मकवानपुर । हातेमालाे बचत तथा ऋण सहकारी संस्था लिमिटेडकाे शेयरपुँजी ६ करोड ३६ हजार १३ हजार ३ सय पुगेकाे छ । २ हजार ७२२ जना सदस्य आवद्ध रहेकाे सहकारीमा २०८१ काे बैशाख मसान्तसम्ममा ५० करोड २४ लाख ६३ हजार ९०२ रुपैयाँ बचत निक्षेप रहेको छ ।
संस्थाले सदस्यहरुलाई ५२ करोड ३४ लाख २७ हजार २६८ रुपैयाँ कर्जा लगानी गरेको सहकारीकाे व्यवस्थापक रमला सापकोटाले बताईन् । सहकारीले १८ औँ स्थापना दिवसको अवसरमा एक सातादेखि विविध कार्यक्रम गर्दै आएकाे छ । यसै अन्तरगत मंगलबार पत्रकारहरुसँग सहकारी कार्यक्रममा यस्ताे जानकारी सार्वजनिक गरिएकाे हाे ।
देशमा सहकारीभित्र हुने अपचलनकाे सवाल चरम भइरहेकाे बेला मकवानपुरकाे हेटाैडा २ मा रहेकाे हालेमालाे सहकारीले नियमित अपनाउँदै आएकाे पारदर्शीताले सहकारीलाई प्रगतीतर्फ डाेर्याएकाे सहकारीका सचिव सिताराम दाहालले बताए ।
सहकारीले सदस्यको सुझाव एवं गुनासो सम्बोधन सहितको सदस्य सेवा, संस्थामा सुचना पाटीको व्यावस्थापन, सदस्य गुनासो पुस्तिका सहित सुझावको व्यवस्था, मोबाईल बैकिङ कारोबारबाट सदस्यलाई नियमित सुचना दिईएको निशुल्क एनएमएस अलर्ट कारोबार बारे जानकारी गराउने गरेकाे छ । यसैगरी फेसबुक मार्फत सुचना तथा गतिविधिको जानकारी, वार्षिक प्रतिवेदन, भित्तेपात्री निशुल्क वितरण,मासिक विवरण फेसबुक, संस्थाको सुचना पाटीमा सार्वजनिक गर्ने गरिएको व्यवस्थापक सापकाेटाले बताइन् ।
सहकारीमा जोखिम, द्धन्द तथा विपद व्यवस्थापन सयंन्त्रको निर्माण, कारोबार डाटा क्लाउडमा व्यवस्थापन, ऋणका फाईलहरु स्क्यान कपी सुरक्षित, साकोसको भौतिक संरचना, उपकरण तथा काउन्टरको विमा,कार्यालयमा सि.सि. क्यामेरा व्यवस्था, कार्यालयमा अग्नि नियन्त्रण यन्त्र व्यवस्था, सम्पत्ति शुद्धिकरण कार्यविधि बनाई लागु गरिएको उपाध्यक्ष केशव धितालले बताए ।
कार्यक्रममा प्रदेश सहकारी विकास बाेर्डका कार्यकारी उपाध्यक्ष नारायणप्रसाद देवकोटाले सहकारीले समय सापेक्ष कार्यक्रम र योजनाहरू ल्याउदा लाभदायक हुने बताए ।
मंगलबार भएकाे कार्यक्रममा हेटाैडा २ का वडाध्यक्ष विष्णुगोपाल महर्जन, हेटौंडा उपमहानगरपालिकाका सहकारी शाखा प्रमुख हिमप्रसाद पौडेल, नेफ्स्कुन फिल्ड कार्यालय मकवानपुरका प्रमुख विदुर खड्का, संस्थाका कानुनी सल्लाहकार अरुण खतिवडा, लेखा समिति संयोजक नारायणप्रसाद रेग्मी, प्रशिक्षक यमकुमारी श्रेष्ठलगायतको उपस्थिति रहेकाे थियो ।

कार्यक्रममा साताव्यापि कार्यक्रमका सहभागीहरुलाई प्रमाणपत्र पनि वितरण गरिएकाे थियाे । सहकारीले साताव्यापि कार्यक्रम अन्तरगत सेल्फ मेकअप तालिम,साँचो जीवन निर्माण अभियान कार्यक्रम,भान्छा सुधार अभियान तथा स्वस्थ रहने वैज्ञानिक सिद्धान्त, सञ्चालक समिति, उप समिति, कर्मचारी, संस्थापक तथा पूर्व सञ्चालक समिक्षा बैठक, असल बचतकर्ता र ऋणी सदस्यहरूसँग अन्तरक्रिया, सम्मान कार्यक्रम, रक्तदान तथा स्वास्थ्य परीक्षण कार्यक्रम, संस्कृत वेद विद्यालयलाई सहयोग हस्तान्तरणलगायतकाे कार्यक्रम गरेकाे अध्यक्ष हरि पौडेलले बताए ।
सुनसरी । सुनसरी जिल्लाकाे दुहवी नगरपालिका वडा नम्बर ९ छाताबेलीका ११ घरपरिवार आगलागीबाट पीडित परिवारलाई राहत वितरण गरिएको छ ।
महिला, बालबालिका तथा ज्येष्ठ नागरिक मन्त्री भगबती चौधरीले आगलागीबाट पीडित परिवारको घरमै पुगेर राहत हस्तान्तरण गरेकी हुन् । त्यसैगरी इटहरी नगरपालिका वडा नं ७ रामजानकी टोल सिसौना निवासी आगलागी पिडित इन्द्रकुमार खड्काको घरमै पुगेर मन्त्री चौधरीले राहत सामग्री वितरण गरेकी छिन् ।
छाताबेलीका ११ घरपरिवार आगलागीबाट पीडितलाई प्रति परिवार २५ किलो चामल, ५ किलो दाल, ३ किलो नुन, २ सेट ब्ल्याङ्केट, १ सेट स्ट्याण्ड फ्यान, स्टेशनरी र पेश १ सेट, १ बण्डल जस्ता पाता, १ सेट डिग्निटी किट, १ सेट झुल, किचनका सामग्री र सडना सेट वितरण गरिएको थियाे । महिला, बालबालिका तथा ज्येष्ठ नागरिक मन्त्रालय, समाज कल्याण परिषद्ले स्वास्थ्य पोषण शिक्षा तथा कृषि अनुसन्धान विकास केन्द्र, दिनेश चौधरी स्मृति प्रतिष्ठान र लेटर डे सेन्ट च्यारिटिजसँगको समन्वयमा उक्त राहत हस्तान्तरण गरिएको हो ।
यसैगरी आगलागी पिडित खड्काको परिवारलाई सहयोग स्वरूप १२ वटा सिमेन्टको पिलर, १० बोरा सिमेन्ट, ३ ट्याक्टर बालुवा/गिट्टी लगायतका सामग्री सहयोग गरिएको हो । इटहरी ७ का वडा सदस्य दिपक घिमिरेले सहयोग ब्यावस्थापन गरेका हुन् । मन्त्री चौधरीका साथै मन्त्रालयका सचिव दिनेश भट्टराई समेतको सहभागितामा सहयाेग हस्तान्तरण गरिएकाे हाे ।
गत वैशाख २१ गते दिउँसो घरमा कोही नभएकाै समयमा विद्युत सर्ट भएर खड्काको घरमा आगलागी हुँदा करिब ११ लाख रुपैयाँ बराबरको क्षती भएको थियो ।
मकवानपुर । डेढवर्षपछि गठित बागमती प्रदेश संसदीय समितिले पुर्णता पाएको । समितिका निर्वाचित ६ जना सभापतिले पद तथा गोपनीयताको शपथ ग्रहण गरेका हुन् । प्रदेशसभा सचिवालयमा आज विषयगत समितिकासभापतिले पद तथा गोपनीयताको शपथ ग्रहण गरेका हुन् ।
उनीहरूलाई प्रदेशसभाका सभामुख भुवनकुमार पाठकले शपथ गराएका हुन् । प्रदेशसभाको प्रदेश मामिला समितिका सभापति छिरिङदोर्जे लामा, सार्वजनिक लेखा समितिका सभापति श्रीराम लामिछाने, शिक्षा स्वास्थ्य तथा कृषि समिति सभापति ठाकुरप्रसाद ढकाल, उद्योग पर्यटन तथा वातावरण समितिका सभापति आनन्दकुमार श्रेष्ठ, अर्थ तथा विकास समितिको सभापतिमा नुरज बज्राचार्य र विशेषाधिकार समितिका सभापति मायादेवी शर्माले शपथ लिएका हुन् ।
उद्योग पर्यटन तथा वातावरण समिति सभापति श्रेष्ठ एमाले सांसद हुन् । यसैगरी अर्थ तथा विकास समिति सभापति बज्राचार्य राप्रपा, विशेषाधिकार समितिको सभापति शर्मा एकीकृत समाजवादी, प्रदेश मामिला समिति सभापति लामा र सार्वजनिक लेखा समिति सभापति लामिछाने कांग्रेसबाट प्रदेशसभा सदस्य हुन् । शिक्षा स्वास्थ्य तथा कृषि समिति सभापति ढकाल माओवादी केन्द्रको सांसद हुन् ।
मकवानपुर । आज सोमबार देशका बागमती, कोशी, मधेश, गण्डकी र कर्णाली प्रदेश लगायत देशका पहाडी भूभागमा आंशिकदेखि साधारणतया बदली रही बाँकी भूभागमा आंशिक बदली रहने छ।
सोमबार राति कोशी, मधेश, बागमती, गण्डकी, लुम्बिनी प्रदेश लगायत देशका पहाडी भूभागमा आंशिकदेखि साधारणतया बदली रही बाँकी भूभागमा मौसम मुख्यतया सफा रहने महाशाखाले जनाएको छ। कोशी, मधेश, बागमती र गण्डकी प्रदेशको केही स्थानहरूमा साथै लुम्बिनी प्रदेशका पुर्वी भूभागका थोरै स्थानहरूमा मेघगर्जन/चट्याङ/हावा हुरीसहित हल्कादेखि मध्यम वर्षाको सम्भावना रहेको छ।
मकवानपुर । जिल्ला प्रहरी कार्यालय मकवानपुरले चोरीको ५ वटा माेटरसाइकल र मास्टर साँचाे सहित ६ जनालाई नियन्त्रणमा लिएकाे छ । विभिन्न मितिमा चोरी भएका मोटरसाइकलहरुको खोजतलास गर्ने एवं चोरी नियन्त्रण गर्ने क्रममा नियन्त्रणमा लिएका व्यत्तिहरुलाई प्रहरीले आइतबार सार्वजनिक गरेकाे हाे ।
२ जेठमा मकवानपुरकाे हेटाैडा उपमहानगरपािलका १६ बाट वडा १५ बस्ने बर्ष २० को मिलन पाख्रिन, वडा १६ बस्ने बर्ष ३० को रत्न बहादुर गोलेलाई बा.प्र.०२-०३ प २१९६ नं. को माेटरसाइकल सहित नियन्त्रणमा लिएकाे हाे ।
उक्त नम्वर प्लेट राखेको मोटरसाइकल चाेरीकाे भएकाेले प्रहरीले नियन्त्रणमा लिएकाे थियाे । उक्त मोटरसाइकल मकवानपुर जिल्ला बकैया गांउपालिका वडा नं. ८ बस्ने बर्ष १९ को संजिव भोलनले बिक्री गरेको थियाे । प्रहरीले संजिव भोलनलाई साेधपुछ गर्ने क्रममा भोलनको साथबाट पनि चाेरीकै माेटरसाइकल फेला पारेकाे थियाे । संजिवकाे साथबाट बागमती प्रदेश ०२-०४१ प ३९०८ नं. प्लेट भएको २२० सि.सि.को चोरीको मोटरसाइकल फेला पारीएकाे प्रहरीले जनाएकाे छ ।
अनुसन्धान गर्ने क्रममा मोटरसाइकलहरु मकवानपुर बकैया गांउपालिका वडा नं. ८ बस्ने बर्ष ३३ को रमेश लोप्चन र ईन्द्रसरोबर गांउपालिका वडा नं. ५ बस्ने बर्ष २९ को सुवाश बोम्जनले दिएको भनिएकाे थियाे ।
साथै संजिव भोलनको साथबाट फेला परेको मोटरसाइकलको सम्पुर्ण पार्टपुर्जाहरु हेटाैडा १९ बस्ने अशोक स्याङतानलाई बिक्रि गरेको पाइएकाे थियाे । प्रहरीले अशोक स्याङतानले प्रयोग गर्ने ना २० प ७७६८ नं. को मोटरसाइकलमा उक्त पार्टपुर्जाहरु राखि स्वरुप परिवर्तन गरेको भन्ने जानकारी पाएकाे थियाे ।
मिलन पाख्रिन, रत्न बहादुर गोले, संजिव भोलन,रमेश लोप्चन र अशोक स्याङतान समेतलाई पक्राउ गरी चोरी मुद्धामा जिल्ला अदालत मकवानपुरबाट ८ दिनको म्याद अनुमति लिई अनुसन्धान जारी राखेकाे छ । प्रहरीले अन्य चोरी भई आएका बा.प्र.०२-०३८ प ७५८१ नं.को NS र बा.प्र.०२-०३३ प ६०२० नं.Duke मोटरसाइकल समेत कार्यालयमा ल्याई अनुसन्धान कार्य भइरहेकाे डिएसपी लक्ष्मी भण्डारीले बताए ।