा कार्यसमितिले मतपत्रको ढाँचा र रङ आफैँ छनोट गर्न पाउने गरी गरिएको व्यवस्था रहेकाे छ ।
मकवानपुर जिल्ला शाखा अध्यक्षमा ४ जनाको उम्मेदवारी
नेपाल पत्रकार महासंघ मकवानपुर जिल्ला शाखाको अध्यक्षका लागि ४ जनाको उम्मेदवारी परेको छ । निर्वाचन कार्यक्रमअन्तर्गत बुधबार भएको उम्मेदवारी दर्तामा अध्यक्ष पदका लागि पोष्टराज अधिकारी, सुरेश श्रेष्ठ, बालकृष्ण अधिकारी, अञ्जली थापा, र शिव कुमार रिजालको उम्मेदवारी दिएका थिए । बिहीबार अध्यक्ष पदमा उम्मेदवारी दिएका रिजालले उम्मेदवारी फिर्ता लिदैं अधिकारीकाे प्यानललाई सहयोग रहने जनाएका छन् ।
महासंघको निर्वाचन कार्यक्रमअन्तर्गत आज शुक्रबार विहान १० बजेदेखि दिउँसो ४ बजेसम्म मतदान हुनेछ । नेपाल पत्रकार महासंघ मकवानपुर जिल्ला शाखाको १८ सदस्यीय समिति चयनका लागि निर्वाचन हुँदैछ । ३ वर्षे कार्यकालका लागि एक सय १७ जना मतदाताले मतदान गर्नेछन् । मकवानपुरमा विभिन्न पदका लागि ४९ जनाले उम्मेदवारी दर्ता गराएकाेमा बिहीबार ४ जनाले उम्मेदवारी फिर्ता लिएका थिए । १ जना सदस्य, ७ जना प्रदेश परिषद सदस्य तथा १ जना केन्द्रिय परिषद सदस्य निर्विरोध निर्वाचित भइसकेका छन् ।
यसैगरी केन्द्रीय समितिको अध्यक्षका लागि चार जनाको उम्मेदवारी परेको छ । अध्यक्षका लागि देवीप्रसाद सापकोटा, निर्मला शर्मा, रमेश विष्ट र लालसिंह लामाले उम्मेदवारी दिएका छन् । वरिष्ठ उपाध्यक्ष पदका लागि गोविन्दप्रसाद चौलागाईं, दीपक आचार्य र रोसन पुरीले उम्मेदवारी रहेकाे छ ।
त्यस्तै उपाध्यक्ष महिलामा गङ्गा पौडेल र नितु पण्डितको उम्मेदवारी परेको छ । समावेशी उपाध्यक्षमा उमिदप्रसाद बागचन्द, मोहनकुमार सिंह र सुभाषप्रसाद साहले उम्मेदवारी दिएका छन् । यसैगरी महासचिवमा जन्मदेव जैशी, प्रकाश थापा, रामप्रसाद दाहाल र लेखनाथ न्यौपानेले उम्मेदवारी दिएको निर्वाचन समितिले जनाएको छ । महासंघका नौ हजार पाँच सयभन्दा बढी सदस्यले प्रत्यक्ष रूपमा मतदान गरी नेतृत्व चयनमा सहभागी हुदैछन् ।