मकवानपुर । सुत्केरी हुँदा पोषिलो खानेकुराको अभावमा आमा र बच्चामा पर्ने स्वास्थ समस्यालाई मध्यनजर गरेरै सरकारले सुत्केरी पोषण कार्यक्रम सुरु गरेको छ ।
हरेक पालिकामा रहेको स्वास्थ सस्था मार्फत सुत्केरी पोषण कार्यक्रम कार्यान्वयन हुदै आएको छ। पालिका प्रमुख वा उपप्रमुख तथा वडा अध्यक्षले उक्त कार्यक्रमबाट प्राप्त पोषणयुक्त खानेकुरा बाडेर कार्यक्रमको प्रभावकारिता बढाइएको देखाउने समेत गरेको पाइन्छ ।
तर मकवानपुरको एक गाउँपालिकाका वडा अध्यक्षले भने आफ्नो व्यक्तिगत खर्चमा सुत्केरीलाई पौष्टिक खानेकुरा सहयोग गर्दै आएका छन् ।
सुत्केरी अवस्थामा पोषिलो खानेकुराको अभावमा आमा र बच्चामा कुपोषण तथा अन्य स्वास्थ्य समस्या आउने भन्दै बागमती गाउँपालिका वडा नं. ८ का अध्यक्ष इन्द्रमणी तिमल्सिनाले आफ्नै खर्चमा वडा भित्रका सुत्केरीलाई पौष्टिक आहार सहयोग गर्दै आएका छन् । उनले सुत्केरीलाई लोकल कुखुरा, तोरीको तेल, विभिन्न मसलाहरू र साबुन सहयोग गर्ने गरेको बताए ।
पछिल्लो समय अध्यक्ष तिमल्सिनाले वडा नम्बर ८ शान्तिपुरकी सुमिता घलानलाई पोसिलो खानेकुरा प्रदान गरे । हालसम्म वडा भित्रका ६ जना आमा (सुत्केरी)लाई अध्यक्षले आफ्नै खर्चमा पौष्टिक आहार सहयोग गरेको अध्यक्ष तिमल्सिना बताउँछन् ।
‘वडाभित्रका सुत्केरी महिलाहरूको पोषणमा सुधार ल्याउने उद्देश्यले आफ्नो व्यक्तिगत खर्चबाट पोषण सामग्री उपलब्ध गराएको छु’ अध्यक्ष तिमल्सिनाले भने २०८१ साल असार मसान्तसम्म वडाभित्रका सुत्केरी महिलाहरूलाई पोषण सामग्री सहयोग गर्नेछु ।’
वडावासीलाई समस्या परेको वेला केही राहत होस् भनेर आफूले पाउने तलबभत्ता र केही आफ्नो ब्यक्तिगत खर्च समेतबाट पोषण सामग्री वितरण गर्न सुरु गरेको उनले बताए । ‘आर्थिक अबस्था कमजोर भएका घर परिवारमा सुत्केरी अवस्थामा स्याहार सुसार गर्नु पर्ने जति गर्न सक्दैनन्’ उनले भने ‘पोषिलो खानेकुराको अभावमा बालबालिकाको भविष्य र आमाको स्वास्थ्य स्थितिमा समस्या आउन सक्ने भएकोले सहयोग गरेको हु ।’
आफूले गरेको सहयोगले केही राहत पुगेपनि बच्चा र आमा प्रति परिवारले गर्ने लगानीलाई अनावश्यक खर्च नभई लगानीको रूपमा लिनुपर्ने अध्यक्ष तिमल्सिनाले बताए ।
मकवानपुर । मकवानपुर प्रहरीले लागूऔषध ५ जनालाई नियन्त्रणमा लिएको छ । आइतबार बिहान र दिउँसोको समय हेटौंडा १५ रातोमाटेबाट उनीहरूलाई गाँजासहित नियन्त्रण लिइएको हो ।
आइतबार बिहान पूर्व–पश्चिम राजमार्गअन्तर्गत हेटौँडा–१५, रातोमाटेबाट ९ केजी ९ सय ८० ग्राम लागूऔषध गाँजासहित मकवानपुर मनहरी गाउँपालिका–८ का १९ वर्षीय दीपक मुक्तान, ५० वर्षीय बुद्धीमान मुक्तान र ४० वर्षीय मंगल सिं थोकरलाई नियन्त्रणमा लिइएको मकवानपुर प्रहरी प्रवक्ता डीएसपी लक्ष्मी भण्डारीले बताए ।
उनका अनुसार हेटौँडाबाट बीरगन्जतर्फ जाँदै गरेको ना ४ ख ५९२२ नम्बरको यात्रुवाहक बस जाँच गर्दा उक्त परिमाणको लागूऔषधसहित उनीहरूलाई नियन्त्रणमा लिइएको हो ।
यसैगरी आइतबार दिउँसो हेटौंडा –१५, रातोमाटेबाट १० केजी लागूऔषध गाँजासहित भारत बिहार राज्य मोतिहारी थानाआधापुर पोष्ट ग्राम औरया जमुनभार बस्ने २२ वर्षीय सदुला अन्सारी र भारत बिहार राज्य उत्तर प्रदेश जिल्ला प्रयागराज थानाफुलपुर पोष्टग्राम मिर्जापुर बस्ने २४ वर्षीय रजनिस सिंङलाई नियन्त्रणमा लिइएको भण्डारीले जानकारी दिए ।
चितवन तर्फबाट बिरगंजतर्फ जादै गरेको ना.६ ख.६७५४ नम्बरको बसलाई जाँच गर्दा बसमा सवार अन्सारी र सिङको साथबाट ५/५ केजी लागूऔषध सहित नियन्त्रणमा लिइएको हो ।
मकवानपुर । मकवानपुरको हेटौंडा उपमहानगरपालिकामा गोबर ग्याँसको ट्याङ्की भित्र चुरोट सल्काउन खोज्दा आगलागी भएको छ ।
आगलागीबाट हेटौंडा–६ हात्तिलेट बस्ने २६ वर्षीय समित राई घाइते भएको मकवानपुर प्रहरीले जनाएको छ । मकवानपुर प्रहरी प्रवक्ता, प्रहरी नायव उपरीक्षक लक्ष्मी भण्डारीका अनुसार आइतबार दिउँसो राई छिमेकीको गोबर ग्याँसको ट्याङ्की सफा गर्न ट्याङ्कीभित्र पसेका थिए ।
उनले गोबर ग्याँस ट्याङ्कीभित्र बसेर चुरोट सल्काउदा आगोलागी हुँदा शरिरको विभिन्न भाग जलेको भण्डारीले बताए ।
घाइते राइलाई उपचारको लागि हेटौंडा अस्पताल ल्याइएकोमा उपचार सम्भव नभएपछि थप उपचारको लागि काठमाडौंस्थित वीर अस्पतालमा रिफर गरिएको प्रहरी नायव उपरीक्षक भण्डारीले बताए ।
मकवानपुर । मकवानपुरको हेटौंडा उपमहानगरपालिकाको छुट्टाछुट्टै स्थानमा भएको सवारी दुर्घटनामा ६ जना घाइते भएका छन् । आइतबार हेटौंडा–८ र हेटौंडा–४ मा सवारी दुर्घटना हुँदा उनीहरु घाइते भएका हुन् ।
मकवानपुरका प्रहरी प्रवक्ता प्रहरी नायव उपरीक्षक लक्ष्मी भण्डारीले हेटौंडा उपमहानगरपालिका वडा नम्वर ८ स्थित कर्रा पुल नजिकै शनिबार दिउँसो सवारी दुर्घटना हुँदा ३ जना घाइते भएको जानकारी दिए ।
हेटौंडा १५ रातोमाटेबाट हेटौंडा बजारतर्फ आउँदै गरेको ना.४४ प.८९२० नम्वरको मोटरसाइकल र विपरित दिशातर्फ जाँदै गरेको ना १ ह ९३८९ नं.को अटो एकआपसमा ठोकिँदा मोटरसाइकल उच्छिटिएर हेटौंडाबाट रातोमाटेतर्फ जाँदै गरेको साईकल यात्री समेतलाई ठक्कर दिदा ३ जना घाइते भएको भण्डारीले बताए ।
घाइते हुनेहरुमा मोटरसाइकल चालक हेटौंडा–१ चौकीटोल बस्ने २२ वर्षीय महेश लामा, मोटरसाइकलमा सवार हेटौंडा–९ पशुपतिनगर बस्ने २६ वर्षीय गोबिन्द श्रेष्ठ र साईकल यात्री हेटौंडा–८ मैदाटोल बस्ने ७० वर्षीय तिलक बहादुर बुढाथोकी रहेका छन् ।
घाइतेमध्ये मोटरसाइकल चालक महेशको हेटौंडा अस्पतालमा उपचार सम्भव नभएपछि थप उपचारको लागि हेटौंडा कै सहकारी अस्पताल लगिएको भण्डारीले बताए । अन्य घाइतेहरुको भने हेटौंडा अस्पतालमा नै उपचार भइरहेको छ ।
प्रहरीले अटो चालक हेटौंडा–८, कमाने बस्ने ५० वर्षीय राममणि घिमिरेलाई नियन्त्रणमा लिई घटनाको बारेमा आवश्यक अनुसन्धान गरिरहेको जनाएको छ ।
यसैगरी, आजै दिउँसो हेटौंडा–८ गौरीचोकस्थित भएको सवारी दुर्घटनामा परेर ३ जना घाइते भएका छन् ।
कमानेबाट हेटौंडा बजारतर्फ आउँदै गरेको ना २१ प ९६४६ नम्वरको मोटरसाइकलले पैदलयात्रीलाई ठक्कर दिई दुर्घटना हुँदा ३ जना घाइते भएको मकवानपुर प्रहरी नायव उपरीक्षक भण्डारीले बताए ।
घाइते हुनेहरुमा पैदलयात्री सोही ठाउँ बस्ने १९ वर्षीया रेखा पुर्रकुटी, मोटरसाइकल चालक हेटौंडा–१७ हटिया बस्ने १८ वर्षीय हिमाल भुजेल र मोटरसाइकलमा सवार हेटौंडा–७ नागस्वति बस्ने २२ वर्षीया गोमा तिमल्सिना रहेका छन् ।
घाइते तीनै जनाको हेटौंडा अस्पतालमा उपचार भइरहेको छ ।
मकवानपुर । जेसीआई हेटौंडा लेडीको जेसीज सप्ताह, २०२३ सम्पन्न भएको छ । गत कात्तिक १५ गते बुधबारबाट सुरु भएको जेसीस सप्ताह विभिन्न कार्यक्रम गरी शनिबार समापन गरिएको हो ।
जेसीज सप्ताह अन्तर्गत ८ वटा कार्यक्रममा सहभागी तथा विजेता बनेकालाई पुरस्कार वितरण गरिएको थियो । समापन तथा पुरस्कार वितरण कार्यक्रम इन्दिरा बानियाँको संयोजकत्वमा भएको हो ।
हेटौंडा लेडी जेसीजले कार्तिक १५ देखि १८ गतेसम्म जेसीज सप्ताह आयोजना गरेको हो ।
जेसीज सप्ताह अन्तर्गत असोज १५ गते पहिलो दिन हेटौंडा १ स्थित ब्लड बैँकमा रक्तदान कार्यक्रम र दिउँसो १ बजे हेटौंडा क्याम्पसमा स्वर्गीय बुद्धरत्न शाक्य स्मृति खुल्ला वतृत्वकला प्रतियोगिता आयोजना गरेको थियो ।
त्यस्तै कात्तिक १६ गते बिहान हेटौंडा १ स्थित ओम बृद्धाश्रममा खाद्यान्न वितरण, दिउँसो बैठक सञ्चालन प्रणाली तालिम आयोजना गरेको हो ।

कार्तिक १७ गते विहान सितलमहल चोकमा स्लो स्कुटी प्रतियोगिता, दिउँसो श्री प्रावि मनहरी चकरीमा स्वर्गीय बाशु प्रसाद पौडेल स्मृतिमा शैक्षिक सामग्री हस्तान्तरण गरिएको सह–मुल कार्यक्रम संंयोजक नम्रता श्रेष्ठले जानकारी दिइन् ।
श्रेष्ठका अनुसार कार्तिक १८ गते विहान हेटौंडा ५ स्थित हाम्रो घर परोपकारी संस्थालाई सरसफाइ सामग्री हस्तान्तरण गरिएको थियो ।
जेसीज सप्ताह–२०२३ अन्तर्गत आयोजित स्व. बुद्धरत्न शाक्य स्मृति वक्तृत्वकला प्रतियोगितामा सुनिल न्यौपाने प्रथम भएका थिए।
देशको आर्थिक सुधारमा युवाको भूमिका” विषयक् वक्तृत्वकला प्रतियोगितामा कृतिका लौँडारी द्वितीय हुँदा उचित बजगाई तृतीय भएका थिए ।
खुल्ला वतृत्वकला प्रतियोगितामा प्रथम, द्वितीय र तृतीय हुनेलाई क्रमशः नगद ५ हजार, ३ हजार र २ हजारसहित प्रमाणपत्र प्रदान गरिएको थियो ।
त्यस्तै स्लो स्कुटी रेसमा विजयी हुनेलाई हेलमेट पुरस्कारस्वरुप प्रदान गरिएको थियो । स्लो स्कुटी प्रतियोगितामा बबी थापा भएकी थिइन् । सोविता केसी द्वितीय र सिर्जना लामिछाने तृतीय भएकी हुन् । समापन कार्यक्रममा सहयोगीलाई मायाको चिनो प्रदान गरिएको थियो ।
समापन कार्यक्रम हेटौंडा लेडी जेसीज वर्ष–२०२३ का अध्यक्ष डिलमाया घर्तीको सभाध्यक्षता तथा बागमती प्रदेशका पूर्व मुख्यमन्त्री डोरमणि पौडेलको प्रमुख आतिथ्यतामा भएको हो ।
जेसीज सप्ताह समापन कार्यक्रममा बागमती प्रदेश सभा सदस्य एकलाल श्रेष्ठ र प्रेमबहादुर पुलामी (छिन्तु), हेटौंडा उपमहानगरपालिकाव १५ नम्बर वडाध्यक्ष सुनिल मोक्तान, ८ नम्बर वडा वडाध्यक्ष राम थापा, ४ नम्बर वडा वडाध्यक्ष नवीन सिग्देल, जेसीज सप्ताह मुल संयोजक अस्मिता न्यौपाने, हेटौंडा जेसीज अध्यक्ष श्रवणकुमार बर्तौला, लेडी जसीज पुर्व अध्यक्ष शुसिला पौडेललगायतको सहभागिता रहेको थियो ।