मकवानपुर । फागुन २१ काे लागि तोकिएकाे प्रतिनिधि सभाकाे निर्वाचनकाे मिति नजिकिदै जादाँ मकवानपुरमा तीव्र रुपमा प्रचार प्रसारकाे कार्यमा पार्टी जुटेकाे छ । जिल्लामा क्रियाशील तथा उम्मेदवारी दिएका दलकासहित स्वतन्त्र उम्मेदवार समेत घरदैलोमा व्यस्त छन् ।
यसैबिच मकवानपुर क्षेत्र नं. २ का एमाले उम्मेदवार महेश कुमार बर्तौला अघिल्लो निर्वाचनमा गरेका प्रतिबद्धताहरू पूरा गरेको दाबी गरे । ‘मैले चुनावका बेला संसदमा निदाएर बस्दिनँ, रेडियो र टेलिभिजन खोल्दा आफ्नो क्षेत्रको मुद्दा उठाएको सुन्न र देख्न पाउने गरी काम गर्छु भनेको थिएँ,’ बर्तौला प्रचारप्रसारमा भने, ‘त्यो वाचा मैले संसदमा देखाएको सक्रियतामार्फत पूरा गरेको छु ।’
थाहानगरकाे गाउँटोलमा पुगेका बर्तौलालाई मकवानपुरका दार्शनिक नेता रुपचन्द्र बिष्ट (रुदाने) कै झल्को आउने गरी स्थानीयले सम्झिएका छन् । निर्वाचनका क्रममा घरदैलो गर्दै थाहा नगरपालिका (पालुङ) का गाउँटोलहरुमा पुगिरहेका बर्तौलाको कार्यशैलीमा जनमुखी नेता रुपचन्द्र बिष्ट ‘‘रुदाने’को झल्को पाएको उनीहरुले बताएका छन् ।
आफ्नो कार्यकालको महत्त्वपूर्ण उपलब्धिका रूपमा चित्लाङ–चन्द्रागिरी–थानकोट सडकलाई प्रस्तुत गर्दै उनले भने ‘मैले यो सडकको स्तरोन्नतिका लागि स्रोतको अभाव हुन दिन्न भनेको थिएँ । ३२ महिनाकै कार्यकालमा सरकारबाट झण्डै ६२ करोड बजेट सुनिश्चित गराउन सफल भएको छु । अहिले सडकको काम तीव्रताका साथ भइरहेको छ ।’
विगतमा चुनाव जितेपछि नेताहरू गाउँ नफर्कने आम गुनासोलाई बर्तौलाले तोडिदिएको स्थानीयले बताएका छन् । २०७९ को निर्वाचनपछि उनी संसद चलेको समयबाहेक अधिकांश समय गाउँकै घरदैलो र जनताका समस्या समाधानमा केन्द्रित हुने गरेका थिए ।
एमालेका निर्वाचन फोकल पर्सन आशिष अस्लामीका अनुसार, मतदाताहरूले बर्तौलाको सक्रियतालाई रुदानेको जनमुखी शैलीसँग तुलना गरेका छन् । बुधबार थाहाका मतदाताहरूसँग भेटघाट गर्दै बर्तौलाले स्थानीयका गुनासो सुन्ने, सुझाव लिने तथा आशीर्वाद ग्रहण गरेका थिए ।
यस्तो छ बर्तौलाको १० बुँदे प्रतिवद्धता
महेश कुमार बर्तौलाले १० बुँदे प्रतिवद्धता पत्र सार्वजनिक गरेका छन् । सामाजिक सञ्जाल फेसबुकमार्फत उनले आउँदो निर्वाचनमा आफ्ना १० बुँदे प्रतिवद्धता सार्वजनिक गरेका हुन् ।
१. मध्यवर्ती क्षेत्रका समस्याको दिगो समाधानलाई पहिलो प्राथमिकतामा राखेका छन्। भूमि समस्या समाधानका लागि कानूनी सुनिश्चितता, मानव–वन्यजन्तु द्वन्द्व व्यवस्थापन तथा न्यायोचित क्षतिपूर्ति र मध्यवर्ती क्षेत्रको सिमाना हेरफेरका विषयमा आवश्यक पहल गर्ने उनको प्रतिवद्धता छ।
२.पूर्वाधार विकासअन्तर्गत खानेपानी, सिंचाइ, कृषि तथा सञ्चार पूर्वाधार विस्तार, बस्ती संरक्षण तटबन्धन, सडक र पुल निर्माणलाई प्राथमिकता दिइने उल्लेख गरिएको छ । विशेषगरी रूपचन्द्र विष्ट मार्ग (मनहरी–राक्सिराङ–कैलाश–थाहा जोड्ने सडक) को निर्माण तथा स्तरोन्नतिमा पहल गरिने उल्लेख गरिएको छ।
३. स्वास्थ्य सेवामा नागरिकको सहज र सरल पहुँच स्थापना गर्ने योजना अघि सारिएको छ।
४. कृषि क्षेत्र सुदृढीकरणका लागि दुग्धजन्य र मासुजन्य उत्पादनको बजार विस्तार गर्दै ‘खोरेतमुक्त मकवानपुर’ अभियान सञ्चालन गरिने, वन्यजन्तुबाट हुने बाली क्षतिमा न्यायोचित क्षतिपूर्ति तथा नियन्त्रणका लागि कानूनी र संरचनागत व्यवस्था गरिने प्रतिवद्धता सार्वजनिक गरिएको हो।
५. सहकारी, कृषि र वन स्रोतको परिचालनमार्फत रोजगारी तथा स्वरोजगार सिर्जना गर्ने योजना पनि अघि सारिएको छ ।
६. शिक्षा, युवा तथा खेलकुद क्षेत्रमा ‘एक पालिका–एक आवासीय विद्यालय’ अवधारणाअनुसार शैक्षिक पूर्वाधार विकास, ‘पढ्दै कमाउँदै’ कार्यक्रमको नीतिगत सुनिश्चितता, युवा–विद्यार्थीसँग संसदीय संवाद कार्यक्रम सञ्चालन तथा मनहरीमा मदन भण्डारी क्षेत्रीय रंगशाला निर्माणमा पहल गरिने उल्लेख गरिएको छ। युवा उद्यम प्रवद्र्धन, स्टार्टअप कर्जा सहजता र कर्जाको सीमा वृद्धि गर्न प्रतिवद्ध रहेको बर्तौलाले बताए ।
७. कानून तथा नीति निर्माण प्रक्रियामा जनसहभागिता सुनिश्चित गर्ने, विभिन्न जाति, जनजाति, सिमान्तकृत समुदाय, महिला, दलित तथा अपाङ्गता भएका व्यक्तिको अधिकार, ज्ञान, सीप र संस्कृतिको संरक्षण तथा प्रवद्र्धन गर्ने प्रतिवद्धता पनि सार्वजनिक गरिएको छ ।
८. जनताका विकास आयोजनालाई सम्बोधन गर्न संसदीय निर्वाचन क्षेत्र विकास कार्यक्रम लागू गर्न पहल गरिने,
९. राक्सिराङ–कैलाश गाउँपालिकामा ‘समृद्धि विशेष कार्यक्रम’ सञ्चालन तथा थाहा, इन्द्रसरोवर र भीमफेदी गाउँपालिका समेटेर उत्तरी मकवानपुरमा पर्यटन सर्किट निर्माण गरिने योजना अघि सारिएको छ ।
१०. देशव्यापी रूपमा बढ्दो लागुऔषध दुव्र्यसन न्यूनीकरणका लागि कानूनी तथा संरचनागत सुधारसहित अभियान सञ्चालन गर्ने र स्थानीय, प्रदेश तथा संघीय सरकारसँग समन्वय गरी मकवानपुरमा उद्योगधन्दा सञ्चालनका लागि लगानीमैत्री वातावरण निर्माण गर्ने उम्मेदवारको भनाइ छ ।
एमाले देश निर्माणको नेतृत्वदायी शक्ति: राना
मकवानपुर क्षेत्र नं. १ का नेकपा एमाले उम्मेदवार रामेश्वर रानाले यहि फागुन २१ गते हुने निर्वाचनलाई आफ्नो पक्षमा माहोल बनाउनी उदेश्यले चुनावी घरदैलो तथा मतदाता भेटघाट कार्यक्रमलाई तीव्र बनाएका छन् । उनले पछिल्ला दिनहरूमा आफ्नो निर्वाचन क्षेत्रमा निरन्तर रुपमा जनतामाझ पुगेका रानाले हेटौंडा उपमहानगरपालिकाकाे ६ र १६ नम्बर वडामा आयोजित कार्यक्रमलाई सम्बोधन गर्दै एमाले देश निर्माणको नेतृत्वदायी शक्ति भएको दाबी गरेका छन्।
उनले भने ‘एमाले देश बनाउने शक्ति हो देश बिगार्ने होइन ।’ उनले विगतका सरकारहरूको कामको समीक्षा गर्दै अबको निर्वाचन देशलाई सही मार्गमा फर्काउने अवसर भएको उल्लेख गरे । फरक राजनीतिक परिस्थिति र चुनौतीपूर्ण अवस्थाबीच हुन लागेको यस निर्वाचनलाई उनले निर्णायक मोडको रूपमा व्याख्या गरे।
रानाले कार्यकर्ता र समर्थकहरूलाई घर–घरमा पुगेर पार्टीका एजेन्डा स्पष्ट रूपमा राख्न आग्रह गरे। जनताका गुनासा, आलोचना र सुझावलाई गम्भीरतापूर्वक सुन्ने र समाधानतर्फ अग्रसर हुने प्रतिबद्धता जनाउँदै उनले विकास, सुशासन र स्थायित्वलाई मुख्य प्राथमिकता बनाउने बताए।
‘देशलाई अस्थिरता र अव्यवस्थाबाट मुक्त गर्दै सही ट्र्याकमा ल्याउन देशभर एमालेको जित आवश्यक छ’ उनले भने । राष्ट्रको स्वाभिमान, समृद्धि र स्थायित्वका लागि एमालेको बहुमत अपरिहार्य रहेकाे उनले बताए । ‘घरदैलो क्रममा स्थानीय राखेका समस्या, अपेक्षा र सुझावलाई समेटेर योजनाबद्ध रूपमा समाधान गर्ने बिश्वास रानाले दिएका छन्।
मकवानपुर । मकवानपुरको हेटौडा उपमहानगरपालिका–१९ सान्नानटारमा ट्रिपरले मोटरसाइकललाई ठक्कर दिदा १ जनाको मृत्यु भएको छ ।
मंगलबार दिउँसो पूर्व–पश्चिम राजमार्गको हेटौंडा मनहरी सडक खण्ड अन्तर सान्नानटारमा मनहरीबाट हेटौडा आउँदै गरेको लु.३४ प ४६७५ नम्बरको मोटरसाइकललाई सोही दिशाबाट आउँदै गरेको बा.प्र.०३–००१ ख ११७९ नम्बरको ट्रिपरले ठक्कर दिएको थियो ।
दुर्घटनामा मोटरसाइकल चालक रुपन्देही जिल्लाका २८ वर्षीय जगदीश थारु घाइते भएकोमा उपचारको क्रममा हेटौंडा अस्पतालका चिकित्सकले मृत घोषणा गरेको जिल्ला प्रहरी कार्यालय मकवानपुरले जानकारी दिएको छ । दुर्घटनामा घाइते मोटरसाइकलको पछाडि सवार दाङ जिल्लाको राप्ती–६ का २२ वर्षीय आदित्य चौधरीको हेटौँडा अस्पतालमा उपचार भइरहेको छ ।
ट्रिपर चालक हेटौंडा–१५ भोर्लेका २६ वर्षीय रोहित तामाङलाई नियन्त्रण लिइएको तथा घटनाको अनुसन्धान भइरहेको प्रहरीले जानकारी दिएको छ ।
मकवानपुर । हिन्दुहरुकाे प्रमुख चाड महाशिवरात्री पर्व आज आइतबार मनाइदैछ । महाशिवरात्री अथवा शिवरात्री हिन्दुहरूको प्रमुख चाड हो। महाशिवरात्री पर्व आइतबार भगवान् शिवको स्तुति गर्दै पशुपतिनाथलगायत देशका विभिन्न शिवालयहरूमा धुमधामका साथ मनाइँदैछ ।
देश तथा विदेशबाट श्रद्धालु तथा साधुसन्त यो मेला भर्न पशुपतिमा आउने गरेका छन् । महाशिवरात्री पर्वमा पशुपतिनाथमा लाग्ने मेला भने विशिष्ट र अन्तर्रा्ष्ट्रिय मेला नै हो । यो भगवान शिवको प्रमुख पर्व हो। भगवान शिवको उत्पत्ति भएको रातका नामबाट नामकरण भएको यो पर्व कालरात्री, मोहरात्री, सुखरात्री र शिवरात्री नामक चार प्रमुख रात्रि मध्ये एक पवित्र पर्वका रूपमा पुराणहरूमा वर्णित छ।
फाल्गुन कृष्ण चतुर्दशीका दिन मनाइने यस पर्वलाई सम्पूर्ण दीन दुःखी र कष्टपूर्ण अवस्थामा रहेका प्राणीहरूको हृदयमा धर्मको उदय गराउने आशुतोष भगवान् शिवको अति प्यारो दिनका रूपमा पनि लिइने गरिन्छ। व्रत उत्सव मध्ये सर्वोत्तम कहलिएको महाशिवरात्रीका दिन भक्तजनहरूले शुद्ध भई शिव मन्दिरमा पूजा-अर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र चढाउने गर्दछन्।
यस पर्वका दिन उपवास गरी ” ॐ नमः शिवाय” मन्त्र जप्ने गरेमा सर्वसिद्धि लाभ भई यमलोक जानु नपर्ने धार्मिक विश्वास रहेको छ। ब्रह्माले रूद्ररूपी शिवजीलाई उत्पन्न गरेको दिन, शिव पार्वतीको विवाहको दिन शिवरात्री पर्व कृष्ण चतुर्दशीमा मनाइन्छ। निर्जल व्रत, रात्री जागरण, चार प्रहरको पूजा, शिवलिंगमा दुधको अभिषेक र शिव महिमा कीर्तन शिवरात्रिको पूजा अर्चनाका मुख्य अङ्ग मानिन्छन्। शिवरात्रि पर्वलाई पर्वको राजा भनिन्छ र शिवरात्रिको पालनाले भोग र मोक्ष दुवैको प्रप्ति हुन्छ भनिन्छ।
यस दिन शिवभक्त, शिव मन्दिरहरूमा गएर शिवलिंगमा बेल-पत्र दूध, भाङ आदि चढाउने, पूजन गर्ने, उपवास बस्ने तथा राती जागरण गर्दछन्। शिव लिङ्गमा बेल-पत्र चढाउनु, उपवास तथा रात्री जागरण गर्नु जस्ता विशेष कर्मको सम्पादन यस पर्वमा हुने गर्दछ। सबै पौराणिक कथामा नीलकन्ठको कथा सबैभन्दा चर्चित छ । महाशिवरात्रीको दिन नै समुन्द्र मन्थन गरिरहँदा कालकेतु विष निकालिएको थियो भनिन्छ । भगवान शिवले सम्पूर्ण ब्रम्हान्डको रक्षाका लागि स्वयम्ले ति सबै विष पिएका थिए । त्यही क्रममा उनको कन्ठ वा गला नीलो भएको थियो । त्यसैले भगवान शिवलाई नीलकण्ड पनि भनिन्छ ।
यस दिन शिवको विवाह भएको थियो त्यसैले राती शिवजीको जन्ती निकालेर उत्सव गर्ने चलन पनि छ। वास्तवमा शिवरात्रिको परम पर्व स्वयं परमपितापरमात्माले सृष्टोलीा अवतरित भएको स्मृति पर्व हो। यहाँ रात्रि शब्दले अज्ञान एवं अन्धकारबाट हुने नैतिक पतनको द्योतन/सङ्केत गर्छ। परमात्मा नै ज्ञानको सागर हो, जसले मानव मात्रलाई सत्य ज्ञानद्वारा अन्धकारबाट प्रकाश तर्फ अथवा असत्यबाट सत्य तर्फ लैजान्छ। ब्राह्मण, क्षत्रिय, वैश्य, शूद्र, स्त्री-पुरुष, बालक, युवा र वृद्ध सबै यस व्रतको पालन गर्न योग्य मानिन्छन्। यस व्रतको विधानमा सवेरै स्नानादिबाट शुद्ध भएर उपवास गर्ने गरिन्छ।
यस दिन माटोको भाँडोमा पानी भरेर, त्यसमाथि बेलपत्र, आँक, धतूरोको फुल, चामल आदि हालेर ‘शिवलिङ्ग’मा अर्पण गरिन्छ। यदि नजिकमा शिवालय छैन भने, शुद्ध गिलो माटोबाटै शिवलिंग बनाएर त्यसलाई पूजा गर्ने विधान छ। राती जागरण बसेर शिवपुराणको पाठ र कथा सुन्नु प्रत्येक व्रतालुको धर्म मानिन्छ। व्रतको भोलिपल्ट बिहान सवेरै जौ, तिल, खीर र बेलपत्रको हवन गरेर व्रत समाप्त गरिन्छ।
महाशिवरात्रि भगवान शङ्करका निमित्त सबैभन्दा पवित्र दिन हो। यो आफ्नो आत्मालाई पुनीत बनाउने महाव्रत हो। यो व्रतको पालना गरेर सबै पापहरूको नाश हुन्छ। हिंसक प्रवृत्तिमा परिवर्तन आउँछ। निरीह जीवहरू प्रति दयाभाव उब्जिन्छ। ईशान संहितामा यसको महत्ताको उल्लेख यसरी गरिएको छ-
॥शिवरात्रि व्रतं नाम सर्वपापं प्रणाशनम्। आचाण्डाल मनुष्याणां भुक्तिमुक्तिप्रदायकम्॥
चतुर्दशी तिथिका स्वामी भगवान शिव हुन्। अत: ज्योतिषशास्त्रमा यस तिथिलाई परम् शुभफलदायी तिथि भनिएको छ। त्यसो त शिवरात्री प्रत्येक महिनाको चतुर्दशीका दिन पर्दछ। तर फागुन कृष्ण चतुर्दशीलाई सबै शिवरात्रि मध्ये विशेष भएकाले महाशिवरात्रि भनिएको हो। ज्योतिषीय गणना अनुसार सूर्यदेव पनि यस समयसम्म उत्तरायणमा आइसकेका हुन्छन् तथा ऋतु परिवर्तनको यो समय अत्यन्त शुभ मानिन्छ। शिवको अर्थ हो कल्याण। शिव सबैको कल्याण गर्ने देवता हुन्। अत: महाशिवरात्रिमा सरल उपाय गर्दा मात्र पनि इच्छित सुखको प्राप्ति हुन्छ।
ज्योतिषीय गणितको अनुसार चतुर्दशी तिथिमा चन्द्रमा अफ्नो क्षीणस्थ अवस्थामा पुग्दछ। त्यस कारण बलहीन चन्द्रमा सृष्टिलाई ऊर्जा प्रदान गर्न असमर्थ हुन्छन्। चन्द्रमाको सीधा सम्बन्ध मनसग हुन्छ। अब मन: कमजोर हुदा भौतिक सन्तापले प्राणीलाई घेर्दछ तथा विषादको स्थिति उत्पन्न हुदछ। जसबाट कष्टहरूको सामना गर्नु पर्दछ। चन्द्रमा शिवको मस्तकमा सुशोभित छन्। अत: चन्द्रदेवको कृपा प्राप्त गर्न भगवान शिवको आश्रय किने गरिन्छ। महाशिवरात्रि शिवको प्रिय तिथि हो। अत: प्राय: ज्योतिषीहरू शिवरात्रिका दिन शिवको आराधना गरेर कष्टहरूबाट मुक्ति पाउन सुझाव दिन्छन्। शिव आदि-अनादि हुन्। सृष्टिको विनाश वा पुन:स्थापनको बीचको मुख्य कडी हो प्रलय अर्थात कष्ट, पुन:स्थापना अर्यात सुख। अत: ज्योतिषमा शिवलाई सुखको आधार मानेर महाशिवरात्रिमा अनेक किसिमका अनुष्ठान गर्ने महत्ता दर्शाइएको छ।
शिवरात्री पूजामा व्रतकालमा भगवान शिवको ध्यान, पूजन र जप गरिन्छ भने जागरण कालमा भक्तको सम्पूर्ण सत्ता जागरणबाट शिवमय बन्दछ। पूजन वा शिवार्चनमा इशान मूर्तिलाई दुधले स्नान गराइन्छ। सृष्टिको प्रारम्भमा यसै दिन मध्यरात्री कालमा भगवान् शङ्कर ब्रह्माबाट रुद्रका रूपमा अवतरण भएका थिए भन्ने धार्मिक विश्वास रहेको छ।
महाशिवरात्रिको अवसरमा काठमाडौँको पशुपतिनाथ, झापाको अर्जुनधारा, सुनसरीको रामधुनी र पिण्डेश्वर, खोटङ्गको हलेसी, मोरङ्गको किराँतेश्वर, गुल्मीको गलेश्वर आदि विविध शिवालयमा भक्तजनको भीड लाग्दछ। यस अवसरमा भारत लगायत विश्वको विभिन्न स्थानहरूबाट जोगी, योगी एवं भक्तजन पशुपति मन्दिरमा आउँछन्।
मकवानपुर । लागुऔषध दुर्व्यसन न्यूनीकरणलाई संस्थागत, समुदायमुखी र परिणाममुखी बनाउने उद्देश्यसहित ३ महिने अभियान सञ्चालन भइरहेको छ । जिल्ला प्रशासन कार्यालय मकवानपुरको आयोजना तथा सिआन पुनर्स्थापना केन्द्र हेटाैंडाकाे व्यवस्थापनमा मनहरी गाउँपालिकामा अभियान गरिएको छ।
अभियान अन्तरगत पालिकास्तरीय समन्वय तथा अन्तरक्रिया तथा बैठकमा लागुऔषध नियन्त्रणलाई स्थानीय तहको साझा जिम्मेवारीका रूपमा स्थापित गर्दै लागुऔषध नियन्त्रण मार्गदर्शन २०७६ बमोजिम पालिका स्तरीय समन्वय समिति गठन गर्ने निर्णय भएकाे छ ।अन्तरक्रियामा गाउँपालिका अध्यक्ष रन्जन कालाखेतीले मनहरीलाई लागुऔषध दुर्व्यसनको जोखिमबाट सुरक्षित राख्न दीर्घकालीन रणनीति आवश्यक रहेको उल्लेख गर्दै बजेट विनियोजन, युवा लक्षित कार्यक्रम, विद्यालय सचेतना, पुनर्स्थापना सहकार्य तथा जनअभियान विस्तारमा गाउँपालिकाले नेतृत्वदायी भूमिका निर्वाह गर्ने प्रतिबद्धता व्यक्त गरे।
प्रमुख प्रशासकीय अधिकृत रमेश सुवेदी ले नीति, योजना, तथ्याङ्क संकलन तथा कार्यक्रम कार्यान्वयनलाई एकीकृत ढंगले अगाडि बढाइने स्पष्ट पारे।अभियान अन्तर्गत मनहरी गाउँपालिकाका भोज सिद्ध माविमा सचेतना कार्यक्रम सञ्चालन गरिएकाे छ। कार्यक्रममा लागुऔषधको शारीरिक, मानसिक, पारिवारिक तथा सामाजिक असर, कानुनी परिणाम, जीवन सीप विकास तथा सकारात्मक जीवनदृष्टि सम्बन्धी प्रशिक्षणमूलक अन्तरक्रिया गरिएको हाे । शिक्षक, अभिभावक, रिकभरिङ नेपाल बागमती प्रदेशका प्रतिनिधि तथा सिआन पुनर्स्थापना केन्द्रका परामर्शदाताको सहभागितामा रहेकाे थियाे ।
समुदायस्तरमा सन्देश प्रवाहलाई सुदृढ बनाउन गाउँपालिकाका मुख्य चोक, सार्वजनिक स्थल तथा बजार क्षेत्रहरूमा सन्देशमूलक होर्डिङ बोर्ड स्थापना गरिएको छ। विद्यालय बाहिर धूम्रपान निषेधित क्षेत्रका बोर्ड राख्नुका साथै सन्देशमूलक पर्चा तथा जनचेतनामूलक सामग्री वितरण समेत गरिएको छ। कार्यक्रमहरूले लागुऔषध विरुद्धको अभियानलाई जनस्तरदेखि नीतिगत तहसम्म जोड्दै सामाजिक उत्तरदायित्व, सहकार्य र सचेतनाको सशक्त वातावरण निर्माण गर्ने बताइएकाे छ ।
गाउँपालिका अध्यक्ष रन्जन कालाखेती अध्यक्षतामा भएकाे अन्तरक्रिया तथा बैठकमा प्रमुख प्रशासकीय अधिकृत, वडा अध्यक्षहरू, कार्यपालिका सदस्यहरू, विभिन्न शाखाका प्रमुखहरू, सुरक्षा निकाय तथा सरोकारवाला प्रतिनिधिहरूको सहभागिता थियो ।
मकवानपुर । आगामी फागुन २१ गते हुने प्रतिनिधिसभा निर्वाचन नजिकिदै जाँदा हेटौंडाको राजनीतिक माहोल क्रमशः तातिँदै गएको छ । जाडो क्रमशः घटदै दैनिक तापक्रम जसरी वढदै छ,त्यसरी नै चुनावी माहौल पनि तातिदै गएको छ । मकवानपुरका दुवै क्षेत्रत्रका उम्मेदवारहरु घरदैलोमा व्यस्त छन ।
मकवानपुर क्षेत्र नम्बर १ का नेकपा एमालेका उम्मेदवार रामेश्वर राना मगर पनि घरदैलो अभियानमा सक्रिय रहदै आएका छन् । घरदैलोमा पुगेर उनले मतदातालाई आफूतिर आकर्षित प्रयत्न गर्दै आएका छन । साेही क्रममा शुक्रबार हेटौंडा उपमहानगरपालिका—१६ र १८ मा घरदैला र भेटघाट कार्यक्रममा गरेका थिए । उक्त कार्यक्रममा स्थानीयवासीको उपस्थिती राम्रो रहेको थियो । टोल–टोलमा पुग्दा मतदाताले रानालाई स्वागत गर्दै विकास, सुशासन र स्थायित्वप्रतिको अपेक्षा राखेका थिए ।
केही स्थानीयले विगतमा जिल्लास्तरमा उनले निर्वाह गरेको भूमिकालाई स्मरण गर्दै अनुभवी र शालीन नेतृत्वको आवश्यकता औंल्याएका थिए ।मतदातासँगको कुराकानीमा रानाले लोकतन्त्रको सुदृढीकरण, विकासको निरन्तरता र जनउत्तरदायी शासन आफनो प्राथमिकता रहेको बताए । पूर्व जिल्ला विकास समिति मकवानपुरका सभापति रहदै उनले दुर्गम क्षेत्रसम्म सडक सञ्जाल विस्तार, दीर्घकालीन विकास योजना निर्माण तथा संगठन सुदृढीकरणमा भूमिका खेलेको उनका समर्थकहरू बताउँछन् ।
२०६४ सालको संविधानसभा निर्वाचनपछि प्रत्यक्ष चुनावी प्रतिस्पर्धाबाट केही समय टाढा रहेका राना करिब १८ वर्षपछि पुनः प्रतिनिधिसभा निर्वाचनमा होमिएका हुन् । स्वच्छ छवि र संयमित स्वभावका कारण उनी स्थानीय राजनीतिमा फरक पहिचान बनाएका नेताका रुपमा चिनिन्छन् ।
मकवानपुर–१ अन्तर्गत हेटौंडा उपमहानगरपालिकाका १५ वटा वडा, बकैया, बागमती गाउँपालिका तथा मकवानपुरगढी गाउँपालिकाका ४ वडा गरी ४० वडा समेटिएकाे छ ।
यस निर्वाचन क्षेत्रमा १३ राजनीतिक दलका १३ तथा १० स्वतन्त्र गरी कूल २३ जना उम्मेदवार प्रतिस्पर्धामा छन् । तीमध्ये ५ जना महिला उम्मेदवार रहेका छन्, जसमा ३ जना विभिन्न दलका तर्फबाट चुनावी मैदानमा उत्रिएका छन् । निर्वाचन मिति नजिकिदै जाँदा मतदाताको सक्रियता र उम्मेदवारहरूको घरदैलो अभियानले हेटौंडाको चुनावी वातावरण अझै चहलपहलपूर्ण बन्दै गएको छ । परिणाम जे आए पनि यस क्षेत्रको प्रतिस्पर्धा रोचक हुने आकलन गरिएको छ ।