मकवानपुर । झरना साहित्यिक परिवारले दाेस्राे बकैया साहित्य महोत्सवमा विभिन्न क्षेत्रमा योगदान पुर्याएका साहित्यकार, पत्रकारलाई सम्मान गर्ने भएको छ । गतवर्षबाट सुरु गरेको महोत्सवलाई निरन्तरता दिन यस बर्ष पनि आयोजना गरी विभिन्न क्षेत्रमा योगदान पुर्याएकाहरुलाई सम्मान गर्ने कार्यक्रम रहेको झरनाका अध्यक्ष दीपक गौतमले जानकारी दिए ।
बकैया गाउँपालिका–५ श्रीपुरमा रहेको प्रभात माविमा फागुन १४ र १५ गते महोत्सवको आयोजना गर्न लागिएको अध्यक्ष गौतमले बताए । महोत्सवमा पहिलो दिन फागुन १४ गते शुक्रबार नवसर्जक (बालबालिका विशेष) रचना वाचन, पुरस्कार वितरण एवम् बहसमूलक कार्यक्रम रहेको छ । दोस्रो दिन फागुन १५ गते शनिबार स्रष्टा सम्मान, स्थानीय सांस्कृतिक नृत्य, जग्गा दाताहरूलाई सम्मानसँगै साहित्यिक रचना वाचन तथा गायन कार्यक्रम रहेको गौतमले जानकारी दिए ।
साहित्यिक महाेत्सवमा यसवर्ष होमनाथ–टीकामाया प्रतिभा सम्मान–२०७७ सुनसरीका अग्रज साहित्यकार प्रा.डा. भीम खतिवडालाई प्रदान गरिने छ । १५ हजार ५ सय ५५ रुपैयाँ नगद राशी रहेको पुरस्कारका संस्थापक नुरप्रसाद गौतम हुन् रहेका अध्यक्ष गाौतमले जानकारी दिए ।
यस्तै, बाबुलाल–भोजमाया प्रतिभा सम्मान–२०७७ मकवानपुरे अग्रज कवि आर.आर. चौलागाईँ प्रदान गरिने भएको छ । ११ हजार १ सय ११ रुपैयाँ राशीको यस पुरस्कारका संस्थापक विनोद सुवेदी रहेका छन् । शिव–सावित्री अधिकारी स्मृति मुक्तक सम्मान– २०७७ अग्रज मुक्तककार ज्ञानुवाकर पौडेललाई प्रदान गरिने झरनाका सचिव मसान उपासकले जानकारी दिए । काठमाडौँ निवासी पौडेललाई प्रदान गर्न लागिएको ११ हजार १ सय ११ राशीको पुरस्कारका संस्थापक रमेशमोहन अधिकारी हुन् ।
यसैगरी, खडानन्द–मनमाया स्मृति प्रतिभा सम्मान–२०७७ नुवाकोटकी युवा साहित्यकार सुमित्रा सुमीलाई प्रदान गरिने छ । अर्पण र दर्पण पराजुलीले स्थापना गरेको उक्त पुरस्कारको राशी ५ हजार ५ सय ५५ रुपैया रहेको छ । सुशीला दङ्गाल स्मृति सिर्जनशील नारी सम्मान–२०७७ मकवानपुरे साहित्यकार रुकु कार्की प्रदान गरिने भएको छ । राजन दङ्गालले स्थापना गरेको उक्त पुरस्कारको राशी पनि ५ हजार ५ सय ५५ रुपैया रहेको छ ।
यस्तै, सञ्जीवनी बुटी साहित्य सेवा सम्मान–२०७७ मकवापुर बकैयाका मनहरी लामिछानेलाई प्रदान गरिने सचिव उपासकले बताए । ५ हजार ५ सय ५५ रुपैया राशीको उक्त पुरस्कारका संस्थापक तुलसी गिरी रहेका सस्थाले जनाएकाे छ .
झरना–बकैया पत्रकारिता पुरस्कार–२०७७ बाट रौतहटका खेम बोलखेलाई प्रदान गरिनेछ । पुरस्कार संस्थापक रहेको बकैया गाउँपालिका रहेको उक्त पुरस्कारको राशी ५ हजार ५ सय ५५ रुपैया रहेको छ । यसैगरी, झरना–बकैया नवप्रतिभा पुरस्कार–२०७७ बाट बकैयाका दीपशिखा घिमिरेलाई प्रदान गरिने छ । पुरस्कार संस्थापक चन्द्रकुमार राई रहेको उक्त पुरस्कारको राशी २ हजार ५ सय ५ रुपैया रहेको झरनाले जनाएको छ ।
झरना २०५० सालमा साविक छतिवन गाविस (हाल बकैया गाउँपालिका) मा स्थापित भई हालसम्म क्रियाशील मकवानपुरको अग्रणी साहित्यिक संस्था हो । यसले मासिक साहित्य शृङ्खला सञ्चालन, ‘झरना’ नामक अर्धवार्षिक पत्रिका प्रकाशन, प्रकाशन कोषमार्फत् साहित्यिक कृतिहरू प्रकाशन लगायत विविध साहित्यको क्षेत्रमा विविध गतिविधिहरू गरिरहेको छ ।
स्थापना कालदेखि नै साहित्यिक कार्यक्रमहरू गर्ने र विद्यालय तहमा अध्ययनरत विद्यार्थीहरूलाई साहित्यमा लाग्न प्रेरित गर्ने अभियानहरू सञ्चालन गर्दै आएको छ । अहिले सिर्जनशील नयाँ पुस्ता निर्माण अभियान अन्तर्गत पछिल्ला ६ वर्षमा झरनाले ५० भन्दा बढी विद्यालय र कलेजहहरूमा पुगेर १ दिने काव्य प्रशिक्षण सञ्चालन गर्दै बाल साहित्य समितिहरू गठन गरिसकेको छ । नवसर्जकहरूमा लेखन र पठन संस्कृतिको विकासमा नेतृत्वदायी भूमिका निर्वाह गर्दै आएको अध्यक्ष गाैतमले जानकारी दिए ।
यसैबीचमा झरना साहित्यिक परिवार मकवानपुरले बकैया–५ मा आफ्नै भवन तथा पुस्कालय सञ्चालन प्रयोजनार्थ २ कठ्ठा जग्गासमेत गाउँपालिका कार्यालयबाट प्राप्त गरेको छ ।
मकवानपुर । मकवानपुर उद्योग वाणिज्य संघको ५४ औं वार्षिक सभा तथा निर्वाचन कार्यक्रम आगामी चैत्र २१ बाट हेने भएकाे छ । संघकाे वार्षिक सभा तथा निर्वाचन आउँदाे चैत्र २१ देखि २३ गते हुने भएको हाे ।
चैत्र २१ गते उद्घाटन सत्र हुनेछ भने चैत्र २२ गते उम्मेदवारी दर्ता, मतदाता तथा उम्मेदवार नामावली प्रकाशन लगायतका कार्य हुने मकवानपुर उद्याेग वाणिज्य संघले जनाएकाे छ ।त्यसैगरी २३ गते मतदान कार्यक्रम हुनेछ । मतदान कार्यक्रम सम्पन्न भएलगत्तै मतगणना हुनेछ । अन्तिम मत परिणाम घोषणा भएको ३ दिन भित्र पद हस्तान्तरण तथा सपथ ग्रहण गर्ने संघको प्रचलन रहेकाे बताइएकाे छ
मकवानपुर । हेटाैडामा विगत ११ वर्षदखि सञ्चालनमा रहेकाे रेडियो मकवानपुर र हेटौंडा-२ मा रहेको दिव्यतारा बहुद्देश्यीय सहकारी संस्थाले आज शुक्रबारबाट सप्ताहव्यापी कार्यक्रम गर्ने भएको छ । सहकारीको २३ औं स्थापना दिवस तथा सहकारी सस्थाद्वारा सञ्चालित रेडियोको ११ औं बार्षिकोत्सवको अवसरमा शुक्रबारदेखि सप्ताहव्यपी कार्यक्रम गर्न लागिएको हो ।
शुक्रबार शहीद दिवसको सन्दर्भमा ‘शहीद’ शीर्षकमा माध्यामिक तहमा अध्ययनरत विद्यार्थीबीच कविता प्रतियोगिता हुनेछ । प्रतियोगितामा प्रथम, द्वितीय, तृतीय र सान्त्वना हुनेलाई क्रमशः नगद ७ हजार, ५ हजार, ३ हजार र २/२ हजार पुरस्कारको व्यवस्था गरिएकाे रेडियाेका स्टेसन म्यानेजर गणेश दर्पण अधिकारीले जानकारी दिएकाे छ ।
शनिबार राक्सिराङको सरिखेत पलाँसेमा सञ्चो हस्पिटलको प्राविधिक सहयोग एवम् राक्सिराङ गाउँपालिकाको समन्वयमा निशुल्क स्वास्थ्य शिविर, १८ गते मामाघर नेपाललाई खाद्यान्न सहयोगको कार्यक्रम रहेको रेडियो मकवानपुरका सञ्चालक समितिका अध्यक्ष आनन्दराम पराजुलीले जानकारी दिए ।
१९ गते एकल महिला, दलित वा विपन्न परिवारको दुईघरलाई खरको छानामुक्त गर्न जस्तापाता खरिद्का लागि जनही २५ हजार रुपैयाँ सहयोग हस्तान्तरण कार्यक्रम, २० र २१ गते रेडियो मकवानपुर कप दोस्रो मिडिया कप फुटसल प्रतियोगिता र २२ गते समापन तथा पुरस्कार वितरण कार्यक्रम हुने पराजुलीले बताए । समापन कार्यक्रममा समाजमा उत्कृष्ट कार्य गरी योगदान पु–याएका दुईजनालाई नगदसहित सामुदायिक सम्मान, रेडियोका एक उत्कृष्ट कर्मचारीलाई सम्मान, रेडियो मकवानपुरका पूर्व स्टेशन म्यानेजरहरुलाई सम्मान तथा दिव्यतारा सहकारीका संस्थापक शेयर सदस्यहरुलाई सम्मान गरिने अध्यक्ष पराजुलीले बताए ।
सहकारीले गरिरहेका सामाजिक क्रियाकलाप जानकारी गराउँदै सहकारीका अध्यक्ष महालक्ष्मी उपाध्याय डीनाले सहकारीले दुईवटा उद्योग सञ्चालनको तयारी गरिरहेको साथै महिलाका लागि सहुलियत कर्जा प्रदान गर्दै आएको जानकारी दिइन् ।
मकवानपुर । मकवानपुर प्रहरीले फरक मुद्दाका २ जना फरार प्रतिवादी पक्राउ गरेकाे छ । यौन दुरुपयोग मुद्धामा २ महिना ४ दिन कैद भुक्तान गर्न बाँकी रहेका प्रतिवादी भिमफेदी गाँउपालिका वडा नं. ४ का ३२ बर्षीय नविन स्याङतान र ज्यान मुद्धामा २ हजार जरीवाना भुक्तान गर्न बाँकी रहेका प्रतिवादी मनहरी गाँउपालिका वडा नं. ४ का ४० बर्षीय लालचन्द्र प्रजालाई माघ १४ गते पक्राउ गरिएकाे जिल्ला प्रहरी कार्यालयका प्रवक्ता इन्द्र बहादुर रानाले जानकारी दिए ।
२०७६ भदाै २२ गतेको फैसलाले यौनयौन दुरुपयोग मुद्धाका फरार प्रतिवादी स्याङतानलाइ बाँकी कैद भुक्तानको लागि मकवानपुर जिल्ला अदालतमा उपस्थित गराई कारागार कार्यालय भिमफेदी पठाउने कार्य भईरहेको रानाले बताए । यस्तै २०६८ कार्तिक ६ गतेको फैसलाले सवारी ज्यान मुद्धाका फरार प्रतिवादी प्रजालाई पक्राउ गरी जरिवाना भुक्तानको लागि सम्मानित जिल्ला अदालत मकवानपुरमा उपस्थित गराईएको उनले बताए ।
मकवानपुर । मकवानपुर प्रहरीले कैलाश गाउँपालिकामा २० विगाहामा लगाइएकाे गाँजा खेती फडानी गरेकाे छ । जिल्ला प्रहरी कार्यालय मकवानपुरका प्रहरी नायव उपरीक्षक इन्द्र बहादुर रानाको कमाण्डमा खटिएकाे संयुक्त प्रहरी टाेलीले उक्त परिणामकाे गाँजा फडानी गरी नष्ट गरेकाे हाे ।

बागमती प्रदेश प्रहरी कार्यालय, जिल्ला प्रहरी कार्यालय, प्रहरी गण रातोमाटे र दंगा नियन्त्रण प्रहरी गणबाट खटिएको ७० जनाको संयुक्त प्रहरी टोलिले माघ ८ गते कैलाशकाे वडा नं. ३ र ८ को कोथलिटार, फास्टार, कुनिले लगायतका विभिन्न स्थानहरुमा गरी कुल २० (बिस) विगाहा लागु औषध गाँजा खेति फडानी गरी नष्ट गरिएको जिल्ला प्रहरी कार्यालयले जानकारी दिएकाे छ।