चितवन । बागमती प्रदेशका स्वास्थ्य मन्त्री किरण थापाले चितवनको बकुलहर रत्ननगर अस्पताल र आयुर्वेद तथा वैकल्पिक चिकित्सालयको शुक्रबार छड्के अनुगमन गरेका छन् । स्वास्थ्य मन्त्रालयका सचिव डा. सुमित्रा गौतम र चिकित्सा महाशाखा प्रमुख डा. खगेश्वर गेलाल सहित मन्त्री थापाले बकुलहर रत्ननगर अस्पतालको आकस्मिक अनुगमन गरेका हुन् ।
अनुगमनका क्रममा उनले अस्पतालको सेवा प्रवाह, उपलब्ध स्रोत-साधन अवस्था तथा संरचनाको जानकारी लिए। अनुगमनपछि मन्त्री थापाले अस्पतालले आफ्नो क्षमता भन्दा बढी बिरामीको चाप भएपनी सेवा दिइरहेको बताए। उनले भने ‘हामी सेवाका क्रममा कुनै कन्जुस्याइँ गर्दैनौं। प्राथमिकता अनुसार बजेट समावेश गरेर अस्पताललाई थप सहयोग गर्नेछौं।’ स्वास्थ्य मन्त्रालयले अस्पतालका समस्या समाधानका लागि मार्गनिर्देशन गर्ने, आवश्यक आर्थिक तथा भौतिक सहयोग प्रदान गर्ने उनले प्रतिबद्धता जनाए।
उनले डाक्टर तथा स्वास्थ्यकर्मीले एप्रोन र परिचयपत्र अनिवार्य रूपमा लगाउन निर्देशन दिँदै अस्पताल व्यवस्थापनलाई यसमा थप ध्यान दिन आग्रह गरे। अनुगमनलाई नियमित बनाउने र सेवा बिस्तारलाई आवश्यक अध्ययनपछि मात्रै अघि बढाउने उनले जानकारी दिए । बकुलहर रत्ननगर अस्पतालमा ग्रामीण भेगका सेवाग्राहीको चाप बढी रहेको भन्दै मन्त्री थापाले सेवाको गुणस्तर कम हुन नदिने प्रतिबद्धता जनाए । अस्पताल व्यवस्थापनलाई बिरामीहरूको सुविधाका लागि प्रभावकारी योजना बनाउन समेत उनले निर्देशन दिए ।
सचिव डा. गौतमले अस्पतालको सेवामा केही सुधार देखिएको भन्दै सन्तोष व्यक्त गरिन् । उनले भनिन् ‘केही समयअघिको तुलनामा अहिले सेवा विस्तार भएको देखिन्छ, जुन सकारात्मक पक्ष हो। तर, अझै सुधार आवश्यक छ।’ प्रदेश सरकारको ध्यान स्वास्थ्य सेवा सुदृढीकरणमा रहेकाले आगामी दिनमा अस्पतालको सेवा प्रवाह थप गुणस्तरीय बनाउने उनले बताइन् ।
चिकित्सा महाशाखा प्रमुख गेलालले टीम वर्क गरेर सेवा प्रवाहलाई थप प्रभावकारी बनाउन सुझाव दिएका छन्। अनुगमन टोलीले अस्पताल भवनको निर्माण कार्य समयमै सम्पन्न गर्न निर्माण व्यवसायीलाई ताकेता गर्ने मन्त्रालयले जनाएको छ । साथै, आँखा सेवामा सुधार गर्दै अन्य आँखा अस्पतालहरूसँग समन्वय गरी १३ वटा अस्पतालमा सेवा विस्तार गर्ने योजना बनाइने बताइएकाे छ।
अस्पताल व्यबस्थापन समितिका अध्यक्ष गोपाल कर्मचार्य र मेडिकल सुपरिटेन्डेन्ट डा. मदन ज्ञवालीले मन्त्रालयको सुझाव र निर्देशन अनुसार सेवा बिस्तार तथा सुधार गर्दै लगिने बताएका छन् ।
मकवानपुर । नेकपा (माओवादी केन्द्र) का केन्द्रीय सदस्य विजय गौतमले फ्याँकिएकाे राजतन्त्रको औचित्यहीन बहसमा अलमलिन नहुने बताएका छन् ।
माओवादी केन्द्र निकट नेपाल दलित मुक्ति मोर्चा मकवानपुरको विस्तारित बैठक एवं प्रशिक्षण कार्यक्रमलाई सम्बोधन गर्दै पार्टी मकवानपुर जिल्ला इन्चार्ज समेत रहेका गौतमले मुलुकमा सुशासन, सम्बृद्धिको बहस हुनुपर्ने बेला केहीथान राजावादीहरुको रहरमा औचित्य सिद्धिएको राजतन्त्रको जबरजस्त बहस गर्न खोजिएको बताए । ‘यस्ता बहसमा कोही पनि अलमल्लिन हुँदैन’ उनले भने ‘मुलुकको समस्या र आवश्यक्ता भन्दा बाहिरको बहस समयको बर्बादी मात्र हाे ।’
‘सतहमा देखापरेका भ्रष्ट्राचार, विकृती र विसंगति औंल्याएर एकथरीहरुले जसरी राजतन्त्रलाई विकल्पको रुपमा चित्रित गर्ने दुस्साहस गरिरहेका छन् त्यो भन्दा कुरुप चित्र राजतन्त्रमा ब्यहोरेका छौं’ नेता गौतमले भने । अहिले मुलुकलाई अगाडी बढाउन सुशासन र सम्बृद्धिको आवश्यक बहस गर्नुपर्ने आवश्यक्ता रहेकाे उनले बताए । मुलुकमा आनन्दले डुल्न पाएका पुर्व राजाले अवान्छित हर्कत बढाए लाखौं युवा सडकमा आएर प्रतिवाद गर्ने र त्यतिबेला देश छोड्नु पर्ने अवस्था आउने उनले दावी समेत गरे ।
नेपाल दलित मुक्ति मोर्चाका केन्द्रीय उपाध्यक्ष अमर बहादुर बिकले हिजो जनयुद्धको अग्रमोर्चा सम्हालेको दलितहरुले बिभेदको प्रतिकको रुपमा रहेकाे राजतन्त्र फालेकाे बताए । उनकाे कुकृत्यको बारेमा नयाँ पुस्तालाई सुसूचित गराउँने दिन आए पूर्व राजाले अत्यन्त खराब परिस्थिति ब्यहोर्नुपर्ने चेतावनी समेत उनले दिए ।
नेकपा (माओवादी केन्द्र) बागमती प्रदेश उपाध्यक्ष एवं बागमती प्रदेश सभा सदस्य प्रेम पहादुर पुलामीले हजारौंको बलिदानको जगमा आएको संघीय लोकतान्त्रिक गणतन्त्र केही राजा चाहने रैतीहरुको रहरमा फर्कन असम्भव रहेको बताउँदै अनावश्यक दुस्साहस नगर्न चेतावनी दिए ।
कार्यक्रममा सहभागीलाई नेपाल दलित मुक्ति मोर्चाको केन्द्रीय उपमहासचिव गणेश विकले बैचारिक प्रशिक्षण चलाउनु भएको थियो। कार्यक्रममा नेकपा (माओवादी केन्द्र) बागमति प्रदेश सचिवालय सदस्य ललित घलान, मोर्चाकी जिल्ला ईन्चार्ज कमला विक, जिल्ला अध्यक्ष जमिन दियाली लगायतले सम्बोधन गरेका थिए।
मकवानपुर । ५ चैतमा भएको स्ववियु निर्वाचन २०८१ अन्तर्गत मकवानपुरमा अनेरास्ववियुबाट विजयी पदाधिकारी र सदस्यहरुलाई नेकपा एमाले मकवानपुरले सम्मान गरेकाे छ ।
एमाले मकवानपुरको जनसंगठन समन्वय संयन्त्रले अनेरास्ववियुबाट मकवानपुर बहुमुखी क्याम्पस, हेटौंडा क्याम्पस, निर्मल बहुमुखी क्याम्पस, वंशगोपाल क्याम्पस, वनविज्ञान संस्थानमा निर्वाचित स्ववियु सभापतिसहित पदाधिकारी र सदस्यलाई बिहीवार सम्मान गरेकाे हाे । जनसंगठन संयन्त्रका प्रमुख सन्तोष पौडेलको सभाध्यक्षता, नेकपा एमालेका केन्द्रीय सदस्य तथा मकवानपुर इञ्चार्ज रामेश्वर रानाको प्रमुख आतिथ्यतामा भएको कार्यक्रममा केन्द्रीय सदस्य केदारप्रसाद न्यौपाने, पार्टी केन्दीय सल्लाहकार परिषद् सदस्य डोरमणि पौडेल, पार्टी जिल्ला अध्यक्ष श्रीधर पोख्रेललगायतले निर्वाचित पदाधिकारी तथा सदस्यहरुलाई टिका, माला लगाएर सम्मानसहित बधाई ज्ञापन गरेका छन् ।
पार्टी अनेरास्ववियुको स्ववियु निर्वाचन लक्षित विशेष योजनाले स्ववियु निर्वाचनमा सफलता हात परेको भन्दै विगतको जुर्मुराउँदो अनेरास्ववियु निर्माणमा लाग्न सबै नेताहरुले अनुरोध गरे । स्ववियुमा निर्वाचित भएकाहरुले विद्यार्थीको हकहितमा लाग्दै क्याम्पसमा अनेरास्ववियुको एकल वर्चश्व हुने गरि काम गरेर देखाउनुपर्ने पार्टी अध्यक्ष श्रीधर पोख्रेलले जोड दिए । संयन्त्र प्रमुख पौडेलले विद्यार्थीहरुको लोकप्रिय मतबाट अनेरास्ववियु मकवानपुरको बलियो संगठनको रुपमा स्थापित हुँदै आएकोमा यसलाई कायम राख्नुपर्नेमा जोड दिए ।
कार्यक्रममा नेकपा एमाले केन्द्रीय निर्वाचन आयोग सदस्य अनन्त पौडेल, पार्टी प्रदेश कमिटी सचिवालय सदस्य रघुनाथ खुलाल, प्रदेश कमिटी सदस्यहरु बद्री लम्साल, भगवति पुडासैनी, पार्टी जिल्ला उपाध्यक्ष हिदम लामा, सचिव सिता विष्टले मन्तव्य राखे । यस्तै, कार्यक्रममा पार्टी जिल्ला सदस्य तथा विद्यार्थी इञ्चार्ज आकाश अधिकारी, अनेरास्ववियु स्थायी कमिटी सदस्य किसन घिसिङ, अनेरास्ववियु केन्द्रीय सदस्य तथा जिल्ला इञ्चार्ज भुवन मैनाली, अनेरास्ववियु मकवानपुर अध्यक्ष अमृत बर्तौलालगायतको अतिथ्यता रहेको थियो । मिलन पाठकले कार्यक्रमको सहजीकरण गरेका थिए ।
जिल्लाका ८ क्याम्पसमध्ये ४ वटामा अनेरास्ववियुले सभापतिमा जित हासिल गरेको थियाे । मकवानपुर, हेटौंडा र निर्मल बहुमुखी क्याम्पसमा निर्वाचनबाट र वंशगोपालमा सर्वसम्मतिले सभापति चयन भएको थियो ।
मकवानपुर । विद्यार्थी जीवनको शिक्षाको आधार भनेर परिभाषित गरिदै आएको माध्यमिक शिक्षा परीक्षा (एसइई) बिहीबारबाट सुरु भएकाे छ । मकवानपुर जिल्लाका २८ वटा केन्द्रमा साधारण, प्राविधिक र ग्रेडवृद्धि तर्फ गरी १५६ जना परीक्षार्थी परीक्षामा अनुपस्थित भएका छन् ।
यस वर्ष मकवानपुरबाट साधारण, प्राविधिक र ग्रेडवृद्धिका गरी ७ हजार ४ सय ५६ जना जना विद्यार्थीले एसइईकाे लागि फर्म भरेकाेमा १५६ जना अनुपस्थित रहेकाे शिक्षा विकास तथा समन्वय इकाई मकवानपुरले जनाएकाे छ । साधारण तर्फ ५ हजार ५६७, प्राविधिक तर्फ २२० तथा ग्रेड वृद्धि तर्फ ४५६ जना एसइईमा सहभागी भएकाे इकाईले प्रकाशित तथ्याङ्कमा उल्लेख छ ।
साधारण तर्फ २ हजार ९०८ जना छात्र र २ हजार ६५९ जना छात्रा परीक्षामा सहभागी भए भने ३५ जना छात्र र २८ जना छात्रा परीक्षामा अनुपस्थित भएका छन् । यस्तै प्राविधिक धार तर्फ १०८ जान छात्र र ११२ जना छात्रा परीक्षामा सहभागी हुदाँ ४ जना छात्र र ३ जना छात्रा अनुपस्थित रहेका छन् । यसैगरी ग्रेड वृद्धि तर्फ १९३ जना छात्र र २६३ जना छात्रा परीक्षामा सहभागी हुँदा ४४ जना छात्र र ४२ जना छात्रा अनुपस्थित रहेकाे इकाईले जनाएकाे छ ।
मकवानपुरको भिमफेदीमा रहेको क्षेत्रीय कारागारबाट ६ जनाले एसइई परीक्षा दिएका छन् । विभिन्न कसुरमा जेल जीवन भोगिरहेका ६ जना कैदीबन्दीले भीमफेदी कारागारबाट यस वर्ष एसईई दिएका हुन् । उनीहरुले परीक्षाको पहिलो दिन बिहीबार भीमफेदी कारागारमै बसेर परीक्षा दिए । सवारी ज्यान, जबरजस्ती करणी, डाँका, चोरी र लागूऔषध मुद्दामा कैद भुक्तान गरिरहेका ३ जना बन्दी र ३ जना कैदी एसइई परीक्षामा सहभागी भएको कारागारका जेलर तिर्थराज पौडेलले बताए ।
हेटौंडा उपमहानगरपालिका—२ स्थित सिद्धार्थ माविबाट एसईई फाराम भरेका कैदीबन्दीहरुले जेलभित्रबाटै परीक्षा दिने व्यवस्था मिलाइएको थियाे । सुरक्षाकर्मीको समन्वयमा सिद्धार्थ माविका शिक्षकले नै उत्तरपुस्तिका र प्रश्नपत्र कारागार पु¥याएका दिए । यसैगरी मकवानपुरको हेटौंडा ११ मा रहेको बाल सुधार गृहका २ जना बालकहरु पनि परीक्षमा सहभागी भएका छन् ।
मकवानपुरमा एसइईकाे लागि २८ वटा परीक्षा केन्द्र तोकिएकाे शिक्षा समन्वय इकाई प्रमुख सुदिप गिरीले जानकारी दिए । गत वर्ष २६ वटा मात्रै परीक्षा केन्द्र तोकिएको मकवानपुरमा कैलाश गाउँपालिकाको नामटारस्थित कालिका माविमा साधारण तर्फ र हेटौंडाको श्रमिक माविमा प्राविधिक धारकाे लागि परीक्षा केन्द्र थप गरिएको प्रमुख गिरीले बताए । कैलाश गाउँपालिकामा परीक्षा केन्द्र थप गरिएसँगै मकवानपुरको सबै स्थानीय तहमा एसइईकाे परीक्षा केन्द्र कायम भएको छ ।
जिल्लामा एसइई परीक्षाका लागि २८ जना केन्द्राध्यक्ष, ५१ जना सहायक केन्द्राध्यक्ष, ३७४ निरीक्षक, ७६ परीक्षा सहायक, १५० कार्यालय सहयोगी र ४२० जना सुरक्षाकर्मी परिचालन गरिएकाे इकाईले जनाएकाे छ । जिल्लामा सामुदायिक र संस्थागत गरी १ सय ३९ वटा विद्यालयबाट एसइईमा विद्यार्थी सहभागी भएका हुन् ।
बागमती गाउँपालिकाको जनता मावि फापरवारी केन्द्रमा ४ वटा विद्यालयका विद्यार्थी सहभागी भएका छन् । यसैगरी बकैया गाउँपालिका हात्तीसुडेस्थित बुद्ध मावि परीक्षा केन्द्रबाट ७ विद्यालयका, बकैयाकै महेन्द्र मावि छतिवन परीक्षा केन्द्रमा ६ विद्यालयका हेटौंडा उपमहानगरपालिका हटियाको जनप्रीय मावि परीक्षा केन्द्रमा ७ वटा विद्यालयका, महेन्द्र मावि भीमफेदी परीक्षा केन्द्रमा ५ विद्यालयका, थाहानगर पालिकास्थित जनकल्याण मावि पालुङ्ग परीक्षा केन्द्रमा ८ विद्यालयका, थाहा नगरकै मत्स्य नारायण मावि परीक्षा केन्द्रमा ३ विद्यालयका, सरस्वती बालबोधनी मावि मार्खु परीक्षा केन्द्रमा ५ विद्यालयका, मनहरी गाउँपालिकाको राष्ट्रिय रोटरी मावि परीक्षा केन्द्रमा ४ विद्यालयका मनहरीकै महेन्द्र किरण मावि ज्यामिरे परीक्षा केन्द्रमा ४ वटा विद्यालयका हेटौंडा बसामाडीस्थित महेन्द्र किरण मावि केन्द्रमा ३ वटा विद्यालयका, हेटौंडा १९ बस्तिपुरको निर्मल मावि परीक्षा केन्द्रमा ७ वटा विद्यालयका परीक्षार्थी सहभागी भए ।
यसैगरी हेटौंडा ६ स्थित वंशगोपाल मावि चौघडा परीक्षा केन्द्रमा ३ वटा विद्यालयका, हेटौंडाकै आधुनिक मावि परीक्षा केन्द्रबाट ८ वटा विद्यालयका, बालज्योति मावि हेटौंडा पिप्ले परीक्षा केन्द्रमा ३ वटा विद्यालयका, हेटौंडा १० ज्ञानदा मावि परीक्षा केन्द्रबाट ३ वटा विद्यालयका, हेटौंडा ४ स्थित भुटनदेवी मावि परीक्षा केन्द्रबाट ७ वटा विद्यालयका, हेटौंडा २ स्थित सिद्धार्थ मावि परीक्षा केन्द्रबाट ७ वटा विद्यालयका विद्यार्थीले एसइईमा सहभागी भए । मकवानपुरका २ वटा संस्थागत विद्यालयमा समेत एसइईको परीक्षा केन्द्र निर्धारण गरिएकोमा हेटौंडा ५ स्थित जीएस निकेतन परीक्षा केन्द्रबाट ३ वटा विद्यालयका, हेटौंडा १० स्थित सोलिड्यारिटी इङ्गलिस एकेडेमी परीक्षा केन्द्रबाट ६ वटा विद्यालयका परीक्षार्थी सहभागी भए ।
यस्तै हेटौंडा ९ स्थित प्रगति मावि परीक्षा केन्द्रबाट ६ वटा विद्यालयका, थाहा नगरपालिका स्थित बज्रवाराही मावि परीक्षा केन्द्रबाट ७ वटा विद्यालयका, हेटौंडा १ स्थित अमर मावि परीक्षा केन्द्रबाट २ वटा विद्यालयका, मकवानपुरगढी ६ स्थित जालपादेवी मावि परीक्षा केन्द्रबाट ६ वटा विद्यालयका, हेटौंडा ८ स्थित चन्द्रोदय मावि परीक्षा केन्द्रबाट ६ विद्यालयका, प्रजा जागृति मावि राक्सिराङ परीक्षा केन्द्रबाट ५ वटा विद्यालयका, कैलाश गाउँपालिका–९, नामटारस्थित कालिका मावि परीक्षा केन्द्रमा ५ वटा विद्यालयका विद्यार्थी परीक्षामा सहभागी भए ।
यस्तै प्राविधिक तर्फका परीक्षार्थीहरुको लागि थप गरिएको हेटौंडा ४ स्थित श्रमिक मावि परीक्षा केन्द्रबाट १० वटा विद्यालयका नियमिततर्फ तथा ग्रेडवृद्धितर्फका विद्यार्थीले परीक्षा दिएका छन् ।